| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. மஹகபாடிஹாரியஸுத்தங்
4. Mahakapāṭihāriyasuttaṃ
346. ஏகங் ஸமயங் ஸம்ப³ஹுலா தே²ரா பி⁴க்கூ² மச்சி²காஸண்டே³ விஹரந்தி அம்பா³டகவனே. அத² கோ² சித்தோ க³ஹபதி யேன தே²ரா பி⁴க்கூ² தேனுபஸங்கமி; உபஸங்கமித்வா தே²ரே பி⁴க்கூ² அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² சித்தோ க³ஹபதி தே²ரே பி⁴க்கூ² ஏதத³வோச – ‘‘அதி⁴வாஸெந்து மே, ப⁴ந்தே தே²ரா, ஸ்வாதனாய கோ³குலே ப⁴த்த’’ந்தி. அதி⁴வாஸேஸுங் கோ² தே²ரா பி⁴க்கூ² துண்ஹீபா⁴வேன. அத² கோ² சித்தோ க³ஹபதி தே²ரானங் பி⁴க்கூ²னங் அதி⁴வாஸனங் விதி³த்வா உட்டா²யாஸனா தே²ரே பி⁴க்கூ² அபி⁴வாதெ³த்வா பத³க்கி²ணங் கத்வா பக்காமி. அத² கோ² தே²ரா பி⁴க்கூ² தஸ்ஸா ரத்தியா அச்சயேன புப்³ப³ண்ஹஸமயங் நிவாஸெத்வா பத்தசீவரமாதா³ய யேன சித்தஸ்ஸ க³ஹபதினோ கோ³குலங் தேனுபஸங்கமிங்ஸு; உபஸங்கமித்வா பஞ்ஞத்தே ஆஸனே நிஸீதி³ங்ஸு.
346. Ekaṃ samayaṃ sambahulā therā bhikkhū macchikāsaṇḍe viharanti ambāṭakavane. Atha kho citto gahapati yena therā bhikkhū tenupasaṅkami; upasaṅkamitvā there bhikkhū abhivādetvā ekamantaṃ nisīdi. Ekamantaṃ nisinno kho citto gahapati there bhikkhū etadavoca – ‘‘adhivāsentu me, bhante therā, svātanāya gokule bhatta’’nti. Adhivāsesuṃ kho therā bhikkhū tuṇhībhāvena. Atha kho citto gahapati therānaṃ bhikkhūnaṃ adhivāsanaṃ viditvā uṭṭhāyāsanā there bhikkhū abhivādetvā padakkhiṇaṃ katvā pakkāmi. Atha kho therā bhikkhū tassā rattiyā accayena pubbaṇhasamayaṃ nivāsetvā pattacīvaramādāya yena cittassa gahapatino gokulaṃ tenupasaṅkamiṃsu; upasaṅkamitvā paññatte āsane nisīdiṃsu.
அத² கோ² சித்தோ க³ஹபதி தே²ரே பி⁴க்கூ² பணீதேன ஸப்பிபாயாஸேன ஸஹத்தா² ஸந்தப்பேஸி ஸம்பவாரேஸி. அத² கோ² தே²ரா பி⁴க்கூ² பு⁴த்தாவினோ ஓனீதபத்தபாணினோ உட்டா²யாஸனா பக்கமிங்ஸு. சித்தோபி கோ² க³ஹபதி ‘ஸேஸகங் விஸ்ஸஜ்ஜேதா²’தி வத்வா தே²ரே பி⁴க்கூ² பிட்டி²தோ பிட்டி²தோ அனுப³ந்தி⁴. தேன கோ² பன ஸமயேன உண்ஹங் ஹோதி குதி²தங் 1; தே ச தே²ரா பி⁴க்கூ² பவேலியமானேன மஞ்ஞே காயேன க³ச்ச²ந்தி, யதா² தங் போ⁴ஜனங் பு⁴த்தாவினோ.
Atha kho citto gahapati there bhikkhū paṇītena sappipāyāsena sahatthā santappesi sampavāresi. Atha kho therā bhikkhū bhuttāvino onītapattapāṇino uṭṭhāyāsanā pakkamiṃsu. Cittopi kho gahapati ‘sesakaṃ vissajjethā’ti vatvā there bhikkhū piṭṭhito piṭṭhito anubandhi. Tena kho pana samayena uṇhaṃ hoti kuthitaṃ 2; te ca therā bhikkhū paveliyamānena maññe kāyena gacchanti, yathā taṃ bhojanaṃ bhuttāvino.
தேன கோ² பன ஸமயேன ஆயஸ்மா மஹகோ தஸ்மிங் பி⁴க்கு²ஸங்கே⁴ ஸப்³ப³னவகோ ஹோதி. அத² கோ² ஆயஸ்மா மஹகோ ஆயஸ்மந்தங் தே²ரங் ஏதத³வோச – ‘‘ஸாது⁴ க்²வஸ்ஸ, ப⁴ந்தே தே²ர, ஸீதகோ ச வாதோ வாயெய்ய, அப்³ப⁴ஸம்பிலாபோ 3 ச அஸ்ஸ, தே³வோ ச ஏகமேகங் பு²ஸாயெய்யா’’தி.
Tena kho pana samayena āyasmā mahako tasmiṃ bhikkhusaṅghe sabbanavako hoti. Atha kho āyasmā mahako āyasmantaṃ theraṃ etadavoca – ‘‘sādhu khvassa, bhante thera, sītako ca vāto vāyeyya, abbhasampilāpo 4 ca assa, devo ca ekamekaṃ phusāyeyyā’’ti.
‘‘ஸாது⁴ க்²வஸ்ஸ, ஆவுஸோ மஹக, யங் ஸீதகோ ச வாதோ வாயெய்ய, அப்³ப⁴ஸம்பிலாபோ ச அஸ்ஸ, தே³வோ ச ஏகமேகங் பு²ஸாயெய்யா’’தி. அத² கோ² ஆயஸ்மா மஹகோ ததா²ரூபங் இத்³தா⁴பி⁴ஸங்கா²ரங் அபி⁴ஸங்க²ரி 5 யதா² ஸீதகோ ச வாதோ வாயி, அப்³ப⁴ஸம்பிலாபோ ச அஸ்ஸ 6, தே³வோ ச ஏகமேகங் பு²ஸி. அத² கோ² சித்தஸ்ஸ க³ஹபதினோ ஏதத³ஹோஸி – ‘‘யோ கோ² இமஸ்மிங் பி⁴க்கு²ஸங்கே⁴ ஸப்³ப³னவகோ பி⁴க்கு² தஸ்ஸாயங் ஏவரூபோ இத்³தா⁴னுபா⁴வோ’’தி . அத² கோ² ஆயஸ்மா மஹகோ ஆராமங் ஸம்பாபுணித்வா ஆயஸ்மந்தங் தே²ரங் ஏதத³வோச – ‘‘அலமெத்தாவதா, ப⁴ந்தே தே²ரா’’தி? ‘‘அலமெத்தாவதா, ஆவுஸோ மஹக! கதமெத்தாவதா, ஆவுஸோ மஹக! பூஜிதமெத்தாவதா, ஆவுஸோ மஹகோ’’தி . அத² கோ² தே²ரா பி⁴க்கூ² யதா²விஹாரங் அக³மங்ஸு. ஆயஸ்மாபி மஹகோ ஸகங் விஹாரங் அக³மாஸி.
‘‘Sādhu khvassa, āvuso mahaka, yaṃ sītako ca vāto vāyeyya, abbhasampilāpo ca assa, devo ca ekamekaṃ phusāyeyyā’’ti. Atha kho āyasmā mahako tathārūpaṃ iddhābhisaṅkhāraṃ abhisaṅkhari 7 yathā sītako ca vāto vāyi, abbhasampilāpo ca assa 8, devo ca ekamekaṃ phusi. Atha kho cittassa gahapatino etadahosi – ‘‘yo kho imasmiṃ bhikkhusaṅghe sabbanavako bhikkhu tassāyaṃ evarūpo iddhānubhāvo’’ti . Atha kho āyasmā mahako ārāmaṃ sampāpuṇitvā āyasmantaṃ theraṃ etadavoca – ‘‘alamettāvatā, bhante therā’’ti? ‘‘Alamettāvatā, āvuso mahaka! Katamettāvatā, āvuso mahaka! Pūjitamettāvatā, āvuso mahako’’ti . Atha kho therā bhikkhū yathāvihāraṃ agamaṃsu. Āyasmāpi mahako sakaṃ vihāraṃ agamāsi.
அத² கோ² சித்தோ க³ஹபதி யேனாயஸ்மா மஹகோ தேனுபஸங்கமி; உபஸங்கமித்வா ஆயஸ்மந்தங் மஹகங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² சித்தோ க³ஹபதி ஆயஸ்மந்தங் மஹகங் ஏதத³வோச – ‘‘ஸாது⁴ மே, ப⁴ந்தே, அய்யோ மஹகோ உத்தரிமனுஸ்ஸத⁴ம்மங் இத்³தி⁴பாடிஹாரியங் த³ஸ்ஸேதூ’’தி. ‘‘தேன ஹி த்வங், க³ஹபதி, ஆலிந்தே³ உத்தராஸங்க³ங் பஞ்ஞபெத்வா திணகலாபங் ஓகாஸேஹீ’’தி. ‘‘ஏவங், ப⁴ந்தே’’தி கோ² சித்தோ க³ஹபதி ஆயஸ்மதோ மஹகஸ்ஸ படிஸ்ஸுத்வா ஆலிந்தே³ உத்தராஸங்க³ங் பஞ்ஞபெத்வா திணகலாபங் ஓகாஸேஸி. அத² கோ² ஆயஸ்மா மஹகோ விஹாரங் பவிஸித்வா ஸூசிக⁴டிகங் த³த்வா ததா²ரூபங் இத்³தா⁴பி⁴ஸங்கா²ரங் அபி⁴ஸங்க²ரி யதா² தாலச்சி²க்³க³ளேன ச அக்³க³ளந்தரிகாய ச அச்சி நிக்க²மித்வா திணானி ஜா²பேஸி, உத்தராஸங்க³ங் ந ஜா²பேஸி. அத² கோ² சித்தோ க³ஹபதி உத்தராஸங்க³ங் பப்போ²டெத்வா ஸங்விக்³கோ³ லோமஹட்ட²ஜாதோ ஏகமந்தங் அட்டா²ஸி. அத² கோ² ஆயஸ்மா மஹகோ விஹாரா நிக்க²மித்வா சித்தங் க³ஹபதிங் ஏதத³வோச – ‘‘அலமெத்தாவதா, க³ஹபதீ’’தி?
Atha kho citto gahapati yenāyasmā mahako tenupasaṅkami; upasaṅkamitvā āyasmantaṃ mahakaṃ abhivādetvā ekamantaṃ nisīdi. Ekamantaṃ nisinno kho citto gahapati āyasmantaṃ mahakaṃ etadavoca – ‘‘sādhu me, bhante, ayyo mahako uttarimanussadhammaṃ iddhipāṭihāriyaṃ dassetū’’ti. ‘‘Tena hi tvaṃ, gahapati, ālinde uttarāsaṅgaṃ paññapetvā tiṇakalāpaṃ okāsehī’’ti. ‘‘Evaṃ, bhante’’ti kho citto gahapati āyasmato mahakassa paṭissutvā ālinde uttarāsaṅgaṃ paññapetvā tiṇakalāpaṃ okāsesi. Atha kho āyasmā mahako vihāraṃ pavisitvā sūcighaṭikaṃ datvā tathārūpaṃ iddhābhisaṅkhāraṃ abhisaṅkhari yathā tālacchiggaḷena ca aggaḷantarikāya ca acci nikkhamitvā tiṇāni jhāpesi, uttarāsaṅgaṃ na jhāpesi. Atha kho citto gahapati uttarāsaṅgaṃ papphoṭetvā saṃviggo lomahaṭṭhajāto ekamantaṃ aṭṭhāsi. Atha kho āyasmā mahako vihārā nikkhamitvā cittaṃ gahapatiṃ etadavoca – ‘‘alamettāvatā, gahapatī’’ti?
‘‘அலமெத்தாவதா , ப⁴ந்தே மஹக! கதமெத்தாவதா, ப⁴ந்தே, மஹக! பூஜிதமெத்தாவதா, ப⁴ந்தே மஹக! அபி⁴ரமது, ப⁴ந்தே, அய்யோ மஹகோ மச்சி²காஸண்டே³. ரமணீயங் அம்பா³டகவனங். அஹங் அய்யஸ்ஸ மஹகஸ்ஸ உஸ்ஸுக்கங் கரிஸ்ஸாமி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரான’’ந்தி. ‘‘கல்யாணங் வுச்சதி, க³ஹபதீ’’தி. அத² கோ² ஆயஸ்மா மஹகோ ஸேனாஸனங் ஸங்ஸாமெத்வா பத்தசீவரமாதா³ய மச்சி²காஸண்ட³ம்ஹா பக்காமி. யங் மச்சி²காஸண்ட³ம்ஹா பக்காமி, ததா² பக்கந்தோவ அஹோஸி; ந புன பச்சாக³ச்சீ²தி. சதுத்த²ங்.
‘‘Alamettāvatā , bhante mahaka! Katamettāvatā, bhante, mahaka! Pūjitamettāvatā, bhante mahaka! Abhiramatu, bhante, ayyo mahako macchikāsaṇḍe. Ramaṇīyaṃ ambāṭakavanaṃ. Ahaṃ ayyassa mahakassa ussukkaṃ karissāmi cīvarapiṇḍapātasenāsanagilānappaccayabhesajjaparikkhārāna’’nti. ‘‘Kalyāṇaṃ vuccati, gahapatī’’ti. Atha kho āyasmā mahako senāsanaṃ saṃsāmetvā pattacīvaramādāya macchikāsaṇḍamhā pakkāmi. Yaṃ macchikāsaṇḍamhā pakkāmi, tathā pakkantova ahosi; na puna paccāgacchīti. Catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. மஹகபாடிஹாரியஸுத்தவண்ணனா • 4. Mahakapāṭihāriyasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. மஹகபாடிஹாரியஸுத்தவண்ணனா • 4. Mahakapāṭihāriyasuttavaṇṇanā
