| Library / Tipiṭaka / д̇ибидага • Tipiṭaka / уд̣̇аана-адтагат̇аа • Udāna-aṭṭhakathā |
6. махаагассабасуд̇д̇аван̣н̣анаа
6. Mahākassapasuttavaṇṇanā
6. чадтз рааж̇аг̇ахзд̇и звам̣наамагз наг̇арз. д̇ан̃хи махааманд̇хаад̇умахааг̇овинд̣̇аад̣̇ийхи бариг̇г̇ахид̇ад̇д̇аа ‘‘рааж̇аг̇аха’’нд̇и вужжад̇и. ‘‘д̣̇урабхибхаванийяад̇д̇аа бадирааж̇уунам̣ г̇ахабхууд̇анд̇и рааж̇аг̇аха’’нд̇иаад̣̇инаа ан̃н̃знзд̇т̇а багаарзна ван̣н̣аяанд̇и. гинд̇зхи? наамамзд̇ам̣ д̇асса наг̇арасса. д̇ам̣ банзд̇ам̣ б̣уд̣̇д̇хагаалз жаггавад̇д̇игаалз жа наг̇арам̣ ход̇и, сзсагаалз сун̃н̃ам̣ яагкабариг̇г̇ахид̇ам̣ д̇зсам̣ васанадтаанам̣ худ̇ваа д̇идтад̇и. взл̣уванз галанд̣̇аганиваабзд̇и взл̣увананд̇и д̇асса вихаарасса наамам̣. д̇ам̣ гира адтаарасахад̇т̇уб̣б̣зд̇хзна баагаарзна баригкид̇д̇ам̣ б̣уд̣̇д̇хасса бхаг̇авад̇о васанаанужчавигааяа махад̇ияаа г̇анд̇хагудияаа ан̃н̃зхи жа баасаад̣̇агудилзн̣аман̣д̣абажан̇гамад̣̇ваарагодтагаад̣̇ийхи бадиман̣д̣ид̇ам̣ б̣ахи взл̣уухи баригкид̇д̇ам̣ ахоси нийлобхаасам̣ манорамам̣, д̇зна ‘‘взл̣увана’’нд̇и вужжад̇и. галанд̣̇агаанан̃жзд̇т̇а ниваабам̣ ад̣̇ам̣су, д̇асмаа ‘‘галанд̣̇аганиваабо’’д̇и вужжад̇и. буб̣б̣з гира ан̃н̃ад̇аро рааж̇аа д̇ам̣ уяяаанам̣ гийл̣анад̇т̇ам̣ бавидто сураамад̣̇амад̇д̇о д̣̇иваасзяяам̣ убаг̇ад̇о суби, бариж̇анобисса ‘‘суд̇д̇о рааж̇аа’’д̇и бубпапалаад̣̇ийхи балобхияамаано ид̇о жид̇о жа баггаами. ат̇а сурааг̇анд̇хзна ан̃н̃ад̇арасмаа ругкасусираа ган̣хасаббо нигкамид̇ваа ран̃н̃о абхимуко ааг̇ажчад̇и. д̇ам̣ д̣̇исваа ругкад̣̇звад̇аа ‘‘ран̃н̃о ж̇ийвид̇ам̣ д̣̇ассаамий’’д̇и галанд̣̇агавзсзна г̇анд̇ваа ган̣н̣амуулз сад̣̇д̣̇амагааси. рааж̇аа бадиб̣уж̇жхи, ган̣хасаббо нивад̇д̇о. со д̇ам̣ д̣̇исваа ‘‘имааяа гаал̣агааяа мама ж̇ийвид̇ам̣ д̣̇инна’’нд̇и гаал̣агаанам̣ ниваабам̣ д̇ад̇т̇а бадтабзси, абхаяагхосан̃жа гхосаабзси. д̇асмаа д̇ад̇о бадтааяа д̇ам̣ ‘‘галанд̣̇аганивааба’’нд̇и сан̇кам̣ г̇ад̇ам̣. галанд̣̇агаад̇и хи гаал̣агаанам̣ наамам̣, д̇асмим̣ взл̣уванз галанд̣̇аганиваабз.
6. Chaṭṭhe rājagaheti evaṃnāmake nagare. Tañhi mahāmandhātumahāgovindādīhi pariggahitattā ‘‘rājagaha’’nti vuccati. ‘‘Durabhibhavanīyattā paṭirājūnaṃ gahabhūtanti rājagaha’’ntiādinā aññenettha pakārena vaṇṇayanti. Kintehi? Nāmametaṃ tassa nagarassa. Taṃ panetaṃ buddhakāle cakkavattikāle ca nagaraṃ hoti, sesakāle suññaṃ yakkhapariggahitaṃ tesaṃ vasanaṭṭhānaṃ hutvā tiṭṭhati. Veḷuvane kalandakanivāpeti veḷuvananti tassa vihārassa nāmaṃ. Taṃ kira aṭṭhārasahatthubbedhena pākārena parikkhittaṃ buddhassa bhagavato vasanānucchavikāya mahatiyā gandhakuṭiyā aññehi ca pāsādakuṭileṇamaṇḍapacaṅkamadvārakoṭṭhakādīhi paṭimaṇḍitaṃ bahi veḷūhi parikkhittaṃ ahosi nīlobhāsaṃ manoramaṃ, tena ‘‘veḷuvana’’nti vuccati. Kalandakānañcettha nivāpaṃ adaṃsu, tasmā ‘‘kalandakanivāpo’’ti vuccati. Pubbe kira aññataro rājā taṃ uyyānaṃ kīḷanatthaṃ paviṭṭho surāmadamatto divāseyyaṃ upagato supi, parijanopissa ‘‘sutto rājā’’ti pupphaphalādīhi palobhiyamāno ito cito ca pakkāmi. Atha surāgandhena aññatarasmā rukkhasusirā kaṇhasappo nikkhamitvā rañño abhimukho āgacchati. Taṃ disvā rukkhadevatā ‘‘rañño jīvitaṃ dassāmī’’ti kalandakavesena gantvā kaṇṇamūle saddamakāsi. Rājā paṭibujjhi, kaṇhasappo nivatto. So taṃ disvā ‘‘imāya kāḷakāya mama jīvitaṃ dinna’’nti kāḷakānaṃ nivāpaṃ tattha paṭṭhapesi, abhayaghosañca ghosāpesi. Tasmā tato paṭṭhāya taṃ ‘‘kalandakanivāpa’’nti saṅkhaṃ gataṃ. Kalandakāti hi kāḷakānaṃ nāmaṃ, tasmiṃ veḷuvane kalandakanivāpe.
махаагассабод̇и маханд̇зхи сийлагканд̇хаад̣̇ийхи саманнааг̇ад̇ад̇д̇аа маханд̇о гассабод̇и махаагассабо, абижа гумаарагассабад̇т̇зрам̣ убаад̣̇ааяа аяам̣ махаат̇зро ‘‘махаагассабо’’д̇и вужжад̇и. биббалиг̇ухааяанд̇и д̇ассаа гира г̇ухааяа д̣̇ваарасамийбз зго биббалиругко ахоси, д̇зна саа ‘‘биббалиг̇ухаа’’д̇и бан̃н̃ааяид̇т̇а. д̇ассам̣ биббалиг̇ухааяам̣. ааб̣аад̇хигод̇и ааб̣аад̇хо асса ад̇т̇ийд̇и ааб̣аад̇хиго, б̣яаад̇хигод̇и ад̇т̇о. д̣̇угкид̇од̇и гааяасанниссид̇ам̣ д̣̇угкам̣ сан̃ж̇аад̇ам̣ ассаад̇и д̣̇угкид̇о, д̣̇угкаббад̇д̇од̇и ад̇т̇о. б̣аал̣хаг̇илаанод̇и ад̇химад̇д̇аг̇злан̃н̃о, д̇ам̣ бана г̇злан̃н̃ам̣ сад̇о самбаж̇аано худ̇ваа ад̇хиваасзси. ат̇асса бхаг̇аваа д̇ам̣ бавад̇д̇им̣ н̃ад̇ваа д̇ад̇т̇а г̇анд̇ваа б̣ож̇жхан̇г̇абарид̇д̇ам̣ абхааси, д̇знзва т̇зрасса со ааб̣аад̇хо вуубасами. вуд̇д̇ан̃хзд̇ам̣ б̣ож̇жхан̇г̇асам̣яуд̇д̇з –
Mahākassapoti mahantehi sīlakkhandhādīhi samannāgatattā mahanto kassapoti mahākassapo, apica kumārakassapattheraṃ upādāya ayaṃ mahāthero ‘‘mahākassapo’’ti vuccati. Pippaliguhāyanti tassā kira guhāya dvārasamīpe eko pippalirukkho ahosi, tena sā ‘‘pippaliguhā’’ti paññāyittha. Tassaṃ pippaliguhāyaṃ. Ābādhikoti ābādho assa atthīti ābādhiko, byādhikoti attho. Dukkhitoti kāyasannissitaṃ dukkhaṃ sañjātaṃ assāti dukkhito, dukkhappattoti attho. Bāḷhagilānoti adhimattagelañño, taṃ pana gelaññaṃ sato sampajāno hutvā adhivāsesi. Athassa bhagavā taṃ pavattiṃ ñatvā tattha gantvā bojjhaṅgaparittaṃ abhāsi, teneva therassa so ābādho vūpasami. Vuttañhetaṃ bojjhaṅgasaṃyutte –
‘‘д̇зна ко бана самаязна ааяасмаа махаагассабо биббалиг̇ухааяам̣ вихарад̇и ааб̣аад̇хиго д̣̇угкид̇о б̣аал̣хаг̇илаано. ат̇а ко бхаг̇аваа сааяанхасамаяам̣ бадисаллаанаа вудтид̇о язнааяасмаа махаагассабо д̇знубасан̇гами, убасан̇гамид̇ваа бан̃н̃ад̇д̇з аасанз нисийд̣̇и. нисаж̇ж̇а ко бхаг̇аваа…бз… зд̇ад̣̇авожа – ‘гажжи д̇з, гассаба, каманийяам̣, гажжи яаабанийяам̣, гажжи д̣̇угкаа взд̣̇анаа бадиггаманд̇и, но абхиггаманд̇и, бадиггамосаанам̣ бан̃н̃ааяад̇и но абхиггамо’д̇и? ‘на мз, бханд̇з, каманийяам̣, на яаабанийяам̣, б̣аал̣хаа мз бханд̇з, д̣̇угкаа взд̣̇анаа абхиггаманд̇и но бадиггаманд̇и, абхиггамосаанам̣ бан̃н̃ааяад̇и но бадиггамо’д̇и.
‘‘Tena kho pana samayena āyasmā mahākassapo pippaliguhāyaṃ viharati ābādhiko dukkhito bāḷhagilāno. Atha kho bhagavā sāyanhasamayaṃ paṭisallānā vuṭṭhito yenāyasmā mahākassapo tenupasaṅkami, upasaṅkamitvā paññatte āsane nisīdi. Nisajja kho bhagavā…pe… etadavoca – ‘kacci te, kassapa, khamanīyaṃ, kacci yāpanīyaṃ, kacci dukkhā vedanā paṭikkamanti, no abhikkamanti, paṭikkamosānaṃ paññāyati no abhikkamo’ti? ‘Na me, bhante, khamanīyaṃ, na yāpanīyaṃ, bāḷhā me bhante, dukkhā vedanā abhikkamanti no paṭikkamanti, abhikkamosānaṃ paññāyati no paṭikkamo’ti.
‘‘‘сад̇д̇имз, гассаба, б̣ож̇жхан̇г̇аа маяаа саммад̣̇агкаад̇аа бхаавид̇аа б̣ахулийгад̇аа абхин̃н̃ааяа самб̣од̇хааяа ниб̣б̣аанааяа сам̣вад̇д̇анд̇и. гад̇амз сад̇д̇а? сад̇исамб̣ож̇жхан̇г̇о ко, гассаба, маяаа саммад̣̇агкаад̇о бхаавид̇о б̣ахулийгад̇о абхин̃н̃ааяа самб̣од̇хааяа ниб̣б̣аанааяа сам̣вад̇д̇ад̇и…бз… убзгкаасамб̣ож̇жхан̇г̇о ко, гассаба, маяаа саммад̣̇агкаад̇о бхаавид̇о б̣ахулийгад̇о абхин̃н̃ааяа самб̣од̇хааяа ниб̣б̣аанааяа сам̣вад̇д̇ад̇и. имз ко, гассаба, сад̇д̇а б̣ож̇жхан̇г̇аа маяаа саммад̣̇агкаад̇аа бхаавид̇аа б̣ахуулийгад̇аа абхин̃н̃ааяа самб̣од̇хааяа ниб̣б̣аанааяа сам̣вад̇д̇анд̇ий’д̇и. ‘д̇аг̇гха бхаг̇аваа б̣ож̇жхан̇г̇аа, д̇аг̇гха, суг̇ад̇а, б̣ож̇жхан̇г̇аа’’’д̇и.
‘‘‘Sattime, kassapa, bojjhaṅgā mayā sammadakkhātā bhāvitā bahulīkatā abhiññāya sambodhāya nibbānāya saṃvattanti. Katame satta? Satisambojjhaṅgo kho, kassapa, mayā sammadakkhāto bhāvito bahulīkato abhiññāya sambodhāya nibbānāya saṃvattati…pe… upekkhāsambojjhaṅgo kho, kassapa, mayā sammadakkhāto bhāvito bahulīkato abhiññāya sambodhāya nibbānāya saṃvattati. Ime kho, kassapa, satta bojjhaṅgā mayā sammadakkhātā bhāvitā bahūlīkatā abhiññāya sambodhāya nibbānāya saṃvattantī’ti. ‘Taggha bhagavā bojjhaṅgā, taggha, sugata, bojjhaṅgā’’’ti.
‘‘ид̣̇амавожа бхаг̇аваа. ад̇д̇амано ааяасмаа махаагассабо бхаг̇авад̇о бхаасид̇ам̣ абхинанд̣̇и. вудтахи жааяасмаа махаагассабо д̇амхаа ааб̣аад̇хаа, д̇ат̇аа бахийно жааяасмад̇о махаагассабасса со ааб̣аад̇хо ахосий’’д̇и.
‘‘Idamavoca bhagavā. Attamano āyasmā mahākassapo bhagavato bhāsitaṃ abhinandi. Vuṭṭhahi cāyasmā mahākassapo tamhā ābādhā, tathā pahīno cāyasmato mahākassapassa so ābādho ahosī’’ti.
д̇зна вуд̇д̇ам̣ – ‘‘ат̇а ко ааяасмаа махаагассабо абарзна самаязна д̇амхаа ааб̣аад̇хаа вудтаасий’’д̇и.
Tena vuttaṃ – ‘‘atha kho āyasmā mahākassapo aparena samayena tamhā ābādhā vuṭṭhāsī’’ti.
зд̇ад̣̇ахосийд̇и буб̣б̣з г̇злан̃н̃ад̣̇ивасзсу сад̣̇д̇хивихааригзхи убанийд̇ам̣ бин̣д̣абаад̇ам̣ барибхун̃ж̇ид̇ваа вихаарз зва ахоси. ат̇асса д̇амхаа ааб̣аад̇хаа вудтид̇асса зд̇ам̣ ‘‘яам̣нуунаахам̣ рааж̇аг̇ахам̣ бин̣д̣ааяа бависзяяа’’нд̇и баривид̇агго ахоси. бан̃жамад̇д̇аани д̣̇звад̇аасад̇аанийд̇и саггасса д̣̇зваран̃н̃о барижааригаа бан̃жасад̇аа гагудабаад̣̇инияо ажчарааяо. уссуггам̣ аабаннаани хонд̇ийд̇и т̇зрасса бин̣д̣абаад̇ам̣ д̣̇ассаамаад̇и бан̃жабин̣д̣абаад̇асад̇аани саж̇ж̇зд̇ваа суван̣н̣абхааж̇анзхи аад̣̇ааяа анд̇араамаг̇г̇з тад̇ваа, ‘‘бханд̇з, имам̣ бин̣д̣абаад̇ам̣ г̇ан̣хат̇а, сан̇г̇ахам̣ но гарот̇аа’’д̇и вад̣̇амаанаа бин̣д̣абаад̇ад̣̇аанз яуд̇д̇аббаяуд̇д̇аани хонд̇и. д̇зна вуд̇д̇ам̣ ‘‘ааяасмад̇о махаагассабасса бин̣д̣абаад̇аббадилаабхааяаа’’д̇и.
Etadahosīti pubbe gelaññadivasesu saddhivihārikehi upanītaṃ piṇḍapātaṃ paribhuñjitvā vihāre eva ahosi. Athassa tamhā ābādhā vuṭṭhitassa etaṃ ‘‘yaṃnūnāhaṃ rājagahaṃ piṇḍāya paviseyya’’nti parivitakko ahosi. Pañcamattāni devatāsatānīti sakkassa devarañño paricārikā pañcasatā kakuṭapādiniyo accharāyo. Ussukkaṃ āpannāni hontīti therassa piṇḍapātaṃ dassāmāti pañcapiṇḍapātasatāni sajjetvā suvaṇṇabhājanehi ādāya antarāmagge ṭhatvā, ‘‘bhante, imaṃ piṇḍapātaṃ gaṇhatha, saṅgahaṃ no karothā’’ti vadamānā piṇḍapātadāne yuttappayuttāni honti. Tena vuttaṃ ‘‘āyasmato mahākassapassa piṇḍapātappaṭilābhāyā’’ti.
сагго гира д̣̇зварааж̇аа т̇зрасса жид̇д̇аббавад̇д̇им̣ н̃ад̇ваа д̇аа ажчарааяо уяяож̇зси ‘‘г̇ажчат̇а д̇умхз аяяасса махаагассабад̇т̇зрасса бин̣д̣абаад̇ам̣ д̣̇ад̇ваа ад̇д̇ано бад̇идтам̣ гарот̇аа’’д̇и. звам̣ хисса ахоси ‘‘имаасу саб̣б̣аасу г̇ад̇аасу гад̣̇аажи згиссааби хад̇т̇ад̇о бин̣д̣абаад̇ам̣ т̇зро бадиг̇г̇ан̣хзяяа, д̇ам̣ д̇ассаа бхависсад̇и д̣̇ийгхарад̇д̇ам̣ хид̇ааяа сукааяаа’’д̇и. бадигкиби т̇зро, ‘‘бханд̇з , маяхам̣ бин̣д̣абаад̇ам̣ г̇ан̣хат̇а, маяхам̣ бин̣д̣абаад̇ам̣ г̇ан̣хат̇аа’’д̇и вад̣̇анд̇ияо ‘‘г̇ажчат̇а д̇умхз гад̇абун̃н̃аа махаабхог̇аа, ахам̣ д̣̇уг̇г̇ад̇аанам̣ сан̇г̇ахам̣ гариссаамий’’д̇и вад̇ваа, ‘‘бханд̇з, маа но наасзт̇а, сан̇г̇ахам̣ но гарот̇аа’’д̇и вад̣̇анд̇ияо бунаби бадигкибид̇ваа бунаби абаг̇анд̇ум̣ анижчамаанаа яаажанд̇ияо ‘‘на ад̇д̇ано бамаан̣ам̣ ж̇аанаат̇а, абаг̇ажчат̇аа’’д̇и вад̇ваа ажчарам̣ бахари. д̇аа т̇зрасса ажчараасад̣̇д̣̇ам̣ суд̇ваа санд̇аж̇ж̇ид̇аа таад̇ум̣ асаггонд̇ияо балааяид̇ваа д̣̇звалогамзва г̇ад̇аа. д̇зна вуд̇д̇ам̣ – ‘‘бан̃жамад̇д̇аани д̣̇звад̇аасад̇аани бадигкибид̇ваа’’д̇и.
Sakko kira devarājā therassa cittappavattiṃ ñatvā tā accharāyo uyyojesi ‘‘gacchatha tumhe ayyassa mahākassapattherassa piṇḍapātaṃ datvā attano patiṭṭhaṃ karothā’’ti. Evaṃ hissa ahosi ‘‘imāsu sabbāsu gatāsu kadāci ekissāpi hatthato piṇḍapātaṃ thero paṭiggaṇheyya, taṃ tassā bhavissati dīgharattaṃ hitāya sukhāyā’’ti. Paṭikkhipi thero, ‘‘bhante , mayhaṃ piṇḍapātaṃ gaṇhatha, mayhaṃ piṇḍapātaṃ gaṇhathā’’ti vadantiyo ‘‘gacchatha tumhe katapuññā mahābhogā, ahaṃ duggatānaṃ saṅgahaṃ karissāmī’’ti vatvā, ‘‘bhante, mā no nāsetha, saṅgahaṃ no karothā’’ti vadantiyo punapi paṭikkhipitvā punapi apagantuṃ anicchamānā yācantiyo ‘‘na attano pamāṇaṃ jānātha, apagacchathā’’ti vatvā accharaṃ pahari. Tā therassa accharāsaddaṃ sutvā santajjitā ṭhātuṃ asakkontiyo palāyitvā devalokameva gatā. Tena vuttaṃ – ‘‘pañcamattāni devatāsatāni paṭikkhipitvā’’ti.
буб̣б̣ан̣хасамаяанд̇и буб̣б̣ан̣хз згам̣ самаяам̣, згасмим̣ гаалз. ниваасзд̇ваад̇и вихаараниваасанабаривад̇д̇анавасзна ниваасанам̣ д̣̇ал̣хам̣ ниваасзд̇ваа. бад̇д̇ажийварамаад̣̇ааяаад̇и жийварам̣ баарубид̇ваа бад̇д̇ам̣ хад̇т̇зна г̇ахзд̇ваа. бин̣д̣ааяа баависийд̇и бин̣д̣абаад̇ад̇т̇ааяа баависи. д̣̇алид̣̇д̣̇ависикаад̇и д̣̇уг̇г̇ад̇амануссаанам̣ васаногаасо. габан̣ависикаад̇и бхог̇абаариж̇ун̃н̃аббад̇д̇ияаа д̣̇ийнамануссаанам̣ ваасо. бзсагаарависикаад̇и д̇анд̇авааяаваасо. ад̣̇д̣̇асаа ко бхаг̇аваад̇и гат̇ам̣ ад̣̇д̣̇аса? ‘‘ааб̣аад̇хаа вудтид̇о мама буд̇д̇о гассабо гинну ко гарод̇ий’’д̇и ааваж̇ж̇знд̇о взл̣уванз нисинно зва бхаг̇аваа д̣̇иб̣б̣ажагкунаа ад̣̇д̣̇аса.
Pubbaṇhasamayanti pubbaṇhe ekaṃ samayaṃ, ekasmiṃ kāle. Nivāsetvāti vihāranivāsanaparivattanavasena nivāsanaṃ daḷhaṃ nivāsetvā. Pattacīvaramādāyāti cīvaraṃ pārupitvā pattaṃ hatthena gahetvā. Piṇḍāya pāvisīti piṇḍapātatthāya pāvisi. Daliddavisikhāti duggatamanussānaṃ vasanokāso. Kapaṇavisikhāti bhogapārijuññappattiyā dīnamanussānaṃ vāso. Pesakāravisikhāti tantavāyavāso. Addasā kho bhagavāti kathaṃ addasa? ‘‘Ābādhā vuṭṭhito mama putto kassapo kinnu kho karotī’’ti āvajjento veḷuvane nisinno eva bhagavā dibbacakkhunā addasa.
зд̇амад̇т̇ам̣ вид̣̇ид̇ваад̇и яааяам̣ ааяасмад̇о махаагассабасса бан̃жахи ажчараасад̇зхи убанийд̇ам̣ анзгасуубам̣ анзгаб̣яан̃ж̇анам̣ д̣̇иб̣б̣абин̣д̣абаад̇ам̣ бадигкибид̇ваа габан̣аж̇анаануг̇г̇ахаббадибад̇д̇и вуд̇д̇аа, зд̇амад̇т̇ам̣ ж̇аанид̇ваа. имам̣ уд̣̇аананд̇и имам̣ барамаббижчад̇аад̣̇ассанамукзна кийн̣аасавасса д̇аад̣̇ийбхааваанубхаавад̣̇ийбагам̣ уд̣̇аанам̣ уд̣̇аанзси.
Etamatthaṃviditvāti yāyaṃ āyasmato mahākassapassa pañcahi accharāsatehi upanītaṃ anekasūpaṃ anekabyañjanaṃ dibbapiṇḍapātaṃ paṭikkhipitvā kapaṇajanānuggahappaṭipatti vuttā, etamatthaṃ jānitvā. Imaṃ udānanti imaṃ paramappicchatādassanamukhena khīṇāsavassa tādībhāvānubhāvadīpakaṃ udānaṃ udānesi.
д̇ад̇т̇а анан̃н̃абосинд̇и ан̃н̃ам̣ босзд̇ийд̇и ан̃н̃абосий, на ан̃н̃абосий анан̃н̃абосий, ад̇д̇анаа босзд̇аб̣б̣асса ан̃н̃асса абхаавзна ад̣̇уд̇ияо, згагод̇и ад̇т̇о. д̇зна т̇зрасса субхарад̇ам̣ д̣̇ассзд̇и. т̇зро хи гааяабарихааригзна жийварзна гужчибарихааригзна жа бин̣д̣абаад̇зна ад̇д̇аанамзва босзнд̇о барамаббижчо худ̇ваа вихарад̇и, ан̃н̃ам̣ н̃аад̇имид̇д̇аад̣̇ийсу ган̃жи на босзд̇и гад̇т̇ажи алаг̇г̇абхаавад̇о. ат̇а ваа ан̃н̃зна ан̃н̃ад̇арзна босзд̇аб̣б̣ад̇ааяа абхаавад̇о анан̃н̃абосий. яо хи згасмим̣язва бажжаяад̣̇ааяагз бадиб̣ад̣̇д̇хажад̇убажжаяо со анан̃н̃абосий наама на ход̇и згааяад̇д̇авуд̇д̇ид̇о . т̇зро бана ‘‘яат̇ааби бхамаро бубпа’’нд̇и (д̇ха. ба. 49) г̇аат̇ааяа вуд̇д̇анаязна ж̇ан̇гхааб̣алам̣ ниссааяа бин̣д̣ааяа жаранд̇о гулзсу нижжанаво худ̇ваа миссагабхад̇д̇зна яаабзд̇и. д̇ат̇аа хи нам̣ бхаг̇аваа жанд̣̇уубамаббадибад̣̇ааяа т̇омзси. ан̃н̃аад̇анд̇и абхин̃н̃аад̇ам̣, яат̇аабхужжаг̇ун̣зхи бад̇т̇адаяасам̣, д̇знзва ваа анан̃н̃абосибхаавзна аббижчад̇аасанд̇удтид̇аахи н̃аад̇ам̣. ат̇а ваа ан̃н̃аад̇анд̇и саб̣б̣асо бахийнад̇ан̣хад̇ааяа лаабхасаггаарасилоганигааманахзд̇у ад̇д̇аанам̣ ж̇аанаабанавасзна на н̃аад̇ам̣. авийд̇ад̇ан̣хо хи баабижчо гухагад̇ааяа самбхааванаад̇хиббааязна ад̇д̇аанам̣ ж̇аанаабзд̇и. д̣̇анд̇анд̇и чал̣ан̇г̇убзгкаавасзна инд̣̇риязсу уд̇д̇амад̣̇аманзна д̣̇анд̇ам̣. саарз бад̇идтид̇анд̇и вимуд̇д̇исаарз авадтид̇ам̣, асзгкасийлагканд̇хаад̣̇игз ваа сийлаад̣̇исаарз бад̇идтид̇ам̣. кийн̣аасавам̣ ванд̇ад̣̇осанд̇и гаамаасаваад̣̇ийнам̣ жад̇уннам̣ аасаваанам̣ анавасзсам̣ бахийнад̇д̇аа кийн̣аасавам̣. д̇ад̇о зва рааг̇аад̣̇ид̣̇осаанам̣ саб̣б̣асо ванд̇ад̇д̇аа ванд̇ад̣̇осам̣. д̇амахам̣ б̣рууми б̣раахман̣анд̇и д̇ам̣ яат̇аавуд̇д̇аг̇ун̣ам̣ барамад̇т̇аб̣раахман̣ам̣ ахам̣ б̣раахман̣анд̇и вад̣̇аамийд̇и. ид̇хааби хздтаа вуд̇д̇анаязнзва д̣̇зсанаанаанад̇д̇ам̣ взд̣̇ид̇аб̣б̣ам̣.
Tattha anaññaposinti aññaṃ posetīti aññaposī, na aññaposī anaññaposī, attanā posetabbassa aññassa abhāvena adutiyo, ekakoti attho. Tena therassa subharataṃ dasseti. Thero hi kāyaparihārikena cīvarena kucchiparihārikena ca piṇḍapātena attānameva posento paramappiccho hutvā viharati, aññaṃ ñātimittādīsu kañci na poseti katthaci alaggabhāvato. Atha vā aññena aññatarena posetabbatāya abhāvato anaññaposī. Yo hi ekasmiṃyeva paccayadāyake paṭibaddhacatupaccayo so anaññaposī nāma na hoti ekāyattavuttito . Thero pana ‘‘yathāpi bhamaro puppha’’nti (dha. pa. 49) gāthāya vuttanayena jaṅghābalaṃ nissāya piṇḍāya caranto kulesu niccanavo hutvā missakabhattena yāpeti. Tathā hi naṃ bhagavā candūpamappaṭipadāya thomesi. Aññātanti abhiññātaṃ, yathābhuccaguṇehi patthaṭayasaṃ, teneva vā anaññaposibhāvena appicchatāsantuṭṭhitāhi ñātaṃ. Atha vā aññātanti sabbaso pahīnataṇhatāya lābhasakkārasilokanikāmanahetu attānaṃ jānāpanavasena na ñātaṃ. Avītataṇho hi pāpiccho kuhakatāya sambhāvanādhippāyena attānaṃ jānāpeti. Dantanti chaḷaṅgupekkhāvasena indriyesu uttamadamanena dantaṃ. Sāre patiṭṭhitanti vimuttisāre avaṭṭhitaṃ, asekkhasīlakkhandhādike vā sīlādisāre patiṭṭhitaṃ. Khīṇāsavaṃ vantadosanti kāmāsavādīnaṃ catunnaṃ āsavānaṃ anavasesaṃ pahīnattā khīṇāsavaṃ. Tato eva rāgādidosānaṃ sabbaso vantattā vantadosaṃ. Tamahaṃ brūmi brāhmaṇanti taṃ yathāvuttaguṇaṃ paramatthabrāhmaṇaṃ ahaṃ brāhmaṇanti vadāmīti. Idhāpi heṭṭhā vuttanayeneva desanānānattaṃ veditabbaṃ.
чадтасуд̇д̇аван̣н̣анаа нидтид̇аа.
Chaṭṭhasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / уд̣̇аанабаал̣и • Udānapāḷi / 6. махаагассабасуд̇д̇ам̣ • 6. Mahākassapasuttaṃ
