| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
54. கச்சாயனவக்³கோ³
54. Kaccāyanavaggo
1. மஹாகச்சாயனத்தே²ரஅபதா³னவண்ணனா
1. Mahākaccāyanattheraapadānavaṇṇanā
சதுபஞ்ஞாஸமவக்³கே³ பட²மாபதா³னே பது³முத்தரோ நாம ஜினோதிஆதி³கங் ஆயஸ்மதோ மஹாகச்சாயனத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே க³ஹபதிமஹாஸாலகுலே நிப்³ப³த்தித்வா வுத்³தி⁴ப்பத்தோ ஏகதி³வஸங் ஸத்து² ஸந்திகே த⁴ம்மங் ஸுணந்தோ ஸத்தா²ரா ஸங்கி²த்தேன பா⁴ஸிதஸ்ஸ வித்தா²ரேன அத்த²ங் விப⁴ஜந்தானங் அக்³க³ட்டா²னே ட²பியமானங் ஏகங் பி⁴க்கு²ங் தி³ஸ்வா ஸயம்பி தங் டா²னந்தரங் பத்தெ²ந்தோ பணிதா⁴னங் கத்வா தா³னாதீ³னி புஞ்ஞானி கத்வா தே³வமனுஸ்ஸேஸு ஸங்ஸரந்தோ ஸுமேத⁴ஸ்ஸ ப⁴க³வதோ காலே விஜ்ஜாத⁴ரோ ஹுத்வா ஆகாஸேன க³ச்ச²ந்தோ ஏகஸ்மிங் வனஸண்டே³ நிஸின்னங் ப⁴க³வந்தங் தி³ஸ்வா பஸன்னமானஸோ கணிகாரபுப்பே²ஹி பூஜங் அகாஸி.
Catupaññāsamavagge paṭhamāpadāne padumuttaro nāma jinotiādikaṃ āyasmato mahākaccāyanattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle gahapatimahāsālakule nibbattitvā vuddhippatto ekadivasaṃ satthu santike dhammaṃ suṇanto satthārā saṃkhittena bhāsitassa vitthārena atthaṃ vibhajantānaṃ aggaṭṭhāne ṭhapiyamānaṃ ekaṃ bhikkhuṃ disvā sayampi taṃ ṭhānantaraṃ patthento paṇidhānaṃ katvā dānādīni puññāni katvā devamanussesu saṃsaranto sumedhassa bhagavato kāle vijjādharo hutvā ākāsena gacchanto ekasmiṃ vanasaṇḍe nisinnaṃ bhagavantaṃ disvā pasannamānaso kaṇikārapupphehi pūjaṃ akāsi.
ஸோ தேன புஞ்ஞேன அபராபரங் ஸுக³தீஸுயேவ பரிவத்தெந்தோ கஸ்ஸபத³ஸப³லஸ்ஸ காலே பா³ராணஸியங் குலகே³ஹே நிப்³ப³த்தித்வா பரினிப்³பு³தே ப⁴க³வதி ஸுவண்ணசேதியகம்மட்டா²னே ஸதஸஹஸ்ஸக்³க⁴னிகாய ஸுவண்ணிட்ட²காய பூஜங் கத்வா ‘‘இமஸ்ஸ நிஸ்ஸந்தே³ன நிப்³ப³த்தனிப்³ப³த்தட்டா²னே ஸரீரங் மே ஸுவண்ணவண்ணங் ஹோதூ’’தி பத்த²னங் அகாஸி. ததோ யாவஜீவங் குஸலகம்மங் கத்வா ஏகங் பு³த்³த⁴ந்தரங் தே³வமனுஸ்ஸேஸு ஸங்ஸரித்வா இமஸ்மிங் பு³த்³து⁴ப்பாதே³ உஜ்ஜேனியங் ரஞ்ஞோ சண்ட³பஜ்ஜோதஸ்ஸ புரோஹிதகே³ஹே நிப்³ப³த்தி, தஸ்ஸ நாமக்³க³ஹணதி³வஸே மாதா ‘‘மய்ஹங் புத்தோ ஸுவண்ணவண்ணோ, அத்தனோ நாமங் க³ஹெத்வா ஆக³தோ’’தி கஞ்சனமாணவோத்வேவ நாமங் அகாஸி. ஸோ வுத்³தி⁴மன்வாய தயோ வேதே³ உக்³க³ண்ஹித்வா பிது அச்சயேன புரோஹிதட்டா²னங் லபி⁴. ஸோ கொ³த்தவஸேன கச்சாயனோதி பஞ்ஞாயித்த². அத² ராஜா சண்ட³பஜ்ஜோதோ பு³த்³து⁴ப்பாத³ங் ஸுத்வா, ‘‘ஆசரிய, தும்ஹே தத்த² க³ந்த்வா ஸத்தா²ரங் இதா⁴னேதா²’’தி பேஸேஸி. ஸோ அத்தட்ட²மோ ஸத்து² ஸந்திகங் உபக³தோ தஸ்ஸ ஸத்தா² த⁴ம்மங் தே³ஸேஸி, தே³ஸனாபரியோஸானே ஸத்தஹி ஜனேஹி ஸத்³தி⁴ங் ஸஹ படிஸம்பி⁴தா³ஹி அரஹத்தே பதிட்டா²ஸி.
So tena puññena aparāparaṃ sugatīsuyeva parivattento kassapadasabalassa kāle bārāṇasiyaṃ kulagehe nibbattitvā parinibbute bhagavati suvaṇṇacetiyakammaṭṭhāne satasahassagghanikāya suvaṇṇiṭṭhakāya pūjaṃ katvā ‘‘imassa nissandena nibbattanibbattaṭṭhāne sarīraṃ me suvaṇṇavaṇṇaṃ hotū’’ti patthanaṃ akāsi. Tato yāvajīvaṃ kusalakammaṃ katvā ekaṃ buddhantaraṃ devamanussesu saṃsaritvā imasmiṃ buddhuppāde ujjeniyaṃ rañño caṇḍapajjotassa purohitagehe nibbatti, tassa nāmaggahaṇadivase mātā ‘‘mayhaṃ putto suvaṇṇavaṇṇo, attano nāmaṃ gahetvā āgato’’ti kañcanamāṇavotveva nāmaṃ akāsi. So vuddhimanvāya tayo vede uggaṇhitvā pitu accayena purohitaṭṭhānaṃ labhi. So gottavasena kaccāyanoti paññāyittha. Atha rājā caṇḍapajjoto buddhuppādaṃ sutvā, ‘‘ācariya, tumhe tattha gantvā satthāraṃ idhānethā’’ti pesesi. So attaṭṭhamo satthu santikaṃ upagato tassa satthā dhammaṃ desesi, desanāpariyosāne sattahi janehi saddhiṃ saha paṭisambhidāhi arahatte patiṭṭhāsi.
1. ஸோ ஏவங் பத்தஅரஹத்தப²லோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பது³முத்தரோ நாம ஜினோதிஆதி³மாஹ. தங் ஹெட்டா² வுத்தத்த²மேவ. அத² ஸத்தா² ‘‘ஏத², பி⁴க்க²வோ’’தி ஹத்த²ங் பஸாரேஸி. தே தாவதே³வ த்³வங்கு³லமத்தகேஸமஸ்ஸுஇத்³தி⁴மயபத்தசீவரத⁴ரா வஸ்ஸஸட்டி²கத்தே²ரா விய அஹேஸுங். ஏவங் தே²ரோ ஸத³த்த²ங் நிப்பா²தெ³த்வா, ‘‘ப⁴ந்தே, ராஜா பஜ்ஜோதோ தும்ஹாகங் பாதே³ வந்தி³துங் த⁴ம்மஞ்ச ஸோதுங் இச்ச²தீ’’தி ஆரோசேஸி. ஸத்தா² ‘‘த்வங்யேவ, கச்சான, தத்த² க³ச்ச², தயி க³தே ராஜா பஸீதி³ஸ்ஸதீ’’தி ஆஹ. தே²ரோ ஸத்து² ஆணாய அத்தட்ட²மோ தத்த² க³ந்த்வா ராஜானங் பஸாதெ³த்வா அவந்தீஸு ஸாஸனங் பதிட்டா²பெத்வா புன ஸத்து² ஸந்திகமேவ ஆக³தோ. அத்தனோ புப்³ப³பத்த²னாவஸேன கச்சாயனப்பகரணங் மஹானிருத்திப்பகரணங் நெத்திப்பகரணந்தி பகரணத்தயங் ஸங்க⁴மஜ்ஜே² ப்³யாகாஸி. அத² ஸந்துட்டே²ன ப⁴க³வதா ‘‘ஏதத³க்³க³ங், பி⁴க்க²வே, மம ஸாவகானங் ஸங்கி²த்தேன பா⁴ஸிதஸ்ஸ வித்தா²ரேன அத்த²ங் விப⁴ஜந்தானங் யதி³த³ங் மஹாகச்சானோ’’தி (அ॰ நி॰ 1.188, 197) ஏதத³க்³க³ட்டா²னே ட²பிதோ அக்³க³ப²லஸுகே²ன விஹாஸீதி.
1. So evaṃ pattaarahattaphalo attano pubbakammaṃ saritvā somanassajāto pubbacaritāpadānaṃ pakāsento padumuttaro nāma jinotiādimāha. Taṃ heṭṭhā vuttatthameva. Atha satthā ‘‘etha, bhikkhavo’’ti hatthaṃ pasāresi. Te tāvadeva dvaṅgulamattakesamassuiddhimayapattacīvaradharā vassasaṭṭhikattherā viya ahesuṃ. Evaṃ thero sadatthaṃ nipphādetvā, ‘‘bhante, rājā pajjoto tumhākaṃ pāde vandituṃ dhammañca sotuṃ icchatī’’ti ārocesi. Satthā ‘‘tvaṃyeva, kaccāna, tattha gaccha, tayi gate rājā pasīdissatī’’ti āha. Thero satthu āṇāya attaṭṭhamo tattha gantvā rājānaṃ pasādetvā avantīsu sāsanaṃ patiṭṭhāpetvā puna satthu santikameva āgato. Attano pubbapatthanāvasena kaccāyanappakaraṇaṃ mahāniruttippakaraṇaṃ nettippakaraṇanti pakaraṇattayaṃ saṅghamajjhe byākāsi. Atha santuṭṭhena bhagavatā ‘‘etadaggaṃ, bhikkhave, mama sāvakānaṃ saṃkhittena bhāsitassa vitthārena atthaṃ vibhajantānaṃ yadidaṃ mahākaccāno’’ti (a. ni. 1.188, 197) etadaggaṭṭhāne ṭhapito aggaphalasukhena vihāsīti.
மஹாகச்சாயனத்தே²ரஅபதா³னவண்ணனா ஸமத்தா.
Mahākaccāyanattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. மஹாகச்சாயனத்தே²ரஅபதா³னங் • 1. Mahākaccāyanattheraapadānaṃ
