| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
3. махаагаббинад̇т̇зраабад̣̇аанаван̣н̣анаа
3. Mahākappinattheraapadānavaṇṇanā
бад̣̇умуд̇д̇аро наама ж̇инод̇иаад̣̇игам̣ ааяасмад̇о габбинад̇т̇зрасса абад̣̇аанам̣. аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяаани бун̃н̃аани убажинанд̇о бад̣̇умуд̇д̇арасса бхаг̇авад̇о гаалз хам̣савад̇ийнаг̇арз гулаг̇зхз ниб̣б̣ад̇д̇о вин̃н̃уд̇ам̣ бад̇ваа сад̇т̇у санд̇игз д̇хаммад̣̇зсанам̣ сун̣анд̇о сад̇т̇аараа згам̣ бхигкум̣ оваад̣̇агаанам̣ аг̇г̇адтаанз табид̇ам̣ д̣̇исваа ад̇хигаарагаммам̣ гад̇ваа д̇ам̣ таананд̇арам̣ бад̇т̇зси.
Padumuttaronāma jinotiādikaṃ āyasmato kappinattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatīnagare kulagehe nibbatto viññutaṃ patvā satthu santike dhammadesanaṃ suṇanto satthārā ekaṃ bhikkhuṃ ovādakānaṃ aggaṭṭhāne ṭhapitaṃ disvā adhikārakammaṃ katvā taṃ ṭhānantaraṃ patthesi.
со д̇ад̇т̇а яааваж̇ийвам̣ гусалам̣ гад̇ваа д̣̇звамануссзсу сам̣саранд̇о б̣аараан̣асид̇о авид̣̇уурз згасмим̣ бзсагаараг̇аамз ж̇здтабзсагаараг̇зхз ниб̣б̣ад̇д̇о д̇ад̣̇аа сахассамад̇д̇аа бажжзгаб̣уд̣̇д̇хаа химаванд̇з адта маасз васид̇ваа вассигз жад̇д̇ааро маасз ж̇анабад̣̇з васанд̇и. д̇з згаваарам̣ б̣аараан̣асияаа авид̣̇уурз од̇арид̇ваа ‘‘сзнаасанам̣ гаран̣ад̇т̇ааяа хад̇т̇агаммам̣ яаажат̇аа’’д̇и ран̃н̃о санд̇игам̣ адта бажжзгаб̣уд̣̇д̇хз бахин̣им̣су. д̇ад̣̇аа бана ран̃н̃о ваббаман̇г̇алам̣ ахоси. со ‘‘бажжзгаб̣уд̣̇д̇хаа гира ааг̇ад̇аа’’д̇и суд̇ваа нигкамид̇ваа ааг̇ад̇агааран̣ам̣ бужчид̇ваа ‘‘аж̇ж̇а, бханд̇з, огаасо над̇т̇и свз амхаагам̣ ваббаман̇г̇алам̣ , д̇ад̇ияад̣̇ивасз гариссаамаа’’д̇и вад̇ваа бажжзгаб̣уд̣̇д̇хз аниманд̇зд̇ваава баависи. бажжзгаб̣уд̣̇д̇хаа ‘‘ан̃н̃ам̣ г̇аамам̣ бависиссаамаа’’д̇и баггамим̣су.
So tattha yāvajīvaṃ kusalaṃ katvā devamanussesu saṃsaranto bārāṇasito avidūre ekasmiṃ pesakāragāme jeṭṭhapesakāragehe nibbatto tadā sahassamattā paccekabuddhā himavante aṭṭha māse vasitvā vassike cattāro māse janapade vasanti. Te ekavāraṃ bārāṇasiyā avidūre otaritvā ‘‘senāsanaṃ karaṇatthāya hatthakammaṃ yācathā’’ti rañño santikaṃ aṭṭha paccekabuddhe pahiṇiṃsu. Tadā pana rañño vappamaṅgalaṃ ahosi. So ‘‘paccekabuddhā kira āgatā’’ti sutvā nikkhamitvā āgatakāraṇaṃ pucchitvā ‘‘ajja, bhante, okāso natthi sve amhākaṃ vappamaṅgalaṃ , tatiyadivase karissāmā’’ti vatvā paccekabuddhe animantetvāva pāvisi. Paccekabuddhā ‘‘aññaṃ gāmaṃ pavisissāmā’’ti pakkamiṃsu.
д̇асмим̣ самаяз ж̇здтабзсагаарасса бхарияаа гзнажид̣̇зва гаран̣ийязна б̣аараан̣асим̣ г̇ажчанд̇ий д̇з бажжзгаб̣уд̣̇д̇хз д̣̇исваа ванд̣̇ид̇ваа, ‘‘гим̣, бханд̇з, авзлааяа аяяаа ааг̇ад̇аа’’д̇и бужчи. д̇з аад̣̇ид̇о бадтааяа гат̇зсум̣. д̇ам̣ суд̇ваа сад̣̇д̇хаасамбаннаа б̣уд̣̇д̇хисамбаннаа ид̇т̇ий ‘‘свз, бханд̇з, амхаагам̣ бхигкам̣ г̇ан̣хат̇аа’’д̇и ниманд̇зси. ‘‘б̣ахугаа маяам̣, бхаг̇иний’’д̇и. ‘‘гид̇д̇агаа, бханд̇з’’д̇и? ‘‘сахассамад̇д̇аа, бхаг̇иний’’д̇и. ‘‘бханд̇з, имасмим̣ но г̇аамз сахассамад̇д̇аа васимхаа, згзго згзгасса бхигкам̣ д̣̇ассад̇и, бхигкам̣ ад̇хиваасзт̇а, ахамзва во васанадтаанам̣ гаараабзссаамий’’д̇и ааха. бажжзгаб̣уд̣̇д̇хаа ад̇хиваасзсум̣.
Tasmiṃ samaye jeṭṭhapesakārassa bhariyā kenacideva karaṇīyena bārāṇasiṃ gacchantī te paccekabuddhe disvā vanditvā, ‘‘kiṃ, bhante, avelāya ayyā āgatā’’ti pucchi. Te ādito paṭṭhāya kathesuṃ. Taṃ sutvā saddhāsampannā buddhisampannā itthī ‘‘sve, bhante, amhākaṃ bhikkhaṃ gaṇhathā’’ti nimantesi. ‘‘Bahukā mayaṃ, bhaginī’’ti. ‘‘Kittakā, bhante’’ti? ‘‘Sahassamattā, bhaginī’’ti. ‘‘Bhante, imasmiṃ no gāme sahassamattā vasimhā, ekeko ekekassa bhikkhaṃ dassati, bhikkhaṃ adhivāsetha, ahameva vo vasanaṭṭhānaṃ kārāpessāmī’’ti āha. Paccekabuddhā adhivāsesuṃ.
саа г̇аамам̣ бависид̇ваа уг̇гхосзси – ‘‘аммад̇аад̇аа, ахам̣ сахассамад̇д̇з бажжзгаб̣уд̣̇д̇хз д̣̇исваа ниманд̇зсим̣, аяяаанам̣ нисийд̣̇анадтаанам̣ сам̣вид̣̇ахат̇а, яааг̇убхад̇д̇аад̣̇ийни самбаад̣̇зт̇аа’’д̇и г̇аамамаж̇жхз ман̣д̣абам̣ гаараабзд̇ваа аасанаани бан̃н̃аабзд̇ваа бунад̣̇ивасз бажжзгаб̣уд̣̇д̇хз нисийд̣̇аабзд̇ваа бан̣ийд̇зна каад̣̇анийязна бхож̇анийязна баривисид̇ваа бхад̇д̇агижжабарияосаанз д̇асмим̣ г̇аамз саб̣б̣аа ид̇т̇ияо аад̣̇ааяа д̇аахи сад̣̇д̇хим̣ бажжзгаб̣уд̣̇д̇хз ванд̣̇ид̇ваа д̇змаасам̣ васанад̇т̇ааяа бадин̃н̃ам̣ г̇ан̣хид̇ваа буна г̇аамз уг̇гхосзси – ‘‘аммад̇аад̇аа, згзгагулад̇о згзгабурисо ваасипарасуаад̣̇ийни г̇ахзд̇ваа аран̃н̃ам̣ бависид̇ваа д̣̇аб̣б̣асамбхаарз аахарид̇ваа аяяаанам̣ васанадтаанам̣ гарод̇уу’’д̇и. г̇аамаваасино д̇ассааязва важанам̣ суд̇ваа згзго згзгам̣ гад̇ваа сад̣̇д̇хим̣ рад̇д̇ид̣̇иваадтаанзхи бан̣н̣асааласахассам̣ нидтаабзд̇ваа ад̇д̇ано ад̇д̇ано бан̣н̣асаалааяам̣ убаг̇ад̇ам̣ бажжзгаб̣уд̣̇д̇хам̣ ‘‘ахам̣ саггажжам̣ убадтахиссаами, ахам̣ саггажжам̣ убадтахиссаамий’’д̇и вад̇ваа убадтахим̣су. саа вассам̣вудтагаалз ‘‘ад̇д̇ано ад̇д̇ано бан̣н̣асаалааяа вассам̣вудтаанам̣ бажжзгаб̣уд̣̇д̇хаанам̣ жийварасаадагз саж̇ж̇зт̇аа’’д̇и самаад̣̇абзд̇ваа згзгасса сахасса сахассамуулам̣ жийварам̣ д̣̇аабзси. бажжзгаб̣уд̣̇д̇хаа вудтавассаа анумод̣̇анам̣ гад̇ваа баггамим̣су. г̇аамаваасиноби ид̣̇ам̣ бун̃н̃агаммам̣ гад̇ваа д̇ад̇о жуд̇о д̇аавад̇им̣сад̣̇звалогз ниб̣б̣ад̇д̇ид̇ваа г̇ан̣ад̣̇звад̇аа наама ахзсум̣.
Sā gāmaṃ pavisitvā ugghosesi – ‘‘ammatātā, ahaṃ sahassamatte paccekabuddhe disvā nimantesiṃ, ayyānaṃ nisīdanaṭṭhānaṃ saṃvidahatha, yāgubhattādīni sampādethā’’ti gāmamajjhe maṇḍapaṃ kārāpetvā āsanāni paññāpetvā punadivase paccekabuddhe nisīdāpetvā paṇītena khādanīyena bhojanīyena parivisitvā bhattakiccapariyosāne tasmiṃ gāme sabbā itthiyo ādāya tāhi saddhiṃ paccekabuddhe vanditvā temāsaṃ vasanatthāya paṭiññaṃ gaṇhitvā puna gāme ugghosesi – ‘‘ammatātā, ekekakulato ekekapuriso vāsipharasuādīni gahetvā araññaṃ pavisitvā dabbasambhāre āharitvā ayyānaṃ vasanaṭṭhānaṃ karotū’’ti. Gāmavāsino tassāyeva vacanaṃ sutvā ekeko ekekaṃ katvā saddhiṃ rattidivāṭṭhānehi paṇṇasālasahassaṃ niṭṭhāpetvā attano attano paṇṇasālāyaṃ upagataṃ paccekabuddhaṃ ‘‘ahaṃ sakkaccaṃ upaṭṭhahissāmi, ahaṃ sakkaccaṃ upaṭṭhahissāmī’’ti vatvā upaṭṭhahiṃsu. Sā vassaṃvuṭṭhakāle ‘‘attano attano paṇṇasālāya vassaṃvuṭṭhānaṃ paccekabuddhānaṃ cīvarasāṭake sajjethā’’ti samādapetvā ekekassa sahassa sahassamūlaṃ cīvaraṃ dāpesi. Paccekabuddhā vuṭṭhavassā anumodanaṃ katvā pakkamiṃsu. Gāmavāsinopi idaṃ puññakammaṃ katvā tato cuto tāvatiṃsadevaloke nibbattitvā gaṇadevatā nāma ahesuṃ.
д̇з д̇ад̇т̇а д̣̇иб̣б̣асамбад̇д̇им̣ анубхавид̇ваа гассабасаммаасамб̣уд̣̇д̇хагаалз гудумб̣игаг̇зхзсу ниб̣б̣ад̇д̇им̣су. буб̣б̣з ж̇здтагабзсагааро ж̇здтагагудумб̣игасса буд̇д̇о ахоси. бхарияаабисса згасса ж̇здтагагудумб̣игасса д̇хийд̇аа ахоси. сзсаанам̣ бхарияааяо сзсагудумб̣игаанам̣ д̇хийд̇аро ахзсум̣, д̇аа саб̣б̣ааби ваяаббад̇д̇аа барагулам̣ г̇ажчанд̇ияо д̇зсам̣ д̇зсам̣язва г̇зхаани аг̇амам̣су. ат̇згад̣̇ивасам̣ вихаарз д̇хаммассаванз сан̇гхудтз ‘‘сад̇т̇аа д̇хаммам̣ д̣̇зсзссад̇ий’’д̇и суд̇ваа д̇з саб̣б̣зби гудумб̣игаа ‘‘д̇хаммам̣ соссаамаа’’д̇и бхарияаахи сад̣̇д̇хим̣ вихаарам̣ аг̇амам̣су. д̇зсам̣ вихаарамаж̇жхам̣ бавидтагкан̣з вассам̣ васси. язсам̣ гулуубагаа ваа н̃аад̇исааман̣зраад̣̇аяо ваа ад̇т̇и, д̇з д̇зсам̣ баривзн̣аад̣̇ийни бависим̣су. д̇з бана д̇ат̇ааруубаанам̣ над̇т̇ид̇ааяа гад̇т̇ажи бависид̇ум̣ ависаханд̇аа вихаарамаж̇жхзязва адтам̣су. ат̇а нз ж̇здтагагудумб̣иго ааха – ‘‘бассат̇а, бхо, амхаагам̣ виббагаарам̣, гулабуд̇д̇зхи наама зд̇д̇агзна лаж̇ж̇ид̇ум̣ яуд̇д̇а’’нд̇и. ‘‘аяяа, гим̣ гаромаа’’д̇и? ‘‘маяам̣ виссаасигадтаанасса абхаавзна имам̣ виббагаарам̣ бад̇д̇аа, саб̣б̣з д̇ханам̣ сам̣харид̇ваа баривзн̣ам̣ гариссаамаа’’д̇и. ‘‘саад̇ху, аяяаа’’д̇и ж̇здтаго сахассам̣ ад̣̇ааси. сзсаа бан̃жа бан̃жа сад̇аани. ид̇т̇ияо ад̣дхад̇зяяаани ад̣дхад̇зяяаани сад̇аани. д̇з д̇ам̣ д̇ханам̣ аахарид̇ваа сахассагуудааг̇аарабариваарам̣ сад̇т̇у васанад̇т̇ааяа махаабаривзн̣ам̣ наама гаараабзсум̣. навагаммасса маханд̇ад̇ааяа д̇ханз аббахонд̇з буб̣б̣з д̣̇иннад̇ханад̇о буна убад̣дхуубад̣дхам̣ ад̣̇ам̣су. нидтид̇з баривзн̣з вихаарамахам̣ гаронд̇аа б̣уд̣̇д̇хаббамукасса бхигкусан̇гхасса сад̇д̇аахам̣ махаад̣̇аанам̣ д̣̇ад̇ваа вийсад̇ияаа бхигкусахассаанам̣ жийвараани саж̇ж̇аяим̣су.
Te tattha dibbasampattiṃ anubhavitvā kassapasammāsambuddhakāle kuṭumbikagehesu nibbattiṃsu. Pubbe jeṭṭhakapesakāro jeṭṭhakakuṭumbikassa putto ahosi. Bhariyāpissa ekassa jeṭṭhakakuṭumbikassa dhītā ahosi. Sesānaṃ bhariyāyo sesakuṭumbikānaṃ dhītaro ahesuṃ, tā sabbāpi vayappattā parakulaṃ gacchantiyo tesaṃ tesaṃyeva gehāni agamaṃsu. Athekadivasaṃ vihāre dhammassavane saṅghuṭṭhe ‘‘satthā dhammaṃ desessatī’’ti sutvā te sabbepi kuṭumbikā ‘‘dhammaṃ sossāmā’’ti bhariyāhi saddhiṃ vihāraṃ agamaṃsu. Tesaṃ vihāramajjhaṃ paviṭṭhakkhaṇe vassaṃ vassi. Yesaṃ kulūpakā vā ñātisāmaṇerādayo vā atthi, te tesaṃ pariveṇādīni pavisiṃsu. Te pana tathārūpānaṃ natthitāya katthaci pavisituṃ avisahantā vihāramajjheyeva aṭṭhaṃsu. Atha ne jeṭṭhakakuṭumbiko āha – ‘‘passatha, bho, amhākaṃ vippakāraṃ, kulaputtehi nāma ettakena lajjituṃ yutta’’nti. ‘‘Ayya, kiṃ karomā’’ti? ‘‘Mayaṃ vissāsikaṭṭhānassa abhāvena imaṃ vippakāraṃ pattā, sabbe dhanaṃ saṃharitvā pariveṇaṃ karissāmā’’ti. ‘‘Sādhu, ayyā’’ti jeṭṭhako sahassaṃ adāsi. Sesā pañca pañca satāni. Itthiyo aḍḍhateyyāni aḍḍhateyyāni satāni. Te taṃ dhanaṃ āharitvā sahassakūṭāgāraparivāraṃ satthu vasanatthāya mahāpariveṇaṃ nāma kārāpesuṃ. Navakammassa mahantatāya dhane appahonte pubbe dinnadhanato puna upaḍḍhūpaḍḍhaṃ adaṃsu. Niṭṭhite pariveṇe vihāramahaṃ karontā buddhappamukhassa bhikkhusaṅghassa sattāhaṃ mahādānaṃ datvā vīsatiyā bhikkhusahassānaṃ cīvarāni sajjayiṃsu.
ж̇здтагагудумб̣игасса бана бхарияаа ад̇д̇ано бан̃н̃ааяа тид̇аа ахам̣ д̇зхи самагам̣ агад̇ваа ад̇ирзгад̇арам̣ гад̇ваа ‘‘сад̇т̇аарам̣ бууж̇зссаамий’’д̇и анож̇абубпаван̣н̣зна сахассамуулзна саадагзна сад̣̇д̇хим̣ анож̇абубпажан̇годагам̣ г̇ахзд̇ваа сад̇т̇аарам̣ анож̇абубпзхи бууж̇зд̇ваа д̇ам̣ саадагам̣ сад̇т̇у баад̣̇амуулз табзд̇ваа, ‘‘бханд̇з, ниб̣б̣ад̇д̇аниб̣б̣ад̇д̇адтаанз анож̇абубпаван̣н̣ам̣язва мз сарийрам̣ ход̇у, анож̇аад̇взва жа наамам̣ ход̇уу’’д̇и бад̇т̇анам̣ агааси. сад̇т̇аа ‘‘звам̣ ход̇уу’’д̇и анумод̣̇анам̣ агааси. д̇з саб̣б̣зби яаавад̇ааяугам̣ тад̇ваа д̇ад̇о жуд̇аа д̣̇звалогз ниб̣б̣ад̇д̇им̣су. д̇з имасмим̣ б̣уд̣̇д̇хуббаад̣̇з д̣̇звалогаа жавид̇ваа ж̇здтаго гуггудавад̇ийнаг̇арз рааж̇агулз ниб̣б̣ад̇д̇ид̇ваа вин̃н̃уд̇ам̣ бад̇д̇о махаагаббинарааж̇аа наама ахоси. сзсаа амажжагулзсу ниб̣б̣ад̇д̇им̣су. ж̇здтагасса бхарияаа мад̣̇д̣̇арадтз саагаланаг̇арз рааж̇агулз ниб̣б̣ад̇д̇и анож̇абубпаван̣н̣амзвассаа сарийрам̣ ахоси, д̇зна анож̇аад̇взвассаа наамам̣ агам̣су, саа ваяаббад̇д̇аа махаагаббинаран̃н̃о г̇зхам̣ г̇анд̇ваа анож̇аад̣̇звийд̇и баагадаа ахоси.
Jeṭṭhakakuṭumbikassa pana bhariyā attano paññāya ṭhitā ahaṃ tehi samakaṃ akatvā atirekataraṃ katvā ‘‘satthāraṃ pūjessāmī’’ti anojapupphavaṇṇena sahassamūlena sāṭakena saddhiṃ anojapupphacaṅkoṭakaṃ gahetvā satthāraṃ anojapupphehi pūjetvā taṃ sāṭakaṃ satthu pādamūle ṭhapetvā, ‘‘bhante, nibbattanibbattaṭṭhāne anojapupphavaṇṇaṃyeva me sarīraṃ hotu, anojātveva ca nāmaṃ hotū’’ti patthanaṃ akāsi. Satthā ‘‘evaṃ hotū’’ti anumodanaṃ akāsi. Te sabbepi yāvatāyukaṃ ṭhatvā tato cutā devaloke nibbattiṃsu. Te imasmiṃ buddhuppāde devalokā cavitvā jeṭṭhako kukkuṭavatīnagare rājakule nibbattitvā viññutaṃ patto mahākappinarājā nāma ahosi. Sesā amaccakulesu nibbattiṃsu. Jeṭṭhakassa bhariyā maddaraṭṭhe sākalanagare rājakule nibbatti anojapupphavaṇṇamevassā sarīraṃ ahosi, tena anojātvevassā nāmaṃ akaṃsu, sā vayappattā mahākappinarañño gehaṃ gantvā anojādevīti pākaṭā ahosi.
сзсид̇т̇ияоби амажжагулзсу ниб̣б̣ад̇д̇ид̇ваа ваяаббад̇д̇аа д̇зсам̣язва амажжабуд̇д̇аанам̣ г̇зхаани аг̇амам̣су. д̇з саб̣б̣зби ран̃н̃о самбад̇д̇исад̣̇исам̣ самбад̇д̇им̣ анубхавим̣су. яад̣̇аа хи рааж̇аа алан̇гаарабадиман̣д̣ид̇о хад̇т̇им̣ абхирухид̇ваа вижарад̇и, д̇ад̣̇ааби д̇з д̇ат̇зва вижаранд̇и. д̇асмим̣ ассзна ваа рат̇зна ваа вижаранд̇з д̇зби д̇ат̇зва вижаранд̇и. звам̣ д̇з згад̇о худ̇ваа гад̇аанам̣ бун̃н̃аанам̣ б̣алзна згад̇ова самбад̇д̇им̣ анубхавим̣су. ран̃н̃о бана ваало, ваалаваахано, бубпо, бубпаваахано, субад̇д̇од̇и бан̃жзва ассаа хонд̇и. д̇зсу рааж̇аа субад̇д̇ам̣ ассам̣ саяам̣ аарохад̇и, ид̇арз жад̇д̇ааро ассз ассаарохаанам̣ саасанаахаран̣ад̇т̇ааяа ад̣̇ааси. рааж̇аа д̇з баад̇ова бхож̇зд̇ваа ‘‘г̇ажчат̇а , бхан̣з, д̣̇вз ваа д̇ийн̣и ваа яож̇анаани аахин̣д̣ид̇ваа б̣уд̣̇д̇хасса ваа д̇хаммасса ваа сан̇гхасса ваа уббаннабхаавам̣ суд̇ваа маяхам̣ сукасаасанам̣ аарожзт̇аа’’д̇и бзсзси. д̇з жад̇уухи д̣̇ваарзхи нигкамид̇ваа д̣̇вз д̇ийн̣и яож̇анаани аахин̣д̣ид̇ваа гин̃жи саасанам̣ алабхид̇ваава бажжааг̇амим̣су.
Sesitthiyopi amaccakulesu nibbattitvā vayappattā tesaṃyeva amaccaputtānaṃ gehāni agamaṃsu. Te sabbepi rañño sampattisadisaṃ sampattiṃ anubhaviṃsu. Yadā hi rājā alaṅkārapaṭimaṇḍito hatthiṃ abhiruhitvā vicarati, tadāpi te tatheva vicaranti. Tasmiṃ assena vā rathena vā vicarante tepi tatheva vicaranti. Evaṃ te ekato hutvā katānaṃ puññānaṃ balena ekatova sampattiṃ anubhaviṃsu. Rañño pana vālo, vālavāhano, puppho, pupphavāhano, supattoti pañceva assā honti. Tesu rājā supattaṃ assaṃ sayaṃ ārohati, itare cattāro asse assārohānaṃ sāsanāharaṇatthāya adāsi. Rājā te pātova bhojetvā ‘‘gacchatha , bhaṇe, dve vā tīṇi vā yojanāni āhiṇḍitvā buddhassa vā dhammassa vā saṅghassa vā uppannabhāvaṃ sutvā mayhaṃ sukhasāsanaṃ ārocethā’’ti pesesi. Te catūhi dvārehi nikkhamitvā dve tīṇi yojanāni āhiṇḍitvā kiñci sāsanaṃ alabhitvāva paccāgamiṃsu.
ат̇згад̣̇ивасам̣ рааж̇аа субад̇д̇ам̣ аарухид̇ваа амажжасахассабаривуд̇о уяяаанам̣ г̇ажчанд̇о гиланд̇аруубз бан̃жасад̇амад̇д̇з ваан̣иж̇агз наг̇арам̣ бависанд̇з д̣̇исваа ‘‘имз ад̣̇д̇хаанагиланд̇аа, ад̣̇д̇хо имзсам̣ санд̇игаа згам̣ бхад̣̇д̣̇агам̣ саасанам̣ соссаамий’’д̇и д̇з баггосаабзд̇ваа ‘‘гуд̇о ааг̇ад̇ад̇т̇аа’’д̇и бужчи. ‘‘ад̇т̇и, д̣̇зва, ид̇о вийсад̇ияож̇анасад̇амад̇т̇агз саавад̇т̇и наама наг̇арам̣, д̇ад̇о ааг̇ад̇амхаа’’д̇и. ‘‘ад̇т̇и бана во д̣̇зсз гин̃жи саасанам̣ уббанна’’нд̇и. ‘‘д̣̇зва, ан̃н̃ам̣ гин̃жи над̇т̇и, саммаасамб̣уд̣̇д̇хо уббанно’’д̇и. рааж̇аа д̇аавад̣̇зва б̣алавабийд̇ияаа пудтасарийро гин̃жи саллагкзд̇ум̣ асаггонд̇о мухуд̇д̇ам̣ вийд̇инаамзд̇ваа бана, ‘‘д̇аад̇аа, гим̣ вад̣̇зт̇аа’’д̇и бужчи. ‘‘б̣уд̣̇д̇хо, д̣̇зва, уббанно’’д̇и. рааж̇аа д̣̇уд̇ияамби д̇ад̇ияамби д̇ат̇зва вийд̇инаамзд̇ваа жад̇уд̇т̇аваарз ‘‘гим̣ вад̣̇зт̇а, д̇аад̇аа’’д̇и бужчид̇ваа ‘‘б̣уд̣̇д̇хо уббанно’’д̇и вуд̇д̇з, ‘‘д̇аад̇аа, сукасаасанасаванааяа сад̇асахассам̣ во д̣̇аммий’’д̇и вад̇ваа ‘‘абарамби гин̃жи саасанам̣ ад̇т̇и, д̇аад̇аа’’д̇и бужчи. ‘‘ад̇т̇и, д̣̇зва, д̇хаммо уббанно’’д̇и. рааж̇аа д̇амби суд̇ваа буриманаязнзва д̇аяо ваарз вийд̇инаамзд̇ваа жад̇уд̇т̇аваарз ‘‘д̇хаммо уббанно’’д̇и вуд̇д̇з – ‘‘ид̇хааби во сад̇асахассам̣ д̣̇аммий’’д̇и вад̇ваа ‘‘абарамби гин̃жи саасанам̣ ад̇т̇и, д̇аад̇аа’’д̇и бужчи. ‘‘ад̇т̇и, д̣̇зва, сан̇гхо уббанно’’д̇и. рааж̇аа д̇амби суд̇ваа д̇ат̇зва д̇аяо ваарз вийд̇инаамзд̇ваа жад̇уд̇т̇аваарз ‘‘сан̇гхо уббанно’’д̇и вуд̇д̇з – ‘‘ид̇хааби во сад̇асахассам̣ д̣̇аммий’’д̇и вад̇ваа амажжасахассам̣ ологзд̇ваа, ‘‘д̇аад̇аа, гим̣ гариссаамаа’’д̇и бужчи. ‘‘д̣̇зва, д̇умхз гим̣ гариссат̇аа’’д̇и? ‘‘ахам̣, д̇аад̇аа, ‘б̣уд̣̇д̇хо уббанно д̇хаммо уббанно сан̇гхо уббанно’д̇и суд̇ваа на буна нивад̇д̇иссаами, бхаг̇аванд̇ам̣ уд̣̇д̣̇исса г̇анд̇ваа д̇асса санд̇игз баб̣б̣аж̇иссаамий’’д̇и. ‘‘маяамби, д̣̇зва, д̇умхзхи сад̣̇д̇хим̣ баб̣б̣аж̇иссаамаа’’д̇и. рааж̇аа суван̣н̣абаддз агкараани ликаабзд̇ваа ваан̣иж̇агаанам̣ д̣̇ад̇ваа ‘‘имам̣ анож̇ааяа наама д̣̇звияаа д̣̇зт̇а, саа д̇умхаагам̣ д̇ийн̣и сад̇асахассаани д̣̇ассад̇и, зван̃жа бана нам̣ вад̣̇зяяаат̇а ‘ран̃н̃аа гира д̇з иссарияам̣ виссадтам̣, яат̇аасукам̣ самбад̇д̇им̣ барибхун̃ж̇аахий’д̇и, сажз бана ‘во рааж̇аа гаха’нд̇и бужчад̇и, ‘сад̇т̇аарам̣ уд̣̇д̣̇исса баб̣б̣аж̇иссаамий’д̇и вад̇ваа г̇ад̇од̇и аарожзяяаат̇аа’’д̇и ааха. амажжааби ад̇д̇ано ад̇д̇ано бхарияаанам̣ д̇ат̇зва саасанам̣ бахин̣им̣су. рааж̇аа ваан̣иж̇агз уяяож̇зд̇ваа ассам̣ абхируяха амажжасахассабаривуд̇о д̇ам̣кан̣ан̃н̃зва нигками.
Athekadivasaṃ rājā supattaṃ āruhitvā amaccasahassaparivuto uyyānaṃ gacchanto kilantarūpe pañcasatamatte vāṇijake nagaraṃ pavisante disvā ‘‘ime addhānakilantā, addho imesaṃ santikā ekaṃ bhaddakaṃ sāsanaṃ sossāmī’’ti te pakkosāpetvā ‘‘kuto āgatatthā’’ti pucchi. ‘‘Atthi, deva, ito vīsatiyojanasatamatthake sāvatthi nāma nagaraṃ, tato āgatamhā’’ti. ‘‘Atthi pana vo dese kiñci sāsanaṃ uppanna’’nti. ‘‘Deva, aññaṃ kiñci natthi, sammāsambuddho uppanno’’ti. Rājā tāvadeva balavapītiyā phuṭṭhasarīro kiñci sallakkhetuṃ asakkonto muhuttaṃ vītināmetvā pana, ‘‘tātā, kiṃ vadethā’’ti pucchi. ‘‘Buddho, deva, uppanno’’ti. Rājā dutiyampi tatiyampi tatheva vītināmetvā catutthavāre ‘‘kiṃ vadetha, tātā’’ti pucchitvā ‘‘buddho uppanno’’ti vutte, ‘‘tātā, sukhasāsanasavanāya satasahassaṃ vo dammī’’ti vatvā ‘‘aparampi kiñci sāsanaṃ atthi, tātā’’ti pucchi. ‘‘Atthi, deva, dhammo uppanno’’ti. Rājā tampi sutvā purimanayeneva tayo vāre vītināmetvā catutthavāre ‘‘dhammo uppanno’’ti vutte – ‘‘idhāpi vo satasahassaṃ dammī’’ti vatvā ‘‘aparampi kiñci sāsanaṃ atthi, tātā’’ti pucchi. ‘‘Atthi, deva, saṅgho uppanno’’ti. Rājā tampi sutvā tatheva tayo vāre vītināmetvā catutthavāre ‘‘saṅgho uppanno’’ti vutte – ‘‘idhāpi vo satasahassaṃ dammī’’ti vatvā amaccasahassaṃ oloketvā, ‘‘tātā, kiṃ karissāmā’’ti pucchi. ‘‘Deva, tumhe kiṃ karissathā’’ti? ‘‘Ahaṃ, tātā, ‘buddho uppanno dhammo uppanno saṅgho uppanno’ti sutvā na puna nivattissāmi, bhagavantaṃ uddissa gantvā tassa santike pabbajissāmī’’ti. ‘‘Mayampi, deva, tumhehi saddhiṃ pabbajissāmā’’ti. Rājā suvaṇṇapaṭṭe akkharāni likhāpetvā vāṇijakānaṃ datvā ‘‘imaṃ anojāya nāma deviyā detha, sā tumhākaṃ tīṇi satasahassāni dassati, evañca pana naṃ vadeyyātha ‘raññā kira te issariyaṃ vissaṭṭhaṃ, yathāsukhaṃ sampattiṃ paribhuñjāhī’ti, sace pana ‘vo rājā kaha’nti pucchati, ‘satthāraṃ uddissa pabbajissāmī’ti vatvā gatoti āroceyyāthā’’ti āha. Amaccāpi attano attano bhariyānaṃ tatheva sāsanaṃ pahiṇiṃsu. Rājā vāṇijake uyyojetvā assaṃ abhiruyha amaccasahassaparivuto taṃkhaṇaññeva nikkhami.
сад̇т̇ааби д̇ам̣д̣̇ивасам̣ бажжуусагаалз логам̣ вологзнд̇о махаагаббинарааж̇аанам̣ сабариваарам̣ д̣̇исваа ‘‘аяам̣ махаагаббино ваан̣иж̇агаанам̣ санд̇игаа д̇ин̣н̣ам̣ рад̇анаанам̣ уббаннабхаавам̣ суд̇ваа д̇зсам̣ важанам̣ д̇ийхи сад̇асахассзхи бууж̇зд̇ваа раж̇ж̇ам̣ бахааяа амажжасахассабаривуд̇о мам̣ уд̣̇д̣̇исса баб̣б̣аж̇ид̇угаамо свз нигкамиссад̇и, со сабаривааро саха бадисамбхид̣̇аахи арахад̇д̇ам̣ баабун̣иссад̇и, бажжуг̇г̇аманам̣ гариссаамий’’д̇и бунад̣̇ивасз жаггавад̇д̇ий вияа куд̣̇д̣̇агаг̇аамабхож̇агам̣ рааж̇аанам̣ бажжуг̇г̇ажчанд̇о саяамзва бад̇д̇ажийварамаад̣̇ааяа вийсаяож̇анасад̇ам̣ маг̇г̇ам̣ бажжуг̇г̇анд̇ваа жанд̣̇абхааг̇ааяа над̣̇ияаа д̇ийрз ниг̇род̇харугкамуулз чаб̣б̣ан̣н̣аб̣уд̣̇д̇харасмияо виссаж̇ж̇зд̇ваа нисийд̣̇и. рааж̇ааби ааг̇ажчанд̇о згам̣ над̣̇им̣ бад̇ваа ‘‘гаа наамааяа’’нд̇и бужчи. ‘‘абаражчаа наама, д̣̇зваа’’д̇и. ‘‘гимассаа баримаан̣ам̣, д̇аад̇аа’’д̇и? ‘‘г̇амбхийрад̇о г̇аавуд̇ам̣, бут̇улад̇о д̣̇вз г̇аавуд̇аани, д̣̇зваа’’д̇и. ‘‘ад̇т̇и банзд̇т̇а нааваа ваа ул̣умбо ваа’’д̇и? ‘‘над̇т̇и, д̣̇зваа’’д̇и. ‘‘нааваад̣̇ийни ологзнд̇з амхз ж̇аад̇и ж̇арам̣ убанзд̇и, ж̇араа маран̣ам̣. ахам̣ ниб̣б̣змад̇иго худ̇ваа д̇ийн̣и рад̇анаани уд̣̇д̣̇исса нигканд̇о, д̇зсам̣ мз аанубхаавзна ‘ид̣̇ам̣ уд̣̇агам̣ уд̣̇агам̣ вияа маа ход̇уу’д̇и рад̇анад̇д̇аяасса г̇ун̣ам̣ ааваж̇ж̇зд̇ваа ‘ид̇иби со бхаг̇аваа арахам̣ саммаасамб̣уд̣̇д̇хо’’’д̇и б̣уд̣̇д̇хаг̇ун̣ам̣ ануссаранд̇о сабаривааро ассасахассзна уд̣̇агабидтз багканд̣̇и. синд̇хаваа бидтибаасаан̣з вияа багканд̣̇им̣су. кураанам̣ аг̇г̇адтаанзва д̇змим̣су.
Satthāpi taṃdivasaṃ paccūsakāle lokaṃ volokento mahākappinarājānaṃ saparivāraṃ disvā ‘‘ayaṃ mahākappino vāṇijakānaṃ santikā tiṇṇaṃ ratanānaṃ uppannabhāvaṃ sutvā tesaṃ vacanaṃ tīhi satasahassehi pūjetvā rajjaṃ pahāya amaccasahassaparivuto maṃ uddissa pabbajitukāmo sve nikkhamissati, so saparivāro saha paṭisambhidāhi arahattaṃ pāpuṇissati, paccuggamanaṃ karissāmī’’ti punadivase cakkavattī viya khuddakagāmabhojakaṃ rājānaṃ paccuggacchanto sayameva pattacīvaramādāya vīsayojanasataṃ maggaṃ paccuggantvā candabhāgāya nadiyā tīre nigrodharukkhamūle chabbaṇṇabuddharasmiyo vissajjetvā nisīdi. Rājāpi āgacchanto ekaṃ nadiṃ patvā ‘‘kā nāmāya’’nti pucchi. ‘‘Aparacchā nāma, devā’’ti. ‘‘Kimassā parimāṇaṃ, tātā’’ti? ‘‘Gambhīrato gāvutaṃ, puthulato dve gāvutāni, devā’’ti. ‘‘Atthi panettha nāvā vā uḷumpo vā’’ti? ‘‘Natthi, devā’’ti. ‘‘Nāvādīni olokente amhe jāti jaraṃ upaneti, jarā maraṇaṃ. Ahaṃ nibbematiko hutvā tīṇi ratanāni uddissa nikkhanto, tesaṃ me ānubhāvena ‘idaṃ udakaṃ udakaṃ viya mā hotū’ti ratanattayassa guṇaṃ āvajjetvā ‘itipi so bhagavā arahaṃ sammāsambuddho’’’ti buddhaguṇaṃ anussaranto saparivāro assasahassena udakapiṭṭhe pakkhandi. Sindhavā piṭṭhipāsāṇe viya pakkhandiṃsu. Khurānaṃ aggaṭṭhāneva temiṃsu.
со д̇ам̣ уд̇д̇арид̇ваа бурад̇о г̇ажчанд̇о абарамби над̣̇им̣ д̣̇исваа ‘‘аяам̣ гаа наамаа’’д̇и бужчи. ‘‘нийлаваахаа наама, д̣̇зваа’’д̇и. ‘‘гимассаа баримаан̣а’’нд̇и? ‘‘г̇амбхийрад̇оби бут̇улад̇оби ад̣дхаяож̇анам̣, д̣̇зваа’’д̇и. сзсам̣ буримасад̣̇исамзва. д̇ам̣ бана над̣̇им̣ д̣̇исваа ‘‘сваагкаад̇о бхаг̇авад̇аа д̇хаммо’’д̇и д̇хаммаануссад̇им̣ ануссаранд̇о багканд̣̇и. д̇амби ад̇иггамид̇ваа г̇ажчанд̇о абарамби над̣̇им̣ д̣̇исваа ‘‘аяам̣ гаа наамаа’’д̇и бужчи. ‘‘жанд̣̇абхааг̇аа наама, д̣̇зваа’’д̇и. ‘‘гимассаа баримаан̣а’’нд̇и? ‘‘г̇амбхийрад̇оби бут̇улад̇оби яож̇анам̣, д̣̇зваа’’д̇и. сзсам̣ буримасад̣̇исамзва. д̇ам̣ бана над̣̇им̣ д̣̇исваа ‘‘суббадибанно бхаг̇авад̇о саавагасан̇гхо’’д̇и сан̇гхаануссад̇им̣ ануссаранд̇о багканд̣̇и. д̇амби над̣̇им̣ ад̇иггамид̇ваа г̇ажчанд̇о сад̇т̇у сарийрад̇о нигканд̇аа чаб̣б̣ан̣н̣аб̣уд̣̇д̇харасмияо ниг̇род̇харугкасса саакаавидабабалаасаани обхаасаяамаанаа д̣̇исваа жинд̇зси – ‘‘аяам̣ обхаасо нзва жанд̣̇асса, на суурияасса, на д̣̇звамаараб̣раахман̣асубан̣н̣анааг̇аанам̣ ан̃н̃ад̇арасса, ад̣̇д̇хаа ахам̣ сад̇т̇аарам̣ уд̣̇д̣̇исса ааг̇ажчанд̇о саммаасамб̣уд̣̇д̇хзна д̣̇идто бхависсаамий’’д̇и. со д̇аавад̣̇зва ассабидтид̇о од̇арид̇ваа онад̇асарийро расмияаанусаарзна сад̇т̇аарам̣ убасан̇гамид̇ваа маносилаарасз нимуж̇ж̇анд̇о вияа б̣уд̣̇д̇харасмийнам̣ анд̇о баависи. со сад̇т̇аарам̣ ванд̣̇ид̇ваа згаманд̇ам̣ нисийд̣̇и сад̣̇д̇хим̣ амажжасахассзна. сад̇т̇аа д̇зсам̣ анубуб̣б̣им̣ гат̇ам̣ гат̇зси. д̣̇зсанаабарияосаанз сабаривааро рааж̇аа сод̇аабад̇д̇ипалз бад̇идтахи.
So taṃ uttaritvā purato gacchanto aparampi nadiṃ disvā ‘‘ayaṃ kā nāmā’’ti pucchi. ‘‘Nīlavāhā nāma, devā’’ti. ‘‘Kimassā parimāṇa’’nti? ‘‘Gambhīratopi puthulatopi aḍḍhayojanaṃ, devā’’ti. Sesaṃ purimasadisameva. Taṃ pana nadiṃ disvā ‘‘svākkhāto bhagavatā dhammo’’ti dhammānussatiṃ anussaranto pakkhandi. Tampi atikkamitvā gacchanto aparampi nadiṃ disvā ‘‘ayaṃ kā nāmā’’ti pucchi. ‘‘Candabhāgā nāma, devā’’ti. ‘‘Kimassā parimāṇa’’nti? ‘‘Gambhīratopi puthulatopi yojanaṃ, devā’’ti. Sesaṃ purimasadisameva. Taṃ pana nadiṃ disvā ‘‘suppaṭipanno bhagavato sāvakasaṅgho’’ti saṅghānussatiṃ anussaranto pakkhandi. Tampi nadiṃ atikkamitvā gacchanto satthu sarīrato nikkhantā chabbaṇṇabuddharasmiyo nigrodharukkhassa sākhāviṭapapalāsāni obhāsayamānā disvā cintesi – ‘‘ayaṃ obhāso neva candassa, na sūriyassa, na devamārabrāhmaṇasupaṇṇanāgānaṃ aññatarassa, addhā ahaṃ satthāraṃ uddissa āgacchanto sammāsambuddhena diṭṭho bhavissāmī’’ti. So tāvadeva assapiṭṭhito otaritvā onatasarīro rasmiyānusārena satthāraṃ upasaṅkamitvā manosilārase nimujjanto viya buddharasmīnaṃ anto pāvisi. So satthāraṃ vanditvā ekamantaṃ nisīdi saddhiṃ amaccasahassena. Satthā tesaṃ anupubbiṃ kathaṃ kathesi. Desanāpariyosāne saparivāro rājā sotāpattiphale patiṭṭhahi.
ат̇а саб̣б̣з удтахид̇ваа баб̣б̣аж̇ж̇ам̣ яаажим̣су. сад̇т̇аа ‘‘ааг̇амиссад̇и ну ко имзсам̣ гулабуд̇д̇аанам̣ ид̣̇д̇химаяабад̇д̇ажийвара’’нд̇и убад̇хаарзнд̇о ‘‘имз гулабуд̇д̇аа бажжзгаб̣уд̣̇д̇хасахассаанам̣ жийварасахассам̣ ад̣̇ам̣су, гассабаб̣уд̣̇д̇хагаалз вийсад̇ияаа бхигкусахассаанам̣ вийсад̇ижийварасахассааниби ад̣̇ам̣су, анажчарияам̣ имзсам̣ гулабуд̇д̇аанам̣ ид̣̇д̇химаяабад̇д̇ажийварааг̇амана’’нд̇и н̃ад̇ваа д̣̇агкин̣ахад̇т̇ам̣ басаарзд̇ваа ‘‘зт̇а, бхигкаво, жарат̇а б̣рахмажарияам̣ саммаа д̣̇угкасса анд̇агирияааяаа’’д̇и ааха. д̇з д̇аавад̣̇зва адтабаригкаарад̇хараа вассасадтигад̇т̇зраа вияа худ̇ваа взхаасам̣ аб̣бхуг̇г̇анд̇ваа бажжорохид̇ваа сад̇т̇аарам̣ ванд̣̇ид̇ваа згаманд̇ам̣ нисийд̣̇им̣су.
Atha sabbe uṭṭhahitvā pabbajjaṃ yāciṃsu. Satthā ‘‘āgamissati nu kho imesaṃ kulaputtānaṃ iddhimayapattacīvara’’nti upadhārento ‘‘ime kulaputtā paccekabuddhasahassānaṃ cīvarasahassaṃ adaṃsu, kassapabuddhakāle vīsatiyā bhikkhusahassānaṃ vīsaticīvarasahassānipi adaṃsu, anacchariyaṃ imesaṃ kulaputtānaṃ iddhimayapattacīvarāgamana’’nti ñatvā dakkhiṇahatthaṃ pasāretvā ‘‘etha, bhikkhavo, caratha brahmacariyaṃ sammā dukkhassa antakiriyāyā’’ti āha. Te tāvadeva aṭṭhaparikkhāradharā vassasaṭṭhikattherā viya hutvā vehāsaṃ abbhuggantvā paccorohitvā satthāraṃ vanditvā ekamantaṃ nisīdiṃsu.
д̇з бана ваан̣иж̇агаа рааж̇аг̇зхам̣ г̇анд̇ваа д̣̇звияаа ран̃н̃аа бахид̇асаасанам̣ аарожзд̇ваа д̣̇звияаа ‘‘ааг̇ажчанд̇уу’’д̇и вуд̇д̇з бависид̇ваа згаманд̇ам̣ адтам̣су. ат̇а нз д̣̇звий бужчи – ‘‘д̇аад̇аа, гим̣гааран̣аа ааг̇ад̇ад̇т̇аа’’д̇и? ‘‘маяам̣ ран̃н̃аа д̇умхаагам̣ санд̇игам̣ бзсид̇аа, д̇ийн̣и гира но сад̇асахассаани д̣̇зт̇аа’’д̇и. ‘‘б̣ахум̣, бхан̣з, бхан̣ат̇а, гим̣ д̇умхзхи ран̃н̃о санд̇игз гад̇ам̣, гисмим̣ во рааж̇аа басанно зд̇д̇агам̣ д̇ханам̣ д̣̇аабзд̇ий’’д̇и? ‘‘д̣̇зви, на ан̃н̃ам̣ гин̃жи гад̇ам̣, згам̣ бана саасанам̣ аарожаяимхаа’’д̇и. ‘‘саггаа бана, д̇аад̇аа, маяхамби д̇ам̣ аарожзд̇у’’нд̇и. ‘‘саггаа, д̣̇звий’’д̇и суван̣н̣абхин̇г̇аарзна мукам̣ вигкаалзд̇ваа ‘‘д̣̇зви, б̣уд̣̇д̇хо логз уббанно’’д̇и. сааби д̇ам̣ суд̇ваа бийд̇ияаа пудтасарийраа д̇игкад̇д̇ум̣ гин̃жи асаллагкзд̇ваа жад̇уд̇т̇аваарз ‘‘б̣уд̣̇д̇хо уббанно’’д̇и суд̇ваа ‘‘гим̣, д̇аад̇аа, имасмим̣ бад̣̇з ран̃н̃аа д̣̇инна’’нд̇и ? ‘‘сад̇асахассам̣, д̣̇звий’’д̇и. ‘‘д̇аад̇аа, ананужчавигам̣ ран̃н̃аа гад̇ам̣ зваруубам̣ саасанам̣ суд̇ваа д̇умхаагам̣ сад̇асахассад̣̇ад̣̇амаанзна, ахам̣ во мама д̣̇уг̇г̇ад̇абан̣н̣аагаарз д̇ийн̣и сад̇асахассаани д̣̇амми. абарам̣ гин̃жи д̇умхзхи аарожид̇а’’нд̇и? д̇з ид̣̇ан̃жа ид̣̇ан̃жаад̇и ид̇арааниби д̣̇вз саасанаани аарожзсум̣. д̣̇звий буриманаязнзва д̇аяо д̇аяо ваарз асаллагкзд̇ваа жад̇уд̇т̇ажад̇уд̇т̇аваарз д̇ийн̣и д̇ийн̣и сад̇асахассаани ад̣̇ааси. звам̣ д̇з саб̣б̣аани д̣̇ваад̣̇асасад̇асахассаани лабхим̣су.
Te pana vāṇijakā rājagehaṃ gantvā deviyā raññā pahitasāsanaṃ ārocetvā deviyā ‘‘āgacchantū’’ti vutte pavisitvā ekamantaṃ aṭṭhaṃsu. Atha ne devī pucchi – ‘‘tātā, kiṃkāraṇā āgatatthā’’ti? ‘‘Mayaṃ raññā tumhākaṃ santikaṃ pesitā, tīṇi kira no satasahassāni dethā’’ti. ‘‘Bahuṃ, bhaṇe, bhaṇatha, kiṃ tumhehi rañño santike kataṃ, kismiṃ vo rājā pasanno ettakaṃ dhanaṃ dāpetī’’ti? ‘‘Devi, na aññaṃ kiñci kataṃ, ekaṃ pana sāsanaṃ ārocayimhā’’ti. ‘‘Sakkā pana, tātā, mayhampi taṃ ārocetu’’nti. ‘‘Sakkā, devī’’ti suvaṇṇabhiṅgārena mukhaṃ vikkhāletvā ‘‘devi, buddho loke uppanno’’ti. Sāpi taṃ sutvā pītiyā phuṭṭhasarīrā tikkhattuṃ kiñci asallakkhetvā catutthavāre ‘‘buddho uppanno’’ti sutvā ‘‘kiṃ, tātā, imasmiṃ pade raññā dinna’’nti ? ‘‘Satasahassaṃ, devī’’ti. ‘‘Tātā, ananucchavikaṃ raññā kataṃ evarūpaṃ sāsanaṃ sutvā tumhākaṃ satasahassadadamānena, ahaṃ vo mama duggatapaṇṇākāre tīṇi satasahassāni dammi. Aparaṃ kiñci tumhehi ārocita’’nti? Te idañca idañcāti itarānipi dve sāsanāni ārocesuṃ. Devī purimanayeneva tayo tayo vāre asallakkhetvā catutthacatutthavāre tīṇi tīṇi satasahassāni adāsi. Evaṃ te sabbāni dvādasasatasahassāni labhiṃsu.
ат̇а нз д̣̇звий бужчи – ‘‘рааж̇аа гахам̣, д̇аад̇аа’’д̇и? ‘‘д̣̇зви, рааж̇аа ‘сад̇т̇аарам̣ уд̣̇д̣̇исса баб̣б̣аж̇иссаамий’д̇и вад̇ваа г̇ад̇о’’д̇и. ‘‘маяхам̣ д̇зна гим̣ саасанам̣ д̣̇инна’’нд̇и? ‘‘саб̣б̣ам̣ гира иссарияам̣ д̇умхаагам̣ виссадтам̣, ‘д̇умхз гира яат̇аасукам̣ самбад̇д̇им̣ анубхават̇аа’’’д̇и. ‘‘амажжаа бана гухим̣, д̇аад̇аа’’д̇и? ‘‘д̇зби ран̃н̃аа сад̣̇д̇хим̣ ‘баб̣б̣аж̇иссаамаа’д̇и г̇ад̇аа, д̣̇звий’’д̇и. саа д̇зсам̣ бхарияааяо баггосаабзд̇ваа, ‘‘аммаа, д̇умхаагам̣ саамигаа ран̃н̃аа сад̣̇д̇хим̣ ‘баб̣б̣аж̇иссаамаа’д̇и г̇ад̇аа, д̇умхз гим̣ гариссат̇аа’’д̇и? ‘‘гим̣ бана д̇зхи амхаагам̣ саасанам̣ бахид̇ам̣, д̣̇звий’’д̇и? ‘‘д̇зхи гира ад̇д̇ано самбад̇д̇и д̇умхаагам̣ виссадтаа ‘д̇умхз гира самбад̇д̇им̣ яат̇аасукам̣ барибхун̃ж̇ат̇аа’’’д̇и. ‘‘д̇умхз бана, д̣̇зви, гим̣ гариссат̇аа’’д̇и? ‘‘амхаагам̣ со д̇аава рааж̇аа маг̇г̇з тид̇о д̇ийхи сад̇асахассзхи д̇ийн̣и рад̇анаани бууж̇зд̇ваа кзл̣абин̣д̣ам̣ вияа самбад̇д̇им̣ бахааяа ‘баб̣б̣аж̇иссаамий’д̇и нигканд̇о, маяааби д̇ин̣н̣ам̣ рад̇анаанам̣ саасанам̣ суд̇ваа д̇аани навахи сад̇асахассзхи бууж̇ид̇аани, на ко банзсаа самбад̇д̇и наама ран̃н̃оязва д̣̇угкаа, маяхамби д̣̇угкаа зва. го ран̃н̃аа чад̣д̣ид̇акзл̣абин̣д̣ам̣ ж̇ан̣н̣угзхи бхуумияам̣ бад̇идтахид̇ваа мукзна г̇ан̣хиссад̇и, на маяхам̣ самбад̇д̇ияаа ад̇т̇о, сад̇т̇аарам̣ уд̣̇д̣̇исса баб̣б̣аж̇иссаамий’’д̇и. ‘‘д̣̇зви, маяамби д̇умхзхи сад̣̇д̇хим̣ баб̣б̣аж̇иссаамаа’’д̇и. ‘‘сажз саггот̇а, саад̇хуу’’д̇и. ‘‘саггома, д̣̇звий’’д̇и. д̇зна хи ‘‘зт̇аа’’д̇и рат̇асахассам̣ яож̇аабзд̇ваа рат̇ам̣ ааруяха д̇аахи сад̣̇д̇хим̣ нигкамид̇ваа анд̇араамаг̇г̇з батамам̣ над̣̇им̣ д̣̇исваа яат̇аа ран̃н̃аа батамам̣ бужчид̇аа, д̇ат̇зва бужчид̇ваа саб̣б̣ам̣ бавад̇д̇им̣ суд̇ваа ‘‘ран̃н̃аа г̇ад̇амаг̇г̇ам̣ ологзт̇аа’’д̇и вад̇ваа ‘‘синд̇хаваанам̣ бад̣̇авалан̃ж̇ам̣ на бассаамаа’’д̇и вуд̇д̇з рааж̇аа ‘‘д̇ийн̣и рад̇анаани уд̣̇д̣̇исса нигканд̇осмий’’д̇и сажжагирияам̣ гарид̇ваа д̇ин̣н̣ам̣ рад̇анаанам̣ г̇ун̣з ануссарид̇ваа г̇ад̇о бхависсад̇и , ахамби д̇ийн̣и рад̇анаани уд̣̇д̣̇исса нигканд̇аа, д̇зсам̣ мз аанубхаавзна ‘‘ид̣̇ам̣ уд̣̇агам̣ уд̣̇агам̣ вияа маа ход̇уу’’д̇и д̇ин̣н̣ам̣ рад̇анаанам̣ г̇ун̣з ануссаранд̇ий рат̇асахассам̣ бзсзси. уд̣̇агам̣ бидтибаасаан̣асад̣̇исам̣ ахоси, жаггаанам̣ аг̇г̇адтаанзва д̇змим̣су. зд̇знзва убааязна ид̇араа д̣̇взби над̣̇ияо уд̇д̇арим̣су.
Atha ne devī pucchi – ‘‘rājā kahaṃ, tātā’’ti? ‘‘Devi, rājā ‘satthāraṃ uddissa pabbajissāmī’ti vatvā gato’’ti. ‘‘Mayhaṃ tena kiṃ sāsanaṃ dinna’’nti? ‘‘Sabbaṃ kira issariyaṃ tumhākaṃ vissaṭṭhaṃ, ‘tumhe kira yathāsukhaṃ sampattiṃ anubhavathā’’’ti. ‘‘Amaccā pana kuhiṃ, tātā’’ti? ‘‘Tepi raññā saddhiṃ ‘pabbajissāmā’ti gatā, devī’’ti. Sā tesaṃ bhariyāyo pakkosāpetvā, ‘‘ammā, tumhākaṃ sāmikā raññā saddhiṃ ‘pabbajissāmā’ti gatā, tumhe kiṃ karissathā’’ti? ‘‘Kiṃ pana tehi amhākaṃ sāsanaṃ pahitaṃ, devī’’ti? ‘‘Tehi kira attano sampatti tumhākaṃ vissaṭṭhā ‘tumhe kira sampattiṃ yathāsukhaṃ paribhuñjathā’’’ti. ‘‘Tumhe pana, devi, kiṃ karissathā’’ti? ‘‘Amhākaṃ so tāva rājā magge ṭhito tīhi satasahassehi tīṇi ratanāni pūjetvā kheḷapiṇḍaṃ viya sampattiṃ pahāya ‘pabbajissāmī’ti nikkhanto, mayāpi tiṇṇaṃ ratanānaṃ sāsanaṃ sutvā tāni navahi satasahassehi pūjitāni, na kho panesā sampatti nāma raññoyeva dukkhā, mayhampi dukkhā eva. Ko raññā chaḍḍitakheḷapiṇḍaṃ jaṇṇukehi bhūmiyaṃ patiṭṭhahitvā mukhena gaṇhissati, na mayhaṃ sampattiyā attho, satthāraṃ uddissa pabbajissāmī’’ti. ‘‘Devi, mayampi tumhehi saddhiṃ pabbajissāmā’’ti. ‘‘Sace sakkotha, sādhū’’ti. ‘‘Sakkoma, devī’’ti. Tena hi ‘‘ethā’’ti rathasahassaṃ yojāpetvā rathaṃ āruyha tāhi saddhiṃ nikkhamitvā antarāmagge paṭhamaṃ nadiṃ disvā yathā raññā paṭhamaṃ pucchitā, tatheva pucchitvā sabbaṃ pavattiṃ sutvā ‘‘raññā gatamaggaṃ olokethā’’ti vatvā ‘‘sindhavānaṃ padavalañjaṃ na passāmā’’ti vutte rājā ‘‘tīṇi ratanāni uddissa nikkhantosmī’’ti saccakiriyaṃ karitvā tiṇṇaṃ ratanānaṃ guṇe anussaritvā gato bhavissati , ahampi tīṇi ratanāni uddissa nikkhantā, tesaṃ me ānubhāvena ‘‘idaṃ udakaṃ udakaṃ viya mā hotū’’ti tiṇṇaṃ ratanānaṃ guṇe anussarantī rathasahassaṃ pesesi. Udakaṃ piṭṭhipāsāṇasadisaṃ ahosi, cakkānaṃ aggaṭṭhāneva temiṃsu. Eteneva upāyena itarā dvepi nadiyo uttariṃsu.
сад̇т̇аа д̇аасам̣ ааг̇ад̇абхаавам̣ н̃ад̇ваа яат̇аа д̇аа ад̇д̇ано санд̇игз нисиннз саамигз бхигкуу на бассанд̇и, д̇ат̇аа ад̇хидтааси. д̣̇звийби ааг̇ажчанд̇ий сад̇т̇у сарийрад̇о нигканд̇аа расмияо д̣̇исваа д̇ат̇зва жинд̇зд̇ваа сад̇т̇аарам̣ убасан̇гамид̇ваа, ванд̣̇ид̇ваа згаманд̇ам̣ тид̇аа бужчи – ‘‘бханд̇з, махаагаббино рааж̇аа д̇умхз уд̣̇д̣̇исса нигкамид̇ваа г̇ад̇о, гахам̣ ну ко со, амхаагам̣ д̇ам̣ д̣̇ассзт̇аа’’д̇и. ‘‘нисийд̣̇ат̇а д̇аава, ид̇хзва нам̣ бассиссат̇аа’’д̇и. д̇аа саб̣б̣ааби хадтад̇удтаа ‘‘ид̇хзва гира нисиннаа саамигз но бассиссаамаа’’д̇и нисийд̣̇им̣су. сад̇т̇аа анубуб̣б̣им̣ гат̇ам̣ гат̇зси. анож̇аад̣̇звий д̣̇зсанаабарияосаанз д̇аахи сад̣̇д̇хим̣ сод̇аабад̇д̇ипалам̣ баабун̣и. махаагаббино т̇зро д̇аасам̣ д̣̇зсияамаанам̣ д̇хаммад̣̇зсанам̣ суд̇ваа сабаривааро саха бадисамбхид̣̇аахи арахад̇д̇ам̣ баабун̣и. д̇асмим̣ кан̣з сад̇т̇аа д̇аасам̣ д̇з бхигкуу д̣̇ассзси. д̇аасан̃хи ааг̇ад̇агкан̣зязва ад̇д̇ано саамигз гаасаавад̇харз мун̣д̣асийсз д̣̇исваа жид̇д̇ам̣ згаг̇г̇ам̣ на бхавзяяа, маг̇г̇апалам̣ ниб̣б̣ад̇д̇зд̇ум̣ саггаа на бхавзяяа. д̇асмаа ажаласад̣̇д̇хааяа бад̇идтид̇агаалад̇о бадтааяа д̇аасам̣ д̇з бхигкуу арахад̇д̇аббад̇д̇з д̣̇ассзси. д̇ааби д̇з д̣̇исваа бан̃жабад̇идтид̇зна ванд̣̇ид̇ваа, ‘‘бханд̇з, д̇умхаагам̣ баб̣б̣аж̇ид̇агижжам̣ мад̇т̇агаббад̇д̇а’’нд̇и вад̇ваа сад̇т̇аарам̣ ванд̣̇ид̇ваа згаманд̇ам̣ тад̇ваа баб̣б̣аж̇ж̇ам̣ яаажим̣су.
Satthā tāsaṃ āgatabhāvaṃ ñatvā yathā tā attano santike nisinne sāmike bhikkhū na passanti, tathā adhiṭṭhāsi. Devīpi āgacchantī satthu sarīrato nikkhantā rasmiyo disvā tatheva cintetvā satthāraṃ upasaṅkamitvā, vanditvā ekamantaṃ ṭhitā pucchi – ‘‘bhante, mahākappino rājā tumhe uddissa nikkhamitvā gato, kahaṃ nu kho so, amhākaṃ taṃ dassethā’’ti. ‘‘Nisīdatha tāva, idheva naṃ passissathā’’ti. Tā sabbāpi haṭṭhatuṭṭhā ‘‘idheva kira nisinnā sāmike no passissāmā’’ti nisīdiṃsu. Satthā anupubbiṃ kathaṃ kathesi. Anojādevī desanāpariyosāne tāhi saddhiṃ sotāpattiphalaṃ pāpuṇi. Mahākappino thero tāsaṃ desiyamānaṃ dhammadesanaṃ sutvā saparivāro saha paṭisambhidāhi arahattaṃ pāpuṇi. Tasmiṃ khaṇe satthā tāsaṃ te bhikkhū dassesi. Tāsañhi āgatakkhaṇeyeva attano sāmike kāsāvadhare muṇḍasīse disvā cittaṃ ekaggaṃ na bhaveyya, maggaphalaṃ nibbattetuṃ sakkā na bhaveyya. Tasmā acalasaddhāya patiṭṭhitakālato paṭṭhāya tāsaṃ te bhikkhū arahattappatte dassesi. Tāpi te disvā pañcapatiṭṭhitena vanditvā, ‘‘bhante, tumhākaṃ pabbajitakiccaṃ matthakappatta’’nti vatvā satthāraṃ vanditvā ekamantaṃ ṭhatvā pabbajjaṃ yāciṃsu.
звам̣ вуд̇д̇з сад̇т̇аа уббалаван̣н̣ааяа т̇зрияаа ааг̇аманам̣ жинд̇зси. саа сад̇т̇у жинд̇ид̇агкан̣зязва аагаасзнааг̇анд̇ваа д̇аа саб̣б̣аа ид̇т̇ияо г̇ахзд̇ваа аагаасзна бхигкунубассаяам̣ нзд̇ваа баб̣б̣ааж̇зси. д̇аа саб̣б̣аа нажирассзва арахад̇д̇ам̣ баабун̣им̣су. сад̇т̇аа бхигкусахассам̣ аад̣̇ааяа аагаасзна ж̇зд̇аванам̣ аг̇амааси. д̇ад̇ра суд̣̇ам̣ ааяасмаа махаагаббино рад̇д̇идтаанаад̣̇ийсу ‘‘ахо сукам̣, ахо сука’’нд̇и уд̣̇аанам̣ уд̣̇аанзнд̇о вижарад̇и. бхигкуу бхаг̇авад̇о аарожзсум̣ – ‘‘бханд̇з, махаагаббино ‘ахо сукам̣, ахо сука’нд̇и уд̣̇аанам̣ уд̣̇аанзнд̇о вижарад̇и, ад̇д̇ано раж̇ж̇асукам̣ аараб̣бха уд̣̇аанзд̇и ман̃н̃з’’д̇и. сад̇т̇аа д̇ам̣ баггосаабзд̇ваа – ‘‘сажжам̣ гира д̇вам̣, габбина, гаамасукам̣ аараб̣бха уд̣̇аанам̣ уд̣̇аанзсий’’д̇и? ‘‘бхаг̇аваа мз, бханд̇з, д̇ам̣ аараб̣бха уд̣̇аанабхаавам̣ ваа ан̃н̃ам̣ аараб̣бха уд̣̇аанабхаавам̣ ваа ж̇аанаад̇ий’’д̇и. ат̇а сад̇т̇аа – ‘‘на, бхигкавз, мама буд̇д̇о гаамасукам̣ раж̇ж̇асукам̣ аараб̣бха уд̣̇аанам̣ уд̣̇аанзд̇и, буд̇д̇асса бана мз д̇хаммам̣ жарад̇о д̇хаммабийд̇и наама уббаж̇ж̇ад̇и, со амад̇амахааниб̣б̣аанам̣ аараб̣бха звам̣ уд̣̇аанам̣ уд̣̇аанзсий’’д̇и анусанд̇хим̣ гхадзд̇ваа д̇хаммам̣ д̣̇зсзнд̇о имам̣ г̇аат̇амааха –
Evaṃ vutte satthā uppalavaṇṇāya theriyā āgamanaṃ cintesi. Sā satthu cintitakkhaṇeyeva ākāsenāgantvā tā sabbā itthiyo gahetvā ākāsena bhikkhunupassayaṃ netvā pabbājesi. Tā sabbā nacirasseva arahattaṃ pāpuṇiṃsu. Satthā bhikkhusahassaṃ ādāya ākāsena jetavanaṃ agamāsi. Tatra sudaṃ āyasmā mahākappino rattiṭṭhānādīsu ‘‘aho sukhaṃ, aho sukha’’nti udānaṃ udānento vicarati. Bhikkhū bhagavato ārocesuṃ – ‘‘bhante, mahākappino ‘aho sukhaṃ, aho sukha’nti udānaṃ udānento vicarati, attano rajjasukhaṃ ārabbha udāneti maññe’’ti. Satthā taṃ pakkosāpetvā – ‘‘saccaṃ kira tvaṃ, kappina, kāmasukhaṃ ārabbha udānaṃ udānesī’’ti? ‘‘Bhagavā me, bhante, taṃ ārabbha udānabhāvaṃ vā aññaṃ ārabbha udānabhāvaṃ vā jānātī’’ti. Atha satthā – ‘‘na, bhikkhave, mama putto kāmasukhaṃ rajjasukhaṃ ārabbha udānaṃ udāneti, puttassa pana me dhammaṃ carato dhammapīti nāma uppajjati, so amatamahānibbānaṃ ārabbha evaṃ udānaṃ udānesī’’ti anusandhiṃ ghaṭetvā dhammaṃ desento imaṃ gāthamāha –
‘‘д̇хаммабийд̇и сукам̣ сзд̇и, виббасаннзна жзд̇асаа;
‘‘Dhammapīti sukhaṃ seti, vippasannena cetasā;
арияаббавзд̣̇ид̇з д̇хаммз, сад̣̇аа рамад̇и бан̣д̣ид̇о’’д̇и. (д̇ха. ба. 79);
Ariyappavedite dhamme, sadā ramati paṇḍito’’ti. (dha. pa. 79);
ат̇згад̣̇ивасам̣ сад̇т̇аа бхигкуу ааманд̇зси – ‘‘гажжи, бхигкавз, габбино бхигкуунам̣ д̇хаммам̣ д̣̇зсзд̇ий’’д̇и? ‘‘аббоссугго, бханд̇з, д̣̇идтад̇хаммасукавихаарам̣ ануяуд̇д̇о вихарад̇и, оваад̣̇амад̇д̇амби на д̣̇зд̇ий’’д̇и. сад̇т̇аа т̇зрам̣ баггосаабзд̇ваа – ‘‘сажжам̣ гира д̇вам̣, габбина, анд̇зваасигаанам̣ оваад̣̇амад̇д̇амби на д̣̇зсий’’д̇и? ‘‘сажжам̣, бхаг̇аваа’’д̇и. ‘‘б̣раахман̣а, маа звам̣ агааси, аж̇ж̇а бадтааяа убаг̇ад̇аанам̣ бхигкуунам̣ д̇хаммам̣ д̣̇зсзхий’’д̇и. ‘‘саад̇ху, бханд̇з’’д̇и т̇зро бхаг̇авад̇о важанам̣ сирасаа самбадижчид̇ваа зговаад̣̇знзва саман̣асахассам̣ арахад̇д̇з бад̇идтаабзси. д̇зна нам̣ сад̇т̇аа бадибаадияаа ад̇д̇ано саавагз таананд̇арз табзнд̇о ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуоваад̣̇агаанам̣ яад̣̇ид̣̇ам̣ махаагаббино’’д̇и (а. ни. 1.219, 231) зд̇ад̣̇аг̇г̇з табзси.
Athekadivasaṃ satthā bhikkhū āmantesi – ‘‘kacci, bhikkhave, kappino bhikkhūnaṃ dhammaṃ desetī’’ti? ‘‘Appossukko, bhante, diṭṭhadhammasukhavihāraṃ anuyutto viharati, ovādamattampi na detī’’ti. Satthā theraṃ pakkosāpetvā – ‘‘saccaṃ kira tvaṃ, kappina, antevāsikānaṃ ovādamattampi na desī’’ti? ‘‘Saccaṃ, bhagavā’’ti. ‘‘Brāhmaṇa, mā evaṃ akāsi, ajja paṭṭhāya upagatānaṃ bhikkhūnaṃ dhammaṃ desehī’’ti. ‘‘Sādhu, bhante’’ti thero bhagavato vacanaṃ sirasā sampaṭicchitvā ekovādeneva samaṇasahassaṃ arahatte patiṭṭhāpesi. Tena naṃ satthā paṭipāṭiyā attano sāvake ṭhānantare ṭhapento ‘‘etadaggaṃ, bhikkhave, mama sāvakānaṃ bhikkhuovādakānaṃ yadidaṃ mahākappino’’ti (a. ni. 1.219, 231) etadagge ṭhapesi.
66. звам̣ т̇зро бад̇д̇аарахад̇д̇апало ад̇д̇ано буб̣б̣агаммам̣ сарид̇ваа соманассаж̇аад̇о буб̣б̣ажарид̇аабад̣̇аанам̣ багаасзнд̇о бад̣̇умуд̇д̇аро наама ж̇инод̇иаад̣̇имааха. уд̣̇ид̇о аж̇адаагаасзд̇и сагалаагаасз уд̣̇ид̇о удтид̇о баагадабхууд̇о. сарад̣̇амб̣арз сарад̣̇агаалз аагаасз равийва суурияо иваад̇и ад̇т̇о.
66. Evaṃ thero pattaarahattaphalo attano pubbakammaṃ saritvā somanassajāto pubbacaritāpadānaṃ pakāsento padumuttaro nāma jinotiādimāha. Udito ajaṭākāseti sakalākāse udito uṭṭhito pākaṭabhūto. Saradambare saradakāle ākāse ravīva sūriyo ivāti attho.
70. агкад̣̇ассо д̇ад̣̇аа аасинд̇и д̇асмим̣ бад̣̇умуд̇д̇арасса бхаг̇авад̇о гаалз саарад̣̇ассий хид̇ад̣̇ассий аажарияо баагадо ахосинд̇и ад̇т̇о.
70.Akkhadasso tadā āsinti tasmiṃ padumuttarassa bhagavato kāle sāradassī hitadassī ācariyo pākaṭo ahosinti attho.
71. саавагасса гад̇аавинод̇и д̇асса бхаг̇авад̇о мз манам̣ мама жид̇д̇ам̣, д̇аббаяанд̇асса д̇осаяанд̇асса саавагасса оваад̣̇агасса г̇ун̣ам̣ багаасаяад̇о аг̇г̇адтаанз табзнд̇асса гад̇аавино саад̇ажжагижжаяуд̇д̇асса важанам̣ суд̇ваад̇и самб̣анд̇хо.
71.Sāvakassakatāvinoti tassa bhagavato me manaṃ mama cittaṃ, tappayantassa tosayantassa sāvakassa ovādakassa guṇaṃ pakāsayato aggaṭṭhāne ṭhapentassa katāvino sātaccakiccayuttassa vacanaṃ sutvāti sambandho.
73. хам̣сасамабхааг̇од̇и хам̣сасад̣̇исаг̇аами. хам̣сад̣̇унд̣̇убхиниссанод̇и хам̣сараво д̣̇унд̣̇убхибхзрисад̣̇д̣̇асад̣̇исаважано ‘‘зд̇ам̣ махаамад̇д̇ам̣ бассат̇а, бхигкаво’’д̇и аахаад̇и самб̣анд̇хо.
73.Haṃsasamabhāgoti haṃsasadisagāmi. Haṃsadundubhinissanoti haṃsaravo dundubhibherisaddasadisavacano ‘‘etaṃ mahāmattaṃ passatha, bhikkhavo’’ti āhāti sambandho.
74. самуг̇г̇ад̇ад̇анууруханд̇и судту уг̇г̇ад̇аломам̣ уд̣̇д̇хаг̇г̇аломам̣, уд̣̇аг̇яаманам̣ ваа. ж̇иймууд̇аван̣н̣анд̇и муд̇д̇апаласамаанаван̣н̣ам̣ сунд̣̇арасарийрабабханд̇и ад̇т̇о. бийн̣ам̣санд̇и барибун̣н̣ам̣ ам̣сам̣. басаннанаяанаанананд̇и басаннаагкибасаннамуканд̇и ад̇т̇о.
74.Samuggatatanūruhanti suṭṭhu uggatalomaṃ uddhaggalomaṃ, udagyamanaṃ vā. Jīmūtavaṇṇanti muttaphalasamānavaṇṇaṃ sundarasarīrapabhanti attho. Pīṇaṃsanti paripuṇṇaṃ aṃsaṃ. Pasannanayanānananti pasannaakkhipasannamukhanti attho.
75. гад̇аавинод̇и гад̇аад̇хигаарасса зд̇ад̣̇аг̇г̇з тид̇асса бхигкуно таанам̣ со зсо муд̣̇ид̇ааяа бахадтажид̇д̇ад̇ааяа бад̇т̇зд̇ийд̇и самб̣анд̇хо.
75.Katāvinoti katādhikārassa etadagge ṭhitassa bhikkhuno ṭhānaṃ so eso muditāya pahaṭṭhacittatāya patthetīti sambandho.
81. сад̇асо анусаасияаад̇и д̇хаммзна самзна важанзна гааран̣авасзна анусаасид̇ваад̇и ад̇т̇о. б̣аараан̣асияамаасаннзд̇и б̣аараан̣асияаа самийбз бзсагаараг̇аамз. ж̇аад̇о гзнияаж̇аад̇ияанд̇и д̇анд̇авааяаж̇аад̇ияаа бзсагаарагулз ж̇аад̇од̇и ад̇т̇о. сзсам̣ сувин̃н̃зяяамзваад̇и.
81.Sataso anusāsiyāti dhammena samena vacanena kāraṇavasena anusāsitvāti attho. Bārāṇasiyamāsanneti bārāṇasiyā samīpe pesakāragāme. Jāto keniyajātiyanti tantavāyajātiyā pesakārakule jātoti attho. Sesaṃ suviññeyyamevāti.
махаагаббинад̇т̇зраабад̣̇аанаван̣н̣анаа самад̇д̇аа.
Mahākappinattheraapadānavaṇṇanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / абад̣̇аанабаал̣и • Apadānapāḷi / 3. махаагаббинад̇т̇зраабад̣̇аанам̣ • 3. Mahākappinattheraapadānaṃ
