| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༦. མཧཱཀཙྩཱནསུཏྟཝཎྞནཱ
6. Mahākaccānasuttavaṇṇanā
༢༦. ཚཊྛེ སམྦཱདྷེཏི ཝཱ ཏཎྷཱསཾཀིལེསཱདཱིནཾ སམྤཱིལེ༹ སངྐརེ གྷརཱཝཱསེ། ཨོཀཱསཱ ཝུཙྩནྟཱིཏི མགྒཕལསུཁཱདྷིགམཱཡ ཨོཀཱསབྷཱཝཏོ ཨོཀཱསཱཏི ཝུཙྩནྟི། ཨོཀཱསཱདྷིགམོཏི ལོཀུཏྟརདྷམྨསྶ ཨདྷིགམཱཡ ཨདྷིགནྟབྦཨོཀཱསོ། ཝིསུཛ྄ཛྷནཏྠཱཡཱཏི རཱགཱདཱིཧི མལེཧི ཨབྷིཛ྄ཛྷཱཝིསམལོབྷཱདཱིཧི ཙ ཨུཔཀྐིལིཊྛཙིཏྟཱནཾ ཝིསུདྡྷཏྠཱཡ། སཱ པནཱཡཾ ཙིཏྟསྶ ཝིསུདྡྷི སིཛ྄ཛྷམཱནཱ ཡསྨཱ སོཀཱདཱིནཾ ཨནུཔཱདཱཡ སཾཝཏྟཏི, ཏསྨཱ ཝུཏྟཾ ‘‘སོཀཔརིདེཝཱནཾ སམཏིཀྐམཱཡཱ’’ཏིཨཱདི། ཏཏྠ སོཙནཾ ཉཱཏིབྱསནཱདིནིམིཏྟཾ ཙེཏསོ སནྟཱཔོ ཨནྟོཏཱཔོ ཨནྟོནིཛ྄ཛྷཱནཾ སོཀོ, ཉཱཏིབྱསནཱདིནིམིཏྟམེཝ སོཙིཀཏཱ། ‘‘ཀཧཾ ཨེཀཔུཏྟཀཱ’’ཏིཨཱདིནཱ (མ॰ ནི॰ ༢.༣༥༣-༣༥༤; སཾ॰ ནི॰ ༢.༦༣) པརིདེཝནཝསེན ལཔནཾ པརིདེཝོ། སམཏིཀྐམནཏྠཱཡཱཏི པཧཱནཱཡ། ཨཱཡཏིཾ ཨནུཔྤཛྫནཉྷི ཨིདྷ སམཏིཀྐམོ། དུཀྑདོམནསྶཱནཾ ཨཏྠངྒམཱཡཱཏི ཀཱཡིཀདུཀྑསྶ ཙ ཙེཏསིཀདོམནསྶསྶ ཙཱཏི ཨིམེསཾ དྭིནྣཾ ཨཏྠངྒམཱཡ, ནིརོདྷཱཡཱཏི ཨཏྠོ། ཉཱཡཏི ནིཙྪཡེན ཀམཏི ནིབྦཱནཾ, ཏཾ ཝཱ ཉཱཡཏི པཊིཝིཛ྄ཛྷཏི ཨེཏེནཱཏི ཉཱཡོ, ཨརིཡམགྒོ། ཨིདྷ པན སཧ པུབྦབྷཱགེན ཨརིཡམགྒོ གཧིཏོཏི ཨཱཧ ‘‘སཧཝིཔསྶནཀསྶ མགྒསྶ ཨདྷིགམནཏྠཱཡཱ’’ཏི། ཨཔཙྩཡཔརིནིབྦཱནསྶཱཏི ཨནུཔཱདིསེསནིབྦཱནཾ སནྡྷཱཡ ཝདཏི། པཙྩཡཝསེན ཨནུཔྤནྣཾ ཨསངྑཏཾ ཨམཏདྷཱཏུམེཝ། སེསམེཏྠ ཨུཏྟཱནམེཝ།
26. Chaṭṭhe sambādheti vā taṇhāsaṃkilesādīnaṃ sampīḷe saṅkare gharāvāse. Okāsā vuccantīti maggaphalasukhādhigamāya okāsabhāvato okāsāti vuccanti. Okāsādhigamoti lokuttaradhammassa adhigamāya adhigantabbaokāso. Visujjhanatthāyāti rāgādīhi malehi abhijjhāvisamalobhādīhi ca upakkiliṭṭhacittānaṃ visuddhatthāya. Sā panāyaṃ cittassa visuddhi sijjhamānā yasmā sokādīnaṃ anupādāya saṃvattati, tasmā vuttaṃ ‘‘sokaparidevānaṃ samatikkamāyā’’tiādi. Tattha socanaṃ ñātibyasanādinimittaṃ cetaso santāpo antotāpo antonijjhānaṃ soko, ñātibyasanādinimittameva socikatā. ‘‘Kahaṃ ekaputtakā’’tiādinā (ma. ni. 2.353-354; saṃ. ni. 2.63) paridevanavasena lapanaṃ paridevo. Samatikkamanatthāyāti pahānāya. Āyatiṃ anuppajjanañhi idha samatikkamo. Dukkhadomanassānaṃ atthaṅgamāyāti kāyikadukkhassa ca cetasikadomanassassa cāti imesaṃ dvinnaṃ atthaṅgamāya, nirodhāyāti attho. Ñāyati nicchayena kamati nibbānaṃ, taṃ vā ñāyati paṭivijjhati etenāti ñāyo, ariyamaggo. Idha pana saha pubbabhāgena ariyamaggo gahitoti āha ‘‘sahavipassanakassa maggassa adhigamanatthāyā’’ti. Apaccayaparinibbānassāti anupādisesanibbānaṃ sandhāya vadati. Paccayavasena anuppannaṃ asaṅkhataṃ amatadhātumeva. Sesamettha uttānameva.
མཧཱཀཙྩཱནསུཏྟཝཎྞནཱ ནིཊྛིཏཱ།
Mahākaccānasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༦. མཧཱཀཙྩཱནསུཏྟཾ • 6. Mahākaccānasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. མཧཱཀཙྩཱནསུཏྟཝཎྞནཱ • 6. Mahākaccānasuttavaṇṇanā
