| Library / Tipiṭaka / ติปิฎก • Tipiṭaka / เถรคาถาปาฬิ • Theragāthāpāḷi |
๓. มหากปฺปินเตฺถรคาถา
3. Mahākappinattheragāthā
๕๔๗.
547.
‘‘อนาคตํ โย ปฎิกจฺจ 1 ปสฺสติ, หิตญฺจ อตฺถํ อหิตญฺจ ตํ ทฺวยํ;
‘‘Anāgataṃ yo paṭikacca 2 passati, hitañca atthaṃ ahitañca taṃ dvayaṃ;
วิเทฺทสิโน ตสฺส หิเตสิโน วา, รนฺธํ น ปสฺสนฺติ สเมกฺขมานาฯ
Viddesino tassa hitesino vā, randhaṃ na passanti samekkhamānā.
๕๔๘.
548.
อนุปุพฺพํ ปริจิตา, ยถา พุเทฺธน เทสิตา;
Anupubbaṃ paricitā, yathā buddhena desitā;
โสมํ โลกํ ปภาเสติ, อพฺภา มุโตฺตว จนฺทิมาฯ
Somaṃ lokaṃ pabhāseti, abbhā muttova candimā.
๕๔๙.
549.
‘‘โอทาตํ วต เม จิตฺตํ, อปฺปมาณํ สุภาวิตํ;
‘‘Odātaṃ vata me cittaṃ, appamāṇaṃ subhāvitaṃ;
นิพฺพิทฺธํ ปคฺคหีตญฺจ, สพฺพา โอภาสเต ทิสาฯ
Nibbiddhaṃ paggahītañca, sabbā obhāsate disā.
๕๕๐.
550.
‘‘ชีวเต วาปิ สปฺปโญฺญ, อปิ วิตฺตปริกฺขโย;
‘‘Jīvate vāpi sappañño, api vittaparikkhayo;
ปญฺญาย จ อลาเภน, วิตฺตวาปิ น ชีวติฯ
Paññāya ca alābhena, vittavāpi na jīvati.
๕๕๑.
551.
‘‘ปญฺญา สุตวินิจฺฉินี, ปญฺญา กิตฺติสิโลกวทฺธนี;
‘‘Paññā sutavinicchinī, paññā kittisilokavaddhanī;
ปญฺญาสหิโต นโร อิธ, อปิ ทุเกฺขสุ สุขานิ วินฺทติฯ
Paññāsahito naro idha, api dukkhesu sukhāni vindati.
๕๕๒.
552.
‘‘นายํ อชฺชตโน ธโมฺม, นเจฺฉโร นปิ อพฺภุโต;
‘‘Nāyaṃ ajjatano dhammo, nacchero napi abbhuto;
ยตฺถ ชาเยถ มีเยถ, ตตฺถ กิํ วิย อพฺภุตํฯ
Yattha jāyetha mīyetha, tattha kiṃ viya abbhutaṃ.
๕๕๓.
553.
‘‘อนนฺตรํ หิ ชาตสฺส, ชีวิตา มรณํ ธุวํ;
‘‘Anantaraṃ hi jātassa, jīvitā maraṇaṃ dhuvaṃ;
ชาตา ชาตา มรนฺตีธ, เอวํธมฺมา หิ ปาณิโนฯ
Jātā jātā marantīdha, evaṃdhammā hi pāṇino.
๕๕๔.
554.
‘‘น เหตทตฺถาย มตสฺส โหติ, ยํ ชีวิตตฺถํ ปรโปริสานํ;
‘‘Na hetadatthāya matassa hoti, yaṃ jīvitatthaṃ paraporisānaṃ;
มตมฺหิ รุณฺณํ น ยโส น โลกฺยํ, น วณฺณิตํ สมณพฺราหฺมเณหิฯ
Matamhi ruṇṇaṃ na yaso na lokyaṃ, na vaṇṇitaṃ samaṇabrāhmaṇehi.
๕๕๕.
555.
‘‘จกฺขุํ สรีรํ อุปหนฺติ เตน 5, นิหียติ วณฺณพลํ มตี จ;
‘‘Cakkhuṃ sarīraṃ upahanti tena 6, nihīyati vaṇṇabalaṃ matī ca;
อานนฺทิโน ตสฺส ทิสา ภวนฺติ, หิเตสิโน นาสฺส สุขี ภวนฺติฯ
Ānandino tassa disā bhavanti, hitesino nāssa sukhī bhavanti.
๕๕๖.
556.
‘‘ตสฺมา หิ อิเจฺฉยฺย กุเล วสเนฺต, เมธาวิโน เจว พหุสฺสุเต จ;
‘‘Tasmā hi iccheyya kule vasante, medhāvino ceva bahussute ca;
เยสํ หิ ปญฺญาวิภเวน กิจฺจํ, ตรนฺติ นาวาย นทิํว ปุณฺณ’’นฺติฯ
Yesaṃ hi paññāvibhavena kiccaṃ, taranti nāvāya nadiṃva puṇṇa’’nti.
… มหากปฺปิโน เถโร…ฯ
… Mahākappino thero….
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / เถรคาถา-อฎฺฐกถา • Theragāthā-aṭṭhakathā / ๓. มหากปฺปินเตฺถรคาถาวณฺณนา • 3. Mahākappinattheragāthāvaṇṇanā
