| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১১. মহাকপ্পিনসুত্তৰণ্ণনা
11. Mahākappinasuttavaṇṇanā
২৪৫. মহাকপ্পিনোতি পূজাৰচনমেতং যথা ‘‘মহামোগ্গল্লানো’’তি। তথারূপন্তি ‘‘বুদ্ধো ধম্মো’’তিআদিকং গুণৰিসেসৰন্তপটিবদ্ধং। সাসনন্তি দেসন্তরতো আগতৰচনং। জঙ্ঘৰাণিজাতি জঙ্ঘচারিনো ৰাণিজা। কিঞ্চি সাসনন্তি অপুব্বপৰত্তিদীপকং কিঞ্চি ৰচনন্তি পুচ্ছি। পীতি উপ্পজ্জি যথা তং সুচিরং কতাভিনীহারতায পরিপক্কঞাণস্স। অপরিমাণং গুণস্স অপরিমাণতো সব্বঞ্ঞুগুণপরিদীপনতো, সেসরতনদ্ৰযে নিয্যানিকভাৰদীপনতো দিট্ঠিসীলসামঞ্ঞেন সংহতভাৰদীপনতোতি ৰত্তব্বং। যথানুসিট্ঠং পটিপজ্জমানে অপাযদুক্খতো সংসারদুক্খতো চ অপতন্তে ধারেতীতি ধম্মো। সুপরিসুদ্ধদিট্ঠিসীলসামঞ্ঞেন সংহতোতি সঙ্ঘোতি। রতনত্থো পন তিণ্ণম্পি সদিসো এৰাতি।
245.Mahākappinoti pūjāvacanametaṃ yathā ‘‘mahāmoggallāno’’ti. Tathārūpanti ‘‘buddho dhammo’’tiādikaṃ guṇavisesavantapaṭibaddhaṃ. Sāsananti desantarato āgatavacanaṃ. Jaṅghavāṇijāti jaṅghacārino vāṇijā. Kiñci sāsananti apubbapavattidīpakaṃ kiñci vacananti pucchi. Pīti uppajji yathā taṃ suciraṃ katābhinīhāratāya paripakkañāṇassa. Aparimāṇaṃ guṇassa aparimāṇato sabbaññuguṇaparidīpanato, sesaratanadvaye niyyānikabhāvadīpanato diṭṭhisīlasāmaññena saṃhatabhāvadīpanatoti vattabbaṃ. Yathānusiṭṭhaṃ paṭipajjamāne apāyadukkhato saṃsāradukkhato ca apatante dhāretīti dhammo. Suparisuddhadiṭṭhisīlasāmaññena saṃhatoti saṅghoti. Ratanattho pana tiṇṇampi sadiso evāti.
নৰসতসহস্সানি অদাসি দেৰী। তুম্হেতি রাজিনিং গারৰেন বহুৰচনেন ৰদতি। রাগোতি অনুগচ্ছন্তরাগো।
Navasatasahassāni adāsi devī. Tumheti rājiniṃ gāravena bahuvacanena vadati. Rāgoti anugacchantarāgo.
জনিতেতি কম্মকিলেসেহি নিব্বত্তিতে। কম্মকিলেসেহি পজাতত্তা পজাতি পজাসদ্দো জনিতসদ্দেন সমানত্থোতি আহ – ‘‘জনিতে, পজাযাতি অত্থো’’তি। অট্ঠহি ৰিজ্জাহীতি অম্বট্ঠসুত্তে (দী॰ নি॰ ১.২৭৮) আগতনযেন। তত্থ হি ৰিপস্সনাঞাণমনোমযিদ্ধীহি সহ ছ অভিঞ্ঞা ‘‘অট্ঠ ৰিজ্জা’’তি আগতা । তপতি পটিপক্খৰিধমনেন ৰিজ্জোততি, তং সূরিযস্স ৰিরোচনন্তি আহ – ‘‘তপতীতি ৰিরোচতী’’তি। ঝানং সমাপজ্জিত্ৰা সমাহিতেন চিত্তেন ৰিপস্সনং ৰড্ঢেত্ৰা ফলসমাপত্তিং সমাপজ্জিত্ৰা নিসিন্নোতি আহ – ‘‘দুৰিধেন ঝানেন ঝাযমানো’’তি। সব্বমঙ্গলগাথাতি সব্বমঙ্গলাৰিরোধী গাথাতি ৰদন্তি। তথা হি ৰদন্তি –
Janiteti kammakilesehi nibbattite. Kammakilesehi pajātattā pajāti pajāsaddo janitasaddena samānatthoti āha – ‘‘janite, pajāyāti attho’’ti. Aṭṭhahi vijjāhīti ambaṭṭhasutte (dī. ni. 1.278) āgatanayena. Tattha hi vipassanāñāṇamanomayiddhīhi saha cha abhiññā ‘‘aṭṭha vijjā’’ti āgatā . Tapati paṭipakkhavidhamanena vijjotati, taṃ sūriyassa virocananti āha – ‘‘tapatīti virocatī’’ti. Jhānaṃ samāpajjitvā samāhitena cittena vipassanaṃ vaḍḍhetvā phalasamāpattiṃ samāpajjitvā nisinnoti āha – ‘‘duvidhena jhānena jhāyamāno’’ti. Sabbamaṅgalagāthāti sabbamaṅgalāvirodhī gāthāti vadanti. Tathā hi vadanti –
‘‘মঙ্গলং ভগৰা বুদ্ধো, ধম্মো সঙ্ঘো চ মঙ্গলং।
‘‘Maṅgalaṃ bhagavā buddho, dhammo saṅgho ca maṅgalaṃ;
সব্বেসম্পি চ সত্তানং, স পুঞ্ঞৰিতমঙ্গল’’ন্তি॥
Sabbesampi ca sattānaṃ, sa puññavitamaṅgala’’nti.
পূজং কারেত্ৰা একং অগারিকধম্মকথিকং উপাসকং আহ। এত্থ চ ‘‘ঝাযী তপতী’’তি ইমিনা আরম্মণূপনিজ্ঝানানং গহিতত্তা ধম্মরতনং গহিতমেৰ। ‘‘ব্রাহ্মণো’’তি ইমিনা সঙ্ঘরতনং গহিতমেৰ। বুদ্ধরতনং পন সরূপেনেৰ গহিতন্তি।
Pūjaṃ kāretvā ekaṃ agārikadhammakathikaṃ upāsakaṃ āha. Ettha ca ‘‘jhāyī tapatī’’ti iminā ārammaṇūpanijjhānānaṃ gahitattā dhammaratanaṃ gahitameva. ‘‘Brāhmaṇo’’ti iminā saṅgharatanaṃ gahitameva. Buddharatanaṃ pana sarūpeneva gahitanti.
মহাকপ্পিনসুত্তৰণ্ণনা নিট্ঠিতা।
Mahākappinasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১১. মহাকপ্পিনসুত্তং • 11. Mahākappinasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১১. মহাকপ্পিনসুত্তৰণ্ণনা • 11. Mahākappinasuttavaṇṇanā
