| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
7. махаагодтигад̇т̇зраабад̣̇аанаван̣н̣анаа
7. Mahākoṭṭhikattheraapadānavaṇṇanā
сад̇д̇амаабад̣̇аанз бад̣̇умуд̇д̇аро наама ж̇инод̇иаад̣̇игам̣ ааяасмад̇о махаагодтигад̇т̇зрасса абад̣̇аанам̣. гаа уббад̇д̇и? аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяаани бун̃н̃аани убажинанд̇о бад̣̇умуд̇д̇арасса бхаг̇авад̇о гаалз хам̣савад̇ийнаг̇арз махаабхог̇агулз ниб̣б̣ад̇д̇ид̇ваа вин̃н̃уд̇ам̣ бад̇д̇о маад̇аабид̇уунам̣ ажжаязна гудумб̣ам̣ сан̣табзд̇ваа гхарааваасам̣ васанд̇о згад̣̇ивасам̣ бад̣̇умуд̇д̇арасса бхаг̇авад̇о д̇хаммад̣̇зсанаагаалз хам̣савад̇ийнаг̇араваасино г̇анд̇хамаалаад̣̇ихад̇т̇з язна б̣уд̣̇д̇хо язна д̇хаммо язна сан̇гхо, д̇анниннз д̇аббон̣з д̇аббаб̣бхаарз г̇ажчанд̇з д̣̇исваа д̇зхи сад̣̇д̇хим̣ бхаг̇аванд̇ам̣ убасан̇гамид̇ваа, сад̇т̇аарам̣ згам̣ бхигкум̣ бадисамбхид̣̇ааббад̇д̇аанам̣ аг̇г̇адтаанз табзнд̇ам̣ д̣̇исваа ‘‘аяам̣ имасмим̣ саасанз бадисамбхид̣̇ааббад̇д̇аанам̣ аг̇г̇о, яам̣нуунаахамби згасса б̣уд̣̇д̇хасса саасанз аяам̣ вияа бадисамбхид̣̇ааббад̇д̇аанам̣ аг̇г̇о бхавзяяа’’нд̇и жинд̇зд̇ваа сад̇т̇у д̣̇зсанаабарияосаанз вудтид̇ааяа барисааяа бхаг̇аванд̇ам̣ убасан̇гамид̇ваа, ‘‘бханд̇з, свз маяхам̣ г̇зхз бхигкам̣ г̇ан̣хат̇аа’’д̇и ниманд̇зси. сад̇т̇аа ад̇хиваасзси. со бхаг̇аванд̇ам̣ абхиваад̣̇зд̇ваа бад̣̇агкин̣ам̣ гад̇ваа саганивзсанам̣ г̇анд̇ваа саб̣б̣арад̇д̇им̣ б̣уд̣̇д̇хасса жа бхигкусан̇гхасса жа нисаж̇ж̇адтаанам̣ г̇анд̇хамаалаад̣̇ийхи алан̇гарид̇ваа каад̣̇анийяабхож̇анийяам̣ бадияаад̣̇аабзд̇ваа д̇ассаа рад̇д̇ияаа ажжаязна саганивзсанз бхигкусад̇асахассабариваарам̣ сад̇т̇аарам̣ вивид̇хаяааг̇укаж̇ж̇агабариваарам̣ сасуубаб̣яан̃ж̇анам̣ г̇анд̇хасаалибхож̇анам̣ бхож̇аабзд̇ваа бхад̇д̇агижжабарияосаанз жинд̇зси – ‘‘маханд̇ам̣ ко ахам̣ таананд̇арам̣ бад̇т̇зми, на бана яуд̇д̇ам̣ маяаа згад̣̇ивасамзва д̣̇аанам̣ д̣̇ад̇ваа д̇ам̣ таананд̇арам̣ бад̇т̇зд̇ум̣, анубадибаадияаа сад̇д̇аахам̣ д̣̇аанам̣ д̣̇ад̇ваа бад̇т̇зссаамий’’д̇и. со д̇знзва нияаамзна сад̇д̇аахам̣ махаад̣̇аанам̣ д̣̇ад̇ваа бхад̇д̇агижжабарияосаанз д̣̇уссагодтааг̇аарам̣ вивараабзд̇ваа уд̇д̇амам̣ д̇ижийвараббахонагам̣ сукумавад̇т̇ам̣ б̣уд̣̇д̇хасса баад̣̇амуулз табзд̇ваа бхигкусад̇асахассасса жа д̇ижийварам̣ д̣̇ад̇ваа д̇ат̇ааг̇ад̇ам̣ убасан̇гамид̇ваа, ‘‘бханд̇з, яо со бхигку д̇умхзхи ид̇о сад̇д̇амз д̣̇ивасамад̇т̇агз бадисамбхид̣̇ааббад̇д̇аанам̣ аг̇г̇адтаанз табид̇о, ахамби со бхигку вияа анааг̇ад̇з уббаж̇ж̇анагасса б̣уд̣̇д̇хасса саасанз баб̣б̣аж̇ид̇ваа бадисамбхид̣̇ааббад̇д̇аанам̣ аг̇г̇о бхавзяяа’’нд̇и сад̇т̇у баад̣̇амуулз нибаж̇ж̇ид̇ваа бад̇т̇анам̣ агааси. сад̇т̇аа д̇асса самиж̇жханабхаавам̣ н̃ад̇ваа ‘‘анааг̇ад̇з ид̇о габбасад̇асахассамад̇т̇агз г̇од̇амо наама б̣уд̣̇д̇хо логз уббаж̇ж̇иссад̇и, д̇асса саасанз д̇ава бад̇т̇анаа самиж̇жхиссад̇ий’’д̇и б̣яаагааси. со д̇ад̇т̇а яаавад̇ааяугам̣ бун̃н̃аани гад̇ваа д̇ад̇о жуд̇о д̣̇звасамбад̇д̇им̣ анубхавид̇ваа абараабарам̣ д̣̇звамануссзсу бариб̣бхами.
Sattamāpadāne padumuttaro nāma jinotiādikaṃ āyasmato mahākoṭṭhikattherassa apadānaṃ. Kā uppatti? Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatīnagare mahābhogakule nibbattitvā viññutaṃ patto mātāpitūnaṃ accayena kuṭumbaṃ saṇṭhapetvā gharāvāsaṃ vasanto ekadivasaṃ padumuttarassa bhagavato dhammadesanākāle haṃsavatīnagaravāsino gandhamālādihatthe yena buddho yena dhammo yena saṅgho, tanninne tappoṇe tappabbhāre gacchante disvā tehi saddhiṃ bhagavantaṃ upasaṅkamitvā, satthāraṃ ekaṃ bhikkhuṃ paṭisambhidāppattānaṃ aggaṭṭhāne ṭhapentaṃ disvā ‘‘ayaṃ imasmiṃ sāsane paṭisambhidāppattānaṃ aggo, yaṃnūnāhampi ekassa buddhassa sāsane ayaṃ viya paṭisambhidāppattānaṃ aggo bhaveyya’’nti cintetvā satthu desanāpariyosāne vuṭṭhitāya parisāya bhagavantaṃ upasaṅkamitvā, ‘‘bhante, sve mayhaṃ gehe bhikkhaṃ gaṇhathā’’ti nimantesi. Satthā adhivāsesi. So bhagavantaṃ abhivādetvā padakkhiṇaṃ katvā sakanivesanaṃ gantvā sabbarattiṃ buddhassa ca bhikkhusaṅghassa ca nisajjaṭṭhānaṃ gandhamālādīhi alaṅkaritvā khādanīyabhojanīyaṃ paṭiyādāpetvā tassā rattiyā accayena sakanivesane bhikkhusatasahassaparivāraṃ satthāraṃ vividhayāgukhajjakaparivāraṃ sasūpabyañjanaṃ gandhasālibhojanaṃ bhojāpetvā bhattakiccapariyosāne cintesi – ‘‘mahantaṃ kho ahaṃ ṭhānantaraṃ patthemi, na pana yuttaṃ mayā ekadivasameva dānaṃ datvā taṃ ṭhānantaraṃ patthetuṃ, anupaṭipāṭiyā sattāhaṃ dānaṃ datvā patthessāmī’’ti. So teneva niyāmena sattāhaṃ mahādānaṃ datvā bhattakiccapariyosāne dussakoṭṭhāgāraṃ vivarāpetvā uttamaṃ ticīvarappahonakaṃ sukhumavatthaṃ buddhassa pādamūle ṭhapetvā bhikkhusatasahassassa ca ticīvaraṃ datvā tathāgataṃ upasaṅkamitvā, ‘‘bhante, yo so bhikkhu tumhehi ito sattame divasamatthake paṭisambhidāppattānaṃ aggaṭṭhāne ṭhapito, ahampi so bhikkhu viya anāgate uppajjanakassa buddhassa sāsane pabbajitvā paṭisambhidāppattānaṃ aggo bhaveyya’’nti satthu pādamūle nipajjitvā patthanaṃ akāsi. Satthā tassa samijjhanabhāvaṃ ñatvā ‘‘anāgate ito kappasatasahassamatthake gotamo nāma buddho loke uppajjissati, tassa sāsane tava patthanā samijjhissatī’’ti byākāsi. So tattha yāvatāyukaṃ puññāni katvā tato cuto devasampattiṃ anubhavitvā aparāparaṃ devamanussesu paribbhami.
звам̣ со д̣̇звамануссзсу сам̣саранд̇о д̇ад̇т̇а д̇ад̇т̇а бхавз бун̃н̃ан̃аан̣асамбхаарз самбхаранд̇о имасмим̣ б̣уд̣̇д̇хуббаад̣̇з саавад̇т̇ияам̣ б̣раахман̣амахаасаалагулз ниб̣б̣ад̇д̇и, годтигод̇исса наамам̣ агам̣су. гасмаа маад̇уяаа ваа аяяагабаяяагаад̣̇ийнам̣ ваа наамам̣ аг̇г̇ахзд̇ваа звам̣ наамам̣ гарим̣сууд̇и жз? ад̇д̇ано бан̃н̃аванд̇ад̇ааяа взд̣̇ан̇г̇зсу сад̇аггабарад̇аггзсу санигхан̣д̣угздубхзсу саагкараббабхзд̣̇зсу сагалаб̣яаагаран̣зсу жа чзгабхаавзна жа д̣̇идтад̣̇идтз ж̇анз мукасад̇д̇ийхи годтзнд̇о баггодтзнд̇о вид̇уд̣̇анд̇о вижарад̇ийд̇и анвад̇т̇анаамам̣ гарим̣сууд̇и взд̣̇ид̇аб̣б̣ам̣. со ваяаббад̇д̇о д̇аяо взд̣̇з уг̇г̇ахзд̇ваа б̣раахман̣асиббз нибпад̇д̇им̣ бад̇д̇о згад̣̇ивасам̣ сад̇т̇у санд̇игам̣ г̇анд̇ваа д̇хаммам̣ суд̇ваа бадилад̣̇д̇хасад̣̇д̇хо баб̣б̣аж̇ид̇ваа убасамбаннагаалад̇о бадтааяа вибассанааяа гаммам̣ гаронд̇о саха бадисамбхид̣̇аахи арахад̇д̇ам̣ бад̇ваа бадисамбхид̣̇аасу жин̣н̣авасий худ̇ваа абхийд̇о махаат̇зрз убасан̇гамид̇ваа бан̃хам̣ бужчанд̇оби д̣̇асаб̣алам̣ убасан̇гамид̇ваа бадисамбхид̣̇аасуязва бан̃хам̣ бужчи. звамаяам̣ т̇зро д̇ад̇т̇а гад̇аад̇хигаарад̇ааяа д̇ад̇т̇а жин̣н̣авасийбхаавзна жа бадисамбхид̣̇ааббад̇д̇аанам̣ аг̇г̇о ж̇аад̇о. ат̇а нам̣ сад̇т̇аа махаавзд̣̇алласуд̇д̇ам̣ адтуббад̇д̇им̣ гад̇ваа бадисамбхид̣̇ааббад̇д̇аанам̣ аг̇г̇адтаанз табзси, ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуунам̣ бадисамбхид̣̇ааббад̇д̇аанам̣ яад̣̇ид̣̇ам̣ махаагодтиго’’д̇и (а. ни. 1.209, 218).
Evaṃ so devamanussesu saṃsaranto tattha tattha bhave puññañāṇasambhāre sambharanto imasmiṃ buddhuppāde sāvatthiyaṃ brāhmaṇamahāsālakule nibbatti, koṭṭhikotissa nāmaṃ akaṃsu. Kasmā mātuyā vā ayyakapayyakādīnaṃ vā nāmaṃ aggahetvā evaṃ nāmaṃ kariṃsūti ce? Attano paññavantatāya vedaṅgesu satakkaparatakkesu sanighaṇḍukeṭubhesu sākkharappabhedesu sakalabyākaraṇesu ca chekabhāvena ca diṭṭhadiṭṭhe jane mukhasattīhi koṭṭhento pakkoṭṭhento vitudanto vicaratīti anvatthanāmaṃ kariṃsūti veditabbaṃ. So vayappatto tayo vede uggahetvā brāhmaṇasippe nipphattiṃ patto ekadivasaṃ satthu santikaṃ gantvā dhammaṃ sutvā paṭiladdhasaddho pabbajitvā upasampannakālato paṭṭhāya vipassanāya kammaṃ karonto saha paṭisambhidāhi arahattaṃ patvā paṭisambhidāsu ciṇṇavasī hutvā abhīto mahāthere upasaṅkamitvā pañhaṃ pucchantopi dasabalaṃ upasaṅkamitvā paṭisambhidāsuyeva pañhaṃ pucchi. Evamayaṃ thero tattha katādhikāratāya tattha ciṇṇavasībhāvena ca paṭisambhidāppattānaṃ aggo jāto. Atha naṃ satthā mahāvedallasuttaṃ aṭṭhuppattiṃ katvā paṭisambhidāppattānaṃ aggaṭṭhāne ṭhapesi, ‘‘etadaggaṃ, bhikkhave, mama sāvakānaṃ bhikkhūnaṃ paṭisambhidāppattānaṃ yadidaṃ mahākoṭṭhiko’’ti (a. ni. 1.209, 218).
221. со абарзна самаязна вимуд̇д̇исукам̣ бадисам̣взд̣̇знд̇о соманассаж̇аад̇о ад̇д̇ано буб̣б̣ажарид̇аабад̣̇аанам̣ багаасзнд̇о бад̣̇умуд̇д̇аро наама ж̇инод̇иаад̣̇имааха. д̇ам̣ саб̣б̣ам̣ хздтаа вуд̇д̇анаяад̇д̇аа уд̇д̇аанад̇т̇амзва.
221. So aparena samayena vimuttisukhaṃ paṭisaṃvedento somanassajāto attano pubbacaritāpadānaṃ pakāsento padumuttaro nāma jinotiādimāha. Taṃ sabbaṃ heṭṭhā vuttanayattā uttānatthameva.
ид̇т̇ам̣ суд̣̇амааяасмаа махаагодтигод̇и зд̇т̇а суд̣̇анд̇и нид̣̇ассанз нибаад̇о. ааяасмаад̇и г̇аараваад̇хиважанам̣, яат̇аа д̇ам̣ ааяасмаа махаамог̇г̇аллаанод̇и.
Itthaṃsudamāyasmā mahākoṭṭhikoti ettha sudanti nidassane nipāto. Āyasmāti gāravādhivacanaṃ, yathā taṃ āyasmā mahāmoggallānoti.
махаагодтигад̇т̇зраабад̣̇аанаван̣н̣анаа самад̇д̇аа.
Mahākoṭṭhikattheraapadānavaṇṇanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / абад̣̇аанабаал̣и • Apadānapāḷi / 7. махаагодтигад̇т̇зраабад̣̇аанам̣ • 7. Mahākoṭṭhikattheraapadānaṃ
