| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೭. ಮಹಾಕಪ್ಪಿನಸುತ್ತಂ
7. Mahākappinasuttaṃ
೯೮೩. ಸಾವತ್ಥಿನಿದಾನಂ। ತೇನ ಖೋ ಪನ ಸಮಯೇನ ಆಯಸ್ಮಾ ಮಹಾಕಪ್ಪಿನೋ ಭಗವತೋ ಅವಿದೂರೇ ನಿಸಿನ್ನೋ ಹೋತಿ ಪಲ್ಲಙ್ಕಂ ಆಭುಜಿತ್ವಾ ಉಜುಂ ಕಾಯಂ ಪಣಿಧಾಯ ಪರಿಮುಖಂ ಸತಿಂ ಉಪಟ್ಠಪೇತ್ವಾ। ಅದ್ದಸಾ ಖೋ ಭಗವಾ ಆಯಸ್ಮನ್ತಂ ಮಹಾಕಪ್ಪಿನಂ ಅವಿದೂರೇ ನಿಸಿನ್ನಂ ಪಲ್ಲಙ್ಕಂ ಆಭುಜಿತ್ವಾ ಉಜುಂ ಕಾಯಂ ಪಣಿಧಾಯ ಪರಿಮುಖಂ ಸತಿಂ ಉಪಟ್ಠಪೇತ್ವಾ। ದಿಸ್ವಾನ ಭಿಕ್ಖೂ ಆಮನ್ತೇಸಿ –
983. Sāvatthinidānaṃ. Tena kho pana samayena āyasmā mahākappino bhagavato avidūre nisinno hoti pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. Addasā kho bhagavā āyasmantaṃ mahākappinaṃ avidūre nisinnaṃ pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. Disvāna bhikkhū āmantesi –
‘‘ಪಸ್ಸಥ ನೋ ತುಮ್ಹೇ, ಭಿಕ್ಖವೇ, ಏತಸ್ಸ ಭಿಕ್ಖುನೋ ಕಾಯಸ್ಸ ಇಞ್ಜಿತತ್ತಂ ವಾ ಫನ್ದಿತತ್ತಂ ವಾ’’ತಿ? ‘‘ಯದಾಪಿ ಮಯಂ, ಭನ್ತೇ, ತಂ ಆಯಸ್ಮನ್ತಂ ಪಸ್ಸಾಮ ಸಙ್ಘಮಜ್ಝೇ ವಾ ನಿಸಿನ್ನಂ ಏಕಂ ವಾ ರಹೋ ನಿಸಿನ್ನಂ, ತದಾಪಿ ಮಯಂ ತಸ್ಸ ಆಯಸ್ಮತೋ ನ ಪಸ್ಸಾಮ ಕಾಯಸ್ಸ ಇಞ್ಜಿತತ್ತಂ ವಾ ಫನ್ದಿತತ್ತಂ ವಾ’’ತಿ।
‘‘Passatha no tumhe, bhikkhave, etassa bhikkhuno kāyassa iñjitattaṃ vā phanditattaṃ vā’’ti? ‘‘Yadāpi mayaṃ, bhante, taṃ āyasmantaṃ passāma saṅghamajjhe vā nisinnaṃ ekaṃ vā raho nisinnaṃ, tadāpi mayaṃ tassa āyasmato na passāma kāyassa iñjitattaṃ vā phanditattaṃ vā’’ti.
‘‘ಯಸ್ಸ, ಭಿಕ್ಖವೇ, ಸಮಾಧಿಸ್ಸ ಭಾವಿತತ್ತಾ ಬಹುಲೀಕತತ್ತಾ ನೇವ ಕಾಯಸ್ಸ ಇಞ್ಜಿತತ್ತಂ ವಾ ಹೋತಿ ಫನ್ದಿತತ್ತಂ ವಾ, ನ ಚಿತ್ತಸ್ಸ ಇಞ್ಜಿತತ್ತಂ ವಾ ಹೋತಿ ಫನ್ದಿತತ್ತಂ ವಾ, ತಸ್ಸ ಸೋ, ಭಿಕ್ಖವೇ, ಭಿಕ್ಖು ಸಮಾಧಿಸ್ಸ ನಿಕಾಮಲಾಭೀ ಅಕಿಚ್ಛಲಾಭೀ ಅಕಸಿರಲಾಭೀ। ಕತಮಸ್ಸ ಚ, ಭಿಕ್ಖವೇ, ಸಮಾಧಿಸ್ಸ ಭಾವಿತತ್ತಾ ಬಹುಲೀಕತತ್ತಾ ನೇವ ಕಾಯಸ್ಸ ಇಞ್ಜಿತತ್ತಂ ವಾ ಹೋತಿ ಫನ್ದಿತತ್ತಂ ವಾ, ನ ಚಿತ್ತಸ್ಸ ಇಞ್ಜಿತತ್ತಂ ವಾ ಹೋತಿ ಫನ್ದಿತತ್ತಂ ವಾ?
‘‘Yassa, bhikkhave, samādhissa bhāvitattā bahulīkatattā neva kāyassa iñjitattaṃ vā hoti phanditattaṃ vā, na cittassa iñjitattaṃ vā hoti phanditattaṃ vā, tassa so, bhikkhave, bhikkhu samādhissa nikāmalābhī akicchalābhī akasiralābhī. Katamassa ca, bhikkhave, samādhissa bhāvitattā bahulīkatattā neva kāyassa iñjitattaṃ vā hoti phanditattaṃ vā, na cittassa iñjitattaṃ vā hoti phanditattaṃ vā?
‘‘ಆನಾಪಾನಸ್ಸತಿಸಮಾಧಿಸ್ಸ, ಭಿಕ್ಖವೇ, ಭಾವಿತತ್ತಾ ಬಹುಲೀಕತತ್ತಾ ನೇವ ಕಾಯಸ್ಸ ಇಞ್ಜಿತತ್ತಂ ವಾ ಹೋತಿ ಫನ್ದಿತತ್ತಂ ವಾ, ನ ಚಿತ್ತಸ್ಸ ಇಞ್ಜಿತತ್ತಂ ವಾ ಹೋತಿ ಫನ್ದಿತತ್ತಂ ವಾ। ಕಥಂ ಭಾವಿತೇ ಚ, ಭಿಕ್ಖವೇ, ಆನಾಪಾನಸ್ಸತಿಸಮಾಧಿಮ್ಹಿ ಕಥಂ ಬಹುಲೀಕತೇ ನೇವ ಕಾಯಸ್ಸ ಇಞ್ಜಿತತ್ತಂ ವಾ ಹೋತಿ ಫನ್ದಿತತ್ತಂ ವಾ, ನ ಚಿತ್ತಸ್ಸ ಇಞ್ಜಿತತ್ತಂ ವಾ ಹೋತಿ ಫನ್ದಿತತ್ತಂ ವಾ?
‘‘Ānāpānassatisamādhissa, bhikkhave, bhāvitattā bahulīkatattā neva kāyassa iñjitattaṃ vā hoti phanditattaṃ vā, na cittassa iñjitattaṃ vā hoti phanditattaṃ vā. Kathaṃ bhāvite ca, bhikkhave, ānāpānassatisamādhimhi kathaṃ bahulīkate neva kāyassa iñjitattaṃ vā hoti phanditattaṃ vā, na cittassa iñjitattaṃ vā hoti phanditattaṃ vā?
‘‘ಇಧ, ಭಿಕ್ಖವೇ, ಭಿಕ್ಖು ಅರಞ್ಞಗತೋ ವಾ ರುಕ್ಖಮೂಲಗತೋ ವಾ ಸುಞ್ಞಾಗಾರಗತೋ ವಾ ನಿಸೀದತಿ ಪಲ್ಲಙ್ಕಂ ಆಭುಜಿತ್ವಾ ಉಜುಂ ಕಾಯಂ ಪಣಿಧಾಯ ಪರಿಮುಖಂ ಸತಿಂ ಉಪಟ್ಠಪೇತ್ವಾ। ಸೋ ಸತೋವ ಅಸ್ಸಸತಿ, ಸತೋವ ಪಸ್ಸಸತಿ…ಪೇ॰… ‘ಪಟಿನಿಸ್ಸಗ್ಗಾನುಪಸ್ಸೀ ಅಸ್ಸಸಿಸ್ಸಾಮೀ’ತಿ ಸಿಕ್ಖತಿ, ‘ಪಟಿನಿಸ್ಸಗ್ಗಾನುಪಸ್ಸೀ ಪಸ್ಸಸಿಸ್ಸಾಮೀ’ತಿ ಸಿಕ್ಖತಿ। ಏವಂ ಭಾವಿತೇ ಚ ಖೋ, ಭಿಕ್ಖವೇ, ಆನಾಪಾನಸ್ಸತಿಸಮಾಧಿಮ್ಹಿ ಏವಂ ಬಹುಲೀಕತೇ ನೇವ ಕಾಯಸ್ಸ ಇಞ್ಜಿತತ್ತಂ ವಾ ಹೋತಿ ಫನ್ದಿತತ್ತಂ ವಾ, ನ ಚಿತ್ತಸ್ಸ ಇಞ್ಜಿತತ್ತಂ ವಾ ಹೋತಿ ಫನ್ದಿತತ್ತಂ ವಾ’’ತಿ। ಸತ್ತಮಂ।
‘‘Idha, bhikkhave, bhikkhu araññagato vā rukkhamūlagato vā suññāgāragato vā nisīdati pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. So satova assasati, satova passasati…pe… ‘paṭinissaggānupassī assasissāmī’ti sikkhati, ‘paṭinissaggānupassī passasissāmī’ti sikkhati. Evaṃ bhāvite ca kho, bhikkhave, ānāpānassatisamādhimhi evaṃ bahulīkate neva kāyassa iñjitattaṃ vā hoti phanditattaṃ vā, na cittassa iñjitattaṃ vā hoti phanditattaṃ vā’’ti. Sattamaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೭. ಮಹಾಕಪ್ಪಿನಸುತ್ತವಣ್ಣನಾ • 7. Mahākappinasuttavaṇṇanā
