| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. மஹாலிஸுத்தவண்ணனா
3. Mahālisuttavaṇṇanā
259. ததியே உபஸங்கமீதி ‘‘ஸக்கோ தே³வராஜாதி கதெ²ந்தி, அத்தி² நு கோ² ஸோ ஸக்கோ, யேன ஸோ தி³ட்ட²புப்³போ³தி இமமத்த²ங் த³ஸப³லங் புச்சி²ஸ்ஸாமீ’’தி உபஸங்கமி. தஞ்ச பஜானாமீதி ப³ஹுவசனே ஏகவசனங், தே ச த⁴ம்மே பஜானாமீதி அத்தோ². ஸக்கோ கிர அனந்தரே அத்தபா⁴வே மக³த⁴ரட்டே² மசலகா³மே மகோ⁴ நாம மாணவோ அஹோஸி பண்டி³தோ ப்³யத்தோ, போ³தி⁴ஸத்தசரியா விய ச தஸ்ஸ சரியா அஹோஸி. ஸோ தெத்திங்ஸ புரிஸே க³ஹெத்வா கல்யாணமகாஸி. ஏகதி³வஸங் அத்தனோவ பஞ்ஞாய உபபரிக்கி²த்வா கா³மமஜ்ஜே² மஹாஜனஸ்ஸ ஸன்னிபதிதட்டா²னே கசவரங் உப⁴தோபஸ்ஸேஸு அபப்³யூஹித்வா தங் டா²னங் ரமணீயங் அகாஸி. புன தத்தே²வ மண்ட³பங் காரேஸி. புன க³ச்ச²ந்தே காலே ஸாலங் காரேஸி. கா³மதோ ச நிக்க²மித்வா கா³வுதம்பி அட்³ட⁴யோஜனம்பி திகா³வுதம்பி யோஜனம்பி விசரித்வா தேஹி ஸஹாயேஹி ஸத்³தி⁴ங் விஸமங் ஸமங் அகாஸி. தே ஸப்³பே³வ ஏகச்ச²ந்தா³ தத்த² தத்த² ஸேதுயுத்தட்டா²னே ஸேதுங், மண்ட³பஸாலாபொக்க²ரணிமாலாவச்ச²ரோபனபதீ³னங் யுத்தட்டா²னேஸு மண்ட³பஸாலாபொக்க²ரணிமாலாவச்ச²ரோபனாதீ³னி கரொந்தா ப³ஹுங் புஞ்ஞமகங்ஸு. மகோ⁴ ஸத்த வதபதா³னி பூரெத்வா காயஸ்ஸ பே⁴தா³ ஸத்³தி⁴ங் ஸஹாயேஹி தாவதிங்ஸப⁴வனே நிப்³ப³த்தி. தங் ஸப்³ப³ங் ப⁴க³வா ஜானாதி. தேனாஹ – யேஸங் த⁴ம்மானங் ஸமாதி³ன்னத்தா ஸக்கோ ஸக்கத்தங் அஜ்ஜ²கா³, தஞ்ச பஜானாமீதி. அயங் ஸக்கஸ்ஸ ஸக்கத்தாதி⁴க³மே ஸங்கே²பகதா², வித்தா²ரோ பன ஸுமங்க³லவிலாஸினியா தீ³க⁴னிகாயட்ட²கதா²ய ஸக்கபண்ஹவண்ணனாயங் வுத்தோ. ததியங்.
259. Tatiye upasaṅkamīti ‘‘sakko devarājāti kathenti, atthi nu kho so sakko, yena so diṭṭhapubboti imamatthaṃ dasabalaṃ pucchissāmī’’ti upasaṅkami. Tañca pajānāmīti bahuvacane ekavacanaṃ, te ca dhamme pajānāmīti attho. Sakko kira anantare attabhāve magadharaṭṭhe macalagāme magho nāma māṇavo ahosi paṇḍito byatto, bodhisattacariyā viya ca tassa cariyā ahosi. So tettiṃsa purise gahetvā kalyāṇamakāsi. Ekadivasaṃ attanova paññāya upaparikkhitvā gāmamajjhe mahājanassa sannipatitaṭṭhāne kacavaraṃ ubhatopassesu apabyūhitvā taṃ ṭhānaṃ ramaṇīyaṃ akāsi. Puna tattheva maṇḍapaṃ kāresi. Puna gacchante kāle sālaṃ kāresi. Gāmato ca nikkhamitvā gāvutampi aḍḍhayojanampi tigāvutampi yojanampi vicaritvā tehi sahāyehi saddhiṃ visamaṃ samaṃ akāsi. Te sabbeva ekacchandā tattha tattha setuyuttaṭṭhāne setuṃ, maṇḍapasālāpokkharaṇimālāvaccharopanapadīnaṃ yuttaṭṭhānesu maṇḍapasālāpokkharaṇimālāvaccharopanādīni karontā bahuṃ puññamakaṃsu. Magho satta vatapadāni pūretvā kāyassa bhedā saddhiṃ sahāyehi tāvatiṃsabhavane nibbatti. Taṃ sabbaṃ bhagavā jānāti. Tenāha – yesaṃ dhammānaṃ samādinnattā sakko sakkattaṃ ajjhagā, tañca pajānāmīti. Ayaṃ sakkassa sakkattādhigame saṅkhepakathā, vitthāro pana sumaṅgalavilāsiniyā dīghanikāyaṭṭhakathāya sakkapaṇhavaṇṇanāyaṃ vutto. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. மஹாலிஸுத்தங் • 3. Mahālisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. மஹாலிஸுத்தவண்ணனா • 3. Mahālisuttavaṇṇanā
