| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. மஹாகொட்டி²கஸுத்தவண்ணனா
3. Mahākoṭṭhikasuttavaṇṇanā
173. ததியே ப²ஸ்ஸாயதனானந்தி ப²ஸ்ஸாகரானங், ப²ஸ்ஸஸ்ஸ உப்பத்திட்டா²னானந்தி அத்தோ². அத்த²ஞ்ஞங் கிஞ்சீதி ஏதேஸு அஸேஸதோ நிருத்³தே⁴ஸு ததோ பரங் கோசி அப்பமத்தகோபி கிலேஸோ அத்தீ²தி புச்ச²தி. நத்த²ஞ்ஞங் கிஞ்சீதி இதா⁴பி ‘‘அப்பமத்தகோபி கிலேஸோ நத்தீ²’’தி புச்ச²தி. ஸேஸத்³வயேபி ஏஸேவ நயோ. இமே பன சத்தாரோபி பஞ்ஹே ஸஸ்ஸதுச்சே²த³ஏகச்சஸஸ்ஸதஅமராவிக்கே²பவஸேன புச்ச²தி. தேனஸ்ஸ தே²ரோ புச்சி²தபுச்சி²தங் படிபா³ஹந்தோ மா ஹேவந்தி ஆஹ. எத்த² ஹிஇதி நிபாதமத்தங், ஏவங் மா ப⁴ணீதி அத்தோ². அத்தூபலத்³தி⁴வஸேனேவ ‘‘அத்த²ஞ்ஞங் கிஞ்சி அஞ்ஞோ கோசி அத்தா நாம அத்தீ²’’தி ஸஸ்ஸதாதி³ஆகாரேன புச்ச²தி. கிங் பனேஸ அத்தூபலத்³தி⁴கோதி? ந அத்தூபலத்³தி⁴கோ. ஏவங்லத்³தி⁴கோ பன தத்தே²கோ பி⁴க்கு² நிஸின்னோ, ஸோ புச்சி²துங் ந ஸக்கோதி. தஸ்ஸ லத்³தி⁴ங் விஸ்ஸஜ்ஜாபனத்த²ங் ஏவங் புச்ச²தி. யேபி ச அனாக³தே ஏவங்லத்³தி⁴கா ப⁴விஸ்ஸந்தி, தேஸங் ‘‘பு³த்³த⁴காலேபேஸோ பஞ்ஹோ மஹாஸாவகேஹி விஸ்ஸஜ்ஜிதோ’’தி வசனோகாஸுபச்சே²த³னத்த²ங் புச்ச²தியேவ.
173. Tatiye phassāyatanānanti phassākarānaṃ, phassassa uppattiṭṭhānānanti attho. Atthaññaṃ kiñcīti etesu asesato niruddhesu tato paraṃ koci appamattakopi kileso atthīti pucchati. Natthaññaṃ kiñcīti idhāpi ‘‘appamattakopi kileso natthī’’ti pucchati. Sesadvayepi eseva nayo. Ime pana cattāropi pañhe sassatucchedaekaccasassataamarāvikkhepavasena pucchati. Tenassa thero pucchitapucchitaṃ paṭibāhanto mā hevanti āha. Ettha hiiti nipātamattaṃ, evaṃ mā bhaṇīti attho. Attūpaladdhivaseneva ‘‘atthaññaṃ kiñci añño koci attā nāma atthī’’ti sassatādiākārena pucchati. Kiṃ panesa attūpaladdhikoti? Na attūpaladdhiko. Evaṃladdhiko pana tattheko bhikkhu nisinno, so pucchituṃ na sakkoti. Tassa laddhiṃ vissajjāpanatthaṃ evaṃ pucchati. Yepi ca anāgate evaṃladdhikā bhavissanti, tesaṃ ‘‘buddhakālepeso pañho mahāsāvakehi vissajjito’’ti vacanokāsupacchedanatthaṃ pucchatiyeva.
அப்பபஞ்சங் பபஞ்சேதீதி ந பபஞ்சேதப்³ப³ட்டா²னே பபஞ்சங் கரோதி, அனாசரிதப்³ப³ங் மக்³க³ங் சரதி. தாவதா பபஞ்சஸ்ஸ க³தீதி யத்தகா ச²ன்னங் ப²ஸ்ஸாயதனானங் க³தி, தத்தகாவ தண்ஹாதி³ட்டி²மானப்பபே⁴த³ஸ்ஸ பபஞ்சஸ்ஸ க³தி. ச²ன்னங், ஆவுஸோ, ப²ஸ்ஸாயதனானங் அஸேஸவிராக³னிரோதா⁴ பபஞ்சனிரோதோ⁴ பபஞ்சவூபஸமோதி ஏதேஸு ச²ஸு ஆயதனேஸு ஸப்³ப³ஸோ நிருத்³தே⁴ஸு பபஞ்சாபி நிருத்³தா⁴வ ஹொந்தி, வூபஸந்தாவ ஹொந்தீதி அத்தோ². ஆருப்பே பன புது²ஜ்ஜனதே³வதானங் கிஞ்சாபி பஞ்ச ப²ஸ்ஸாயதனானி நிருத்³தா⁴னி, ச²ட்ட²ஸ்ஸ பன அனிருத்³த⁴த்தா தயோபி பபஞ்சா அப்பஹீனாவ. அபிச பஞ்சவோகாரப⁴வவஸேனேவ பஞ்ஹோ கதி²தோதி. சதுத்தே² இமினாவ நயேன அத்தோ² வேதி³தப்³போ³.
Appapañcaṃpapañcetīti na papañcetabbaṭṭhāne papañcaṃ karoti, anācaritabbaṃ maggaṃ carati. Tāvatā papañcassa gatīti yattakā channaṃ phassāyatanānaṃ gati, tattakāva taṇhādiṭṭhimānappabhedassa papañcassa gati. Channaṃ, āvuso, phassāyatanānaṃ asesavirāganirodhā papañcanirodho papañcavūpasamoti etesu chasu āyatanesu sabbaso niruddhesu papañcāpi niruddhāva honti, vūpasantāva hontīti attho. Āruppe pana puthujjanadevatānaṃ kiñcāpi pañca phassāyatanāni niruddhāni, chaṭṭhassa pana aniruddhattā tayopi papañcā appahīnāva. Apica pañcavokārabhavavaseneva pañho kathitoti. Catutthe imināva nayena attho veditabbo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. மஹாகொட்டி²கஸுத்தங் • 3. Mahākoṭṭhikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3-4. மஹாகொட்டி²கஸுத்தாதி³வண்ணனா • 3-4. Mahākoṭṭhikasuttādivaṇṇanā
