Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā

    ১৮. চত্তালীসনিপাতো

    18. Cattālīsanipāto

    ১. মহাকস্সপত্থেরগাথাৰণ্ণনা

    1. Mahākassapattheragāthāvaṇṇanā

    চত্তালীসনিপাতে ন গণেন পুরক্খতোতিআদিকা আযস্মতো মহাকস্সপত্থেরস্স গাথা। কা উপ্পত্তি? অযং কির পদুমুত্তরস্স ভগৰতো কালে হংসৰতীনগরে ৰেদেহো নাম অসীতিকোটিৰিভৰো কুটুম্বিকো অহোসি। সো বুদ্ধমামকো, ধম্মমামকো, সঙ্ঘমামকো উপাসকো হুত্ৰা ৰিহরন্তো একস্মিং উপোসথদিৰসে পাতোৰ সুভোজনং ভুঞ্জিত্ৰা উপোসথঙ্গানি অধিট্ঠায গন্ধপুপ্ফাদীনি গহেত্ৰা ৰিহারং গন্ত্ৰা সত্থারং পূজেত্ৰা ৰন্দিত্ৰা একমন্তং নিসীদি।

    Cattālīsanipāte na gaṇena purakkhatotiādikā āyasmato mahākassapattherassa gāthā. Kā uppatti? Ayaṃ kira padumuttarassa bhagavato kāle haṃsavatīnagare vedeho nāma asītikoṭivibhavo kuṭumbiko ahosi. So buddhamāmako, dhammamāmako, saṅghamāmako upāsako hutvā viharanto ekasmiṃ uposathadivase pātova subhojanaṃ bhuñjitvā uposathaṅgāni adhiṭṭhāya gandhapupphādīni gahetvā vihāraṃ gantvā satthāraṃ pūjetvā vanditvā ekamantaṃ nisīdi.

    তস্মিঞ্চ খণে সত্থা মহানিসভত্থেরং নাম ততিযসাৰকং ‘‘এতদগ্গং, ভিক্খৰে, মম সাৰকানং ভিক্খূনং ধুতৰাদানং, যদিদং নিসভো’’তি এতদগ্গে ঠপেসি। উপাসকো তং সুত্ৰা পসন্নো ধম্মকথাৰসানে মহাজনে উট্ঠায গতে সত্থারং ৰন্দিত্ৰা ‘‘স্ৰে ময্হং ভিক্খং অধিৰাসেথা’’তি নিমন্তেসি। ‘‘মহা খো, উপাসক , ভিক্খুসঙ্ঘো’’তি। ‘‘কিত্তকো, ভন্তে’’তি? ‘‘অট্ঠসট্ঠিভিক্খুসতসহস্স’’ন্তি। ‘‘ভন্তে, একং সামণেরম্পি ৰিহারে অসেসেত্ৰা ময্হং ভিক্খং অধিৰাসেথা’’তি। সত্থা অধিৰাসেসি। উপাসকো সত্থু অধিৰাসনং ৰিদিত্ৰা গেহং গন্ত্ৰা মহাদানং সজ্জেত্ৰা পুনদিৰসে সত্থু কালং আরোচাপেসি। সত্থা পত্তচীৰরমাদায ভিক্খুসঙ্ঘপরিৰুতো উপাসকস্স ঘরং গন্ত্ৰা পঞ্ঞত্তাসনে নিসিন্নো দক্খিণোদকাৰসানে যাগুআদীনি সম্পটিচ্ছন্তো ভত্তৰিস্সগ্গং অকাসি। উপাসকোপি সত্থু সন্তিকে নিসীদি।

    Tasmiñca khaṇe satthā mahānisabhattheraṃ nāma tatiyasāvakaṃ ‘‘etadaggaṃ, bhikkhave, mama sāvakānaṃ bhikkhūnaṃ dhutavādānaṃ, yadidaṃ nisabho’’ti etadagge ṭhapesi. Upāsako taṃ sutvā pasanno dhammakathāvasāne mahājane uṭṭhāya gate satthāraṃ vanditvā ‘‘sve mayhaṃ bhikkhaṃ adhivāsethā’’ti nimantesi. ‘‘Mahā kho, upāsaka , bhikkhusaṅgho’’ti. ‘‘Kittako, bhante’’ti? ‘‘Aṭṭhasaṭṭhibhikkhusatasahassa’’nti. ‘‘Bhante, ekaṃ sāmaṇerampi vihāre asesetvā mayhaṃ bhikkhaṃ adhivāsethā’’ti. Satthā adhivāsesi. Upāsako satthu adhivāsanaṃ viditvā gehaṃ gantvā mahādānaṃ sajjetvā punadivase satthu kālaṃ ārocāpesi. Satthā pattacīvaramādāya bhikkhusaṅghaparivuto upāsakassa gharaṃ gantvā paññattāsane nisinno dakkhiṇodakāvasāne yāguādīni sampaṭicchanto bhattavissaggaṃ akāsi. Upāsakopi satthu santike nisīdi.

    তস্মিং অন্তরে মহানিসভত্থেরো পিণ্ডায চরন্তো তমেৰ ৰীথিং পটিপজ্জি। উপাসকো দিস্ৰা উট্ঠায গন্ত্ৰা থেরং ৰন্দিত্ৰা ‘‘পত্তং, ভন্তে, দেথা’’তি আহ। থেরো পত্তং অদাসি। ‘‘ভন্তে, ইধেৰ পৰিসথ, সত্থাপি গেহে নিসিন্নো’’তি। ‘‘ন ৰট্টিস্সতি, উপাসকা’’তি। সো থেরস্স পত্তং গহেত্ৰা পিণ্ডপাতস্স পূরেত্ৰা অদাসি। ততো থেরং অনুগন্ত্ৰা নিৰত্তো সত্থু সন্তিকে নিসীদিত্ৰা এৰমাহ – ‘‘মহানিসভত্থেরো, ভন্তে, ‘সত্থাপি গেহে নিসিন্নো’তি ৰুত্তেপি পৰিসিতুং ন ইচ্ছি, অত্থি নু খো এতস্স তুম্হাকং গুণেহি অতিরেকগুণো’’তি। বুদ্ধানঞ্চ ৰণ্ণমচ্ছেরং নাম নত্থি, তস্মা সত্থা এৰমাহ – ‘‘উপাসক, মযং ভিক্খং আগমযমানা গেহে নিসীদাম, সো পন ভিক্খু ন এৰং নিসীদিত্ৰা ভিক্খং উদিক্খতি, মযং গামন্তসেনাসনে ৰসাম, সো অরঞ্ঞস্মিংযেৰ ৰসতি, মযং ছন্নে ৰসাম, সো অব্ভোকাসেযেৰ ৰসতী’’তি ভগৰা ‘‘অযঞ্চ অযঞ্চেতস্স গুণো’’তি মহাসমুদ্দং পূরযমানো ৰিয তস্স গুণং কথেসি।

    Tasmiṃ antare mahānisabhatthero piṇḍāya caranto tameva vīthiṃ paṭipajji. Upāsako disvā uṭṭhāya gantvā theraṃ vanditvā ‘‘pattaṃ, bhante, dethā’’ti āha. Thero pattaṃ adāsi. ‘‘Bhante, idheva pavisatha, satthāpi gehe nisinno’’ti. ‘‘Na vaṭṭissati, upāsakā’’ti. So therassa pattaṃ gahetvā piṇḍapātassa pūretvā adāsi. Tato theraṃ anugantvā nivatto satthu santike nisīditvā evamāha – ‘‘mahānisabhatthero, bhante, ‘satthāpi gehe nisinno’ti vuttepi pavisituṃ na icchi, atthi nu kho etassa tumhākaṃ guṇehi atirekaguṇo’’ti. Buddhānañca vaṇṇamaccheraṃ nāma natthi, tasmā satthā evamāha – ‘‘upāsaka, mayaṃ bhikkhaṃ āgamayamānā gehe nisīdāma, so pana bhikkhu na evaṃ nisīditvā bhikkhaṃ udikkhati, mayaṃ gāmantasenāsane vasāma, so araññasmiṃyeva vasati, mayaṃ channe vasāma, so abbhokāseyeva vasatī’’ti bhagavā ‘‘ayañca ayañcetassa guṇo’’ti mahāsamuddaṃ pūrayamāno viya tassa guṇaṃ kathesi.

    উপাসকো পকতিযাপি জলমানপদীপো তেলেন আসিত্তো ৰিয সুট্ঠুতরং পসন্নো হুত্ৰা চিন্তেসি – ‘‘কিং ময্হং অঞ্ঞায সম্পত্তিযা, অনাগতে একস্স বুদ্ধস্স সন্তিকে ধুতৰাদানং অগ্গভাৰত্থায পত্থনং করিস্সামী’’তি। সো পুনপি সত্থারং নিমন্তেত্ৰা তেনেৰ নিযামেন সত্ত দিৰসে মহাদানং দত্ৰা সত্তমে দিৰসে বুদ্ধপ্পমুখস্স মহাভিক্খুসঙ্ঘস্স তিচীৰরানি দত্ৰা সত্থু পাদমূলে নিপজ্জিত্ৰা এৰমাহ – ‘‘যং মে, ভন্তে, সত্ত দিৰসে দানং দেন্তস্স মেত্তং কাযকম্মং, মেত্তং ৰচীকম্মং, মেত্তং মনোকম্মং পচ্চুপট্ঠিতং, ইমিনাহং ন অঞ্ঞং দেৰসম্পত্তিং ৰা সক্কমারব্রহ্মসম্পত্তিং ৰা পত্থেমি, ইদং পন মে কম্মং অনাগতে একস্স বুদ্ধস্স সন্তিকে মহানিসভত্থেরেন পত্তট্ঠানন্তরং পাপুণনত্থায তেরসধুতঙ্গধরানং অগ্গভাৰস্স অধিকারো হোতূ’’তি। সত্থা ‘‘মহন্তং ঠানং ইমিনা পত্থিতং, সমিজ্ঝিস্সতি নু খো, নো’’তি ওলোকেন্তো সমিজ্ঝনভাৰং দিস্ৰা আহ – ‘‘মনাপং তে ঠানং পত্থিতং, অনাগতে সতসহস্সকপ্পাৰসানে গোতমো নাম বুদ্ধো উপ্পজ্জিস্সতি , তস্স ত্ৰং ততিযসাৰকো মহাকস্সপত্থেরো নাম ভৰিস্সসী’’তি ব্যাকাসি। তং সুত্ৰা উপাসকো ‘‘বুদ্ধানং দ্ৰে কথা নাম নত্থী’’তি পুনদিৰসে পত্তব্বং ৰিয তং সম্পত্তিং অমঞ্ঞিত্থ। সো যাৰতাযুকং দানং দত্ৰা, সীলং সমাদায রক্খিত্ৰা, নানপ্পকারং কল্যাণকম্মং কত্ৰা, কালং কত্ৰা, সগ্গে নিব্বত্তি।

    Upāsako pakatiyāpi jalamānapadīpo telena āsitto viya suṭṭhutaraṃ pasanno hutvā cintesi – ‘‘kiṃ mayhaṃ aññāya sampattiyā, anāgate ekassa buddhassa santike dhutavādānaṃ aggabhāvatthāya patthanaṃ karissāmī’’ti. So punapi satthāraṃ nimantetvā teneva niyāmena satta divase mahādānaṃ datvā sattame divase buddhappamukhassa mahābhikkhusaṅghassa ticīvarāni datvā satthu pādamūle nipajjitvā evamāha – ‘‘yaṃ me, bhante, satta divase dānaṃ dentassa mettaṃ kāyakammaṃ, mettaṃ vacīkammaṃ, mettaṃ manokammaṃ paccupaṭṭhitaṃ, imināhaṃ na aññaṃ devasampattiṃ vā sakkamārabrahmasampattiṃ vā patthemi, idaṃ pana me kammaṃ anāgate ekassa buddhassa santike mahānisabhattherena pattaṭṭhānantaraṃ pāpuṇanatthāya terasadhutaṅgadharānaṃ aggabhāvassa adhikāro hotū’’ti. Satthā ‘‘mahantaṃ ṭhānaṃ iminā patthitaṃ, samijjhissati nu kho, no’’ti olokento samijjhanabhāvaṃ disvā āha – ‘‘manāpaṃ te ṭhānaṃ patthitaṃ, anāgate satasahassakappāvasāne gotamo nāma buddho uppajjissati , tassa tvaṃ tatiyasāvako mahākassapatthero nāma bhavissasī’’ti byākāsi. Taṃ sutvā upāsako ‘‘buddhānaṃ dve kathā nāma natthī’’ti punadivase pattabbaṃ viya taṃ sampattiṃ amaññittha. So yāvatāyukaṃ dānaṃ datvā, sīlaṃ samādāya rakkhitvā, nānappakāraṃ kalyāṇakammaṃ katvā, kālaṃ katvā, sagge nibbatti.

    ততো পট্ঠায দেৰমনুস্সেসু সম্পত্তিং অনুভৰন্তো ইতো একনৰুতে কপ্পে ৰিপস্সিসম্মাসম্বুদ্ধে বন্ধুমতীনগরং উপনিস্সায খেমে মিগদাযে ৰিহরন্তে দেৰলোকা চৰিত্ৰা অঞ্ঞতরস্মিং পরিজিণ্ণব্রাহ্মণকুলে নিব্বত্তি। তস্মিঞ্চ কালে ৰিপস্সী ভগৰা সত্তমে সত্তমে সংৰচ্ছরে ধম্মং কথেসি, মহন্তং কোলাহলং হোতি। সকলজম্বুদীপে দেৰতা ‘‘সত্থা ধম্মং কথেস্সতী’’তি আরোচেসুং। ব্রাহ্মণো তং সাসনং অস্সোসি । তস্স চ নিৰাসনসাটকো একোযেৰ হোতি, তথা ব্রাহ্মণিযা। পারুপনং পন দ্ৰিন্নম্পি একমেৰ। সো সকলনগরে ‘‘একসাটকব্রাহ্মণো’’তি পঞ্ঞাযি। সো ব্রাহ্মণানং কেনচিদেৰ কিচ্চেন সন্নিপাতে সতি ব্রাহ্মণিং গেহে ঠপেত্ৰা সযং তং ৰত্থং পারুপিত্ৰা গচ্ছতি। ব্রাহ্মণীনং সন্নিপাতে সতি সযং গেহে অচ্ছতি, ব্রাহ্মণী তং ৰত্থং পারুপিত্ৰা গচ্ছতি। তস্মিং পন দিৰসে ব্রাহ্মণো ব্রাহ্মণিং আহ – ‘‘ভোতি, কিং রত্তিং ধম্মং সুণিস্সসি, দিৰা’’তি? ‘‘মযং মাতুগামজাতিকা নাম রত্তিং সোতুং ন সক্কোম, দিৰা সোস্সামা’’তি ব্রাহ্মণং গেহে ঠপেত্ৰা তং ৰত্থং পারুপিত্ৰা উপাসিকাহি সদ্ধিং দিৰা গন্ত্ৰা সত্থারং ৰন্দিত্ৰা একমন্তে নিসিন্না ধম্মং সুত্ৰা উপাসিকাহিযেৰ সদ্ধিং আগমাসি। অথ ব্রাহ্মণো ব্রাহ্মণিং গেহে ঠপেত্ৰা তং ৰত্থং পারুপিত্ৰা ৰিহারং গতো।

    Tato paṭṭhāya devamanussesu sampattiṃ anubhavanto ito ekanavute kappe vipassisammāsambuddhe bandhumatīnagaraṃ upanissāya kheme migadāye viharante devalokā cavitvā aññatarasmiṃ parijiṇṇabrāhmaṇakule nibbatti. Tasmiñca kāle vipassī bhagavā sattame sattame saṃvacchare dhammaṃ kathesi, mahantaṃ kolāhalaṃ hoti. Sakalajambudīpe devatā ‘‘satthā dhammaṃ kathessatī’’ti ārocesuṃ. Brāhmaṇo taṃ sāsanaṃ assosi . Tassa ca nivāsanasāṭako ekoyeva hoti, tathā brāhmaṇiyā. Pārupanaṃ pana dvinnampi ekameva. So sakalanagare ‘‘ekasāṭakabrāhmaṇo’’ti paññāyi. So brāhmaṇānaṃ kenacideva kiccena sannipāte sati brāhmaṇiṃ gehe ṭhapetvā sayaṃ taṃ vatthaṃ pārupitvā gacchati. Brāhmaṇīnaṃ sannipāte sati sayaṃ gehe acchati, brāhmaṇī taṃ vatthaṃ pārupitvā gacchati. Tasmiṃ pana divase brāhmaṇo brāhmaṇiṃ āha – ‘‘bhoti, kiṃ rattiṃ dhammaṃ suṇissasi, divā’’ti? ‘‘Mayaṃ mātugāmajātikā nāma rattiṃ sotuṃ na sakkoma, divā sossāmā’’ti brāhmaṇaṃ gehe ṭhapetvā taṃ vatthaṃ pārupitvā upāsikāhi saddhiṃ divā gantvā satthāraṃ vanditvā ekamante nisinnā dhammaṃ sutvā upāsikāhiyeva saddhiṃ āgamāsi. Atha brāhmaṇo brāhmaṇiṃ gehe ṭhapetvā taṃ vatthaṃ pārupitvā vihāraṃ gato.

    তস্মিং সমযে সত্থা পরিসমজ্ঝে অলঙ্কতধম্মাসনে নিসিন্নো চিত্তবীজনিং আদায আকাসগঙ্গং ওতারেন্তো ৰিয, সিনেরুং মন্থং কত্ৰা সাগরং নিম্মথেন্তো ৰিয, ধম্মকথং কথেসি। ব্রাহ্মণস্স পরিসপরিযন্তে নিসিন্নস্স ধম্মং সুণন্তস্স পঠমযামস্মিংযেৰ সকলসরীরং পূরযমানা পঞ্চৰণ্ণা পীতি উপ্পজ্জি। সো পারুতৰত্থং সঙ্ঘরিত্ৰা ‘‘দসবলস্স দস্সামী’’তি চিন্তেসি। অথস্স আদীনৰসহস্সং দস্সযমানং মচ্ছেরং উপ্পজ্জি। সো ‘‘ব্রাহ্মণিযা ময্হঞ্চ একমেৰ ৰত্থং, অঞ্ঞং কিঞ্চি পারুপনং নত্থি, অপারুপিত্ৰা চ নাম বহি ৰিচরিতুং ন সক্কা’’তি সব্বথাপি অদাতুকামো অহোসি, অথস্স নিক্খন্তে পঠমযামে মজ্ঝিমযামেপি তথেৰ পীতি উপ্পজ্জি। তথেৰ চিন্তেত্ৰা তথেৰ অদাতুকামো অহোসি। অথস্স মজ্ঝিমযামে নিক্খন্তে পচ্ছিমযামেপি তথেৰ পীতি উপ্পজ্জি। তদা সো ‘‘যং ৰা হোতু তং ৰা পচ্ছাপি জানিস্সামী’’তি ৰত্থং সঙ্ঘরিত্ৰা সত্থু পাদমূলে ঠপেসি। ততো ৰামহত্থং আভুজিত্ৰা দক্খিণেন হত্থেন তিক্খত্তুং অপ্ফোটেত্ৰা ‘‘জিতং মে, জিতং মে’’তি তযো ৰারে নদি।

    Tasmiṃ samaye satthā parisamajjhe alaṅkatadhammāsane nisinno cittabījaniṃ ādāya ākāsagaṅgaṃ otārento viya, sineruṃ manthaṃ katvā sāgaraṃ nimmathento viya, dhammakathaṃ kathesi. Brāhmaṇassa parisapariyante nisinnassa dhammaṃ suṇantassa paṭhamayāmasmiṃyeva sakalasarīraṃ pūrayamānā pañcavaṇṇā pīti uppajji. So pārutavatthaṃ saṅgharitvā ‘‘dasabalassa dassāmī’’ti cintesi. Athassa ādīnavasahassaṃ dassayamānaṃ maccheraṃ uppajji. So ‘‘brāhmaṇiyā mayhañca ekameva vatthaṃ, aññaṃ kiñci pārupanaṃ natthi, apārupitvā ca nāma bahi vicarituṃ na sakkā’’ti sabbathāpi adātukāmo ahosi, athassa nikkhante paṭhamayāme majjhimayāmepi tatheva pīti uppajji. Tatheva cintetvā tatheva adātukāmo ahosi. Athassa majjhimayāme nikkhante pacchimayāmepi tatheva pīti uppajji. Tadā so ‘‘yaṃ vā hotu taṃ vā pacchāpi jānissāmī’’ti vatthaṃ saṅgharitvā satthu pādamūle ṭhapesi. Tato vāmahatthaṃ ābhujitvā dakkhiṇena hatthena tikkhattuṃ apphoṭetvā ‘‘jitaṃ me, jitaṃ me’’ti tayo vāre nadi.

    তস্মিঞ্চ সমযে বন্ধুমরাজা ধম্মাসনস্স পচ্ছতো অন্তোসাণিযং নিসিন্নো ধম্মং সুণাতি। রঞ্ঞো চ নাম ‘‘জিতং মে’’তি সদ্দো অমনাপো হোতি । সো পুরিসং পেসেসি – ‘‘গচ্ছ, এতং পুচ্ছ কিং ৰদসী’’তি। সো তেন গন্ত্ৰা পুচ্ছিতো ‘‘অৰসেসা হত্থিযানাদীনি আরুয্হ অসিচম্মাদীনি গহেত্ৰা পরসেনং জিনন্তি, ন তং অচ্ছরিযং। অহং পন পচ্ছতো আগচ্ছন্তস্স কূটগোণস্স মুগ্গরেন সীসং ভিন্দিত্ৰা তং পলাপেন্তো ৰিয মচ্ছেরচিত্তং মদ্দিত্ৰা পারুতৰত্থং দসবলস্স অদাসিং, তং মে মচ্ছরিযং জিত’’ন্তি আহ। সো পুরিসো আগন্ত্ৰা তং পৰত্তিং রঞ্ঞো আরোচেসি। রাজা আহ – ‘‘অম্হে, ভণে, দসবলস্স অনুরূপং ন জানিম্হ, ব্রাহ্মণো জানী’’তি ৰত্থযুগং পেসেসি। তং দিস্ৰা ব্রাহ্মণো চিন্তেসি – ‘‘অযং ময্হং তুণ্হীনিসিন্নস্স পঠমং কিঞ্চি অদত্ৰা সত্থু গুণে কথেন্তস্স অদাসি। সত্থু গুণে পটিচ্চ উপ্পন্নেন পন ময্হং কো অত্থো’’তি তম্পি ৰত্থযুগং দসবলস্সেৰ অদাসি। রাজাপি ‘‘কিং ব্রাহ্মণেন কত’’ন্তি পুচ্ছিত্ৰা ‘‘তম্পি তেন ৰত্থযুগং তথাগতস্সেৰ দিন্ন’’ন্তি সুত্ৰা অঞ্ঞানিপি দ্ৰে ৰত্থযুগানি পেসেসি, সো তানিপি অদাসি। রাজা অঞ্ঞানিপি চত্তারীতি এৰং যাৰ দ্ৰত্তিংসৰত্থযুগানি পেসেসি। অথ ব্রাহ্মণো ‘‘ইদং ৰড্ঢেত্ৰা ৰড্ঢেত্ৰা গহণং ৰিয হোতী’’তি অত্তনো অত্থায একং, ব্রাহ্মণিযা একন্তি দ্ৰে ৰত্থযুগানি গহেত্ৰা তিংসযুগানি তথাগতস্সেৰ অদাসি। ততো পট্ঠায চ সো সত্থু ৰিস্সাসিকো জাতো।

    Tasmiñca samaye bandhumarājā dhammāsanassa pacchato antosāṇiyaṃ nisinno dhammaṃ suṇāti. Rañño ca nāma ‘‘jitaṃ me’’ti saddo amanāpo hoti . So purisaṃ pesesi – ‘‘gaccha, etaṃ puccha kiṃ vadasī’’ti. So tena gantvā pucchito ‘‘avasesā hatthiyānādīni āruyha asicammādīni gahetvā parasenaṃ jinanti, na taṃ acchariyaṃ. Ahaṃ pana pacchato āgacchantassa kūṭagoṇassa muggarena sīsaṃ bhinditvā taṃ palāpento viya maccheracittaṃ madditvā pārutavatthaṃ dasabalassa adāsiṃ, taṃ me macchariyaṃ jita’’nti āha. So puriso āgantvā taṃ pavattiṃ rañño ārocesi. Rājā āha – ‘‘amhe, bhaṇe, dasabalassa anurūpaṃ na jānimha, brāhmaṇo jānī’’ti vatthayugaṃ pesesi. Taṃ disvā brāhmaṇo cintesi – ‘‘ayaṃ mayhaṃ tuṇhīnisinnassa paṭhamaṃ kiñci adatvā satthu guṇe kathentassa adāsi. Satthu guṇe paṭicca uppannena pana mayhaṃ ko attho’’ti tampi vatthayugaṃ dasabalasseva adāsi. Rājāpi ‘‘kiṃ brāhmaṇena kata’’nti pucchitvā ‘‘tampi tena vatthayugaṃ tathāgatasseva dinna’’nti sutvā aññānipi dve vatthayugāni pesesi, so tānipi adāsi. Rājā aññānipi cattārīti evaṃ yāva dvattiṃsavatthayugāni pesesi. Atha brāhmaṇo ‘‘idaṃ vaḍḍhetvā vaḍḍhetvā gahaṇaṃ viya hotī’’ti attano atthāya ekaṃ, brāhmaṇiyā ekanti dve vatthayugāni gahetvā tiṃsayugāni tathāgatasseva adāsi. Tato paṭṭhāya ca so satthu vissāsiko jāto.

    অথ নং রাজা একদিৰসং সীতসমযে সত্থু সন্তিকে ধম্মং সুণন্তং দিস্ৰা সতসহস্সগ্ঘনকং অত্তনা পারুতরত্তকম্বলং দত্ৰা আহ – ‘‘ইতো পট্ঠায ইমং পারুপিত্ৰা ধম্মং সুণাহী’’তি। সো ‘‘কিং মে ইমিনা কম্বলেন ইমস্মিং পূতিকাযে উপনীতেনা’’তি চিন্তেত্ৰা অন্তোগন্ধকুটিযং তথাগতস্স মঞ্চস্স উপরি ৰিতানং কত্ৰা অগমাসি। অথেকদিৰসং রাজা পাতোৰ ৰিহারং গন্ত্ৰা অন্তোগন্ধকুটিযং সত্থু সন্তিকে নিসীদি। তস্মিঞ্চ সমযে ছব্বণ্ণা বুদ্ধরস্মিযো কম্বলে পটিহঞ্ঞন্তি, কম্বলো অতিৰিয ৰিরোচতি। রাজা উল্লোকেন্তো সঞ্জানিত্ৰা আহ – ‘‘অম্হাকং, ভন্তে, এস কম্বলো, অম্হেহি একসাটকব্রাহ্মণস্স দিন্নো’’তি। ‘‘তুম্হেহি, মহারাজ, ব্রাহ্মণো পূজিতো, ব্রাহ্মণেন মযং পূজিতা’’তি। রাজা ‘‘ব্রাহ্মণো যুত্তং অঞ্ঞাসি, ন ময’’ন্তি পসীদিত্ৰা যং মনুস্সানং উপকারভূতং, তং সব্বং অট্ঠট্ঠকং কত্ৰা সব্বট্ঠকং নাম দানং দত্ৰা পুরোহিতট্ঠানে ঠপেসি। সোপি ‘‘অট্ঠট্ঠকং নাল চতুসট্ঠি হোতী’’তি চতুসট্ঠি সলাকভত্তানি উপনিবন্ধাপেত্ৰা যাৰজীৰং দানং দত্ৰা সীলং রক্খিত্ৰা ততো চুতো সগ্গে নিব্বত্তি।

    Atha naṃ rājā ekadivasaṃ sītasamaye satthu santike dhammaṃ suṇantaṃ disvā satasahassagghanakaṃ attanā pārutarattakambalaṃ datvā āha – ‘‘ito paṭṭhāya imaṃ pārupitvā dhammaṃ suṇāhī’’ti. So ‘‘kiṃ me iminā kambalena imasmiṃ pūtikāye upanītenā’’ti cintetvā antogandhakuṭiyaṃ tathāgatassa mañcassa upari vitānaṃ katvā agamāsi. Athekadivasaṃ rājā pātova vihāraṃ gantvā antogandhakuṭiyaṃ satthu santike nisīdi. Tasmiñca samaye chabbaṇṇā buddharasmiyo kambale paṭihaññanti, kambalo ativiya virocati. Rājā ullokento sañjānitvā āha – ‘‘amhākaṃ, bhante, esa kambalo, amhehi ekasāṭakabrāhmaṇassa dinno’’ti. ‘‘Tumhehi, mahārāja, brāhmaṇo pūjito, brāhmaṇena mayaṃ pūjitā’’ti. Rājā ‘‘brāhmaṇo yuttaṃ aññāsi, na maya’’nti pasīditvā yaṃ manussānaṃ upakārabhūtaṃ, taṃ sabbaṃ aṭṭhaṭṭhakaṃ katvā sabbaṭṭhakaṃ nāma dānaṃ datvā purohitaṭṭhāne ṭhapesi. Sopi ‘‘aṭṭhaṭṭhakaṃ nāla catusaṭṭhi hotī’’ti catusaṭṭhi salākabhattāni upanibandhāpetvā yāvajīvaṃ dānaṃ datvā sīlaṃ rakkhitvā tato cuto sagge nibbatti.

    পুন ততো চুতো ইমস্মিং কপ্পে কোণাগমনস্স চ ভগৰতো কস্সপদসবলস্স চাতি দ্ৰিন্নং বুদ্ধানং অন্তরে বারাণসিযং কুটুম্বিযঘরে নিব্বত্তো। সো ৰুদ্ধিমন্ৰায ঘরাৰাসং ৰসন্তো একদিৰসং অরঞ্ঞে জঙ্ঘৰিহারং চরতি। তস্মিঞ্চ সমযে পচ্চেকবুদ্ধো নদীতীরে চীৰরকম্মং করোন্তো অনুৰাতে অপ্পহোন্তে সঙ্ঘরিত্ৰা ঠপেতুং আরদ্ধো। সো দিস্ৰা ‘‘কস্মা, ভন্তে, সঙ্ঘরিত্ৰা ঠপেথা’’তি আহ। ‘‘অনুৰাতো নপ্পহোতী’’তি। ‘‘ইমিনা, ভন্তে, করোথা’’তি উত্তরসাটকং দত্ৰা ‘‘নিব্বত্তনিব্বত্তট্ঠানে মে কেনচি পরিহানি মা হোতূ’’তি পত্থনং পট্ঠপেসি।

    Puna tato cuto imasmiṃ kappe koṇāgamanassa ca bhagavato kassapadasabalassa cāti dvinnaṃ buddhānaṃ antare bārāṇasiyaṃ kuṭumbiyaghare nibbatto. So vuddhimanvāya gharāvāsaṃ vasanto ekadivasaṃ araññe jaṅghavihāraṃ carati. Tasmiñca samaye paccekabuddho nadītīre cīvarakammaṃ karonto anuvāte appahonte saṅgharitvā ṭhapetuṃ āraddho. So disvā ‘‘kasmā, bhante, saṅgharitvā ṭhapethā’’ti āha. ‘‘Anuvāto nappahotī’’ti. ‘‘Iminā, bhante, karothā’’ti uttarasāṭakaṃ datvā ‘‘nibbattanibbattaṭṭhāne me kenaci parihāni mā hotū’’ti patthanaṃ paṭṭhapesi.

    ঘরেপিস্স ভগিনিযা সদ্ধিং ভরিযায কলহং করোন্তিযা পচ্চেকবুদ্ধো পিণ্ডায পাৰিসি। অথস্স ভগিনী পচ্চেকবুদ্ধস্স পিণ্ডপাতং দত্ৰা তস্স ভরিযং সন্ধায ‘‘এৰরূপং বালং যোজনসতেন পরিৰজ্জেয্য’’ন্তি পত্থনং পট্ঠপেসি। সা গেহঙ্গণে ঠিতা সুত্ৰা ‘‘ইমায দিন্নভত্তং মা এস ভুঞ্জতূ’’তি পত্তং গহেত্ৰা পিণ্ডপাতং ছড্ডেত্ৰা কললস্স পূরেত্ৰা অদাসি। ইতরা দিস্ৰা ‘‘বালে, ত্ৰং মং তাৰ অক্কোস ৰা পহর ৰা, এৰরূপস্স পন দ্ৰে অসঙ্খ্যেয্যানি পূরিতপারমিস্স পত্ততো ভত্তং ছড্ডেত্ৰা কললং দাতুং ন যুত্ত’’ন্তি আহ। অথস্স ভরিযায পটিসঙ্খানং উপ্পজ্জি। সা ‘‘তিট্ঠথ, ভন্তে’’তি কললং ছড্ডেত্ৰা পত্তং ধোৰিত্ৰা গন্ধচুণ্ণেন । উব্বট্টেত্ৰা পণীতভত্তস্স চতুমধুরস্স চ পূরেত্ৰা উপরি আসিত্তেন পদুমগব্ভৰণ্ণেন সপ্পিনা ৰিজ্জোতমানং পচ্চেকবুদ্ধস্স হত্থে ঠপেত্ৰা ‘‘যথা অযং পিণ্ডপাতো ওভাসজাতো, এৰং ওভাসজাতং মে সরীরং হোতূ’’তি পত্থনং পট্ঠপেসি। পচ্চেকবুদ্ধো অনুমোদিত্ৰা আকাসং পক্খন্দি।

    Gharepissa bhaginiyā saddhiṃ bhariyāya kalahaṃ karontiyā paccekabuddho piṇḍāya pāvisi. Athassa bhaginī paccekabuddhassa piṇḍapātaṃ datvā tassa bhariyaṃ sandhāya ‘‘evarūpaṃ bālaṃ yojanasatena parivajjeyya’’nti patthanaṃ paṭṭhapesi. Sā gehaṅgaṇe ṭhitā sutvā ‘‘imāya dinnabhattaṃ mā esa bhuñjatū’’ti pattaṃ gahetvā piṇḍapātaṃ chaḍḍetvā kalalassa pūretvā adāsi. Itarā disvā ‘‘bāle, tvaṃ maṃ tāva akkosa vā pahara vā, evarūpassa pana dve asaṅkhyeyyāni pūritapāramissa pattato bhattaṃ chaḍḍetvā kalalaṃ dātuṃ na yutta’’nti āha. Athassa bhariyāya paṭisaṅkhānaṃ uppajji. Sā ‘‘tiṭṭhatha, bhante’’ti kalalaṃ chaḍḍetvā pattaṃ dhovitvā gandhacuṇṇena . Ubbaṭṭetvā paṇītabhattassa catumadhurassa ca pūretvā upari āsittena padumagabbhavaṇṇena sappinā vijjotamānaṃ paccekabuddhassa hatthe ṭhapetvā ‘‘yathā ayaṃ piṇḍapāto obhāsajāto, evaṃ obhāsajātaṃ me sarīraṃ hotū’’ti patthanaṃ paṭṭhapesi. Paccekabuddho anumoditvā ākāsaṃ pakkhandi.

    তেপি জাযম্পতিকা যাৰতাযুকং কুসলং কত্ৰা সগ্গে নিব্বত্তিত্ৰা পুন ততো চৰিত্ৰা উপাসকো কস্সপসম্মাসম্বুদ্ধকালে বারাণসিযং অসীতিকোটিৰিভৰস্স সেট্ঠিনো পুত্তো হুত্ৰা নিব্বত্তি, ইতরাপি তাদিসস্সেৰ সেট্ঠিনো ধীতা হুত্ৰা নিব্বত্তি। তস্স ৰুদ্ধিপ্পত্তস্স তমেৰ সেট্ঠিধীতরং আনযিংসু। তস্সা পুব্বে অনিট্ঠৰিপাকস্স পাপকম্মস্স আনুভাৰেন পতিকুলং পৰিট্ঠমত্তায উম্মারব্ভন্তরে সকলসরীরং উগ্ঘাটিতৰচ্চকুটি ৰিয দুগ্গন্ধং জাতং। সেট্ঠিকুমারো ‘‘কস্সাযং গন্ধো’’তি পুচ্ছিত্ৰা, ‘‘সেট্ঠিকঞ্ঞাযা’’তি সুত্ৰা, ‘‘নীহরথ, নীহরথা’’তি আভতনিযামেনেৰ কুলঘরং পেসেসি। সা এতেনেৰ নীহারেন সত্তসু ঠানেসু পটিনিৰত্তিতা।

    Tepi jāyampatikā yāvatāyukaṃ kusalaṃ katvā sagge nibbattitvā puna tato cavitvā upāsako kassapasammāsambuddhakāle bārāṇasiyaṃ asītikoṭivibhavassa seṭṭhino putto hutvā nibbatti, itarāpi tādisasseva seṭṭhino dhītā hutvā nibbatti. Tassa vuddhippattassa tameva seṭṭhidhītaraṃ ānayiṃsu. Tassā pubbe aniṭṭhavipākassa pāpakammassa ānubhāvena patikulaṃ paviṭṭhamattāya ummārabbhantare sakalasarīraṃ ugghāṭitavaccakuṭi viya duggandhaṃ jātaṃ. Seṭṭhikumāro ‘‘kassāyaṃ gandho’’ti pucchitvā, ‘‘seṭṭhikaññāyā’’ti sutvā, ‘‘nīharatha, nīharathā’’ti ābhataniyāmeneva kulagharaṃ pesesi. Sā eteneva nīhārena sattasu ṭhānesu paṭinivattitā.

    তেন চ সমযেন কস্সপদসবলো পরিনিব্বাযি। তস্স ঘনকোট্টিমাহি সতসহস্সগ্ঘনিকাহি রত্তসুৰণ্ণিট্ঠকাহি যোজনুব্বেধং চেতিযং আরভিংসু। তস্মিং চেতিযে করীযমানে সা সেট্ঠিধীতা চিন্তেসি – ‘‘অহং সত্তসু ঠানেসু পটিনিৰত্তিতা, কিং মে জীৰিতেনা’’তি অত্তনো আভরণভণ্ডং ভঞ্জাপেত্ৰা সুৰণ্ণিট্ঠকং কারেসি রতনাযতং ৰিদত্থিৰিত্থিন্নং চতুরঙ্গুলুব্বেধং। ততো হরিতালমনোসিলাপিণ্ডং গহেত্ৰা অট্ঠ উপ্পলহত্থকে আদায চেতিযকরণট্ঠানং গতা। তস্মিঞ্চ খণে একা ইট্ঠকাপন্তি পরিক্খিপিত্ৰা আগচ্ছমানা ঘটনিট্ঠকায ঊনা হোতি, সেট্ঠিধীতা ৰড্ঢকিং আহ – ‘‘ইমং ইট্ঠকং এত্থ ঠপেথা’’তি। ‘‘অম্ম, ভদ্দকে কালে আগতাসি, সযমেৰ ঠপেহী’’তি। সা আরুয্হ তেলেন হরিতালমনোসিলাপিণ্ডং যোজেত্ৰা তেন বন্ধনেন ইট্ঠকং পতিট্ঠপেত্ৰা উপরি অট্ঠহি উপ্পলহত্থকেহি পূজং কত্ৰা ৰন্দিত্ৰা ‘‘নিব্বত্তনিব্বত্তট্ঠানে মে কাযতো চন্দনগন্ধো ৰাযতু, মুখতো উপ্পলগন্ধো’’তি পত্থনং কত্ৰা চেতিযং ৰন্দিত্ৰা পদক্খিণং কত্ৰা অগমাসি।

    Tena ca samayena kassapadasabalo parinibbāyi. Tassa ghanakoṭṭimāhi satasahassagghanikāhi rattasuvaṇṇiṭṭhakāhi yojanubbedhaṃ cetiyaṃ ārabhiṃsu. Tasmiṃ cetiye karīyamāne sā seṭṭhidhītā cintesi – ‘‘ahaṃ sattasu ṭhānesu paṭinivattitā, kiṃ me jīvitenā’’ti attano ābharaṇabhaṇḍaṃ bhañjāpetvā suvaṇṇiṭṭhakaṃ kāresi ratanāyataṃ vidatthivitthinnaṃ caturaṅgulubbedhaṃ. Tato haritālamanosilāpiṇḍaṃ gahetvā aṭṭha uppalahatthake ādāya cetiyakaraṇaṭṭhānaṃ gatā. Tasmiñca khaṇe ekā iṭṭhakāpanti parikkhipitvā āgacchamānā ghaṭaniṭṭhakāya ūnā hoti, seṭṭhidhītā vaḍḍhakiṃ āha – ‘‘imaṃ iṭṭhakaṃ ettha ṭhapethā’’ti. ‘‘Amma, bhaddake kāle āgatāsi, sayameva ṭhapehī’’ti. Sā āruyha telena haritālamanosilāpiṇḍaṃ yojetvā tena bandhanena iṭṭhakaṃ patiṭṭhapetvā upari aṭṭhahi uppalahatthakehi pūjaṃ katvā vanditvā ‘‘nibbattanibbattaṭṭhāne me kāyato candanagandho vāyatu, mukhato uppalagandho’’ti patthanaṃ katvā cetiyaṃ vanditvā padakkhiṇaṃ katvā agamāsi.

    অথ তস্মিংযেৰ খণে যস্স সেট্ঠিপুত্তস্স পঠমং গেহং নীতা, তস্স তং আরব্ভ সতি উদপাদি। নগরেপি নক্খত্তং সঙ্ঘুট্ঠং হোতি। সো উপট্ঠাকে আহ – ‘‘তদা ইধ আনীতা সেট্ঠিধীতা অত্থি, কহং সা’’তি? ‘‘কুলগেহে সামী’’তি। ‘‘আনেথ নং, নক্খত্তং কীল়িস্সামা’’তি। তে গন্ত্ৰা তং ৰন্দিত্ৰা ঠিতা ‘‘কিং, তাতা, আগতত্থা’’তি তায পুট্ঠা তং পৰত্তিং আচিক্খিংসু। ‘‘তাতা, মযা আভরণভণ্ডেন চেতিযং পূজিতং, আভরণং মে নত্থী’’তি । তে গন্ত্ৰা সেট্ঠিপুত্তস্স আরোচেসুং। আনেথ নং, পিল়ন্ধনং লভিস্সতীতি। তে আনযিংসু। তস্সা সহ ঘরপৰেসনেন সকলগেহং চন্দনগন্ধো চেৰ নীলুপ্পলগন্ধো চ ৰাযি। সেট্ঠিপুত্তো তং পুচ্ছি – ‘‘পঠমং তৰ সরীরতো দুগ্গন্ধো ৰাযি, ইদানি পন তে সরীরতো চন্দনগন্ধো, মুখতো উপ্পলগন্ধো ৰাযতি। কিং এত’’ন্তি? সা আদিতো পট্ঠায অত্তনা কতকম্মং আরোচেসি। সেট্ঠিপুত্তো ‘‘নিয্যানিকং ৰত বুদ্ধসাসন’’ন্তি পসীদিত্ৰা যোজনিকং সুৰণ্ণচেতিযং কম্বলকঞ্চুকেন পরিক্খিপিত্ৰা তত্থ তত্থ রথচক্কপ্পমাণেহি সুৰণ্ণপদুমেহি অলঙ্করি। তেসং দ্ৰাদসহত্থা ওলম্বকা হোন্তি।

    Atha tasmiṃyeva khaṇe yassa seṭṭhiputtassa paṭhamaṃ gehaṃ nītā, tassa taṃ ārabbha sati udapādi. Nagarepi nakkhattaṃ saṅghuṭṭhaṃ hoti. So upaṭṭhāke āha – ‘‘tadā idha ānītā seṭṭhidhītā atthi, kahaṃ sā’’ti? ‘‘Kulagehe sāmī’’ti. ‘‘Ānetha naṃ, nakkhattaṃ kīḷissāmā’’ti. Te gantvā taṃ vanditvā ṭhitā ‘‘kiṃ, tātā, āgatatthā’’ti tāya puṭṭhā taṃ pavattiṃ ācikkhiṃsu. ‘‘Tātā, mayā ābharaṇabhaṇḍena cetiyaṃ pūjitaṃ, ābharaṇaṃ me natthī’’ti . Te gantvā seṭṭhiputtassa ārocesuṃ. Ānetha naṃ, piḷandhanaṃ labhissatīti. Te ānayiṃsu. Tassā saha gharapavesanena sakalagehaṃ candanagandho ceva nīluppalagandho ca vāyi. Seṭṭhiputto taṃ pucchi – ‘‘paṭhamaṃ tava sarīrato duggandho vāyi, idāni pana te sarīrato candanagandho, mukhato uppalagandho vāyati. Kiṃ eta’’nti? Sā ādito paṭṭhāya attanā katakammaṃ ārocesi. Seṭṭhiputto ‘‘niyyānikaṃ vata buddhasāsana’’nti pasīditvā yojanikaṃ suvaṇṇacetiyaṃ kambalakañcukena parikkhipitvā tattha tattha rathacakkappamāṇehi suvaṇṇapadumehi alaṅkari. Tesaṃ dvādasahatthā olambakā honti.

    সো তত্থ যাৰতাযুকং ঠত্ৰা সগ্গে নিব্বত্তিত্ৰা ততো চুতো বারাণসিতো যোজনমত্তে ঠানে অঞ্ঞতরস্মিং অমচ্চকুলে নিব্বত্তি, সেট্ঠিকঞ্ঞাপি দেৰলোকতো চৰিত্ৰা রাজকুলে জেট্ঠধীতা হুত্ৰা নিব্বত্তি। তেসু ৰযপ্পত্তেসু কুমারস্স ৰসনগামে নক্খত্তং সঙ্ঘুট্ঠং। সো মাতরং আহ – ‘‘সাটকং মে, অম্ম, দেহি, নক্খত্তং কীল়িস্সামী’’তি । সা ধোতৰত্থং নীহরিত্ৰা অদাসি। ‘‘অম্ম, থূলং ইদ’’ন্তি আহ। সা অঞ্ঞং নীহরিত্ৰা অদাসি, তম্পি পটিক্খিপি। অথ নং মাতা আহ – ‘‘তাত, যাদিসে গেহে মযং জাতা, নত্থি নো ইতো সুখুমতরস্স পটিলাভায পুঞ্ঞ’’ন্তি। ‘‘তেন হি লভনট্ঠানং গচ্ছামি অম্মা’’তি। ‘‘পুত্ত, অহং অজ্জেৰ তুয্হং বারাণসিনগরে রজ্জপটিলাভম্পি ইচ্ছামী’’তি। সো মাতরং ৰন্দিত্ৰা আহ – ‘‘গচ্ছামি, অম্মা’’তি। ‘‘গচ্ছ, তাতা’’তি। এৰং কিরস্সা চিত্তং অহোসি – ‘‘কহং গমিস্সতি? ইধ ৰা এত্থ ৰা গেহে নিসীদিস্সতী’’তি। সো পন পুঞ্ঞনিযামেন নিক্খমিত্ৰা বারাণসিং গন্ত্ৰা উয্যানে মঙ্গলসিলাপট্টে সসীসং পারুপিত্ৰা নিপজ্জি। সো চ বারাণসিরঞ্ঞো কালঙ্কতস্স সত্তমো দিৰসো হোতি।

    So tattha yāvatāyukaṃ ṭhatvā sagge nibbattitvā tato cuto bārāṇasito yojanamatte ṭhāne aññatarasmiṃ amaccakule nibbatti, seṭṭhikaññāpi devalokato cavitvā rājakule jeṭṭhadhītā hutvā nibbatti. Tesu vayappattesu kumārassa vasanagāme nakkhattaṃ saṅghuṭṭhaṃ. So mātaraṃ āha – ‘‘sāṭakaṃ me, amma, dehi, nakkhattaṃ kīḷissāmī’’ti . Sā dhotavatthaṃ nīharitvā adāsi. ‘‘Amma, thūlaṃ ida’’nti āha. Sā aññaṃ nīharitvā adāsi, tampi paṭikkhipi. Atha naṃ mātā āha – ‘‘tāta, yādise gehe mayaṃ jātā, natthi no ito sukhumatarassa paṭilābhāya puñña’’nti. ‘‘Tena hi labhanaṭṭhānaṃ gacchāmi ammā’’ti. ‘‘Putta, ahaṃ ajjeva tuyhaṃ bārāṇasinagare rajjapaṭilābhampi icchāmī’’ti. So mātaraṃ vanditvā āha – ‘‘gacchāmi, ammā’’ti. ‘‘Gaccha, tātā’’ti. Evaṃ kirassā cittaṃ ahosi – ‘‘kahaṃ gamissati? Idha vā ettha vā gehe nisīdissatī’’ti. So pana puññaniyāmena nikkhamitvā bārāṇasiṃ gantvā uyyāne maṅgalasilāpaṭṭe sasīsaṃ pārupitvā nipajji. So ca bārāṇasirañño kālaṅkatassa sattamo divaso hoti.

    অমচ্চা রঞ্ঞো সরীরকিচ্চং কত্ৰা রাজঙ্গণে নিসীদিত্ৰা মন্তযিংসু – ‘‘রঞ্ঞো একা ধীতাৰ অত্থি, পুত্তো নত্থি, অরাজকং রজ্জং নস্সতি, কো রাজা হোতী’’তি? ‘‘ত্ৰং হোহি, ত্ৰং হোহী’’তি আহংসু। পুরোহিতো আহ – ‘‘বহুং ওলোকেতুং ন ৰট্টতি, ফুস্সরথং ৰিস্সজ্জেমা’’তি। তে কুমুদৰণ্ণে চত্তারো সিন্ধৰে যোজেত্ৰা পঞ্চৰিধং রাজককুধভণ্ডং সেতচ্ছত্তঞ্চ রথস্মিংযেৰ ঠপেত্ৰা রথং ৰিস্সজ্জেত্ৰা পচ্ছতো তূরিযানি পগ্গণ্হাপেসুং। রথো পাচীনদ্ৰারেন নিক্খমিত্ৰা উয্যানাভিমুখো অহোসি। ‘‘পরিচযেন উয্যানাভিমুখো গচ্ছতি, নিৰত্তেমা’’তি কেচি আহংসু। পুরোহিতো ‘‘মা নিৰত্তযিত্থা’’তি আহ। রথো কুমারং পদক্খিণং কত্ৰা আরোহনসজ্জো হুত্ৰা অট্ঠাসি, পুরোহিতো পারুপনকণ্ণং অপনেত্ৰা পাদতলানি ওলোকেন্তো, ‘‘তিট্ঠতু অযং দীপো, দ্ৰিসহস্সদীপপরিৰারেসু চতূসু মহাদীপেসু এস রজ্জং কারেতুং যুত্তো’’তি ৰত্ৰা ‘‘পুনপি তূরিযানি পগ্গণ্হথ, পুনপি পগ্গণ্হথা’’তি তিক্খত্তুং তূরিযানি পগ্গণ্হাপেসি।

    Amaccā rañño sarīrakiccaṃ katvā rājaṅgaṇe nisīditvā mantayiṃsu – ‘‘rañño ekā dhītāva atthi, putto natthi, arājakaṃ rajjaṃ nassati, ko rājā hotī’’ti? ‘‘Tvaṃ hohi, tvaṃ hohī’’ti āhaṃsu. Purohito āha – ‘‘bahuṃ oloketuṃ na vaṭṭati, phussarathaṃ vissajjemā’’ti. Te kumudavaṇṇe cattāro sindhave yojetvā pañcavidhaṃ rājakakudhabhaṇḍaṃ setacchattañca rathasmiṃyeva ṭhapetvā rathaṃ vissajjetvā pacchato tūriyāni paggaṇhāpesuṃ. Ratho pācīnadvārena nikkhamitvā uyyānābhimukho ahosi. ‘‘Paricayena uyyānābhimukho gacchati, nivattemā’’ti keci āhaṃsu. Purohito ‘‘mā nivattayitthā’’ti āha. Ratho kumāraṃ padakkhiṇaṃ katvā ārohanasajjo hutvā aṭṭhāsi, purohito pārupanakaṇṇaṃ apanetvā pādatalāni olokento, ‘‘tiṭṭhatu ayaṃ dīpo, dvisahassadīpaparivāresu catūsu mahādīpesu esa rajjaṃ kāretuṃ yutto’’ti vatvā ‘‘punapi tūriyāni paggaṇhatha, punapi paggaṇhathā’’ti tikkhattuṃ tūriyāni paggaṇhāpesi.

    অথ কুমারো মুখং ৰিৰরিত্ৰা ওলোকেত্ৰা, ‘‘কেন কম্মেন আগতত্থা’’তি আহ। ‘‘দেৰ, তুম্হাকং রজ্জং পাপুণাতী’’তি। ‘‘রাজা কহ’’ন্তি? ‘‘দেৰত্তং গতো, সামী’’তি। ‘‘কতি দিৰসা অতিক্কন্তা’’তি? ‘‘অজ্জ সত্তমো দিৰসো’’তি। ‘‘পুত্তো ৰা ধীতা ৰা নত্থী’’তি? ‘‘ধীতা অত্থি দেৰ, পুত্তো নত্থী’’তি। ‘‘করিস্সামি রজ্জ’’ন্তি। তে তাৰদেৰ অভিসেকমণ্ডপং কারেত্ৰা রাজধীতরং সব্বালঙ্কারেহি অলঙ্করিত্ৰা, উয্যানং আনেত্ৰা কুমারস্স অভিসেকং অকংসু। অথস্স কতাভিসেকস্স সতসহস্সগ্ঘনকং ৰত্থং উপহরিংসু। সো ‘‘কিমিদং, তাতা’’তি আহ। ‘‘নিৰাসনৰত্থং দেৰা’’তি। ‘‘ননু, তাতা, থূল’’ন্তি? ‘‘মনুস্সানং পরিভোগৰত্থেসু ইতো সুখুমতরং নত্থি, দেৰা’’তি। ‘‘তুম্হাকং রাজা এৰরূপং নিৰাসেসী’’তি? ‘‘আম, দেৰা’’তি। ‘‘ন মঞ্ঞে পুঞ্ঞৰা তুম্হাকং রাজা, সুৰণ্ণভিঙ্গারং আহরথ, লভিস্সাম ৰত্থ’’ন্তি। সুৰণ্ণভিঙ্গারং আহরিংসু। সো উট্ঠায হত্থে ধোৰিত্ৰা মুখং ৰিক্খালেত্ৰা হত্থেন উদকং আদায পুরত্থিমদিসাযং অব্ভুক্কিরি। তাৰদেৰ ঘনপথৰিং ভিন্দিত্ৰা অট্ঠ কপ্পরুক্খা উট্ঠহিংসু। পুন উদকং গহেত্ৰা দক্খিণাযং পচ্ছিমাযং উত্তরাযন্তি এৰং চতূসু দিসাসু অব্ভুক্কিরি। সব্বদিসাসু অট্ঠট্ঠকং কত্ৰা দ্ৰত্তিংস কপ্পরুক্খা উট্ঠহিংসু। সো একং দিব্বদুস্সং নিৰাসেত্ৰা একং পারুপিত্ৰা ‘‘নন্দরঞ্ঞো ৰিজিতে সুত্তকন্তিকা ইত্থিযো মা সুত্তং কন্তিংসূতি এৰং ভেরিং চরাপেথা’’তি ৰত্ৰা ছত্তং উস্সাপেত্ৰা অলঙ্কতপটিযত্তো হত্থিক্খন্ধৰরগতো নগরং পৰিসিত্ৰা পাসাদং আরুয্হ মহাসম্পত্তিং অনুভৰি।

    Atha kumāro mukhaṃ vivaritvā oloketvā, ‘‘kena kammena āgatatthā’’ti āha. ‘‘Deva, tumhākaṃ rajjaṃ pāpuṇātī’’ti. ‘‘Rājā kaha’’nti? ‘‘Devattaṃ gato, sāmī’’ti. ‘‘Kati divasā atikkantā’’ti? ‘‘Ajja sattamo divaso’’ti. ‘‘Putto vā dhītā vā natthī’’ti? ‘‘Dhītā atthi deva, putto natthī’’ti. ‘‘Karissāmi rajja’’nti. Te tāvadeva abhisekamaṇḍapaṃ kāretvā rājadhītaraṃ sabbālaṅkārehi alaṅkaritvā, uyyānaṃ ānetvā kumārassa abhisekaṃ akaṃsu. Athassa katābhisekassa satasahassagghanakaṃ vatthaṃ upahariṃsu. So ‘‘kimidaṃ, tātā’’ti āha. ‘‘Nivāsanavatthaṃ devā’’ti. ‘‘Nanu, tātā, thūla’’nti? ‘‘Manussānaṃ paribhogavatthesu ito sukhumataraṃ natthi, devā’’ti. ‘‘Tumhākaṃ rājā evarūpaṃ nivāsesī’’ti? ‘‘Āma, devā’’ti. ‘‘Na maññe puññavā tumhākaṃ rājā, suvaṇṇabhiṅgāraṃ āharatha, labhissāma vattha’’nti. Suvaṇṇabhiṅgāraṃ āhariṃsu. So uṭṭhāya hatthe dhovitvā mukhaṃ vikkhāletvā hatthena udakaṃ ādāya puratthimadisāyaṃ abbhukkiri. Tāvadeva ghanapathaviṃ bhinditvā aṭṭha kapparukkhā uṭṭhahiṃsu. Puna udakaṃ gahetvā dakkhiṇāyaṃ pacchimāyaṃ uttarāyanti evaṃ catūsu disāsu abbhukkiri. Sabbadisāsu aṭṭhaṭṭhakaṃ katvā dvattiṃsa kapparukkhā uṭṭhahiṃsu. So ekaṃ dibbadussaṃ nivāsetvā ekaṃ pārupitvā ‘‘nandarañño vijite suttakantikā itthiyo mā suttaṃ kantiṃsūti evaṃ bheriṃ carāpethā’’ti vatvā chattaṃ ussāpetvā alaṅkatapaṭiyatto hatthikkhandhavaragato nagaraṃ pavisitvā pāsādaṃ āruyha mahāsampattiṃ anubhavi.

    এৰং কালে গচ্ছন্তে একদিৰসং দেৰী রঞ্ঞো মহাসম্পত্তিং দিস্ৰা, ‘‘অহো তপস্সী’’তি কারুঞ্ঞাকারং দস্সেতি। ‘‘কিমিদং, দেৰী’’তি চ পুট্ঠা ‘‘অতিমহতী তে, দেৰ, সম্পত্তি। অতীতে বুদ্ধানং সদ্দহিত্ৰা কল্যাণং অকত্থ, ইদানি অনাগতস্স পচ্চযং কুসলং ন করোথা’’তি আহ। ‘‘কস্স দস্সাম, সীলৰন্তো নত্থী’’তি? ‘‘অসুঞ্ঞো, দেৰ, জম্বুদীপো অরহন্তেহি, তুম্হে দানমেৰ সজ্জেথ, অহং অরহন্তে লচ্ছামী’’তি আহ। রাজা পুনদিৰসে পাচীনদ্ৰারে দানং সজ্জাপেসি। দেৰী পাতোৰ উপোসথঙ্গানি অধিট্ঠায উপরিপাসাদে পুরত্থাভিমুখা উরেন নিপজ্জিত্ৰা ‘‘সচে এতিস্সং দিসাযং অরহন্তো অত্থি, স্ৰেৰ আগন্ত্ৰা অম্হাকং ভিক্খং গণ্হন্তূ’’তি আহ। তস্সং দিসাযং অরহন্তো নাহেসুং, তং সক্কারং কপণযাচকানং অদংসু। পুনদিৰসে দক্খিণদ্ৰারে দানং সজ্জেত্ৰা তথেৰ অকাসি, পুনদিৰসে পচ্ছিমদ্ৰারে। উত্তরদ্ৰারে সজ্জিতদিৰসে পন দেৰিযা তথেৰ নিমন্তেন্তিযা হিমৰন্তে ৰসন্তানং পদুমৰতিযা পুত্তানং পঞ্চসতানং পচ্চেকবুদ্ধানং জেট্ঠকো মহাপদুমপচ্চেকবুদ্ধো ভাতিকে আমন্তেসি, ‘‘মারিসা, নন্দরাজা, তুম্হে নিমন্তেতি, অধিৰাসেথ তস্সা’’তি। তে অধিৰাসেত্ৰা পুনদিৰসে অনোতত্তদহে মুখং ধোৰিত্ৰা, আকাসেন আগন্ত্ৰা উত্তরদ্ৰারে ওতরিংসু। মনুস্সা দিস্ৰা গন্ত্ৰা ‘‘পঞ্চসতা, দেৰ, পচ্চেকবুদ্ধা আগতা’’তি রঞ্জো আরোচেসুং। রাজা সদ্ধিং দেৰিযা গন্ত্ৰা, ৰন্দিত্ৰা, পত্তং গহেত্ৰা পচ্চেকবুদ্ধে পাসাদং আরোপেত্ৰা, তত্র নেসং দানং দত্ৰা, ভত্তকিচ্চাৰসানে রাজা সঙ্ঘত্থেরস্স, দেৰী, সঙ্ঘনৰকস্স পাদমূলে নিপজ্জিত্ৰা ‘‘অয্যা পচ্চযেহি ন কিলমিস্সন্তি, মযং পুঞ্ঞেন ন হাযিস্সাম। অম্হাকং যাৰজীৰং ইধ নিৰাসায পটিঞ্ঞং দেথা’’তি পটিঞ্ঞং কারেত্ৰা উয্যানে পঞ্চপণ্ণসালাসতানি পঞ্চচঙ্কমনসতানীতি সব্বাকারেন নিৰাসনট্ঠানানি সম্পাদেত্ৰা তত্থ ৰসাপেসুং।

    Evaṃ kāle gacchante ekadivasaṃ devī rañño mahāsampattiṃ disvā, ‘‘aho tapassī’’ti kāruññākāraṃ dasseti. ‘‘Kimidaṃ, devī’’ti ca puṭṭhā ‘‘atimahatī te, deva, sampatti. Atīte buddhānaṃ saddahitvā kalyāṇaṃ akattha, idāni anāgatassa paccayaṃ kusalaṃ na karothā’’ti āha. ‘‘Kassa dassāma, sīlavanto natthī’’ti? ‘‘Asuñño, deva, jambudīpo arahantehi, tumhe dānameva sajjetha, ahaṃ arahante lacchāmī’’ti āha. Rājā punadivase pācīnadvāre dānaṃ sajjāpesi. Devī pātova uposathaṅgāni adhiṭṭhāya uparipāsāde puratthābhimukhā urena nipajjitvā ‘‘sace etissaṃ disāyaṃ arahanto atthi, sveva āgantvā amhākaṃ bhikkhaṃ gaṇhantū’’ti āha. Tassaṃ disāyaṃ arahanto nāhesuṃ, taṃ sakkāraṃ kapaṇayācakānaṃ adaṃsu. Punadivase dakkhiṇadvāre dānaṃ sajjetvā tatheva akāsi, punadivase pacchimadvāre. Uttaradvāre sajjitadivase pana deviyā tatheva nimantentiyā himavante vasantānaṃ padumavatiyā puttānaṃ pañcasatānaṃ paccekabuddhānaṃ jeṭṭhako mahāpadumapaccekabuddho bhātike āmantesi, ‘‘mārisā, nandarājā, tumhe nimanteti, adhivāsetha tassā’’ti. Te adhivāsetvā punadivase anotattadahe mukhaṃ dhovitvā, ākāsena āgantvā uttaradvāre otariṃsu. Manussā disvā gantvā ‘‘pañcasatā, deva, paccekabuddhā āgatā’’ti rañjo ārocesuṃ. Rājā saddhiṃ deviyā gantvā, vanditvā, pattaṃ gahetvā paccekabuddhe pāsādaṃ āropetvā, tatra nesaṃ dānaṃ datvā, bhattakiccāvasāne rājā saṅghattherassa, devī, saṅghanavakassa pādamūle nipajjitvā ‘‘ayyā paccayehi na kilamissanti, mayaṃ puññena na hāyissāma. Amhākaṃ yāvajīvaṃ idha nivāsāya paṭiññaṃ dethā’’ti paṭiññaṃ kāretvā uyyāne pañcapaṇṇasālāsatāni pañcacaṅkamanasatānīti sabbākārena nivāsanaṭṭhānāni sampādetvā tattha vasāpesuṃ.

    এৰং কালে গচ্ছন্তে রঞ্ঞো পচ্চন্তো কুপিতো। সো ‘‘অহং পচ্চন্তং ৰূপসমেতুং গচ্ছামি, ত্ৰং পচ্চেকবুদ্ধেসু মা পমজ্জী’’তি দেৰিং ওৰদিত্ৰা গতো। তস্মিং অনাগতেযেৰ পচ্চেকবুদ্ধানং আযুসঙ্খারা খীণা। মহাপদুমপচ্চেকবুদ্ধো তিযামরত্তিং ঝানকীল়ং কীল়িত্ৰা অরুণুগ্গমনে আলম্বনফলকং আলম্বিত্ৰা ঠিতকোৰ অনুপাদিসেসায নিব্বানধাতুযা পরিনিব্বাযি। এতেনুপাযেন সেসাপীতি সব্বেৰ পরিনিব্বুতা। পুনদিৰসে দেৰী পচ্চেকবুদ্ধানং নিসীদনট্ঠানং হরিতূপলিত্তং কারেত্ৰা পুপ্ফানি ৰিকিরিত্ৰা, ধূপং দত্ৰা তেসং আগমনং ওলোকযন্তী নিসিন্না আগমনং অপস্সন্তী পুরিসং পেসেসি – ‘‘গচ্ছ, তাত, জানাহি, কিং অয্যানং কিঞ্চি অফাসুক’’ন্তি? সো গন্ত্ৰা মহাপদুমস্স পণ্ণসালায দ্ৰারং ৰিৰরিত্ৰা তত্থ অপস্সন্তো চঙ্কমনং গন্ত্ৰা আলম্বনফলকং নিস্সায ঠিতং দিস্ৰা ৰন্দিত্ৰা ‘‘কালো, ভন্তে’’তি আহ। ‘‘পরিনিব্বুতসরীরং কিং কথেস্সতি? সো নিদ্দাযতি মঞ্ঞে’’তি গন্ত্ৰা পিট্ঠিপাদে হত্থেন পরামসিত্ৰা পাদানং সীতলতায চেৰ থদ্ধতায চ পরিনিব্বুতভাৰং ঞত্ৰা, দুতিযস্স সন্তিকং অগমাসি। এৰং ততিযস্সাতি সব্বেসং পরিনিব্বুতভাৰং ঞত্ৰা রাজকুলং গতো। ‘‘কহং, তাত, পচ্চেকবুদ্ধা’’তি পুট্ঠো ‘‘পরিনিব্বুতা, দেৰী’’তি আহ। দেৰী কন্দন্তী রোদন্তী নিক্খমিত্ৰা নাগরেহি সদ্ধিং তত্থ গন্ত্ৰা সাধুকীল়িতং কারেত্ৰা পচ্চেকবুদ্ধানং সরীরকিচ্চং কারেত্ৰা ধাতুযো গহেত্ৰা চেতিযং পতিট্ঠাপেসি।

    Evaṃ kāle gacchante rañño paccanto kupito. So ‘‘ahaṃ paccantaṃ vūpasametuṃ gacchāmi, tvaṃ paccekabuddhesu mā pamajjī’’ti deviṃ ovaditvā gato. Tasmiṃ anāgateyeva paccekabuddhānaṃ āyusaṅkhārā khīṇā. Mahāpadumapaccekabuddho tiyāmarattiṃ jhānakīḷaṃ kīḷitvā aruṇuggamane ālambanaphalakaṃ ālambitvā ṭhitakova anupādisesāya nibbānadhātuyā parinibbāyi. Etenupāyena sesāpīti sabbeva parinibbutā. Punadivase devī paccekabuddhānaṃ nisīdanaṭṭhānaṃ haritūpalittaṃ kāretvā pupphāni vikiritvā, dhūpaṃ datvā tesaṃ āgamanaṃ olokayantī nisinnā āgamanaṃ apassantī purisaṃ pesesi – ‘‘gaccha, tāta, jānāhi, kiṃ ayyānaṃ kiñci aphāsuka’’nti? So gantvā mahāpadumassa paṇṇasālāya dvāraṃ vivaritvā tattha apassanto caṅkamanaṃ gantvā ālambanaphalakaṃ nissāya ṭhitaṃ disvā vanditvā ‘‘kālo, bhante’’ti āha. ‘‘Parinibbutasarīraṃ kiṃ kathessati? So niddāyati maññe’’ti gantvā piṭṭhipāde hatthena parāmasitvā pādānaṃ sītalatāya ceva thaddhatāya ca parinibbutabhāvaṃ ñatvā, dutiyassa santikaṃ agamāsi. Evaṃ tatiyassāti sabbesaṃ parinibbutabhāvaṃ ñatvā rājakulaṃ gato. ‘‘Kahaṃ, tāta, paccekabuddhā’’ti puṭṭho ‘‘parinibbutā, devī’’ti āha. Devī kandantī rodantī nikkhamitvā nāgarehi saddhiṃ tattha gantvā sādhukīḷitaṃ kāretvā paccekabuddhānaṃ sarīrakiccaṃ kāretvā dhātuyo gahetvā cetiyaṃ patiṭṭhāpesi.

    রাজা পচ্চন্তং ৰূপসমেত্ৰা আগতো পচ্চুগ্গমনং আগতং দেৰিং পুচ্ছি – ‘‘কিং, ভদ্দে, পচ্চেকবুদ্ধেসু নপ্পমজ্জি, নিরোগা অয্যা’’তি? ‘‘পরিনিব্বুতা দেৰা’’তি। রাজা চিন্তেতি ‘‘এৰরূপানম্পি পণ্ডিতানং মরণং উপ্পজ্জতি, অম্হাকং কুতো মোক্খো’’তি। সো নগরং অগন্ত্ৰা, উয্যানমেৰ পৰিসিত্ৰা জেট্ঠপুত্তং পক্কোসাপেত্ৰা, তস্স রজ্জং নিয্যাতেত্ৰা, সযং সমণপব্বজ্জং পব্বজি। দেৰীপি ‘‘ইমস্মিং পব্বজিতে অহং কিং করিস্সামী’’তি তত্থেৰ উয্যানে পব্বজিত্ৰা দ্ৰেপি ঝানং ভাৰেত্ৰা ততো চুতা ব্রহ্মলোকে নিব্বত্তিংসু।

    Rājā paccantaṃ vūpasametvā āgato paccuggamanaṃ āgataṃ deviṃ pucchi – ‘‘kiṃ, bhadde, paccekabuddhesu nappamajji, nirogā ayyā’’ti? ‘‘Parinibbutā devā’’ti. Rājā cinteti ‘‘evarūpānampi paṇḍitānaṃ maraṇaṃ uppajjati, amhākaṃ kuto mokkho’’ti. So nagaraṃ agantvā, uyyānameva pavisitvā jeṭṭhaputtaṃ pakkosāpetvā, tassa rajjaṃ niyyātetvā, sayaṃ samaṇapabbajjaṃ pabbaji. Devīpi ‘‘imasmiṃ pabbajite ahaṃ kiṃ karissāmī’’ti tattheva uyyāne pabbajitvā dvepi jhānaṃ bhāvetvā tato cutā brahmaloke nibbattiṃsu.

    তেসু তত্থেৰ ৰসন্তেসু অম্হাকং সত্থা লোকে উপ্পজ্জিত্ৰা পৰত্তিতৰরধম্মচক্কো অনুপুব্বেন রাজগহং পাৰিসি। সত্থরি তত্থ পটিৰসন্তে অযং পিপ্পলিমাণৰো মগধরট্ঠে মহাতিত্থব্রাহ্মণগামে কপিলব্রাহ্মণস্স অগ্গমহেসিযা কুচ্ছিম্হি নিব্বত্তো। অযং ভদ্দা কাপিলানী মদ্দরট্ঠে সাগলনগরে কোসিযগোত্তব্রাহ্মণস্স অগ্গমহেসিযা কুচ্ছিস্মিং নিব্বত্তা। তেসং অনুক্কমেন ৰড্ঢমানানং পিপ্পলিমাণৰস্স ৰীসতিমে, ভদ্দায সোল়সমে ৰস্সে সম্পত্তে মাতাপিতরো পুত্তং ওলোকেত্ৰা ‘‘তাত, ত্ৰং ৰযপ্পত্তো, কুলৰংসো নাম পতিট্ঠপেতব্বো’’তি অতিৰিয নিপ্পীল়যিংসু। মাণৰো আহ ‘‘ময্হং সোতপথে এৰরূপং কথং মা কথেথ। অহং যাৰ তুম্হে ধরথ, তাৰ পটিজগ্গিস্সামি, তুম্হাকং অচ্চযেন নিক্খমিত্ৰা পব্বজিস্সামী’’তি। তে কতিপাহং অতিক্কমিত্ৰা পুন কথযিংসু। সোপি তথেৰ পটিক্খিপি। ততো পট্ঠায নিরন্তরং কথেতিযেৰ।

    Tesu tattheva vasantesu amhākaṃ satthā loke uppajjitvā pavattitavaradhammacakko anupubbena rājagahaṃ pāvisi. Satthari tattha paṭivasante ayaṃ pippalimāṇavo magadharaṭṭhe mahātitthabrāhmaṇagāme kapilabrāhmaṇassa aggamahesiyā kucchimhi nibbatto. Ayaṃ bhaddā kāpilānī maddaraṭṭhe sāgalanagare kosiyagottabrāhmaṇassa aggamahesiyā kucchismiṃ nibbattā. Tesaṃ anukkamena vaḍḍhamānānaṃ pippalimāṇavassa vīsatime, bhaddāya soḷasame vasse sampatte mātāpitaro puttaṃ oloketvā ‘‘tāta, tvaṃ vayappatto, kulavaṃso nāma patiṭṭhapetabbo’’ti ativiya nippīḷayiṃsu. Māṇavo āha ‘‘mayhaṃ sotapathe evarūpaṃ kathaṃ mā kathetha. Ahaṃ yāva tumhe dharatha, tāva paṭijaggissāmi, tumhākaṃ accayena nikkhamitvā pabbajissāmī’’ti. Te katipāhaṃ atikkamitvā puna kathayiṃsu. Sopi tatheva paṭikkhipi. Tato paṭṭhāya nirantaraṃ kathetiyeva.

    মাণৰো ‘‘মম মাতরং সঞ্ঞাপেস্সামী’’তি রত্তসুৰণ্ণস্স নিক্খসহস্সং দত্ৰা সব্বকামেহি সন্তপ্পেত্ৰা সুৰণ্ণকারেহি একং ইত্থিরূপং কারাপেত্ৰা তস্স মজ্জনঘট্টনাদিকম্মপরিযোসানে তং রত্তৰত্থং নিৰাসাপেত্ৰা ৰণ্ণসম্পন্নেহি পুপ্ফেহি চেৰ নানাঅলঙ্কারেহি চ অলঙ্কারাপেত্ৰা মাতরং পক্কোসাপেত্ৰা আহ ‘‘অম্ম, এৰরূপং আরম্মণং লভন্তো গেহে ৰসিস্সামি অলভন্তো ন ৰসিস্সামী’’তি। পণ্ডিতা ব্রাহ্মণী চিন্তেসি – ‘‘ময্হং পুত্তো পুঞ্ঞৰা দিন্নদানো কতাভিনীহারো, পুঞ্ঞং করোন্তো ন এককোৰ অকাসি, অদ্ধা এতেন সহকতপুঞ্ঞা সুৰণ্ণরূপপটিভাগাৰ ভৰিস্সতী’’তি অট্ঠ ব্রাহ্মণে পক্কোসাপেত্ৰা সব্বকামেহি সন্তপ্পেত্ৰা সুৰণ্ণরূপকং রথং আরোপেত্ৰা ‘‘গচ্ছথ, তাতা, যত্থ অম্হাকং জাতিগোত্তভোগেহি সমানে কুলে এৰরূপং দারিকং পস্সথ, ইমমেৰ সুৰণ্ণরূপকং পণ্ণাকারং কত্ৰা এথা’’তি উয্যোজেসি।

    Māṇavo ‘‘mama mātaraṃ saññāpessāmī’’ti rattasuvaṇṇassa nikkhasahassaṃ datvā sabbakāmehi santappetvā suvaṇṇakārehi ekaṃ itthirūpaṃ kārāpetvā tassa majjanaghaṭṭanādikammapariyosāne taṃ rattavatthaṃ nivāsāpetvā vaṇṇasampannehi pupphehi ceva nānāalaṅkārehi ca alaṅkārāpetvā mātaraṃ pakkosāpetvā āha ‘‘amma, evarūpaṃ ārammaṇaṃ labhanto gehe vasissāmi alabhanto na vasissāmī’’ti. Paṇḍitā brāhmaṇī cintesi – ‘‘mayhaṃ putto puññavā dinnadāno katābhinīhāro, puññaṃ karonto na ekakova akāsi, addhā etena sahakatapuññā suvaṇṇarūpapaṭibhāgāva bhavissatī’’ti aṭṭha brāhmaṇe pakkosāpetvā sabbakāmehi santappetvā suvaṇṇarūpakaṃ rathaṃ āropetvā ‘‘gacchatha, tātā, yattha amhākaṃ jātigottabhogehi samāne kule evarūpaṃ dārikaṃ passatha, imameva suvaṇṇarūpakaṃ paṇṇākāraṃ katvā ethā’’ti uyyojesi.

    তে ‘‘অম্হাকং নাম এতং কম্ম’’ন্তি নিক্খমিত্ৰা ‘‘কত্থ গমিস্সামা’’তি চিন্তেত্ৰা ‘‘মদ্দরট্ঠং নাম ইত্থাকরো, মদ্দরট্ঠং গমিস্সামা’’তি মদ্দরট্ঠে সাগলনগরং অগমংসু। তত্থ তং সুৰণ্ণরূপকং ন্হানতিত্থে ঠপেত্ৰা একমন্তে নিসীদিংসু। অথ ভদ্দায ধাতী ভদ্দং ন্হাপেত্ৰা, অলঙ্করিত্ৰা, সিরিগব্ভে নিসীদাপেত্ৰা সযং ন্হাযিতুং উদকতিত্থং গতা তত্থ তং সুৰণ্ণরূপকং দিস্ৰা ‘‘কিস্সাযং অৰিনীতা ইধাগন্ত্ৰা ঠিতা’’তি পিট্ঠিপস্সে পহরিত্ৰা ‘‘সুৰণ্ণরূপক’’ন্তি ঞত্ৰা ‘‘অয্যধীতা মে’’তি সঞ্ঞং উপ্পাদেসিং, ‘‘অযং পন মে অয্যধীতায নিৰাসনপটিগ্গাহিকাযাপি অসদিসা’’তি আহ। অথ নং তে মনুস্সা পরিৰারেত্ৰা ‘‘এৰরূপা তে সামিধীতা’’তি পুচ্ছিংসু। ‘‘কিং এসা, ইমায সুৰণ্ণপটিমায সতগুণেন সহস্সগুণেন ময্হং অয্যধীতা অভিরূপতরা, দ্ৰাদসহত্থে গব্ভে নিসিন্নায পদীপকিচ্চং নত্থি, সরীরোভাসেনেৰ তমং ৰিধমতী’’তি। ‘‘তেন হি আগচ্ছা’’তি তং খুজ্জং গহেত্ৰা সুৰণ্ণরূপকং রথে আরোপেত্ৰা কোসিযগোত্তস্স ব্রাহ্মণস্স ঘরদ্ৰারে ঠত্ৰা আগমনং নিৰেদযিংসু।

    Te ‘‘amhākaṃ nāma etaṃ kamma’’nti nikkhamitvā ‘‘kattha gamissāmā’’ti cintetvā ‘‘maddaraṭṭhaṃ nāma itthākaro, maddaraṭṭhaṃ gamissāmā’’ti maddaraṭṭhe sāgalanagaraṃ agamaṃsu. Tattha taṃ suvaṇṇarūpakaṃ nhānatitthe ṭhapetvā ekamante nisīdiṃsu. Atha bhaddāya dhātī bhaddaṃ nhāpetvā, alaṅkaritvā, sirigabbhe nisīdāpetvā sayaṃ nhāyituṃ udakatitthaṃ gatā tattha taṃ suvaṇṇarūpakaṃ disvā ‘‘kissāyaṃ avinītā idhāgantvā ṭhitā’’ti piṭṭhipasse paharitvā ‘‘suvaṇṇarūpaka’’nti ñatvā ‘‘ayyadhītā me’’ti saññaṃ uppādesiṃ, ‘‘ayaṃ pana me ayyadhītāya nivāsanapaṭiggāhikāyāpi asadisā’’ti āha. Atha naṃ te manussā parivāretvā ‘‘evarūpā te sāmidhītā’’ti pucchiṃsu. ‘‘Kiṃ esā, imāya suvaṇṇapaṭimāya sataguṇena sahassaguṇena mayhaṃ ayyadhītā abhirūpatarā, dvādasahatthe gabbhe nisinnāya padīpakiccaṃ natthi, sarīrobhāseneva tamaṃ vidhamatī’’ti. ‘‘Tena hi āgacchā’’ti taṃ khujjaṃ gahetvā suvaṇṇarūpakaṃ rathe āropetvā kosiyagottassa brāhmaṇassa gharadvāre ṭhatvā āgamanaṃ nivedayiṃsu.

    ব্রাহ্মণো পটিসন্থারং কত্ৰা ‘‘কুতো আগতত্থা’’তি পুচ্ছি। ‘‘মগধরট্ঠে মহাতিত্থগামে কপিলব্রাহ্মণস্স ঘরতো’’তি। ‘‘কিং কারণা আগতা’’তি? ‘‘ইমিনা নাম কারণেনা’’তি। ‘‘কল্যাণং, তাতা, সমজাতিগোত্তৰিভৰো অম্হাকং ব্রাহ্মণো, দস্সামি দারিক’’ন্তি পণ্ণাকারং গণ্হি। তে কপিলব্রাহ্মণস্স সাসনং পহিণিংসু ‘‘লদ্ধা দারিকা , কত্তব্বং করোথা’’তি। তং সাসনং সুত্ৰা পিপ্পলিমাণৰস্স আরোচযিংসু ‘‘লদ্ধা কির দারিকা’’তি। মাণৰো ‘‘অহং ‘ন লভিস্সন্তী’তি চিন্তেসিং, ইমে ‘লদ্ধা’তি ৰদন্তি, অনত্থিকো হুত্ৰা পণ্ণং পেসেস্সামী’’তি রহোগতো পণ্ণং লিখি ‘‘ভদ্দা, অত্তনো জাতিগোত্তভোগানুরূপং ঘরাৰাসং লভতু, অহং নিক্খমিত্ৰা পব্বজিস্সামি, মা পচ্ছা ৰিপ্পটিসারিনী অহোসী’’তি। ভদ্দাপি ‘‘অসুকস্স কির মং দাতুকামো’’তি সুত্ৰা ‘‘পণ্ণং পেসেস্সামী’’তি রহোগতা পণ্ণং লিখি ‘‘অয্যপুত্তো অত্তনো জাতিগোত্তভোগানুরূপং ঘরাৰাসং লভতু, অহং পব্বজিস্সামি, মা পচ্ছা ৰিপ্পটিসারী অহোসী’’তি। দ্ৰেপি পণ্ণানি অন্তরামগ্গে সমাগচ্ছিংসু। ‘‘ইদং কস্স পণ্ণ’’ন্তি? ‘‘পিপ্পলিমাণৰেন ভদ্দায পহিত’’ন্তি। ‘‘ইদং কস্সা’’তি? ‘‘ভদ্দায পিপ্পলিমাণৰস্স পহিত’’ন্তি চ ৰুত্তে তে দ্ৰেপি ৰাচেত্ৰা ‘‘পস্সথ দারকানং কম্ম’’ন্তি ফালেত্ৰা অরঞ্ঞে ছড্ডেত্ৰা অঞ্ঞং তংসমানং পণ্ণং লিখিত্ৰা ইতো এত্তো চ পেসেসুং। ইতি কুমারস্স কুমারিকায চ সদিসং পণ্ণং লোকস্সাদরহিতমেৰাতি অনিচ্ছমানানংযেৰ দ্ৰিন্নং সমাগমো অহোসি।

    Brāhmaṇo paṭisanthāraṃ katvā ‘‘kuto āgatatthā’’ti pucchi. ‘‘Magadharaṭṭhe mahātitthagāme kapilabrāhmaṇassa gharato’’ti. ‘‘Kiṃ kāraṇā āgatā’’ti? ‘‘Iminā nāma kāraṇenā’’ti. ‘‘Kalyāṇaṃ, tātā, samajātigottavibhavo amhākaṃ brāhmaṇo, dassāmi dārika’’nti paṇṇākāraṃ gaṇhi. Te kapilabrāhmaṇassa sāsanaṃ pahiṇiṃsu ‘‘laddhā dārikā , kattabbaṃ karothā’’ti. Taṃ sāsanaṃ sutvā pippalimāṇavassa ārocayiṃsu ‘‘laddhā kira dārikā’’ti. Māṇavo ‘‘ahaṃ ‘na labhissantī’ti cintesiṃ, ime ‘laddhā’ti vadanti, anatthiko hutvā paṇṇaṃ pesessāmī’’ti rahogato paṇṇaṃ likhi ‘‘bhaddā, attano jātigottabhogānurūpaṃ gharāvāsaṃ labhatu, ahaṃ nikkhamitvā pabbajissāmi, mā pacchā vippaṭisārinī ahosī’’ti. Bhaddāpi ‘‘asukassa kira maṃ dātukāmo’’ti sutvā ‘‘paṇṇaṃ pesessāmī’’ti rahogatā paṇṇaṃ likhi ‘‘ayyaputto attano jātigottabhogānurūpaṃ gharāvāsaṃ labhatu, ahaṃ pabbajissāmi, mā pacchā vippaṭisārī ahosī’’ti. Dvepi paṇṇāni antarāmagge samāgacchiṃsu. ‘‘Idaṃ kassa paṇṇa’’nti? ‘‘Pippalimāṇavena bhaddāya pahita’’nti. ‘‘Idaṃ kassā’’ti? ‘‘Bhaddāya pippalimāṇavassa pahita’’nti ca vutte te dvepi vācetvā ‘‘passatha dārakānaṃ kamma’’nti phāletvā araññe chaḍḍetvā aññaṃ taṃsamānaṃ paṇṇaṃ likhitvā ito etto ca pesesuṃ. Iti kumārassa kumārikāya ca sadisaṃ paṇṇaṃ lokassādarahitamevāti anicchamānānaṃyeva dvinnaṃ samāgamo ahosi.

    তং দিৰসংযেৰ পিপ্পলিমাণৰো একং পুপ্ফদামং গন্থাপেসি ভদ্দাপি। তানি সযনমজ্ঝে ঠপেসুং ভুত্তসাযমাসা উভোপি ‘‘সযনং আরুহিস্সামা’’তি মাণৰো দক্খিণপস্সেন সযনং আরুহি। ভদ্দা ৰামপস্সেন অভিরুহিত্ৰা আহ – ‘‘যস্স পস্সে পুপ্ফানি মিলাযন্তি, তস্স রাগচিত্তং উপ্পন্নন্তি ৰিজানিস্সাম, ইমং পুপ্ফদামং ন অল্লিযিতব্ব’’ন্তি। তে পন অঞ্ঞমঞ্ঞং সরীরসম্ফস্সভযেন তিযামরত্তিং নিদ্দং অনোক্কমন্তাৰ ৰীতিনামেন্তি, দিৰা পন হসিতমত্তম্পি নাহোসি। তে লোকামিসেন অসংসট্ঠা যাৰ মাতাপিতরো ধরন্তি, তাৰ কুটুম্বং অৰিচারেত্ৰা তেসু কালঙ্কতেসু ৰিচারযিংসু। মহতী মাণৰস্স সম্পত্তি – একদিৰসং সরীরং উব্বট্টেত্ৰা ছড্ডেতব্বং সুৰণ্ণচুণ্ণং এৰ মগধনাল়িযা দ্ৰাদসনাল়িমত্তং লদ্ধুং ৰট্টতি। যন্তবদ্ধানি সট্ঠিমহাতল়াকানি, কম্মন্তো দ্ৰাদসযোজনিকো, অনুরাধপুরপমাণা চুদ্দস গামা, চুদ্দস হত্থানীকানি, চুদ্দস অস্সানীকানি, চুদ্দস রথানীকানি।

    Taṃ divasaṃyeva pippalimāṇavo ekaṃ pupphadāmaṃ ganthāpesi bhaddāpi. Tāni sayanamajjhe ṭhapesuṃ bhuttasāyamāsā ubhopi ‘‘sayanaṃ āruhissāmā’’ti māṇavo dakkhiṇapassena sayanaṃ āruhi. Bhaddā vāmapassena abhiruhitvā āha – ‘‘yassa passe pupphāni milāyanti, tassa rāgacittaṃ uppannanti vijānissāma, imaṃ pupphadāmaṃ na alliyitabba’’nti. Te pana aññamaññaṃ sarīrasamphassabhayena tiyāmarattiṃ niddaṃ anokkamantāva vītināmenti, divā pana hasitamattampi nāhosi. Te lokāmisena asaṃsaṭṭhā yāva mātāpitaro dharanti, tāva kuṭumbaṃ avicāretvā tesu kālaṅkatesu vicārayiṃsu. Mahatī māṇavassa sampatti – ekadivasaṃ sarīraṃ ubbaṭṭetvā chaḍḍetabbaṃ suvaṇṇacuṇṇaṃ eva magadhanāḷiyā dvādasanāḷimattaṃ laddhuṃ vaṭṭati. Yantabaddhāni saṭṭhimahātaḷākāni, kammanto dvādasayojaniko, anurādhapurapamāṇā cuddasa gāmā, cuddasa hatthānīkāni, cuddasa assānīkāni, cuddasa rathānīkāni.

    সো একদিৰসং অলঙ্কতঅস্সং আরুয্হ মহাজনপরিৰুতো কম্মন্তং গন্ত্ৰা খেত্তকোটিযং ঠিতো নঙ্গলেহি ভিন্নট্ঠানতো কাকাদযো সকুণে গণ্ডুপ্পাদাদিপাণকে উদ্ধরিত্ৰা খাদন্তে দিস্ৰা, ‘‘তাতা, ইমে কিং খাদন্তী’’তি পুচ্ছি। ‘‘গণ্ডুপ্পাদে, অয্যা’’তি। ‘‘এতেহি কতং পাপং কস্স হোতী’’তি? ‘‘তুম্হাকং, অয্যা’’তি। সো চিন্তেসি – ‘‘সচে এতেহি কতং পাপং ময্হং হোতি, কিং মে করিস্সতি সত্তঅসীতিকোটিধনং, কিং দ্ৰাদসযোজনো কম্মন্তো, কিং যন্তবদ্ধানি তল়াকানি, কিং চুদ্দস গামা, সব্বমেতং ভদ্দায কাপিলানিযা নিয্যাতেত্ৰা নিক্খম্ম পব্বজিস্সামী’’তি।

    So ekadivasaṃ alaṅkataassaṃ āruyha mahājanaparivuto kammantaṃ gantvā khettakoṭiyaṃ ṭhito naṅgalehi bhinnaṭṭhānato kākādayo sakuṇe gaṇḍuppādādipāṇake uddharitvā khādante disvā, ‘‘tātā, ime kiṃ khādantī’’ti pucchi. ‘‘Gaṇḍuppāde, ayyā’’ti. ‘‘Etehi kataṃ pāpaṃ kassa hotī’’ti? ‘‘Tumhākaṃ, ayyā’’ti. So cintesi – ‘‘sace etehi kataṃ pāpaṃ mayhaṃ hoti, kiṃ me karissati sattaasītikoṭidhanaṃ, kiṃ dvādasayojano kammanto, kiṃ yantabaddhāni taḷākāni, kiṃ cuddasa gāmā, sabbametaṃ bhaddāya kāpilāniyā niyyātetvā nikkhamma pabbajissāmī’’ti.

    ভদ্দাপি কাপিলানী তস্মিং খণে অন্তরৰত্থুম্হি তযো তিলকুম্ভে পত্থরাপেত্ৰা ধাতীহি পরিৰুতা নিসিন্না কাকে তিলপাণকে খাদমানে দিস্ৰা, ‘‘অম্মা, কিং ইমে খাদন্তী’’তি পুচ্ছি। ‘‘পাণকে অয্যে’’তি। ‘‘অকুসলং কস্স হোতী’’তি? ‘‘তুম্হাকং, অয্যে’’তি। সা চিন্তেসি – ‘‘ময্হং চতুহত্থৰত্থং নাল়িকোদনমত্তঞ্চ লদ্ধুং ৰট্টতি, যদি পনেতং এত্তকেন জনেন কতং অকুসলং ময্হং হোতি, ভৰসহস্সেনপি ৰট্টতো সীসং উক্খিপিতুং ন সক্কা। অয্যপুত্তে আগতমত্তেযেৰ সব্বং তস্স নিয্যাতেত্ৰা নিক্খম্ম পব্বজিস্সামী’’তি।

    Bhaddāpi kāpilānī tasmiṃ khaṇe antaravatthumhi tayo tilakumbhe pattharāpetvā dhātīhi parivutā nisinnā kāke tilapāṇake khādamāne disvā, ‘‘ammā, kiṃ ime khādantī’’ti pucchi. ‘‘Pāṇake ayye’’ti. ‘‘Akusalaṃ kassa hotī’’ti? ‘‘Tumhākaṃ, ayye’’ti. Sā cintesi – ‘‘mayhaṃ catuhatthavatthaṃ nāḷikodanamattañca laddhuṃ vaṭṭati, yadi panetaṃ ettakena janena kataṃ akusalaṃ mayhaṃ hoti, bhavasahassenapi vaṭṭato sīsaṃ ukkhipituṃ na sakkā. Ayyaputte āgatamatteyeva sabbaṃ tassa niyyātetvā nikkhamma pabbajissāmī’’ti.

    মাণৰো আগন্ত্ৰা, ন্হত্ৰা পাসাদং আরুয্হ মহারহে পল্লঙ্কে নিসীদি। অথস্স চক্কৰত্তিনো অনুচ্ছৰিকং ভোজনং সজ্জযিংসু। দ্ৰেপি ভুঞ্জিত্ৰা পরিজনে নিক্খন্তে রহোগতা ফাসুকট্ঠানে নিসীদিংসু। ততো মাণৰো ভদ্দং আহ – ‘‘ভদ্দে, ইমং ঘরং আগচ্ছন্তী ত্ৰং কিত্তকং ধনং আহরসী’’তি? ‘‘পঞ্চপণ্ণাস সকটসহস্সানি, অয্যা’’তি। ‘‘তং সব্বং, যা চ ইমস্মিং ঘরে সত্তঅসীতিকোটিযো যন্তবদ্ধসট্ঠিতল়াকাদিভেদা চ সম্পত্তি অত্থি, তং সব্বঞ্চ তুয্হংযেৰ নিয্যাদেমী’’তি। ‘‘তুম্হে পন কহং গচ্ছথ, অয্যা’’তি? ‘‘অহং পব্বজিস্সামী’’তি। ‘‘অয্য, অহম্পি তুম্হাকংযেৰ আগমনং ওলোকযমানা নিসিন্না। অহম্পি পব্বজিস্সামী’’তি। তেসং আদিত্তপণ্ণকুটি ৰিয তযো ভৰা উপট্ঠহিংসু। তে অন্তরাপণতো কসাযরসপীতানি ৰত্থানি মত্তিকাপত্তে চ আহরাপেত্ৰা অঞ্ঞমঞ্ঞং কেসে ওরোপেত্ৰা ‘‘যে লোকে অরহন্তো, তে উদ্দিস্স অম্হাকং পব্বজ্জা’’তি পব্বজিত্ৰা, থৰিকাসু পত্তে পক্খিপিত্ৰা অংসে লগ্গেত্ৰা পাসাদতো ওতরিংসু। গেহে দাসেসু ৰা কম্মকরেসু ৰা ন কোচি সঞ্জানি।

    Māṇavo āgantvā, nhatvā pāsādaṃ āruyha mahārahe pallaṅke nisīdi. Athassa cakkavattino anucchavikaṃ bhojanaṃ sajjayiṃsu. Dvepi bhuñjitvā parijane nikkhante rahogatā phāsukaṭṭhāne nisīdiṃsu. Tato māṇavo bhaddaṃ āha – ‘‘bhadde, imaṃ gharaṃ āgacchantī tvaṃ kittakaṃ dhanaṃ āharasī’’ti? ‘‘Pañcapaṇṇāsa sakaṭasahassāni, ayyā’’ti. ‘‘Taṃ sabbaṃ, yā ca imasmiṃ ghare sattaasītikoṭiyo yantabaddhasaṭṭhitaḷākādibhedā ca sampatti atthi, taṃ sabbañca tuyhaṃyeva niyyādemī’’ti. ‘‘Tumhe pana kahaṃ gacchatha, ayyā’’ti? ‘‘Ahaṃ pabbajissāmī’’ti. ‘‘Ayya, ahampi tumhākaṃyeva āgamanaṃ olokayamānā nisinnā. Ahampi pabbajissāmī’’ti. Tesaṃ ādittapaṇṇakuṭi viya tayo bhavā upaṭṭhahiṃsu. Te antarāpaṇato kasāyarasapītāni vatthāni mattikāpatte ca āharāpetvā aññamaññaṃ kese oropetvā ‘‘ye loke arahanto, te uddissa amhākaṃ pabbajjā’’ti pabbajitvā, thavikāsu patte pakkhipitvā aṃse laggetvā pāsādato otariṃsu. Gehe dāsesu vā kammakaresu vā na koci sañjāni.

    অথ নে ব্রাহ্মণগামতো নিক্খম্ম দাসগামদ্ৰারেন গচ্ছন্তে আকপ্পকুত্তৰসেন দাসগামৰাসিনো সঞ্জানিংসু। তে রোদন্তা পাদেসু নিপতিত্ৰা ‘‘কিং, অম্হে, অনাথে করোথ অয্যা’’তি আহংসু। ‘‘মযং, ‘ভণে, আদিত্তপণ্ণসালা ৰিয তযো ভৰা’তি পব্বজিম্হা। সচে তুম্হেসু একেকং ভুজিস্সং করোম, ৰস্সসতম্পি নপ্পহোতি। তুম্হেৰ তুম্হাকং সীসং ধোৰিত্ৰা ভুজিস্সা হুত্ৰা জীৰথা’’তি ৰত্ৰা তেসং রোদন্তানংযেৰ পক্কমিংসু।

    Atha ne brāhmaṇagāmato nikkhamma dāsagāmadvārena gacchante ākappakuttavasena dāsagāmavāsino sañjāniṃsu. Te rodantā pādesu nipatitvā ‘‘kiṃ, amhe, anāthe karotha ayyā’’ti āhaṃsu. ‘‘Mayaṃ, ‘bhaṇe, ādittapaṇṇasālā viya tayo bhavā’ti pabbajimhā. Sace tumhesu ekekaṃ bhujissaṃ karoma, vassasatampi nappahoti. Tumheva tumhākaṃ sīsaṃ dhovitvā bhujissā hutvā jīvathā’’ti vatvā tesaṃ rodantānaṃyeva pakkamiṃsu.

    থেরো পুরতো গচ্ছন্তো নিৰত্তিত্ৰা ওলোকেন্তো চিন্তেসি – ‘‘অযং, ভদ্দা কাপিলানী, সকলজম্বুদীপগ্ঘনিকা ইত্থী ময্হং পচ্ছতো আগচ্ছতি, ঠানং খো পনেতং ৰিজ্জতি, যং কোচিদেৰ এৰং চিন্তেয্য ‘ইমে পব্বজিতাপি ৰিনা ভৰিতুং ন সক্কোন্তি, অননুচ্ছৰিকং করোন্তী’তি, কোচি পাপেন মনং পদূসেত্ৰা অপাযপূরকো ভৰেয্য, ইমং পহায ময্হং গন্তুং ৰট্টতী’’তি চিত্তং উপ্পাদেসি। সো পুরতো গচ্ছন্তো দ্ৰেধাপথং দিস্ৰা তস্স মত্থকে অট্ঠাসি। ভদ্দাপি আগন্ত্ৰা, ৰন্দিত্ৰা অট্ঠাসি। অথ নং আহ – ‘‘ভদ্দে, তাদিসিং ইত্থিং মম পচ্ছতো আগচ্ছন্তিং দিস্ৰা ‘ইমে পব্বজিতাপি ৰিনা ভৰিতুং ন সক্কোন্তী’তি চিন্তেত্ৰা অম্হেসু পদুট্ঠচিত্তো মহাজনো অপাযপূরকো ভৰেয্য। ইমস্মিং দ্ৰেধাপথে ত্ৰং একং গণ্হ, অহমেকেন গমিস্সামী’’তি। ‘‘আম, অয্য, পব্বজিতানং মাতুগামো পলিবোধো, ‘পব্বজিত্ৰাপি ৰিনা ন ভৰন্তী’তি অম্হাকং দোসং দস্সেস্সন্তি, তুম্হে একং মগ্গং গণ্হথ, ৰিনা ভৰিস্সামা’’তি তিক্খত্তুং পদক্খিণং কত্ৰা চতূসু ঠানেসু পঞ্চপতিট্ঠিতেন ৰন্দিত্ৰা দসনখসমোধানসমুজ্জলং অঞ্জলিং পগ্গয্হ ‘‘সতসহস্সকপ্পপরিমাণে অদ্ধানে কতো মিত্তসন্থৰো অজ্জ ভিজ্জতী’’তি ৰত্ৰা ‘‘তুম্হে দক্খিণজাতিকা নাম, তুম্হাকং দক্খিণমগ্গো ৰট্টতি, মযং মাতুগামা নাম ৰামজাতিকা, অম্হাকং ৰামমগ্গো ৰট্টতী’’তি ৰন্দিত্ৰা মগ্গং পটিপন্না। তেসং দ্ৰেধাভূতকালে অযং মহাপথৰী ‘‘অহং চক্কৰাল়সিনেরুপব্বতে ধারেতুং সক্কোন্তীপি তুম্হাকং গুণে ধারেতুং ন সক্কোমী’’তি ৰদন্তী ৰিয ৰিরৰমানা কম্পি, আকাসে অসনিসদ্দো ৰিয পৰত্তি, চক্কৰাল়সিনেরুপব্বতো উন্নদি।

    Thero purato gacchanto nivattitvā olokento cintesi – ‘‘ayaṃ, bhaddā kāpilānī, sakalajambudīpagghanikā itthī mayhaṃ pacchato āgacchati, ṭhānaṃ kho panetaṃ vijjati, yaṃ kocideva evaṃ cinteyya ‘ime pabbajitāpi vinā bhavituṃ na sakkonti, ananucchavikaṃ karontī’ti, koci pāpena manaṃ padūsetvā apāyapūrako bhaveyya, imaṃ pahāya mayhaṃ gantuṃ vaṭṭatī’’ti cittaṃ uppādesi. So purato gacchanto dvedhāpathaṃ disvā tassa matthake aṭṭhāsi. Bhaddāpi āgantvā, vanditvā aṭṭhāsi. Atha naṃ āha – ‘‘bhadde, tādisiṃ itthiṃ mama pacchato āgacchantiṃ disvā ‘ime pabbajitāpi vinā bhavituṃ na sakkontī’ti cintetvā amhesu paduṭṭhacitto mahājano apāyapūrako bhaveyya. Imasmiṃ dvedhāpathe tvaṃ ekaṃ gaṇha, ahamekena gamissāmī’’ti. ‘‘Āma, ayya, pabbajitānaṃ mātugāmo palibodho, ‘pabbajitvāpi vinā na bhavantī’ti amhākaṃ dosaṃ dassessanti, tumhe ekaṃ maggaṃ gaṇhatha, vinā bhavissāmā’’ti tikkhattuṃ padakkhiṇaṃ katvā catūsu ṭhānesu pañcapatiṭṭhitena vanditvā dasanakhasamodhānasamujjalaṃ añjaliṃ paggayha ‘‘satasahassakappaparimāṇe addhāne kato mittasanthavo ajja bhijjatī’’ti vatvā ‘‘tumhe dakkhiṇajātikā nāma, tumhākaṃ dakkhiṇamaggo vaṭṭati, mayaṃ mātugāmā nāma vāmajātikā, amhākaṃ vāmamaggo vaṭṭatī’’ti vanditvā maggaṃ paṭipannā. Tesaṃ dvedhābhūtakāle ayaṃ mahāpathavī ‘‘ahaṃ cakkavāḷasinerupabbate dhāretuṃ sakkontīpi tumhākaṃ guṇe dhāretuṃ na sakkomī’’ti vadantī viya viravamānā kampi, ākāse asanisaddo viya pavatti, cakkavāḷasinerupabbato unnadi.

    সম্মাসম্বুদ্ধো ৰেল়ুৰনমহাৰিহারে গন্ধকুটিযং নিসিন্নো পথৰীকম্পনসদ্দং সুত্ৰা ‘‘কিস্স নু খো পথৰী কম্পতী’’তি আৰজ্জেন্তো ‘‘পিপ্পলিমাণৰো চ ভদ্দা চ কাপিলানী মং উদ্দিস্স অপ্পমেয্যং সম্পত্তিং পহায পব্বজিতা। তেসং ৰিযোগট্ঠানে উভিন্নং গুণবলেন অযং পথৰীকম্পো জাতো। মযাপি এতেসং সঙ্গহং কাতুং ৰট্টতী’’তি গন্ধকুটিতো নিক্খম্ম সযমেৰ পত্তচীৰরমাদায অসীতিমহাথেরেসু কঞ্চিপি অনামন্তেত্ৰা তিগাৰুতং মগ্গং পচ্চুগ্গমনং কত্ৰা রাজগহস্স চ নালন্দায চ অন্তরে বহুপুত্তকনিগ্রোধরুক্খমূলে পল্লঙ্কং আভুজিত্ৰা নিসীদি। নিসীদন্তো পন অঞ্ঞতরপংসুকূলিকো ৰিয অনিসীদিত্ৰা বুদ্ধৰেসং গহেত্ৰা অসীতিহত্থঘনবুদ্ধরস্মিযো ৰিস্সজ্জেন্তো নিসীদি। ইতি তস্মিং খণে পণ্ণচ্ছত্তসকটচক্ককূটাগারাদিপ্পমাণা বুদ্ধরস্মিযো ইতো চিতো চ ৰিপ্ফরন্তিযো ৰিধাৰন্তিযো চন্দসহস্সসূরিযসহস্সউগ্গমনকালো ৰিয কুরুমানা তং ৰনন্তং একোভাসং অকংসু। দ্ৰত্তিংসমহাপুরিসলক্খণসিরিযা সমুজ্জলতারাগণেন ৰিয গগনং, সুপুপ্ফিতকমলকুৰলযেন ৰিয সলিলং, ৰনন্তং ৰিরোচিত্থ। নিগ্রোধরুক্খস্স নাম খন্ধো সেতো হোতি, পত্তানি নীলানি, পক্কানি রত্তানি। তস্মিং পন দিৰসে সতসাখো নিগ্রোধো সুৰণ্ণৰণ্ণোৰ অহোসি।

    Sammāsambuddho veḷuvanamahāvihāre gandhakuṭiyaṃ nisinno pathavīkampanasaddaṃ sutvā ‘‘kissa nu kho pathavī kampatī’’ti āvajjento ‘‘pippalimāṇavo ca bhaddā ca kāpilānī maṃ uddissa appameyyaṃ sampattiṃ pahāya pabbajitā. Tesaṃ viyogaṭṭhāne ubhinnaṃ guṇabalena ayaṃ pathavīkampo jāto. Mayāpi etesaṃ saṅgahaṃ kātuṃ vaṭṭatī’’ti gandhakuṭito nikkhamma sayameva pattacīvaramādāya asītimahātheresu kañcipi anāmantetvā tigāvutaṃ maggaṃ paccuggamanaṃ katvā rājagahassa ca nālandāya ca antare bahuputtakanigrodharukkhamūle pallaṅkaṃ ābhujitvā nisīdi. Nisīdanto pana aññatarapaṃsukūliko viya anisīditvā buddhavesaṃ gahetvā asītihatthaghanabuddharasmiyo vissajjento nisīdi. Iti tasmiṃ khaṇe paṇṇacchattasakaṭacakkakūṭāgārādippamāṇā buddharasmiyo ito cito ca vippharantiyo vidhāvantiyo candasahassasūriyasahassauggamanakālo viya kurumānā taṃ vanantaṃ ekobhāsaṃ akaṃsu. Dvattiṃsamahāpurisalakkhaṇasiriyā samujjalatārāgaṇena viya gaganaṃ, supupphitakamalakuvalayena viya salilaṃ, vanantaṃ virocittha. Nigrodharukkhassa nāma khandho seto hoti, pattāni nīlāni, pakkāni rattāni. Tasmiṃ pana divase satasākho nigrodho suvaṇṇavaṇṇova ahosi.

    মহাকস্সপত্থেরো ‘‘অযং অম্হাকং সত্থা ভৰিস্সতি, ইমং অহং উদ্দিস্স পব্বজিতো’’তি দিট্ঠট্ঠানতো পট্ঠায ওণতোণতোৰ গন্ত্ৰা তীসু ঠানেসু ৰন্দিত্ৰা ‘‘সত্থা মে, ভন্তে, ভগৰা, সাৰকোহমস্মি, সত্থা মে, ভন্তে, ভগৰা সাৰকোহমস্মী’’তি (সং॰ নি॰ ২.১৫৪) আহ। অথ নং ভগৰা আহ ‘‘কস্সপ, সচে ত্ৰং ইমং নিপচ্চকারং মহাপথৰিযা করেয্যাসি, সাপি ধারেতুং ন সক্কুণেয্য। তথাগতস্স এৰং গুণমহন্ততং জানতা তযা কতো নিপচ্চকারো ময্হং, লোমম্পি চালেতুং ন সক্কোতি। নিসীদ, কস্সপ, দাযজ্জং তে দস্সামী’’তি। অথস্স ভগৰা তীহি ওৰাদেহি উপসম্পদমদাসি। দত্ৰা বহুপুত্তকনিগ্রোধমূলতো নিক্খমিত্ৰা থেরং পচ্ছাসমণং কত্ৰা মগ্গং পটিপজ্জি। সত্থু সরীরং দ্ৰত্তিংসমহাপুরিসলক্খণৰিচিত্তং, মহাকস্সপস্স সরীরং সত্তমহাপুরিসলক্খণপটিমণ্ডিতং, সো কঞ্চনমহানাৰায পচ্ছাবদ্ধো ৰিয সত্থু পদানুপদিকং অনুগচ্ছি। সত্থা থোকং মগ্গং গন্ত্ৰা মগ্গা ওক্কম্ম অঞ্ঞতরস্মিং রুক্খমূলে নিসজ্জাকারং দস্সেসি। থেরো ‘‘নিসীদিতুকামো সত্থা’’তি ঞত্ৰা অত্তনো পারুপিতপটপিলোতিকসঙ্ঘাটিং চতুগ্গুণং কত্ৰা পঞ্ঞপেসি।

    Mahākassapatthero ‘‘ayaṃ amhākaṃ satthā bhavissati, imaṃ ahaṃ uddissa pabbajito’’ti diṭṭhaṭṭhānato paṭṭhāya oṇatoṇatova gantvā tīsu ṭhānesu vanditvā ‘‘satthā me, bhante, bhagavā, sāvakohamasmi, satthā me, bhante, bhagavā sāvakohamasmī’’ti (saṃ. ni. 2.154) āha. Atha naṃ bhagavā āha ‘‘kassapa, sace tvaṃ imaṃ nipaccakāraṃ mahāpathaviyā kareyyāsi, sāpi dhāretuṃ na sakkuṇeyya. Tathāgatassa evaṃ guṇamahantataṃ jānatā tayā kato nipaccakāro mayhaṃ, lomampi cāletuṃ na sakkoti. Nisīda, kassapa, dāyajjaṃ te dassāmī’’ti. Athassa bhagavā tīhi ovādehi upasampadamadāsi. Datvā bahuputtakanigrodhamūlato nikkhamitvā theraṃ pacchāsamaṇaṃ katvā maggaṃ paṭipajji. Satthu sarīraṃ dvattiṃsamahāpurisalakkhaṇavicittaṃ, mahākassapassa sarīraṃ sattamahāpurisalakkhaṇapaṭimaṇḍitaṃ, so kañcanamahānāvāya pacchābaddho viya satthu padānupadikaṃ anugacchi. Satthā thokaṃ maggaṃ gantvā maggā okkamma aññatarasmiṃ rukkhamūle nisajjākāraṃ dassesi. Thero ‘‘nisīditukāmo satthā’’ti ñatvā attano pārupitapaṭapilotikasaṅghāṭiṃ catugguṇaṃ katvā paññapesi.

    সত্থা তত্থ নিসীদিত্ৰা হত্থেন চীৰরং পরিমজ্জন্তো ‘‘মুদুকা খো ত্যাযং, কস্সপ, পটপিলোতিকসঙ্ঘাটী’’তি (সং॰ নি॰ ২.১৫৪) আহ। থেরো ‘‘সত্থা মম সঙ্ঘাটিযা মুদুভাৰং কথেতি, পারুপিতুকামো ভৰিস্সতী’’তি ঞত্ৰা ‘‘পারুপতু, ভন্তে, ভগৰা সঙ্ঘাটি’’ন্তি আহ। ‘‘ত্ৰং কিং পারুপিস্সসি, কস্সপা’’তি? ‘‘তুম্হাকং নিৰাসনং লভন্তো পারুপিস্সামি, ভন্তে’’তি। ‘‘কিং পন ত্ৰং, কস্সপ, ইমং পরিভোগজিণ্ণং পংসুকূলং ধারেতুং সক্খিস্সসি? মযা হি ইমস্স পংসুকূলস্স গহিতদিৰসে উদকপরিযন্তং কত্ৰা মহাপথৰী কম্পি, ইমং বুদ্ধানং পরিভোগজিণ্ণচীৰরং নাম ন সক্কা পরিত্তগুণেন ধারেতুং, পটিবলেনেৰিদং পটিপত্তিপূরণসমত্থেন জাতিপংসুকূলিকেন ধারেতুং ৰট্টতী’’তি ৰত্ৰা থেরেন সদ্ধিং চীৰরং পরিৰত্তেসি।

    Satthā tattha nisīditvā hatthena cīvaraṃ parimajjanto ‘‘mudukā kho tyāyaṃ, kassapa, paṭapilotikasaṅghāṭī’’ti (saṃ. ni. 2.154) āha. Thero ‘‘satthā mama saṅghāṭiyā mudubhāvaṃ katheti, pārupitukāmo bhavissatī’’ti ñatvā ‘‘pārupatu, bhante, bhagavā saṅghāṭi’’nti āha. ‘‘Tvaṃ kiṃ pārupissasi, kassapā’’ti? ‘‘Tumhākaṃ nivāsanaṃ labhanto pārupissāmi, bhante’’ti. ‘‘Kiṃ pana tvaṃ, kassapa, imaṃ paribhogajiṇṇaṃ paṃsukūlaṃ dhāretuṃ sakkhissasi? Mayā hi imassa paṃsukūlassa gahitadivase udakapariyantaṃ katvā mahāpathavī kampi, imaṃ buddhānaṃ paribhogajiṇṇacīvaraṃ nāma na sakkā parittaguṇena dhāretuṃ, paṭibalenevidaṃ paṭipattipūraṇasamatthena jātipaṃsukūlikena dhāretuṃ vaṭṭatī’’ti vatvā therena saddhiṃ cīvaraṃ parivattesi.

    এৰং পন চীৰরপরিৰত্তনং কত্ৰা থেরস্স পারুতচীৰরং ভগৰা পারুপি, সত্থু চীৰরং থেরো। তস্মিং সমযে অচেতনাপি অযং মহাপথৰী ‘‘দুক্করং, ভন্তে, অকত্থ, অত্তনা পারুতচীৰরং সাৰকস্স দিন্নপুব্বো নাম নত্থি, অহং তুম্হাকং গুণং ধারেতুং ন সক্কোমী’’তি ৰদন্তী ৰিয উদকপরিযন্তং কত্ৰা কম্পি। থেরোপি ‘‘লদ্ধং দানি মযা বুদ্ধানং পরিভোগচীৰরং, কিং মে ইদানি উত্তরি কত্তব্বং অত্থী’’তি উন্নতিং অকত্ৰা বুদ্ধানং সন্তিকেযেৰ তেরস ধুতগুণে সমাদায সত্তদিৰসমত্তং পুথুজ্জনো অহোসি, অট্ঠমে দিৰসে সহ পটিসম্ভিদাহি অরহত্তং পাপুণি। তেন ৰুত্তং অপদানে (অপ॰ থের ১.১.৩৯৮-৪২০) –

    Evaṃ pana cīvaraparivattanaṃ katvā therassa pārutacīvaraṃ bhagavā pārupi, satthu cīvaraṃ thero. Tasmiṃ samaye acetanāpi ayaṃ mahāpathavī ‘‘dukkaraṃ, bhante, akattha, attanā pārutacīvaraṃ sāvakassa dinnapubbo nāma natthi, ahaṃ tumhākaṃ guṇaṃ dhāretuṃ na sakkomī’’ti vadantī viya udakapariyantaṃ katvā kampi. Theropi ‘‘laddhaṃ dāni mayā buddhānaṃ paribhogacīvaraṃ, kiṃ me idāni uttari kattabbaṃ atthī’’ti unnatiṃ akatvā buddhānaṃ santikeyeva terasa dhutaguṇe samādāya sattadivasamattaṃ puthujjano ahosi, aṭṭhame divase saha paṭisambhidāhi arahattaṃ pāpuṇi. Tena vuttaṃ apadāne (apa. thera 1.1.398-420) –

    ‘‘পদুমুত্তরস্স ভগৰতো, লোকজেট্ঠস্স তাদিনো।

    ‘‘Padumuttarassa bhagavato, lokajeṭṭhassa tādino;

    নিব্বুতে লোকনাথম্হি, পূজং কুব্বন্তি সত্থুনো॥

    Nibbute lokanāthamhi, pūjaṃ kubbanti satthuno.

    ‘‘উদগ্গচিত্তা জনতা, আমোদিতপমোদিতা।

    ‘‘Udaggacittā janatā, āmoditapamoditā;

    তেসু সংৰেগজাতেসু, পীতি সে উদপজ্জথ॥

    Tesu saṃvegajātesu, pīti se udapajjatha.

    ‘‘ঞাতিমিত্তে সমানেত্ৰা, ইদং ৰচনমব্রৰিং।

    ‘‘Ñātimitte samānetvā, idaṃ vacanamabraviṃ;

    পরিনিব্বুতো মহাৰীরো, হন্দ পূজং করোমসে॥

    Parinibbuto mahāvīro, handa pūjaṃ karomase.

    ‘‘সাধূতি তে পটিস্সুত্ৰা, ভিয্যো হাসং জনিংসু মে।

    ‘‘Sādhūti te paṭissutvā, bhiyyo hāsaṃ janiṃsu me;

    বুদ্ধস্মিং লোকনাথম্হি, কাহাম পুঞ্ঞসঞ্চযং॥

    Buddhasmiṃ lokanāthamhi, kāhāma puññasañcayaṃ.

    ‘‘অগ্ঘিযং সুকতং কত্ৰা, সতহত্থসমুগ্গতং।

    ‘‘Agghiyaṃ sukataṃ katvā, satahatthasamuggataṃ;

    দিযড্ঢহত্থপত্থটং, ৰিমানং নভমুগ্গতং॥

    Diyaḍḍhahatthapatthaṭaṃ, vimānaṃ nabhamuggataṃ.

    ‘‘কত্ৰান হম্মিযং তত্থ, তালপন্তীহি চিত্তিতং।

    ‘‘Katvāna hammiyaṃ tattha, tālapantīhi cittitaṃ;

    সকং চিত্তং পসাদেত্ৰা, চেতিযং পূজযুত্তমং॥

    Sakaṃ cittaṃ pasādetvā, cetiyaṃ pūjayuttamaṃ.

    ‘‘অগ্গিক্খন্ধোৰ জলিতো, কিংসুকো ইৰ ফুল্লিতো।

    ‘‘Aggikkhandhova jalito, kiṃsuko iva phullito;

    ইন্দলট্ঠীৰ আকাসে, ওভাসেতি চতুদ্দিসা॥

    Indalaṭṭhīva ākāse, obhāseti catuddisā.

    ‘‘তত্থ চিত্তং পসাদেত্ৰা, কত্ৰান কুসলং বহুং।

    ‘‘Tattha cittaṃ pasādetvā, katvāna kusalaṃ bahuṃ;

    পুব্বকম্মং সরিত্ৰান, তিদসং উপপজ্জহং॥

    Pubbakammaṃ saritvāna, tidasaṃ upapajjahaṃ.

    ‘‘সহস্সযুত্তং হযৰাহিং, দিব্বযানমধিট্ঠিতো।

    ‘‘Sahassayuttaṃ hayavāhiṃ, dibbayānamadhiṭṭhito;

    উব্বিদ্ধং ভৰনং ময্হং, সত্তভূমং সমুগ্গতং॥

    Ubbiddhaṃ bhavanaṃ mayhaṃ, sattabhūmaṃ samuggataṃ.

    ‘‘কূটাগারসহস্সানি, সব্বসোণ্ণমযা অহুং।

    ‘‘Kūṭāgārasahassāni, sabbasoṇṇamayā ahuṃ;

    জলন্তি সকতেজেন, দিসা সব্বা পভাসযং॥

    Jalanti sakatejena, disā sabbā pabhāsayaṃ.

    ‘‘সন্তি অঞ্ঞেপি নিয্যূহা, লোহিতঙ্গমযা তদা।

    ‘‘Santi aññepi niyyūhā, lohitaṅgamayā tadā;

    তেপি জোতন্তি আভায, সমন্তা চতুরো দিসা॥

    Tepi jotanti ābhāya, samantā caturo disā.

    ‘‘পুঞ্ঞকম্মাভিনিব্বত্তা, কূটাগারা সুনিম্মিতা।

    ‘‘Puññakammābhinibbattā, kūṭāgārā sunimmitā;

    মণিমযাপি জোতন্তি, দিসা দস সমন্ততো॥

    Maṇimayāpi jotanti, disā dasa samantato.

    ‘‘তেসং উজ্জোতমানানং, ওভাসো ৰিপুলো অহু।

    ‘‘Tesaṃ ujjotamānānaṃ, obhāso vipulo ahu;

    সব্বে দেৰে অভিভোমি, পুঞ্ঞকম্মস্সিদং ফলং॥

    Sabbe deve abhibhomi, puññakammassidaṃ phalaṃ.

    ‘‘সট্ঠিকপ্পসহস্সম্হি, উব্বিদ্ধো নাম খত্তিযো।

    ‘‘Saṭṭhikappasahassamhi, ubbiddho nāma khattiyo;

    চাতুরন্তো ৰিজিতাৰী, পথৰিং আৰসিং অহং॥

    Cāturanto vijitāvī, pathaviṃ āvasiṃ ahaṃ.

    ‘‘তথেৰ ভদ্দকে কপ্পে, তিংসক্খত্তুং অহোসহং।

    ‘‘Tatheva bhaddake kappe, tiṃsakkhattuṃ ahosahaṃ;

    সককম্মাভিরদ্ধোম্হি, চক্কৰত্তী মহব্বলো॥

    Sakakammābhiraddhomhi, cakkavattī mahabbalo.

    ‘‘সত্তরতনসম্পন্নো, চতুদীপম্হি ইস্সরো।

    ‘‘Sattaratanasampanno, catudīpamhi issaro;

    তত্থাপি ভৰনং ময্হং, ইন্দলট্ঠীৰ উগ্গতং॥

    Tatthāpi bhavanaṃ mayhaṃ, indalaṭṭhīva uggataṃ.

    ‘‘আযামতো চতুব্বীসং, ৰিত্থারেন চ দ্ৰাদস।

    ‘‘Āyāmato catubbīsaṃ, vitthārena ca dvādasa;

    রম্মণং নাম নগরং, দল়্হপাকারতোরণং॥

    Rammaṇaṃ nāma nagaraṃ, daḷhapākāratoraṇaṃ.

    ‘‘আযামতো পঞ্চসতং, ৰিত্থারেন তদড্ঢকং।

    ‘‘Āyāmato pañcasataṃ, vitthārena tadaḍḍhakaṃ;

    আকিণ্ণং জনকাযেহি, তিদসানং পুরং ৰিয॥

    Ākiṇṇaṃ janakāyehi, tidasānaṃ puraṃ viya.

    ‘‘যথা সূচিঘরে সূচী, পক্খিত্তা পণ্ণৰীসতি।

    ‘‘Yathā sūcighare sūcī, pakkhittā paṇṇavīsati;

    অঞ্ঞমঞ্ঞং পঘট্টেন্তি, আকিণ্ণং হোতি লঙ্কতং॥

    Aññamaññaṃ paghaṭṭenti, ākiṇṇaṃ hoti laṅkataṃ.

    ‘‘এৰম্পি নগরং ময্হং, হত্থিস্সরথসংকুলং।

    ‘‘Evampi nagaraṃ mayhaṃ, hatthissarathasaṃkulaṃ;

    মনুস্সেহি সদাকিণ্ণং, রম্মণং নগরুত্তমং॥

    Manussehi sadākiṇṇaṃ, rammaṇaṃ nagaruttamaṃ.

    ‘‘তত্থ ভুত্ৰা পিৰিত্ৰা চ, পুন দেৰত্তনং গতো।

    ‘‘Tattha bhutvā pivitvā ca, puna devattanaṃ gato;

    ভৰে পচ্ছিমকে ময্হং, অহোসি কুলসম্পদা॥

    Bhave pacchimake mayhaṃ, ahosi kulasampadā.

    ‘‘ব্রহ্মঞ্ঞকুলসম্ভূতো, মহারতনসঞ্চযো।

    ‘‘Brahmaññakulasambhūto, mahāratanasañcayo;

    অসীতিকোটিযো হিত্ৰা, হিরঞ্ঞস্সাপি পব্বজিং॥

    Asītikoṭiyo hitvā, hiraññassāpi pabbajiṃ.

    ‘‘পটিসম্ভিদা চতস্সো…পে॰… কতং বুদ্ধস্স সাসন’’ন্তি॥

    ‘‘Paṭisambhidā catasso…pe… kataṃ buddhassa sāsana’’nti.

    অথ নং সত্থা ‘‘কস্সপো, ভিক্খৰে, চন্দূপমো কুলানি উপসঙ্কমতি অপকস্সেৰ কাযং, অপকস্স চিত্তং, নিচ্চনৰকো কুলেসু অপ্পগব্ভো’’তি এৰমাদিনা (সং॰ নি॰ ২.১৪৬) পসংসিত্ৰা অপরভাগে অরিযগণমজ্ঝে নিসিন্নো ‘‘এতদগ্গং, ভিক্খৰে, মম সাৰকানং ভিক্খূনং ধুতৰাদানং যদিদং মহাকস্সপো’’তি (অ॰ নি॰ ১.১৮৮, ১৯১) ধুতঙ্গধরানং অগ্গট্ঠানে ঠপেসি। সো ৰিৰেকাভিরতিকিত্তনমুখেন ভিক্খূনং ওৰাদং দেন্তো অত্তনো পটিপত্তিং পকাসেন্তো –

    Atha naṃ satthā ‘‘kassapo, bhikkhave, candūpamo kulāni upasaṅkamati apakasseva kāyaṃ, apakassa cittaṃ, niccanavako kulesu appagabbho’’ti evamādinā (saṃ. ni. 2.146) pasaṃsitvā aparabhāge ariyagaṇamajjhe nisinno ‘‘etadaggaṃ, bhikkhave, mama sāvakānaṃ bhikkhūnaṃ dhutavādānaṃ yadidaṃ mahākassapo’’ti (a. ni. 1.188, 191) dhutaṅgadharānaṃ aggaṭṭhāne ṭhapesi. So vivekābhiratikittanamukhena bhikkhūnaṃ ovādaṃ dento attano paṭipattiṃ pakāsento –

    ১০৫৪.

    1054.

    ‘‘ন গণেন পুরক্খতো চরে, ৰিমনো হোতি সমাধি দুল্লভো।

    ‘‘Na gaṇena purakkhato care, vimano hoti samādhi dullabho;

    নানাজনসঙ্গহো দুখো, ইতি দিস্ৰান গণং ন রোচযে॥

    Nānājanasaṅgaho dukho, iti disvāna gaṇaṃ na rocaye.

    ১০৫৫.

    1055.

    ‘‘ন কুলানি উপব্বজে মুনি, ৰিমনো হোতি সমাধি দুল্লভো।

    ‘‘Na kulāni upabbaje muni, vimano hoti samādhi dullabho;

    সো উস্সুক্কো রসানুগিদ্ধো, অত্থং রিঞ্চতি যো সুখাৰহো॥

    So ussukko rasānugiddho, atthaṃ riñcati yo sukhāvaho.

    ১০৫৬.

    1056.

    ‘‘পঙ্কোতি হি নং অৰেদযুং, যাযং ৰন্দনপূজনা কুলেসু।

    ‘‘Paṅkoti hi naṃ avedayuṃ, yāyaṃ vandanapūjanā kulesu;

    সুখুমং সল্লং দুরুব্বহং, সক্কারো কাপুরিসেন দুজ্জহো॥

    Sukhumaṃ sallaṃ durubbahaṃ, sakkāro kāpurisena dujjaho.

    ১০৫৭.

    1057.

    ‘‘সেনাসনম্হা ওরুয্হ, নগরং পিণ্ডায পাৰিসিং।

    ‘‘Senāsanamhā oruyha, nagaraṃ piṇḍāya pāvisiṃ;

    ভুঞ্জন্তং পুরিসং কুট্ঠিং, সক্কচ্চং তং উপট্ঠহিং॥

    Bhuñjantaṃ purisaṃ kuṭṭhiṃ, sakkaccaṃ taṃ upaṭṭhahiṃ.

    ১০৫৮.

    1058.

    ‘‘সো মে পক্কেন হত্থেন, আলোপং উপনামযি।

    ‘‘So me pakkena hatthena, ālopaṃ upanāmayi;

    আলোপং পক্খিপন্তস্স, অঙ্গুলি চেত্থ ছিজ্জথ॥

    Ālopaṃ pakkhipantassa, aṅguli cettha chijjatha.

    ১০৫৯.

    1059.

    ‘‘কুট্টমূলঞ্চ নিস্সায, আলোপং তং অভুঞ্জিসং।

    ‘‘Kuṭṭamūlañca nissāya, ālopaṃ taṃ abhuñjisaṃ;

    ভুঞ্জমানে ৰা ভুত্তে ৰা, জেগুচ্ছং মে ন ৰিজ্জতি॥

    Bhuñjamāne vā bhutte vā, jegucchaṃ me na vijjati.

    ১০৬০.

    1060.

    ‘‘উত্তিট্ঠপিণ্ডো আহারো, পূতিমুত্তঞ্চ ওসধং।

    ‘‘Uttiṭṭhapiṇḍo āhāro, pūtimuttañca osadhaṃ;

    সেনাসনং রুক্খমূলং, পংসুকূলঞ্চ চীৰরং।

    Senāsanaṃ rukkhamūlaṃ, paṃsukūlañca cīvaraṃ;

    যস্সেতে অভিসম্ভুত্ৰা, স ৰে চাতুদ্দিসো নরো॥

    Yassete abhisambhutvā, sa ve cātuddiso naro.

    ১০৬১.

    1061.

    ‘‘যত্থ একে ৰিহঞ্ঞন্তি, আরুহন্তা সিলুচ্চযং।

    ‘‘Yattha eke vihaññanti, āruhantā siluccayaṃ;

    তত্থ বুদ্ধস্স দাযাদো, সম্পজানো পটিস্সতো।

    Tattha buddhassa dāyādo, sampajāno paṭissato;

    ইদ্ধিবলেনুপত্থদ্ধো, কস্সপো অভিরূহতি॥

    Iddhibalenupatthaddho, kassapo abhirūhati.

    ১০৬২.

    1062.

    ‘‘পিণ্ডপাতপটিক্কন্তো, সেলমারুয্হ কস্সপো।

    ‘‘Piṇḍapātapaṭikkanto, selamāruyha kassapo;

    ঝাযতি অনুপাদানো, পহীনভযভেরৰো॥

    Jhāyati anupādāno, pahīnabhayabheravo.

    ১০৬৩.

    1063.

    ‘‘পিণ্ডপাতপটিক্কন্তো, সেলমারুয্হ কস্সপো।

    ‘‘Piṇḍapātapaṭikkanto, selamāruyha kassapo;

    ঝাযতি অনুপাদানো, ডয্হমানেসু নিব্বুতো॥

    Jhāyati anupādāno, ḍayhamānesu nibbuto.

    ১০৬৪.

    1064.

    ‘‘পিণ্ডপাতপটিক্কন্তো, সেলমারুয্হ কস্সপো।

    ‘‘Piṇḍapātapaṭikkanto, selamāruyha kassapo;

    ঝাযতি অনুপাদানো, কতকিচ্চো অনাসৰো॥

    Jhāyati anupādāno, katakicco anāsavo.

    ১০৬৫.

    1065.

    ‘‘করেরিমালাৰিততা, ভূমিভাগা মনোরমা।

    ‘‘Karerimālāvitatā, bhūmibhāgā manoramā;

    কুঞ্জরাভিরুদা রম্মা, তে সেলা রমযন্তি মং॥

    Kuñjarābhirudā rammā, te selā ramayanti maṃ.

    ১০৬৬.

    1066.

    ‘‘নীলব্ভৰণ্ণা রুচিরা, ৰারিসীতা সুচিন্ধরা।

    ‘‘Nīlabbhavaṇṇā rucirā, vārisītā sucindharā;

    ইন্দগোপকসঞ্ছন্না, তে সেলা রমযন্তি মং॥

    Indagopakasañchannā, te selā ramayanti maṃ.

    ১০৬৭.

    1067.

    ‘‘নীলব্ভকূটসদিসা, কূটাগারৰরূপমা।

    ‘‘Nīlabbhakūṭasadisā, kūṭāgāravarūpamā;

    ৰারণাভিরুদা রম্মা, তে সেলা রমযন্তি মং॥

    Vāraṇābhirudā rammā, te selā ramayanti maṃ.

    ১০৬৮.

    1068.

    ‘‘অভিৰুট্ঠা রম্মতলা, নগা ইসিভি সেৰিতা।

    ‘‘Abhivuṭṭhā rammatalā, nagā isibhi sevitā;

    অব্ভুন্নদিতা সিখীহি, তে সেলা রমযন্তি মং॥

    Abbhunnaditā sikhīhi, te selā ramayanti maṃ.

    ১০৬৯.

    1069.

    ‘‘অলং ঝাযিতুকামস্স, পহিতত্তস্স মে সতো।

    ‘‘Alaṃ jhāyitukāmassa, pahitattassa me sato;

    অলং মে অত্থকামস্স, পহিতত্তস্স ভিক্খুনো॥

    Alaṃ me atthakāmassa, pahitattassa bhikkhuno.

    ১০৭০.

    1070.

    ‘‘অলং মে ফাসুকামস্স, পহিতত্তস্স ভিক্খুনো।

    ‘‘Alaṃ me phāsukāmassa, pahitattassa bhikkhuno;

    অলং মে যোগকামস্স, পহিতত্তস্স তাদিনো॥

    Alaṃ me yogakāmassa, pahitattassa tādino.

    ১০৭১.

    1071.

    ‘‘উমাপুপ্ফেন সমানা, গগনাৰব্ভছাদিতা।

    ‘‘Umāpupphena samānā, gaganāvabbhachāditā;

    নানাদিজগণাকিণ্ণা, তে সেলা রমযন্তি মং॥

    Nānādijagaṇākiṇṇā, te selā ramayanti maṃ.

    ১০৭২.

    1072.

    ‘‘অনাকিণ্ণা গহট্ঠেহি, মিগসঙ্ঘনিসেৰিতা।

    ‘‘Anākiṇṇā gahaṭṭhehi, migasaṅghanisevitā;

    নানাদিজগণাকিণ্ণা, তে সেলা রমযন্তি মং॥

    Nānādijagaṇākiṇṇā, te selā ramayanti maṃ.

    ১০৭৩.

    1073.

    ‘‘অচ্ছোদিকা পুথুসিলা, গোনঙ্গুলমিগাযুতা।

    ‘‘Acchodikā puthusilā, gonaṅgulamigāyutā;

    অম্বুসেৰালসঞ্ছন্না, তে সেলা রমযন্তি মং॥

    Ambusevālasañchannā, te selā ramayanti maṃ.

    ১০৭৪.

    1074.

    ‘‘ন পঞ্চঙ্গিকেন তূরিযেন, রতি মে হোতি তাদিসী।

    ‘‘Na pañcaṅgikena tūriyena, rati me hoti tādisī;

    যথা একগ্গচিত্তস্স, সম্মা ধম্মং ৰিপস্সতো॥

    Yathā ekaggacittassa, sammā dhammaṃ vipassato.

    ১০৭৫.

    1075.

    ‘‘কম্মং বহুকং ন কারযে, পরিৰজ্জেয্য জনং ন উয্যমে।

    ‘‘Kammaṃ bahukaṃ na kāraye, parivajjeyya janaṃ na uyyame;

    উস্সুক্কো সো রসানুগিদ্ধো, অত্থং রিঞ্চতি যো সুখাৰহো॥

    Ussukko so rasānugiddho, atthaṃ riñcati yo sukhāvaho.

    ১০৭৬.

    1076.

    ‘‘কম্মং বহুকং ন কারযে, পরিৰজ্জেয্য অনত্তনেয্যমেতং।

    ‘‘Kammaṃ bahukaṃ na kāraye, parivajjeyya anattaneyyametaṃ;

    কিচ্ছতি কাযো কিলমতি, দুক্খিতো সো সমথং ন ৰিন্দতি॥

    Kicchati kāyo kilamati, dukkhito so samathaṃ na vindati.

    ১০৭৭.

    1077.

    ‘‘ওট্ঠপ্পহতমত্তেন, অত্তানম্পি ন পস্সতি।

    ‘‘Oṭṭhappahatamattena, attānampi na passati;

    পত্থদ্ধগীৰো চরতি, অহং সেয্যোতি মঞ্ঞতি॥

    Patthaddhagīvo carati, ahaṃ seyyoti maññati.

    ১০৭৮.

    1078.

    ‘‘অসেয্যো সেয্যসমানং, বালো মঞ্ঞতি অত্তানং।

    ‘‘Aseyyo seyyasamānaṃ, bālo maññati attānaṃ;

    ন তং ৰিঞ্ঞূ পসংসন্তি, পত্থদ্ধমানসং নরং॥

    Na taṃ viññū pasaṃsanti, patthaddhamānasaṃ naraṃ.

    ১০৭৯.

    1079.

    ‘‘যো চ সেয্যোহমস্মীতি, নাহং সেয্যোতি ৰা পন।

    ‘‘Yo ca seyyohamasmīti, nāhaṃ seyyoti vā pana;

    হীনো তংসদিসো ৰাতি, ৰিধাসু ন ৰিকম্পতি॥

    Hīno taṃsadiso vāti, vidhāsu na vikampati.

    ১০৮০.

    1080.

    ‘‘পঞ্ঞৰন্তং তথা তাদিং, সীলেসু সুসমাহিতং।

    ‘‘Paññavantaṃ tathā tādiṃ, sīlesu susamāhitaṃ;

    চেতোসমথমনুযুত্তং, তঞ্চে ৰিঞ্ঞূ পসংসরে॥

    Cetosamathamanuyuttaṃ, tañce viññū pasaṃsare.

    ১০৮১.

    1081.

    ‘‘যস্স সব্রহ্মচারীসু, গারৰো নূপলব্ভতি।

    ‘‘Yassa sabrahmacārīsu, gāravo nūpalabbhati;

    আরকা হোতি সদ্ধম্মা, নভতো পুথৰী যথা॥

    Ārakā hoti saddhammā, nabhato puthavī yathā.

    ১০৮২.

    1082.

    ‘‘যেসঞ্চ হিরি ওত্তপ্পং, সদা সম্মা উপট্ঠিতং।

    ‘‘Yesañca hiri ottappaṃ, sadā sammā upaṭṭhitaṃ;

    ৰিরূল়্হব্রহ্মচরিযা তে, তেসং খীণা পুনব্ভৰা॥

    Virūḷhabrahmacariyā te, tesaṃ khīṇā punabbhavā.

    ১০৮৩.

    1083.

    ‘‘উদ্ধতো চপলো ভিক্খু, পংসুকূলেন পারুতো।

    ‘‘Uddhato capalo bhikkhu, paṃsukūlena pāruto;

    কপীৰ সীহচম্মেন, ন সো তেনুপসোভতি॥

    Kapīva sīhacammena, na so tenupasobhati.

    ১০৮৪.

    1084.

    ‘‘অনুদ্ধতো অচপলো, নিপকো সংৰুতিন্দ্রিযো।

    ‘‘Anuddhato acapalo, nipako saṃvutindriyo;

    সোভতি পংসুকূলেন, সীহোৰ গিরিগব্ভরে॥

    Sobhati paṃsukūlena, sīhova girigabbhare.

    ১০৮৫.

    1085.

    ‘‘এতে সম্বহুলা দেৰা, ইদ্ধিমন্তো যসস্সিনো।

    ‘‘Ete sambahulā devā, iddhimanto yasassino;

    দসদেৰসহস্সানি, সব্বে তে ব্রহ্মকাযিকা॥

    Dasadevasahassāni, sabbe te brahmakāyikā.

    ১০৮৬.

    1086.

    ‘‘ধম্মসেনাপতিং ৰীরং, মহাঝাযিং সমাহিতং।

    ‘‘Dhammasenāpatiṃ vīraṃ, mahājhāyiṃ samāhitaṃ;

    সারিপুত্তং নমস্সন্তা, তিট্ঠন্তি পঞ্জলীকতা॥

    Sāriputtaṃ namassantā, tiṭṭhanti pañjalīkatā.

    ১০৮৭.

    1087.

    ‘‘নমো তে পুরিসাজঞ্ঞ, নমো তে পুরিসুত্তম।

    ‘‘Namo te purisājañña, namo te purisuttama;

    যস্স তে নাভিজানাম, যম্পি নিস্সায ঝাযতি॥

    Yassa te nābhijānāma, yampi nissāya jhāyati.

    ১০৮৮.

    1088.

    ‘‘অচ্ছেরং ৰত বুদ্ধানং, গম্ভীরো গোচরো সকো।

    ‘‘Accheraṃ vata buddhānaṃ, gambhīro gocaro sako;

    যে মযং নাভিজানাম, ৰালৰেধিসমাগতা॥

    Ye mayaṃ nābhijānāma, vālavedhisamāgatā.

    ১০৮৯.

    1089.

    ‘‘তং তথা দেৰকাযেহি, পূজিতং পূজনারহং।

    ‘‘Taṃ tathā devakāyehi, pūjitaṃ pūjanārahaṃ;

    সারিপুত্তং তদা দিস্ৰা, কপ্পিনস্স সিতং অহু॥

    Sāriputtaṃ tadā disvā, kappinassa sitaṃ ahu.

    ১০৯০.

    1090.

    ‘‘যাৰতা বুদ্ধখেত্তম্হি, ঠপযিত্ৰা মহামুনিং।

    ‘‘Yāvatā buddhakhettamhi, ṭhapayitvā mahāmuniṃ;

    ধুতগুণে ৰিসিট্ঠোহং, সদিসো মে ন ৰিজ্জতি॥

    Dhutaguṇe visiṭṭhohaṃ, sadiso me na vijjati.

    ১০৯১.

    1091.

    ‘‘পরিচিণ্ণো মযা সত্থা, কতং বুদ্ধস্স সাসনং।

    ‘‘Pariciṇṇo mayā satthā, kataṃ buddhassa sāsanaṃ;

    ওহিতো গরুকো ভারো, নত্থি দানি পুনব্ভৰো॥

    Ohito garuko bhāro, natthi dāni punabbhavo.

    ১০৯২.

    1092.

    ‘‘ন চীৰরে ন সযনে, ভোজনে নুপলিম্পতি।

    ‘‘Na cīvare na sayane, bhojane nupalimpati;

    গোতমো অনপ্পমেয্যো, মূল়ালপুপ্ফং ৰিমলংৰ।

    Gotamo anappameyyo, mūḷālapupphaṃ vimalaṃva;

    অম্বুনা নেক্খম্মনিন্নো, তিভৰাভিনিস্সটো॥

    Ambunā nekkhammaninno, tibhavābhinissaṭo.

    ১০৯৩.

    1093.

    ‘‘সতিপট্ঠানগীৰো সো, সদ্ধাহত্থো মহামুনি।

    ‘‘Satipaṭṭhānagīvo so, saddhāhattho mahāmuni;

    পঞ্ঞাসীসো মহাঞাণী, সদা চরতি নিব্বুতো’’তি॥ –

    Paññāsīso mahāñāṇī, sadā carati nibbuto’’ti. –

    ইমা গাথা অভাসি। তত্থ আদিতো তিস্সো গাথা গণেসু কুলেসু চ সংসট্ঠে ভিক্খূ দিস্ৰা তেসং ওৰাদদানৰসেন ৰুত্তা।

    Imā gāthā abhāsi. Tattha ādito tisso gāthā gaṇesu kulesu ca saṃsaṭṭhe bhikkhū disvā tesaṃ ovādadānavasena vuttā.

    তত্থ ন গণেন পুরক্খতো চরেতি ভিক্খুগণেহি পুরক্খতো পরিৰারিতো হুত্ৰা ন চরেয্য ন ৰিহরেয্য। কস্মা? ৰিমনো হোতি সমাধি দুল্লভো গণং পরিহরন্তস্স দুক্খুপ্পত্তিযা ব্যাকুলমনতায, উদ্দেসেন ওৰাদেন অনুসাসনিযা অনুগ্গহং করোন্তো যথানুসিট্ঠং অপ্পটিপত্তিযা চ ৰিমনো ৰিকারিভূতচিত্তো হোতি, ততো সংসগ্গেন একগ্গতং অলভন্তস্স সমাধি দুল্লভো হোতি। তথারূপস্স হি উপচারসমাধিমত্তম্পি ন ইজ্ঝতি, পগেৰ ইতরো। নানাজনসঙ্গহোতি নানজ্ঝাসযস্স নানারুচিকস্স জনস্স পেয্যখজ্জাদিনা সঙ্গহো। দুখোতি কিচ্ছো কসিরো। ইতি দিস্ৰানাতি এৰং গণসঙ্গহে বহুৰিধং আদীনৰং দিস্ৰা ঞাণচক্খুনা ওলোকেত্ৰা। গণং গণৰাসং ন রোচযে ন রোচেয্য ন ইচ্ছেয্য।

    Tattha na gaṇena purakkhato careti bhikkhugaṇehi purakkhato parivārito hutvā na careyya na vihareyya. Kasmā? Vimano hoti samādhi dullabho gaṇaṃ pariharantassa dukkhuppattiyā byākulamanatāya, uddesena ovādena anusāsaniyā anuggahaṃ karonto yathānusiṭṭhaṃ appaṭipattiyā ca vimano vikāribhūtacitto hoti, tato saṃsaggena ekaggataṃ alabhantassa samādhi dullabho hoti. Tathārūpassa hi upacārasamādhimattampi na ijjhati, pageva itaro. Nānājanasaṅgahoti nānajjhāsayassa nānārucikassa janassa peyyakhajjādinā saṅgaho. Dukhoti kiccho kasiro. Iti disvānāti evaṃ gaṇasaṅgahe bahuvidhaṃ ādīnavaṃ disvā ñāṇacakkhunā oloketvā. Gaṇaṃ gaṇavāsaṃ na rocaye na roceyya na iccheyya.

    ন কুলানি উপব্বজে মুনীতি ইমস্মিং সাসনে পব্বজিতো খত্তিযাদিকুলূপকো হুত্ৰা ন উপগচ্ছেয্য। কিংকারণা? ৰিমনো হোতি সমাধি দুল্লভো। সো উস্সুক্কো কুলূপসঙ্কমনে উস্সুক্কং আপন্নো কুলেসু লদ্ধব্বেসু মধুরাদিরসেসু অনুগিদ্ধো গেধং আপন্নো তত্থ উপ্পন্নেসু কিচ্চকরণীযেসু অত্তনাৰ যোগং আপজ্জন্তো। অত্থং রিঞ্চতি যো সুখাৰহোতি যো অত্তনো মগ্গফলনিব্বানসুখাৰহো তং সীলৰিসুদ্ধিআদিসঙ্খাতং অত্থং রিঞ্চতি জহতি, নানুযুঞ্জতীতি অত্থো।

    Na kulāni upabbaje munīti imasmiṃ sāsane pabbajito khattiyādikulūpako hutvā na upagaccheyya. Kiṃkāraṇā? Vimano hoti samādhi dullabho. So ussukko kulūpasaṅkamane ussukkaṃ āpanno kulesu laddhabbesu madhurādirasesu anugiddho gedhaṃ āpanno tattha uppannesu kiccakaraṇīyesu attanāva yogaṃ āpajjanto. Atthaṃ riñcati yo sukhāvahoti yo attano maggaphalanibbānasukhāvaho taṃ sīlavisuddhiādisaṅkhātaṃ atthaṃ riñcati jahati, nānuyuñjatīti attho.

    ততিযগাথা হেট্ঠা ৰুত্তা এৰ।

    Tatiyagāthā heṭṭhā vuttā eva.

    সেনাসনম্হা ওরুয্হাতিআদিকা চতস্সো গাথা পচ্চযেসু অত্তনো সন্তোসদস্সনমুখেন ‘‘ভিক্খুনা নাম এৰং পটিপজ্জিতব্ব’’ন্তি ভিক্খূনং ওৰাদদানৰসেন ৰুত্তা। তত্থ সেনাসনম্হা ওরুয্হাতি পব্বতসেনাসনত্তা ৰুত্তং। সক্কচ্চং তং উপট্ঠহিন্তি তং কুট্ঠিপুরিসং উল়ারসম্পত্তিং পাপেতুকামতায ভিক্খায অত্থিকো হুত্ৰা পণীতভিক্খদাযকং কুলং মহিচ্ছপুগ্গলো ৰিয আদরেন উপগন্ত্ৰা অট্ঠাসিং।

    Senāsanamhā oruyhātiādikā catasso gāthā paccayesu attano santosadassanamukhena ‘‘bhikkhunā nāma evaṃ paṭipajjitabba’’nti bhikkhūnaṃ ovādadānavasena vuttā. Tattha senāsanamhā oruyhāti pabbatasenāsanattā vuttaṃ. Sakkaccaṃ taṃ upaṭṭhahinti taṃ kuṭṭhipurisaṃ uḷārasampattiṃ pāpetukāmatāya bhikkhāya atthiko hutvā paṇītabhikkhadāyakaṃ kulaṃ mahicchapuggalo viya ādarena upagantvā aṭṭhāsiṃ.

    পক্কেনাতি অট্ঠিগতকুট্ঠরোগতায উপক্কেন কুথিতেন। অঙ্গুলি চেত্থ ছিজ্জথাতি এত্থ পত্তে তস্স অঙ্গুলি ছিজ্জিত্ৰা আহারেন সদ্ধিং পততীতি অত্থো।

    Pakkenāti aṭṭhigatakuṭṭharogatāya upakkena kuthitena. Aṅguli cettha chijjathāti ettha patte tassa aṅguli chijjitvā āhārena saddhiṃ patatīti attho.

    কুট্টমূলং নিস্সাযাতি তস্স পুরিসস্স পসাদজননত্থং তাদিসে ঘরভিত্তিসমীপে নিসীদিত্ৰা আলোপং তং অভুঞ্জিসং পরিভুঞ্জিং। অযং পন থেরস্স পটিপত্তি সিক্খাপদে অপঞ্ঞত্তেতি দট্ঠব্বং। পটিক্কূলে চ অপ্পটিক্কূলে ইৰ অপ্পটিক্কূলসঞ্ঞিতায অরিযিদ্ধিযা উক্কংসগতত্তা থেরস্স তং অজ্ঝোহরন্তস্স জিগুচ্ছা ন উপ্পজ্জি, পুথুজ্জনস্স পন তাদিসং ভুঞ্জন্তস্স অন্তানি নিক্খমেয্যুং। তেনাহ ‘‘ভুঞ্জমানে ৰা ভুত্তে ৰা, জেগুচ্ছং মে ন ৰিজ্জতী’’তি।

    Kuṭṭamūlaṃ nissāyāti tassa purisassa pasādajananatthaṃ tādise gharabhittisamīpe nisīditvā ālopaṃ taṃ abhuñjisaṃ paribhuñjiṃ. Ayaṃ pana therassa paṭipatti sikkhāpade apaññatteti daṭṭhabbaṃ. Paṭikkūle ca appaṭikkūle iva appaṭikkūlasaññitāya ariyiddhiyā ukkaṃsagatattā therassa taṃ ajjhoharantassa jigucchā na uppajji, puthujjanassa pana tādisaṃ bhuñjantassa antāni nikkhameyyuṃ. Tenāha ‘‘bhuñjamāne vā bhutte vā, jegucchaṃ me na vijjatī’’ti.

    উত্তিট্ঠপিণ্ডোতি উত্তিট্ঠিত্ৰা পরেসং ঘরদ্ৰারে ঠত্ৰা গহেতব্বপিণ্ডো, জঙ্ঘবলং নিস্সায অনুঘরং গন্ত্ৰা লদ্ধব্বমিস্সকভিক্খাতি অত্থো। পূতিমুত্তন্তি গোমুত্তপরিভাৰিতহরীটকাদি চ। যস্সেতে অভিসম্ভুত্ৰাতি, যো ভিক্খু এতে উত্তিট্ঠপিণ্ডাদযো চত্তারো পচ্চযে অন্তিমন্তেন অভিরমিত্ৰা পরিভুঞ্জতি। স ৰে চাতুদ্দিসো নরোতি সো পুগ্গলো একংসেন চাতুদ্দিসো পুরত্থিমাদিচতুদিসাযোগ্যো, কত্থচি অপ্পটিঘো যায কাযচি দিসায ৰিহরিতুং সক্কোতীতি অত্থো।

    Uttiṭṭhapiṇḍoti uttiṭṭhitvā paresaṃ gharadvāre ṭhatvā gahetabbapiṇḍo, jaṅghabalaṃ nissāya anugharaṃ gantvā laddhabbamissakabhikkhāti attho. Pūtimuttanti gomuttaparibhāvitaharīṭakādi ca. Yassete abhisambhutvāti, yo bhikkhu ete uttiṭṭhapiṇḍādayo cattāro paccaye antimantena abhiramitvā paribhuñjati. Sa ve cātuddiso naroti so puggalo ekaṃsena cātuddiso puratthimādicatudisāyogyo, katthaci appaṭigho yāya kāyaci disāya viharituṃ sakkotīti attho.

    অথ থেরো অত্তনো মহল্লককালে মনুস্সেহি ‘‘কথং, ভন্তে, তুম্হে এৰরূপায জরায ৰত্তমানায দিনে দিনে পব্বতং অভিরুহথা’’তি ৰুত্তে ‘‘যত্থ একে’’তিআদিকা চতস্সো গাথা অভাসি। তত্থ যত্থাতি যস্মিং পচ্ছিমৰযে। একেতি একচ্চে। ৰিহঞ্ঞন্তীতি সরীরকিলমথেন চিত্তেন ৰিঘাতং আপজ্জন্তি। সিলুচ্চযন্তি পব্বতং। তত্থাতি তস্মিং জরাজিণ্ণকালেপি। সম্পজানো পটিস্সতোতি ইমিনা চিত্তখেদাভাৰং দস্সেতি, ইদ্ধিবলেনুপত্থদ্ধোতি ইমিনা সরীরখেদাভাৰং।

    Atha thero attano mahallakakāle manussehi ‘‘kathaṃ, bhante, tumhe evarūpāya jarāya vattamānāya dine dine pabbataṃ abhiruhathā’’ti vutte ‘‘yattha eke’’tiādikā catasso gāthā abhāsi. Tattha yatthāti yasmiṃ pacchimavaye. Eketi ekacce. Vihaññantīti sarīrakilamathena cittena vighātaṃ āpajjanti. Siluccayanti pabbataṃ. Tatthāti tasmiṃ jarājiṇṇakālepi. Sampajāno paṭissatoti iminā cittakhedābhāvaṃ dasseti, iddhibalenupatthaddhoti iminā sarīrakhedābhāvaṃ.

    ভযহেতূনং কিলেসানং সমুচ্ছিন্নত্তা পহীনভযভেরৰো।

    Bhayahetūnaṃ kilesānaṃ samucchinnattā pahīnabhayabheravo.

    ডয্হমানেসূতি রাগগ্গিআদীহি একাদসহি অগ্গীহি সত্তেসু ডয্হমানেসু। সংকিলেসপরিল়াহাভাৰেন নিব্বুতো সীতিভূতো।

    Ḍayhamānesūti rāgaggiādīhi ekādasahi aggīhi sattesu ḍayhamānesu. Saṃkilesapariḷāhābhāvena nibbuto sītibhūto.

    পুন মনুস্সেহি ‘‘কিং, ভন্তে, জিণ্ণকালেপি অরঞ্ঞপব্বতেযেৰ ৰিহরথ, ননু ইমে ৰেল়ুৰনাদযো ৰিহারা মনোরমা’’তি ৰুত্তে অরঞ্ঞপব্বতা এৰ ময্হং মনোরমাতি দস্সেন্তো ‘‘করেরিমালাৰিততা’’তিআদিকা দ্ৰাদস গাথা অভাসি। তত্থ করেরিমালাৰিততাতি ৰরুণরুক্খপন্তীহি সমাগতা। ‘‘কালৰণ্ণপুপ্ফেহি ওত্থটা’’তিপি ৰদন্তি। কুঞ্জরাভিরুদাতি পটিঘোসাদিগুণীভূতেহি হত্থীনং গোচরেসীনং গজ্জিতেহি অভিত্থনিতা।

    Puna manussehi ‘‘kiṃ, bhante, jiṇṇakālepi araññapabbateyeva viharatha, nanu ime veḷuvanādayo vihārā manoramā’’ti vutte araññapabbatā eva mayhaṃ manoramāti dassento ‘‘karerimālāvitatā’’tiādikā dvādasa gāthā abhāsi. Tattha karerimālāvitatāti varuṇarukkhapantīhi samāgatā. ‘‘Kālavaṇṇapupphehi otthaṭā’’tipi vadanti. Kuñjarābhirudāti paṭighosādiguṇībhūtehi hatthīnaṃ gocaresīnaṃ gajjitehi abhitthanitā.

    অভিৰুট্ঠাতি মহামেঘেন অভিপ্পৰুট্ঠা। রম্মতলাতি তেনেৰ রজোজল্লপণ্ণেয্যাদীনং অপগমেন রমণীযতলা। নগাতি দেসন্তরং অগমনতো ‘‘নগা’’তি সেলমযতায ‘‘সেলা’’তি চ লদ্ধনামা পব্বতা। অব্ভুন্নদিতা সিখীহীতি মধুরস্সরেন উন্নদিতা।

    Abhivuṭṭhāti mahāmeghena abhippavuṭṭhā. Rammatalāti teneva rajojallapaṇṇeyyādīnaṃ apagamena ramaṇīyatalā. Nagāti desantaraṃ agamanato ‘‘nagā’’ti selamayatāya ‘‘selā’’ti ca laddhanāmā pabbatā. Abbhunnaditā sikhīhīti madhurassarena unnaditā.

    অলন্তি যুত্তং সমত্থং ৰা। ঝাযিতুকামস্স অত্থকামস্সাতিআদীসুপি ইমিনা নযেন যোজেতব্বং। ভিক্খুনোতি ভিন্নকিলেসভিক্খুনো, মেতি সম্বন্ধো।

    Alanti yuttaṃ samatthaṃ vā. Jhāyitukāmassa atthakāmassātiādīsupi iminā nayena yojetabbaṃ. Bhikkhunoti bhinnakilesabhikkhuno, meti sambandho.

    উমাপুপ্ফেন সমানাতি মেচকনিভতায উমাকুসুমসদিসা। গগনাৰব্ভ ছাদিতাতি ততো এৰ সরদস্স গগনঅব্ভা ৰিয কাল়মেঘসঞ্ছাদিতা, নীলৰণ্ণাতি অত্থো।

    Umāpupphenasamānāti mecakanibhatāya umākusumasadisā. Gaganāvabbha chāditāti tato eva saradassa gaganaabbhā viya kāḷameghasañchāditā, nīlavaṇṇāti attho.

    অনাকিণ্ণাতি অসংকিণ্ণা অসম্বাধা। পঞ্চঙ্গিকেনাতি আততাদীহি পঞ্চহি অঙ্গেহি যুত্তেন তূরিযেন পরিৰারিযমানস্স তাদিসীপি ন হোতি, যথা যাদিসী একগ্গচিত্তস্স সমাহিতচিত্তস্স সম্মদেৰ রূপারূপধম্মং অনিচ্চাদিৰসেন ৰিপস্সন্তস্স রতি হোতি। তেনাহ ভগৰা –

    Anākiṇṇāti asaṃkiṇṇā asambādhā. Pañcaṅgikenāti ātatādīhi pañcahi aṅgehi yuttena tūriyena parivāriyamānassa tādisīpi na hoti, yathā yādisī ekaggacittassa samāhitacittassa sammadeva rūpārūpadhammaṃ aniccādivasena vipassantassa rati hoti. Tenāha bhagavā –

    ‘‘যতো যতো সম্মসতি, খন্ধানং উদযব্বযং।

    ‘‘Yato yato sammasati, khandhānaṃ udayabbayaṃ;

    লভতী পীতিপামোজ্জং, অমতং তং ৰিজানত’’ন্তি॥ (ধ॰ প॰ ৩৭৪)

    Labhatī pītipāmojjaṃ, amataṃ taṃ vijānata’’nti. (dha. pa. 374)

    কম্মং বহুকন্তিআদিনা দ্ৰে গাথা কম্মারামানং পচ্চযগিদ্ধানং ভিক্খূনং ওৰাদদানৰসেন ৰুত্তা। তত্থ কম্মং বহুকং ন কারযেতি কম্মারামো হুত্ৰা বহুং নাম কম্মং ন কারযে ন অধিট্ঠহে, খণ্ডফুল্লপটিসঙ্খরণং পন সত্থারা অনুঞ্ঞাতমেৰ। পরিৰজ্জেয্য জনন্তি অকল্যাণমিত্তভূতং জনং ৰজ্জেয্য। ন উয্যমেতি পচ্চযুপ্পাদনগণবন্ধাদিৰসেন ৰাযামং ন করেয্য।

    Kammaṃ bahukantiādinā dve gāthā kammārāmānaṃ paccayagiddhānaṃ bhikkhūnaṃ ovādadānavasena vuttā. Tattha kammaṃ bahukaṃ na kārayeti kammārāmo hutvā bahuṃ nāma kammaṃ na kāraye na adhiṭṭhahe, khaṇḍaphullapaṭisaṅkharaṇaṃ pana satthārā anuññātameva. Parivajjeyya jananti akalyāṇamittabhūtaṃ janaṃ vajjeyya. Na uyyameti paccayuppādanagaṇabandhādivasena vāyāmaṃ na kareyya.

    অনত্তনেয্যমেতন্তি এতং নৰকম্মাধিট্ঠানাদিকং অত্তনো অত্থাৰহং ন হোতীতি অত্থো। তত্থ কারণমাহ ‘‘কিচ্ছতি কাযো কিলমতী’’তি। নৰকম্মাদিপসুতস্স হি তহং তহং ৰিচরতো কাযসুখাদিঅলাভেন কিচ্ছপ্পত্তো হোতি কিলমতি খেদং আপজ্জতি, তেন চ কাযকিলমথেন দুক্খিতো। ৰত্থুৰিসদঅত্তনেয্যকিরিযাদীনং অভাৰেন সো পুগ্গলো সমথং ন ৰিন্দতি চিত্তসমাধানং ন লভতীতি।

    Anattaneyyametanti etaṃ navakammādhiṭṭhānādikaṃ attano atthāvahaṃ na hotīti attho. Tattha kāraṇamāha ‘‘kicchati kāyo kilamatī’’ti. Navakammādipasutassa hi tahaṃ tahaṃ vicarato kāyasukhādialābhena kicchappatto hoti kilamati khedaṃ āpajjati, tena ca kāyakilamathena dukkhito. Vatthuvisadaattaneyyakiriyādīnaṃ abhāvena so puggalo samathaṃ na vindati cittasamādhānaṃ na labhatīti.

    ওট্ঠপ্পহতমত্তেনাতিআদিনা দ্ৰে গাথা সুতপরমস্স পণ্ডিতমানিনো গরহৰসেন, ততো পরা দ্ৰে পণ্ডিতস্স পসংসাৰসেন ৰুত্তা। তত্থ ওট্ঠপ্পহতমত্তেনাতি সজ্ঝাযসীসেন ওট্ঠপরিৰত্তনমত্তেন, বুদ্ধৰচনং সজ্ঝাযকরণমত্তেনাতি অত্থো। অত্তানম্পি ন পস্সতীতি অনত্থঞ্ঞুতায অত্তনো পচ্চক্খভূতম্পি অত্থং ন জানাতি, যাথাৰতো অত্তনো পমাণং ন পরিচ্ছিন্দতীতি অত্থো। পত্থদ্ধগীৰো চরতীতি ‘‘অহং বহুস্সুতো, সতিমা, পঞ্ঞৰা, ন মযা সদিসো অঞ্ঞো অত্থী’’তি মানত্থদ্ধো হুত্ৰা গরুট্ঠানিযানম্পি অপচিতিং অদস্সেন্তো অযোসলাকং গিলিত্ৰা ঠিতো ৰিয থদ্ধগীৰো চরতি। অহং সেয্যোতি মঞ্ঞতীতি অহমেৰ সেয্যো উত্তমোতি মঞ্ঞতি।

    Oṭṭhappahatamattenātiādinā dve gāthā sutaparamassa paṇḍitamānino garahavasena, tato parā dve paṇḍitassa pasaṃsāvasena vuttā. Tattha oṭṭhappahatamattenāti sajjhāyasīsena oṭṭhaparivattanamattena, buddhavacanaṃ sajjhāyakaraṇamattenāti attho. Attānampi na passatīti anatthaññutāya attano paccakkhabhūtampi atthaṃ na jānāti, yāthāvato attano pamāṇaṃ na paricchindatīti attho. Patthaddhagīvo caratīti ‘‘ahaṃ bahussuto, satimā, paññavā, na mayā sadiso añño atthī’’ti mānatthaddho hutvā garuṭṭhāniyānampi apacitiṃ adassento ayosalākaṃ gilitvā ṭhito viya thaddhagīvo carati. Ahaṃ seyyoti maññatīti ahameva seyyo uttamoti maññati.

    অসেয্যো সেয্যসমানং, বালো মঞ্ঞতি অত্তানন্তি অযং অসেয্যো হীনো সমানো অঞ্ঞেন সেয্যেন উত্তমেন সমানং সদিসং কত্ৰা অত্তানং বালো মন্দবুদ্ধি বালভাৰেনেৰ মঞ্ঞতীতি। ন তং ৰিঞ্ঞূ পসংসন্তীতি তং তাদিসং বালং পগ্গহিতচিত্ততায পত্থদ্ধমানসং থম্ভিতত্তং নরং ৰিঞ্ঞূ পণ্ডিতা ন পসংসন্তি, অঞ্ঞদত্থু গরহন্তিযেৰ।

    Aseyyo seyyasamānaṃ, bālo maññati attānanti ayaṃ aseyyo hīno samāno aññena seyyena uttamena samānaṃ sadisaṃ katvā attānaṃ bālo mandabuddhi bālabhāveneva maññatīti. Na taṃ viññū pasaṃsantīti taṃ tādisaṃ bālaṃ paggahitacittatāya patthaddhamānasaṃ thambhitattaṃ naraṃ viññū paṇḍitā na pasaṃsanti, aññadatthu garahantiyeva.

    সেয্যোহমস্মীতি যো পন পণ্ডিতো পুগ্গলো ‘‘সেয্যোহমস্মী’’তি ৰা হীনসদিসমানৰসেন ‘‘নাহং সেয্যো’’তি ৰা কঞ্চিপি মানং অজপ্পেন্তো ৰিধাসু নৰসু মানকোট্ঠাসেসু কস্সচিপি ৰসেন ন ৰিকম্পতি।

    Seyyohamasmīti yo pana paṇḍito puggalo ‘‘seyyohamasmī’’ti vā hīnasadisamānavasena ‘‘nāhaṃ seyyo’’ti vā kañcipi mānaṃ ajappento vidhāsu navasu mānakoṭṭhāsesu kassacipi vasena na vikampati.

    পঞ্ঞৰন্তন্তি অগ্গফলপঞ্ঞাৰসেন পঞ্ঞৰন্তং ইট্ঠাদীসু তাদিভাৰপ্পত্তিযা তাদিং, অসেক্খফলসীলেসু সুট্ঠু পতিট্ঠিতত্তা সীলেসু সুসমাহিতং, অরহত্তফলসমাপত্তিসমাপজ্জনেন চেতোসমথমনুযুত্তন্তি তাদিসং সব্বসো পহীনমানং খীণাসৰং ৰিঞ্ঞূ বুদ্ধাদযো পণ্ডিতা পসংসরে ৰণ্ণেন্তি থোমেন্তীতি অত্থো।

    Paññavantanti aggaphalapaññāvasena paññavantaṃ iṭṭhādīsu tādibhāvappattiyā tādiṃ, asekkhaphalasīlesu suṭṭhu patiṭṭhitattā sīlesu susamāhitaṃ, arahattaphalasamāpattisamāpajjanena cetosamathamanuyuttanti tādisaṃ sabbaso pahīnamānaṃ khīṇāsavaṃ viññū buddhādayo paṇḍitā pasaṃsare vaṇṇenti thomentīti attho.

    পুন অঞ্ঞতরং দুব্বচং ভিক্খুং দিস্ৰা দোৰচস্সতায আদীনৰং, সোৰচস্সতায আনিসংসঞ্চ পকাসেন্তো ‘‘যস্স সব্রহ্মচারীসূ’’তিআদিকা দ্ৰে গাথা অভাসি। তা ৰুত্তত্থা এৰ।

    Puna aññataraṃ dubbacaṃ bhikkhuṃ disvā dovacassatāya ādīnavaṃ, sovacassatāya ānisaṃsañca pakāsento ‘‘yassa sabrahmacārīsū’’tiādikā dve gāthā abhāsi. Tā vuttatthā eva.

    পুন উদ্ধতং উন্নল়ং একং ভিক্খুং দিস্ৰা উদ্ধতাদিভাৰে দোসং, অনুদ্ধতাদিভাৰে চ গুণং ৰিভাৰেন্তো ‘‘উদ্ধতো চপলো ভিক্খূ’’তিআদিকা দ্ৰে গাথা অভাসি। তত্থ কপীৰ সীহচম্মেনাতি সীহচম্মেন পারুতো মক্কটো ৰিয। সো উদ্ধতাদিদোসসংযুত্তো ভিক্খু তেন পংসুকূলেন অরিযদ্ধজেন ন উপসোভতি অরিযগুণানং অভাৰতো।

    Puna uddhataṃ unnaḷaṃ ekaṃ bhikkhuṃ disvā uddhatādibhāve dosaṃ, anuddhatādibhāve ca guṇaṃ vibhāvento ‘‘uddhato capalo bhikkhū’’tiādikā dve gāthā abhāsi. Tattha kapīva sīhacammenāti sīhacammena pāruto makkaṭo viya. So uddhatādidosasaṃyutto bhikkhu tena paṃsukūlena ariyaddhajena na upasobhati ariyaguṇānaṃ abhāvato.

    যো পন উপসোভতি, তং দস্সেতুং ‘‘অনুদ্ধতো’’তিআদি ৰুত্তং।

    Yo pana upasobhati, taṃ dassetuṃ ‘‘anuddhato’’tiādi vuttaṃ;

    এতে সম্বহুলাতিআদিকা পঞ্চ গাথা আযস্মন্তং সারিপুত্তং নমস্সন্তে ব্রহ্মকাযিকে দেৰে দিস্ৰা আযস্মতো কপ্পিনস্স সিতপাতুকম্মনিমিত্তং ৰুত্তা। তত্থ এতেতি তেসং পচ্চক্খতায ৰুত্তং । সম্বহুলাতি বহুভাৰতো, তং পন বহুভাৰং ‘‘দসদেৰসহস্সানী’’তি পরিচ্ছিন্দিত্ৰা আহ। দেৰাতি উপপত্তিদেৰা। তং তেসং দেৰভাৰং অঞ্ঞেহি ৰিসেসেত্ৰা দস্সেন্তো ‘‘সব্বে তে ব্রহ্মকাযিকা’’তি আহ। যস্মা তে অত্তনো উপপত্তিদ্ধিযা মহতিযা দেৰিদ্ধিযা সমন্নাগতা পরিৰারসম্পন্না চ, তস্মা আহ ‘‘ইদ্ধিমন্তো যসস্সিনো’’তি।

    Ete sambahulātiādikā pañca gāthā āyasmantaṃ sāriputtaṃ namassante brahmakāyike deve disvā āyasmato kappinassa sitapātukammanimittaṃ vuttā. Tattha eteti tesaṃ paccakkhatāya vuttaṃ . Sambahulāti bahubhāvato, taṃ pana bahubhāvaṃ ‘‘dasadevasahassānī’’ti paricchinditvā āha. Devāti upapattidevā. Taṃ tesaṃ devabhāvaṃ aññehi visesetvā dassento ‘‘sabbe te brahmakāyikā’’ti āha. Yasmā te attano upapattiddhiyā mahatiyā deviddhiyā samannāgatā parivārasampannā ca, tasmā āha ‘‘iddhimanto yasassino’’ti.

    ‘‘কো নু সেনাপতি ভোতো’’তি পুচ্ছায ৰিস্সজ্জনৰসেন ‘‘মযা পৰত্তিতং ধম্মচক্কং অনুত্তরং সারিপুত্তো অনুৰত্তেতী’’তি (ম॰ নি॰ ২.৩৯৯) ৰদন্তেন ভগৰতা আযস্মতো সারিপুত্তত্থেরস্স ধম্মসেনাপতিভাৰো অনুঞ্ঞাতোতি আহ – ‘‘ধম্মসেনাপতিং ৰীরং মহাঝাযিং সমাহিতং সারিপুত্ত’’ন্তি। তত্থ ৰীরন্তি কিলেসমারাদীনং নিম্মথনেন ৰীরিযৰন্তং মহাৰিক্কন্তং। মহাঝাযিন্তি দিব্বৰিহারাদীনং উক্কংসগমনেন মহন্তং ঝাযিং। ততো এৰ সব্বসো ৰিক্খেপৰিদ্ধংসনৰসেন সমাহিতং। নমস্সন্তাতি সিরসি অঞ্জলিং পগ্গয্হ নমস্সমানা তিট্ঠন্তি।

    ‘‘Ko nu senāpati bhoto’’ti pucchāya vissajjanavasena ‘‘mayā pavattitaṃ dhammacakkaṃ anuttaraṃ sāriputto anuvattetī’’ti (ma. ni. 2.399) vadantena bhagavatā āyasmato sāriputtattherassa dhammasenāpatibhāvo anuññātoti āha – ‘‘dhammasenāpatiṃ vīraṃ mahājhāyiṃ samāhitaṃ sāriputta’’nti. Tattha vīranti kilesamārādīnaṃ nimmathanena vīriyavantaṃ mahāvikkantaṃ. Mahājhāyinti dibbavihārādīnaṃ ukkaṃsagamanena mahantaṃ jhāyiṃ. Tato eva sabbaso vikkhepaviddhaṃsanavasena samāhitaṃ. Namassantāti sirasi añjaliṃ paggayha namassamānā tiṭṭhanti.

    যম্পি নিস্সাযাতি যং নু খো আরম্মণং নিস্সায আরব্ভ ঝাযতীতি নাভিজানামাতি পুথুজ্জনভাৰেন ব্রহ্মানো এৰং আহংসু।

    Yampinissāyāti yaṃ nu kho ārammaṇaṃ nissāya ārabbha jhāyatīti nābhijānāmāti puthujjanabhāvena brahmāno evaṃ āhaṃsu.

    অচ্ছেরং ৰতাতি অচ্ছরিযং ৰত। বুদ্ধানন্তি চতুসচ্চবুদ্ধানং। গম্ভীরো গোচরো সকোতি পরমগম্ভীরো অতিদুদ্দসো দুরনুবোধো পুথুজ্জনেহি অসাধারণো অৰিসযো। ইদানি তস্স গম্ভীরভাৰে কারণং দস্সেতুং ‘‘যে ময’’ন্তিআদি ৰুত্তং। তত্থ ৰালৰেধিসমাগতাতি যে মযং ৰালৰেধিধনুগ্গহসদিসা অতিসুখুমম্পি ৰিসযং পটিৰিজ্ঝিতুং সমত্থা আগতা উপপরিক্খন্তা নাভিজানাম, গম্ভীরো ৰত বুদ্ধানং ৰিসযোতি অত্থো। তং তথা দেৰকাযেহীতি তং তথারূপং সারিপুত্তং সদেৰকস্স লোকস্স পূজনারহং তেহি ব্রহ্মকাযিকেহি তদা তথা পূজিতং দিস্ৰা আযস্মতো মহাকপ্পিনস্স সিতং অহোসি। ইমেসং লোকসম্মতানং ব্রহ্মূনম্পি অৰিসযো, যত্থ সাৰকানং ৰিসযোতি।

    Accheraṃ vatāti acchariyaṃ vata. Buddhānanti catusaccabuddhānaṃ. Gambhīro gocaro sakoti paramagambhīro atiduddaso duranubodho puthujjanehi asādhāraṇo avisayo. Idāni tassa gambhīrabhāve kāraṇaṃ dassetuṃ ‘‘ye maya’’ntiādi vuttaṃ. Tattha vālavedhisamāgatāti ye mayaṃ vālavedhidhanuggahasadisā atisukhumampi visayaṃ paṭivijjhituṃ samatthā āgatā upaparikkhantā nābhijānāma, gambhīro vata buddhānaṃ visayoti attho. Taṃ tathā devakāyehīti taṃ tathārūpaṃ sāriputtaṃ sadevakassa lokassa pūjanārahaṃ tehi brahmakāyikehi tadā tathā pūjitaṃ disvā āyasmato mahākappinassa sitaṃ ahosi. Imesaṃ lokasammatānaṃ brahmūnampi avisayo, yattha sāvakānaṃ visayoti.

    যাৰতা বুদ্ধখেত্তম্হীতি গাথা থেরেন অত্তানং আরব্ভ সীহনাদং নদন্তেন ভাসিতা। তত্থ বুদ্ধখেত্তম্হীতি আণাখেত্তং সন্ধায ৰদতি। ঠপযিত্ৰা মহামুনিন্তি সম্মাসম্বুদ্ধং ঠপেত্ৰা । বুদ্ধা হি ভগৰন্তো ধুতগুণেহিপি সব্বসত্তেহি পরমুক্কংসগতা এৰ, কেৰলং পন মহাকরুণাসঞ্চোদিতমানসা সত্তানং তাদিসং মহন্তং উপকারং ওলোকেত্ৰা গামন্তসেনাসনৰাসাদিং অনুৰত্তন্তীতি তং তং ধুতধম্মৰিরোধী হোতি। ধুতগুণেতি কিলেসানং ধুতেন গুণেন আরঞ্ঞকাদিভাৰেন অপেক্খিতগুণে। করণত্থে ৰা এতং ভুম্মৰচনং। সদিসো মে ন ৰিজ্জতি, কুতো পন উত্তরীতি অধিপ্পাযো। তথা হেস থেরো তত্থ অগ্গট্ঠানে ঠপিতো।

    Yāvatā buddhakhettamhīti gāthā therena attānaṃ ārabbha sīhanādaṃ nadantena bhāsitā. Tattha buddhakhettamhīti āṇākhettaṃ sandhāya vadati. Ṭhapayitvā mahāmuninti sammāsambuddhaṃ ṭhapetvā . Buddhā hi bhagavanto dhutaguṇehipi sabbasattehi paramukkaṃsagatā eva, kevalaṃ pana mahākaruṇāsañcoditamānasā sattānaṃ tādisaṃ mahantaṃ upakāraṃ oloketvā gāmantasenāsanavāsādiṃ anuvattantīti taṃ taṃ dhutadhammavirodhī hoti. Dhutaguṇeti kilesānaṃ dhutena guṇena āraññakādibhāvena apekkhitaguṇe. Karaṇatthe vā etaṃ bhummavacanaṃ. Sadiso me na vijjati, kuto pana uttarīti adhippāyo. Tathā hesa thero tattha aggaṭṭhāne ṭhapito.

    ন চীৰরেতি গাথায ‘‘ঠপযিত্ৰা মহামুনি’’ন্তি ৰুত্তমেৰত্থং পাকটতরং করোতি, চীৰরাদীসু তণ্হায অনুপলেপো ধুতঙ্গফলং। তত্থ ন চীৰরে সম্পত্তে তণ্হালেপেনাতি যোজনা। সযনেতি সেনাসনে। গোতমোতি ভগৰন্তং গোত্তেন কিত্তেতি। অনপ্পমেয্যোতি পমাণকরকিলেসাভাৰতো অপরিমাণগুণতায চ অনপ্পমেয্যো। মুল়ালপুপ্ফং ৰিমলংৰ অম্বুনাতি যথা নিম্মলং ৰিরজং নল়িনং উদকেন ন লিম্পতি, এৰং গোতমো ভগৰা তণ্হালেপাদিনা ন লিম্পতীতি অত্থো। নেক্খম্মনিন্নো অভিনিক্খম্মনিন্নো ততো এৰ তিভৰাভিনিস্সটো ভৰত্তযতো ৰিনিস্সটো ৰিসংযুত্তো।

    Na cīvareti gāthāya ‘‘ṭhapayitvā mahāmuni’’nti vuttamevatthaṃ pākaṭataraṃ karoti, cīvarādīsu taṇhāya anupalepo dhutaṅgaphalaṃ. Tattha na cīvare sampatte taṇhālepenāti yojanā. Sayaneti senāsane. Gotamoti bhagavantaṃ gottena kitteti. Anappameyyoti pamāṇakarakilesābhāvato aparimāṇaguṇatāya ca anappameyyo. Muḷālapupphaṃ vimalaṃva ambunāti yathā nimmalaṃ virajaṃ naḷinaṃ udakena na limpati, evaṃ gotamo bhagavā taṇhālepādinā na limpatīti attho. Nekkhammaninno abhinikkhammaninno tato eva tibhavābhinissaṭo bhavattayato vinissaṭo visaṃyutto.

    যেসং সতিপট্ঠানগীৰাদীনং ভাৰনাপারিপূরিযা যত্থ কত্থচি অনুপলিত্তো নেক্খম্মনিন্নোৰ অহোসি, তে অঙ্গভূতে দস্সেন্তো ‘‘সতিপট্ঠানগীৰো’’তি ওসানগাথমাহ। তত্থ গুণরাসিতো উত্তমঙ্গভূতায পঞ্ঞায অধিট্ঠানভাৰতো সতিপট্ঠানং গীৰা এতস্সাতি সতিপট্ঠানগীৰো, অনৰজ্জধম্মানং আদানে সদ্ধা হত্থো এতস্সাতি সদ্ধাহত্থো। গুণসরীরস্স উত্তমঙ্গভাৰতো পঞ্ঞা সীসং এতস্সাতি পঞ্ঞাসীসো। মহাসমুদাগমনতায মহাৰিসযতায মহানুভাৰতায মহাবলতায চ মহন্তং সব্বঞ্ঞুতসঙ্খাতং ঞাণং এতস্স অত্থীতি মহাঞাণী। সদা সব্বকালং নিব্বুতো সীতিভূতো চরতি। ‘‘সুসমাহিতো…পে॰… নাগো’’তি (অ॰ নি॰ ৬.৪৩) সুত্তপদঞ্চেত্থ নিদস্সেতব্বং। যং পনেত্থ অত্থতো অৰিভত্তং, তং হেট্ঠা ৰুত্তনযমেৰ।

    Yesaṃ satipaṭṭhānagīvādīnaṃ bhāvanāpāripūriyā yattha katthaci anupalitto nekkhammaninnova ahosi, te aṅgabhūte dassento ‘‘satipaṭṭhānagīvo’’ti osānagāthamāha. Tattha guṇarāsito uttamaṅgabhūtāya paññāya adhiṭṭhānabhāvato satipaṭṭhānaṃ gīvā etassāti satipaṭṭhānagīvo, anavajjadhammānaṃ ādāne saddhā hattho etassāti saddhāhattho. Guṇasarīrassa uttamaṅgabhāvato paññā sīsaṃ etassāti paññāsīso. Mahāsamudāgamanatāya mahāvisayatāya mahānubhāvatāya mahābalatāya ca mahantaṃ sabbaññutasaṅkhātaṃ ñāṇaṃ etassa atthīti mahāñāṇī. Sadā sabbakālaṃ nibbuto sītibhūto carati. ‘‘Susamāhito…pe… nāgo’’ti (a. ni. 6.43) suttapadañcettha nidassetabbaṃ. Yaṃ panettha atthato avibhattaṃ, taṃ heṭṭhā vuttanayameva.

    মহাকস্সপত্থেরগাথাৰণ্ণনা নিট্ঠিতা।

    Mahākassapattheragāthāvaṇṇanā niṭṭhitā.

    চত্তালীসনিপাতৰণ্ণনা নিট্ঠিতা।

    Cattālīsanipātavaṇṇanā niṭṭhitā.




    Next: ১৯. পঞ্ঞাসনিপাতো • 19. Paññāsanipāto




    Related texts:



    তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ১. মহাকস্সপত্থেরগাথা • 1. Mahākassapattheragāthā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact