| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. মহালিসুত্তং
8. Mahālisuttaṃ
৬০. এৰং মে সুতং – একং সমযং ভগৰা ৰেসালিযং ৰিহরতি মহাৰনে কূটাগারসালাযং। অথ খো মহালি লিচ্ছৰি যেন ভগৰা তেনুপসঙ্কমি …পে॰… একমন্তং নিসিন্নো খো মহালি লিচ্ছৰি ভগৰন্তং এতদৰোচ –
60. Evaṃ me sutaṃ – ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho mahāli licchavi yena bhagavā tenupasaṅkami …pe… ekamantaṃ nisinno kho mahāli licchavi bhagavantaṃ etadavoca –
‘‘পূরণো, ভন্তে, কস্সপো এৰমাহ – ‘নত্থি হেতু নত্থি পচ্চযো সত্তানং সংকিলেসায; অহেতূ অপ্পচ্চযা সত্তা সংকিলিস্সন্তি। নত্থি হেতু নত্থি পচ্চযো সত্তানং ৰিসুদ্ধিযা; অহেতূ অপ্পচ্চযা সত্তা ৰিসুজ্ঝন্তী’তি। ইধ, ভগৰা কিমাহা’’তি?
‘‘Pūraṇo, bhante, kassapo evamāha – ‘natthi hetu natthi paccayo sattānaṃ saṃkilesāya; ahetū appaccayā sattā saṃkilissanti. Natthi hetu natthi paccayo sattānaṃ visuddhiyā; ahetū appaccayā sattā visujjhantī’ti. Idha, bhagavā kimāhā’’ti?
‘‘অত্থি, মহালি, হেতু অত্থি পচ্চযো সত্তানং সংকিলেসায; সহেতূ সপ্পচ্চযা সত্তা সংকিলিস্সন্তি। অত্থি, মহালি, হেতু, অত্থি পচ্চযো সত্তানং ৰিসুদ্ধিযা; সহেতূ সপ্পচ্চযা সত্তা ৰিসুজ্ঝন্তী’’তি।
‘‘Atthi, mahāli, hetu atthi paccayo sattānaṃ saṃkilesāya; sahetū sappaccayā sattā saṃkilissanti. Atthi, mahāli, hetu, atthi paccayo sattānaṃ visuddhiyā; sahetū sappaccayā sattā visujjhantī’’ti.
‘‘কতমো পন, ভন্তে, হেতু কতমো পচ্চযো সত্তানং সংকিলেসায; কথং সহেতূ সপ্পচ্চযা সত্তা সংকিলিস্সন্তী’’তি?
‘‘Katamo pana, bhante, hetu katamo paccayo sattānaṃ saṃkilesāya; kathaṃ sahetū sappaccayā sattā saṃkilissantī’’ti?
‘‘রূপঞ্চ হিদং, মহালি, একন্তদুক্খং অভৰিস্স দুক্খানুপতিতং দুক্খাৰক্কন্তং অনৰক্কন্তং সুখেন, নযিদং সত্তা রূপস্মিং সারজ্জেয্যুং। যস্মা চ খো, মহালি, রূপং সুখং সুখানুপতিতং সুখাৰক্কন্তং অনৰক্কন্তং দুক্খেন, তস্মা সত্তা রূপস্মিং সারজ্জন্তি; সারাগা সংযুজ্জন্তি; সংযোগা সংকিলিস্সন্তি। অযং খো, মহালি, হেতু, অযং পচ্চযো সত্তানং সংকিলেসায; এৰং সহেতূ সপ্পচ্চযা সত্তা সংকিলিস্সন্তি।
‘‘Rūpañca hidaṃ, mahāli, ekantadukkhaṃ abhavissa dukkhānupatitaṃ dukkhāvakkantaṃ anavakkantaṃ sukhena, nayidaṃ sattā rūpasmiṃ sārajjeyyuṃ. Yasmā ca kho, mahāli, rūpaṃ sukhaṃ sukhānupatitaṃ sukhāvakkantaṃ anavakkantaṃ dukkhena, tasmā sattā rūpasmiṃ sārajjanti; sārāgā saṃyujjanti; saṃyogā saṃkilissanti. Ayaṃ kho, mahāli, hetu, ayaṃ paccayo sattānaṃ saṃkilesāya; evaṃ sahetū sappaccayā sattā saṃkilissanti.
‘‘ৰেদনা চ হিদং, মহালি, একন্তদুক্খা অভৰিস্স দুক্খানুপতিতা দুক্খাৰক্কন্তা অনৰক্কন্তা সুখেন, নযিদং সত্তা ৰেদনায সারজ্জেয্যুং। যস্মা চ খো, মহালি, ৰেদনা সুখা সুখানুপতিতা সুখাৰক্কন্তা অনৰক্কন্তা দুক্খেন, তস্মা সত্তা ৰেদনায সারজ্জন্তি; সারাগা সংযুজ্জন্তি; সংযোগা সংকিলিস্সন্তি। অযম্পি খো, মহালি, হেতু, অযং পচ্চযো সত্তানং সংকিলেসায। এৰম্পি সহেতূ সপ্পচ্চযা সত্তা সংকিলিস্সন্তি।
‘‘Vedanā ca hidaṃ, mahāli, ekantadukkhā abhavissa dukkhānupatitā dukkhāvakkantā anavakkantā sukhena, nayidaṃ sattā vedanāya sārajjeyyuṃ. Yasmā ca kho, mahāli, vedanā sukhā sukhānupatitā sukhāvakkantā anavakkantā dukkhena, tasmā sattā vedanāya sārajjanti; sārāgā saṃyujjanti; saṃyogā saṃkilissanti. Ayampi kho, mahāli, hetu, ayaṃ paccayo sattānaṃ saṃkilesāya. Evampi sahetū sappaccayā sattā saṃkilissanti.
‘‘সঞ্ঞা চ হিদং, মহালি…পে॰… সঙ্খারা চ হিদং, মহালি, একন্তদুক্খা অভৰিস্সংসু দুক্খানুপতিতা দুক্খাৰক্কন্তা অনৰক্কন্তা সুখেন, নযিদং সত্তা সঙ্খারেসু সারজ্জেয্যুং। যস্মা চ খো, মহালি, সঙ্খারা সুখা সুখানুপতিতা সুখাৰক্কন্তা অনৰক্কন্তা দুক্খেন, তস্মা সত্তা সঙ্খারেসু সারজ্জন্তি; সারাগা সংযুজ্জন্তি; সংযোগা সংকিলিস্সন্তি। অযম্পি খো, মহালি, হেতু, অযং পচ্চযো সত্তানং সংকিলেসায। এৰম্পি সহেতূ সপ্পচ্চযা সত্তা সংকিলিস্সন্তি।
‘‘Saññā ca hidaṃ, mahāli…pe… saṅkhārā ca hidaṃ, mahāli, ekantadukkhā abhavissaṃsu dukkhānupatitā dukkhāvakkantā anavakkantā sukhena, nayidaṃ sattā saṅkhāresu sārajjeyyuṃ. Yasmā ca kho, mahāli, saṅkhārā sukhā sukhānupatitā sukhāvakkantā anavakkantā dukkhena, tasmā sattā saṅkhāresu sārajjanti; sārāgā saṃyujjanti; saṃyogā saṃkilissanti. Ayampi kho, mahāli, hetu, ayaṃ paccayo sattānaṃ saṃkilesāya. Evampi sahetū sappaccayā sattā saṃkilissanti.
‘‘ৰিঞ্ঞাণঞ্চ হিদং, মহালি, একন্তদুক্খং অভৰিস্স দুক্খানুপতিতং দুক্খাৰক্কন্তং অনৰক্কন্তং সুখেন, নযিদং সত্তা ৰিঞ্ঞাণস্মিং সারজ্জেয্যুং। যস্মা চ খো , মহালি, ৰিঞ্ঞাণং সুখং সুখানুপতিতং সুখাৰক্কন্তং অনৰক্কন্তং দুক্খেন, তস্মা সত্তা ৰিঞ্ঞাণস্মিং সারজ্জন্তি; সারাগা সংযুজ্জন্তি; সংযোগা সংকিলিস্সন্তি। অযম্পি খো, মহালি, হেতু অযং পচ্চযো সত্তানং সংকিলেসায। এৰম্পি সহেতূ সপ্পচ্চযা সত্তা সংকিলিস্সন্তী’’তি।
‘‘Viññāṇañca hidaṃ, mahāli, ekantadukkhaṃ abhavissa dukkhānupatitaṃ dukkhāvakkantaṃ anavakkantaṃ sukhena, nayidaṃ sattā viññāṇasmiṃ sārajjeyyuṃ. Yasmā ca kho , mahāli, viññāṇaṃ sukhaṃ sukhānupatitaṃ sukhāvakkantaṃ anavakkantaṃ dukkhena, tasmā sattā viññāṇasmiṃ sārajjanti; sārāgā saṃyujjanti; saṃyogā saṃkilissanti. Ayampi kho, mahāli, hetu ayaṃ paccayo sattānaṃ saṃkilesāya. Evampi sahetū sappaccayā sattā saṃkilissantī’’ti.
‘‘কতমো পন, ভন্তে, হেতু কতমো পচ্চযো সত্তানং ৰিসুদ্ধিযা; কথং সহেতূ সপ্পচ্চযা সত্তা ৰিসুজ্ঝন্তী’’তি? ‘‘রূপঞ্চ হিদং, মহালি, একন্তসুখং অভৰিস্স সুখানুপতিতং সুখাৰক্কন্তং অনৰক্কন্তং দুক্খেন, নযিদং সত্তা রূপস্মিং নিব্বিন্দেয্যুং। যস্মা চ খো, মহালি, রূপং দুক্খং দুক্খানুপতিতং দুক্খাৰক্কন্তং অনৰক্কন্তং সুখেন, তস্মা সত্তা রূপস্মিং নিব্বিন্দন্তি; নিব্বিন্দং ৰিরজ্জন্তি; ৰিরাগা ৰিসুজ্ঝন্তি। অযং খো, মহালি, হেতু, অযং পচ্চযো, সত্তানং ৰিসুদ্ধিযা। এৰং সহেতূ সপ্পচ্চযা সত্তা ৰিসুজ্ঝন্তি’’।
‘‘Katamo pana, bhante, hetu katamo paccayo sattānaṃ visuddhiyā; kathaṃ sahetū sappaccayā sattā visujjhantī’’ti? ‘‘Rūpañca hidaṃ, mahāli, ekantasukhaṃ abhavissa sukhānupatitaṃ sukhāvakkantaṃ anavakkantaṃ dukkhena, nayidaṃ sattā rūpasmiṃ nibbindeyyuṃ. Yasmā ca kho, mahāli, rūpaṃ dukkhaṃ dukkhānupatitaṃ dukkhāvakkantaṃ anavakkantaṃ sukhena, tasmā sattā rūpasmiṃ nibbindanti; nibbindaṃ virajjanti; virāgā visujjhanti. Ayaṃ kho, mahāli, hetu, ayaṃ paccayo, sattānaṃ visuddhiyā. Evaṃ sahetū sappaccayā sattā visujjhanti’’.
‘‘ৰেদনা চ হিদং, মহালি, একন্তসুখা অভৰিস্স…পে॰… সঞ্ঞা চ হিদং, মহালি…পে॰… সঙ্খারা চ হিদং, মহালি, একন্তসুখা অভৰিস্সংসু…পে॰… ৰিঞ্ঞাণঞ্চ হিদং, মহালি, একন্তসুখং অভৰিস্স সুখানুপতিতং সুখাৰক্কন্তং অনৰক্কন্তং দুক্খেন, নযিদং সত্তা ৰিঞ্ঞাণস্মিং নিব্বিন্দেয্যুং। যস্মা চ খো, মহালি, ৰিঞ্ঞাণং দুক্খং দুক্খানুপতিতং দুক্খাৰক্কন্তং অনৰক্কন্তং সুখেন, তস্মা সত্তা ৰিঞ্ঞাণস্মিং নিব্বিন্দন্তি; নিব্বিন্দং ৰিরজ্জন্তি; ৰিরাগা ৰিসুজ্ঝন্তি। অযং খো, মহালি, হেতু, অযং পচ্চযো, সত্তানং ৰিসুদ্ধিযা । এৰম্পি সহেতূ সপ্পচ্চযা সত্তা ৰিসুজ্ঝন্তী’’তি। অট্ঠমং।
‘‘Vedanā ca hidaṃ, mahāli, ekantasukhā abhavissa…pe… saññā ca hidaṃ, mahāli…pe… saṅkhārā ca hidaṃ, mahāli, ekantasukhā abhavissaṃsu…pe… viññāṇañca hidaṃ, mahāli, ekantasukhaṃ abhavissa sukhānupatitaṃ sukhāvakkantaṃ anavakkantaṃ dukkhena, nayidaṃ sattā viññāṇasmiṃ nibbindeyyuṃ. Yasmā ca kho, mahāli, viññāṇaṃ dukkhaṃ dukkhānupatitaṃ dukkhāvakkantaṃ anavakkantaṃ sukhena, tasmā sattā viññāṇasmiṃ nibbindanti; nibbindaṃ virajjanti; virāgā visujjhanti. Ayaṃ kho, mahāli, hetu, ayaṃ paccayo, sattānaṃ visuddhiyā . Evampi sahetū sappaccayā sattā visujjhantī’’ti. Aṭṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. মহালিসুত্তৰণ্ণনা • 8. Mahālisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. মহালিসুত্তৰণ্ণনা • 8. Mahālisuttavaṇṇanā
