| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. மஹாகச்சானத்தே²ரஅபதா³னவண்ணனா
3. Mahākaccānattheraapadānavaṇṇanā
பது³முத்தரனாத²ஸ்ஸாதிஆதி³கங் ஆயஸ்மதோ கச்சானத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே க³ஹபதிமஹாஸாலகுலகே³ஹே நிப்³ப³த்தெத்வா வுத்³தி⁴ப்பத்தோ ஏகதி³வஸங் ஸத்து² ஸந்திகே த⁴ம்மங் ஸுணந்தோ ஸத்தா²ரங் ஏகங் பி⁴க்கு²ங் ஸங்கி²த்தேன பா⁴ஸிதஸ்ஸ வித்தா²ரேன அத்த²ங் விப⁴ஜந்தானங் அக்³க³ட்டா²னே ட²பெந்தங் தி³ஸ்வா ஸயம்பி தங் டா²னந்தரங் பத்தெ²ந்தோ தா³னாதீ³னி புஞ்ஞானி கத்வா தே³வமனுஸ்ஸேஸு ஸங்ஸரந்தோ ஸுமேத⁴ஸ்ஸ ப⁴க³வதோ காலே விஜ்ஜாத⁴ரோ ஹுத்வா ஆகாஸேன க³ச்ச²ந்தோ ஸத்தா²ரங் ஏகஸ்மிங் வனஸண்டே³ நிஸின்னங் தி³ஸ்வா பஸன்னமானஸோ கணிகாரபுப்பே²ஹி பூஜங் அகாஸி.
Padumuttaranāthassātiādikaṃ āyasmato kaccānattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle gahapatimahāsālakulagehe nibbattetvā vuddhippatto ekadivasaṃ satthu santike dhammaṃ suṇanto satthāraṃ ekaṃ bhikkhuṃ saṃkhittena bhāsitassa vitthārena atthaṃ vibhajantānaṃ aggaṭṭhāne ṭhapentaṃ disvā sayampi taṃ ṭhānantaraṃ patthento dānādīni puññāni katvā devamanussesu saṃsaranto sumedhassa bhagavato kāle vijjādharo hutvā ākāsena gacchanto satthāraṃ ekasmiṃ vanasaṇḍe nisinnaṃ disvā pasannamānaso kaṇikārapupphehi pūjaṃ akāsi.
ஸோ தேன புஞ்ஞகம்மேன அபராபரங் ஸுக³தீஸுயேவ பரிவத்தெத்வா கஸ்ஸபத³ஸப³லஸ்ஸ காலே பா³ராணஸியங் குலக⁴ரே நிப்³ப³த்தித்வா பரினிப்³பு³தே ப⁴க³வதி ஸுவண்ணசேதியகரணட்டா²னங் த³ஸஸஹஸ்ஸக்³க⁴னிகாய ஸுவண்ணிட்ட²காய பூஜங் கத்வா ‘‘ப⁴க³வா மய்ஹங் நிப்³ப³த்தனிப்³ப³த்தட்டா²னே ஸரீரங் ஸுவண்ணவண்ணங் ஹோதூ’’தி பத்த²ரங் அகாஸி. ததோ யாவஜீவங் குஸலங் கத்வா ஏகங் பு³த்³த⁴ந்தரங் தே³வமனுஸ்ஸேஸு ஸங்ஸரித்வா இமஸ்மிங் பு³த்³து⁴ப்பாதே³ உஜ்ஜேனியங் ரஞ்ஞோ சண்ட³பஜ்ஜோதஸ்ஸ புரோஹிதஸ்ஸ கே³ஹே நிப்³ப³த்தி, தஸ்ஸ நாமக்³க³ஹணதி³வஸே மாதாபிதரோ ‘‘அம்ஹாகங் புத்தோ ஸுவண்ணவண்ணோ அத்தனோ நாமங் க³ஹெத்வா ஆக³தோ’’தி கஞ்சனமாணவோத்வேவ நாமங் கரிங்ஸு. ஸோ வுத்³தி⁴மன்வாய தயோ வேதே³ உக்³க³ண்ஹித்வா பிது அச்சயேன புரோஹிதட்டா²னங் லபி⁴. ஸோ கொ³த்தவஸேன கச்சானோதி பஞ்ஞாயித்த².
So tena puññakammena aparāparaṃ sugatīsuyeva parivattetvā kassapadasabalassa kāle bārāṇasiyaṃ kulaghare nibbattitvā parinibbute bhagavati suvaṇṇacetiyakaraṇaṭṭhānaṃ dasasahassagghanikāya suvaṇṇiṭṭhakāya pūjaṃ katvā ‘‘bhagavā mayhaṃ nibbattanibbattaṭṭhāne sarīraṃ suvaṇṇavaṇṇaṃ hotū’’ti pattharaṃ akāsi. Tato yāvajīvaṃ kusalaṃ katvā ekaṃ buddhantaraṃ devamanussesu saṃsaritvā imasmiṃ buddhuppāde ujjeniyaṃ rañño caṇḍapajjotassa purohitassa gehe nibbatti, tassa nāmaggahaṇadivase mātāpitaro ‘‘amhākaṃ putto suvaṇṇavaṇṇo attano nāmaṃ gahetvā āgato’’ti kañcanamāṇavotveva nāmaṃ kariṃsu. So vuddhimanvāya tayo vede uggaṇhitvā pitu accayena purohitaṭṭhānaṃ labhi. So gottavasena kaccānoti paññāyittha.
ராஜா சண்ட³பஜ்ஜோதோ பு³த்³து⁴ப்பாத³ங் ஸுத்வா, ‘‘ஆசரிய, த்வங் தத்த² க³ந்த்வா ஸத்தா²ரங் இதா⁴னேஹீ’’தி பேஸேஸி. ஸோ அத்தட்ட²மோ ஸத்து² ஸந்திகங் உபக³தோ. தஸ்ஸ ஸத்தா² த⁴ம்மங் தே³ஸேஸி. தே³ஸனாபரியோஸானே ஸோ ஸத்தஹி ஜனேஹி ஸத்³தி⁴ங் ஸஹபடிஸம்பி⁴தா³ஹி அரஹத்தே பதிட்டா²ஸி. அத² ஸத்தா² ‘‘ஏத², பி⁴க்க²வோ’’தி ஹத்த²ங் பஸாரேஸி. தே தாவதே³வ த்³வங்கு³லமத்தகேஸமஸ்ஸுகா இத்³தி⁴மயபத்தசீவரத⁴ரா வஸ்ஸஸட்டி²கத்தே²ரா விய அஹேஸுங். ஏவங் தே²ரோ ஸத³த்த²ங் நிப்பா²தெ³த்வா, ‘‘ப⁴ந்தே, ராஜா பஜ்ஜோதோ தும்ஹாகங் பாதே³ வந்தி³துங் த⁴ம்மஞ்ச ஸோதுங் இச்ச²தீ’’தி ஸத்து² ஆரோசேஸி. ஸத்தா² ‘‘த்வங்யேவ பி⁴க்கு² தத்த² க³ச்ச², தயி க³தேபி ராஜா பஸீதி³ஸ்ஸதீ’’தி ஆஹ. தே²ரோ அத்தட்ட²மோ தத்த² க³ந்த்வா ராஜானங் பஸாதெ³த்வா அவந்தீஸு ஸாஸனங் பதிட்டா²பெத்வா புன ஸத்து² ஸந்திகமேவ க³தோ.
Rājā caṇḍapajjoto buddhuppādaṃ sutvā, ‘‘ācariya, tvaṃ tattha gantvā satthāraṃ idhānehī’’ti pesesi. So attaṭṭhamo satthu santikaṃ upagato. Tassa satthā dhammaṃ desesi. Desanāpariyosāne so sattahi janehi saddhiṃ sahapaṭisambhidāhi arahatte patiṭṭhāsi. Atha satthā ‘‘etha, bhikkhavo’’ti hatthaṃ pasāresi. Te tāvadeva dvaṅgulamattakesamassukā iddhimayapattacīvaradharā vassasaṭṭhikattherā viya ahesuṃ. Evaṃ thero sadatthaṃ nipphādetvā, ‘‘bhante, rājā pajjoto tumhākaṃ pāde vandituṃ dhammañca sotuṃ icchatī’’ti satthu ārocesi. Satthā ‘‘tvaṃyeva bhikkhu tattha gaccha, tayi gatepi rājā pasīdissatī’’ti āha. Thero attaṭṭhamo tattha gantvā rājānaṃ pasādetvā avantīsu sāsanaṃ patiṭṭhāpetvā puna satthu santikameva gato.
31. ஏவங் ஸோ பத்தஅரஹத்தப²லோ ‘‘ஏதத³க்³க³ங், பி⁴க்க²வே, மம ஸாவகானங் ஸங்கி²த்தேன பா⁴ஸிதஸ்ஸ வித்தா²ரேன அத்த²ங் விப⁴ஜந்தானங் யதி³த³ங் மஹாகச்சானோ’’தி (அ॰ நி॰ 1.188, 197) ஏதத³க்³க³ட்டா²னங் பத்வா அத்தனோ புப்³ப³கம்மங் ஸரித்வா புப்³ப³சரிதாபதா³னங் பகாஸெந்தோ பது³முத்தரனாத²ஸ்ஸாதிஆதி³மாஹ. தத்த² பது³மங் நாம சேதியந்தி பது³மேஹி சா²தி³தத்தா வா பது³மாகாரேஹி கதத்தா வா ப⁴க³வதோ வஸனக³ந்த⁴குடிவிஹாரோவ பூஜனீயபா⁴வேன சேதியங், யதா² ‘‘கோ³தமகசேதியங், ஆளவகசேதிய’’ந்தி வுத்தே தேஸங் யக்கா²னங் நிவஸனட்டா²னங் பூஜனீயட்டா²னத்தா சேதியந்தி வுச்சதி, ஏவமித³ங் ப⁴க³வதோ வஸனட்டா²னங் சேதியந்தி வுச்சதி, ந தா⁴துனிதா⁴யகசேதியந்தி வேதி³தப்³ப³ங். ந ஹி அபரினிப்³பு³தஸ்ஸ ப⁴க³வதோ ஸரீரதா⁴தூனங் அபா⁴வா தா⁴துசேதியங் அகரி. ஸிலாஸனங் காரயித்வாதி தஸ்ஸா பது³மனாமிகாய க³ந்த⁴குடியா புப்பா²தா⁴ரத்தா²ய ஹெட்டா² ப²லிகமயங் ஸிலாஸனங் காரெத்வா. ஸுவண்ணேனாபி⁴லேபயிந்தி தங் ஸிலாஸனங் ஜம்போ³னத³ஸுவண்ணேன அபி⁴விஸேஸேன லேபயிங் சா²தே³ஸிந்தி அத்தோ².
31. Evaṃ so pattaarahattaphalo ‘‘etadaggaṃ, bhikkhave, mama sāvakānaṃ saṃkhittena bhāsitassa vitthārena atthaṃ vibhajantānaṃ yadidaṃ mahākaccāno’’ti (a. ni. 1.188, 197) etadaggaṭṭhānaṃ patvā attano pubbakammaṃ saritvā pubbacaritāpadānaṃ pakāsento padumuttaranāthassātiādimāha. Tattha padumaṃ nāma cetiyanti padumehi chāditattā vā padumākārehi katattā vā bhagavato vasanagandhakuṭivihārova pūjanīyabhāvena cetiyaṃ, yathā ‘‘gotamakacetiyaṃ, āḷavakacetiya’’nti vutte tesaṃ yakkhānaṃ nivasanaṭṭhānaṃ pūjanīyaṭṭhānattā cetiyanti vuccati, evamidaṃ bhagavato vasanaṭṭhānaṃ cetiyanti vuccati, na dhātunidhāyakacetiyanti veditabbaṃ. Na hi aparinibbutassa bhagavato sarīradhātūnaṃ abhāvā dhātucetiyaṃ akari. Silāsanaṃ kārayitvāti tassā padumanāmikāya gandhakuṭiyā pupphādhāratthāya heṭṭhā phalikamayaṃ silāsanaṃ kāretvā. Suvaṇṇenābhilepayinti taṃ silāsanaṃ jambonadasuvaṇṇena abhivisesena lepayiṃ chādesinti attho.
32. ரதனாமயங் ஸத்தஹி ரதனேஹி கதங் ச²த்தங் பக்³க³ய்ஹ முத்³த⁴னி தா⁴ரெத்வா வாளபீ³ஜனிஞ்ச ஸேதபவரசாமரிஞ்ச பக்³க³ய்ஹ பு³த்³த⁴ஸ்ஸ அபி⁴ரோபயிங். லோகப³ந்து⁴ஸ்ஸ தாதி³னோதி ஸகலலோகப³ந்து⁴ஸதி³ஸஸ்ஸ தாதி³கு³ணஸமங்கி³ஸ்ஸ பு³த்³த⁴ஸ்ஸ தா⁴ரேஸிந்தி அத்தோ². ஸேஸங் உத்தானத்த²மேவாதி.
32.Ratanāmayaṃ sattahi ratanehi kataṃ chattaṃ paggayha muddhani dhāretvā vāḷabījaniñca setapavaracāmariñca paggayha buddhassa abhiropayiṃ. Lokabandhussa tādinoti sakalalokabandhusadisassa tādiguṇasamaṅgissa buddhassa dhāresinti attho. Sesaṃ uttānatthamevāti.
மஹாகச்சானத்தே²ரஅபதா³னவண்ணனா ஸமத்தா.
Mahākaccānattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3. மஹாகச்சானத்தே²ரஅபதா³னங் • 3. Mahākaccānattheraapadānaṃ
