| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၆. မဟာကစ္စာနသုတ္တဝဏ္ဏနာ
6. Mahākaccānasuttavaṇṇanā
၂၆. ဆဋ္ဌေ သမ္ဗာဓေတိ ပဉ္စကာမဂုဏသမ္ဗာဓေ။ ဩကာသာဓိဂမောတိ ဧတ္ထ ဩကာသာ ဝုစ္စန္တိ ဆ အနုသ္သတိဋ္ဌာနာနိ, တေသံ အဓိဂမော။ ဝိသုဒ္ဓိယာတိ ဝိသုဇ္ဈနတ္ထာယ။ သောကပရိဒေဝာနံ သမတိက္ကမာယာတိ သောကာနဉ္စ ပရိဒေဝာနဉ္စ သမတိက္ကမတ္ထာယ။ အတ္ထင္ဂမာယာတိ အတ္ထံ ဂမနတ္ထာယ ။ ဉာယသ္သ အဓိဂမာယာတိ သဟဝိပသ္သနကသ္သ မဂ္ဂသ္သ အဓိဂမနတ္ထာယ။ နိဗ္ဗာနသ္သ သစ္ဆိကိရိယာယာတိ အပစ္စယပရိနိဗ္ဗာနသ္သ ပစ္စက္ခကိရိယတ္ထာယ။
26. Chaṭṭhe sambādheti pañcakāmaguṇasambādhe. Okāsādhigamoti ettha okāsā vuccanti cha anussatiṭṭhānāni, tesaṃ adhigamo. Visuddhiyāti visujjhanatthāya. Sokaparidevānaṃ samatikkamāyāti sokānañca paridevānañca samatikkamatthāya. Atthaṅgamāyāti atthaṃ gamanatthāya . Ñāyassa adhigamāyāti sahavipassanakassa maggassa adhigamanatthāya. Nibbānassa sacchikiriyāyāti apaccayaparinibbānassa paccakkhakiriyatthāya.
သဗ္ဗသောတိ သဗ္ဗာကာရေန။ အာကာသသမေနာတိ အလဂ္ဂနဋ္ဌေန စေဝ အပလိဗုဒ္ဓဋ္ဌေန စ အာကာသသဒိသေန။ ဝိပုလေနာတိ န ပရိတ္တကေန။ မဟဂ္ဂတေနာတိ မဟန္တဘာဝံ ဂတေန, မဟန္တေဟိ ဝာ အရိယသာဝကေဟိ ဂတေန, ပဋိပန္နေနာတိ အတ္ထော။ အပ္ပမာဏေနာတိ ဖရဏအပ္ပမာဏတာယ အပ္ပမာဏေန။ အဝေရေနာတိ အကုသလဝေရပုဂ္ဂလဝေရရဟိတေန။ အဗ္ယာပဇ္ဈေနာတိ ကောဓဒုက္ခဝဇ္ဇိတေန။ သဗ္ဗမေတံ ဗုဒ္ဓာနုသ္သတိစိတ္တမေဝ သန္ဓာယ ဝုတ္တံ။ ပရတောပိ ဧသေဝ နယော။ ဝိသုဒ္ဓိဓမ္မာတိ ဝိသုဇ္ဈနသဘာဝာ။ ဣမသ္မိမ္ပိ သုတ္တေ ဆ အနုသ္သတိဋ္ဌာနာနိ မိသ္သကာနေဝ ကထိတာနီတိ။
Sabbasoti sabbākārena. Ākāsasamenāti alagganaṭṭhena ceva apalibuddhaṭṭhena ca ākāsasadisena. Vipulenāti na parittakena. Mahaggatenāti mahantabhāvaṃ gatena, mahantehi vā ariyasāvakehi gatena, paṭipannenāti attho. Appamāṇenāti pharaṇaappamāṇatāya appamāṇena. Averenāti akusalaverapuggalaverarahitena. Abyāpajjhenāti kodhadukkhavajjitena. Sabbametaṃ buddhānussaticittameva sandhāya vuttaṃ. Paratopi eseva nayo. Visuddhidhammāti visujjhanasabhāvā. Imasmimpi sutte cha anussatiṭṭhānāni missakāneva kathitānīti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၆. မဟာကစ္စာနသုတ္တံ • 6. Mahākaccānasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆. မဟာကစ္စာနသုတ္တဝဏ္ဏနာ • 6. Mahākaccānasuttavaṇṇanā
