| Library / Tipiṭaka / ཏིཔིཊཀ • Tipiṭaka / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā) |
༦. མཧཱལིསུཏྟཝཎྞནཱ
6. Mahālisuttavaṇṇanā
བྲཱཧྨཎདཱུཏཝཏྠུཝཎྞནཱ
Brāhmaṇadūtavatthuvaṇṇanā
༣༥༩. ཨེཝཾ མེ སུཏཾ – ཨེཀཾ སམཡཾ བྷགཝཱ ཝེསཱལིཡནྟི མཧཱལིསུཏྟཾ། ཏཏྲཱཡཾ ཨཔུབྦཔདཝཎྞནཱ། ཝེསཱལིཡནྟི པུནཔྤུནཾ ཝིསཱལབྷཱཝཱུཔགམནཏོ ཝེསཱལཱིཏི ལདྡྷནཱམཀེ ནགརེ། མཧཱཝནེཏི བཧིནགརེ ཧིམཝནྟེན སདྡྷིཾ ཨེཀཱབདྡྷཾ ཧུཏྭཱ ཋིཏཾ སཡཾ ཛཱཏཝནཾ ཨཏྠི, ཡཾ མཧནྟབྷཱཝེནེཝ མཧཱཝནནྟི ཝུཙྩཏི, ཏསྨིཾ མཧཱཝནེ། ཀཱུཊཱགཱརསཱལཱཡནྟི ཏསྨིཾ ཝནསཎྜེ སངྒྷཱརཱམཾ པཏིཊྛཔེསུཾ། ཏཏྠ ཀཎྞིཀཾ ཡོཛེཏྭཱ ཐམྦྷཱནཾ ཨུཔརི ཀཱུཊཱགཱརསཱལཱསངྑེཔེན དེཝཝིམཱནསདིསཾ པཱསཱདཾ ཨཀཾསུ, ཏཾ ཨུཔཱདཱཡ སཀལོཔི སངྒྷཱརཱམོ ‘‘ཀཱུཊཱགཱརསཱལཱ’’ཏི པཉྙཱཡིཏྠ། བྷགཝཱ ཏཾ ཝེསཱལིཾ ཨུཔནིསྶཱཡ ཏསྨིཾ སངྒྷཱརཱམེ ཝིཧརཏི། ཏེན ཝུཏྟཾ – ‘‘ཝེསཱལིཡཾ ཝིཧརཏི མཧཱཝནེ ཀཱུཊཱགཱརསཱལཱཡ’’ནྟི། ཀོསལཀཱཏི ཀོསལརཊྛཝཱསིནོ། མཱགདྷཀཱཏི མགདྷརཊྛཝཱསིནོ། ཀརཎཱིཡེནཱཏི ཨཝསྶཾ ཀཏྟབྦཀམྨེན། ཡཉྷི ཨཀཱཏུམྤི ཝཊྚཏི, ཏཾ ཀིཙྩནྟི ཝུཙྩཏི, ཡཾ ཨཝསྶཾ ཀཱཏབྦམེཝ, ཏཾ ཀརཎཱིཡཾ ནཱམ།
359.Evaṃme sutaṃ – ekaṃ samayaṃ bhagavā vesāliyanti mahālisuttaṃ. Tatrāyaṃ apubbapadavaṇṇanā. Vesāliyanti punappunaṃ visālabhāvūpagamanato vesālīti laddhanāmake nagare. Mahāvaneti bahinagare himavantena saddhiṃ ekābaddhaṃ hutvā ṭhitaṃ sayaṃ jātavanaṃ atthi, yaṃ mahantabhāveneva mahāvananti vuccati, tasmiṃ mahāvane. Kūṭāgārasālāyanti tasmiṃ vanasaṇḍe saṅghārāmaṃ patiṭṭhapesuṃ. Tattha kaṇṇikaṃ yojetvā thambhānaṃ upari kūṭāgārasālāsaṅkhepena devavimānasadisaṃ pāsādaṃ akaṃsu, taṃ upādāya sakalopi saṅghārāmo ‘‘kūṭāgārasālā’’ti paññāyittha. Bhagavā taṃ vesāliṃ upanissāya tasmiṃ saṅghārāme viharati. Tena vuttaṃ – ‘‘vesāliyaṃ viharati mahāvane kūṭāgārasālāya’’nti. Kosalakāti kosalaraṭṭhavāsino. Māgadhakāti magadharaṭṭhavāsino. Karaṇīyenāti avassaṃ kattabbakammena. Yañhi akātumpi vaṭṭati, taṃ kiccanti vuccati, yaṃ avassaṃ kātabbameva, taṃ karaṇīyaṃ nāma.
༣༦༠. པཊིསལླཱིནོ བྷགཝཱཏི ནཱནཱརམྨཎཙཱརཏོ པཊིཀྐམྨ སལླཱིནོ ནིལཱིནོ, ཨེཀཱིབྷཱཝཾ ཨུཔགམྨ ཨེཀཏྟཱརམྨཎེ ཛྷཱནརཏིཾ ཨནུབྷཝཏཱིཏི ཨཏྠོ། ཏཏྠེཝཱཏི ཏསྨིཉྙེཝ ཝིཧཱརེ། ཨེཀམནྟནྟི ཏསྨཱ ཋཱནཱ ཨཔཀྐམྨ ཏཱསུ ཏཱསུ རུཀྑཙྪཱཡཱསུ ནིསཱིདིཾསུ།
360.Paṭisallīno bhagavāti nānārammaṇacārato paṭikkamma sallīno nilīno, ekībhāvaṃ upagamma ekattārammaṇe jhānaratiṃ anubhavatīti attho. Tatthevāti tasmiññeva vihāre. Ekamantanti tasmā ṭhānā apakkamma tāsu tāsu rukkhacchāyāsu nisīdiṃsu.
ཨོཊྛདྡྷལིཙྪཝཱིཝཏྠུཝཎྞནཱ
Oṭṭhaddhalicchavīvatthuvaṇṇanā
༣༦༡. ཨོཊྛདྡྷོཏི ཨདྡྷོཊྛཏཱཡ ཨེཝཾལདྡྷནཱམོ། མཧཏིཡཱ ལིཙྪཝཱིཔརིསཱཡཱཏི པུརེབྷཏྟཾ བུདྡྷཔྤམུཁསྶ བྷིཀྑུསངྒྷསྶ དཱནཾ དཏྭཱ བྷགཝཏོ སནྟིཀེ ཨུཔོསཐངྒཱནི ཨདྷིཊྛཧིཏྭཱ གནྡྷམཱལཱདཱིནི གཱཧཱཔེཏྭཱ ཨུགྒྷོསནཱཡ མཧཏིཾ ལིཙྪཝིརཱཛཔརིསཾ སནྣིཔཱཏཱཔེཏྭཱ ཏཱཡ ནཱིལཔཱིཏཱདིཝཎྞཝཏྠཱབྷརཎཝིལེཔནཔཊིམཎྜིཏཱཡ ཏཱཝཏིཾསཔརིསསཔྤཊིབྷཱགཱཡ མཧཏིཡཱ ལིཙྪཝིཔརིསཱཡ སདྡྷིཾ ཨུཔསངྐམི། ཨཀཱལོ ཁོ མཧཱལཱིཏི ཏསྶ ཨོཊྛདྡྷསྶ མཧཱལཱིཏི མཱུལནཱམཾ, ཏེན མཱུལནཱམམཏྟེན ནཾ ཐེརོ མཧཱལཱིཏི ཨཱལཔཏི། ཨེཀམནྟཾ ནིསཱིདཱིཏི པཏིརཱུཔཱསུ རུཀྑཙྪཱཡཱསུ ཏཱཡ ལིཙྪཝིཔརིསཱཡ སདྡྷིཾ རཏནཏྟཡསྶ ཝཎྞཾ ཀཐཡནྟོ ནིསཱིདི།
361.Oṭṭhaddhoti addhoṭṭhatāya evaṃladdhanāmo. Mahatiyā licchavīparisāyāti purebhattaṃ buddhappamukhassa bhikkhusaṅghassa dānaṃ datvā bhagavato santike uposathaṅgāni adhiṭṭhahitvā gandhamālādīni gāhāpetvā ugghosanāya mahatiṃ licchavirājaparisaṃ sannipātāpetvā tāya nīlapītādivaṇṇavatthābharaṇavilepanapaṭimaṇḍitāya tāvatiṃsaparisasappaṭibhāgāya mahatiyā licchaviparisāya saddhiṃ upasaṅkami. Akālo kho mahālīti tassa oṭṭhaddhassa mahālīti mūlanāmaṃ, tena mūlanāmamattena naṃ thero mahālīti ālapati. Ekamantaṃ nisīdīti patirūpāsu rukkhacchāyāsu tāya licchaviparisāya saddhiṃ ratanattayassa vaṇṇaṃ kathayanto nisīdi.
༣༦༢. སཱིཧོ སམཎུདྡེསོཏི ཨཱཡསྨཏོ ནཱགིཏསྶ བྷཱགིནེཡྻོ སཏྟཝསྶཀཱལེ པབྦཛིཏྭཱ སཱསནེ ཡུཏྟཔཡུཏྟོ ‘‘སཱིཧོ’’ཏི ཨེཝཾནཱམཀོ སཱམཎེརོ, སོ ཀིར ཏཾ མཧཱཔརིསཾ དིསྭཱ – ‘‘ཨཡཾ པརིསཱ མཧཏཱི, སཀལཾ ཝིཧཱརཾ པཱུརེཏྭཱ ནིསིནྣཱ, ཨདྡྷཱ བྷགཝཱ ཨཛྫ ཨིམིསྶཱ པརིསཱཡ མཧནྟེན ཨུསྶཱཧེན དྷམྨཾ དེསེསྶཏི, ཡཾནཱུནཱཧཾ ཨུཔཛ྄ཛྷཱཡསྶཱཙིཀྑིཏྭཱ བྷགཝཏོ མཧཱཔརིསཱཡ སནྣིཔཏིཏབྷཱཝཾ ཨཱརོཙཱཔེཡྻ’’ནྟི ཙིནྟེཏྭཱ ཡེནཱཡསྨཱ ནཱགིཏོ ཏེནུཔསངྐམི། བྷནྟེ ཀསྶཔཱཏི ཐེརཾ གོཏྟེན ཨཱལཔཏི། ཨེསཱ ཛནཏཱཏི ཨེསོ ཛནསམཱུཧོ།
362.Sīho samaṇuddesoti āyasmato nāgitassa bhāgineyyo sattavassakāle pabbajitvā sāsane yuttapayutto ‘‘sīho’’ti evaṃnāmako sāmaṇero, so kira taṃ mahāparisaṃ disvā – ‘‘ayaṃ parisā mahatī, sakalaṃ vihāraṃ pūretvā nisinnā, addhā bhagavā ajja imissā parisāya mahantena ussāhena dhammaṃ desessati, yaṃnūnāhaṃ upajjhāyassācikkhitvā bhagavato mahāparisāya sannipatitabhāvaṃ ārocāpeyya’’nti cintetvā yenāyasmā nāgito tenupasaṅkami. Bhante kassapāti theraṃ gottena ālapati. Esā janatāti eso janasamūho.
ཏྭཉྙེཝ བྷགཝཏོ ཨཱརོཙེཧཱིཏི སཱིཧོ ཀིར བྷགཝཏོ ཝིསྶཱསིཀོ, ཨཡཉྷི ཐེརོ ཐཱུལསརཱིརོ, ཏེནསྶ སརཱིརགརུཏཱཡ ཨུཊྛཱནནིསཛྫཱདཱིསུ ཨཱལསིཡབྷཱཝོ ཨཱིསཀཾ ཨཔྤཧཱིནོ ཝིཡ ཧོཏི། ཨཐཱཡཾ སཱམཎེརོ བྷགཝཏོ ཀཱལེན ཀཱལཾ ཝཏྟཾ ཀརོཏི། ཏེན ནཾ ཐེརོ ‘‘ཏྭམྤི དསབལསྶ ཝིསྶཱསིཀོ’’ཏི ཝཏྭཱ གཙྪ ཏྭཉྙེཝཱརོཙེཧཱིཏི ཨཱཧ། ཝིཧཱརཔཙྪཱཡཱཡནྟི ཝིཧཱརཚཱཡཱཡཾ, ཀཱུཊཱགཱརམཧཱགེཧཙྪཱཡཱཡ ཕརིཏོཀཱསེཏི ཨཏྠོ། སཱ ཀིར ཀཱུཊཱགཱརསཱལཱ དཀྑིཎུཏྟརཏོ དཱིགྷཱ པཱཙཱིནམུཁཱ, ཏེནསྶཱ པུརཏོ མཧཏཱི ཚཱཡཱ པཏྠཊཱ ཧོཏི, སཱིཧོ ཏཏྠ བྷགཝཏོ ཨཱསནཾ པཉྙཔེསི།
Tvaññeva bhagavato ārocehīti sīho kira bhagavato vissāsiko, ayañhi thero thūlasarīro, tenassa sarīragarutāya uṭṭhānanisajjādīsu ālasiyabhāvo īsakaṃ appahīno viya hoti. Athāyaṃ sāmaṇero bhagavato kālena kālaṃ vattaṃ karoti. Tena naṃ thero ‘‘tvampi dasabalassa vissāsiko’’ti vatvā gaccha tvaññevārocehīti āha. Vihārapacchāyāyanti vihārachāyāyaṃ, kūṭāgāramahāgehacchāyāya pharitokāseti attho. Sā kira kūṭāgārasālā dakkhiṇuttarato dīghā pācīnamukhā, tenassā purato mahatī chāyā patthaṭā hoti, sīho tattha bhagavato āsanaṃ paññapesi.
༣༦༣. ཨཐ ཁོ བྷགཝཱ དྭཱརནྟརེཧི ཙེཝ ཝཱཏཔཱནནྟརེཧི ཙ ནིཀྑམིཏྭཱ ཝིདྷཱཝནྟཱཧི ཝིཔྥརནྟཱིཧི ཚབྦཎྞཱཧི བུདྡྷརསྨཱིཧི སཾསཱུཙིཏནིཀྑམནོ ཝལཱཧཀནྟརཏོ པུཎྞཙནྡོ ཝིཡ ཀཱུཊཱགཱརསཱལཏོ ནིཀྑམིཏྭཱ པཉྙཏྟཝརབུདྡྷཱསནེ ནིསཱིདི། ཏེན ཝུཏྟཾ – ‘‘ཨཐ ཁོ བྷགཝཱ ཝིཧཱརཱ ནིཀྑམྨ ཝིཧཱརཔཙྪཱཡཱཡ པཉྙཏྟེ ཨཱསནེ ནིསཱིདཱི’’ཏི།
363. Atha kho bhagavā dvārantarehi ceva vātapānantarehi ca nikkhamitvā vidhāvantāhi vippharantīhi chabbaṇṇāhi buddharasmīhi saṃsūcitanikkhamano valāhakantarato puṇṇacando viya kūṭāgārasālato nikkhamitvā paññattavarabuddhāsane nisīdi. Tena vuttaṃ – ‘‘atha kho bhagavā vihārā nikkhamma vihārapacchāyāya paññatte āsane nisīdī’’ti.
༣༦༤-༣༦༥. པུརིམཱནི , བྷནྟེ, དིཝསཱནི པུརིམཏརཱནཱིཏི ཨེཏྠ ཧིཡྻོ དིཝསཾ པུརིམཾ ནཱམ, ཏཏོ པརཾ པུརིམཏརཾ། ཏཏོ པཊྛཱཡ པན སབྦཱནི པུརིམཱནི ཙེཝ པུརིམཏརཱནི ཙ ཧོནྟི། ཡདགྒེཏི མཱུལདིཝསཏོ པཊྛཱཡ ཡཾ དིཝསཾ ཨགྒཾ པརཀོཊིཾ ཀཏྭཱ ཝིཧརཱམཱིཏི ཨཏྠོ, ཡཱཝ ཝིཧཱསིནྟི ཝུཏྟཾ ཧོཏི། ཨིདཱནི ཏསྶ པརིམཱཎཾ དསྶེནྟོ ‘‘ནཙིརཾ ཏཱིཎི ཝསྶཱནཱི’’ཏི ཨཱཧ། ཨཐ ཝཱ ཡདགྒེཏི ཡཾ དིཝསཾ ཨགྒཾ ཀཏྭཱ ནཙིརཾ ཏཱིཎི ཝསྶཱནི ཝིཧརཱམཱིཏིཔི ཨཏྠོ ། ཡཾ དིཝསཾ ཨཱདིཾ ཀཏྭཱ ནཙིརཾ ཝིཧཱསིཾ ཏཱིཎིཡེཝ ཝསྶཱནཱིཏི ཝུཏྟཾ ཧོཏི། ཨཡཾ ཀིར བྷགཝཏོ པཏྟཙཱིཝརཾ གཎྷནྟོ ཏཱིཎི སཾཝཙྪརཱནི བྷགཝནྟཾ ཨུཔཊྛཱསི, ཏཾ སནྡྷཱཡ ཨེཝཾ ཝདཏི། པིཡརཱུཔཱནཱིཏི པིཡཛཱཏིཀཱནི སཱཏཛཱཏིཀཱནི། ཀཱམཱུཔསཾཧིཏཱནཱིཏི ཀཱམསྶཱདཡུཏྟཱནི། རཛནཱིཡཱནཱིཏི རཱགཛནཀཱནི། ནོ ཙ ཁོ དིབྦཱནི སདྡཱནཱིཏི ཀསྨཱ སུནཀྑཏྟོ ཏཱནི ན སུཎཱཏི? སོ ཀིར བྷགཝནྟཾ ཨུཔསངྐམིཏྭཱ དིབྦཙཀྑུཔརིཀམྨཾ ཡཱཙི, ཏསྶ བྷགཝཱ ཨཱཙིཀྑི, སོ ཡཐཱནུསིཊྛཾ པཊིཔནྣོ དིབྦཙཀྑུཾ ཨུཔྤཱདེཏྭཱ དེཝཏཱནཾ རཱུཔཱནི དིསྭཱ ཙིནྟེསི ‘‘ཨིམསྨིཾ སརཱིརསཎྛཱནེ སདྡེན མདྷུརེན བྷཝིཏབྦཾ, ཀཐཾ ནུ ཁོ ནཾ སུཎེཡྻ’’ནྟི བྷགཝནྟཾ ཨུཔསངྐམིཏྭཱ དིབྦསོཏཔརིཀམྨཾ པུཙྪི། ཨཡཉྩ ཨཏཱིཏེ ཨེཀཾ སཱིལཝནྟཾ བྷིཀྑུཾ ཀཎྞསཀྑལིཡཾ པཧརིཏྭཱ བདྷིརམཀཱསི། ཏསྨཱ པརིཀམྨཾ ཀརོནྟོཔི ཨབྷབྦོ དིབྦསོཏཱདྷིགམཱཡ། ཏེནསྶ ན བྷགཝཱ པརིཀམྨཾ ཀཐེསི། སོ ཨེཏྟཱཝཏཱ བྷགཝཏི ཨཱགྷཱཏཾ བནྡྷིཏྭཱ ཙིནྟེསི – ‘‘ཨདྡྷཱ སམཎསྶ གོཏམསྶ ཨེཝཾ ཧོཏི – ‘ཨཧམྤི ཁཏྟིཡོ ཨཡམྤི ཁཏྟིཡོ, སཙསྶ ཉཱཎཾ ཝཌྜྷིསྶཏི, ཨཡམྤི སབྦཉྙཱུ བྷཝིསྶཏཱི’ཏི ཨུསཱུཡཱཡ མཡ྄ཧཾ ན ཀཐེསཱི’’ཏི། སོ ཨནུཀྐམེན གིཧིབྷཱཝཾ པཏྭཱ ཏམཏྠཾ མཧཱལིལིཙྪཝིནོ ཀཐེནྟོ ཨེཝམཱཧ།
364-365.Purimāni, bhante, divasāni purimatarānīti ettha hiyyo divasaṃ purimaṃ nāma, tato paraṃ purimataraṃ. Tato paṭṭhāya pana sabbāni purimāni ceva purimatarāni ca honti. Yadaggeti mūladivasato paṭṭhāya yaṃ divasaṃ aggaṃ parakoṭiṃ katvā viharāmīti attho, yāva vihāsinti vuttaṃ hoti. Idāni tassa parimāṇaṃ dassento ‘‘naciraṃ tīṇi vassānī’’ti āha. Atha vā yadaggeti yaṃ divasaṃ aggaṃ katvā naciraṃ tīṇi vassāni viharāmītipi attho . Yaṃ divasaṃ ādiṃ katvā naciraṃ vihāsiṃ tīṇiyeva vassānīti vuttaṃ hoti. Ayaṃ kira bhagavato pattacīvaraṃ gaṇhanto tīṇi saṃvaccharāni bhagavantaṃ upaṭṭhāsi, taṃ sandhāya evaṃ vadati. Piyarūpānīti piyajātikāni sātajātikāni. Kāmūpasaṃhitānīti kāmassādayuttāni. Rajanīyānīti rāgajanakāni. No ca kho dibbāni saddānīti kasmā sunakkhatto tāni na suṇāti? So kira bhagavantaṃ upasaṅkamitvā dibbacakkhuparikammaṃ yāci, tassa bhagavā ācikkhi, so yathānusiṭṭhaṃ paṭipanno dibbacakkhuṃ uppādetvā devatānaṃ rūpāni disvā cintesi ‘‘imasmiṃ sarīrasaṇṭhāne saddena madhurena bhavitabbaṃ, kathaṃ nu kho naṃ suṇeyya’’nti bhagavantaṃ upasaṅkamitvā dibbasotaparikammaṃ pucchi. Ayañca atīte ekaṃ sīlavantaṃ bhikkhuṃ kaṇṇasakkhaliyaṃ paharitvā badhiramakāsi. Tasmā parikammaṃ karontopi abhabbo dibbasotādhigamāya. Tenassa na bhagavā parikammaṃ kathesi. So ettāvatā bhagavati āghātaṃ bandhitvā cintesi – ‘‘addhā samaṇassa gotamassa evaṃ hoti – ‘ahampi khattiyo ayampi khattiyo, sacassa ñāṇaṃ vaḍḍhissati, ayampi sabbaññū bhavissatī’ti usūyāya mayhaṃ na kathesī’’ti. So anukkamena gihibhāvaṃ patvā tamatthaṃ mahālilicchavino kathento evamāha.
༣༦༦-༣༧༡. ཨེཀཾསབྷཱཝིཏོཏི ཨེཀཾསཱཡ ཨེཀཀོཊྛཱསཱཡ བྷཱཝིཏོ, དིབྦཱནཾ ཝཱ རཱུཔཱནཾ དསྶནཏྠཱཡ དིབྦཱནཾ ཝཱ སདྡཱནཾ སཝནཏྠཱཡ བྷཱཝིཏོཏི ཨཏྠོ། ཏིརིཡནྟི ཨནུདིསཱཡ། ཨུབྷཡཾསབྷཱཝིཏོཏི ཨུབྷཡཾསཱཡ ཨུབྷཡཀོཊྛཱསཱཡ བྷཱཝིཏོཏི ཨཏྠོ། ཨཡཾ ཁོ མཧཱལི ཧེཏཱུཏི ཨཡཾ དིབྦཱནཾཡེཝ རཱུཔཱནཾ དསྶནཱཡ ཨེཀཾསབྷཱཝིཏོ སམཱདྷི ཧེཏུ། ཨིམམཏྠཾ སུཏྭཱ སོ ལིཙྪཝཱི ཙིནྟེསི – ‘‘ཨིདཾ དིབྦསོཏེན སདྡསུཎནཾ ཨིམསྨིཾ སཱསནེ ཨུཏྟམཏྠབྷཱུཏཾ མཉྙེ ཨིམསྶ ནཱུན ཨཏྠཱཡ ཨེཏེ བྷིཀྑཱུ པཉྙཱསམྤི སཊྛིཔི ཝསྶཱནི ཨཔཎྞཀཾ བྲཧྨཙརིཡཾ ཙརནྟི, ཡཾནཱུནཱཧཾ དསབལཾ ཨེཏམཏྠཾ པུཙྪེཡྻ’’ནྟི།
366-371.Ekaṃsabhāvitoti ekaṃsāya ekakoṭṭhāsāya bhāvito, dibbānaṃ vā rūpānaṃ dassanatthāya dibbānaṃ vā saddānaṃ savanatthāya bhāvitoti attho. Tiriyanti anudisāya. Ubhayaṃsabhāvitoti ubhayaṃsāya ubhayakoṭṭhāsāya bhāvitoti attho. Ayaṃ kho mahāli hetūti ayaṃ dibbānaṃyeva rūpānaṃ dassanāya ekaṃsabhāvito samādhi hetu. Imamatthaṃ sutvā so licchavī cintesi – ‘‘idaṃ dibbasotena saddasuṇanaṃ imasmiṃ sāsane uttamatthabhūtaṃ maññe imassa nūna atthāya ete bhikkhū paññāsampi saṭṭhipi vassāni apaṇṇakaṃ brahmacariyaṃ caranti, yaṃnūnāhaṃ dasabalaṃ etamatthaṃ puccheyya’’nti.
༣༧༢. ཏཏོ ཏམཏྠཾ པུཙྪནྟོ ‘‘ཨེཏཱསཾ ནཱུན, བྷནྟེ’’ཏིཨཱདིམཱཧ། སམཱདྷིབྷཱཝནཱནནྟི ཨེཏྠ སམཱདྷིཡེཝ སམཱདྷིབྷཱཝནཱ, ཨུབྷཡཾསབྷཱཝིཏཱནཾ སམཱདྷཱིནནྟི ཨཏྠོ། ཨཐ ཡསྨཱ སཱསནཏོ བཱཧིརཱ ཨེཏཱ སམཱདྷིབྷཱཝནཱ, ན ཨཛ྄ཛྷཏྟིཀཱ། ཏསྨཱ ཏཱ པཊིཀྑིཔིཏྭཱ ཡདཏྠཾ བྷིཀྑཱུ བྲཧྨཙརིཡཾ ཙརནྟི, ཏཾ དསྶེནྟོ བྷགཝཱ ‘‘ན ཁོ མཧཱལཱི’’ཏིཨཱདིམཱཧ།
372. Tato tamatthaṃ pucchanto ‘‘etāsaṃ nūna, bhante’’tiādimāha. Samādhibhāvanānanti ettha samādhiyeva samādhibhāvanā, ubhayaṃsabhāvitānaṃ samādhīnanti attho. Atha yasmā sāsanato bāhirā etā samādhibhāvanā, na ajjhattikā. Tasmā tā paṭikkhipitvā yadatthaṃ bhikkhū brahmacariyaṃ caranti, taṃ dassento bhagavā ‘‘na kho mahālī’’tiādimāha.
ཙཏུཨརིཡཕལཝཎྞནཱ
Catuariyaphalavaṇṇanā
༣༧༣. ཏིཎྞཾ སཾཡོཛནཱནནྟི སཀྐཱཡདིཊྛིཨཱདཱིནཾ ཏིཎྞཾ བནྡྷནཱནཾ། ཏཱནི ཧི ཝཊྚདུཀྑམཡེ རཐེ སཏྟེ སཾཡོཛེནྟི, ཏསྨཱ སཾཡོཛནཱནཱིཏི ཝུཙྩནྟི། སོཏཱཔནྣོ ཧོཏཱིཏི མགྒསོཏཾ ཨཱཔནྣོ ཧོཏི། ཨཝིནིཔཱཏདྷམྨོཏི ཙཏཱུསུ ཨཔཱཡེསུ ཨཔཏནདྷམྨོ། ནིཡཏོཏི དྷམྨནིཡཱམེན ནིཡཏོ། སམྦོདྷིཔརཱཡཎོཏི ཨུཔརིམགྒཏྟཡསངྑཱཏཱ སམྦོདྷི པརཾ ཨཡནཾ ཨསྶ, ཨནེན ཝཱ པཏྟབྦཱཏི སམྦོདྷིཔརཱཡཎོ།
373.Tiṇṇaṃsaṃyojanānanti sakkāyadiṭṭhiādīnaṃ tiṇṇaṃ bandhanānaṃ. Tāni hi vaṭṭadukkhamaye rathe satte saṃyojenti, tasmā saṃyojanānīti vuccanti. Sotāpannohotīti maggasotaṃ āpanno hoti. Avinipātadhammoti catūsu apāyesu apatanadhammo. Niyatoti dhammaniyāmena niyato. Sambodhiparāyaṇoti uparimaggattayasaṅkhātā sambodhi paraṃ ayanaṃ assa, anena vā pattabbāti sambodhiparāyaṇo.
ཏནུཏྟཱཏི པརིཡུཊྛཱནམནྡཏཱཡ ཙ ཀདཱཙི ཀརཧཙི ཨུཔྤཏྟིཡཱ ཙ ཏནུབྷཱཝཱ། ཨོརམྦྷཱགིཡཱནནྟི ཧེཊྛཱབྷཱགིཡཱནཾ, ཡེ ཧི བདྡྷོ ཨུཔརི སུདྡྷཱཝཱསབྷཱུམིཡཾ ནིབྦཏྟིཏུཾ ན སཀྐོཏི། ཨོཔཔཱཏིཀོཏི སེསཡོནིཔཊིཀྑེཔཝཙནམེཏཾ། ཏཏྠ པརིནིབྦཱཡཱིཏི ཏསྨིཾ ཨུཔརིབྷཝེཡེཝ པརིནིབྦཱནདྷམྨོ། ཨནཱཝཏྟིདྷམྨོཏི ཏཏོ བྲཧྨལོཀཱ པུན པཊིསནྡྷིཝསེན ཨནཱཝཏྟནདྷམྨོ། ཙེཏོཝིམུཏྟིནྟི ཙིཏྟཝིསུདྡྷིཾ, སབྦཀིལེསབནྡྷནཝིམུཏྟསྶ ཨརཧཏྟཕལཙིཏྟསྶེཏཾ ཨདྷིཝཙནཾ། པཉྙཱཝིམུཏྟིནྟི ཨེཏྠཱཔི སབྦཀིལེསབནྡྷནཝིམུཏྟཱ ཨརཧཏྟཕལཔཉྙཱཝ པཉྙཱཝིམུཏྟཱིཏི ཝེདིཏབྦཱ། དིཊྛེཝ དྷམྨེཏི ཨིམསྨིཾཡེཝ ཨཏྟབྷཱཝེ། སཡནྟི སཱམཾ། ཨབྷིཉྙཱཏི ཨབྷིཛཱནིཏྭཱ། སཙྪིཀཏྭཱཏི པཙྩཀྑཾ ཀཏྭཱ། ཨཐ ཝཱ ཨབྷིཉྙཱ སཙྪིཀཏྭཱཏི ཨབྷིཉྙཱཡ ཨབྷིཝིསིཊྛེན ཉཱཎེན སཙྪིཀརིཏྭཱཏིཔི ཨཏྠོ། ཨུཔསམྤཛྫཱཏི པཏྭཱ པཊིལབྷིཏྭཱ། ཨིདཾ སུཏྭཱ ལིཙྪཝིརཱཛཱ ཙིནྟེསི – ‘‘ཨཡཾ པན དྷམྨོ ན སཀུཎེན ཝིཡ ཨུཔྤཏིཏྭཱ, ནཱཔི གོདྷཱཡ ཝིཡ ཨུརེན གནྟྭཱ སཀྐཱ པཊིཝིཛ྄ཛྷིཏུཾ , ཨདྡྷཱ པན ཨིམཾ པཊིཝིཛ྄ཛྷནྟསྶ པུབྦབྷཱགཔྤཊིཔདཱཡ བྷཝིཏབྦཾ, པུཙྪཱམི ཏཱཝ ན’’ནྟི།
Tanuttāti pariyuṭṭhānamandatāya ca kadāci karahaci uppattiyā ca tanubhāvā. Orambhāgiyānanti heṭṭhābhāgiyānaṃ, ye hi baddho upari suddhāvāsabhūmiyaṃ nibbattituṃ na sakkoti. Opapātikoti sesayonipaṭikkhepavacanametaṃ. Tattha parinibbāyīti tasmiṃ uparibhaveyeva parinibbānadhammo. Anāvattidhammoti tato brahmalokā puna paṭisandhivasena anāvattanadhammo. Cetovimuttinti cittavisuddhiṃ, sabbakilesabandhanavimuttassa arahattaphalacittassetaṃ adhivacanaṃ. Paññāvimuttinti etthāpi sabbakilesabandhanavimuttā arahattaphalapaññāva paññāvimuttīti veditabbā. Diṭṭheva dhammeti imasmiṃyeva attabhāve. Sayanti sāmaṃ. Abhiññāti abhijānitvā. Sacchikatvāti paccakkhaṃ katvā. Atha vā abhiññā sacchikatvāti abhiññāya abhivisiṭṭhena ñāṇena sacchikaritvātipi attho. Upasampajjāti patvā paṭilabhitvā. Idaṃ sutvā licchavirājā cintesi – ‘‘ayaṃ pana dhammo na sakuṇena viya uppatitvā, nāpi godhāya viya urena gantvā sakkā paṭivijjhituṃ , addhā pana imaṃ paṭivijjhantassa pubbabhāgappaṭipadāya bhavitabbaṃ, pucchāmi tāva na’’nti.
ཨརིཡཨཊྛངྒིཀམགྒཝཎྞནཱ
Ariyaaṭṭhaṅgikamaggavaṇṇanā
༣༧༤-༣༧༥. ཏཏོ བྷགཝནྟཾ པུཙྪནྟོ ‘‘ཨཏྠི པན བྷནྟེ’’ཏིཨཱདིམཱཧ། ཨཊྛངྒིཀོཏི པཉྩངྒིཀཾ ཏུརིཡཾ ཝིཡ ཨཊྛངྒིཀོ གཱམོ ཝིཡ ཙ ཨཊྛངྒམཏྟོཡེཝ ཧུཏྭཱ ཨཊྛངྒིཀོ, ན ཨངྒཏོ ཨཉྙོ མགྒོ ནཱམ ཨཏྠི། ཏེནེཝཱཧ – ‘‘སེཡྻཐིདཾ, སམྨཱདིཊྛི…པེ॰… སམྨཱསམཱདྷཱི’’ཏི། ཏཏྠ སམྨཱདསྶནལཀྑཎཱ སམྨཱདིཊྛི། སམྨཱ ཨབྷིནིརོཔནལཀྑཎོ སམྨཱསངྐཔྤོ། སམྨཱ པརིགྒཧཎལཀྑཎཱ སམྨཱཝཱཙཱ། སམྨཱ སམུཊྛཱཔནལཀྑཎོ སམྨཱཀམྨནྟོ། སམྨཱ ཝོདཱཔནལཀྑཎོ སམྨཱཨཱཛཱིཝོ། སམྨཱ པགྒཧལཀྑཎོ སམྨཱཝཱཡཱམོ། སམྨཱ ཨུཔཊྛཱནལཀྑཎཱ སམྨཱསཏི། སམྨཱ སམཱདྷཱནལཀྑཎོ སམྨཱསམཱདྷི། ཨེཏེསུ ཨེཀེཀསྶ ཏཱིཎི ཏཱིཎི ཀིཙྩཱནི ཧོནྟི། སེཡྻཐིདཾ, སམྨཱདིཊྛི ཏཱཝ ཨཉྙེཧིཔི ཨཏྟནོ པཙྩནཱིཀཀིལེསེཧི སདྡྷིཾ མིཙྪཱདིཊྛིཾ པཛཧཏི, ནིརོདྷཾ ཨཱརམྨཎཾ ཀརོཏི, སམྤཡུཏྟདྷམྨེ ཙ པསྶཏི ཏཔྤཊིཙྪཱདཀམོཧཝིདྷམནཝསེན ཨསམྨོཧཏོ། སམྨཱསངྐཔྤཱདཡོཔི ཏཐེཝ མིཙྪཱསངྐཔྤཱདཱིནི པཛཧནྟི, ནིརོདྷཉྩ ཨཱརམྨཎཾ ཀརོནྟི, ཝིསེསཏོ པནེཏྠ སམྨཱསངྐཔྤོ སཧཛཱཏདྷམྨེ ཨབྷིནིརོཔེཏི། སམྨཱཝཱཙཱ སམྨཱ པརིགྒཎྷཏི། སམྨཱཀམྨནྟོ སམྨཱ སམུཊྛཱཔེཏི། སམྨཱཨཱཛཱིཝོ སམྨཱ ཝོདཱཔེཏི། སམྨཱཝཱཡཱམོ སམྨཱ པགྒཎྷཏི། སམྨཱསཏི སམྨཱ ཨུཔཊྛཱཔེཏི། སམྨཱསམཱདྷི སམྨཱ པདཧཏི།
374-375. Tato bhagavantaṃ pucchanto ‘‘atthi pana bhante’’tiādimāha. Aṭṭhaṅgikoti pañcaṅgikaṃ turiyaṃ viya aṭṭhaṅgiko gāmo viya ca aṭṭhaṅgamattoyeva hutvā aṭṭhaṅgiko, na aṅgato añño maggo nāma atthi. Tenevāha – ‘‘seyyathidaṃ, sammādiṭṭhi…pe… sammāsamādhī’’ti. Tattha sammādassanalakkhaṇā sammādiṭṭhi. Sammā abhiniropanalakkhaṇo sammāsaṅkappo. Sammā pariggahaṇalakkhaṇā sammāvācā. Sammā samuṭṭhāpanalakkhaṇo sammākammanto. Sammā vodāpanalakkhaṇo sammāājīvo. Sammā paggahalakkhaṇo sammāvāyāmo. Sammā upaṭṭhānalakkhaṇā sammāsati. Sammā samādhānalakkhaṇo sammāsamādhi. Etesu ekekassa tīṇi tīṇi kiccāni honti. Seyyathidaṃ, sammādiṭṭhi tāva aññehipi attano paccanīkakilesehi saddhiṃ micchādiṭṭhiṃ pajahati, nirodhaṃ ārammaṇaṃ karoti, sampayuttadhamme ca passati tappaṭicchādakamohavidhamanavasena asammohato. Sammāsaṅkappādayopi tatheva micchāsaṅkappādīni pajahanti, nirodhañca ārammaṇaṃ karonti, visesato panettha sammāsaṅkappo sahajātadhamme abhiniropeti. Sammāvācā sammā pariggaṇhati. Sammākammanto sammā samuṭṭhāpeti. Sammāājīvo sammā vodāpeti. Sammāvāyāmo sammā paggaṇhati. Sammāsati sammā upaṭṭhāpeti. Sammāsamādhi sammā padahati.
ཨཔི ཙེསཱ སམྨཱདིཊྛི ནཱམ པུབྦབྷཱགེ ནཱནཱཀྑཎཱ ནཱནཱརམྨཎཱ ཧོཏི, མགྒཀྑཎེ ཨེཀཀྑཎཱ ཨེཀཱརམྨཎཱ། ཀིཙྩཏོ པན ‘‘དུཀྑེ ཉཱཎ’’ནྟིཨཱདཱིནི ཙཏྟཱརི ནཱམཱནི ལབྷཏི། སམྨཱསངྐཔྤཱདཡོཔི པུབྦབྷཱགེ ནཱནཱཀྑཎཱ ནཱནཱརམྨཎཱ ཧོནྟི། མགྒཀྑཎེ ཨེཀཀྑཎཱ ཨེཀཱརམྨཎཱ། ཏེསུ སམྨཱསངྐཔྤོ ཀིཙྩཏོ ‘‘ནེཀྑམྨསངྐཔྤོ’’ཏིཨཱདཱིནི ཏཱིཎི ནཱམཱནི ལབྷཏི། སམྨཱ ཝཱཙཱདཡོ ཏིསྶོ ཝིརཏིཡོཔི ཧོནྟི, ཙེཏནཱདཡོཔི ཧོནྟི, མགྒཀྑཎེ པན ཝིརཏིཡེཝ། སམྨཱཝཱཡཱམོ སམྨཱསཏཱིཏི ཨིདམྤི དྭཡཾ ཀིཙྩཏོ སམྨཔྤདྷཱནསཏིཔཊྛཱནཝསེན ཙཏྟཱརི ནཱམཱནི ལབྷཏི། སམྨཱསམཱདྷི པན པུབྦབྷཱགེཔི མགྒཀྑཎེཔི སམྨཱསམཱདྷིཡེཝ།
Api cesā sammādiṭṭhi nāma pubbabhāge nānākkhaṇā nānārammaṇā hoti, maggakkhaṇe ekakkhaṇā ekārammaṇā. Kiccato pana ‘‘dukkhe ñāṇa’’ntiādīni cattāri nāmāni labhati. Sammāsaṅkappādayopi pubbabhāge nānākkhaṇā nānārammaṇā honti. Maggakkhaṇe ekakkhaṇā ekārammaṇā. Tesu sammāsaṅkappo kiccato ‘‘nekkhammasaṅkappo’’tiādīni tīṇi nāmāni labhati. Sammā vācādayo tisso viratiyopi honti, cetanādayopi honti, maggakkhaṇe pana viratiyeva. Sammāvāyāmo sammāsatīti idampi dvayaṃ kiccato sammappadhānasatipaṭṭhānavasena cattāri nāmāni labhati. Sammāsamādhi pana pubbabhāgepi maggakkhaṇepi sammāsamādhiyeva.
ཨིཏི ཨིམེསུ ཨཊྛསུ དྷམྨེསུ བྷགཝཏཱ ནིབྦཱནཱདྷིགམཱཡ པཊིཔནྣསྶ ཡོགིནོ བཧུཀཱརཏྟཱ པཋམཾ སམྨཱདིཊྛི དེསིཏཱ། ཨཡཉྷི ‘‘པཉྙཱཔཛྫོཏོ པཉྙཱསཏྠ’’ནྟི (དྷ॰ ས॰ ༢༠) ཙ ཝུཏྟཱ། ཏསྨཱ ཨེཏཱཡ པུབྦབྷཱགེ ཝིཔསྶནཱཉཱཎསངྑཱཏཱཡ སམྨཱདིཊྛིཡཱ ཨཝིཛྫནྡྷཀཱརཾ ཝིདྷམིཏྭཱ ཀིལེསཙོརེ གྷཱཏེནྟོ ཁེམེན ཡོགཱཝཙརོ ནིབྦཱནཾ པཱཔུཎཱཏི། ཏེན ཝུཏྟཾ – ‘‘ནིབྦཱནཱདྷིགམཱཡ པཊིཔནྣསྶ ཡོགིནོ བཧུཀཱརཏྟཱ པཋམཾ སམྨཱདིཊྛི དེསིཏཱ’’ཏི།
Iti imesu aṭṭhasu dhammesu bhagavatā nibbānādhigamāya paṭipannassa yogino bahukārattā paṭhamaṃ sammādiṭṭhi desitā. Ayañhi ‘‘paññāpajjoto paññāsattha’’nti (dha. sa. 20) ca vuttā. Tasmā etāya pubbabhāge vipassanāñāṇasaṅkhātāya sammādiṭṭhiyā avijjandhakāraṃ vidhamitvā kilesacore ghātento khemena yogāvacaro nibbānaṃ pāpuṇāti. Tena vuttaṃ – ‘‘nibbānādhigamāya paṭipannassa yogino bahukārattā paṭhamaṃ sammādiṭṭhi desitā’’ti.
སམྨཱསངྐཔྤོ པན ཏསྶཱ བཧུཀཱརོ, ཏསྨཱ ཏདནནྟརཾ ཝུཏྟོ། ཡཐཱ ཧི ཧེརཉྙིཀོ ཧཏྠེན པརིཝཊྚེཏྭཱ པརིཝཊྚེཏྭཱ ཙཀྑུནཱ ཀཧཱཔཎཾ ཨོལོཀེནྟོ – ‘‘ཨཡཾ ཚེཀོ, ཨཡཾ ཀཱུཊོ’’ཏི ཛཱནཱཏི། ཨེཝཾ ཡོགཱཝཙརོཔི པུབྦབྷཱགེ ཝིཏཀྐེན ཝིཏཀྐེཏྭཱ ཝིཔསྶནཱཔཉྙཱཡ ཨོལོཀཡམཱནོ – ‘‘ཨིམེ དྷམྨཱ ཀཱམཱཝཙརཱ, ཨིམེ དྷམྨཱ རཱུཔཱཝཙརཱདཡོ’’ཏི པཛཱནཱཏི། ཡཐཱ ཝཱ པན པུརིསེན ཀོཊིཡཾ གཧེཏྭཱ པརིཝཊྚེཏྭཱ པརིཝཊྚེཏྭཱ དིནྣཾ མཧཱརུཀྑཾ ཏཙྪཀོ ཝཱསིཡཱ ཏཙྪེཏྭཱ ཀམྨེ ཨུཔནེཏི, ཨེཝཾ ཝིཏཀྐེན ཝིཏཀྐེཏྭཱ ཝིཏཀྐེཏྭཱ དིནྣེ དྷམྨེ ཡོགཱཝཙརོ པཉྙཱཡ – ‘‘ཨིམེ ཀཱམཱཝཙརཱ, ཨིམེ རཱུཔཱཝཙརཱ’’ཏིཨཱདིནཱ ནཡེན པརིཙྪིནྡིཏྭཱ ཀམྨེ ཨུཔནེཏི ། ཏེན ཝུཏྟཾ – ‘‘སམྨཱསངྐཔྤོ པན ཏསྶཱ བཧུཀཱརོ, ཏསྨཱ ཏདནནྟརཾ ཝུཏྟོ’’ཏི། སྭཱཡཾ ཡཐཱ སམྨཱདིཊྛིཡཱ ཨེཝཾ སམྨཱཝཱཙཱཡཔི ཨུཔཀཱརཀོ། ཡཐཱཧ – ‘‘པུབྦེ ཁོ, ཝིསཱཁ, ཝིཏཀྐེཏྭཱ ཝིཙཱརེཏྭཱ པཙྪཱ ཝཱཙཾ བྷིནྡཏཱི’’ཏི, (མ॰ ནི॰ ༡.༤༦༣) ཏསྨཱ ཏདནནྟརཾ སམྨཱཝཱཙཱ ཝུཏྟཱ།
Sammāsaṅkappo pana tassā bahukāro, tasmā tadanantaraṃ vutto. Yathā hi heraññiko hatthena parivaṭṭetvā parivaṭṭetvā cakkhunā kahāpaṇaṃ olokento – ‘‘ayaṃ cheko, ayaṃ kūṭo’’ti jānāti. Evaṃ yogāvacaropi pubbabhāge vitakkena vitakketvā vipassanāpaññāya olokayamāno – ‘‘ime dhammā kāmāvacarā, ime dhammā rūpāvacarādayo’’ti pajānāti. Yathā vā pana purisena koṭiyaṃ gahetvā parivaṭṭetvā parivaṭṭetvā dinnaṃ mahārukkhaṃ tacchako vāsiyā tacchetvā kamme upaneti, evaṃ vitakkena vitakketvā vitakketvā dinne dhamme yogāvacaro paññāya – ‘‘ime kāmāvacarā, ime rūpāvacarā’’tiādinā nayena paricchinditvā kamme upaneti . Tena vuttaṃ – ‘‘sammāsaṅkappo pana tassā bahukāro, tasmā tadanantaraṃ vutto’’ti. Svāyaṃ yathā sammādiṭṭhiyā evaṃ sammāvācāyapi upakārako. Yathāha – ‘‘pubbe kho, visākha, vitakketvā vicāretvā pacchā vācaṃ bhindatī’’ti, (ma. ni. 1.463) tasmā tadanantaraṃ sammāvācā vuttā.
ཡསྨཱ པན – ‘‘ཨིདཉྩིདཉྩ ཀརིསྶཱམཱ’’ཏི པཋམཾ ཝཱཙཱཡ སཾཝིདཧིཏྭཱ ལོཀེ ཀམྨནྟེ པཡོཛེནྟི; ཏསྨཱ ཝཱཙཱ ཀཱཡཀམྨསྶ ཨུཔཀཱརིཀཱཏི སམྨཱཝཱཙཱཡ ཨནནྟརཾ སམྨཱཀམྨནྟོ ཝུཏྟོ། ཙཏུབྦིདྷཾ པན ཝཙཱིདུཙྩརིཏཾ, ཏིཝིདྷཉྩ ཀཱཡདུཙྩརིཏཾ པཧཱཡ ཨུབྷཡཾ སུཙརིཏཾ པཱུརེནྟསྶེཝ ཡསྨཱ ཨཱཛཱིཝཊྛམཀཾ སཱིལཾ པཱུརེཏི, ན ཨིཏརསྶ, ཏསྨཱ ཏདུབྷཡཱནནྟརཾ སམྨཱཨཱཛཱིཝོ ཝུཏྟོ། ཨེཝཾ ཝིསུདྡྷཱཛཱིཝེན པན ‘‘པརིསུདྡྷོ མེ ཨཱཛཱིཝོ’’ཏི ཨེཏྟཱཝཏཱ ཙ པརིཏོསཾ ཀཏྭཱ སུཏྟཔམཏྟེན ཝིཧརིཏུཾ ན ཡུཏྟཾ, ཨཐ ཁོ ‘‘སབྦིརིཡཱཔཐེསུ ཨིདཾ ཝཱིརིཡཾ སམཱརབྷིཏབྦ’’ནྟི དསྶེཏུཾ ཏདནནྟརཾ སམྨཱཝཱཡཱམོ ཝུཏྟོ། ཏཏོ ‘‘ཨཱརདྡྷཝཱིརིཡེནཔི ཀཱཡཱདཱིསུ ཙཏཱུསུ ཝཏྠཱུསུ སཏི སཱུཔཊྛིཏཱ ཀཱཏབྦཱ’’ཏི དསྶནཏྠཾ ཏདནནྟརཾ སམྨཱསཏི དེསིཏཱ། ཡསྨཱ པནེཝཾ སཱུཔཊྛིཏཱ སཏི སམཱདྷིསྶུཔཀཱརཱནུཔཀཱརཱནཾ དྷམྨཱནཾ གཏིཡོ སམནྣེསིཏྭཱ པཧོཏི ཨེཀཏྟཱརམྨཎེ ཙིཏྟཾ སམཱདྷཱཏུཾ, ཏསྨཱ སམྨཱསཏིཡཱ ཨནནྟརཾ སམྨཱསམཱདྷི དེསིཏོཏི ཝེདིཏབྦོ། ཨེཏེསཾ དྷམྨཱནཾ སཙྪིཀིརིཡཱཡཱཏི ཨེཏེསཾ སོཏཱཔཏྟིཕལཱདཱིནཾ པཙྩཀྑཀིརིཡཏྠཱཡ།
Yasmā pana – ‘‘idañcidañca karissāmā’’ti paṭhamaṃ vācāya saṃvidahitvā loke kammante payojenti; tasmā vācā kāyakammassa upakārikāti sammāvācāya anantaraṃ sammākammanto vutto. Catubbidhaṃ pana vacīduccaritaṃ, tividhañca kāyaduccaritaṃ pahāya ubhayaṃ sucaritaṃ pūrentasseva yasmā ājīvaṭṭhamakaṃ sīlaṃ pūreti, na itarassa, tasmā tadubhayānantaraṃ sammāājīvo vutto. Evaṃ visuddhājīvena pana ‘‘parisuddho me ājīvo’’ti ettāvatā ca paritosaṃ katvā suttapamattena viharituṃ na yuttaṃ, atha kho ‘‘sabbiriyāpathesu idaṃ vīriyaṃ samārabhitabba’’nti dassetuṃ tadanantaraṃ sammāvāyāmo vutto. Tato ‘‘āraddhavīriyenapi kāyādīsu catūsu vatthūsu sati sūpaṭṭhitā kātabbā’’ti dassanatthaṃ tadanantaraṃ sammāsati desitā. Yasmā panevaṃ sūpaṭṭhitā sati samādhissupakārānupakārānaṃ dhammānaṃ gatiyo samannesitvā pahoti ekattārammaṇe cittaṃ samādhātuṃ, tasmā sammāsatiyā anantaraṃ sammāsamādhi desitoti veditabbo. Etesaṃ dhammānaṃ sacchikiriyāyāti etesaṃ sotāpattiphalādīnaṃ paccakkhakiriyatthāya.
དྭེ པབྦཛིཏཝཏྠུཝཎྞནཱ
Dve pabbajitavatthuvaṇṇanā
༣༧༦-༣༧༧. ཨེཀམིདཱཧནྟི ཨིདཾ ཀསྨཱ ཨཱརདྡྷཾ? ཨཡཾ ཀིར རཱཛཱ – ‘‘རཱུཔཾ ཨཏྟཱ’’ཏི ཨེཝཾལདྡྷིཀོ, ཏེནསྶ དེསནཱཡ ཙིཏྟཾ ནཱདྷིམུཙྩཏི། ཨཐ བྷགཝཏཱ ཏསྶ ལདྡྷིཡཱ ཨཱཝིཀརཎཏྠཾ ཨེཀཾ ཀཱརཎཾ ཨཱཧརིཏུཾ ཨིདམཱརདྡྷཾ། ཏཏྲཱཡཾ སངྑེཔཏྠོ – ‘‘ཨཧཾ ཨེཀཾ སམཡཾ གྷོསིཏཱརཱམེ ཝིཧརཱམི, ཏཏྲ ཝསནྟཾ མཾ ཏེ དྭེ པབྦཛིཏཱ ཨེཝཾ པུཙྪིཾསུ། ཨཐཱཧཾ ཏེསཾ བུདྡྷུཔྤཱདཾ དསྶེཏྭཱ ཏནྟིདྷམྨཾ ནཱམ ཀཐེནྟོ ཨིདམཝོཙཾ – ‘‘ཨཱཝུསོ, སདྡྷཱསམྤནྣོ ནཱམ ཀུལཔུཏྟོ ཨེཝརཱུཔསྶ སཏྠུ སཱསནེ པབྦཛིཏོ, ཨེཝཾ ཏིཝིདྷཾ སཱིལཾ པཱུརེཏྭཱ པཋམཛ྄ཛྷཱནཱདཱིནི པཏྭཱ ཋིཏོ ‘ཏཾ ཛཱིཝ’ནྟིཨཱདཱིནི ཝདེཡྻ, ཡུཏྟཾ ནུ ཁོ ཨེཏམསྶཱ’’ཏི? ཏཏོ ཏེཧི ‘‘ཡུཏྟ’’ནྟི ཝུཏྟེ ‘‘ཨཧཾ ཁོ པནེཏཾ, ཨཱཝུསོ, ཨེཝཾ ཛཱནཱམི, ཨེཝཾ པསྶཱམི, ཨཐ ཙ པནཱཧཾ ན ཝདཱམཱི’’ཏི ཏཾ ཝཱདཾ པཊིཀྑིཔིཏྭཱ ཨུཏྟརི ཁཱིཎཱསཝཾ དསྶེཏྭཱ ‘‘ཨིམསྶ ཨེཝཾ ཝཏྟུཾ ན ཡུཏྟ’’ནྟི ཨཝོཙཾ། ཏེ མམ ཝཙནཾ སུཏྭཱ ཨཏྟམནཱ ཨཧེསུནྟི། ཨེཝཾ ཝུཏྟེ སོཔི ཨཏྟམནོ ཨཧོསི ། ཏེནཱཧ – ‘‘ཨིདམཝོཙ བྷགཝཱ། ཨཏྟམནོ ཨོཊྛདྡྷོ ལིཙྪཝཱི བྷགཝཏོ བྷཱསིཏཾ ཨབྷིནནྡཱི’’ཏི།
376-377.Ekamidāhanti idaṃ kasmā āraddhaṃ? Ayaṃ kira rājā – ‘‘rūpaṃ attā’’ti evaṃladdhiko, tenassa desanāya cittaṃ nādhimuccati. Atha bhagavatā tassa laddhiyā āvikaraṇatthaṃ ekaṃ kāraṇaṃ āharituṃ idamāraddhaṃ. Tatrāyaṃ saṅkhepattho – ‘‘ahaṃ ekaṃ samayaṃ ghositārāme viharāmi, tatra vasantaṃ maṃ te dve pabbajitā evaṃ pucchiṃsu. Athāhaṃ tesaṃ buddhuppādaṃ dassetvā tantidhammaṃ nāma kathento idamavocaṃ – ‘‘āvuso, saddhāsampanno nāma kulaputto evarūpassa satthu sāsane pabbajito, evaṃ tividhaṃ sīlaṃ pūretvā paṭhamajjhānādīni patvā ṭhito ‘taṃ jīva’ntiādīni vadeyya, yuttaṃ nu kho etamassā’’ti? Tato tehi ‘‘yutta’’nti vutte ‘‘ahaṃ kho panetaṃ, āvuso, evaṃ jānāmi, evaṃ passāmi, atha ca panāhaṃ na vadāmī’’ti taṃ vādaṃ paṭikkhipitvā uttari khīṇāsavaṃ dassetvā ‘‘imassa evaṃ vattuṃ na yutta’’nti avocaṃ. Te mama vacanaṃ sutvā attamanā ahesunti. Evaṃ vutte sopi attamano ahosi . Tenāha – ‘‘idamavoca bhagavā. Attamano oṭṭhaddho licchavī bhagavato bhāsitaṃ abhinandī’’ti.
ཨིཏི སུམངྒལཝིལཱསིནིཡཱ དཱིགྷནིཀཱཡཊྛཀཐཱཡཾ
Iti sumaṅgalavilāsiniyā dīghanikāyaṭṭhakathāyaṃ
མཧཱལིསུཏྟཝཎྞནཱ ནིཊྛིཏཱ།
Mahālisuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / དཱིགྷནིཀཱཡ • Dīghanikāya / ༦. མཧཱལིསུཏྟཾ • 6. Mahālisuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / དཱིགྷནིཀཱཡ (ཊཱིཀཱ) • Dīghanikāya (ṭīkā) / ༦. མཧཱལིསུཏྟཝཎྞནཱ • 6. Mahālisuttavaṇṇanā
