| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
6. மஹாகம்மவிப⁴ங்க³ஸுத்தவண்ணனா
6. Mahākammavibhaṅgasuttavaṇṇanā
298. கம்மஸ்ஸ மோக⁴பா⁴வோ நாம ப²லேன துச்ச²தா ப²லாபா⁴வோதி ஆஹ – ‘‘மோக⁴ந்தி துச்ச²ங் அப²ல’’ந்தி. தத²ங் பூ⁴தந்தி ஸச்சஸத்³த³ஸ்ஸ அத்த²மாஹ. பரிப்³பா³ஜகோ பன ‘‘ஸச்ச’’ந்தி இமினா தமேவ ஸப²லந்தி வத³தி. ஸப²லஞ்ஹி கம்மங் ஸத்து² அபி⁴மதமனோகம்மந்தி அதி⁴ப்பாயோ. இத³ஞ்ச ‘‘மோக⁴ங் காயகம்ம’’ந்திஆதி³வசனங். தங் க³ஹெத்வாதி பரம்பராய க³ஹெத்வா. ஏஸாதி போதலிபுத்தோ பரிப்³பா³ஜகோ. அபி⁴ஸஞ்ஞானிரோத⁴கத²ங் ஸந்தா⁴ய வத³தி. ஸாபி ஹி தித்தி²யானங் அந்தரே பாகடா ஜாதாதி. தே²ரோதி ஸமித்³தி⁴த்தே²ரோ. யதா² ப⁴க³வதா வுத்தங், ததோ ச அஞ்ஞதா²வ தோ³ஸாரோபனப⁴யேன க³ஹெத்வா ததோ ப⁴க³வந்தங் தே²ரோ ரக்க²தீதி அதி⁴ப்பாயேன பரிப்³பா³ஜகோ, ‘‘பரிரக்கி²தப்³ப³ங் மஞ்ஞிஸ்ஸதீ’’தி அவோசாதி ஆஹ – ‘‘பரிரக்கி²தப்³ப³ந்தி க³ரஹதோ மோசனேன ரக்கி²தப்³ப³’’ந்தி. ஸஞ்சேதனா அஸ்ஸ அத்தீ²தி ஸஞ்சேதனிகங். கம்மந்தி ஸஞ்சேதனிகஸ்ஸபி கம்மஸ்ஸ அத்தனோ ஸமயே இச்சி²தத்தா பரிப்³பா³ஜகேன வுத்தங்.
298. Kammassa moghabhāvo nāma phalena tucchatā phalābhāvoti āha – ‘‘moghanti tucchaṃ aphala’’nti. Tathaṃ bhūtanti saccasaddassa atthamāha. Paribbājako pana ‘‘sacca’’nti iminā tameva saphalanti vadati. Saphalañhi kammaṃ satthu abhimatamanokammanti adhippāyo. Idañca ‘‘moghaṃ kāyakamma’’ntiādivacanaṃ. Taṃ gahetvāti paramparāya gahetvā. Esāti potaliputto paribbājako. Abhisaññānirodhakathaṃ sandhāya vadati. Sāpi hi titthiyānaṃ antare pākaṭā jātāti. Theroti samiddhitthero. Yathā bhagavatā vuttaṃ, tato ca aññathāva dosāropanabhayena gahetvā tato bhagavantaṃ thero rakkhatīti adhippāyena paribbājako, ‘‘parirakkhitabbaṃ maññissatī’’ti avocāti āha – ‘‘parirakkhitabbanti garahato mocanena rakkhitabba’’nti. Sañcetanā assa atthīti sañcetanikaṃ. Kammanti sañcetanikassapi kammassa attano samaye icchitattā paribbājakena vuttaṃ.
ஸங்க²தஸங்கா²ரதாய ரூபமேவ ‘‘திலமத்தம்பி ஸங்கா²ர’’ந்தி வுத்தங். தேனாஹ – ‘‘மங்ஸசக்கு²னாவ பஸ்ஸதீ’’தி. ஸமாக³மத³ஸ்ஸனங் ஸந்தா⁴யாதி கத்த²சிபி தஸ்ஸ த³ஸ்ஸனங் ஸந்தா⁴ய, ந பரிஞ்ஞாத³ஸ்ஸனங். தேனாஹ ப⁴க³வா – ‘‘குதோ பனேவரூபங் கதா²ஸல்லாப’’ந்தி.
Saṅkhatasaṅkhāratāya rūpameva ‘‘tilamattampi saṅkhāra’’nti vuttaṃ. Tenāha – ‘‘maṃsacakkhunāva passatī’’ti. Samāgamadassanaṃ sandhāyāti katthacipi tassa dassanaṃ sandhāya, na pariññādassanaṃ. Tenāha bhagavā – ‘‘kuto panevarūpaṃ kathāsallāpa’’nti.
299. வட்டது³க்க²ந்தி ஸங்ஸாரது³க்க²ங். கிலேஸது³க்க²ந்தி கிலேஸஸம்ப⁴வராக³பரிளாஹது³க்க²ங். ஸங்கா²ரது³க்க²ந்தி யத³னிச்சங், தங் து³க்க²ந்தி ஏவங் வுத்தது³க்க²ங். ஸசே பா⁴ஸிதங் ப⁴வெய்யாதி இமங் ஈதி³ஸங் து³க்க²ங் ஸந்தா⁴ய ஆயஸ்மதா ஸமித்³தி⁴னா பா⁴ஸிதங் ஸியா நு ப⁴க³வா, அவிப⁴ஜித்வா ப்³யாகரணங் யுத்தமேவாதி அதி⁴ப்பாயோ.
299.Vaṭṭadukkhanti saṃsāradukkhaṃ. Kilesadukkhanti kilesasambhavarāgapariḷāhadukkhaṃ. Saṅkhāradukkhanti yadaniccaṃ, taṃ dukkhanti evaṃ vuttadukkhaṃ. Sace bhāsitaṃ bhaveyyāti imaṃ īdisaṃ dukkhaṃ sandhāya āyasmatā samiddhinā bhāsitaṃ siyā nu bhagavā, avibhajitvā byākaraṇaṃ yuttamevāti adhippāyo.
300. உம்மங்க³ந்தி உம்முஜ்ஜனங், கதா²முள்ஹேன அந்தரா அஞ்ஞாணவிஸயபஞ்ஹா உம்மங்க³ங். தேனாஹ – ‘‘பஞ்ஹாஉம்மங்க³’’ந்தி நேவ தி³ப்³ப³சக்கு²னாதி கஸ்மா வுத்தங். ந ஹி தங் அயோனிஸோ உம்முஜ்ஜனங் தி³ப்³ப³சக்கு²விஸயந்தி? காமஞ்சேதங் ந தி³ப்³ப³சக்கு²விஸயங், தி³ப்³ப³சக்கு²பரிப⁴ண்ட³ஞாவிஸயங் பன ஸியாதி ததா² வுத்தங். அதி⁴ப்பாயேனேவாதி உதா³யித்தே²ரஸ்ஸ அதி⁴ப்பாயேனேவ க³ய்ஹமானேன தங் அயோனியோ உம்முஜ்ஜனங் அஞ்ஞாஸி. ஸன்னிஸீதி³துங் புப்³பே³ நிஸின்னாகாரேன ஸன்னிஸீதி³துங் ந ஸக்கோதி. ஸமித்³தி⁴த்தே²ரேன அனபி⁴ஸங்க²தஸ்ஸேவ அத்த²ஸ்ஸ கதி²தத்தா, ‘‘யங் அபூ⁴தங், ததே³வ கதெ²ஸ்ஸதீ’’தி வுத்தங். தேனாஹ ‘‘அயோனிஸோ உம்முஜ்ஜிஸ்ஸதீ’’தி. திஸ்ஸோ வேத³னா புச்சி²தா, ‘‘கிங் ஸோ வேதி³யதீ’’தி அவிபா⁴கே³ன வேதி³யமானஸ்ஸ ஜாதிதத்தா. ஸுகா²ய வேத³னாய ஹிதந்தி ஸுக²வேத³னியங். தேனாஹ – ‘‘ஸுக²வேத³னாய பச்சயபூ⁴த’’ந்தி. ஸேஸேஸூதி, ‘‘து³க்க²வேத³னிய’’ந்திஆதீ³ஸு.
300.Ummaṅganti ummujjanaṃ, kathāmuḷhena antarā aññāṇavisayapañhā ummaṅgaṃ. Tenāha – ‘‘pañhāummaṅga’’nti neva dibbacakkhunāti kasmā vuttaṃ. Na hi taṃ ayoniso ummujjanaṃ dibbacakkhuvisayanti? Kāmañcetaṃ na dibbacakkhuvisayaṃ, dibbacakkhuparibhaṇḍañāvisayaṃ pana siyāti tathā vuttaṃ. Adhippāyenevāti udāyittherassa adhippāyeneva gayhamānena taṃ ayoniyo ummujjanaṃ aññāsi. Sannisīdituṃ pubbe nisinnākārena sannisīdituṃ na sakkoti. Samiddhittherena anabhisaṅkhatasseva atthassa kathitattā, ‘‘yaṃ abhūtaṃ, tadeva kathessatī’’ti vuttaṃ. Tenāha ‘‘ayoniso ummujjissatī’’ti. Tisso vedanā pucchitā, ‘‘kiṃ so vediyatī’’ti avibhāgena vediyamānassa jātitattā. Sukhāya vedanāya hitanti sukhavedaniyaṃ. Tenāha – ‘‘sukhavedanāya paccayabhūta’’nti. Sesesūti, ‘‘dukkhavedaniya’’ntiādīsu.
ஹெட்டா² திகஜ்ஜா²னசேதனாதி எத்த², ‘‘குஸலதோ’’தி அதி⁴காரதோ ரூபாவசரகுஸலதோ ஹெட்டா² திகஜ்ஜா²னசேதனாதி அத்தோ². எத்தா²தி ஏதேஸு காமாவசரரூபாவசரஸுக²வேத³னியகம்மேஸு. அது³க்க²மஸுக²ம்பீதி பி-ஸத்³தே³ன இட்டா²ரம்மணே ஸுக²ம்பீதி இமமத்த²ங் ஸம்பிண்டே³தி.
Heṭṭhā tikajjhānacetanāti ettha, ‘‘kusalato’’ti adhikārato rūpāvacarakusalato heṭṭhā tikajjhānacetanāti attho. Etthāti etesu kāmāvacararūpāvacarasukhavedaniyakammesu. Adukkhamasukhampīti pi-saddena iṭṭhārammaṇe sukhampīti imamatthaṃ sampiṇḍeti.
யதி³ காயத்³வாரே பவத்ததோ அஞ்ஞத்த² அது³க்க²மஸுக²ங் ஜனேதி, அத² கஸ்மா, ‘‘து³க்க²ஸ்ஸேவ ஜனநதோ’’தி வுத்தந்தி ஆஹ – ‘‘ஸா பன வேத³னா’’திஆதி³.
Yadi kāyadvāre pavattato aññattha adukkhamasukhaṃ janeti, atha kasmā, ‘‘dukkhasseva jananato’’ti vuttanti āha – ‘‘sā pana vedanā’’tiādi.
சதுத்த²ஜ்ஜா²னசேதனாதி எத்த² அரூபாவசரகுஸலசேதனாதிபி வத்தப்³ப³ங். யதா² ஹி ‘‘காயேன வாசாய மனஸா’’தி எத்த² யதா²லாப⁴க்³க³ஹணவஸேன மனஸா ஸுக²வேத³னியங் அது³க்க²மஸுக²வேத³னியந்தி அயமத்தோ² அரூபாவசரகுஸலேபி லப்³ப⁴தீதி ஸுக²ம்பி ஜனேதி உக்கட்ட²ஸ்ஸ ஞாணஸம்பயுத்தகுஸலஸ்ஸ ஸோளஸவிபாகசித்தனிப்³ப³த்தனதோ, அயஞ்ச நயோ ஹெட்டா², ‘‘அது³க்க²மஸுக²ம்பீ’’தி எத்தா²பி வத்தப்³போ³. புப்³பே³ பரியாயதோ து³க்க²வேத³னா வுத்தா, ஸுத்தந்தஸங்வண்ணனா ஹேஸாதி இதா³னி நிப்பரியாயதோ புன த³ஸ்ஸேதுங், ‘‘அபிசா’’திஆதி³ வுத்தங். தேன எத்த² து³க்க²வேத³னியங் பவத்திவஸேனேவ வட்டதீதி. ஏதஸ்ஸாதி து³க்க²வேத³னியஸ்ஸ பவத்திவஸேனேவ யுஜ்ஜமானத்தா ஏதஸ்ஸ வஸேன ஸப்³ப³ங் ஸுக²வேத³னியங் அது³க்க²மஸுக²வேத³னியஞ்ச பவத்திவஸேனேவ வத்துங் வட்டதி.
Catutthajjhānacetanāti ettha arūpāvacarakusalacetanātipi vattabbaṃ. Yathā hi ‘‘kāyena vācāya manasā’’ti ettha yathālābhaggahaṇavasena manasā sukhavedaniyaṃ adukkhamasukhavedaniyanti ayamattho arūpāvacarakusalepi labbhatīti sukhampi janeti ukkaṭṭhassa ñāṇasampayuttakusalassa soḷasavipākacittanibbattanato, ayañca nayo heṭṭhā, ‘‘adukkhamasukhampī’’ti etthāpi vattabbo. Pubbe pariyāyato dukkhavedanā vuttā, suttantasaṃvaṇṇanā hesāti idāni nippariyāyato puna dassetuṃ, ‘‘apicā’’tiādi vuttaṃ. Tena ettha dukkhavedaniyaṃ pavattivaseneva vaṭṭatīti. Etassāti dukkhavedaniyassa pavattivaseneva yujjamānattā etassa vasena sabbaṃ sukhavedaniyaṃ adukkhamasukhavedaniyañca pavattivaseneva vattuṃ vaṭṭati.
ஆலயோதி அபி⁴ருசி. மஹாகம்மவிப⁴ங்க³ஞாணந்தி மஹதி கம்மவிப⁴ஜனே ஞாணங், மஹந்தங் வா கம்மவிப⁴ஜனஞாணங். பா⁴ஜனங் நாம நித்³தே³ஸோ, அயங் பன உத்³தே³ஸோதி கத்வா ஆஹ – ‘‘கதமே சத்தாரோ…பே॰… மாதிகாட்ட²பன’’ந்தி.
Ālayoti abhiruci. Mahākammavibhaṅgañāṇanti mahati kammavibhajane ñāṇaṃ, mahantaṃ vā kammavibhajanañāṇaṃ. Bhājanaṃ nāma niddeso, ayaṃ pana uddesoti katvā āha – ‘‘katame cattāro…pe… mātikāṭṭhapana’’nti.
301. பாடியேக்கோ அனுஸந்தி⁴ யதா²உத்³தி³ட்ட²ஸ்ஸ மஹாகம்மவிப⁴ங்க³ஞாணஸ்ஸ அபா⁴ஜனபா⁴வதோ, புச்சா²னுஸந்தி⁴அஜ்ஜா²ஸயானுஸந்தீ⁴ஸு ச அனந்தோக³த⁴த்தா. தேனாஹ ‘‘இத³ங் ஹீ’’திஆதி³. இத³ங் ஆரம்மணங் கத்வாதி இத⁴, ‘‘பாணாதிபாதிங் அதி³ன்னாதா³யி’’ந்திஆதி³னா புக்³க³லாதி⁴ட்டா²னேன வுத்தங் கம்மவிப⁴ங்க³ங் ஆரப்³ப⁴. இமங் பச்சயங் லபி⁴த்வாதி தஸ்ஸேவ வேவசனங். இத³ங் த³ஸ்ஸனங் க³ண்ஹந்தீதி இத³ங், ‘‘அத்தி² கிர, போ⁴, பாபகானி கம்மானி, நத்தி² கிர, போ⁴, பாபகானி கம்மானீ’’தி ச ஆதீ³னி ஹத்தி²த³ஸ்ஸகஅந்தா⁴விய தி³ட்ட²மத்தே ஏவ ட²த்வா அசித்தகத³ஸ்ஸனஞ்ச க³ண்ஹந்தி. வீரியங் கிலேஸானங் ஆதாபனவஸேன ஆதப்பங், ததே³வ பத³ஹவஸேன பதா⁴னங், புனப்புனங் யுஞ்ஜனவஸேன அனுயோகோ³, ததா² பா⁴வனாய நப்பமஜ்ஜதி ஏதேனாதி அப்பமாதோ³, ஸம்மா யோனிஸோ மனஸி கரோதி ஏதேனாதி ஸம்மாமனஸிகாரோதி வுச்சதீதி அதி⁴ப்பாயேன, ‘‘பஞ்சபி வீரியஸ்ஸேவ நாமானீ’’தி ஆஹ. அப்பமாதோ³ வா ஸதியா அவிப்பவாஸோ. யஸ்மிங் மனஸிகாரே ஸதி தஸ்ஸ தி³ப்³ப³சக்கு²ஞாணங் இஜ்ஜ²தி, அயமெத்த² ஸம்மாமனஸிகாரோதி எத்த² அத்தோ² த³ட்ட²ப்³போ³. சேதோஸமாதி⁴ந்தி தி³ப்³ப³சக்கு²ஞாணஸஹக³தங் சித்தஸமாதி⁴ங். தேனாஹ ‘‘தி³ப்³ப³சக்கு²ஸமாதி⁴’’ந்தி. அஞ்ஞதா²தி அகுஸலகம்மகரணதோ அஞ்ஞதா², தங் பன குஸலகம்மகரணங் ஹோதீதி ஆஹ – ‘‘யே த³ஸ்ஸன்னங் குஸலானங் கம்மபதா²னங் பூரிதத்தா’’தி தி³ட்டி²தா²மேனாதி தி³ட்டி²வஸேன தி³ட்டி²ப³லேன. தி³ட்டி²பராமாஸேனாதி தி³ட்டி²வஸேன த⁴ம்மஸபா⁴வங் அதிக்கமித்வா பராமாஸேன. அதி⁴ட்ட²ஹித்வாதி, ‘‘இத³மேவ ஸச்சங், மோக⁴மஞ்ஞ’’ந்தி அதி⁴ட்டா²ய அபி⁴னிவிஸித்வா. ஆதி³யித்வாதி த³ள்ஹக்³கா³ஹங் க³ஹெத்வா. வோஹரதீதி அத்தனோ க³ஹிதக்³க³ஹணங் பரேஸங் தீ³பெந்தோ வோஹரதி.
301.Pāṭiyekko anusandhi yathāuddiṭṭhassa mahākammavibhaṅgañāṇassa abhājanabhāvato, pucchānusandhiajjhāsayānusandhīsu ca anantogadhattā. Tenāha ‘‘idaṃ hī’’tiādi. Idaṃ ārammaṇaṃ katvāti idha, ‘‘pāṇātipātiṃ adinnādāyi’’ntiādinā puggalādhiṭṭhānena vuttaṃ kammavibhaṅgaṃ ārabbha. Imaṃ paccayaṃ labhitvāti tasseva vevacanaṃ. Idaṃ dassanaṃ gaṇhantīti idaṃ, ‘‘atthi kira, bho, pāpakāni kammāni, natthi kira, bho, pāpakāni kammānī’’ti ca ādīni hatthidassakaandhāviya diṭṭhamatte eva ṭhatvā acittakadassanañca gaṇhanti. Vīriyaṃ kilesānaṃ ātāpanavasena ātappaṃ, tadeva padahavasena padhānaṃ, punappunaṃ yuñjanavasena anuyogo, tathā bhāvanāya nappamajjati etenāti appamādo, sammā yoniso manasi karoti etenāti sammāmanasikāroti vuccatīti adhippāyena, ‘‘pañcapi vīriyasseva nāmānī’’ti āha. Appamādo vā satiyā avippavāso. Yasmiṃ manasikāre sati tassa dibbacakkhuñāṇaṃ ijjhati, ayamettha sammāmanasikāroti ettha attho daṭṭhabbo. Cetosamādhinti dibbacakkhuñāṇasahagataṃ cittasamādhiṃ. Tenāha ‘‘dibbacakkhusamādhi’’nti. Aññathāti akusalakammakaraṇato aññathā, taṃ pana kusalakammakaraṇaṃ hotīti āha – ‘‘ye dassannaṃ kusalānaṃ kammapathānaṃ pūritattā’’ti diṭṭhithāmenāti diṭṭhivasena diṭṭhibalena. Diṭṭhiparāmāsenāti diṭṭhivasena dhammasabhāvaṃ atikkamitvā parāmāsena. Adhiṭṭhahitvāti, ‘‘idameva saccaṃ, moghamañña’’nti adhiṭṭhāya abhinivisitvā. Ādiyitvāti daḷhaggāhaṃ gahetvā. Voharatīti attano gahitaggahaṇaṃ paresaṃ dīpento voharati.
302. தத்ரானந்தா³தி எத்த² இதி-ஸத்³தோ³ ஆதி³அத்தோ². இத³ம்பீதி இத³ங் வசனங். ‘‘தத்ரானந்தா³’’தி ஏவமாதி³வசனம்பீதி அத்தோ². ந மஹாகம்மவிப⁴ங்க³ஞாணஸ்ஸ பா⁴ஜனங் தஸ்ஸ அனித்³தே³ஸபா⁴வதோ. அஸ்ஸாதி மஹாகம்மவிப⁴ங்க³ஞாணஸ்ஸ மாதிகாட்ட²பனமேவ தி³ப்³ப³சக்கு²கானங் ஸமணப்³ராஹ்மணானங் வஸேன அனுஞ்ஞாதப்³ப³ஸ்ஸ ச த³ஸ்ஸனவஸேன உத்³தே³ஸபா⁴வதோ. தேனாஹ ‘‘எத்த² பனா’’திஆதி³. தத்த² எத்த² பனாதி ‘‘தத்ரானந்தா³’’திஆதி³பாடே². ஏதேஸங் தி³ப்³ப³சக்கு²கானந்தி ஏதேஸங் ஹெட்டா² சதூஸுபி வாரேஸு ஆக³தானங் தி³ப்³ப³சக்கு²கானங். எத்தகாதி ஏகச்சியா ஸச்சகி³ரா. அனுஞ்ஞாதாதி அனுஜானிதா. அனநுஞ்ஞாதாதி படிக்கே²பிதா. இத⁴ அனநுஞ்ஞாதமுகே²ன தீ³பிதங் அனநுஞ்ஞாதபா⁴வமத்தங். தத்ரானந்தா³திஆதி³கே தத்ராதி நித்³தா⁴ரணே பு⁴ம்மந்தி த³ஸ்ஸெந்தோ, ‘‘தேஸு சதூஸு ஸமணப்³ராஹ்மணேஸூ’’தி ஆஹ. இத³ங் வசனங் ‘‘அத்தி² கிர, போ⁴…பே॰… விபாகோ’’தி இத³ங் ஏவங் வுத்தங். அஸ்ஸாதி ததா²வாதி³னோ ஸமணப்³ராஹ்மணஸ்ஸ. அஞ்ஞேனாகாரேனாதி ‘‘யோ கிர, போ⁴’’திஆதி³னா வுத்தகாரணதோ அஞ்ஞேன காரணேன. த்³வீஸு டா²னேஸூதி ‘‘அத்தி² கிர, போ⁴…பே॰… விபாகோ’’தி ச, ‘‘அபாயங்…பே॰… நிரயங் உபபன்ன’’ந்தி ச இமேஸு த்³வீஸு பாட²பதே³ஸேஸு. அனுஞ்ஞாதா தத³த்த²ஸ்ஸ அத்தி²பா⁴வதோ. தீஸு டா²னேஸூதி ‘‘யோ கிர, போ⁴…பே॰… நிரயங் உபபஜ்ஜதி’’, ‘‘யம்பி ஸோ…பே॰… தே ஸஞ்ஜானந்தி’’, ‘‘யம்பி ஸோ யதே³வ…பே॰… மோக⁴மஞ்ஞ’’ந்தி இமேஸு தீஸு பாட²பதே³ஸேஸு. அனநுஞ்ஞாதா தத³த்த²ஸ்ஸானேகந்திகத்தா மிச்சா²பி⁴னிவேஸதோ ச. தேனாஹ ப⁴க³வா – ‘‘அஞ்ஞதா² ஹி, ஆனந்த³, ததா²க³தஸ்ஸ மஹாகம்மவிப⁴ங்க³ஞாண’’ந்தி. யதா² தே அப்பஹீனவிபல்லாஸா பதே³ஸஞாணஸமணப்³ராஹ்மணா கம்மவிப⁴ங்க³ங் ஸஞ்ஜானந்தி, ததோ அஞ்ஞதா²வ ஸப்³ப³ஸோ பஹீனவிபல்லாஸஸ்ஸ ததா² ஆக³மனாதி³அத்தே²ன ததா²க³தஸ்ஸ ஸம்மாஸம்பு³த்³த⁴ஸ்ஸ மஹாகம்மவிப⁴ங்க³ஞாணங் ஹோதீதி அத்தோ².
302.Tatrānandāti ettha iti-saddo ādiattho. Idampīti idaṃ vacanaṃ. ‘‘Tatrānandā’’ti evamādivacanampīti attho. Na mahākammavibhaṅgañāṇassa bhājanaṃ tassa aniddesabhāvato. Assāti mahākammavibhaṅgañāṇassa mātikāṭṭhapanameva dibbacakkhukānaṃ samaṇabrāhmaṇānaṃ vasena anuññātabbassa ca dassanavasena uddesabhāvato. Tenāha ‘‘ettha panā’’tiādi. Tattha ettha panāti ‘‘tatrānandā’’tiādipāṭhe. Etesaṃ dibbacakkhukānanti etesaṃ heṭṭhā catūsupi vāresu āgatānaṃ dibbacakkhukānaṃ. Ettakāti ekacciyā saccagirā. Anuññātāti anujānitā. Ananuññātāti paṭikkhepitā. Idha ananuññātamukhena dīpitaṃ ananuññātabhāvamattaṃ. Tatrānandātiādike tatrāti niddhāraṇe bhummanti dassento, ‘‘tesu catūsu samaṇabrāhmaṇesū’’ti āha. Idaṃ vacanaṃ ‘‘atthi kira, bho…pe… vipāko’’ti idaṃ evaṃ vuttaṃ. Assāti tathāvādino samaṇabrāhmaṇassa. Aññenākārenāti ‘‘yo kira, bho’’tiādinā vuttakāraṇato aññena kāraṇena. Dvīsu ṭhānesūti ‘‘atthi kira, bho…pe… vipāko’’ti ca, ‘‘apāyaṃ…pe… nirayaṃ upapanna’’nti ca imesu dvīsu pāṭhapadesesu. Anuññātā tadatthassa atthibhāvato. Tīsu ṭhānesūti ‘‘yo kira, bho…pe… nirayaṃ upapajjati’’, ‘‘yampi so…pe… te sañjānanti’’, ‘‘yampi so yadeva…pe… moghamañña’’nti imesu tīsu pāṭhapadesesu. Ananuññātā tadatthassānekantikattā micchābhinivesato ca. Tenāha bhagavā – ‘‘aññathā hi, ānanda, tathāgatassa mahākammavibhaṅgañāṇa’’nti. Yathā te appahīnavipallāsā padesañāṇasamaṇabrāhmaṇā kammavibhaṅgaṃ sañjānanti, tato aññathāva sabbaso pahīnavipallāsassa tathā āgamanādiatthena tathāgatassa sammāsambuddhassa mahākammavibhaṅgañāṇaṃ hotīti attho.
303. இமினா தி³ப்³ப³சக்கு²கேன யங் கம்மங் கரொந்தோ தி³ட்டோ², ததோ புப்³பே³தி யோஜனா. ததோதி ததோ கரியமானகம்மதோ புப்³பே³. க²ந்தோ³தி குமாரோ. ஸிவோதி இஸ்ஸரோ. பிதாமஹோதி ப்³ரஹ்மா. இஸ்ஸராதீ³ஹீதி இஸ்ஸரப்³ரஹ்மபஜாபதிஆதீ³ஹி. விஸட்டோ²தி நிம்மிதோ. மிச்சா²த³ஸ்ஸனேனாதி மிச்சா²த³ஸ்ஸனவஸேன. யந்தி யங் கம்மங். தத்தா²தி தேஸு பாணாதிபாதாதி³வஸேன பவத்தகம்மேஸு. தி³ட்டே²வ த⁴ம்மேதி தஸ்மிங்யேவ அத்தபா⁴வே விபாகங் படிஸங்வேதே³தீதி யோஜனா. உபபஜ்ஜித்வாதி து³தியப⁴வே நிப்³ப³த்தித்வா. அபரஸ்மிங் பரியாயேதி அஞ்ஞஸ்மிங் யத்த² கத்த²சி ப⁴வே.
303. Iminā dibbacakkhukena yaṃ kammaṃ karonto diṭṭho, tato pubbeti yojanā. Tatoti tato kariyamānakammato pubbe. Khandoti kumāro. Sivoti issaro. Pitāmahoti brahmā. Issarādīhīti issarabrahmapajāpatiādīhi. Visaṭṭhoti nimmito. Micchādassanenāti micchādassanavasena. Yanti yaṃ kammaṃ. Tatthāti tesu pāṇātipātādivasena pavattakammesu. Diṭṭheva dhammeti tasmiṃyeva attabhāve vipākaṃ paṭisaṃvedetīti yojanā. Upapajjitvāti dutiyabhave nibbattitvā. Aparasmiṃ pariyāyeti aññasmiṃ yattha katthaci bhave.
ஏகங் கம்மராஸிந்தி பாணாதிபாதாதி³பே⁴தே³ன ஏகங் கம்மஸமுதா³யங். ஏகங் விபாகராஸிந்தி தஸ்ஸேவ அங்கே³ன ஏகங் விபாகஸமுதா³யங். இமினாதி யதா²வுத்தேன தி³ப்³ப³சக்கு²கேன ஸமணேன ப்³ராஹ்மணேன வா அதி³ட்டா². தயோதி ‘‘புப்³பே³ வாஸ்ஸ தங் கதங் ஹோதீ’’திஆதி³னா வுத்தா தயோ. த்³வே விபாகராஸீதி தி³ட்ட²த⁴ம்மவேத³னியோ அபராபரியாயவேத³னியோதி த்³வே விபாகராஸீ. உபபஜ்ஜவேத³னியங் பன தேன தி³ட்ட²ங், தஸ்மா ‘‘த்³வே’’தி வுத்தங். தி³ட்டோ² ஏகோ, அதி³ட்டா² தயோதி தி³ட்டே² ச அதி³ட்டே² ச சத்தாரோ கம்மராஸீ, ததா² தி³ட்டோ² ஏகோ, அதி³ட்டா² த்³வேதி தயோ விபாகராஸீ. இமானி ஸத்த டா²னானீதி யதா²வுத்தானி ஸத்த ஞாணஸ்ஸ பவத்தனட்டா²னானி. ‘‘இமஸ்ஸ நாம கம்மஸ்ஸ இத³ங் ப²லங் நிப்³ப³த்த’’ந்தி கம்மஸ்ஸ, ப²லஸ்ஸ வா அதி³ட்ட²த்தா, ‘‘து³தியவாரே தி³ப்³ப³சக்கு²கேன கிஞ்சி ந தி³ட்ட²’’ந்தி வுத்தங். பட²மங் வுத்தனயேன தயோ கம்மராஸீ வேதி³தப்³பா³, இத⁴ தி³ப்³ப³சக்கு²கேன தி³ட்ட²ஸ்ஸ அபா⁴வதோ, ‘‘பச்சத்தட்டா²னானீ’’தி வுத்தங்.
Ekaṃ kammarāsinti pāṇātipātādibhedena ekaṃ kammasamudāyaṃ. Ekaṃ vipākarāsinti tasseva aṅgena ekaṃ vipākasamudāyaṃ. Imināti yathāvuttena dibbacakkhukena samaṇena brāhmaṇena vā adiṭṭhā. Tayoti ‘‘pubbe vāssa taṃ kataṃ hotī’’tiādinā vuttā tayo. Dve vipākarāsīti diṭṭhadhammavedaniyo aparāpariyāyavedaniyoti dve vipākarāsī. Upapajjavedaniyaṃ pana tena diṭṭhaṃ, tasmā ‘‘dve’’ti vuttaṃ. Diṭṭho eko, adiṭṭhā tayoti diṭṭhe ca adiṭṭhe ca cattāro kammarāsī, tathā diṭṭho eko, adiṭṭhā dveti tayo vipākarāsī. Imāni satta ṭhānānīti yathāvuttāni satta ñāṇassa pavattanaṭṭhānāni. ‘‘Imassa nāma kammassa idaṃ phalaṃ nibbatta’’nti kammassa, phalassa vā adiṭṭhattā, ‘‘dutiyavāre dibbacakkhukena kiñci na diṭṭha’’nti vuttaṃ. Paṭhamaṃ vuttanayena tayo kammarāsī veditabbā, idha dibbacakkhukena diṭṭhassa abhāvato, ‘‘paccattaṭṭhānānī’’ti vuttaṃ.
ப⁴வதி வட்³ட⁴தி ஏதேனாதி ப⁴ப்³ப³ங், வட்³டி⁴னிமித்தங். ந ப⁴ப்³ப³ங் அப⁴ப்³ப³ந்தி ஆஹ ‘‘பூ⁴தவிரஹித’’ந்தி. அத்தனோ ப²லே பா⁴ஸனங் தி³ப்³ப³னங் ஆபா⁴ஸனந்தி ஆஹ – ‘‘ஆபா⁴ஸதி அபி⁴ப⁴வதி படிபா³ஹதீ’’தி. ப³லவகம்மந்தி மஹாஸாவஜ்ஜங் கம்மங் க³ருஸமாஸேவிதாதி³பே⁴த³ங். ஆஸன்னேதி மரணே, அபி⁴ண்ஹங் உபட்டா²னேன வா தஸ்ஸ மரணசித்தஸ்ஸ ஆஸன்னே. ப³லவகம்மந்தி க³ருஸமாஸேவிததாதி³வஸேன ப³லவங் குஸலகம்மங். து³ப்³ப³லகம்மஸ்ஸாதி அத்தனோ து³ப்³ப³லஸ்ஸ. ஆஸன்னே குஸலங் கதந்தி இதா⁴பி ஆஸன்னதா புப்³பே³ வுத்தனயேனேவ வேதி³தப்³பா³.
Bhavati vaḍḍhati etenāti bhabbaṃ, vaḍḍhinimittaṃ. Na bhabbaṃ abhabbanti āha ‘‘bhūtavirahita’’nti. Attano phale bhāsanaṃ dibbanaṃ ābhāsananti āha – ‘‘ābhāsati abhibhavati paṭibāhatī’’ti. Balavakammanti mahāsāvajjaṃ kammaṃ garusamāsevitādibhedaṃ. Āsanneti maraṇe, abhiṇhaṃ upaṭṭhānena vā tassa maraṇacittassa āsanne. Balavakammanti garusamāsevitatādivasena balavaṃ kusalakammaṃ. Dubbalakammassāti attano dubbalassa. Āsanne kusalaṃ katanti idhāpi āsannatā pubbe vuttanayeneva veditabbā.
உபட்டா²னாகாரேனாதி மரணஸ்ஸ ஆஸன்னகாலே கம்மஸ்ஸ உபட்டா²னாகாரேன. தஸ்ஸாதி தஸ்ஸ புக்³க³லஸ்ஸ. நிப்³ப³த்திகாரணபூ⁴தங் ஹுத்வா உபட்டா²தி அகுஸலந்தி யோஜனா. தித்தி²யா கம்மந்தரவிபாகந்தரேஸு அகுஸலதாய யங் கிஞ்சி கம்மங் யஸ்ஸ கஸ்ஸசி விபாகஸ்ஸ காரணங் கத்வா க³ண்ஹந்தி ஹத்தி²த³ஸ்ஸகஅந்தா⁴த³யோ விய தி³ட்ட²மத்தாபி⁴னிவேஸினோதி, ‘‘அஞ்ஞதித்தி²யா…பே॰… உபட்டா²தீ’’தி வுத்தங். இதரஸ்மிந்தி ப⁴ப்³ப³ஞ்சேவ ப⁴ப்³பா³பா⁴ஸஞ்ச, ப⁴ப்³ப³ங் அப⁴ப்³பா³பா⁴ஸந்தி இமஸ்மிங் த்³வயே . ஏஸேவ நயோ பட²மது³தியபுக்³க³லவஸேன புரிமானங் த்³வின்னங் கம்மானங் யோஜனானயோ வுத்தோ உபட்டா²னாகாரவஸேன. அயமேவ ததியசதுத்த²புக்³க³லவஸேன பச்சி²மானங் த்³வின்னங் கம்மானங் யோஜனானயோ. ததியஸ்ஸ ஹி கம்மஸ்ஸ குஸலத்தா தஸ்ஸ ச ஸக்³கே³ நிப்³ப³த்தத்தா தத்த² காரணபூ⁴தங் குஸலங் ஹுத்வா உபட்டா²தி; ததா² சதுத்த²ஸ்ஸபி கம்மஸ்ஸ குஸலத்தா, தஸ்ஸ பன நிரயே நிப்³ப³த்தத்தா தத்த² நிப்³ப³த்திகாரணபூ⁴தங் அஞ்ஞதித்தி²யானங் அகுஸலங் ஹுத்வா உபட்டா²தீதி. யங் பனெத்த² அத்த²தோ அவிப⁴த்தங், தங் ஸுவிஞ்ஞெய்யமேவ.
Upaṭṭhānākārenāti maraṇassa āsannakāle kammassa upaṭṭhānākārena. Tassāti tassa puggalassa. Nibbattikāraṇabhūtaṃ hutvā upaṭṭhāti akusalanti yojanā. Titthiyā kammantaravipākantaresu akusalatāya yaṃ kiñci kammaṃ yassa kassaci vipākassa kāraṇaṃ katvā gaṇhanti hatthidassakaandhādayo viya diṭṭhamattābhinivesinoti, ‘‘aññatitthiyā…pe… upaṭṭhātī’’ti vuttaṃ. Itarasminti bhabbañceva bhabbābhāsañca, bhabbaṃ abhabbābhāsanti imasmiṃ dvaye . Eseva nayo paṭhamadutiyapuggalavasena purimānaṃ dvinnaṃ kammānaṃ yojanānayo vutto upaṭṭhānākāravasena. Ayameva tatiyacatutthapuggalavasena pacchimānaṃ dvinnaṃ kammānaṃ yojanānayo. Tatiyassa hi kammassa kusalattā tassa ca sagge nibbattattā tattha kāraṇabhūtaṃ kusalaṃ hutvā upaṭṭhāti; tathā catutthassapi kammassa kusalattā, tassa pana niraye nibbattattā tattha nibbattikāraṇabhūtaṃ aññatitthiyānaṃ akusalaṃ hutvā upaṭṭhātīti. Yaṃ panettha atthato avibhattaṃ, taṃ suviññeyyameva.
மஹாகம்மவிப⁴ங்க³ஸுத்தவண்ணனாய லீனத்த²ப்பகாஸனா ஸமத்தா.
Mahākammavibhaṅgasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 6. மஹாகம்மவிப⁴ங்க³ஸுத்தங் • 6. Mahākammavibhaṅgasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 6. மஹாகம்மவிப⁴ங்க³ஸுத்தவண்ணனா • 6. Mahākammavibhaṅgasuttavaṇṇanā
