| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
11. මහාකප්‌පිනසුත්‌තවණ්‌ණනා
11. Mahākappinasuttavaṇṇanā
245. මහාකප්‌පිනොති පූජාවචනමෙතං යථා ‘‘මහාමොග්‌ගල්‌ලානො’’ති. තථාරූපන්‌ති ‘‘බුද්‌ධො ධම්‌මො’’තිආදිකං ගුණවිසෙසවන්‌තපටිබද්‌ධං. සාසනන්‌ති දෙසන්‌තරතො ආගතවචනං. ජඞ්‌ඝවාණිජාති ජඞ්‌ඝචාරිනො වාණිජා. කිඤ්‌චි සාසනන්‌ති අපුබ්‌බපවත්‌තිදීපකං කිඤ්‌චි වචනන්‌ති පුච්‌ඡි. පීති උප්‌පජ්‌ජි යථා තං සුචිරං කතාභිනීහාරතාය පරිපක්‌කඤාණස්‌ස. අපරිමාණං ගුණස්‌ස අපරිමාණතො සබ්‌බඤ්‌ඤුගුණපරිදීපනතො, සෙසරතනද්‌වයෙ නිය්‍යානිකභාවදීපනතො දිට්‌ඨිසීලසාමඤ්‌ඤෙන සංහතභාවදීපනතොති වත්‌තබ්‌බං. යථානුසිට්‌ඨං පටිපජ්‌ජමානෙ අපායදුක්‌ඛතො සංසාරදුක්‌ඛතො ච අපතන්‌තෙ ධාරෙතීති ධම්‌මො. සුපරිසුද්‌ධදිට්‌ඨිසීලසාමඤ්‌ඤෙන සංහතොති සඞ්‌ඝොති. රතනත්‌ථො පන තිණ්‌ණම්‌පි සදිසො එවාති.
245.Mahākappinoti pūjāvacanametaṃ yathā ‘‘mahāmoggallāno’’ti. Tathārūpanti ‘‘buddho dhammo’’tiādikaṃ guṇavisesavantapaṭibaddhaṃ. Sāsananti desantarato āgatavacanaṃ. Jaṅghavāṇijāti jaṅghacārino vāṇijā. Kiñci sāsananti apubbapavattidīpakaṃ kiñci vacananti pucchi. Pīti uppajji yathā taṃ suciraṃ katābhinīhāratāya paripakkañāṇassa. Aparimāṇaṃ guṇassa aparimāṇato sabbaññuguṇaparidīpanato, sesaratanadvaye niyyānikabhāvadīpanato diṭṭhisīlasāmaññena saṃhatabhāvadīpanatoti vattabbaṃ. Yathānusiṭṭhaṃ paṭipajjamāne apāyadukkhato saṃsāradukkhato ca apatante dhāretīti dhammo. Suparisuddhadiṭṭhisīlasāmaññena saṃhatoti saṅghoti. Ratanattho pana tiṇṇampi sadiso evāti.
නවසතසහස්‌සානි අදාසි දෙවී. තුම්‌හෙති රාජිනිං ගාරවෙන බහුවචනෙන වදති. රාගොති අනුගච්‌ඡන්‌තරාගො.
Navasatasahassāni adāsi devī. Tumheti rājiniṃ gāravena bahuvacanena vadati. Rāgoti anugacchantarāgo.
ජනිතෙති කම්‌මකිලෙසෙහි නිබ්‌බත්‌තිතෙ. කම්‌මකිලෙසෙහි පජාතත්‌තා පජාති පජාසද්‌දො ජනිතසද්‌දෙන සමානත්‌ථොති ආහ – ‘‘ජනිතෙ, පජායාති අත්‌ථො’’ති. අට්‌ඨහි විජ්‌ජාහීති අම්‌බට්‌ඨසුත්‌තෙ (දී. නි. 1.278) ආගතනයෙන. තත්‌ථ හි විපස්‌සනාඤාණමනොමයිද්‌ධීහි සහ ඡ අභිඤ්‌ඤා ‘‘අට්‌ඨ විජ්‌ජා’’ති ආගතා . තපති පටිපක්‌ඛවිධමනෙන විජ්‌ජොතති, තං සූරියස්‌ස විරොචනන්‌ති ආහ – ‘‘තපතීති විරොචතී’’ති. ඣානං සමාපජ්‌ජිත්‌වා සමාහිතෙන චිත්‌තෙන විපස්‌සනං වඩ්‌ඪෙත්‌වා ඵලසමාපත්‌තිං සමාපජ්‌ජිත්‌වා නිසින්‌නොති ආහ – ‘‘දුවිධෙන ඣානෙන ඣායමානො’’ති. සබ්‌බමඞ්‌ගලගාථාති සබ්‌බමඞ්‌ගලාවිරොධී ගාථාති වදන්‌ති. තථා හි වදන්‌ති –
Janiteti kammakilesehi nibbattite. Kammakilesehi pajātattā pajāti pajāsaddo janitasaddena samānatthoti āha – ‘‘janite, pajāyāti attho’’ti. Aṭṭhahi vijjāhīti ambaṭṭhasutte (dī. ni. 1.278) āgatanayena. Tattha hi vipassanāñāṇamanomayiddhīhi saha cha abhiññā ‘‘aṭṭha vijjā’’ti āgatā . Tapati paṭipakkhavidhamanena vijjotati, taṃ sūriyassa virocananti āha – ‘‘tapatīti virocatī’’ti. Jhānaṃ samāpajjitvā samāhitena cittena vipassanaṃ vaḍḍhetvā phalasamāpattiṃ samāpajjitvā nisinnoti āha – ‘‘duvidhena jhānena jhāyamāno’’ti. Sabbamaṅgalagāthāti sabbamaṅgalāvirodhī gāthāti vadanti. Tathā hi vadanti –
‘‘මඞ්‌ගලං භගවා බුද්‌ධො, ධම්‌මො සඞ්‌ඝො ච මඞ්‌ගලං;
‘‘Maṅgalaṃ bhagavā buddho, dhammo saṅgho ca maṅgalaṃ;
සබ්‌බෙසම්‌පි ච සත්‌තානං, ස පුඤ්‌ඤවිතමඞ්‌ගල’’න්‌ති.
Sabbesampi ca sattānaṃ, sa puññavitamaṅgala’’nti.
පූජං කාරෙත්‌වා එකං අගාරිකධම්‌මකථිකං උපාසකං ආහ. එත්‌ථ ච ‘‘ඣායී තපතී’’ති ඉමිනා ආරම්‌මණූපනිජ්‌ඣානානං ගහිතත්‌තා ධම්‌මරතනං ගහිතමෙව. ‘‘බ්‍රාහ්‌මණො’’ති ඉමිනා සඞ්‌ඝරතනං ගහිතමෙව. බුද්‌ධරතනං පන සරූපෙනෙව ගහිතන්‌ති.
Pūjaṃ kāretvā ekaṃ agārikadhammakathikaṃ upāsakaṃ āha. Ettha ca ‘‘jhāyī tapatī’’ti iminā ārammaṇūpanijjhānānaṃ gahitattā dhammaratanaṃ gahitameva. ‘‘Brāhmaṇo’’ti iminā saṅgharatanaṃ gahitameva. Buddharatanaṃ pana sarūpeneva gahitanti.
මහාකප්‌පිනසුත්‌තවණ්‌ණනා නිට්‌ඨිතා.
Mahākappinasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 11. මහාකප්‌පිනසුත්‌තං • 11. Mahākappinasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 11. මහාකප්‌පිනසුත්‌තවණ්‌ණනා • 11. Mahākappinasuttavaṇṇanā
