| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೩. ಮಹಾಕೋಟ್ಠಿಕಸುತ್ತವಣ್ಣನಾ
3. Mahākoṭṭhikasuttavaṇṇanā
೧೭೩. ತತಿಯೇ ಫಸ್ಸಾಯತನಾನನ್ತಿ ಫಸ್ಸಾಕರಾನಂ, ಫಸ್ಸಸ್ಸ ಉಪ್ಪತ್ತಿಟ್ಠಾನಾನನ್ತಿ ಅತ್ಥೋ। ಅತ್ಥಞ್ಞಂ ಕಿಞ್ಚೀತಿ ಏತೇಸು ಅಸೇಸತೋ ನಿರುದ್ಧೇಸು ತತೋ ಪರಂ ಕೋಚಿ ಅಪ್ಪಮತ್ತಕೋಪಿ ಕಿಲೇಸೋ ಅತ್ಥೀತಿ ಪುಚ್ಛತಿ। ನತ್ಥಞ್ಞಂ ಕಿಞ್ಚೀತಿ ಇಧಾಪಿ ‘‘ಅಪ್ಪಮತ್ತಕೋಪಿ ಕಿಲೇಸೋ ನತ್ಥೀ’’ತಿ ಪುಚ್ಛತಿ। ಸೇಸದ್ವಯೇಪಿ ಏಸೇವ ನಯೋ। ಇಮೇ ಪನ ಚತ್ತಾರೋಪಿ ಪಞ್ಹೇ ಸಸ್ಸತುಚ್ಛೇದಏಕಚ್ಚಸಸ್ಸತಅಮರಾವಿಕ್ಖೇಪವಸೇನ ಪುಚ್ಛತಿ। ತೇನಸ್ಸ ಥೇರೋ ಪುಚ್ಛಿತಪುಚ್ಛಿತಂ ಪಟಿಬಾಹನ್ತೋ ಮಾ ಹೇವನ್ತಿ ಆಹ। ಏತ್ಥ ಹಿಇತಿ ನಿಪಾತಮತ್ತಂ, ಏವಂ ಮಾ ಭಣೀತಿ ಅತ್ಥೋ। ಅತ್ತೂಪಲದ್ಧಿವಸೇನೇವ ‘‘ಅತ್ಥಞ್ಞಂ ಕಿಞ್ಚಿ ಅಞ್ಞೋ ಕೋಚಿ ಅತ್ತಾ ನಾಮ ಅತ್ಥೀ’’ತಿ ಸಸ್ಸತಾದಿಆಕಾರೇನ ಪುಚ್ಛತಿ। ಕಿಂ ಪನೇಸ ಅತ್ತೂಪಲದ್ಧಿಕೋತಿ? ನ ಅತ್ತೂಪಲದ್ಧಿಕೋ। ಏವಂಲದ್ಧಿಕೋ ಪನ ತತ್ಥೇಕೋ ಭಿಕ್ಖು ನಿಸಿನ್ನೋ, ಸೋ ಪುಚ್ಛಿತುಂ ನ ಸಕ್ಕೋತಿ। ತಸ್ಸ ಲದ್ಧಿಂ ವಿಸ್ಸಜ್ಜಾಪನತ್ಥಂ ಏವಂ ಪುಚ್ಛತಿ। ಯೇಪಿ ಚ ಅನಾಗತೇ ಏವಂಲದ್ಧಿಕಾ ಭವಿಸ್ಸನ್ತಿ, ತೇಸಂ ‘‘ಬುದ್ಧಕಾಲೇಪೇಸೋ ಪಞ್ಹೋ ಮಹಾಸಾವಕೇಹಿ ವಿಸ್ಸಜ್ಜಿತೋ’’ತಿ ವಚನೋಕಾಸುಪಚ್ಛೇದನತ್ಥಂ ಪುಚ್ಛತಿಯೇವ।
173. Tatiye phassāyatanānanti phassākarānaṃ, phassassa uppattiṭṭhānānanti attho. Atthaññaṃ kiñcīti etesu asesato niruddhesu tato paraṃ koci appamattakopi kileso atthīti pucchati. Natthaññaṃ kiñcīti idhāpi ‘‘appamattakopi kileso natthī’’ti pucchati. Sesadvayepi eseva nayo. Ime pana cattāropi pañhe sassatucchedaekaccasassataamarāvikkhepavasena pucchati. Tenassa thero pucchitapucchitaṃ paṭibāhanto mā hevanti āha. Ettha hiiti nipātamattaṃ, evaṃ mā bhaṇīti attho. Attūpaladdhivaseneva ‘‘atthaññaṃ kiñci añño koci attā nāma atthī’’ti sassatādiākārena pucchati. Kiṃ panesa attūpaladdhikoti? Na attūpaladdhiko. Evaṃladdhiko pana tattheko bhikkhu nisinno, so pucchituṃ na sakkoti. Tassa laddhiṃ vissajjāpanatthaṃ evaṃ pucchati. Yepi ca anāgate evaṃladdhikā bhavissanti, tesaṃ ‘‘buddhakālepeso pañho mahāsāvakehi vissajjito’’ti vacanokāsupacchedanatthaṃ pucchatiyeva.
ಅಪ್ಪಪಞ್ಚಂ ಪಪಞ್ಚೇತೀತಿ ನ ಪಪಞ್ಚೇತಬ್ಬಟ್ಠಾನೇ ಪಪಞ್ಚಂ ಕರೋತಿ, ಅನಾಚರಿತಬ್ಬಂ ಮಗ್ಗಂ ಚರತಿ। ತಾವತಾ ಪಪಞ್ಚಸ್ಸ ಗತೀತಿ ಯತ್ತಕಾ ಛನ್ನಂ ಫಸ್ಸಾಯತನಾನಂ ಗತಿ, ತತ್ತಕಾವ ತಣ್ಹಾದಿಟ್ಠಿಮಾನಪ್ಪಭೇದಸ್ಸ ಪಪಞ್ಚಸ್ಸ ಗತಿ। ಛನ್ನಂ, ಆವುಸೋ, ಫಸ್ಸಾಯತನಾನಂ ಅಸೇಸವಿರಾಗನಿರೋಧಾ ಪಪಞ್ಚನಿರೋಧೋ ಪಪಞ್ಚವೂಪಸಮೋತಿ ಏತೇಸು ಛಸು ಆಯತನೇಸು ಸಬ್ಬಸೋ ನಿರುದ್ಧೇಸು ಪಪಞ್ಚಾಪಿ ನಿರುದ್ಧಾವ ಹೋನ್ತಿ, ವೂಪಸನ್ತಾವ ಹೋನ್ತೀತಿ ಅತ್ಥೋ। ಆರುಪ್ಪೇ ಪನ ಪುಥುಜ್ಜನದೇವತಾನಂ ಕಿಞ್ಚಾಪಿ ಪಞ್ಚ ಫಸ್ಸಾಯತನಾನಿ ನಿರುದ್ಧಾನಿ, ಛಟ್ಠಸ್ಸ ಪನ ಅನಿರುದ್ಧತ್ತಾ ತಯೋಪಿ ಪಪಞ್ಚಾ ಅಪ್ಪಹೀನಾವ। ಅಪಿಚ ಪಞ್ಚವೋಕಾರಭವವಸೇನೇವ ಪಞ್ಹೋ ಕಥಿತೋತಿ। ಚತುತ್ಥೇ ಇಮಿನಾವ ನಯೇನ ಅತ್ಥೋ ವೇದಿತಬ್ಬೋ।
Appapañcaṃpapañcetīti na papañcetabbaṭṭhāne papañcaṃ karoti, anācaritabbaṃ maggaṃ carati. Tāvatā papañcassa gatīti yattakā channaṃ phassāyatanānaṃ gati, tattakāva taṇhādiṭṭhimānappabhedassa papañcassa gati. Channaṃ, āvuso, phassāyatanānaṃ asesavirāganirodhā papañcanirodho papañcavūpasamoti etesu chasu āyatanesu sabbaso niruddhesu papañcāpi niruddhāva honti, vūpasantāva hontīti attho. Āruppe pana puthujjanadevatānaṃ kiñcāpi pañca phassāyatanāni niruddhāni, chaṭṭhassa pana aniruddhattā tayopi papañcā appahīnāva. Apica pañcavokārabhavavaseneva pañho kathitoti. Catutthe imināva nayena attho veditabbo.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೩. ಮಹಾಕೋಟ್ಠಿಕಸುತ್ತಂ • 3. Mahākoṭṭhikasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೩-೪. ಮಹಾಕೋಟ್ಠಿಕಸುತ್ತಾದಿವಣ್ಣನಾ • 3-4. Mahākoṭṭhikasuttādivaṇṇanā
