| Library / Tipiṭaka / ತಿಪಿಟಕ • Tipiṭaka / ಥೇರಗಾಥಾಪಾಳಿ • Theragāthāpāḷi |
೩. ಮಹಾಕಪ್ಪಿನತ್ಥೇರಗಾಥಾ
3. Mahākappinattheragāthā
೫೪೭.
547.
‘‘ಅನಾಗತಂ ಯೋ ಪಟಿಕಚ್ಚ 1 ಪಸ್ಸತಿ, ಹಿತಞ್ಚ ಅತ್ಥಂ ಅಹಿತಞ್ಚ ತಂ ದ್ವಯಂ।
‘‘Anāgataṃ yo paṭikacca 2 passati, hitañca atthaṃ ahitañca taṃ dvayaṃ;
ವಿದ್ದೇಸಿನೋ ತಸ್ಸ ಹಿತೇಸಿನೋ ವಾ, ರನ್ಧಂ ನ ಪಸ್ಸನ್ತಿ ಸಮೇಕ್ಖಮಾನಾ॥
Viddesino tassa hitesino vā, randhaṃ na passanti samekkhamānā.
೫೪೮.
548.
ಅನುಪುಬ್ಬಂ ಪರಿಚಿತಾ, ಯಥಾ ಬುದ್ಧೇನ ದೇಸಿತಾ।
Anupubbaṃ paricitā, yathā buddhena desitā;
ಸೋಮಂ ಲೋಕಂ ಪಭಾಸೇತಿ, ಅಬ್ಭಾ ಮುತ್ತೋವ ಚನ್ದಿಮಾ॥
Somaṃ lokaṃ pabhāseti, abbhā muttova candimā.
೫೪೯.
549.
‘‘ಓದಾತಂ ವತ ಮೇ ಚಿತ್ತಂ, ಅಪ್ಪಮಾಣಂ ಸುಭಾವಿತಂ।
‘‘Odātaṃ vata me cittaṃ, appamāṇaṃ subhāvitaṃ;
ನಿಬ್ಬಿದ್ಧಂ ಪಗ್ಗಹೀತಞ್ಚ, ಸಬ್ಬಾ ಓಭಾಸತೇ ದಿಸಾ॥
Nibbiddhaṃ paggahītañca, sabbā obhāsate disā.
೫೫೦.
550.
‘‘ಜೀವತೇ ವಾಪಿ ಸಪ್ಪಞ್ಞೋ, ಅಪಿ ವಿತ್ತಪರಿಕ್ಖಯೋ।
‘‘Jīvate vāpi sappañño, api vittaparikkhayo;
ಪಞ್ಞಾಯ ಚ ಅಲಾಭೇನ, ವಿತ್ತವಾಪಿ ನ ಜೀವತಿ॥
Paññāya ca alābhena, vittavāpi na jīvati.
೫೫೧.
551.
‘‘ಪಞ್ಞಾ ಸುತವಿನಿಚ್ಛಿನೀ, ಪಞ್ಞಾ ಕಿತ್ತಿಸಿಲೋಕವದ್ಧನೀ।
‘‘Paññā sutavinicchinī, paññā kittisilokavaddhanī;
ಪಞ್ಞಾಸಹಿತೋ ನರೋ ಇಧ, ಅಪಿ ದುಕ್ಖೇಸು ಸುಖಾನಿ ವಿನ್ದತಿ॥
Paññāsahito naro idha, api dukkhesu sukhāni vindati.
೫೫೨.
552.
‘‘ನಾಯಂ ಅಜ್ಜತನೋ ಧಮ್ಮೋ, ನಚ್ಛೇರೋ ನಪಿ ಅಬ್ಭುತೋ।
‘‘Nāyaṃ ajjatano dhammo, nacchero napi abbhuto;
ಯತ್ಥ ಜಾಯೇಥ ಮೀಯೇಥ, ತತ್ಥ ಕಿಂ ವಿಯ ಅಬ್ಭುತಂ॥
Yattha jāyetha mīyetha, tattha kiṃ viya abbhutaṃ.
೫೫೩.
553.
‘‘ಅನನ್ತರಂ ಹಿ ಜಾತಸ್ಸ, ಜೀವಿತಾ ಮರಣಂ ಧುವಂ।
‘‘Anantaraṃ hi jātassa, jīvitā maraṇaṃ dhuvaṃ;
ಜಾತಾ ಜಾತಾ ಮರನ್ತೀಧ, ಏವಂಧಮ್ಮಾ ಹಿ ಪಾಣಿನೋ॥
Jātā jātā marantīdha, evaṃdhammā hi pāṇino.
೫೫೪.
554.
‘‘ನ ಹೇತದತ್ಥಾಯ ಮತಸ್ಸ ಹೋತಿ, ಯಂ ಜೀವಿತತ್ಥಂ ಪರಪೋರಿಸಾನಂ।
‘‘Na hetadatthāya matassa hoti, yaṃ jīvitatthaṃ paraporisānaṃ;
ಮತಮ್ಹಿ ರುಣ್ಣಂ ನ ಯಸೋ ನ ಲೋಕ್ಯಂ, ನ ವಣ್ಣಿತಂ ಸಮಣಬ್ರಾಹ್ಮಣೇಹಿ॥
Matamhi ruṇṇaṃ na yaso na lokyaṃ, na vaṇṇitaṃ samaṇabrāhmaṇehi.
೫೫೫.
555.
‘‘ಚಕ್ಖುಂ ಸರೀರಂ ಉಪಹನ್ತಿ ತೇನ 5, ನಿಹೀಯತಿ ವಣ್ಣಬಲಂ ಮತೀ ಚ।
‘‘Cakkhuṃ sarīraṃ upahanti tena 6, nihīyati vaṇṇabalaṃ matī ca;
ಆನನ್ದಿನೋ ತಸ್ಸ ದಿಸಾ ಭವನ್ತಿ, ಹಿತೇಸಿನೋ ನಾಸ್ಸ ಸುಖೀ ಭವನ್ತಿ॥
Ānandino tassa disā bhavanti, hitesino nāssa sukhī bhavanti.
೫೫೬.
556.
‘‘ತಸ್ಮಾ ಹಿ ಇಚ್ಛೇಯ್ಯ ಕುಲೇ ವಸನ್ತೇ, ಮೇಧಾವಿನೋ ಚೇವ ಬಹುಸ್ಸುತೇ ಚ।
‘‘Tasmā hi iccheyya kule vasante, medhāvino ceva bahussute ca;
ಯೇಸಂ ಹಿ ಪಞ್ಞಾವಿಭವೇನ ಕಿಚ್ಚಂ, ತರನ್ತಿ ನಾವಾಯ ನದಿಂವ ಪುಣ್ಣ’’ನ್ತಿ॥
Yesaṃ hi paññāvibhavena kiccaṃ, taranti nāvāya nadiṃva puṇṇa’’nti.
… ಮಹಾಕಪ್ಪಿನೋ ಥೇರೋ…।
… Mahākappino thero….
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಥೇರಗಾಥಾ-ಅಟ್ಠಕಥಾ • Theragāthā-aṭṭhakathā / ೩. ಮಹಾಕಪ್ಪಿನತ್ಥೇರಗಾಥಾವಣ್ಣನಾ • 3. Mahākappinattheragāthāvaṇṇanā
