| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৭১. মহাকরুণাঞাণনিদ্দেসো
71. Mahākaruṇāñāṇaniddeso
১১৭. কতমং তথাগতস্স মহাকরুণাসমাপত্তিযা ঞাণং? বহুকেহি আকারেহি পস্সন্তানং বুদ্ধানং ভগৰন্তানং সত্তেসু মহাকরুণা ওক্কমতি। আদিত্তো লোকসন্নিৰাসোতি – পস্সন্তানং বুদ্ধানং ভগৰন্তানং সত্তেসু মহাকরুণা ওক্কমতি। উয্যুত্তো লোকসন্নিৰাসোতি – পস্সন্তানং বুদ্ধানং ভগৰন্তানং সত্তেসু মহাকরুণা ওক্কমতি। পযাতো লোকসন্নিৰাসোতি – পস্সন্তানং বুদ্ধানং ভগৰন্তানং সত্তেসু মহাকরুণা ওক্কমতি। কুম্মগ্গপ্পটিপন্নো 1 লোকসন্নিৰাসোতি – পস্সন্তানং বুদ্ধানং ভগৰন্তানং সত্তেসু মহাকরুণা ওক্কমতি। উপনীযতি লোকো অদ্ধুৰোতি – পস্সন্তানং বুদ্ধানং ভগৰন্তানং সত্তেসু মহাকরুণা ওক্কমতি। অতাণো 2 লোকো অনভিস্সরোতি – পস্সন্তানং বুদ্ধানং ভগৰন্তানং সত্তেসু মহাকরুণা ওক্কমতি। অস্সকো লোকো , সব্বং পহায গমনীযন্তি – পস্সন্তানং বুদ্ধানং ভগৰন্তানং সত্তেসু মহাকরুণা ওক্কমতি। ঊনো লোকো অতীতো তণ্হাদাসোতি – পস্সন্তানং বুদ্ধানং ভগৰন্তানং সত্তেসু মহাকরুণা ওক্কমতি। অতাযনো লোকসন্নিৰাসোতি – পস্সন্তানং…পে॰… অলেণো লোকসন্নিৰাসোতি – পস্সন্তানং …পে॰… অসরণো লোকসন্নিৰাসোতি – পস্সন্তানং…পে॰… অসরণীভূতো লোকসন্নিৰাসোতি – পস্সন্তানং…পে॰…।
117. Katamaṃ tathāgatassa mahākaruṇāsamāpattiyā ñāṇaṃ? Bahukehi ākārehi passantānaṃ buddhānaṃ bhagavantānaṃ sattesu mahākaruṇā okkamati. Āditto lokasannivāsoti – passantānaṃ buddhānaṃ bhagavantānaṃ sattesu mahākaruṇā okkamati. Uyyutto lokasannivāsoti – passantānaṃ buddhānaṃ bhagavantānaṃ sattesu mahākaruṇā okkamati. Payāto lokasannivāsoti – passantānaṃ buddhānaṃ bhagavantānaṃ sattesu mahākaruṇā okkamati. Kummaggappaṭipanno 3 lokasannivāsoti – passantānaṃ buddhānaṃ bhagavantānaṃ sattesu mahākaruṇā okkamati. Upanīyati loko addhuvoti – passantānaṃ buddhānaṃ bhagavantānaṃ sattesu mahākaruṇā okkamati. Atāṇo 4 loko anabhissaroti – passantānaṃ buddhānaṃ bhagavantānaṃ sattesu mahākaruṇā okkamati. Assako loko , sabbaṃ pahāya gamanīyanti – passantānaṃ buddhānaṃ bhagavantānaṃ sattesu mahākaruṇā okkamati. Ūno loko atīto taṇhādāsoti – passantānaṃ buddhānaṃ bhagavantānaṃ sattesu mahākaruṇā okkamati. Atāyano lokasannivāsoti – passantānaṃ…pe… aleṇo lokasannivāsoti – passantānaṃ …pe… asaraṇo lokasannivāsoti – passantānaṃ…pe… asaraṇībhūto lokasannivāsoti – passantānaṃ…pe….
উদ্ধতো লোকো অৰূপসন্তোতি – পস্সন্তানং…পে॰… সসল্লো লোকসন্নিৰাসো, ৰিদ্ধো পুথুসল্লেহি; তস্স নত্থঞ্ঞো কোচি সল্লানং উদ্ধতা, অঞ্ঞত্র মযাতি – পস্সন্তানং…পে॰… অৰিজ্জন্ধকারাৰরণো লোকসন্নিৰাসো অণ্ডভূতো কিলেসপঞ্জরপক্খিত্তো; তস্স নত্থঞ্ঞো কোচি আলোকং দস্সেতা, অঞ্ঞত্র মযাতি – পস্সন্তানং…পে॰… অৰিজ্জাগতো লোকসন্নিৰাসো অণ্ডভূতো পরিযোনদ্ধো তন্তাকুলকজাতো 5 কুলাগণ্ডিকজাতো 6 মুঞ্জপব্বজভূতো অপাযং দুগ্গতিং ৰিনিপাতং সংসারং নাতিৰত্ততীতি – পস্সন্তানং…পে॰… অৰিজ্জাৰিসদোসসংলিত্তো লোকসন্নিৰাসো কিলেসকললীভূতোতি – পস্সন্তানং…পে॰… রাগদোসমোহজটাজটিতো লোকসন্নিৰাসো; তস্স নত্থঞ্ঞো কোচি জটং ৰিজটেতা, অঞ্ঞত্র মযাতি – পস্সন্তানং…পে॰…।
Uddhato loko avūpasantoti – passantānaṃ…pe… sasallo lokasannivāso, viddho puthusallehi; tassa natthañño koci sallānaṃ uddhatā, aññatra mayāti – passantānaṃ…pe… avijjandhakārāvaraṇo lokasannivāso aṇḍabhūto kilesapañjarapakkhitto; tassa natthañño koci ālokaṃ dassetā, aññatra mayāti – passantānaṃ…pe… avijjāgato lokasannivāso aṇḍabhūto pariyonaddho tantākulakajāto 7 kulāgaṇḍikajāto 8 muñjapabbajabhūto apāyaṃ duggatiṃ vinipātaṃ saṃsāraṃ nātivattatīti – passantānaṃ…pe… avijjāvisadosasaṃlitto lokasannivāso kilesakalalībhūtoti – passantānaṃ…pe… rāgadosamohajaṭājaṭito lokasannivāso; tassa natthañño koci jaṭaṃ vijaṭetā, aññatra mayāti – passantānaṃ…pe….
তণ্হাসঙ্ঘাটপটিমুক্কো লোকসন্নিৰাসোতি – পস্সন্তানং…পে॰… তণ্হাজালেন ওত্থটো 9 লোকসন্নিৰাসোতি – পস্সন্তানং…পে॰… তণ্হাসোতেন ৰুয্হতি লোকসন্নিৰাসোতি – পস্সন্তানং…পে॰… তণ্হাসঞ্ঞোজনেন সঞ্ঞুত্তো লোকসন্নিৰাসোতি – পস্সন্তানং…পে॰… তণ্হানুসযেন অনুসটো লোকসন্নিৰাসোতি – পস্সন্তানং…পে॰… তণ্হাসন্তাপেন সন্তপ্পতি লোকসন্নিৰাসোতি – পস্সন্তানং…পে॰… তণ্হাপরিল়াহেন পরিডয্হতি লোকসন্নিৰাসোতি – পস্সন্তানং…পে॰…।
Taṇhāsaṅghāṭapaṭimukko lokasannivāsoti – passantānaṃ…pe… taṇhājālena otthaṭo 10 lokasannivāsoti – passantānaṃ…pe… taṇhāsotena vuyhati lokasannivāsoti – passantānaṃ…pe… taṇhāsaññojanena saññutto lokasannivāsoti – passantānaṃ…pe… taṇhānusayena anusaṭo lokasannivāsoti – passantānaṃ…pe… taṇhāsantāpena santappati lokasannivāsoti – passantānaṃ…pe… taṇhāpariḷāhena pariḍayhati lokasannivāsoti – passantānaṃ…pe….
দিট্ঠিসঙ্ঘাটপটিমুক্কো লোকসন্নিৰাসোতি – পস্সন্তানং…পে॰… দিট্ঠিজালেন ওত্থটো লোকসন্নিৰাসোতি – পস্সন্তানং…পে॰… দিট্ঠিসোতেন ৰুয্হতি লোকসন্নিৰাসোতি – পস্সন্তানং…পে॰… দিট্ঠিসঞ্ঞোজনেন সঞ্ঞুত্তো লোকসন্নিৰাসোতি – পস্সন্তানং…পে॰… দিট্ঠানুসযেন অনুসটো লোকসন্নিৰাসোতি – পস্সন্তানং…পে॰… দিট্ঠিসন্তাপেন সন্তপ্পতি লোকসন্নিৰাসোতি – পস্সন্তানং…পে॰… দিট্ঠিপরিল়াহেন পরিডয্হতি লোকসন্নিৰাসোতি – পস্সন্তানং…পে॰…।
Diṭṭhisaṅghāṭapaṭimukko lokasannivāsoti – passantānaṃ…pe… diṭṭhijālena otthaṭo lokasannivāsoti – passantānaṃ…pe… diṭṭhisotena vuyhati lokasannivāsoti – passantānaṃ…pe… diṭṭhisaññojanena saññutto lokasannivāsoti – passantānaṃ…pe… diṭṭhānusayena anusaṭo lokasannivāsoti – passantānaṃ…pe… diṭṭhisantāpena santappati lokasannivāsoti – passantānaṃ…pe… diṭṭhipariḷāhena pariḍayhati lokasannivāsoti – passantānaṃ…pe….
জাতিযা অনুগতো লোকসন্নিৰাসোতি – পস্সন্তানং…পে॰… জরায অনুসটো লোকসন্নিৰাসোতি – পস্সন্তানং…পে॰… ব্যাধিনা অভিভূতো লোকসন্নিৰাসোতি – পস্সন্তানং …পে॰… মরণেন অব্ভাহতো লোকসন্নিৰাসোতি – পস্সন্তানং…পে॰… দুক্খে পতিট্ঠিতো লোকসন্নিৰাসোতি – পস্সন্তানং…পে॰…।
Jātiyā anugato lokasannivāsoti – passantānaṃ…pe… jarāya anusaṭo lokasannivāsoti – passantānaṃ…pe… byādhinā abhibhūto lokasannivāsoti – passantānaṃ …pe… maraṇena abbhāhato lokasannivāsoti – passantānaṃ…pe… dukkhe patiṭṭhito lokasannivāsoti – passantānaṃ…pe….
তণ্হায উড্ডিতো লোকসন্নিৰাসোতি – পস্সন্তানং…পে॰… জরাপাকারপরিক্খিত্তো লোকসন্নিৰাসোতি – পস্সন্তানং…পে॰… মচ্চুপাসেন পরিক্খিত্তো লোকসন্নিৰাসোতি – পস্সন্তানং…পে॰… মহাবন্ধনবন্ধো লোকসন্নিৰাসো – রাগবন্ধনেন দোসবন্ধনেন মোহবন্ধনেন মানবন্ধনেন দিট্ঠিবন্ধনেন কিলেসবন্ধনেন দুচ্চরিতবন্ধনেন; তস্স নত্থঞ্ঞো কোচি বন্ধনং মোচেতা, অঞ্ঞত্র মযাতি – পস্সন্তানং…পে॰… মহাসম্বাধপ্পটিপন্নো লোকসন্নিৰাসো; তস্স নত্থঞ্ঞো কোচি ওকাসং দস্সেতা, অঞ্ঞত্র মযাতি – পস্সন্তানং… মহাপলিবোধেন পলিবুদ্ধো লোকসন্নিৰাসো; তস্স নত্থঞ্ঞো কোচি পলিবোধং ছেতা, অঞ্ঞত্র মযাতি – পস্সন্তানং…পে॰… মহাপপাতে পতিতো লোকসন্নিৰাসো; তস্স নত্থঞ্ঞো কোচি পপাতা উদ্ধতা, অঞ্ঞত্র মযাতি – পস্সন্তানং…পে॰… মহাকন্তারপ্পটিপন্নো লোকসন্নিৰাসো; তস্স নত্থঞ্ঞো কোচি কন্তারং তারেতা, অঞ্ঞত্র মযাতি – পস্সন্তানং…পে॰… মহাসংসারপ্পটিপন্নো লোকসন্নিৰাসো; তস্স নত্থঞ্ঞো কোচি সংসারা মোচেতা, অঞ্ঞত্র মযাতি – পস্সন্তানং…পে॰… মহাৰিদুগ্গে সম্পরিৰত্ততি লোকসন্নিৰাসো; তস্স নত্থঞ্ঞো কোচি ৰিদুগ্গা উদ্ধতা, অঞ্ঞত্র মযাতি – পস্সন্তানং…পে॰… মহাপলিপে 11 পলিপন্নো লোকসন্নিৰাসো ; তস্স নত্থঞ্ঞো কোচি পলিপা উদ্ধতা, অঞ্ঞত্র মযাতি – পস্সন্তানং…পে॰…।
Taṇhāya uḍḍito lokasannivāsoti – passantānaṃ…pe… jarāpākāraparikkhitto lokasannivāsoti – passantānaṃ…pe… maccupāsena parikkhitto lokasannivāsoti – passantānaṃ…pe… mahābandhanabandho lokasannivāso – rāgabandhanena dosabandhanena mohabandhanena mānabandhanena diṭṭhibandhanena kilesabandhanena duccaritabandhanena; tassa natthañño koci bandhanaṃ mocetā, aññatra mayāti – passantānaṃ…pe… mahāsambādhappaṭipanno lokasannivāso; tassa natthañño koci okāsaṃ dassetā, aññatra mayāti – passantānaṃ… mahāpalibodhena palibuddho lokasannivāso; tassa natthañño koci palibodhaṃ chetā, aññatra mayāti – passantānaṃ…pe… mahāpapāte patito lokasannivāso; tassa natthañño koci papātā uddhatā, aññatra mayāti – passantānaṃ…pe… mahākantārappaṭipanno lokasannivāso; tassa natthañño koci kantāraṃ tāretā, aññatra mayāti – passantānaṃ…pe… mahāsaṃsārappaṭipanno lokasannivāso; tassa natthañño koci saṃsārā mocetā, aññatra mayāti – passantānaṃ…pe… mahāvidugge samparivattati lokasannivāso; tassa natthañño koci viduggā uddhatā, aññatra mayāti – passantānaṃ…pe… mahāpalipe 12 palipanno lokasannivāso ; tassa natthañño koci palipā uddhatā, aññatra mayāti – passantānaṃ…pe….
অব্ভাহতো লোকসন্নিৰাসোতি – পস্সন্তানং…পে॰… আদিত্তো লোকসন্নিৰাসো – রাগগ্গিনা দোসগ্গিনা মোহগ্গিনা জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি; তস্স নত্থঞ্ঞো কোচি নিব্বাপেতা, অঞ্ঞত্র মযাতি – পস্সন্তানং…পে॰… উন্নীতকো লোকসন্নিৰাসো হঞ্ঞতি নিচ্চমতাণো পত্তদণ্ডো তক্করোতি – পস্সন্তানং…পে॰… ৰজ্জবন্ধনবদ্ধো লোকসন্নিৰাসো আঘাতনপচ্চুপট্ঠিতো; তস্স নত্থঞ্ঞো কোচি বন্ধনং মোচেতা, অঞ্ঞত্র মযাতি – পস্সন্তানং…পে॰… অনাথো লোকসন্নিৰাসো পরমকারুঞ্ঞপ্পত্তো; তস্স নত্থঞ্ঞো কোচি তাযেতা, অঞ্ঞত্র মযাতি – পস্সন্তানং…পে॰… দুক্খাভিতুন্নো 13 লোকসন্নিৰাসো চিররত্তং পীল়িতোতি – পস্সন্তানং…পে॰… গধিতো লোকসন্নিৰাসো নিচ্চং পিপাসিতোতি – পস্সন্তানং…পে॰…।
Abbhāhato lokasannivāsoti – passantānaṃ…pe… āditto lokasannivāso – rāgagginā dosagginā mohagginā jātiyā jarāya maraṇena sokehi paridevehi dukkhehi domanassehi upāyāsehi; tassa natthañño koci nibbāpetā, aññatra mayāti – passantānaṃ…pe… unnītako lokasannivāso haññati niccamatāṇo pattadaṇḍo takkaroti – passantānaṃ…pe… vajjabandhanabaddho lokasannivāso āghātanapaccupaṭṭhito; tassa natthañño koci bandhanaṃ mocetā, aññatra mayāti – passantānaṃ…pe… anātho lokasannivāso paramakāruññappatto; tassa natthañño koci tāyetā, aññatra mayāti – passantānaṃ…pe… dukkhābhitunno 14 lokasannivāso cirarattaṃ pīḷitoti – passantānaṃ…pe… gadhito lokasannivāso niccaṃ pipāsitoti – passantānaṃ…pe….
অন্ধো লোকসন্নিৰাসো অচক্খুকোতি – পস্সন্তানং…পে॰… হতনেত্তো লোকসন্নিৰাসো অপরিণাযকোতি – পস্সন্তানং…পে॰… ৰিপথপক্খন্দো 15 লোকসন্নিৰাসো অঞ্জসাপরদ্ধো; তস্স নত্থঞ্ঞো কোচি অরিযপথং আনেতা, অঞ্ঞত্র মযাতি – পস্সন্তানং…পে॰… মহোঘপক্খন্দো লোকসন্নিৰাসো; তস্স নত্থঞ্ঞো কোচি ওঘা উদ্ধতা, অঞ্ঞত্র মযাতি – পস্সন্তানং…পে॰…।
Andho lokasannivāso acakkhukoti – passantānaṃ…pe… hatanetto lokasannivāso apariṇāyakoti – passantānaṃ…pe… vipathapakkhando 16 lokasannivāso añjasāparaddho; tassa natthañño koci ariyapathaṃ ānetā, aññatra mayāti – passantānaṃ…pe… mahoghapakkhando lokasannivāso; tassa natthañño koci oghā uddhatā, aññatra mayāti – passantānaṃ…pe….
১১৮. দ্ৰীহি দিট্ঠিগতেহি পরিযুট্ঠিতো লোকসন্নিৰাসোতি – পস্সন্তানং…পে॰… তীহি দুচ্চরিতেহি ৰিপ্পটিপন্নো লোকসন্নিৰাসোতি – পস্সন্তানং…পে॰… চতূহি যোগেহি যুত্তো লোকসন্নিৰাসো চতুযোগযোজিতোতি – পস্সন্তানং…পে॰… চতূহি গন্থেহি 17 গন্থিতো লোকসন্নিৰাসোতি – পস্সন্তানং…পে॰… চতূহি উপাদানেহি উপাদিযতি লোকসন্নিৰাসোতি – পস্সন্তানং…পে॰… পঞ্চগতিসমারুল়্হো লোকসন্নিৰাসোতি – পস্সন্তানং…পে॰… পঞ্চহি কামগুণেহি রজ্জতি লোকসন্নিৰাসোতি – পস্সন্তানং…পে॰… পঞ্চহি নীৰরণেহি ওত্থটো লোকসন্নিৰাসোতি – পস্সন্তানং…পে॰… ছহি ৰিৰাদমূলেহি ৰিৰদতি লোকসন্নিৰাসোতি – পস্সন্তানং…পে॰… ছহি তণ্হাকাযেহি রজ্জতি লোকসন্নিৰাসোতি – পস্সন্তানং…পে॰… ছহি দিট্ঠিগতেহি পরিযুট্ঠিতো লোকসন্নিৰাসোতি – পস্সন্তানং …পে॰… সত্তহি অনুসযেহি অনুসটো লোকসন্নিৰাসোতি – পস্সন্তানং…পে॰… সত্তহি সঞ্ঞোজনেহি সঞ্ঞুত্তো লোকসন্নিৰাসোতি – পস্সন্তানং…পে॰… সত্তহি মানেহি উন্নতো 18 লোকসন্নিৰাসোতি – পস্সন্তানং…পে॰… অট্ঠহি লোকধম্মেহি সম্পরিৰত্ততি লোকসন্নিৰাসোতি – পস্সন্তানং…পে॰… অট্ঠহি মিচ্ছত্তেহি নিয্যাতো লোকসন্নিৰাসোতি – পস্সন্তানং…পে॰… অট্ঠহি পুরিসদোসেহি দুস্সতি লোকসন্নিৰাসোতি – পস্সন্তানং…পে॰… নৰহি আঘাতৰত্থূহি আঘাতিতো লোকসন্নিৰাসোতি – পস্সন্তানং …পে॰… নৰৰিধমানেহি উন্নতো লোকসন্নিৰাসোতি – পস্সন্তানং…পে॰… নৰহি তণ্হামূলকেহি ধম্মেহি রজ্জতি লোকসন্নিৰাসোতি – পস্সন্তানং…পে॰… দসহি কিলেসৰত্থূহি কিলিস্সতি লোকসন্নিৰাসোতি – পস্সন্তানং…পে॰… দসহি আঘাতৰত্থূহি আঘাতিতো লোকসন্নিৰাসোতি – পস্সন্তানং…পে॰… দসহি অকুসলকম্মপথেহি সমন্নাগতো লোকসন্নিৰাসোতি – পস্সন্তানং…পে॰… দসহি সঞ্ঞোজনেহি সঞ্ঞুত্তো লোকসন্নিৰাসোতি – পস্সন্তানং…পে॰… দসহি মিচ্ছত্তেহি নিয্যাতো লোকসন্নিৰাসোতি – পস্সন্তানং…পে॰… দসৰত্থুকায মিচ্ছাদিট্ঠিযা সমন্নাগতো লোকসন্নিৰাসোতি – পস্সন্তানং…পে॰… দসৰত্থুকায অন্তগ্গাহিকায দিট্ঠিযা সমন্নাগতো লোকসন্নিৰাসোতি – পস্সন্তানং…পে॰… অট্ঠসততণ্হাপপঞ্চসতেহি পপঞ্চিতো লোকসন্নিৰাসোতি – পস্সন্তানং বুদ্ধানং ভগৰন্তানং সত্তেসু মহাকরুণা ওক্কমতি। দ্ৰাসট্ঠিযা দিট্ঠিগতেহি পরিযুট্ঠিতো লোকসন্নিৰাসোতি – পস্সন্তানং বুদ্ধানং ভগৰন্তানং সত্তেসু মহাকরুণা ওক্কমতি।
118. Dvīhi diṭṭhigatehi pariyuṭṭhito lokasannivāsoti – passantānaṃ…pe… tīhi duccaritehi vippaṭipanno lokasannivāsoti – passantānaṃ…pe… catūhi yogehi yutto lokasannivāso catuyogayojitoti – passantānaṃ…pe… catūhi ganthehi 19 ganthito lokasannivāsoti – passantānaṃ…pe… catūhi upādānehi upādiyati lokasannivāsoti – passantānaṃ…pe… pañcagatisamāruḷho lokasannivāsoti – passantānaṃ…pe… pañcahi kāmaguṇehi rajjati lokasannivāsoti – passantānaṃ…pe… pañcahi nīvaraṇehi otthaṭo lokasannivāsoti – passantānaṃ…pe… chahi vivādamūlehi vivadati lokasannivāsoti – passantānaṃ…pe… chahi taṇhākāyehi rajjati lokasannivāsoti – passantānaṃ…pe… chahi diṭṭhigatehi pariyuṭṭhito lokasannivāsoti – passantānaṃ …pe… sattahi anusayehi anusaṭo lokasannivāsoti – passantānaṃ…pe… sattahi saññojanehi saññutto lokasannivāsoti – passantānaṃ…pe… sattahi mānehi unnato 20 lokasannivāsoti – passantānaṃ…pe… aṭṭhahi lokadhammehi samparivattati lokasannivāsoti – passantānaṃ…pe… aṭṭhahi micchattehi niyyāto lokasannivāsoti – passantānaṃ…pe… aṭṭhahi purisadosehi dussati lokasannivāsoti – passantānaṃ…pe… navahi āghātavatthūhi āghātito lokasannivāsoti – passantānaṃ …pe… navavidhamānehi unnato lokasannivāsoti – passantānaṃ…pe… navahi taṇhāmūlakehi dhammehi rajjati lokasannivāsoti – passantānaṃ…pe… dasahi kilesavatthūhi kilissati lokasannivāsoti – passantānaṃ…pe… dasahi āghātavatthūhi āghātito lokasannivāsoti – passantānaṃ…pe… dasahi akusalakammapathehi samannāgato lokasannivāsoti – passantānaṃ…pe… dasahi saññojanehi saññutto lokasannivāsoti – passantānaṃ…pe… dasahi micchattehi niyyāto lokasannivāsoti – passantānaṃ…pe… dasavatthukāya micchādiṭṭhiyā samannāgato lokasannivāsoti – passantānaṃ…pe… dasavatthukāya antaggāhikāya diṭṭhiyā samannāgato lokasannivāsoti – passantānaṃ…pe… aṭṭhasatataṇhāpapañcasatehi papañcito lokasannivāsoti – passantānaṃ buddhānaṃ bhagavantānaṃ sattesu mahākaruṇā okkamati. Dvāsaṭṭhiyā diṭṭhigatehi pariyuṭṭhito lokasannivāsoti – passantānaṃ buddhānaṃ bhagavantānaṃ sattesu mahākaruṇā okkamati.
অহঞ্চম্হি তিণ্ণো, লোকো চ অতিণ্ণো অহং চম্হি মুত্তো, লোকো চ অমুত্তো; অহঞ্চম্হি দন্তো, লোকো চ অদন্তো; অহং চম্হি সন্তো, লোকো চ অসন্তো; অহং চম্হি অস্সত্থো, লোকো চ অনস্সত্থো; অহং চম্হি পরিনিব্বুতো, লোকো চ অপরিনিব্বুতো; পহোমি খ্ৰাহং তিণ্ণো তারেতুং, মুত্তো মোচেতুং, দন্তো দমেতুং, সন্তো সমেতুং, অস্সত্থো অস্সাসেতুং, পরিনিব্বুতো পরে চ পরিনিব্বাপেতুন্তি – পস্সন্তানং বুদ্ধানং ভগৰন্তানং সত্তেসু মহাকরুণা ওক্কমতি। ইদং তথাগতস্স মহাকরুণাসমাপত্তিযা ঞাণং।
Ahañcamhi tiṇṇo, loko ca atiṇṇo ahaṃ camhi mutto, loko ca amutto; ahañcamhi danto, loko ca adanto; ahaṃ camhi santo, loko ca asanto; ahaṃ camhi assattho, loko ca anassattho; ahaṃ camhi parinibbuto, loko ca aparinibbuto; pahomi khvāhaṃ tiṇṇo tāretuṃ, mutto mocetuṃ, danto dametuṃ, santo sametuṃ, assattho assāsetuṃ, parinibbuto pare ca parinibbāpetunti – passantānaṃ buddhānaṃ bhagavantānaṃ sattesu mahākaruṇā okkamati. Idaṃ tathāgatassa mahākaruṇāsamāpattiyā ñāṇaṃ.
মহাকরুণাঞাণনিদ্দেসো একসত্ততিমো।
Mahākaruṇāñāṇaniddeso ekasattatimo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৭১. মহাকরুণাঞাণনিদ্দেসৰণ্ণনা • 71. Mahākaruṇāñāṇaniddesavaṇṇanā
