| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
3-3. махаагассабад̇т̇зраабад̣̇аанаван̣н̣анаа
3-3. Mahākassapattheraapadānavaṇṇanā
бад̣̇умуд̇д̇арасса бхаг̇авад̇од̇яаад̣̇игам̣ ааяасмад̇о махаагассабад̇т̇зрасса абад̣̇аанам̣. аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяаани бун̃н̃асамбхаараани убажинанд̇о бад̣̇умуд̇д̇арабхаг̇авад̇о гаалз хам̣савад̇ийнаг̇арз взд̣̇зхо наама асийд̇игодивибхаво гудумб̣иго ахоси. со б̣уд̣̇д̇хамаамаго, д̇хаммамаамаго, сан̇гхамаамаго, убаасаго худ̇ваа вихаранд̇о згасмим̣ убосат̇ад̣̇ивасз баад̇ова субхож̇анам̣ бхун̃ж̇ид̇ваа убосат̇ан̇г̇аани ад̇хидтааяа г̇анд̇хабубпаад̣̇ийни г̇ахзд̇ваа вихаарам̣ г̇анд̇ваа сад̇т̇аарам̣ бууж̇зд̇ваа ванд̣̇ид̇ваа згаманд̇ам̣ нисийд̣̇и.
Padumuttarassabhagavatotyādikaṃ āyasmato mahākassapattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññasambhārāni upacinanto padumuttarabhagavato kāle haṃsavatīnagare vedeho nāma asītikoṭivibhavo kuṭumbiko ahosi. So buddhamāmako, dhammamāmako, saṅghamāmako, upāsako hutvā viharanto ekasmiṃ uposathadivase pātova subhojanaṃ bhuñjitvā uposathaṅgāni adhiṭṭhāya gandhapupphādīni gahetvā vihāraṃ gantvā satthāraṃ pūjetvā vanditvā ekamantaṃ nisīdi.
д̇асмин̃жа кан̣з сад̇т̇аа махаанисабхад̇т̇зрам̣ наама д̇ад̇ияасаавагам̣ ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуунам̣ д̇худ̇аваад̣̇аанам̣ яад̣̇ид̣̇ам̣ нисабхо’’д̇и зд̇ад̣̇аг̇г̇з табзси. убаасаго д̇ам̣ суд̇ваа басанно д̇хаммагат̇аавасаанз махааж̇анз удтааяа г̇ад̇з сад̇т̇аарам̣ ванд̣̇ид̇ваа ‘‘свз, бханд̇з, маяхам̣ бхигкам̣ ад̇хиваасзт̇аа’’д̇и ниманд̇зси. ‘‘махаа ко, убаасага, бхигкусан̇гхо’’д̇и. ‘‘гид̇д̇аго, бханд̇з’’д̇и? ‘‘адтасадтибхигкусад̇асахасса’’нд̇и. ‘‘бханд̇з, згам̣ сааман̣зрамби вихаарз асзсзд̇ваа маяхам̣ бхигкам̣ г̇ан̣хат̇аа’’д̇и. сад̇т̇аа ад̇хиваасзси. убаасаго сад̇т̇у ад̇хиваасанам̣ н̃ад̇ваа г̇зхам̣ г̇анд̇ваа махаад̣̇аанам̣ саж̇ж̇зд̇ваа бунад̣̇ивасз сад̇т̇у гаалам̣ аарожаабзси. сад̇т̇аа бад̇д̇ажийварамаад̣̇ааяа бхигкусан̇гхабаривуд̇о убаасагасса гхарам̣ г̇анд̇ваа бан̃н̃ад̇д̇аасанз нисинно д̣̇агкин̣од̣̇агаавасаанз яааг̇уаад̣̇ийни самбадижчанд̇о бхад̇д̇ависсаг̇г̇ам̣ агааси. убаасагоби сад̇т̇у санд̇игз нисийд̣̇и.
Tasmiñca khaṇe satthā mahānisabhattheraṃ nāma tatiyasāvakaṃ ‘‘etadaggaṃ, bhikkhave, mama sāvakānaṃ bhikkhūnaṃ dhutavādānaṃ yadidaṃ nisabho’’ti etadagge ṭhapesi. Upāsako taṃ sutvā pasanno dhammakathāvasāne mahājane uṭṭhāya gate satthāraṃ vanditvā ‘‘sve, bhante, mayhaṃ bhikkhaṃ adhivāsethā’’ti nimantesi. ‘‘Mahā kho, upāsaka, bhikkhusaṅgho’’ti. ‘‘Kittako, bhante’’ti? ‘‘Aṭṭhasaṭṭhibhikkhusatasahassa’’nti. ‘‘Bhante, ekaṃ sāmaṇerampi vihāre asesetvā mayhaṃ bhikkhaṃ gaṇhathā’’ti. Satthā adhivāsesi. Upāsako satthu adhivāsanaṃ ñatvā gehaṃ gantvā mahādānaṃ sajjetvā punadivase satthu kālaṃ ārocāpesi. Satthā pattacīvaramādāya bhikkhusaṅghaparivuto upāsakassa gharaṃ gantvā paññattāsane nisinno dakkhiṇodakāvasāne yāguādīni sampaṭicchanto bhattavissaggaṃ akāsi. Upāsakopi satthu santike nisīdi.
д̇асмим̣ анд̇арз махаанисабхад̇т̇зро бин̣д̣ааяа жаранд̇о д̇амзва вийт̇им̣ бадибаж̇ж̇и. убаасаго д̣̇исваа удтааяа г̇анд̇ваа т̇зрам̣ ванд̣̇ид̇ваа ‘‘бад̇д̇ам̣, бханд̇з, д̣̇зт̇аа’’д̇и ааха. т̇зро бад̇д̇ам̣ ад̣̇ааси. ‘‘бханд̇з, ид̇хзва бависат̇а, сад̇т̇ааби г̇зхз нисинно’’д̇и. ‘‘на ваддиссад̇и, убаасагаа’’д̇и. со т̇зрасса бад̇д̇ам̣ г̇ахзд̇ваа бин̣д̣абаад̇асса буурзд̇ваа ад̣̇ааси. д̇ад̇о т̇зрам̣ ануг̇анд̇ваа нивад̇д̇о сад̇т̇у санд̇игз нисийд̣̇ид̇ваа звамааха – ‘‘махаанисабхад̇т̇зро, бханд̇з, ‘сад̇т̇ааби г̇зхз нисинно’д̇и вуд̇д̇зби бависид̇ум̣ на ижчи. ад̇т̇и ну ко зд̇асса д̇умхаагам̣ г̇ун̣зхи ад̇ирзгаг̇ун̣о’’д̇и? б̣уд̣̇д̇хаанан̃жа ван̣н̣амажчзрам̣ наама над̇т̇и, д̇асмаа сад̇т̇аа звамааха – ‘‘убаасага, маяам̣ бхигкам̣ ааг̇амаяамаанаа г̇зхз нисийд̣̇аама, со бхигку на звам̣ нисийд̣̇ид̇ваа бхигкам̣ уд̣̇игкад̇и. маяам̣ г̇ааманд̇асзнаасанз васаама, со аран̃н̃зязва васад̇и. маяам̣ чаннз васаама, со аб̣бхогаасзязва васад̇ий’’д̇и бхаг̇аваа ‘‘аяан̃жа аяан̃жзд̇асса г̇ун̣о’’д̇и махаасамуд̣̇д̣̇ам̣ буураяамаано вияа д̇асса г̇ун̣ам̣ гат̇зси.
Tasmiṃ antare mahānisabhatthero piṇḍāya caranto tameva vīthiṃ paṭipajji. Upāsako disvā uṭṭhāya gantvā theraṃ vanditvā ‘‘pattaṃ, bhante, dethā’’ti āha. Thero pattaṃ adāsi. ‘‘Bhante, idheva pavisatha, satthāpi gehe nisinno’’ti. ‘‘Na vaṭṭissati, upāsakā’’ti. So therassa pattaṃ gahetvā piṇḍapātassa pūretvā adāsi. Tato theraṃ anugantvā nivatto satthu santike nisīditvā evamāha – ‘‘mahānisabhatthero, bhante, ‘satthāpi gehe nisinno’ti vuttepi pavisituṃ na icchi. Atthi nu kho etassa tumhākaṃ guṇehi atirekaguṇo’’ti? Buddhānañca vaṇṇamaccheraṃ nāma natthi, tasmā satthā evamāha – ‘‘upāsaka, mayaṃ bhikkhaṃ āgamayamānā gehe nisīdāma, so bhikkhu na evaṃ nisīditvā bhikkhaṃ udikkhati. Mayaṃ gāmantasenāsane vasāma, so araññeyeva vasati. Mayaṃ channe vasāma, so abbhokāseyeva vasatī’’ti bhagavā ‘‘ayañca ayañcetassa guṇo’’ti mahāsamuddaṃ pūrayamāno viya tassa guṇaṃ kathesi.
убаасагоби багад̇ияаа ж̇аламаанад̣̇ийбо д̇злзна аасид̇д̇о вияа судтуд̇арам̣ басанно худ̇ваа жинд̇зси – ‘‘гим̣ маяхам̣ ан̃н̃ааяа самбад̇д̇ияаа, яам̣нуунаахам̣ анааг̇ад̇з згасса б̣уд̣̇д̇хасса санд̇игз д̇худ̇аваад̣̇аанам̣ аг̇г̇абхаавад̇т̇ааяа бад̇т̇анам̣ гариссаамий’’д̇и. со бунаби сад̇т̇аарам̣ ниманд̇зд̇ваа д̇знзва нияаамзна сад̇д̇а д̣̇ивасз махаад̣̇аанам̣ д̣̇ад̇ваа сад̇д̇амз д̣̇ивасз б̣уд̣̇д̇хаббамукасса махаабхигкусан̇гхасса д̇ижийвараани д̣̇ад̇ваа сад̇т̇у баад̣̇амуулз нибаж̇ж̇ид̇ваа звамааха – ‘‘яам̣ мз, бханд̇з, сад̇д̇а д̣̇ивасз д̣̇аанам̣ д̣̇знд̇асса мзд̇д̇ам̣ гааяагаммам̣ мзд̇д̇ам̣ важийгаммам̣ мзд̇д̇ам̣ маногаммам̣ бажжубадтид̇ам̣, иминаахам̣ на ан̃н̃ам̣ д̣̇звасамбад̇д̇им̣ ваа саггамаараб̣рахмасамбад̇д̇им̣ ваа бад̇т̇зми, ид̣̇ам̣ бана мз гаммам̣ анааг̇ад̇з згасса б̣уд̣̇д̇хасса санд̇игз махаанисабхад̇т̇зрзна бад̇д̇адтаананд̇арам̣ баабун̣анад̇т̇ааяа д̇зрасад̇худ̇ан̇г̇ад̇хараанам̣ аг̇г̇абхаавасса ад̇хигааро ход̇уу’’д̇и. сад̇т̇аа ‘‘маханд̇ам̣ таанам̣ иминаа бад̇т̇ид̇ам̣, самиж̇жхиссад̇и ну ко, но’’д̇и ологзнд̇о самиж̇жханабхаавам̣ д̣̇исваа ааха – ‘‘манаабам̣ д̇з таанам̣ бад̇т̇ид̇ам̣, анааг̇ад̇з сад̇асахассагаббаавасаанз г̇од̇амо наама б̣уд̣̇д̇хо уббаж̇ж̇иссад̇и, д̇асса д̇вам̣ д̇ад̇ияасааваго махаагассабад̇т̇зро наама бхависсасий’’д̇и б̣яаагааси. д̇ам̣ суд̇ваа убаасаго ‘‘б̣уд̣̇д̇хаанам̣ д̣̇вз гат̇аа наама над̇т̇ий’’д̇и бунад̣̇ивасз бад̇д̇аб̣б̣ам̣ вияа д̇ам̣ самбад̇д̇им̣ аман̃н̃ид̇т̇а. со яаавад̇ааяугам̣ д̣̇аанам̣ д̣̇ад̇ваа сийлам̣ самаад̣̇ааяа рагкид̇ваа наанаббагаарам̣ бун̃н̃агаммам̣ гад̇ваа гаалам̣гад̇ваа саг̇г̇з ниб̣б̣ад̇д̇и.
Upāsakopi pakatiyā jalamānadīpo telena āsitto viya suṭṭhutaraṃ pasanno hutvā cintesi – ‘‘kiṃ mayhaṃ aññāya sampattiyā, yaṃnūnāhaṃ anāgate ekassa buddhassa santike dhutavādānaṃ aggabhāvatthāya patthanaṃ karissāmī’’ti. So punapi satthāraṃ nimantetvā teneva niyāmena satta divase mahādānaṃ datvā sattame divase buddhappamukhassa mahābhikkhusaṅghassa ticīvarāni datvā satthu pādamūle nipajjitvā evamāha – ‘‘yaṃ me, bhante, satta divase dānaṃ dentassa mettaṃ kāyakammaṃ mettaṃ vacīkammaṃ mettaṃ manokammaṃ paccupaṭṭhitaṃ, imināhaṃ na aññaṃ devasampattiṃ vā sakkamārabrahmasampattiṃ vā patthemi, idaṃ pana me kammaṃ anāgate ekassa buddhassa santike mahānisabhattherena pattaṭṭhānantaraṃ pāpuṇanatthāya terasadhutaṅgadharānaṃ aggabhāvassa adhikāro hotū’’ti. Satthā ‘‘mahantaṃ ṭhānaṃ iminā patthitaṃ, samijjhissati nu kho, no’’ti olokento samijjhanabhāvaṃ disvā āha – ‘‘manāpaṃ te ṭhānaṃ patthitaṃ, anāgate satasahassakappāvasāne gotamo nāma buddho uppajjissati, tassa tvaṃ tatiyasāvako mahākassapatthero nāma bhavissasī’’ti byākāsi. Taṃ sutvā upāsako ‘‘buddhānaṃ dve kathā nāma natthī’’ti punadivase pattabbaṃ viya taṃ sampattiṃ amaññittha. So yāvatāyukaṃ dānaṃ datvā sīlaṃ samādāya rakkhitvā nānappakāraṃ puññakammaṃ katvā kālaṃkatvā sagge nibbatti.
д̇ад̇о бадтааяа д̣̇звамануссзсу самбад̇д̇им̣ анубхаванд̇о ид̇о зганавуд̇игаббз вибассисаммаасамб̣уд̣̇д̇хз б̣анд̇хумад̇ийнаг̇арам̣ убаниссааяа кзмз миг̇ад̣̇ааяз вихаранд̇з д̣̇звалогаа жавид̇ваа ан̃н̃ад̇арасмим̣ бариж̇ин̣н̣аб̣раахман̣агулз ниб̣б̣ад̇д̇и. д̇асмин̃жа гаалз вибассий бхаг̇аваа сад̇д̇амз сам̣важчарз д̇хаммам̣ гат̇зси, маханд̇ам̣ голаахалам̣ ахоси. сагалаж̇амб̣уд̣̇ийбз д̣̇звад̇аа ‘‘сад̇т̇аа д̇хаммам̣ гат̇зссад̇ий’’д̇и аарожзсум̣. б̣раахман̣о д̇ам̣ саасанам̣ ассоси. д̇асса ниваасанасаадаго згоязва, д̇ат̇аа б̣раахман̣ияаа. баарубанам̣ бана д̣̇виннамби згамзва. со сагаланаг̇арз ‘‘згасаадагаб̣раахман̣о’’д̇и бан̃н̃ааяи . со б̣раахман̣о гзнажид̣̇зва гижжзна б̣раахман̣аанам̣ саннибаад̇з сад̇и б̣раахман̣им̣ г̇зхз табзд̇ваа саяам̣ д̇ам̣ вад̇т̇ам̣ баарубид̇ваа г̇ажчад̇и, б̣раахман̣ийнам̣ саннибаад̇з сад̇и саяам̣ г̇зхз ажчад̇и, б̣раахман̣ий д̇ам̣ вад̇т̇ам̣ баарубид̇ваа г̇ажчад̇и. д̇асмим̣ бана д̣̇ивасз со б̣раахман̣им̣ ааха – ‘‘бход̇и, гим̣ д̇вам̣ рад̇д̇им̣ д̇хаммам̣ сун̣иссаси, уд̣̇ааху д̣̇иваа’’д̇и? ‘‘саами, ахам̣ маад̇уг̇аамо бхийругаж̇аад̇игаа рад̇д̇им̣ сод̇ум̣ на саггоми, д̣̇иваа соссаамий’’д̇и д̇ам̣ б̣раахман̣ам̣ г̇зхз табзд̇ваа д̇ам̣ вад̇т̇ам̣ баарубид̇ваа убаасигаахи сад̣̇д̇хим̣ вихаарам̣ г̇анд̇ваа сад̇т̇аарам̣ ванд̣̇ид̇ваа згаманд̇ам̣ нисиннаа д̇хаммам̣ суд̇ваа убаасигаахи сад̣̇д̇хим̣ аг̇амааси. ат̇а б̣раахман̣о д̇ам̣ г̇зхз табзд̇ваа д̇ам̣ вад̇т̇ам̣ баарубид̇ваа вихаарам̣ г̇ад̇о.
Tato paṭṭhāya devamanussesu sampattiṃ anubhavanto ito ekanavutikappe vipassisammāsambuddhe bandhumatīnagaraṃ upanissāya kheme migadāye viharante devalokā cavitvā aññatarasmiṃ parijiṇṇabrāhmaṇakule nibbatti. Tasmiñca kāle vipassī bhagavā sattame saṃvacchare dhammaṃ kathesi, mahantaṃ kolāhalaṃ ahosi. Sakalajambudīpe devatā ‘‘satthā dhammaṃ kathessatī’’ti ārocesuṃ. Brāhmaṇo taṃ sāsanaṃ assosi. Tassa nivāsanasāṭako ekoyeva, tathā brāhmaṇiyā. Pārupanaṃ pana dvinnampi ekameva. So sakalanagare ‘‘ekasāṭakabrāhmaṇo’’ti paññāyi . So brāhmaṇo kenacideva kiccena brāhmaṇānaṃ sannipāte sati brāhmaṇiṃ gehe ṭhapetvā sayaṃ taṃ vatthaṃ pārupitvā gacchati, brāhmaṇīnaṃ sannipāte sati sayaṃ gehe acchati, brāhmaṇī taṃ vatthaṃ pārupitvā gacchati. Tasmiṃ pana divase so brāhmaṇiṃ āha – ‘‘bhoti, kiṃ tvaṃ rattiṃ dhammaṃ suṇissasi, udāhu divā’’ti? ‘‘Sāmi, ahaṃ mātugāmo bhīrukajātikā rattiṃ sotuṃ na sakkomi, divā sossāmī’’ti taṃ brāhmaṇaṃ gehe ṭhapetvā taṃ vatthaṃ pārupitvā upāsikāhi saddhiṃ vihāraṃ gantvā satthāraṃ vanditvā ekamantaṃ nisinnā dhammaṃ sutvā upāsikāhi saddhiṃ agamāsi. Atha brāhmaṇo taṃ gehe ṭhapetvā taṃ vatthaṃ pārupitvā vihāraṃ gato.
д̇асмин̃жа самаяз сад̇т̇аа барисамаж̇жхз алан̇гад̇ад̇хаммаасанз нисинно жид̇д̇аб̣ийж̇аним̣ г̇ахзд̇ваа аагаасаг̇ан̇г̇ам̣ од̇аарзнд̇о вияа синзрум̣ мант̇ам̣ гад̇ваа сааг̇арам̣ ниммант̇знд̇о вияа жа д̇хаммагат̇ам̣ гат̇зси. б̣раахман̣асса барисабарияанд̇зна нисиннасса д̇хаммам̣ сун̣анд̇асса батамаяаамзязва сагаласарийрам̣ буураяамаанаа бан̃жаван̣н̣аа бийд̇и уббаж̇ж̇и. со бааруд̇авад̇т̇ам̣ сан̇гхарид̇ваа ‘‘д̣̇асаб̣аласса д̣̇ассаамий’’д̇и жинд̇зси. ат̇асса аад̣̇ийнавасахассам̣ д̣̇ассаяамаанам̣ мажчзрам̣ уббаж̇ж̇и. со ‘‘б̣раахман̣ияаа д̇уяхан̃жа згамзва вад̇т̇ам̣, ан̃н̃ам̣ гин̃жи баарубанам̣ наама над̇т̇и, абаарубид̇ваа б̣ахи вижарид̇ум̣ на саггомий’’д̇и саб̣б̣ат̇ааби ад̣̇аад̇угаамо ахоси. ат̇асса нигканд̇з батамз маж̇жхимаяаамзд̇и д̇ат̇зва бийд̇и уббаж̇ж̇и. со д̇ат̇зва жинд̇зд̇ваа д̇ат̇зва ад̣̇аад̇угаамо ахоси. ат̇асса маж̇жхимз яаамз нигканд̇з бажчимаяаамзби д̇ат̇зва бийд̇и уббаж̇ж̇и. д̇ад̣̇аа со мажчзрам̣ ж̇инид̇ваа вад̇т̇ам̣ сан̇гхарид̇ваа сад̇т̇у баад̣̇амуулз табзси. д̇ад̇о ваамахад̇т̇ам̣ аабхуж̇ид̇ваа д̣̇агкин̣зна хад̇т̇зна абподзд̇ваа ‘‘ж̇ид̇ам̣ мз, ж̇ид̇ам̣ мз’’д̇и д̇игкад̇д̇ум̣ над̣̇и.
Tasmiñca samaye satthā parisamajjhe alaṅkatadhammāsane nisinno cittabījaniṃ gahetvā ākāsagaṅgaṃ otārento viya sineruṃ manthaṃ katvā sāgaraṃ nimmanthento viya ca dhammakathaṃ kathesi. Brāhmaṇassa parisapariyantena nisinnassa dhammaṃ suṇantassa paṭhamayāmeyeva sakalasarīraṃ pūrayamānā pañcavaṇṇā pīti uppajji. So pārutavatthaṃ saṅgharitvā ‘‘dasabalassa dassāmī’’ti cintesi. Athassa ādīnavasahassaṃ dassayamānaṃ maccheraṃ uppajji. So ‘‘brāhmaṇiyā tuyhañca ekameva vatthaṃ, aññaṃ kiñci pārupanaṃ nāma natthi, apārupitvā bahi vicarituṃ na sakkomī’’ti sabbathāpi adātukāmo ahosi. Athassa nikkhante paṭhame majjhimayāmeti tatheva pīti uppajji. So tatheva cintetvā tatheva adātukāmo ahosi. Athassa majjhime yāme nikkhante pacchimayāmepi tatheva pīti uppajji. Tadā so maccheraṃ jinitvā vatthaṃ saṅgharitvā satthu pādamūle ṭhapesi. Tato vāmahatthaṃ ābhujitvā dakkhiṇena hatthena apphoṭetvā ‘‘jitaṃ me, jitaṃ me’’ti tikkhattuṃ nadi.
д̇асмим̣ самаяз б̣анд̇хумаа рааж̇аа д̇хаммаасанасса бажчад̇о анд̇осаан̣ияам̣ нисинно д̇хаммам̣ сун̣аад̇и. ран̃н̃о жа наама ‘‘ж̇ид̇ам̣ мз’’д̇и сад̣̇д̣̇о аманаабо ход̇и. рааж̇аа бурисам̣ аан̣аабзси ‘‘г̇ажча, бхан̣з, зд̇ам̣ бужча – ‘гим̣ со вад̣̇ад̇ий’’’д̇и? б̣раахман̣о д̇знааг̇анд̇ваа бужчид̇о ‘‘авасзсаа хад̇т̇ияаанаад̣̇ийни ааруяха асижаммаад̣̇ийни г̇ахзд̇ваа барасзнам̣ ж̇инанд̇и, на д̇ам̣ ажчарияам̣. ахам̣ бана бажчад̇о ааг̇ажчанд̇асса гуудаг̇он̣асса муг̇г̇арзна сийсам̣ бхинд̣̇ид̇ваа д̇ам̣ балаабзнд̇о вияа мажчзражид̇д̇ам̣ ж̇инид̇ваа бааруд̇авад̇т̇ам̣ д̣̇асаб̣аласса ад̣̇аасим̣, д̇ам̣ мз ж̇ид̇ам̣ мажчзрам̣ ажчарияа’’нд̇и ааха. со ааг̇анд̇ваа д̇ам̣ бавад̇д̇им̣ ран̃н̃о аарожзси. рааж̇аа ‘‘амхз, бхан̣з, д̣̇асаб̣аласса ануруубам̣ на ж̇аанаама, б̣раахман̣о ж̇аанаад̇ий’’д̇и д̇асса басийд̣̇ид̇ваа вад̇т̇аяуг̇ам̣ бзсзси. д̇ам̣ д̣̇исваа б̣раахман̣о жинд̇зси – ‘‘рааж̇аа маяхам̣ д̇ун̣хий нисиннасса батамам̣ гин̃жи ад̣̇ад̇ваа сад̇т̇у г̇ун̣з гат̇знд̇асса ад̣̇ааси, сад̇т̇у г̇ун̣з бадижжа ид̣̇ам̣ уббаннам̣, сад̇т̇уязва анужчавига’’нд̇и д̇амби вад̇т̇аяуг̇ам̣ д̣̇асаб̣аласса ад̣̇ааси. рааж̇аа ‘‘гим̣ б̣раахман̣зна гад̇а’’нд̇и бужчид̇ваа ‘‘д̇амби д̇зна вад̇т̇аяуг̇ам̣ д̇ат̇ааг̇ад̇ассзва д̣̇инна’’нд̇и суд̇ваа ан̃н̃ааниби д̣̇вз вад̇т̇аяуг̇аани бзсзси, со д̇ааниби сад̇т̇у ад̣̇ааси. буна рааж̇аа ‘ан̃н̃ааниби жад̇д̇аарий’д̇и звам̣ вад̇ваа яаава звам̣ д̣̇вад̇д̇им̣са вад̇т̇аяуг̇аани бзсзси. ат̇а б̣раахман̣о ‘‘ид̣̇ам̣ вад̣дхзд̇ваа вад̣дхзд̇ваа г̇ахан̣ам̣ вияа ход̇ий’’д̇и ад̇д̇ано ад̇т̇ааяа згам̣, б̣раахман̣ияаа зганд̇и д̣̇вз вад̇т̇аяуг̇аани г̇ахзд̇ваа, д̇им̣са яуг̇аани д̇ат̇ааг̇ад̇ассзва ад̣̇ааси. д̇ад̇о бадтааяа жа со сад̇т̇у виссаасиго ж̇аад̇о.
Tasmiṃ samaye bandhumā rājā dhammāsanassa pacchato antosāṇiyaṃ nisinno dhammaṃ suṇāti. Rañño ca nāma ‘‘jitaṃ me’’ti saddo amanāpo hoti. Rājā purisaṃ āṇāpesi ‘‘gaccha, bhaṇe, etaṃ puccha – ‘kiṃ so vadatī’’’ti? Brāhmaṇo tenāgantvā pucchito ‘‘avasesā hatthiyānādīni āruyha asicammādīni gahetvā parasenaṃ jinanti, na taṃ acchariyaṃ. Ahaṃ pana pacchato āgacchantassa kūṭagoṇassa muggarena sīsaṃ bhinditvā taṃ palāpento viya maccheracittaṃ jinitvā pārutavatthaṃ dasabalassa adāsiṃ, taṃ me jitaṃ maccheraṃ acchariya’’nti āha. So āgantvā taṃ pavattiṃ rañño ārocesi. Rājā ‘‘amhe, bhaṇe, dasabalassa anurūpaṃ na jānāma, brāhmaṇo jānātī’’ti tassa pasīditvā vatthayugaṃ pesesi. Taṃ disvā brāhmaṇo cintesi – ‘‘rājā mayhaṃ tuṇhī nisinnassa paṭhamaṃ kiñci adatvā satthu guṇe kathentassa adāsi, satthu guṇe paṭicca idaṃ uppannaṃ, satthuyeva anucchavika’’nti tampi vatthayugaṃ dasabalassa adāsi. Rājā ‘‘kiṃ brāhmaṇena kata’’nti pucchitvā ‘‘tampi tena vatthayugaṃ tathāgatasseva dinna’’nti sutvā aññānipi dve vatthayugāni pesesi, so tānipi satthu adāsi. Puna rājā ‘aññānipi cattārī’ti evaṃ vatvā yāva evaṃ dvattiṃsa vatthayugāni pesesi. Atha brāhmaṇo ‘‘idaṃ vaḍḍhetvā vaḍḍhetvā gahaṇaṃ viya hotī’’ti attano atthāya ekaṃ, brāhmaṇiyā ekanti dve vatthayugāni gahetvā, tiṃsa yugāni tathāgatasseva adāsi. Tato paṭṭhāya ca so satthu vissāsiko jāto.
ат̇а д̇ам̣ рааж̇аа згад̣̇ивасам̣ сийд̇асамаяз сад̇т̇у санд̇игз д̇хаммам̣ сун̣анд̇ам̣ д̣̇исваа сад̇асахассаг̇гханагам̣ ад̇д̇ано бааруд̇ам̣ рад̇д̇агамб̣алам̣ д̣̇ад̇ваа ааха – ‘‘ид̇о бадтааяа имам̣ баарубид̇ваа д̇хаммам̣ сун̣аахий’’д̇и. со ‘‘гим̣ мз иминаа гамб̣алзна имасмим̣ бууд̇игааяз убанийд̇знаа’’д̇и жинд̇зд̇ваа анд̇ог̇анд̇хагудияам̣ д̇ат̇ааг̇ад̇асса ман̃жасса убари вид̇аанам̣ гад̇ваа аг̇амааси. ат̇згад̣̇ивасам̣ рааж̇аа баад̇ова вихаарам̣ г̇анд̇ваа анд̇ог̇анд̇хагудияам̣ сад̇т̇у санд̇игз нисийд̣̇и. д̇асмим̣ кан̣з чаб̣б̣ан̣н̣аа б̣уд̣̇д̇харасмияо гамб̣алз бадихан̃н̃анд̇и, гамб̣ало ад̇ивияа вирожид̇т̇а. рааж̇аа уллогзнд̇о сан̃ж̇аанид̇ваа ааха – ‘‘амхаагам̣, бханд̇з, зса гамб̣ало, амхзхи згасаадагаб̣раахман̣асса д̣̇инно’’д̇и. ‘‘д̇умхзхи, махаарааж̇а, б̣раахман̣о бууж̇ид̇о, б̣раахман̣зна маяам̣ бууж̇ид̇аа’’д̇и. рааж̇аа ‘‘б̣раахман̣о яуд̇д̇ам̣ ан̃н̃ааси, на маяа’’нд̇и басийд̣̇ид̇ваа яам̣ мануссаанам̣ убагаарабхууд̇ам̣, д̇ам̣ саб̣б̣ам̣ адтадтагам̣ гад̇ваа саб̣б̣адтагам̣ наама д̣̇аанам̣ д̣̇ад̇ваа бурохид̇адтаанз табзси. соби ‘‘адтадтагам̣ наама жад̇усадти ход̇ий’’д̇и жад̇усадтисалаагабхад̇д̇аани убадтабзд̇ваа яааваж̇ийвам̣ д̣̇аанам̣ д̣̇ад̇ваа сийлам̣ рагкид̇ваа д̇ад̇о жуд̇о саг̇г̇з ниб̣б̣ад̇д̇и.
Atha taṃ rājā ekadivasaṃ sītasamaye satthu santike dhammaṃ suṇantaṃ disvā satasahassagghanakaṃ attano pārutaṃ rattakambalaṃ datvā āha – ‘‘ito paṭṭhāya imaṃ pārupitvā dhammaṃ suṇāhī’’ti. So ‘‘kiṃ me iminā kambalena imasmiṃ pūtikāye upanītenā’’ti cintetvā antogandhakuṭiyaṃ tathāgatassa mañcassa upari vitānaṃ katvā agamāsi. Athekadivasaṃ rājā pātova vihāraṃ gantvā antogandhakuṭiyaṃ satthu santike nisīdi. Tasmiṃ khaṇe chabbaṇṇā buddharasmiyo kambale paṭihaññanti, kambalo ativiya virocittha. Rājā ullokento sañjānitvā āha – ‘‘amhākaṃ, bhante, esa kambalo, amhehi ekasāṭakabrāhmaṇassa dinno’’ti. ‘‘Tumhehi, mahārāja, brāhmaṇo pūjito, brāhmaṇena mayaṃ pūjitā’’ti. Rājā ‘‘brāhmaṇo yuttaṃ aññāsi, na maya’’nti pasīditvā yaṃ manussānaṃ upakārabhūtaṃ, taṃ sabbaṃ aṭṭhaṭṭhakaṃ katvā sabbaṭṭhakaṃ nāma dānaṃ datvā purohitaṭṭhāne ṭhapesi. Sopi ‘‘aṭṭhaṭṭhakaṃ nāma catusaṭṭhi hotī’’ti catusaṭṭhisalākabhattāni upaṭṭhapetvā yāvajīvaṃ dānaṃ datvā sīlaṃ rakkhitvā tato cuto sagge nibbatti.
буна д̇ад̇о жуд̇о имасмим̣ габбз бхаг̇авад̇о гон̣ааг̇аманасса бхаг̇авад̇о гассабасса жаад̇и д̣̇виннам̣ анд̇арз б̣аараан̣асияам̣ гудумб̣ияагулз ниб̣б̣ад̇д̇о. со вад̣дхиманвааяа гхарааваасам̣ васанд̇о згад̣̇ивасам̣ аран̃н̃з ж̇ан̇гхавихаарам̣ вижарад̇и. д̇асмин̃жа самаяз бажжзгаб̣уд̣̇д̇хо над̣̇ийд̇ийрз жийварагаммам̣ гаронд̇о ануваад̇з аббахонд̇з сан̇гхарид̇ваа табзд̇умаарад̣̇д̇хо. со д̇ам̣ д̣̇исваа ‘‘гасмаа, бханд̇з, сан̇гхарид̇ваа табзт̇аа’’д̇и ааха. ‘‘ануваад̇о наббаход̇ий’’д̇и. ‘‘иминаа, бханд̇з, гарот̇аа’’д̇и уд̇д̇арисаадагам̣ д̣̇ад̇ваа ‘‘ниб̣б̣ад̇д̇аниб̣б̣ад̇д̇адтаанз мз гаажи хаани маа ход̇уу’’д̇и бад̇т̇анам̣ агааси.
Puna tato cuto imasmiṃ kappe bhagavato koṇāgamanassa bhagavato kassapassa cāti dvinnaṃ antare bārāṇasiyaṃ kuṭumbiyakule nibbatto. So vaḍḍhimanvāya gharāvāsaṃ vasanto ekadivasaṃ araññe jaṅghavihāraṃ vicarati. Tasmiñca samaye paccekabuddho nadītīre cīvarakammaṃ karonto anuvāte appahonte saṅgharitvā ṭhapetumāraddho. So taṃ disvā ‘‘kasmā, bhante, saṅgharitvā ṭhapethā’’ti āha. ‘‘Anuvāto nappahotī’’ti. ‘‘Iminā, bhante, karothā’’ti uttarisāṭakaṃ datvā ‘‘nibbattanibbattaṭṭhāne me kāci hāni mā hotū’’ti patthanaṃ akāsi.
гхарзбисса бхаг̇инияаа сад̣̇д̇хим̣ бхарияааяа галахам̣ гаронд̇ияаа бажжзгаб̣уд̣̇д̇хо бин̣д̣ааяа баависи. ат̇асса бхаг̇иний бажжзгаб̣уд̣̇д̇хасса бин̣д̣абаад̇ам̣ д̣̇ад̇ваа д̇асса бхарияам̣ санд̇хааяа – ‘‘зваруубам̣ б̣аалам̣ яож̇анасад̇з бариваж̇ж̇зяяа’’нд̇и бад̇т̇анам̣ табзси. саа г̇зхан̇г̇ан̣з тид̇аа суд̇ваа ‘‘имааяа д̣̇иннабхад̇д̇ам̣ зса маа бхун̃ж̇ад̇уу’’д̇и бад̇д̇ам̣ г̇ахзд̇ваа бхад̇д̇ам̣ чад̣д̣зд̇ваа галаласса буурзд̇ваа ад̣̇ааси. ид̇араа д̣̇исваа ‘‘б̣аалз, мам̣ д̇аава аггоса ваа бахара ваа, зваруубасса бана д̣̇вз асан̇кязяяаани буурид̇абаарамисса бажжзгаб̣уд̣̇д̇хасса бад̇д̇ад̇о бхад̇д̇ам̣ чад̣д̣зд̇ваа галалам̣ д̣̇аад̇ум̣ на яуд̇д̇а’’нд̇и ааха. ат̇асса бхарияааяа бадисан̇каанам̣ уббаж̇ж̇и. саа ‘‘д̇идтат̇а, бханд̇з’’д̇и галалам̣ чад̣д̣зд̇ваа бад̇д̇ам̣ д̇ховид̇ваа г̇анд̇хажун̣н̣зна уб̣б̣аддзд̇ваа бан̣ийд̇абхад̇д̇асса жад̇умад̇хурасса жа буурзд̇ваа убари аасид̇д̇зна бад̣̇умаг̇аб̣бхаван̣н̣зна саббинаа виж̇ж̇од̇амаанам̣ бад̇д̇ам̣ бажжзгаб̣уд̣̇д̇хасса хад̇т̇з табзд̇ваа ‘‘яат̇аа аяам̣ бин̣д̣абаад̇о обхаасаж̇аад̇о, звам̣ обхаасаж̇аад̇ам̣ мз сарийрам̣ ход̇уу’’д̇и бад̇т̇анам̣ агааси. бажжзгаб̣уд̣̇д̇хо анумод̣̇ид̇ваа аагаасам̣ багканд̣̇и. д̇зби д̣̇вз ж̇ааяамбад̇игаа яаавад̇ааяугам̣ тад̇ваа д̇ад̇о жуд̇аа саг̇г̇з ниб̣б̣ад̇д̇им̣су. буна д̇ад̇о жавид̇ваа убаасаго гассабасаммаасамб̣уд̣̇д̇хагаалз б̣аараан̣асияам̣ асийд̇игодивибхавасамбаннз гулз ниб̣б̣ад̇д̇и, ид̇арааби д̇аад̣̇исассзва сздтино д̇хийд̇аа худ̇ваа ниб̣б̣ад̇д̇и, д̇асса ваяаббад̇д̇асса д̇амзва сздтид̇хийд̇арам̣ аанаяим̣су. д̇ассаа буб̣б̣з анидтавибаагасса баабагаммасса аанубхаавзна бад̇игулам̣ бавидтамад̇д̇ааяа уммааранд̇арад̇о бадтааяа сагалам̣ г̇зхам̣ уг̇гхаадид̇аважжагуубо вияа д̣̇уг̇г̇анд̇хам̣ ж̇аад̇ам̣. гумааро ‘‘гассааяам̣ г̇анд̇хо’’д̇и бужчид̇ваа ‘‘сздтиган̃н̃ааяаа’’д̇и суд̇ваа ‘‘нийхарат̇а на’’нд̇и д̇ассааязва гулагхарам̣ бзсзси. саа д̇знзва нийхаарзна сад̇д̇асу таанзсу бадинивад̇д̇и.
Gharepissa bhaginiyā saddhiṃ bhariyāya kalahaṃ karontiyā paccekabuddho piṇḍāya pāvisi. Athassa bhaginī paccekabuddhassa piṇḍapātaṃ datvā tassa bhariyaṃ sandhāya – ‘‘evarūpaṃ bālaṃ yojanasate parivajjeyya’’nti patthanaṃ ṭhapesi. Sā gehaṅgaṇe ṭhitā sutvā ‘‘imāya dinnabhattaṃ esa mā bhuñjatū’’ti pattaṃ gahetvā bhattaṃ chaḍḍetvā kalalassa pūretvā adāsi. Itarā disvā ‘‘bāle, maṃ tāva akkosa vā pahara vā, evarūpassa pana dve asaṅkhyeyyāni pūritapāramissa paccekabuddhassa pattato bhattaṃ chaḍḍetvā kalalaṃ dātuṃ na yutta’’nti āha. Athassa bhariyāya paṭisaṅkhānaṃ uppajji. Sā ‘‘tiṭṭhatha, bhante’’ti kalalaṃ chaḍḍetvā pattaṃ dhovitvā gandhacuṇṇena ubbaṭṭetvā paṇītabhattassa catumadhurassa ca pūretvā upari āsittena padumagabbhavaṇṇena sappinā vijjotamānaṃ pattaṃ paccekabuddhassa hatthe ṭhapetvā ‘‘yathā ayaṃ piṇḍapāto obhāsajāto, evaṃ obhāsajātaṃ me sarīraṃ hotū’’ti patthanaṃ akāsi. Paccekabuddho anumoditvā ākāsaṃ pakkhandi. Tepi dve jāyampatikā yāvatāyukaṃ ṭhatvā tato cutā sagge nibbattiṃsu. Puna tato cavitvā upāsako kassapasammāsambuddhakāle bārāṇasiyaṃ asītikoṭivibhavasampanne kule nibbatti, itarāpi tādisasseva seṭṭhino dhītā hutvā nibbatti, tassa vayappattassa tameva seṭṭhidhītaraṃ ānayiṃsu. Tassā pubbe aniṭṭhavipākassa pāpakammassa ānubhāvena patikulaṃ paviṭṭhamattāya ummārantarato paṭṭhāya sakalaṃ gehaṃ ugghāṭitavaccakūpo viya duggandhaṃ jātaṃ. Kumāro ‘‘kassāyaṃ gandho’’ti pucchitvā ‘‘seṭṭhikaññāyā’’ti sutvā ‘‘nīharatha na’’nti tassāyeva kulagharaṃ pesesi. Sā teneva nīhārena sattasu ṭhānesu paṭinivatti.
д̇зна самаязна гассабад̣̇асаб̣ало бариниб̣б̣ааяи. д̇асса сад̇асахасаг̇гханигаахи суван̣н̣идтагаахи яож̇ануб̣б̣зд̇хам̣ жзд̇ияам̣ аарабхим̣су. д̇асмим̣ жзд̇ияз гарияамаанз саа сздтид̇хийд̇аа жинд̇зси – ‘‘ахам̣ сад̇д̇асу таанзсу бадинивад̇д̇аа, гим̣ мз ж̇ийвид̇знаа’’д̇и ад̇д̇ано аабхаран̣абхан̣д̣ам̣ бхан̃ж̇аабзд̇ваа суван̣н̣идтагам̣ гаарзси рад̇анааяад̇ам̣ вид̣̇ад̇т̇ивид̇т̇ин̣н̣ам̣ жад̇уран̇г̇улуб̣б̣зд̇хам̣. д̇ад̇о харид̇ааламаносилаабин̣д̣ам̣ г̇ахзд̇ваа адта уббалабубпахад̇т̇агз аад̣̇ааяа жзд̇ияагаран̣адтаанам̣ г̇ад̇аа. д̇асмин̃жа кан̣з згаа идтагаабанд̇и баригкибид̇ваа ааг̇ажчамаанаа гхаданидтагааяа уунаа ход̇и. сздтид̇хийд̇аа вад̣дхагим̣ ааха ‘‘имам̣ мз идтагам̣ зд̇т̇а табзт̇аа’’д̇и. ‘‘амма бхад̣̇д̣̇агз, гаалз ааг̇ад̇ааси, саяамзва табзхий’’д̇и. саа ааруяха д̇злзна харид̇ааламаносилаабин̣д̣ам̣ яож̇зд̇ваа д̇зна б̣анд̇ханзна идтагам̣ бад̇идтабзд̇ваа убари адтахи уббалабубпахад̇т̇агзхи бууж̇ам̣ гад̇ваа ванд̣̇ид̇ваа ‘‘ниб̣б̣ад̇д̇аниб̣б̣ад̇д̇адтаанз мз гааяад̇о жанд̣̇анаг̇анд̇хо вааяад̇у, мукад̇о уббалаг̇анд̇хо’’д̇и бад̇т̇анам̣ гад̇ваа жзд̇ияам̣ ванд̣̇ид̇ваа бад̣̇агкин̣ам̣ гад̇ваа г̇зхам̣ аг̇амааси.
Tena samayena kassapadasabalo parinibbāyi. Tassa satasahasagghanikāhi suvaṇṇiṭṭhakāhi yojanubbedhaṃ cetiyaṃ ārabhiṃsu. Tasmiṃ cetiye kariyamāne sā seṭṭhidhītā cintesi – ‘‘ahaṃ sattasu ṭhānesu paṭinivattā, kiṃ me jīvitenā’’ti attano ābharaṇabhaṇḍaṃ bhañjāpetvā suvaṇṇiṭṭhakaṃ kāresi ratanāyataṃ vidatthivitthiṇṇaṃ caturaṅgulubbedhaṃ. Tato haritālamanosilāpiṇḍaṃ gahetvā aṭṭha uppalapupphahatthake ādāya cetiyakaraṇaṭṭhānaṃ gatā. Tasmiñca khaṇe ekā iṭṭhakāpanti parikkhipitvā āgacchamānā ghaṭaniṭṭhakāya ūnā hoti. Seṭṭhidhītā vaḍḍhakiṃ āha ‘‘imaṃ me iṭṭhakaṃ ettha ṭhapethā’’ti. ‘‘Amma bhaddake, kāle āgatāsi, sayameva ṭhapehī’’ti. Sā āruyha telena haritālamanosilāpiṇḍaṃ yojetvā tena bandhanena iṭṭhakaṃ patiṭṭhapetvā upari aṭṭhahi uppalapupphahatthakehi pūjaṃ katvā vanditvā ‘‘nibbattanibbattaṭṭhāne me kāyato candanagandho vāyatu, mukhato uppalagandho’’ti patthanaṃ katvā cetiyaṃ vanditvā padakkhiṇaṃ katvā gehaṃ agamāsi.
д̇асмим̣язва кан̣з саа яасса сздтибуд̇д̇асса батамам̣ г̇зхам̣ нийд̇аа, д̇асса д̇ам̣ аараб̣бха сад̇и уд̣̇абаад̣̇и. наг̇арзби нагкад̇д̇ам̣ сан̇гхудтам̣ ход̇и. со убадтаагз ааха ‘‘ид̇ха аанийд̇аа сздтид̇хийд̇аа гухи’’нд̇и? ‘‘гулаг̇зхз, саамий’’д̇и. ‘‘аанзт̇а нам̣, нагкад̇д̇ам̣ гийл̣иссаамий’’д̇и. д̇з г̇анд̇ваа д̇ам̣ ванд̣̇ид̇ваа тид̇аа. ‘‘гим̣, д̇аад̇аа, ааг̇ад̇ад̇т̇аа’’д̇и д̇ааяа будтаа д̇ассаа д̇ам̣ бавад̇д̇им̣ аажигким̣су. ‘‘д̇аад̇аа, маяаа аабхаран̣абхан̣д̣зхи жзд̇ияам̣ бууж̇ид̇ам̣, аабхаран̣ам̣ мз над̇т̇ий’’д̇и. д̇з г̇анд̇ваа сздтибуд̇д̇асса аарожзсум̣. ‘‘аанзт̇а нам̣, бил̣анд̇ханам̣ лабхиссад̇ий’’д̇и. д̇з д̇ам̣ аанаяим̣су. д̇ассаа саха г̇зхабавзсанзна сагалаг̇зхам̣ жанд̣̇анаг̇анд̇хо жзва уббалаг̇анд̇хо жа вааяи. сздтибуд̇д̇о д̇ам̣ бужчи – ‘‘бхад̣̇д̣̇з, д̇ава сарийрад̇о батамам̣ д̣̇уг̇г̇анд̇хо вааяи, ид̣̇аани бана д̇з сарийрад̇о жанд̣̇анаг̇анд̇хо, мукад̇о уббалаг̇анд̇хо вааяад̇и, гимзд̇а’’нд̇и? саа аад̣̇ид̇о бадтааяа ад̇д̇анаа гад̇агаммам̣ аарожзси. сздтибуд̇д̇о ‘‘нияяаанигам̣ вад̇а б̣уд̣̇д̇хасаасана’’нд̇и басийд̣̇ид̇ваа яож̇анигам̣ суван̣н̣ажзд̇ияам̣ гамб̣алаган̃жугзна бадижчаад̣̇зд̇ваа д̇ад̇т̇а д̇ад̇т̇а рат̇ажаггабамаан̣зхи суван̣н̣абад̣̇умзхи алан̇гари. д̇зсам̣ д̣̇ваад̣̇асахад̇т̇аа оламб̣агаа хонд̇и.
Tasmiṃyeva khaṇe sā yassa seṭṭhiputtassa paṭhamaṃ gehaṃ nītā, tassa taṃ ārabbha sati udapādi. Nagarepi nakkhattaṃ saṅghuṭṭhaṃ hoti. So upaṭṭhāke āha ‘‘idha ānītā seṭṭhidhītā kuhi’’nti? ‘‘Kulagehe, sāmī’’ti. ‘‘Ānetha naṃ, nakkhattaṃ kīḷissāmī’’ti. Te gantvā taṃ vanditvā ṭhitā. ‘‘Kiṃ, tātā, āgatatthā’’ti tāya puṭṭhā tassā taṃ pavattiṃ ācikkhiṃsu. ‘‘Tātā, mayā ābharaṇabhaṇḍehi cetiyaṃ pūjitaṃ, ābharaṇaṃ me natthī’’ti. Te gantvā seṭṭhiputtassa ārocesuṃ. ‘‘Ānetha naṃ, piḷandhanaṃ labhissatī’’ti. Te taṃ ānayiṃsu. Tassā saha gehapavesanena sakalagehaṃ candanagandho ceva uppalagandho ca vāyi. Seṭṭhiputto taṃ pucchi – ‘‘bhadde, tava sarīrato paṭhamaṃ duggandho vāyi, idāni pana te sarīrato candanagandho, mukhato uppalagandho vāyati, kimeta’’nti? Sā ādito paṭṭhāya attanā katakammaṃ ārocesi. Seṭṭhiputto ‘‘niyyānikaṃ vata buddhasāsana’’nti pasīditvā yojanikaṃ suvaṇṇacetiyaṃ kambalakañcukena paṭicchādetvā tattha tattha rathacakkapamāṇehi suvaṇṇapadumehi alaṅkari. Tesaṃ dvādasahatthā olambakā honti.
со д̇ад̇т̇а яаавад̇ааяугам̣ тад̇ваа д̇ад̇о жуд̇о саг̇г̇з ниб̣б̣ад̇д̇ид̇ваа, буна д̇ад̇о жавид̇ваа б̣аараан̣асид̇о яож̇анамад̇д̇з таанз ан̃н̃ад̇арасмим̣ амажжагулз ниб̣б̣ад̇д̇и. бхарияаа банасса д̣̇звалогад̇о жавид̇ваа рааж̇агулз ж̇здтарааж̇ад̇хийд̇аа худ̇ваа ниб̣б̣ад̇д̇и. д̇зсу ваяаббад̇д̇зсу гумаарасса васанаг̇аамз нагкад̇д̇ам̣ сан̇гхудтам̣. со маад̇арам̣ ааха – ‘‘амма, саадагам̣ мз д̣̇зхи, нагкад̇д̇ам̣ гийл̣иссаамий’’д̇и. саа д̇ход̇авад̇т̇ам̣ нийхарид̇ваа ад̣̇ааси. ‘‘амма, т̇ууламид̣̇а’’нд̇и ааха. саа ан̃н̃ам̣ нийхарид̇ваа ад̣̇ааси. со д̇амби бадигкиби. ат̇а нам̣ маад̇аа ааха – ‘‘д̇аад̇а, яаад̣̇исз г̇зхз маяам̣ ж̇аад̇аа, над̇т̇и но ид̇о сукумад̇арасса бадилаабхааяа бун̃н̃а’’нд̇и. ‘‘д̇зна хи лабханадтаанам̣ г̇ажчаами, аммаа’’д̇и. ‘‘буд̇д̇а, ахам̣ аж̇ж̇зва д̇уяхам̣ б̣аараан̣асинаг̇арараж̇ж̇абадилаабхам̣ ижчаамий’’д̇и. со маад̇арам̣ ванд̣̇ид̇ваа ‘‘г̇ажчаами, аммаа’’д̇и. ‘‘г̇ажча, д̇аад̇аа’’д̇и. со бана бун̃н̃анияаамзна нигкамид̇ваа б̣аараан̣асим̣ г̇анд̇ваа уяяаанз ман̇г̇аласилаабаддз сасийсам̣ баарубид̇ваа нибаж̇ж̇и. со жа б̣аараан̣асиран̃н̃о гаалан̇гад̇асса сад̇д̇амо д̣̇ивасо ход̇и.
So tattha yāvatāyukaṃ ṭhatvā tato cuto sagge nibbattitvā, puna tato cavitvā bārāṇasito yojanamatte ṭhāne aññatarasmiṃ amaccakule nibbatti. Bhariyā panassa devalokato cavitvā rājakule jeṭṭharājadhītā hutvā nibbatti. Tesu vayappattesu kumārassa vasanagāme nakkhattaṃ saṅghuṭṭhaṃ. So mātaraṃ āha – ‘‘amma, sāṭakaṃ me dehi, nakkhattaṃ kīḷissāmī’’ti. Sā dhotavatthaṃ nīharitvā adāsi. ‘‘Amma, thūlamida’’nti āha. Sā aññaṃ nīharitvā adāsi. So tampi paṭikkhipi. Atha naṃ mātā āha – ‘‘tāta, yādise gehe mayaṃ jātā, natthi no ito sukhumatarassa paṭilābhāya puñña’’nti. ‘‘Tena hi labhanaṭṭhānaṃ gacchāmi, ammā’’ti. ‘‘Putta, ahaṃ ajjeva tuyhaṃ bārāṇasinagararajjapaṭilābhaṃ icchāmī’’ti. So mātaraṃ vanditvā ‘‘gacchāmi, ammā’’ti. ‘‘Gaccha, tātā’’ti. So pana puññaniyāmena nikkhamitvā bārāṇasiṃ gantvā uyyāne maṅgalasilāpaṭṭe sasīsaṃ pārupitvā nipajji. So ca bārāṇasirañño kālaṅkatassa sattamo divaso hoti.
амажжаа ран̃н̃о сарийрагижжам̣ гад̇ваа рааж̇ан̇г̇ан̣з нисийд̣̇ид̇ваа манд̇аяим̣су – ‘‘ран̃н̃о згаа д̇хийд̇аава ад̇т̇и, буд̇д̇о над̇т̇и, арааж̇агам̣ раж̇ж̇ам̣ нассиссад̇и, го рааж̇аа бхавид̇ум̣ арахад̇ий’’д̇и? ‘‘д̇вам̣ хохи, д̇вам̣ хохий’’д̇и. бурохид̇о ааха – ‘‘б̣ахум̣ ологзд̇ум̣ на ваддад̇и, пуссарат̇ам̣ виссаж̇ж̇зссаамаа’’д̇и. д̇з гумуд̣̇аван̣н̣з жад̇д̇ааро синд̇хавз яож̇зд̇ваа бан̃жавид̇харааж̇агагуд̇хабхан̣д̣ам̣ сзд̇ажчад̇д̇ан̃жа д̇асмим̣ табзд̇ваа рат̇ам̣ виссаж̇ж̇зд̇ваа бажчад̇о д̇уурияаани баг̇г̇ан̣хаабзсум̣. рат̇о баажийнад̣̇ваарзна нигкамид̇ваа уяяаанаабхимуко аг̇амааси. ‘‘барижаязна уяяаанаабхимуко г̇ажчад̇и, нивад̇д̇змаа’’д̇и гзжи аахам̣су. бурохид̇о ‘‘маа нивад̇д̇аяид̇т̇аа’’д̇и ааха. рат̇о г̇анд̇ваа гумаарам̣ бад̣̇агкин̣ам̣ гад̇ваа ааруханасаж̇ж̇о худ̇ваа адтааси. бурохид̇о баарубанаган̣н̣ам̣ абанзд̇ваа баад̣̇ад̇алаани ологзнд̇о ‘‘д̇идтад̇у аяам̣ д̣̇ийбо, д̣̇висахассабарид̇д̇ад̣̇ийбаваарзсу жад̇уусу махаад̣̇ийбзсу зса раж̇ж̇ам̣ гаарзд̇ум̣ яуд̇д̇о’’д̇и вад̇ваа ‘‘д̇уурияаани баг̇г̇ан̣хат̇аа’’д̇и д̇игкад̇д̇ум̣ д̇уурияаани баг̇г̇ан̣хаабзд̇и.
Amaccā rañño sarīrakiccaṃ katvā rājaṅgaṇe nisīditvā mantayiṃsu – ‘‘rañño ekā dhītāva atthi, putto natthi, arājakaṃ rajjaṃ nassissati, ko rājā bhavituṃ arahatī’’ti? ‘‘Tvaṃ hohi, tvaṃ hohī’’ti. Purohito āha – ‘‘bahuṃ oloketuṃ na vaṭṭati, phussarathaṃ vissajjessāmā’’ti. Te kumudavaṇṇe cattāro sindhave yojetvā pañcavidharājakakudhabhaṇḍaṃ setacchattañca tasmiṃ ṭhapetvā rathaṃ vissajjetvā pacchato tūriyāni paggaṇhāpesuṃ. Ratho pācīnadvārena nikkhamitvā uyyānābhimukho agamāsi. ‘‘Paricayena uyyānābhimukho gacchati, nivattemā’’ti keci āhaṃsu. Purohito ‘‘mā nivattayitthā’’ti āha. Ratho gantvā kumāraṃ padakkhiṇaṃ katvā āruhanasajjo hutvā aṭṭhāsi. Purohito pārupanakaṇṇaṃ apanetvā pādatalāni olokento ‘‘tiṭṭhatu ayaṃ dīpo, dvisahassaparittadīpavāresu catūsu mahādīpesu esa rajjaṃ kāretuṃ yutto’’ti vatvā ‘‘tūriyāni paggaṇhathā’’ti tikkhattuṃ tūriyāni paggaṇhāpeti.
ат̇а гумааро мукам̣ виварид̇ваа ологзнд̇о ‘‘гзна гаммзна ааг̇ад̇ад̇т̇аа’’д̇и ааха. ‘‘д̣̇зва, д̇умхаагам̣ раж̇ж̇ам̣ баабун̣аад̇ий’’д̇и. ‘‘рааж̇аа во гаха’’нд̇и? ‘‘д̣̇звад̇д̇ам̣ г̇ад̇о, саамий’’д̇и. ‘‘гад̇и д̣̇ивасаа ад̇игганд̇аа’’д̇и ? ‘‘аж̇ж̇а сад̇д̇амо д̣̇ивасо’’д̇и. ‘‘буд̇д̇о ваа д̇хийд̇аа ваа над̇т̇ий’’д̇и ? ‘‘д̇хийд̇аа ад̇т̇и, д̣̇зва, буд̇д̇о над̇т̇ий’’д̇и. ‘‘д̇зна хи гариссаами раж̇ж̇а’’нд̇и. д̇з д̇аавад̣̇зва абхисзгаман̣д̣абам̣ гаарзд̇ваа рааж̇ад̇хийд̇арам̣ саб̣б̣аалан̇гаарзхи алан̇гарид̇ваа уяяаанам̣ аанзд̇ваа гумаарасса абхисзгам̣ агам̣су. ат̇асса гад̇аабхисзгасса сад̇асахассаг̇гханагам̣ вад̇т̇ам̣ убанаяим̣су. со ‘‘гимид̣̇ам̣, д̇аад̇аа’’д̇и ааха. ‘‘ниваасанавад̇т̇ам̣, д̣̇зваа’’д̇и. ‘‘нану, д̇аад̇аа, т̇уула’’нд̇и? ‘‘мануссабарибхог̇авад̇т̇зсу ид̇о муд̣̇уд̇арам̣ над̇т̇и, д̣̇зваа’’д̇и. ‘‘д̇умхаагам̣ рааж̇аа зваруубам̣ ниваасзсий’’д̇и? ‘‘аама, д̣̇зваа’’д̇и. ‘‘на ман̃н̃з бун̃н̃аваа д̇умхаагам̣ рааж̇аа’’д̇и ‘‘суван̣н̣абхин̇г̇аарам̣ аахарат̇а, лабхиссаами вад̇т̇а’’нд̇и суван̣н̣абхин̇г̇аарам̣ аахараабзд̇ваа удтааяа хад̇т̇з д̇ховид̇ваа мукам̣ вигкаалзд̇ваа хад̇т̇зна уд̣̇агам̣ г̇ахзд̇ваа бурад̇т̇имад̣̇исааяам̣ аб̣бхуггири. гханабат̇авим̣ бхинд̣̇ид̇ваа адта габбаругкаа удтахим̣су. буна уд̣̇агам̣ г̇ахзд̇ваа д̣̇агкин̣абажчимауд̇д̇арад̣̇исааяанд̇и звам̣ жад̇уусу д̣̇исаасу аб̣бхуггири. саб̣б̣ад̣̇исаасу адтаадтагам̣ гад̇ваа д̣̇вад̇д̇им̣са габбаругкаа удтахим̣су. со згам̣ д̣̇иб̣б̣ад̣̇уссам̣ ниваасзд̇ваа згам̣ баарубид̇ваа ‘‘нанд̣̇аран̃н̃о виж̇ид̇з суд̇д̇аганд̇игаа ид̇т̇ияо ‘маа суд̇д̇ам̣ ганд̇им̣суу’д̇и звам̣ бхзрим̣ жараабзт̇аа’’д̇и вад̇ваа чад̇д̇ам̣ уссаабзд̇ваа алан̇гад̇абадияад̇д̇о хад̇т̇игканд̇хавараг̇ад̇о наг̇арам̣ бависид̇ваа баасаад̣̇ам̣ абхируяха махаасамбад̇д̇им̣ анубхави.
Atha kumāro mukhaṃ vivaritvā olokento ‘‘kena kammena āgatatthā’’ti āha. ‘‘Deva, tumhākaṃ rajjaṃ pāpuṇātī’’ti. ‘‘Rājā vo kaha’’nti? ‘‘Devattaṃ gato, sāmī’’ti. ‘‘Kati divasā atikkantā’’ti ? ‘‘Ajja sattamo divaso’’ti. ‘‘Putto vā dhītā vā natthī’’ti ? ‘‘Dhītā atthi, deva, putto natthī’’ti. ‘‘Tena hi karissāmi rajja’’nti. Te tāvadeva abhisekamaṇḍapaṃ kāretvā rājadhītaraṃ sabbālaṅkārehi alaṅkaritvā uyyānaṃ ānetvā kumārassa abhisekaṃ akaṃsu. Athassa katābhisekassa satasahassagghanakaṃ vatthaṃ upanayiṃsu. So ‘‘kimidaṃ, tātā’’ti āha. ‘‘Nivāsanavatthaṃ, devā’’ti. ‘‘Nanu, tātā, thūla’’nti? ‘‘Manussaparibhogavatthesu ito mudutaraṃ natthi, devā’’ti. ‘‘Tumhākaṃ rājā evarūpaṃ nivāsesī’’ti? ‘‘Āma, devā’’ti. ‘‘Na maññe puññavā tumhākaṃ rājā’’ti ‘‘suvaṇṇabhiṅgāraṃ āharatha, labhissāmi vattha’’nti suvaṇṇabhiṅgāraṃ āharāpetvā uṭṭhāya hatthe dhovitvā mukhaṃ vikkhāletvā hatthena udakaṃ gahetvā puratthimadisāyaṃ abbhukkiri. Ghanapathaviṃ bhinditvā aṭṭha kapparukkhā uṭṭhahiṃsu. Puna udakaṃ gahetvā dakkhiṇapacchimauttaradisāyanti evaṃ catūsu disāsu abbhukkiri. Sabbadisāsu aṭṭhaaṭṭhakaṃ katvā dvattiṃsa kapparukkhā uṭṭhahiṃsu. So ekaṃ dibbadussaṃ nivāsetvā ekaṃ pārupitvā ‘‘nandarañño vijite suttakantikā itthiyo ‘mā suttaṃ kantiṃsū’ti evaṃ bheriṃ carāpethā’’ti vatvā chattaṃ ussāpetvā alaṅkatapaṭiyatto hatthikkhandhavaragato nagaraṃ pavisitvā pāsādaṃ abhiruyha mahāsampattiṃ anubhavi.
звам̣ г̇ажчанд̇з гаалз д̣̇звий ран̃н̃о самбад̇д̇им̣ д̣̇исваа ‘‘ахо вад̇а д̇абассий’’д̇и гаарун̃н̃аагаарам̣ д̣̇ассзси. ‘‘гимид̣̇ам̣, д̣̇звий’’д̇и будтаа ‘‘ад̇имахад̇ий, д̣̇зва, д̇з самбад̇д̇и, ад̇ийд̇з б̣уд̣̇д̇хаанам̣ сад̣̇д̣̇ахид̇ваа гад̇агаляаан̣асса палам̣, ид̣̇аани анааг̇ад̇асса бажжаяам̣ бун̃н̃ам̣ на гарот̇аа’’д̇и ааха. гасса д̣̇ассаама, сийлаванд̇о над̇т̇ийд̇и. ‘‘асун̃н̃о, д̣̇зва, ж̇амб̣уд̣̇ийбо араханд̇зхи; д̇умхз, д̣̇зва, д̣̇аанам̣ саж̇ж̇зт̇а, ахам̣ араханд̇з лажчаамий’’д̇и ааха. бунад̣̇ивасз рааж̇аа баажийнад̣̇ваарз д̣̇аанам̣ саж̇ж̇аабзси. д̣̇звий баад̇ова убосат̇ан̇г̇аани ад̇хидтааяа убарибаасаад̣̇з бурад̇т̇аабхимукаа урзна нибаж̇ж̇ид̇ваа ‘‘сажз зд̇иссааяа д̣̇исааяа араханд̇о ад̇т̇и, свз ааг̇анд̇ваа амхаагам̣ бхигкам̣ г̇ан̣ханд̇уу’’д̇и ааха. д̇ассам̣ д̣̇исааяам̣ араханд̇о наахзсум̣, д̇ам̣ саггаарам̣ габан̣аяаажагаанам̣ ад̣̇ам̣су.
Evaṃ gacchante kāle devī rañño sampattiṃ disvā ‘‘aho vata tapassī’’ti kāruññākāraṃ dassesi. ‘‘Kimidaṃ, devī’’ti puṭṭhā ‘‘atimahatī, deva, te sampatti, atīte buddhānaṃ saddahitvā katakalyāṇassa phalaṃ, idāni anāgatassa paccayaṃ puññaṃ na karothā’’ti āha. Kassa dassāma, sīlavanto natthīti. ‘‘Asuñño, deva, jambudīpo arahantehi; tumhe, deva, dānaṃ sajjetha, ahaṃ arahante lacchāmī’’ti āha. Punadivase rājā pācīnadvāre dānaṃ sajjāpesi. Devī pātova uposathaṅgāni adhiṭṭhāya uparipāsāde puratthābhimukhā urena nipajjitvā ‘‘sace etissāya disāya arahanto atthi, sve āgantvā amhākaṃ bhikkhaṃ gaṇhantū’’ti āha. Tassaṃ disāyaṃ arahanto nāhesuṃ, taṃ sakkāraṃ kapaṇayācakānaṃ adaṃsu.
бунад̣̇ивасз д̣̇агкин̣ад̣̇ваарз саж̇ж̇зд̇ваа д̇ат̇зва д̣̇агкин̣зяяам̣ наалад̇т̇а, бунад̣̇ивасзби бажчимад̣̇ваарз д̇ат̇зва. уд̇д̇арад̣̇ваарз саж̇ж̇ид̇ад̣̇ивасзна бана д̣̇звияаа д̇ат̇зва ниманд̇знд̇ияаа химаванд̇з васанд̇аанам̣ бад̣̇умавад̇ияаа буд̇д̇аанам̣ бан̃жасад̇аанам̣ бажжзгаб̣уд̣̇д̇хаанам̣ ж̇здтаго махаабад̣̇умабажжзгаб̣уд̣̇д̇хо бхаад̇игз ааманд̇зси – ‘‘маарисаа, нанд̣̇арааж̇аа д̇умхз ниманд̇зд̇и, ад̇хиваасзт̇а д̇ассаа’’д̇и. д̇з ад̇хиваасзд̇ваа бунад̣̇ивасз анод̇ад̇д̇ад̣̇ахз мукам̣ д̇ховид̇ваа аагаасзнааг̇анд̇ваа уд̇д̇арад̣̇ваарз од̇арим̣су. мануссаа д̣̇исваа г̇анд̇ваа ‘‘бан̃жасад̇аа, д̣̇зва, бажжзгаб̣уд̣̇д̇хаа ааг̇ад̇аа’’д̇и ран̃н̃о аарожзсум̣. рааж̇аа сад̣̇д̇хим̣ д̣̇звияаа г̇анд̇ваа ванд̣̇ид̇ваа бажжзгаб̣уд̣̇д̇хз баасаад̣̇ам̣ ааробзд̇ваа д̇ад̇ра нзсам̣ д̣̇аанам̣ д̣̇ад̇ваа бхад̇д̇агижжаавасаанз рааж̇аа сан̇гхад̇т̇зрасса, д̣̇звий сан̇гханавагасса баад̣̇амуулз нибад̇ид̇ваа ‘‘аяяаа, бханд̇з, бажжаязхи на гиламиссанд̇и, маяан̃жа бун̃н̃зна на барихааяиссаамий, амхаагам̣ яааваж̇ийвам̣ ид̇ха ниваасааяа бадин̃н̃ам̣ д̣̇зт̇аа’’д̇и бадин̃н̃ам̣ гаарзд̇ваа уяяаанз бан̃жа бан̣н̣асаалаасад̇аани, бан̃жа жан̇гаманасад̇аанийд̇и саб̣б̣аагаарзна ниваасанадтаанаани самбаад̣̇зд̇ваа д̇ад̇т̇а васаабзсум̣.
Punadivase dakkhiṇadvāre sajjetvā tatheva dakkhiṇeyyaṃ nālattha, punadivasepi pacchimadvāre tatheva. Uttaradvāre sajjitadivasena pana deviyā tatheva nimantentiyā himavante vasantānaṃ padumavatiyā puttānaṃ pañcasatānaṃ paccekabuddhānaṃ jeṭṭhako mahāpadumapaccekabuddho bhātike āmantesi – ‘‘mārisā, nandarājā tumhe nimanteti, adhivāsetha tassā’’ti. Te adhivāsetvā punadivase anotattadahe mukhaṃ dhovitvā ākāsenāgantvā uttaradvāre otariṃsu. Manussā disvā gantvā ‘‘pañcasatā, deva, paccekabuddhā āgatā’’ti rañño ārocesuṃ. Rājā saddhiṃ deviyā gantvā vanditvā paccekabuddhe pāsādaṃ āropetvā tatra nesaṃ dānaṃ datvā bhattakiccāvasāne rājā saṅghattherassa, devī saṅghanavakassa pādamūle nipatitvā ‘‘ayyā, bhante, paccayehi na kilamissanti, mayañca puññena na parihāyissāmī, amhākaṃ yāvajīvaṃ idha nivāsāya paṭiññaṃ dethā’’ti paṭiññaṃ kāretvā uyyāne pañca paṇṇasālāsatāni, pañca caṅkamanasatānīti sabbākārena nivāsanaṭṭhānāni sampādetvā tattha vasāpesuṃ.
звам̣ гаалз г̇ажчанд̇з ран̃н̃о бажжанд̇з губид̇з рааж̇аа ‘‘ахам̣ бажжанд̇ам̣ вуубасамзд̇ум̣ г̇ажчаами, д̇вам̣ бажжзгаб̣уд̣̇д̇хзсу маа бамаж̇ж̇аа’’д̇и д̣̇звим̣ овад̣̇ид̇ваа г̇ад̇о. д̇асмим̣ анааг̇ад̇зязва бажжзгаб̣уд̣̇д̇хаанам̣ ааяусан̇каараа кийн̣аа. махаабад̣̇умабажжзгаб̣уд̣̇д̇хо д̇ияаамарад̇д̇им̣ жхаанагийл̣ам̣ гийл̣ид̇ваа арун̣уг̇г̇аманасамаяз ааламб̣анапалагам̣ ааламб̣ид̇ваа тид̇агова анубаад̣̇исзсааяа ниб̣б̣аанад̇хаад̇уяаа бариниб̣б̣ааяи. зд̇знубааязна сзсаабийд̇и саб̣б̣зва бариниб̣б̣уд̇аа. бунад̣̇ивасз д̣̇звий бажжзгаб̣уд̣̇д̇хаанам̣ нисийд̣̇анадтаанаани саж̇ж̇зд̇ваа бубпаани вигирид̇ваа д̇хуубам̣ ваасзд̇ваа д̇зсам̣ ааг̇аманам̣ ологзнд̇ий нисиннаа ааг̇аманам̣ ад̣̇исваа бурисз бзсзси – ‘‘г̇ажчат̇а, д̇аад̇аа, ж̇аанаат̇а гим̣ аяяаанам̣ апаасуга’’нд̇и? д̇з г̇анд̇ваа махаабад̣̇умасса бан̣н̣асаалааяа д̣̇ваарам̣ виварид̇ваа д̇ад̇т̇а д̇ам̣ абассанд̇аа жан̇гаманам̣ г̇анд̇ваа ааламб̣анапалагам̣ ниссааяа тид̇ам̣ д̣̇исваа ванд̣̇ид̇ваа ‘‘гаало, бханд̇з’’д̇и аахам̣су. бариниб̣б̣уд̇асарийрам̣ гим̣ гат̇зссад̇и, д̇з ‘‘нид̣̇д̣̇ааяад̇и ман̃н̃з’’д̇и вад̇ваа бидтибаад̣̇з хад̇т̇зна бараамасид̇ваа баад̣̇аанам̣ сийд̇алад̇ааяа жзва т̇ад̣̇д̇хад̇ааяа жа бариниб̣б̣уд̇абхаавам̣ н̃ад̇ваа д̣̇уд̇ияасса санд̇игам̣ г̇анд̇ваа д̇ат̇зва н̃ад̇ваа буна д̇ад̇ияассаад̇и звам̣ саб̣б̣зби бариниб̣б̣уд̇абхаавам̣ н̃ад̇ваа рааж̇агулам̣ ааг̇амим̣су. ‘‘гахам̣, д̇аад̇аа, бажжзгаб̣уд̣̇д̇хаа’’д̇и будтаа ‘‘бариниб̣б̣уд̇аа, д̣̇звий’’д̇и аахам̣су. д̣̇звий ганд̣̇анд̇ий род̣̇анд̇ий нигкамид̇ваа нааг̇арзхи сад̣̇д̇хим̣ д̇ад̇т̇а г̇анд̇ваа саад̇хугийл̣ид̇ам̣ гаарзд̇ваа бажжзгаб̣уд̣̇д̇хаанам̣ сарийрагижжам̣ гаарзд̇ваа д̇хаад̇уяо г̇аахаабзд̇ваа жзд̇ияам̣ бад̇идтаабзси.
Evaṃ kāle gacchante rañño paccante kupite rājā ‘‘ahaṃ paccantaṃ vūpasametuṃ gacchāmi, tvaṃ paccekabuddhesu mā pamajjā’’ti deviṃ ovaditvā gato. Tasmiṃ anāgateyeva paccekabuddhānaṃ āyusaṅkhārā khīṇā. Mahāpadumapaccekabuddho tiyāmarattiṃ jhānakīḷaṃ kīḷitvā aruṇuggamanasamaye ālambanaphalakaṃ ālambitvā ṭhitakova anupādisesāya nibbānadhātuyā parinibbāyi. Etenupāyena sesāpīti sabbeva parinibbutā. Punadivase devī paccekabuddhānaṃ nisīdanaṭṭhānāni sajjetvā pupphāni vikiritvā dhūpaṃ vāsetvā tesaṃ āgamanaṃ olokentī nisinnā āgamanaṃ adisvā purise pesesi – ‘‘gacchatha, tātā, jānātha kiṃ ayyānaṃ aphāsuka’’nti? Te gantvā mahāpadumassa paṇṇasālāya dvāraṃ vivaritvā tattha taṃ apassantā caṅkamanaṃ gantvā ālambanaphalakaṃ nissāya ṭhitaṃ disvā vanditvā ‘‘kālo, bhante’’ti āhaṃsu. Parinibbutasarīraṃ kiṃ kathessati, te ‘‘niddāyati maññe’’ti vatvā piṭṭhipāde hatthena parāmasitvā pādānaṃ sītalatāya ceva thaddhatāya ca parinibbutabhāvaṃ ñatvā dutiyassa santikaṃ gantvā tatheva ñatvā puna tatiyassāti evaṃ sabbepi parinibbutabhāvaṃ ñatvā rājakulaṃ āgamiṃsu. ‘‘Kahaṃ, tātā, paccekabuddhā’’ti puṭṭhā ‘‘parinibbutā, devī’’ti āhaṃsu. Devī kandantī rodantī nikkhamitvā nāgarehi saddhiṃ tattha gantvā sādhukīḷitaṃ kāretvā paccekabuddhānaṃ sarīrakiccaṃ kāretvā dhātuyo gāhāpetvā cetiyaṃ patiṭṭhāpesi.
рааж̇аа бажжанд̇ам̣ вуубасамзд̇ваа ааг̇ад̇о бажжуг̇г̇аманам̣ ааг̇ад̇ам̣ д̣̇звим̣ бужчи – ‘‘гим̣, бхад̣̇д̣̇з, д̇вам̣ бажжзгаб̣уд̣̇д̇хзсу на бамаж̇ж̇аси, нирог̇аа жа аяяаа’’д̇и? ‘‘бариниб̣б̣уд̇аа, д̣̇зваа’’д̇и. д̇ам̣ суд̇ваа рааж̇аа жинд̇зси – ‘‘зваруубаанамби бан̣д̣ид̇аанам̣ маран̣ам̣ уббаж̇ж̇ад̇и, амхаагам̣ гуд̇о могкаа’’д̇и? со наг̇арам̣ абависид̇ваа уяяаанамзва г̇анд̇ваа ж̇здтабуд̇д̇ам̣ баггосаабзд̇ваа д̇асса раж̇ж̇ам̣ нияяаад̇зд̇ваа саяам̣ саман̣абаб̣б̣аж̇ж̇ам̣ баб̣б̣аж̇и. д̣̇звийби ‘‘ран̃н̃з баб̣б̣аж̇ид̇з ахам̣ гим̣ гариссаамий’’д̇и д̇ат̇зва уяяаанз баб̣б̣аж̇и. д̣̇взби жхаанам̣ бхаавзд̇ваа д̇ад̇о жуд̇аа б̣рахмалогз ниб̣б̣ад̇д̇им̣су.
Rājā paccantaṃ vūpasametvā āgato paccuggamanaṃ āgataṃ deviṃ pucchi – ‘‘kiṃ, bhadde, tvaṃ paccekabuddhesu na pamajjasi, nirogā ca ayyā’’ti? ‘‘Parinibbutā, devā’’ti. Taṃ sutvā rājā cintesi – ‘‘evarūpānampi paṇḍitānaṃ maraṇaṃ uppajjati, amhākaṃ kuto mokkhā’’ti? So nagaraṃ apavisitvā uyyānameva gantvā jeṭṭhaputtaṃ pakkosāpetvā tassa rajjaṃ niyyātetvā sayaṃ samaṇapabbajjaṃ pabbaji. Devīpi ‘‘raññe pabbajite ahaṃ kiṃ karissāmī’’ti tatheva uyyāne pabbaji. Dvepi jhānaṃ bhāvetvā tato cutā brahmaloke nibbattiṃsu.
д̇зсу д̇ад̇т̇зва васанд̇зсу амхаагам̣ сад̇т̇аа логз уббаж̇ж̇ид̇ваа бавад̇д̇ид̇аварад̇хаммажагго анубуб̣б̣зна рааж̇аг̇ахам̣ баабун̣и. сад̇т̇ари д̇ад̇т̇а бадивасанд̇з аяам̣ биббалимаан̣аво маг̇ад̇харадтз махаад̇ид̇т̇аб̣раахман̣аг̇аамз габилаб̣раахман̣асса бхарияааяа гужчимхи ниб̣б̣ад̇д̇о. аяам̣ бхад̣̇д̣̇агаабилааний мад̣̇д̣̇арадтз сааг̇аланаг̇арз госияаг̇од̇д̇аб̣раахман̣асса бхарияааяа гужчимхи ниб̣б̣ад̇д̇аа. д̇зсам̣ ануггамзна вад̣дхамаанаанам̣ биббалимаан̣авасса вийсад̇имз, бхад̣̇д̣̇ааяа сол̣асамз ваяз самбад̇д̇з маад̇аабид̇аро буд̇д̇ам̣ ологзд̇ваа ‘‘д̇аад̇а, д̇вам̣ ваяаббад̇д̇о, гулавам̣сам̣ бад̇идтабзд̇ум̣ яуд̇д̇о’’д̇и ад̇ивияа ниббийл̣ияим̣су. маан̣аво ааха – ‘‘маяхам̣ сод̇абат̇з зваруубам̣ гат̇ам̣ маа гат̇аяид̇т̇а, ахам̣ яаава д̇умхз д̇харат̇а, д̇аава бадиж̇аг̇г̇иссаами, д̇умхаагам̣ ажжаязна нигкамид̇ваа баб̣б̣аж̇иссаамий’’д̇и. д̇з гад̇ибаахам̣ ад̇иггамид̇ваа буна гат̇аяим̣су. соби буна бадигкиби. д̇ад̇о бадтааяа маад̇аа ниранд̇арам̣ гат̇зд̇иязва.
Tesu tattheva vasantesu amhākaṃ satthā loke uppajjitvā pavattitavaradhammacakko anupubbena rājagahaṃ pāpuṇi. Satthari tattha paṭivasante ayaṃ pippalimāṇavo magadharaṭṭhe mahātitthabrāhmaṇagāme kapilabrāhmaṇassa bhariyāya kucchimhi nibbatto. Ayaṃ bhaddakāpilānī maddaraṭṭhe sāgalanagare kosiyagottabrāhmaṇassa bhariyāya kucchimhi nibbattā. Tesaṃ anukkamena vaḍḍhamānānaṃ pippalimāṇavassa vīsatime, bhaddāya soḷasame vaye sampatte mātāpitaro puttaṃ oloketvā ‘‘tāta, tvaṃ vayappatto, kulavaṃsaṃ patiṭṭhapetuṃ yutto’’ti ativiya nippīḷiyiṃsu. Māṇavo āha – ‘‘mayhaṃ sotapathe evarūpaṃ kathaṃ mā kathayittha, ahaṃ yāva tumhe dharatha, tāva paṭijaggissāmi, tumhākaṃ accayena nikkhamitvā pabbajissāmī’’ti. Te katipāhaṃ atikkamitvā puna kathayiṃsu. Sopi puna paṭikkhipi. Tato paṭṭhāya mātā nirantaraṃ kathetiyeva.
маан̣аво ‘‘маад̇арам̣ сан̃н̃аабзссаамий’’д̇и рад̇д̇асуван̣н̣асса нигкасахассам̣ д̣̇ад̇ваа суван̣н̣агаарзхи ид̇т̇ируубагам̣ гаарзд̇ваа д̇асса маж̇ж̇анагхадданаад̣̇игаммабарияосаанз д̇ам̣ рад̇д̇авад̇т̇ам̣ ниваасзд̇ваа суван̣н̣асамбаннзхи бубпзхи жзва наанаалан̇гаарзхи жа алан̇гаараабзд̇ваа ‘‘амма, зваруубам̣ аарамман̣ам̣ лабханд̇о г̇зхз васиссаами, алабханд̇о на васиссаамий’’д̇и. бан̣д̣ид̇аа б̣раахман̣ий жинд̇зси – ‘‘маяхам̣ буд̇д̇о бун̃н̃аваа д̣̇иннад̣̇аано гад̇аабхинийхааро буб̣б̣з бун̃н̃аани гаронд̇о на згагова агааси, ад̣̇д̇хаа зд̇зна саха гад̇абун̃н̃аа суван̣н̣аруубагабадибхааг̇аа бхависсад̇ий’’д̇и. адта б̣раахман̣з баггосаабзд̇ваа саб̣б̣абхог̇зхи санд̇аббзд̇ваа суван̣н̣аруубагам̣ рат̇з ааробзд̇ваа ‘‘г̇ажчат̇а, д̇аад̇аа, яад̇т̇а амхзхи ж̇аад̇иг̇од̇д̇абхог̇аад̣̇исамаанагулз зваруубам̣ д̣̇ааригам̣ бассат̇а, д̇ад̇т̇а ид̣̇амзва суван̣н̣аруубагам̣ сажжаагаарам̣ гад̇ваа д̣̇зт̇аа’’д̇и уяяож̇зси.
Māṇavo ‘‘mātaraṃ saññāpessāmī’’ti rattasuvaṇṇassa nikkhasahassaṃ datvā suvaṇṇakārehi itthirūpakaṃ kāretvā tassa majjanaghaṭṭanādikammapariyosāne taṃ rattavatthaṃ nivāsetvā suvaṇṇasampannehi pupphehi ceva nānālaṅkārehi ca alaṅkārāpetvā ‘‘amma, evarūpaṃ ārammaṇaṃ labhanto gehe vasissāmi, alabhanto na vasissāmī’’ti. Paṇḍitā brāhmaṇī cintesi – ‘‘mayhaṃ putto puññavā dinnadāno katābhinīhāro pubbe puññāni karonto na ekakova akāsi, addhā etena saha katapuññā suvaṇṇarūpakapaṭibhāgā bhavissatī’’ti. Aṭṭha brāhmaṇe pakkosāpetvā sabbabhogehi santappetvā suvaṇṇarūpakaṃ rathe āropetvā ‘‘gacchatha, tātā, yattha amhehi jātigottabhogādisamānakule evarūpaṃ dārikaṃ passatha, tattha idameva suvaṇṇarūpakaṃ saccākāraṃ katvā dethā’’ti uyyojesi.
д̇з ‘‘амхаагам̣ наама зд̇ам̣ гамма’’нд̇и нигкамид̇ваа ‘‘гад̇т̇а лабхиссаама, мад̣̇д̣̇арадтам̣ наама ид̇т̇ааг̇аарам̣, мад̣̇д̣̇арадтам̣ г̇амиссаамаа’’д̇и мад̣̇д̣̇арадтз сааг̇аланаг̇арам̣ аг̇амам̣су. ад̇т̇а д̇ам̣ суван̣н̣аруубагам̣ нхаанад̇ид̇т̇з табзд̇ваа згаманд̇ам̣ нисийд̣̇им̣су. ат̇а бхад̣̇д̣̇ааяа д̇хаад̇ий бхад̣̇д̣̇ам̣ нхаабзд̇ваа алан̇гарид̇ваа саяам̣ нхааяид̇ум̣ уд̣̇агад̇ид̇т̇ам̣ г̇анд̇ваа суван̣н̣аруубагам̣ д̣̇исваа ‘‘гиссааяам̣ авинийд̇аа ид̇хааг̇анд̇ваа тид̇аа’’д̇и бидтибассз бахарид̇ваа суван̣н̣аруубагам̣ н̃ад̇ваа ‘‘аяяад̇хийд̇аа мзд̇и сан̃н̃ам̣ уббаад̣̇зси, аяам̣ бана аяяад̇хийд̇ааяа ниваасанабадиг̇г̇ахид̇ааяаби асад̣̇исаа’’д̇и ааха. ат̇а нам̣ д̇з б̣раахман̣аа ‘‘зваруубаа гира д̇з саамид̇хийд̇аа’’д̇и бужчим̣су. саа ‘‘имааяа суван̣н̣абадимааяа сад̇аг̇ун̣зна сахассаг̇ун̣зна маяхам̣ аяяад̇хийд̇аа абхируубад̇араа’’, д̇ат̇аа хи ‘‘аббад̣̇ийбзби д̣̇ваад̣̇асахад̇т̇з г̇аб̣бхз нисиннаа сарийробхаасзна д̇амам̣ вид̇хамад̇ий’’д̇и ааха. ‘‘д̇зна хи д̇ассаа маад̇аабид̇уунам̣ санд̇игам̣ г̇ажчаамаа’’д̇и суван̣н̣аруубагам̣ рат̇з ааробзд̇ваа д̇ам̣ д̇хаад̇им̣ ануг̇анд̇ваа госияаг̇од̇д̇асса гхарад̣̇ваарз тад̇ваа ааг̇аманам̣ аарожаяим̣су.
Te ‘‘amhākaṃ nāma etaṃ kamma’’nti nikkhamitvā ‘‘kattha labhissāma, maddaraṭṭhaṃ nāma itthāgāraṃ, maddaraṭṭhaṃ gamissāmā’’ti maddaraṭṭhe sāgalanagaraṃ agamaṃsu. Attha taṃ suvaṇṇarūpakaṃ nhānatitthe ṭhapetvā ekamantaṃ nisīdiṃsu. Atha bhaddāya dhātī bhaddaṃ nhāpetvā alaṅkaritvā sayaṃ nhāyituṃ udakatitthaṃ gantvā suvaṇṇarūpakaṃ disvā ‘‘kissāyaṃ avinītā idhāgantvā ṭhitā’’ti piṭṭhipasse paharitvā suvaṇṇarūpakaṃ ñatvā ‘‘ayyadhītā meti saññaṃ uppādesi, ayaṃ pana ayyadhītāya nivāsanapaṭiggahitāyapi asadisā’’ti āha. Atha naṃ te brāhmaṇā ‘‘evarūpā kira te sāmidhītā’’ti pucchiṃsu. Sā ‘‘imāya suvaṇṇapaṭimāya sataguṇena sahassaguṇena mayhaṃ ayyadhītā abhirūpatarā’’, tathā hi ‘‘appadīpepi dvādasahatthe gabbhe nisinnā sarīrobhāsena tamaṃ vidhamatī’’ti āha. ‘‘Tena hi tassā mātāpitūnaṃ santikaṃ gacchāmā’’ti suvaṇṇarūpakaṃ rathe āropetvā taṃ dhātiṃ anugantvā kosiyagottassa gharadvāre ṭhatvā āgamanaṃ ārocayiṃsu.
б̣раахман̣о бадисант̇аарам̣ гад̇ваа ‘‘гуд̇о ааг̇ад̇ад̇т̇аа’’д̇и бужчи. д̇з ‘‘маг̇ад̇харадтз махаад̇ид̇т̇аг̇аамз габилаб̣раахман̣асса гхарад̇о иминаа наама гааран̣зна ааг̇ад̇амхаа’’д̇и аахам̣су. ‘‘саад̇ху, д̇аад̇аа, амхзхи самаж̇аад̇иг̇од̇д̇авибхаво со б̣раахман̣о, д̣̇ассаама д̣̇аарига’’нд̇и бан̣н̣аагаарам̣ г̇ан̣хи. д̇з габилаб̣раахман̣асса саасанам̣ бахин̣им̣су – ‘‘лад̣̇д̇хаа но бхад̣̇д̣̇аа наама д̣̇ааригаа, гад̇д̇аб̣б̣ам̣ ж̇аанаат̇аа’’д̇и. д̇ам̣ саасанам̣ суд̇ваа биббалимаан̣авасса аарожаяим̣су ‘‘лад̣̇д̇хаа д̣̇ааригаа’’д̇и. биббалимаан̣аво ‘‘ахам̣ ‘на лабхиссанд̇ий’д̇и жинд̇зсим̣, имз ‘лад̣̇д̇хаа’д̇и бзсзнд̇и, анад̇т̇иго худ̇ваа бан̣н̣ам̣ бзсзссаамий’’д̇и рахог̇ад̇о бан̣н̣ам̣ лики ‘‘бхад̣̇д̣̇аа ад̇д̇ано ж̇аад̇иг̇од̇д̇абхог̇аануруубам̣ бад̇им̣ лабхад̇у, ахам̣ нигкамид̇ваа баб̣б̣аж̇иссаами, маа бажчаа виббадисаариний ахосий’’д̇и. бхад̣̇д̣̇ааби ‘‘асугасса гира мам̣ д̣̇аад̇угаамаа’’д̇и суд̇ваа рахог̇ад̇аа бан̣н̣ам̣ лики – ‘‘аяяабуд̇д̇о ад̇д̇ано ж̇аад̇иг̇од̇д̇абхог̇аануруубам̣ д̣̇ааригам̣ лабхад̇у, ахам̣ баб̣б̣аж̇иссаами, маа бажчаа виббадисаарий бхаваахий’’д̇и. д̣̇взби бан̣н̣аани анд̇араамаг̇г̇з самааг̇ажчим̣су. ‘‘ид̣̇ам̣ гасса бан̣н̣а’’нд̇и? ‘‘биббалимаан̣авзна бхад̣̇д̣̇ааяа бахид̇а’’нд̇и. ‘‘ид̣̇ам̣ гассаа’’д̇и? ‘‘бхад̣̇д̣̇ааяа биббалимаан̣авасса бахид̇а’’нд̇и жа вуд̇д̇з д̇з д̣̇взби ваажзд̇ваа ‘‘бассат̇а д̣̇аарагаанам̣ гамма’’нд̇и паалзд̇ваа аран̃н̃з чад̣д̣зд̇ваа ан̃н̃ам̣ д̇ам̣самаанам̣ бан̣н̣ам̣ ликид̇ваа ид̇о зд̇д̇о жа бзсзсум̣. ид̇и гумаарасса гумааригааяа жа сад̣̇исам̣ бан̣н̣ам̣ логассаад̣̇арахид̇амзваад̇и анижчамаанаанамби д̇зсам̣ д̣̇виннам̣ самааг̇амо ахоси.
Brāhmaṇo paṭisanthāraṃ katvā ‘‘kuto āgatatthā’’ti pucchi. Te ‘‘magadharaṭṭhe mahātitthagāme kapilabrāhmaṇassa gharato iminā nāma kāraṇena āgatamhā’’ti āhaṃsu. ‘‘Sādhu, tātā, amhehi samajātigottavibhavo so brāhmaṇo, dassāma dārika’’nti paṇṇākāraṃ gaṇhi. Te kapilabrāhmaṇassa sāsanaṃ pahiṇiṃsu – ‘‘laddhā no bhaddā nāma dārikā, kattabbaṃ jānāthā’’ti. Taṃ sāsanaṃ sutvā pippalimāṇavassa ārocayiṃsu ‘‘laddhā dārikā’’ti. Pippalimāṇavo ‘‘ahaṃ ‘na labhissantī’ti cintesiṃ, ime ‘laddhā’ti pesenti, anatthiko hutvā paṇṇaṃ pesessāmī’’ti rahogato paṇṇaṃ likhi ‘‘bhaddā attano jātigottabhogānurūpaṃ patiṃ labhatu, ahaṃ nikkhamitvā pabbajissāmi, mā pacchā vippaṭisārinī ahosī’’ti. Bhaddāpi ‘‘asukassa kira maṃ dātukāmā’’ti sutvā rahogatā paṇṇaṃ likhi – ‘‘ayyaputto attano jātigottabhogānurūpaṃ dārikaṃ labhatu, ahaṃ pabbajissāmi, mā pacchā vippaṭisārī bhavāhī’’ti. Dvepi paṇṇāni antarāmagge samāgacchiṃsu. ‘‘Idaṃ kassa paṇṇa’’nti? ‘‘Pippalimāṇavena bhaddāya pahita’’nti. ‘‘Idaṃ kassā’’ti? ‘‘Bhaddāya pippalimāṇavassa pahita’’nti ca vutte te dvepi vācetvā ‘‘passatha dārakānaṃ kamma’’nti phāletvā araññe chaḍḍetvā aññaṃ taṃsamānaṃ paṇṇaṃ likhitvā ito etto ca pesesuṃ. Iti kumārassa kumārikāya ca sadisaṃ paṇṇaṃ lokassādarahitamevāti anicchamānānampi tesaṃ dvinnaṃ samāgamo ahosi.
д̇ам̣д̣̇ивасамзва биббалимаан̣авоби бхад̣̇д̣̇ам̣ згам̣ бубпад̣̇аамам̣ г̇ан̣хаабзси. бхад̣̇д̣̇ааби д̇аани саяанамаж̇жхз табзси. убхоби бхуд̇д̇асааяамаасаа саяанам̣ аарухид̇ум̣ аарабхим̣су. д̇зсу маан̣аво д̣̇агкин̣абассзна саяанам̣ аарухи, бхад̣̇д̣̇аа ваамабассзна абхирухид̇ваа ааха – ‘‘яасса бассз бубпаани милааяанд̇и, д̇асса рааг̇ажид̇д̇ам̣ уббаннанд̇и виж̇ааниссаама, имам̣ бубпад̣̇аамам̣ на аллийяид̇аб̣б̣а’’нд̇и. д̇з бана ан̃н̃аман̃н̃ам̣ сарийрасампассабхаязна сагаларад̇д̇им̣ нид̣̇д̣̇ам̣ аноггаманд̇аава вийд̇инаамзсум̣. д̣̇иваа бана хасид̇амад̇д̇амби наагам̣су. д̇з логаамисзна асам̣садтаа яаава маад̇аабид̇аро д̇харанд̇и, д̇аава гудумб̣ам̣ авижаарзд̇ваа д̇зсу гаалан̇гад̇зсу вижаараяим̣су. махад̇ий маан̣авасса самбад̇д̇и. згад̣̇ивасам̣ сарийрам̣ уб̣б̣аддзд̇ваа чад̣д̣зд̇аб̣б̣ам̣ суван̣н̣ажун̣н̣ам̣ зва маг̇ад̇ханаал̣ияаа д̣̇ваад̣̇асанаал̣имад̇д̇ам̣ лад̣̇д̇хум̣ ваддад̇и. яанд̇аб̣ад̣̇д̇хаани садти махаад̇ал̣аагаани, гамманд̇о д̣̇ваад̣̇асаяож̇аниго, анураад̇хабураббамаан̣аа жуд̣̇д̣̇асаг̇аамаа, жуд̣̇д̣̇аса хад̇т̇аанийгаани, жуд̣̇д̣̇аса ассаанийгаани, жуд̣̇д̣̇аса рат̇аанийгаани.
Taṃdivasameva pippalimāṇavopi bhaddaṃ ekaṃ pupphadāmaṃ gaṇhāpesi. Bhaddāpi tāni sayanamajjhe ṭhapesi. Ubhopi bhuttasāyamāsā sayanaṃ āruhituṃ ārabhiṃsu. Tesu māṇavo dakkhiṇapassena sayanaṃ āruhi, bhaddā vāmapassena abhiruhitvā āha – ‘‘yassa passe pupphāni milāyanti, tassa rāgacittaṃ uppannanti vijānissāma, imaṃ pupphadāmaṃ na allīyitabba’’nti. Te pana aññamaññaṃ sarīrasamphassabhayena sakalarattiṃ niddaṃ anokkamantāva vītināmesuṃ. Divā pana hasitamattampi nākaṃsu. Te lokāmisena asaṃsaṭṭhā yāva mātāpitaro dharanti, tāva kuṭumbaṃ avicāretvā tesu kālaṅkatesu vicārayiṃsu. Mahatī māṇavassa sampatti. Ekadivasaṃ sarīraṃ ubbaṭṭetvā chaḍḍetabbaṃ suvaṇṇacuṇṇaṃ eva magadhanāḷiyā dvādasanāḷimattaṃ laddhuṃ vaṭṭati. Yantabaddhāni saṭṭhi mahātaḷākāni, kammanto dvādasayojaniko, anurādhapurappamāṇā cuddasagāmā, cuddasa hatthānīkāni, cuddasa assānīkāni, cuddasa rathānīkāni.
со згад̣̇ивасам̣ алан̇гад̇аассам̣ ааруяха махааж̇анабаривуд̇о гамманд̇адтаанам̣ г̇анд̇ваа кзд̇д̇агодияам̣ тид̇о нан̇г̇алзхи чиннадтаанад̇о гаагаад̣̇аяо сагун̣з г̇ан̣д̣уббаад̣̇аад̣̇игз баан̣агз уд̣̇д̇харид̇ваа каад̣̇анд̇з д̣̇исваа ‘‘д̇аад̇аа, имз гим̣ каад̣̇анд̇ий’’д̇и бужчи. ‘‘г̇ан̣д̣уббаад̣̇з, аяяаа’’д̇и. ‘‘зд̇зхи гад̇абаабам̣ гасса ход̇ий’’д̇и? ‘‘д̇умхаагам̣, аяяаа’’д̇и. со жинд̇зси – ‘‘сажз зд̇зхи гад̇абаабам̣ маяхам̣ ход̇и, гим̣ мз гариссад̇и сад̇д̇аасийд̇игодид̇ханам̣, д̣̇ваад̣̇асаяож̇анагамманд̇о гим̣ гариссад̇и, гим̣ яанд̇аб̣ад̣̇д̇хаани д̇ал̣аагаани, гим̣ жуд̣̇д̣̇аса г̇аамаани, саб̣б̣амзд̇ам̣ бхад̣̇д̣̇ааяа гаабилаанияаа нияяаад̇зд̇ваа нигкамма баб̣б̣аж̇иссаамий’’д̇и.
So ekadivasaṃ alaṅkataassaṃ āruyha mahājanaparivuto kammantaṭṭhānaṃ gantvā khettakoṭiyaṃ ṭhito naṅgalehi chinnaṭṭhānato kākādayo sakuṇe gaṇḍuppādādike pāṇake uddharitvā khādante disvā ‘‘tātā, ime kiṃ khādantī’’ti pucchi. ‘‘Gaṇḍuppāde, ayyā’’ti. ‘‘Etehi katapāpaṃ kassa hotī’’ti? ‘‘Tumhākaṃ, ayyā’’ti. So cintesi – ‘‘sace etehi katapāpaṃ mayhaṃ hoti, kiṃ me karissati sattaasītikoṭidhanaṃ, dvādasayojanakammanto kiṃ karissati, kiṃ yantabaddhāni taḷākāni, kiṃ cuddasa gāmāni, sabbametaṃ bhaddāya kāpilāniyā niyyātetvā nikkhamma pabbajissāmī’’ti.
бхад̣̇д̣̇аа гаабилааний д̇асмим̣ кан̣з анд̇аравад̇т̇усмим̣ д̇аяо д̇илагумбхз бад̇т̇арид̇ваа д̇хаад̇ийхи баривуд̇аа нисиннаа гаагз д̇илабаан̣агз каад̣̇амаанз д̣̇исваа ‘‘аммаа, гим̣ имз каад̣̇анд̇ий’’д̇и бужчи. ‘‘баан̣агз, аяяз’’д̇и. ‘‘агусалам̣ гасса ход̇ий’’д̇и? ‘‘д̇умхаагам̣, аяяз’’д̇и. саа жинд̇зси – ‘‘маяхам̣ жад̇ухад̇т̇ам̣ вад̇т̇ам̣ наал̣игод̣̇анамад̇д̇ан̃жа лад̣̇д̇хум̣ ваддад̇и, яад̣̇и банзд̇ам̣ зд̇зхи гад̇ам̣ агусалам̣ маяхам̣ ход̇и, бхавасахассзнаби ваддад̇о сийсам̣ угкибид̇ум̣ на саггаа, аяяабуд̇д̇з ааг̇ад̇амад̇д̇зязва саб̣б̣ам̣ д̇асса нияяаад̇зд̇ваа нигкамма баб̣б̣аж̇иссаамий’’д̇и.
Bhaddā kāpilānī tasmiṃ khaṇe antaravatthusmiṃ tayo tilakumbhe pattharitvā dhātīhi parivutā nisinnā kāke tilapāṇake khādamāne disvā ‘‘ammā, kiṃ ime khādantī’’ti pucchi. ‘‘Pāṇake, ayye’’ti. ‘‘Akusalaṃ kassa hotī’’ti? ‘‘Tumhākaṃ, ayye’’ti. Sā cintesi – ‘‘mayhaṃ catuhatthaṃ vatthaṃ nāḷikodanamattañca laddhuṃ vaṭṭati, yadi panetaṃ etehi kataṃ akusalaṃ mayhaṃ hoti, bhavasahassenapi vaṭṭato sīsaṃ ukkhipituṃ na sakkā, ayyaputte āgatamatteyeva sabbaṃ tassa niyyātetvā nikkhamma pabbajissāmī’’ti.
маан̣аво ааг̇анд̇ваа нхад̇ваа баасаад̣̇ам̣ ааруяха махаарахз баллан̇гз нисийд̣̇и, ат̇асса жаггавад̇д̇ино анужчавигабхож̇анам̣ убанаяим̣су. д̣̇взби бхун̃ж̇ид̇ваа бариж̇анз нигканд̇з рахог̇ад̇аа паасугадтаанз нисийд̣̇им̣су. д̇ад̇о маан̣аво бхад̣̇д̣̇ам̣ ааха – ‘‘бхад̣̇д̣̇з, имам̣ гхарам̣ ааг̇ажчанд̇ий гид̇д̇агам̣ д̇ханамаахарасий’’д̇и? ‘‘бан̃жабан̣н̣ааса сагадасахассаани, аяяаа’’д̇и. ‘‘саб̣б̣ам̣ д̇ам̣, яаа жа имасмим̣ гхарз сад̇д̇аасийд̇и годияо яанд̇аб̣ад̣̇д̇хаани садти д̇ал̣аагаанийд̇и звамаад̣̇ибхзд̣̇аа самбад̇д̇и ад̇т̇и, д̇ам̣ саб̣б̣ам̣ д̇уяхзва нияяаад̇змий’’д̇и. ‘‘д̇умхз бана гухим̣ г̇ажчат̇а, аяяаа’’д̇и? ‘‘ахам̣ баб̣б̣аж̇иссаамий’’д̇и. ‘‘аяяа, ахамби д̇умхаагам̣ ааг̇аманам̣ ологаяамаанаа нисиннаа, ахамби баб̣б̣аж̇иссаамий’’д̇и. д̇зсам̣ аад̣̇ид̇д̇абан̣н̣агуди вияа д̇аяо бхаваа убадтаханд̇и. д̇з ‘‘баб̣б̣аж̇иссаамаа’’д̇и вад̇ваа анд̇араабан̣ад̇о гаасааяарасабийд̇аани жийвараани мад̇д̇игаабад̇д̇з жа аахараабзд̇ваа ан̃н̃аман̃н̃ам̣ гзсз охаарзд̇ваа ‘‘яз логз араханд̇о ад̇т̇и, д̇з уд̣̇д̣̇исса амхаагам̣ баб̣б̣аж̇ж̇аа’’д̇и баб̣б̣аж̇ид̇ваа т̇авигаасу бад̇д̇з багкибид̇ваа ам̣сз лаг̇г̇зд̇ваа баасаад̣̇ад̇о од̇арим̣су. г̇зхз д̣̇аасзсу жа гаммагаарзсу жа на гожи сан̃ж̇аани.
Māṇavo āgantvā nhatvā pāsādaṃ āruyha mahārahe pallaṅke nisīdi, athassa cakkavattino anucchavikabhojanaṃ upanayiṃsu. Dvepi bhuñjitvā parijane nikkhante rahogatā phāsukaṭṭhāne nisīdiṃsu. Tato māṇavo bhaddaṃ āha – ‘‘bhadde, imaṃ gharaṃ āgacchantī kittakaṃ dhanamāharasī’’ti? ‘‘Pañcapaṇṇāsa sakaṭasahassāni, ayyā’’ti. ‘‘Sabbaṃ taṃ, yā ca imasmiṃ ghare sattāsīti koṭiyo yantabaddhāni saṭṭhi taḷākānīti evamādibhedā sampatti atthi, taṃ sabbaṃ tuyheva niyyātemī’’ti. ‘‘Tumhe pana kuhiṃ gacchatha, ayyā’’ti? ‘‘Ahaṃ pabbajissāmī’’ti. ‘‘Ayya, ahampi tumhākaṃ āgamanaṃ olokayamānā nisinnā, ahampi pabbajissāmī’’ti. Tesaṃ ādittapaṇṇakuṭi viya tayo bhavā upaṭṭhahanti. Te ‘‘pabbajissāmā’’ti vatvā antarāpaṇato kāsāyarasapītāni cīvarāni mattikāpatte ca āharāpetvā aññamaññaṃ kese ohāretvā ‘‘ye loke arahanto atthi, te uddissa amhākaṃ pabbajjā’’ti pabbajitvā thavikāsu patte pakkhipitvā aṃse laggetvā pāsādato otariṃsu. Gehe dāsesu ca kammakāresu ca na koci sañjāni.
ат̇а нз б̣раахман̣аг̇аамад̇о нигкамид̇ваа д̣̇аасаг̇аамад̣̇ваарзна г̇ажчанд̇з аагаббагуд̇авасзна д̣̇аасаг̇аамаваасино сан̃ж̇ааним̣су. д̇з род̣̇анд̇аа баад̣̇зсу бад̇ид̇ваа ‘‘гим̣ амхз анаат̇з гарот̇а, аяяаа’’д̇и аахам̣су. ‘‘маяам̣, бхан̣з, ‘д̇аяо бхаваа аад̣̇ид̇д̇абан̣н̣асаалаа вияаа’д̇и баб̣б̣аж̇имха, сажз д̇умхзсу згзгам̣ бхуж̇иссам̣ гарома, вассасад̇амби наббаход̇и. д̇умхзва д̇умхаагам̣ сийсам̣ д̇ховид̇ваа бхуж̇иссаа худ̇ваа ж̇ийват̇аа’’д̇и вад̇ваа д̇зсам̣ род̣̇анд̇аанам̣язва баггамим̣су.
Atha ne brāhmaṇagāmato nikkhamitvā dāsagāmadvārena gacchante ākappakutavasena dāsagāmavāsino sañjāniṃsu. Te rodantā pādesu patitvā ‘‘kiṃ amhe anāthe karotha, ayyā’’ti āhaṃsu. ‘‘Mayaṃ, bhaṇe, ‘tayo bhavā ādittapaṇṇasālā viyā’ti pabbajimha, sace tumhesu ekekaṃ bhujissaṃ karoma, vassasatampi nappahoti. Tumheva tumhākaṃ sīsaṃ dhovitvā bhujissā hutvā jīvathā’’ti vatvā tesaṃ rodantānaṃyeva pakkamiṃsu.
т̇зро бурад̇о г̇ажчанд̇о нивад̇д̇ид̇ваа ологзнд̇о жинд̇зси – ‘‘аяам̣ бхад̣̇д̣̇аа гаабилааний сагалаж̇амб̣уд̣̇ийбаг̇гханигаа ид̇т̇ий маяхам̣ бажчад̇о ааг̇ажчад̇и, таанам̣ ко банзд̇ам̣ виж̇ж̇ад̇и, яам̣ гожид̣̇зва звам̣ жинд̇зяяа ‘имз баб̣б̣аж̇ид̇ааби винаа бхавид̇ум̣ на саггонд̇и, ананужчавигам̣ гаронд̇ий’д̇и. звам̣ гожи баабагзна манасаа бад̣̇уусзд̇ваа абааяабуураго бхавзяяа, имам̣ бахааяа маяаа г̇анд̇ум̣ ваддад̇ий’’д̇и жид̇д̇ам̣ уббаад̣̇зд̇ваа бурад̇о г̇ажчанд̇о д̣̇взд̇хаабат̇ам̣ д̣̇исваа д̇асса мад̇т̇агз адтааси. бхад̣̇д̣̇ааби ааг̇анд̇ваа ванд̣̇ид̇ваа адтааси. ат̇а нам̣ ааха – ‘‘бхад̣̇д̣̇з, д̇аад̣̇исим̣ ид̇т̇им̣ мама бажчад̇о ааг̇ажчанд̇им̣ д̣̇исваа ‘имз баб̣б̣аж̇ид̇ааби винаа бхавид̇ум̣ на саггонд̇ий’д̇и амхзсу бад̣̇удтажид̇д̇о махааж̇ано абааяабуураго бхавзяяа. имасмим̣ д̣̇взд̇хаабат̇з д̇вам̣ зд̇ам̣ г̇ан̣ха, ахам̣ згзна г̇амиссаамий’’д̇и. ‘‘аама, аяяа, маад̇уг̇аамо ‘баб̣б̣аж̇ид̇аанам̣ балиб̣од̇хо, баб̣б̣аж̇ид̇ааби винаа на бхаванд̇ий’д̇и амхаагам̣ д̣̇осам̣ д̣̇ассзяяу’’нд̇и д̇игкад̇д̇ум̣ бад̣̇агкин̣ам̣ гад̇ваа жад̇уусу таанзсу бан̃жабад̇идтид̇зна ванд̣̇ид̇ваа д̣̇асанакасамод̇хаанасамуж̇ж̇алам̣ ан̃ж̇алим̣ баг̇г̇аяха ‘‘сад̇асахассагаббабамаан̣з ад̣̇д̇хаанз гад̇о мид̇д̇асант̇аво аж̇ж̇а бхиж̇ж̇ад̇и, д̇умхзва д̣̇агкин̣аа наама, д̇умхаагам̣ д̣̇агкин̣амаг̇г̇о ваддад̇и, маяам̣ маад̇уг̇аамаа наама ваамаж̇аад̇игаа, амхаагам̣ ваамамаг̇г̇о ваддад̇ий’’д̇и ванд̣̇ид̇ваа маг̇г̇ам̣ бадибаж̇ж̇и. д̇зсам̣ д̣̇взд̇хаабхууд̇агаалз аяам̣ махаабат̇авий ‘‘ахам̣ жаггаваал̣асинзрубаб̣б̣ад̇аад̣̇аяо д̇хаарзд̇ум̣ саггонд̇ийби д̇умхаагам̣ г̇ун̣з д̇хаарзд̇ум̣ на саггомий’’д̇и вад̣̇анд̇ий вияа виравамаанаа агамбид̇т̇а. аагаасз асанисад̣̇д̣̇о вияа бавад̇д̇и, жаггаваал̣абаб̣б̣ад̇о уннаад̣̇и.
Thero purato gacchanto nivattitvā olokento cintesi – ‘‘ayaṃ bhaddā kāpilānī sakalajambudīpagghanikā itthī mayhaṃ pacchato āgacchati, ṭhānaṃ kho panetaṃ vijjati, yaṃ kocideva evaṃ cinteyya ‘ime pabbajitāpi vinā bhavituṃ na sakkonti, ananucchavikaṃ karontī’ti. Evaṃ koci pāpakena manasā padūsetvā apāyapūrako bhaveyya, imaṃ pahāya mayā gantuṃ vaṭṭatī’’ti cittaṃ uppādetvā purato gacchanto dvedhāpathaṃ disvā tassa matthake aṭṭhāsi. Bhaddāpi āgantvā vanditvā aṭṭhāsi. Atha naṃ āha – ‘‘bhadde, tādisiṃ itthiṃ mama pacchato āgacchantiṃ disvā ‘ime pabbajitāpi vinā bhavituṃ na sakkontī’ti amhesu paduṭṭhacitto mahājano apāyapūrako bhaveyya. Imasmiṃ dvedhāpathe tvaṃ etaṃ gaṇha, ahaṃ ekena gamissāmī’’ti. ‘‘Āma, ayya, mātugāmo ‘pabbajitānaṃ palibodho, pabbajitāpi vinā na bhavantī’ti amhākaṃ dosaṃ dasseyyu’’nti tikkhattuṃ padakkhiṇaṃ katvā catūsu ṭhānesu pañcapatiṭṭhitena vanditvā dasanakhasamodhānasamujjalaṃ añjaliṃ paggayha ‘‘satasahassakappapamāṇe addhāne kato mittasanthavo ajja bhijjati, tumheva dakkhiṇā nāma, tumhākaṃ dakkhiṇamaggo vaṭṭati, mayaṃ mātugāmā nāma vāmajātikā, amhākaṃ vāmamaggo vaṭṭatī’’ti vanditvā maggaṃ paṭipajji. Tesaṃ dvedhābhūtakāle ayaṃ mahāpathavī ‘‘ahaṃ cakkavāḷasinerupabbatādayo dhāretuṃ sakkontīpi tumhākaṃ guṇe dhāretuṃ na sakkomī’’ti vadantī viya viravamānā akampittha. Ākāse asanisaddo viya pavatti, cakkavāḷapabbato unnādi.
саммаасамб̣уд̣̇д̇хоби взл̣уванамахаавихаарз гудияам̣ нисинно бат̇авийгамбанасад̣̇д̣̇ам̣ суд̇ваа ‘‘гисса ну ко бат̇авий гамбад̇ий’’д̇и ааваж̇ж̇знд̇о ‘‘биббалимаан̣аво жа бхад̣̇д̣̇аа жа гаабилааний мам̣ уд̣̇д̣̇исса аббамзяяам̣ самбад̇д̇им̣ бахааяа баб̣б̣аж̇ид̇аа, д̇зсам̣ вияог̇адтаанз убхиннам̣ г̇ун̣аб̣алзна аяам̣ бат̇авийгамбо ж̇аад̇о, маяааби зд̇зсам̣ сан̇г̇ахам̣ гаад̇ум̣ ваддад̇ий’’д̇и г̇анд̇хагудид̇о нигкамма саяамзва бад̇д̇ажийварамаад̣̇ааяа асийд̇имахаат̇зрзсу ган̃жи анаабужчаа д̇иг̇аавуд̇амаг̇г̇ам̣ бажжуг̇г̇аманам̣ гад̇ваа рааж̇аг̇ахасса жа нааланд̣̇ааяа жа анд̇арз б̣ахубуд̇д̇аниг̇род̇хамуулз баллан̇гам̣ аабхуж̇ид̇ваа нисийд̣̇и. нисинно бана ан̃н̃ад̇арабам̣сугуулиго вияа анисийд̣̇ид̇ваа б̣уд̣̇д̇хавзсам̣ г̇ахзд̇ваа асийд̇ихад̇т̇аа б̣уд̣̇д̇харам̣сияо виссаж̇ж̇знд̇о нисийд̣̇и. ид̇и д̇асмим̣ кан̣з бан̣н̣ажчад̇д̇асагадажаггагуудааг̇аараад̣̇иббамаан̣аа б̣уд̣̇д̇харам̣сияо ид̇о жид̇о жа вибпаранд̇ияо вид̇хааванд̇ияо жанд̣̇асахассасуурияасахассауг̇г̇аманагаалам̣ вияа гурумаанаа д̇ам̣ вананд̇арам̣ згобхаасам̣ агам̣су. д̣̇вад̇д̇им̣самахаабурисалагкан̣асирияаа самуж̇ж̇алад̇аарааг̇ан̣зна вияа г̇аг̇анам̣, субубпид̇агамалагувалаязна вияа салилам̣ вананд̇арам̣ вирожид̇т̇а. ниг̇род̇харугкасса канд̇хо багад̇ияаа сзд̇о ход̇и, бад̇д̇аани нийлаани баггаани рад̇д̇аани. д̇асмим̣ бана д̣̇ивасз саб̣б̣о ниг̇род̇хо суван̣н̣аван̣н̣ова ахоси.
Sammāsambuddhopi veḷuvanamahāvihāre kuṭiyaṃ nisinno pathavīkampanasaddaṃ sutvā ‘‘kissa nu kho pathavī kampatī’’ti āvajjento ‘‘pippalimāṇavo ca bhaddā ca kāpilānī maṃ uddissa appameyyaṃ sampattiṃ pahāya pabbajitā, tesaṃ viyogaṭṭhāne ubhinnaṃ guṇabalena ayaṃ pathavīkampo jāto, mayāpi etesaṃ saṅgahaṃ kātuṃ vaṭṭatī’’ti gandhakuṭito nikkhamma sayameva pattacīvaramādāya asītimahātheresu kañci anāpucchā tigāvutamaggaṃ paccuggamanaṃ katvā rājagahassa ca nālandāya ca antare bahuputtanigrodhamūle pallaṅkaṃ ābhujitvā nisīdi. Nisinno pana aññatarapaṃsukūliko viya anisīditvā buddhavesaṃ gahetvā asītihatthā buddharaṃsiyo vissajjento nisīdi. Iti tasmiṃ khaṇe paṇṇacchattasakaṭacakkakūṭāgārādippamāṇā buddharaṃsiyo ito cito ca vippharantiyo vidhāvantiyo candasahassasūriyasahassauggamanakālaṃ viya kurumānā taṃ vanantaraṃ ekobhāsaṃ akaṃsu. Dvattiṃsamahāpurisalakkhaṇasiriyā samujjalatārāgaṇena viya gaganaṃ, supupphitakamalakuvalayena viya salilaṃ vanantaraṃ virocittha. Nigrodharukkhassa khandho pakatiyā seto hoti, pattāni nīlāni pakkāni rattāni. Tasmiṃ pana divase sabbo nigrodho suvaṇṇavaṇṇova ahosi.
махаагассабад̇т̇зро д̇ам̣ д̣̇исваа ‘‘аяам̣ амхаагам̣ сад̇т̇аа бхависсад̇и, имам̣ ахам̣ уд̣̇д̣̇исса баб̣б̣аж̇ид̇о’’д̇и д̣̇идтадтаанад̇о бадтааяа онад̇о г̇анд̇ваа д̇ийсу таанзсу ванд̣̇ид̇ваа ‘‘сад̇т̇аа мз, бханд̇з, бхаг̇аваа, саавагохамасми, сад̇т̇аа мз, бханд̇з, бхаг̇аваа, саавагохамасмий’’д̇и (сам̣. ни. 2.154) ааха. ат̇а нам̣ бхаг̇аваа ааха – ‘‘гассаба, сажз д̇вам̣ имам̣ нибажжагаарам̣ махаабат̇авияаа гарзяяааси, сааби д̇хаарзд̇ум̣ на саггун̣зяяа. д̇ат̇ааг̇ад̇асса бана звам̣ г̇ун̣амаханд̇ад̇ам̣ ж̇аанад̇аа д̇аяаа гад̇о нибажжагааро маяхам̣ ломамби жаалзд̇ум̣ на саггод̇и. нисийд̣̇а, гассаба, д̣̇ааяаж̇ж̇ам̣ д̇з д̣̇ассаамий’’д̇и. ат̇асса бхаг̇аваа д̇ийхи оваад̣̇зхи убасамбад̣̇ам̣ ад̣̇ааси. д̣̇ад̇ваа жа б̣ахубуд̇д̇аниг̇род̇хамуулад̇о нигкамид̇ваа т̇зрам̣ бажчаасаман̣ам̣ гад̇ваа маг̇г̇ам̣ бадибаж̇ж̇и. сад̇т̇у сарийрам̣ д̣̇вад̇д̇им̣самахаабурисалагкан̣авижид̇д̇ам̣, махаагассабасса сад̇д̇амахаабурисалагкан̣абадиман̣д̣ид̇ам̣, со ган̃жананаавааяа бажчааб̣ад̣̇д̇хо вияа сад̇т̇у бад̣̇аанубад̣̇игам̣ ануг̇ан̃чи. сад̇т̇аа т̇огам̣ маг̇г̇ам̣ г̇анд̇ваа маг̇г̇аа оггамма ан̃н̃ад̇арасмим̣ ругкамуулз нисаж̇ж̇аагаарам̣ д̣̇ассзси. т̇зро ‘‘сад̇т̇аа нисийд̣̇ид̇угаамо’’д̇и н̃ад̇ваа ад̇д̇ано бадабилод̇игам̣ сан̇гхаадим̣ жад̇уг̇г̇ун̣ам̣ гад̇ваа бан̃н̃абзси.
Mahākassapatthero taṃ disvā ‘‘ayaṃ amhākaṃ satthā bhavissati, imaṃ ahaṃ uddissa pabbajito’’ti diṭṭhaṭṭhānato paṭṭhāya onato gantvā tīsu ṭhānesu vanditvā ‘‘satthā me, bhante, bhagavā, sāvakohamasmi, satthā me, bhante, bhagavā, sāvakohamasmī’’ti (saṃ. ni. 2.154) āha. Atha naṃ bhagavā āha – ‘‘kassapa, sace tvaṃ imaṃ nipaccakāraṃ mahāpathaviyā kareyyāsi, sāpi dhāretuṃ na sakkuṇeyya. Tathāgatassa pana evaṃ guṇamahantataṃ jānatā tayā kato nipaccakāro mayhaṃ lomampi cāletuṃ na sakkoti. Nisīda, kassapa, dāyajjaṃ te dassāmī’’ti. Athassa bhagavā tīhi ovādehi upasampadaṃ adāsi. Datvā ca bahuputtanigrodhamūlato nikkhamitvā theraṃ pacchāsamaṇaṃ katvā maggaṃ paṭipajji. Satthu sarīraṃ dvattiṃsamahāpurisalakkhaṇavicittaṃ, mahākassapassa sattamahāpurisalakkhaṇapaṭimaṇḍitaṃ, so kañcananāvāya pacchābaddho viya satthu padānupadikaṃ anugañchi. Satthā thokaṃ maggaṃ gantvā maggā okkamma aññatarasmiṃ rukkhamūle nisajjākāraṃ dassesi. Thero ‘‘satthā nisīditukāmo’’ti ñatvā attano paṭapilotikaṃ saṅghāṭiṃ catugguṇaṃ katvā paññapesi.
сад̇т̇аа д̇ад̇т̇а нисийд̣̇ид̇ваа хад̇т̇зна жийварам̣ баримаж̇ж̇анд̇о ‘‘муд̣̇угаа ко д̇яааяам̣, гассаба, бадабилод̇игаа сан̇гхаадий’’д̇и ааха (сам̣. ни. 2.154). со ‘‘сад̇т̇аа мз сан̇гхаадияаа муд̣̇убхаавам̣ гат̇зси, баарубид̇угаамо бхависсад̇ий’’д̇и н̃ад̇ваа ‘‘баарубад̇у, бханд̇з, бхаг̇аваа сан̇гхаади’’нд̇и ааха. ‘‘гим̣ д̇вам̣ баарубиссаси, гассабаа’’д̇и? ‘‘д̇умхаагам̣ ниваасанам̣ лабханд̇о баарубиссаами, бханд̇з’’д̇и. ‘‘гим̣ бана д̇вам̣, гассаба, имам̣ барибхог̇аж̇ин̣н̣ам̣ бам̣сугуулам̣ д̇хаарзд̇ум̣ сагкиссаси, маяаа хи имасса бам̣сугууласса г̇ахид̇ад̣̇ивасз уд̣̇агабарияанд̇ам̣ гад̇ваа махаабат̇авий гамби, имам̣ б̣уд̣̇д̇хабарибхог̇аж̇ин̣н̣ажийварам̣ наама на саггаа барид̇д̇аг̇ун̣зна д̇хаарзд̇ум̣, бадиб̣алзнзвид̣̇ам̣ бадибад̇д̇ибууран̣асамад̇т̇зна ж̇аад̇ибам̣сугуулигзна д̇хаарзд̇ум̣ ваддад̇ий’’д̇и вад̇ваа т̇зрзна сад̣̇д̇хим̣ жийварам̣ баривад̇д̇зси.
Satthā tattha nisīditvā hatthena cīvaraṃ parimajjanto ‘‘mudukā kho tyāyaṃ, kassapa, paṭapilotikā saṅghāṭī’’ti āha (saṃ. ni. 2.154). So ‘‘satthā me saṅghāṭiyā mudubhāvaṃ kathesi, pārupitukāmo bhavissatī’’ti ñatvā ‘‘pārupatu, bhante, bhagavā saṅghāṭi’’nti āha. ‘‘Kiṃ tvaṃ pārupissasi, kassapā’’ti? ‘‘Tumhākaṃ nivāsanaṃ labhanto pārupissāmi, bhante’’ti. ‘‘Kiṃ pana tvaṃ, kassapa, imaṃ paribhogajiṇṇaṃ paṃsukūlaṃ dhāretuṃ sakkhissasi, mayā hi imassa paṃsukūlassa gahitadivase udakapariyantaṃ katvā mahāpathavī kampi, imaṃ buddhaparibhogajiṇṇacīvaraṃ nāma na sakkā parittaguṇena dhāretuṃ, paṭibalenevidaṃ paṭipattipūraṇasamatthena jātipaṃsukūlikena dhāretuṃ vaṭṭatī’’ti vatvā therena saddhiṃ cīvaraṃ parivattesi.
звам̣ жийварам̣ баривад̇д̇зд̇ваа т̇зрасса жийварам̣ бхаг̇аваа бааруби, сад̇т̇у жийварам̣ т̇зро. д̇асмим̣ кан̣з ажзд̇анааби аяам̣ махаабат̇авий ‘‘д̣̇уггарам̣, бханд̇з, агад̇т̇а, ад̇д̇ано бааруд̇ажийварам̣ саавагзна баривад̇д̇ид̇абуб̣б̣ам̣ наама наахоси, ахам̣ д̇умхаагам̣ г̇ун̣ам̣ д̇хаарзд̇ум̣ на саггомий’’д̇и вад̣̇анд̇ий вияа уд̣̇агабарияанд̇ам̣ гад̇ваа гамби. т̇зроби ‘‘лад̣̇д̇хам̣ мз б̣уд̣̇д̇хаанам̣ барибхог̇ажийварам̣, гим̣ мз ид̣̇аани уд̇д̇ари гад̇д̇аб̣б̣а’’нд̇и уннад̇им̣ агад̇ваа сад̇т̇у санд̇игзязва д̇зраса д̇худ̇аг̇ун̣з самаад̣̇ааяа сад̇д̇ад̣̇ивасамад̇д̇ам̣ бут̇уж̇ж̇ано ахоси. адтамз д̣̇ивасз саха бадисамбхид̣̇аахи арахад̇д̇ам̣ баабун̣и. ат̇а нам̣ сад̇т̇аа ‘‘гассабо, бхигкавз, жанд̣̇уубамо гулаани убасан̇гамад̇и, абагассзва гааяам̣ абагасса жид̇д̇ам̣ нижжанаваго гулзсу аббаг̇аб̣бхо’’д̇и (сам̣. ни. 2.146) звамаад̣̇инаа басам̣сид̇ваа абарабхааг̇з арияаг̇ан̣амаж̇жхз нисинно ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуунам̣ д̇худ̇аваад̣̇аанам̣ яад̣̇ид̣̇ам̣ махаагассабо’’д̇и (а. ни. 1.188, 191) д̇худ̇аваад̣̇аанам̣ аг̇г̇адтаанз табзси.
Evaṃ cīvaraṃ parivattetvā therassa cīvaraṃ bhagavā pārupi, satthu cīvaraṃ thero. Tasmiṃ khaṇe acetanāpi ayaṃ mahāpathavī ‘‘dukkaraṃ, bhante, akattha, attano pārutacīvaraṃ sāvakena parivattitapubbaṃ nāma nāhosi, ahaṃ tumhākaṃ guṇaṃ dhāretuṃ na sakkomī’’ti vadantī viya udakapariyantaṃ katvā kampi. Theropi ‘‘laddhaṃ me buddhānaṃ paribhogacīvaraṃ, kiṃ me idāni uttari kattabba’’nti unnatiṃ akatvā satthu santikeyeva terasa dhutaguṇe samādāya sattadivasamattaṃ puthujjano ahosi. Aṭṭhame divase saha paṭisambhidāhi arahattaṃ pāpuṇi. Atha naṃ satthā ‘‘kassapo, bhikkhave, candūpamo kulāni upasaṅkamati, apakasseva kāyaṃ apakassa cittaṃ niccanavako kulesu appagabbho’’ti (saṃ. ni. 2.146) evamādinā pasaṃsitvā aparabhāge ariyagaṇamajjhe nisinno ‘‘etadaggaṃ, bhikkhave, mama sāvakānaṃ bhikkhūnaṃ dhutavādānaṃ yadidaṃ mahākassapo’’ti (a. ni. 1.188, 191) dhutavādānaṃ aggaṭṭhāne ṭhapesi.
398. звам̣ бхаг̇авад̇аа зд̇ад̣̇аг̇г̇адтаанз табид̇о ааяасмаа махаагассабо махаасаавагабхаавам̣ бад̇д̇о ад̇д̇ано буб̣б̣агаммам̣ сарид̇ваа соманассавасзнам̣ буб̣б̣ажарид̇аабад̣̇аанам̣ багаасзнд̇о бад̣̇умуд̇д̇арасса бхаг̇авад̇од̇иаад̣̇имааха. д̇ад̇т̇а бад̣̇умуд̇д̇арассаад̇и д̇асса гира бхаг̇авад̇о маад̇угужчид̇о нигкаманагаалад̇о бадтааяа баад̣̇аанам̣ нигкзбанасамаяз агганд̇агганд̇абаад̣̇з сад̇асахассабад̇д̇аа бад̣̇умаа бат̇авим̣ бхинд̣̇ид̇ваа удтахим̣су. д̇асмаасса д̇ам̣ наамам̣ ахоси. сагаласад̇д̇анигааязсу згзгзна сад̇асад̇абун̃н̃з гад̇з д̇асса бун̃н̃асса сад̇аг̇ун̣абун̃н̃аанам̣ гад̇ад̇д̇аа бхаг̇авад̇од̇и ад̇т̇о. логаж̇здтасса д̇аад̣̇инод̇и сад̇д̇алогасса бад̇хаанабхууд̇асса идтаанидтзсу агамбияабхаавам̣ бад̇д̇ад̇д̇аа д̇аад̣̇ино. ниб̣б̣уд̇з логанаат̇амхийд̇и сад̇д̇алогасса бадисаран̣абхууд̇з бхаг̇авад̇и канд̇хабариниб̣б̣аанзна бариниб̣б̣уд̇з, ад̣̇ассанам̣ г̇ад̇зд̇и ад̇т̇о. бууж̇ам̣ губ̣б̣анд̇и сант̇унод̇и сад̣̇звагасса логасса саасанад̇о ‘‘сад̇т̇аа’’д̇и лад̣̇д̇ханаамасса бхаг̇авад̇о саад̇хугийл̣ам̣ гийл̣анд̇аа бууж̇ам̣ гаронд̇ийд̇и самб̣анд̇хо.
398. Evaṃ bhagavatā etadaggaṭṭhāne ṭhapito āyasmā mahākassapo mahāsāvakabhāvaṃ patto attano pubbakammaṃ saritvā somanassavasenaṃ pubbacaritāpadānaṃ pakāsento padumuttarassa bhagavatotiādimāha. Tattha padumuttarassāti tassa kira bhagavato mātukucchito nikkhamanakālato paṭṭhāya pādānaṃ nikkhepanasamaye akkantakkantapāde satasahassapattā padumā pathaviṃ bhinditvā uṭṭhahiṃsu. Tasmāssa taṃ nāmaṃ ahosi. Sakalasattanikāyesu ekekena satasatapuññe kate tassa puññassa sataguṇapuññānaṃ katattā bhagavatoti attho. Lokajeṭṭhassa tādinoti sattalokassa padhānabhūtassa iṭṭhāniṭṭhesu akampiyabhāvaṃ pattattā tādino. Nibbute lokanāthamhīti sattalokassa paṭisaraṇabhūte bhagavati khandhaparinibbānena parinibbute, adassanaṃ gateti attho. Pūjaṃ kubbanti santhunoti sadevakassa lokassa sāsanato ‘‘satthā’’ti laddhanāmassa bhagavato sādhukīḷaṃ kīḷantā pūjaṃ karontīti sambandho.
399. аг̇г̇им̣ жинанд̇ий ж̇анад̇аад̇и ж̇анасамуухаа аал̣ааханад̇т̇ааяа аг̇г̇им̣ жинанд̇аа раасим̣ гаронд̇аа аасаманд̇ад̇о мод̣̇ид̇аа санд̇удтаа багаарзна мод̣̇ид̇аа санд̇удтаа бууж̇ам̣ гаронд̇ийд̇и самб̣анд̇хо. д̇зсу сам̣взг̇аж̇аад̇зсууд̇и д̇зсу ж̇анасамуухзсу сам̣взг̇аббад̇д̇зсу уд̇раасам̣ лабханд̇зсу мз маяхам̣ бийд̇и хаасо уд̣̇абаж̇ж̇ат̇а баад̇убхавийд̇и ад̇т̇о.
399.Aggiṃcinantī janatāti janasamūhā āḷāhanatthāya aggiṃ cinantā rāsiṃ karontā āsamantato moditā santuṭṭhā pakārena moditā santuṭṭhā pūjaṃ karontīti sambandho. Tesusaṃvegajātesūti tesu janasamūhesu saṃvegappattesu utrāsaṃ labhantesu me mayhaṃ pīti hāso udapajjatha pātubhavīti attho.
400. н̃аад̇имид̇д̇з самаанзд̇ваад̇и мама б̣анд̇хусахааяз самаанзд̇ваа раасим̣ гад̇ваа. махаавийро бхаг̇аваа бариниб̣б̣уд̇о ад̣̇ассанам̣ аг̇амаасийд̇и ид̣̇ам̣ важанам̣ аб̣равим̣ гат̇зсинд̇и самб̣анд̇хо. ханд̣̇а бууж̇ам̣ гаромасзд̇и ханд̣̇аад̇и воссаг̇г̇ад̇т̇з нибаад̇о, д̇зна гааран̣зна маяам̣ саб̣б̣з самааг̇ад̇аа бууж̇ам̣ гаромаад̇и ад̇т̇о. сзд̇и нибаад̇о.
400.Ñātimitte samānetvāti mama bandhusahāye samānetvā rāsiṃ katvā. Mahāvīro bhagavā parinibbuto adassanaṃ agamāsīti idaṃ vacanaṃ abraviṃ kathesinti sambandho. Handa pūjaṃ karomaseti handāti vossaggatthe nipāto, tena kāraṇena mayaṃ sabbe samāgatā pūjaṃ karomāti attho. Seti nipāto.
401. саад̇хууд̇и д̇з бадиссуд̇ваад̇и д̇з мама н̃аад̇имид̇д̇аа саад̇ху ид̇и сунд̣̇арам̣ бхад̣̇д̣̇агам̣ ид̇и бадисун̣ид̇ваа мама важанам̣ самбадичид̇ваа мз маяхам̣ бхияяо ад̇ирзгам̣ хаасам̣ бийд̇им̣ ж̇аним̣су уббаад̣̇зсунд̇и ад̇т̇о.
401.Sādhūti te paṭissutvāti te mama ñātimittā sādhu iti sundaraṃ bhaddakaṃ iti paṭisuṇitvā mama vacanaṃ sampaṭichitvā me mayhaṃ bhiyyo atirekaṃ hāsaṃ pītiṃ janiṃsu uppādesunti attho.
402. д̇ад̇о ад̇д̇ано гад̇абун̃н̃асан̃жаяам̣ д̣̇ассзнд̇о б̣уд̣̇д̇хасмим̣ логанаат̇амхийд̇иаад̣̇имааха. сад̇ахад̇т̇ам̣ уг̇г̇ад̇ам̣ уб̣б̣ид̣̇д̇хам̣ д̣̇ияад̣дхахад̇т̇асад̇ам̣ вид̇т̇ад̇ам̣, вимаанам̣ набхаси аагаасз уг̇г̇ад̇ам̣ аг̇гхияам̣, сугад̇ам̣ сунд̣̇араагаарзна гад̇ам̣, гад̇ваа гаарзд̇ваа жа бун̃н̃асан̃жаяам̣ бун̃н̃араасим̣ гаахаасим̣ агаасинд̇и самб̣анд̇хо.
402. Tato attano katapuññasañcayaṃ dassento buddhasmiṃ lokanāthamhītiādimāha. Satahatthaṃ uggataṃ ubbiddhaṃ diyaḍḍhahatthasataṃ vitthataṃ, vimānaṃ nabhasi ākāse uggataṃ agghiyaṃ, sukataṃ sundarākārena kataṃ, katvā kāretvā ca puññasañcayaṃ puññarāsiṃ kāhāsiṃ akāsinti sambandho.
403. гад̇ваана аг̇гхияам̣ д̇ад̇т̇аад̇и д̇асмим̣ жзд̇ияабууж̇анадтаанз д̇аалабанд̇ийхи д̇аалабаал̣ийхи жид̇д̇ид̇ам̣ собхид̇ам̣ аг̇гхияам̣ гад̇ваана гаарзд̇ваа жа сагам̣ жид̇д̇ам̣ ад̇д̇ано жид̇д̇ам̣ басаад̣̇зд̇ваа жзд̇ияам̣ бууж̇аяуд̇д̇аманд̇и уд̇д̇амам̣ б̣уд̣̇д̇хад̇хаад̇унид̇хаабид̇ам̣ жзд̇ияам̣ бууж̇аяинд̇и самб̣анд̇хо.
403.Katvāna agghiyaṃ tatthāti tasmiṃ cetiyapūjanaṭṭhāne tālapantīhi tālapāḷīhi cittitaṃ sobhitaṃ agghiyaṃ katvāna kāretvā ca sakaṃ cittaṃ attano cittaṃ pasādetvā cetiyaṃ pūjayuttamanti uttamaṃ buddhadhātunidhāpitaṃ cetiyaṃ pūjayinti sambandho.
404. д̇асса жзд̇ияасса махимам̣ д̣̇ассзнд̇о аг̇г̇игканд̇ховаад̇иаад̣̇имааха. д̇ад̇т̇а аг̇г̇игканд̇ховаад̇и аагаасз ж̇аламаано аг̇г̇игканд̇хова аг̇г̇ирааси ива д̇ам̣ жзд̇ияам̣ сад̇д̇ахи рад̇анзхи ж̇алад̇и пуллид̇о вигасид̇абубпо сааларугкарааж̇аа ива аагаасз инд̣̇аладтийва инд̣̇ад̇хану ива жа жад̇уд̣̇д̣̇исаа жад̇уусу д̣̇исаасу обхаасад̇и виж̇ж̇од̇ад̇ийд̇и самб̣анд̇хо.
404. Tassa cetiyassa mahimaṃ dassento aggikkhandhovātiādimāha. Tattha aggikkhandhovāti ākāse jalamāno aggikkhandhova aggirāsi iva taṃ cetiyaṃ sattahi ratanehi jalati phullito vikasitapuppho sālarukkharājā iva ākāse indalaṭṭhīva indadhanu iva ca catuddisā catūsu disāsu obhāsati vijjotatīti sambandho.
405. д̇ад̇т̇а жид̇д̇ам̣ басаад̣̇зд̇ваад̇и д̇асмим̣ ж̇од̇амаанад̇хаад̇уг̇аб̣бхамхи жид̇д̇ам̣ манам̣ басаад̣̇зд̇ваа соманассам̣ гад̇ваа д̇зна жид̇д̇аббасаад̣̇зна б̣ахум̣ анзгаббагаарам̣ гусалам̣ бун̃н̃ам̣ гад̇ваана ‘‘д̇хаад̇уг̇аб̣бхз жа саасанз жа зд̇д̇агаани бун̃н̃аани маяаа гад̇ааний’’д̇и звам̣ бун̃н̃агаммам̣ сарид̇ваана гаалам̣гад̇ваа д̇ид̣̇асам̣ д̇аавад̇им̣сабхаванам̣ суд̇д̇аббаб̣уд̣̇д̇хо вияа ахам̣ убабаж̇ж̇им̣ ж̇аад̇од̇и самб̣анд̇хо.
405.Tatthacittaṃ pasādetvāti tasmiṃ jotamānadhātugabbhamhi cittaṃ manaṃ pasādetvā somanassaṃ katvā tena cittappasādena bahuṃ anekappakāraṃ kusalaṃ puññaṃ katvāna ‘‘dhātugabbhe ca sāsane ca ettakāni puññāni mayā katānī’’ti evaṃ puññakammaṃ saritvāna kālaṃkatvā tidasaṃ tāvatiṃsabhavanaṃ suttappabuddho viya ahaṃ upapajjiṃ jātoti sambandho.
406. ад̇д̇ано уббаннад̣̇звалогз лад̣̇д̇хасамбад̇д̇им̣ д̣̇ассзнд̇о сахассаяуд̇д̇анд̇иаад̣̇имааха. д̇ад̇т̇а хаяаваахим̣ синд̇хавасахассаяож̇ид̇ам̣ д̣̇иб̣б̣арат̇ам̣ ад̇хидтид̇о. сад̇д̇ахи бхуумийхи сам̣ судту уг̇г̇ад̇ам̣ уб̣б̣ид̣̇д̇хам̣ ужжам̣ маяхам̣ бхаванам̣ вимаанам̣ ахосийд̇и ад̇т̇о.
406. Attano uppannadevaloke laddhasampattiṃ dassento sahassayuttantiādimāha. Tattha hayavāhiṃ sindhavasahassayojitaṃ dibbarathaṃ adhiṭṭhito. Sattahi bhūmīhi saṃ suṭṭhu uggataṃ ubbiddhaṃ uccaṃ mayhaṃ bhavanaṃ vimānaṃ ahosīti attho.
407. д̇асмим̣ вимаанз саб̣б̣асован̣н̣амаяаа сагаласован̣н̣амаяаани гуудааг̇аарасахассаани ахум̣ ахзсунд̇и ад̇т̇о. сагад̇зж̇зна ад̇д̇ано аанубхаавзна саб̣б̣аа д̣̇аса д̣̇исаа бабхаасаяам̣ обхаасзнд̇аани ж̇аланд̇и виж̇ж̇од̇анд̇ийд̇и самб̣анд̇хо.
407. Tasmiṃ vimāne sabbasovaṇṇamayā sakalasovaṇṇamayāni kūṭāgārasahassāni ahuṃ ahesunti attho. Sakatejena attano ānubhāvena sabbā dasa disā pabhāsayaṃ obhāsentāni jalanti vijjotantīti sambandho.
408. д̇асмим̣ маяхам̣ баад̇убхууд̇авимаанз ан̃н̃зби нияяуухаа бамукасаалааяо санд̇и виж̇ж̇анд̇и. гим̣ бхууд̇аа? лохид̇ан̇г̇амаяаа рад̇д̇аман̣имаяаа д̇ад̣̇аа д̇зби нияяуухаа жад̇ассо д̣̇исаа аабхааяа бабхааяа ж̇од̇анд̇ийд̇и самб̣анд̇хо.
408. Tasmiṃ mayhaṃ pātubhūtavimāne aññepi niyyūhā pamukhasālāyo santi vijjanti. Kiṃ bhūtā? Lohitaṅgamayā rattamaṇimayā tadā tepi niyyūhā catasso disā ābhāya pabhāya jotantīti sambandho.
410. саб̣б̣з д̣̇звз сагалачад̣̇звалогз д̣̇звз абхибхоми абхибхаваами. гасса паланд̇и жз? маяаа гад̇асса бун̃н̃агаммасса ид̣̇ам̣ паланд̇и ад̇т̇о.
410.Sabbedeve sakalachadevaloke deve abhibhomi abhibhavāmi. Kassa phalanti ce? Mayā katassa puññakammassa idaṃ phalanti attho.
411. д̇ад̇о мануссасамбад̇д̇им̣ д̣̇ассзнд̇о садтигаббасахассамхийд̇иаад̣̇имааха. д̇ад̇т̇а ид̇о габбад̇о хздтаа садтисахассагаббамад̇т̇агз жаад̇уранд̇о жад̇умахаад̣̇ийбаванд̇о виж̇ид̇аавий саб̣б̣ам̣ бажжад̇т̇игам̣ виж̇ид̇аванд̇о ахам̣ уб̣б̣ид̣̇д̇хо наама жаггавад̇д̇ий рааж̇аа худ̇ваа бат̇авим̣ аавасим̣ раж̇ж̇ам̣ гаарзсинд̇и самб̣анд̇хо.
411. Tato manussasampattiṃ dassento saṭṭhikappasahassamhītiādimāha. Tattha ito kappato heṭṭhā saṭṭhisahassakappamatthake cāturanto catumahādīpavanto vijitāvī sabbaṃ paccatthikaṃ vijitavanto ahaṃ ubbiddho nāma cakkavattī rājā hutvā pathaviṃ āvasiṃ rajjaṃ kāresinti sambandho.
412-4. д̇ат̇зва бхад̣̇д̣̇агз габбзд̇и бан̃жаб̣уд̣̇д̇хабадиман̣д̣ид̇ад̇д̇аа бхад̣̇д̣̇агз наама габбз. д̇им̣сагкад̇д̇ум̣ д̇им̣саж̇аад̇ияаа жад̇уд̣̇ийбамхи иссаро бад̇хаано жаггарад̇анаад̣̇ийхи сад̇д̇ахи рад̇анзхи самбанно саман̇г̇ийбхууд̇о сагагаммаабхирад̣̇д̇хо ад̇д̇ано гаммз д̣̇аса рааж̇ад̇хаммз абхирад̣̇д̇хо аллийно жаггавад̇д̇ий рааж̇аа амхий ахосинд̇и самб̣анд̇хо. ад̇д̇ано жаггавад̇д̇игаалз анубхууд̇асамбад̇д̇им̣ д̣̇ассзнд̇о ‘‘д̇ад̇т̇ааби бхаванам̣ маяха’’нд̇иаад̣̇имааха. д̇ад̇т̇а д̇асмим̣ жаггавад̇д̇ираж̇ж̇амхи маяхам̣ бхаванам̣ мама баасаад̣̇ам̣ инд̣̇аладтийва уг̇г̇ад̇ам̣ аагаасз тид̇авиж̇ж̇од̇амаанаа виж̇ж̇уллад̇аа ива уг̇г̇ад̇ам̣ сад̇д̇абхуумигаад̣̇ибхзд̣̇зхи ужжам̣ ааяаамад̇о д̣̇ийгхад̇о жа ужжад̇о жа жад̇увийсад̇ияож̇анам̣ вид̇т̇аарад̇о д̣̇ваад̣̇асаяож̇анам̣ ахосийд̇и самб̣анд̇хо. саб̣б̣зсам̣ ж̇анаанам̣ манам̣ аллийнабхаавзна рамман̣ам̣ наама наг̇арам̣ ахосийд̇и ад̇т̇о. д̣̇ал̣хзхи д̣̇ваад̣̇асахад̇т̇зхи ваа д̇им̣сахад̇т̇зхи ваа ужжзхи баагаарад̇оран̣зхи самбаннанд̇и д̣̇ассзд̇и.
412-4.Tatheva bhaddake kappeti pañcabuddhapaṭimaṇḍitattā bhaddake nāma kappe. Tiṃsakkhattuṃ tiṃsajātiyā catudīpamhi issaro padhāno cakkaratanādīhi sattahi ratanehi sampanno samaṅgībhūto sakakammābhiraddho attano kamme dasa rājadhamme abhiraddho allīno cakkavattī rājā amhī ahosinti sambandho. Attano cakkavattikāle anubhūtasampattiṃ dassento ‘‘tatthāpi bhavanaṃ mayha’’ntiādimāha. Tattha tasmiṃ cakkavattirajjamhi mayhaṃ bhavanaṃ mama pāsādaṃ indalaṭṭhīva uggataṃ ākāse ṭhitavijjotamānā vijjullatā iva uggataṃ sattabhūmikādibhedehi uccaṃ āyāmato dīghato ca uccato ca catuvīsatiyojanaṃ vitthārato dvādasayojanaṃ ahosīti sambandho. Sabbesaṃ janānaṃ manaṃ allīnabhāvena rammaṇaṃ nāma nagaraṃ ahosīti attho. Daḷhehi dvādasahatthehi vā tiṃsahatthehi vā uccehi pākāratoraṇehi sampannanti dasseti.
415-20. д̇ад̣̇ад̣дхагам̣ д̇ад̇о ад̣дхагам̣ ад̣дхад̇ияасад̇аяож̇ананд̇и ад̇т̇о. багкид̇д̇аа бан̣н̣авийсад̇ийд̇и вийсад̇иаабан̣абагкид̇д̇ам̣ ниранд̇арам̣ вийт̇ибарижчзд̣̇анд̇и ад̇т̇о. б̣раахман̃н̃агуласамбхууд̇од̇и б̣раахман̣агулз суж̇аад̇о. сзсам̣ вуд̇д̇анаяад̇д̇аа сувин̃н̃зяяамзваад̇и.
415-20.Tadaḍḍhakaṃ tato aḍḍhakaṃ aḍḍhatiyasatayojananti attho. Pakkhittā paṇṇavīsatīti vīsatiāpaṇapakkhittaṃ nirantaraṃ vīthiparicchedanti attho. Brāhmaññakulasambhūtoti brāhmaṇakule sujāto. Sesaṃ vuttanayattā suviññeyyamevāti.
махаагассабад̇т̇зраабад̣̇аанаван̣н̣анаа самад̇д̇аа.
Mahākassapattheraapadānavaṇṇanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / абад̣̇аанабаал̣и • Apadānapāḷi / 3-3. махаагассабад̇т̇зраабад̣̇аанам̣ • 3-3. Mahākassapattheraapadānaṃ
