| Library / Tipiṭaka / तिपिटक • Tipiṭaka / थेरगाथापाळि • Theragāthāpāḷi |
३. महाकप्पिनत्थेरगाथा
3. Mahākappinattheragāthā
५४७.
547.
‘‘अनागतं यो पटिकच्च 1 पस्सति, हितञ्च अत्थं अहितञ्च तं द्वयं।
‘‘Anāgataṃ yo paṭikacca 2 passati, hitañca atthaṃ ahitañca taṃ dvayaṃ;
विद्देसिनो तस्स हितेसिनो वा, रन्धं न पस्सन्ति समेक्खमाना॥
Viddesino tassa hitesino vā, randhaṃ na passanti samekkhamānā.
५४८.
548.
अनुपुब्बं परिचिता, यथा बुद्धेन देसिता।
Anupubbaṃ paricitā, yathā buddhena desitā;
सोमं लोकं पभासेति, अब्भा मुत्तोव चन्दिमा॥
Somaṃ lokaṃ pabhāseti, abbhā muttova candimā.
५४९.
549.
‘‘ओदातं वत मे चित्तं, अप्पमाणं सुभावितं।
‘‘Odātaṃ vata me cittaṃ, appamāṇaṃ subhāvitaṃ;
निब्बिद्धं पग्गहीतञ्च, सब्बा ओभासते दिसा॥
Nibbiddhaṃ paggahītañca, sabbā obhāsate disā.
५५०.
550.
‘‘जीवते वापि सप्पञ्ञो, अपि वित्तपरिक्खयो।
‘‘Jīvate vāpi sappañño, api vittaparikkhayo;
पञ्ञाय च अलाभेन, वित्तवापि न जीवति॥
Paññāya ca alābhena, vittavāpi na jīvati.
५५१.
551.
‘‘पञ्ञा सुतविनिच्छिनी, पञ्ञा कित्तिसिलोकवद्धनी।
‘‘Paññā sutavinicchinī, paññā kittisilokavaddhanī;
पञ्ञासहितो नरो इध, अपि दुक्खेसु सुखानि विन्दति॥
Paññāsahito naro idha, api dukkhesu sukhāni vindati.
५५२.
552.
‘‘नायं अज्जतनो धम्मो, नच्छेरो नपि अब्भुतो।
‘‘Nāyaṃ ajjatano dhammo, nacchero napi abbhuto;
यत्थ जायेथ मीयेथ, तत्थ किं विय अब्भुतं॥
Yattha jāyetha mīyetha, tattha kiṃ viya abbhutaṃ.
५५३.
553.
‘‘अनन्तरं हि जातस्स, जीविता मरणं धुवं।
‘‘Anantaraṃ hi jātassa, jīvitā maraṇaṃ dhuvaṃ;
जाता जाता मरन्तीध, एवंधम्मा हि पाणिनो॥
Jātā jātā marantīdha, evaṃdhammā hi pāṇino.
५५४.
554.
‘‘न हेतदत्थाय मतस्स होति, यं जीवितत्थं परपोरिसानं।
‘‘Na hetadatthāya matassa hoti, yaṃ jīvitatthaṃ paraporisānaṃ;
मतम्हि रुण्णं न यसो न लोक्यं, न वण्णितं समणब्राह्मणेहि॥
Matamhi ruṇṇaṃ na yaso na lokyaṃ, na vaṇṇitaṃ samaṇabrāhmaṇehi.
५५५.
555.
‘‘चक्खुं सरीरं उपहन्ति तेन 5, निहीयति वण्णबलं मती च।
‘‘Cakkhuṃ sarīraṃ upahanti tena 6, nihīyati vaṇṇabalaṃ matī ca;
आनन्दिनो तस्स दिसा भवन्ति, हितेसिनो नास्स सुखी भवन्ति॥
Ānandino tassa disā bhavanti, hitesino nāssa sukhī bhavanti.
५५६.
556.
‘‘तस्मा हि इच्छेय्य कुले वसन्ते, मेधाविनो चेव बहुस्सुते च।
‘‘Tasmā hi iccheyya kule vasante, medhāvino ceva bahussute ca;
येसं हि पञ्ञाविभवेन किच्चं, तरन्ति नावाय नदिंव पुण्ण’’न्ति॥
Yesaṃ hi paññāvibhavena kiccaṃ, taranti nāvāya nadiṃva puṇṇa’’nti.
… महाकप्पिनो थेरो…।
… Mahākappino thero….
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / थेरगाथा-अट्ठकथा • Theragāthā-aṭṭhakathā / ३. महाकप्पिनत्थेरगाथावण्णना • 3. Mahākappinattheragāthāvaṇṇanā
