| Library / Tipiṭaka / ཏིཔིཊཀ • Tipiṭaka / དཱིགྷནིཀཱཡ (ཊཱིཀཱ) • Dīghanikāya (ṭīkā) |
༦. མཧཱལིསུཏྟཝཎྞནཱ
6. Mahālisuttavaṇṇanā
བྲཱཧྨཎདཱུཏཝཏྠུཝཎྞནཱ
Brāhmaṇadūtavatthuvaṇṇanā
༣༥༩. པུནཔྤུནཾ ཝིསཱལཱིབྷཱཝཱུཔགམནཏོཏི པུབྦེ ཀིར པུཏྟདྷཱིཏུཝསེན དྭེ དྭེ ཧུཏྭཱ སོལ༹སཀྑཏྟུཾ ཛཱཏཱནཾ ལིཙྪཝཱིརཱཛཀུམཱརཱནཾ སཔརིཝཱརཱནཾ ཨནུཀྐམེནེཝ ཝཌྜྷནྟཱནཾ ནིཝཱསནཊྛཱནཱརཱམུཡྻཱནཔོཀྑརཎཱིཨཱདཱིནཾ པཏིཊྛཱནསྶ ཨཔྤཧོནཀཏཱཡ ནགརཾ ཏིཀྑཏྟུཾ གཱཝུཏནྟརེན གཱཝུཏནྟརེན པརིཀྑིཔིཾསུ, ཏེནསྶ པུནཔྤུནཾ ཝིསཱལཱིབྷཱཝཾ གཏཏྟཱ ‘‘ཝེསཱལཱི’’ ཏྭེཝ ནཱམཾ ཛཱཏཾ, ཏེན ཝུཏྟཾ ‘‘པུནཔྤུནཾ ཝིསཱལཱིབྷཱཝཱུཔགམནཏོ ཝེསཱལཱིཏི ལདྡྷནཱམཀེ ནགརེ’’ཏི། སཡཾཛཱཏནྟི སཡམེཝ ཛཱཏཾ ཨརོཔིམཾ། མཧནྟབྷཱཝེནེཝཱཏི རུཀྑགཙྪཱནཾ, ཋིཏོཀཱསསྶ ཙ མཧནྟབྷཱཝེན, ཏེནཱཧ ‘‘ཧིམཝནྟེན སདྡྷིཾ ཨེཀཱབདྡྷཾ ཧུཏྭཱ’’ཏི། ཀཱུཊཱགཱརསཱལཱསངྑེཔེནཱཏི ཧཾསཝཊྚཀཙྪནྣེན ཀཱུཊཱགཱརསཱལཱནིཡཱམེན། ཀོསལེསུ ཛཱཏཱ, བྷཝཱ ཝཱ, ཏཾ ཝཱ རཊྛཾ ནིཝཱསོ ཨེཏེསནྟི ཀོསལཀཱ། ཨེཝཾ མཱགདྷཀཱ ཝེདིཏབྦཱ། ཡསྶ ཨཀརཎེ པུགྒལོ མཧཱཛཱནིཡོ ཧོཏི, ཏཾ ཀརཎཾ ཨརཧཏཱིཏི ཀརཎཱིཡཾ ཏེན ཀརཎཱིཡེན, ཏེནཱཧ ‘‘ཨཝསྶཾ ཀཏྟབྦཀམྨེནཱ’’ཏི། ཏཾ ཀིཙྩནྟི ཝུཙྩཏི སཏི སམཝཱཡེ ཀཱཏབྦཏོ།
359.Punappunaṃvisālībhāvūpagamanatoti pubbe kira puttadhītuvasena dve dve hutvā soḷasakkhattuṃ jātānaṃ licchavīrājakumārānaṃ saparivārānaṃ anukkameneva vaḍḍhantānaṃ nivāsanaṭṭhānārāmuyyānapokkharaṇīādīnaṃ patiṭṭhānassa appahonakatāya nagaraṃ tikkhattuṃ gāvutantarena gāvutantarena parikkhipiṃsu, tenassa punappunaṃ visālībhāvaṃ gatattā ‘‘vesālī’’ tveva nāmaṃ jātaṃ, tena vuttaṃ ‘‘punappunaṃ visālībhāvūpagamanato vesālīti laddhanāmake nagare’’ti. Sayaṃjātanti sayameva jātaṃ aropimaṃ. Mahantabhāvenevāti rukkhagacchānaṃ, ṭhitokāsassa ca mahantabhāvena, tenāha ‘‘himavantena saddhiṃ ekābaddhaṃ hutvā’’ti. Kūṭāgārasālāsaṅkhepenāti haṃsavaṭṭakacchannena kūṭāgārasālāniyāmena. Kosalesu jātā, bhavā vā, taṃ vā raṭṭhaṃ nivāso etesanti kosalakā. Evaṃ māgadhakā veditabbā. Yassa akaraṇe puggalo mahājāniyo hoti, taṃ karaṇaṃ arahatīti karaṇīyaṃ tena karaṇīyena, tenāha ‘‘avassaṃ kattabbakammenā’’ti. Taṃ kiccanti vuccati sati samavāye kātabbato.
༣༦༠. ཡཱ བུདྡྷཱནཾ ཨུཔྤཛྫནཱརཧཱ ནཱནཏྟསཉྙཱ, ཏཱསཾ ཝསེན ནཱནཱརམྨཎཱཙཱརཏོ། སམྦྷཝནྟསྶེཝ པཊིསེདྷོ། པཊིཀྐམྨཱཏི ནིཝཏྟིཏྭཱ ཏཐཱ ཙིཏྟཾ ཨནུཔྤཱདེཏྭཱ། སལླཱིནོཏི ཛྷཱནསམཱཔཏྟིཡཱ ཨེཀཏྟཱརམྨཎཾ ཨལླཱིནོ།
360. Yā buddhānaṃ uppajjanārahā nānattasaññā, tāsaṃ vasena nānārammaṇācārato. Sambhavantasseva paṭisedho. Paṭikkammāti nivattitvā tathā cittaṃ anuppādetvā. Sallīnoti jhānasamāpattiyā ekattārammaṇaṃ allīno.
ཨོཊྛདྡྷལིཙྪཝཱིཝཏྠུཝཎྞནཱ
Oṭṭhaddhalicchavīvatthuvaṇṇanā
༣༦༡. ཨདྡྷོཊྛཏཱཡཱཏི ཏསྶ ཀིར ཨུཏྟརོཊྛཾ ཨཔྤཀཏཱཡ ཏིརིཡཾ ཕཱལེཏྭཱ ཨཔནཱིཏདྡྷཾ ཝིཡ ཁཱཡཏི ཙཏྟཱརོ དནྟེ, དྭེ ཙ དཱཋཱ ན ཚཱདེཏི, ཏེན ནཾ ‘‘ཨོཊྛདྡྷོ’’ཏི ཝོཧརནྟི། ཨཡཾ ཀིར ཨུཔཱསཀོ སདྡྷོ པསནྣོ དཱཡཀོ དཱནཔཏི བུདྡྷམཱམཀོ དྷམྨམཱམཀོ སངྒྷམཱམཀོ, ཏེནཱཧ པུརེབྷཏྟནྟིཨཱདི།
361.Addhoṭṭhatāyāti tassa kira uttaroṭṭhaṃ appakatāya tiriyaṃ phāletvā apanītaddhaṃ viya khāyati cattāro dante, dve ca dāṭhā na chādeti, tena naṃ ‘‘oṭṭhaddho’’ti voharanti. Ayaṃ kira upāsako saddho pasanno dāyako dānapati buddhamāmako dhammamāmako saṅghamāmako, tenāha purebhattantiādi.
༣༦༢. སཱསནེ ཡུཏྟཔཡུཏྟོཏི བྷཱཝནཾ ཨནུཡུཏྟོ། སབྦཏྠ སཱིཧསམཱནཝུཏྟིནོཔི བྷགཝཏོ པརིསཱཡ མཧནྟེ སཏི ཏདཛ྄ཛྷཱསཡཱནུརཱུཔཾ པཝཏྟིཡམཱནཱཡ དྷམྨདེསནཱཡ ཝིསེསོ ཧོཏཱིཏི ཨཱཧ ‘‘མཧནྟེན ཨུསྶཱཧེན དྷམྨཾ དེསེསྶཏཱི’’ཏི།
362.Sāsaneyuttapayuttoti bhāvanaṃ anuyutto. Sabbattha sīhasamānavuttinopi bhagavato parisāya mahante sati tadajjhāsayānurūpaṃ pavattiyamānāya dhammadesanāya viseso hotīti āha ‘‘mahantena ussāhena dhammaṃ desessatī’’ti.
‘‘ཝིསྶཱསིཀོ’’ཏི ཝཏྭཱ ཏམསྶ ཝིསྶཱསིཀབྷཱཝཾ ཝིབྷཱཝེཏུཾ ‘‘ཨཡཉྷཱི’’ཏིཨཱདི ཝུཏྟཾ། ཐེརསྶ ཁཱིཎཱ སཝསྶསཏོ ཨཱལསིཡབྷཱཝོ ‘‘ཨཔྤཧཱིནོ’’ཏི ན ཝཏྟབྦོ, ཝཱསནཱལེསཾ པན ཨུཔཱདཱཡཱཧ ‘‘ཨཱིསཀཾ ཨཔྤཧཱིནོ ཝིཡ ཧོཏཱི’’ཏི། ན ཧི སཱཝཀཱནཾ སཝཱསནཱ ཀིལེསཱ པཧཱིཡནྟི།
‘‘Vissāsiko’’ti vatvā tamassa vissāsikabhāvaṃ vibhāvetuṃ ‘‘ayañhī’’tiādi vuttaṃ. Therassa khīṇā savassasato ālasiyabhāvo ‘‘appahīno’’ti na vattabbo, vāsanālesaṃ pana upādāyāha ‘‘īsakaṃ appahīno viya hotī’’ti. Na hi sāvakānaṃ savāsanā kilesā pahīyanti.
༣༦༣. ཝིནེཡྻཛནཱནུརོདྷེན བུདྡྷཱནཾ པཱཊིཧཱརིཡཝིཛམྦྷནཾ ཧོཏཱིཏི ཝུཏྟཾ ‘‘ཨཐ ཁོ བྷགཝཱ’’ཏིཨཱདི, ཏེནེཝཱཧ ‘‘སཾསཱུཙིཏནིཀྑམནོ’’ཏི། གནྡྷཀུཊིཏོ ནིཀྑམནཝེལཱཡཉྷི ཚབྦཎྞཱ བུདྡྷརསྨིཡོ ཨཱཝེལཱ༹ཝེལཱ༹ཡམལཱཡམལཱ ཧུཏྭཱ སཝིསེསཱ པབྷསྶརཱ ཝིནིཙྪརིཾསུ།
363. Vineyyajanānurodhena buddhānaṃ pāṭihāriyavijambhanaṃ hotīti vuttaṃ ‘‘atha kho bhagavā’’tiādi, tenevāha ‘‘saṃsūcitanikkhamano’’ti. Gandhakuṭito nikkhamanavelāyañhi chabbaṇṇā buddharasmiyo āveḷāveḷāyamalāyamalā hutvā savisesā pabhassarā vinicchariṃsu.
༣༦༤. ཏཏོ པརནྟི ‘‘ཧིཡྻོ’’ཏི ཝུཏྟདིཝསཏོ ཨནནྟརཾ པརཾ པུརིམཏརཾ ཨཏིསཡེན པུརིམཏྟཱ། ཨིཏི ཨིམེསུ དྭཱིསུ ཝཝཏྠིཏོ ཡཐཱཀྐམཾ པུརིམཔུརིམཏརབྷཱཝོ། ཨེཝཾ སནྟེཔི ཡདེཏྠ ‘‘པུརིམཏར’’ནྟི ཝུཏྟཾ, ཏཏོ པབྷུཏི ཡཾ ཡཾ ཨོརཾ, ཏཾ ཏཾ པུརིམཾ, ཡཾ ཡཾ པརཾ, ཏཾ ཏཾ པུརིམཏརཾ, ཨོརཔཱརབྷཱཝསྶ ཝིཡ པུརིམཔུརིམཏརབྷཱཝསྶ ཙ ཨཔེཀྑཱསིདྡྷིཏོ, ཏེནཱཧ ‘‘ཏཏོ པཊྛཱཡཱ’’ཏིཨཱདི། མཱུལདིཝསཏོ པཊྛཱཡཱཏིཨཱདིདིཝསཏོ པཊྛཱཡ། ཨགྒནྟི པཋམཾ། ཏཾ པནེཏྠ པརཱ ཨཏཱིཏཱ ཀོཊི ཧོཏཱིཏི ཨཱཧ ‘‘པརཀོཊིཾ ཀཏྭཱ’’ཏི། ཡཾ-སདྡཡོགེན ཙཱཡཾ ‘‘ཝིཧརཱམཱི’’ཏི ཝཏྟམཱནཔྤཡོགོ, ཨཏྠོ པན ཨཏཱིཏཀཱལཝསེནེཝ ཝེདིཏབྦོ, ཏེནཱཧ ‘‘ཝིཧཱསིནྟི ཝུཏྟཾ ཧོཏཱི’’ཏི། པཋམཝིཀཔྤེ ‘‘ཝིཧརཱམཱི’’ཏི པདསྶ ‘‘ཡདགྒེ’’ཏི ཨིམིནཱ ཨུཛུཀཾ སམྦནྡྷོ དསྶིཏོ, དུཏིཡཝིཀཔྤེ པན ‘‘ཏཱིཎི ཝསྶཱནཱི’’ཏི ཨིམིནཱཔི།
364.Tato paranti ‘‘hiyyo’’ti vuttadivasato anantaraṃ paraṃ purimataraṃ atisayena purimattā. Iti imesu dvīsu vavatthito yathākkamaṃ purimapurimatarabhāvo. Evaṃ santepi yadettha ‘‘purimatara’’nti vuttaṃ, tato pabhuti yaṃ yaṃ oraṃ, taṃ taṃ purimaṃ, yaṃ yaṃ paraṃ, taṃ taṃ purimataraṃ, orapārabhāvassa viya purimapurimatarabhāvassa ca apekkhāsiddhito, tenāha ‘‘tato paṭṭhāyā’’tiādi. Mūladivasato paṭṭhāyātiādidivasato paṭṭhāya. Agganti paṭhamaṃ. Taṃ panettha parā atītā koṭi hotīti āha ‘‘parakoṭiṃ katvā’’ti. Yaṃ-saddayogena cāyaṃ ‘‘viharāmī’’ti vattamānappayogo, attho pana atītakālavaseneva veditabbo, tenāha ‘‘vihāsinti vuttaṃ hotī’’ti. Paṭhamavikappe ‘‘viharāmī’’ti padassa ‘‘yadagge’’ti iminā ujukaṃ sambandho dassito, dutiyavikappe pana ‘‘tīṇi vassānī’’ti imināpi.
པིཡཛཱཏིཀཱནཱིཏི ཨིཊྛསབྷཱཝཱནི། སཱཏཛཱཏིཀཱནཱིཏི མདྷུརསབྷཱཝཱནི། མདྷུརཾ ཝིཡཱཏི ཧི ‘‘མདྷུར’’ནྟི ཝུཙྩཏི མནོརམཾ ཡཾ ཀིཉྩི། ཀཱམཱུཔསཉྷིཏཱནཱིཏི ཨཱརམྨཎཾ ཀརོནྟེན ཀཱམེན ཨུཔསཾཧིཏཱནི, ཀཱམནཱིཡཱནཱིཏི ཨཏྠོ, ཏེནཱཧ ‘‘ཀཱམསྶཱདཡུཏྟཱནཱི’’ཏི, ཀཱམསྶཱདསྶ ཡུཏྟཱནི ཡོགྱཱནཱིཏི ཨཏྠོ། སརཱིརསཎྛཱནེཏི སརཱིརབིམྦེ, ཨཱདྷཱརེ ཙེཏཾ བྷུམྨཾ། ཏསྨཱ སདྡེནཱཏི ཏཾ ནིསྶཱཡ ཏཏོ ཨུཔྤནྣེན སདྡེནཱཏི ཨཏྠོ། མདྷུརེནཱཏི ཨིཊྛེན། ཨེཏྟཱཝཏཱཏི དིབྦསོཏཉཱཎསྶ པརིཀམྨཱཀཐནམཏྟེན། ‘‘ཨཏྟནཱ ཉཱཏམྤི ན ཀཐེཏི, ཀིམསྶ སཱསནེ ཨདྷིཊྛཱནེནཱ’’ཏི ཀུཛ྄ཛྷནྟོ ཨཱགྷཱཏཾ བནྡྷིཏྭཱ སཧ ཀུཛ྄ཛྷནེནེཝ ཛྷཱནཱབྷིཉྙཱཧི པརིཧཱཡི། ཙིནྟེསཱིཏི ‘‘ཀསྨཱ ནུ ཁོ མཡ྄ཧཾ ཏཾ པརིཀམྨཾ ན ཀཐེསཱི’’ཏི པརིཝིཏཀྐེནྟོ ཨཡོནིསོ ཨུམྨུཛྫནཝསེན ཙིནྟེསི། ཨནུཀྐམེནཱཏི པཱཐིཀསུཏྟེ ཨཱགཏནཡེན ཏཾ ཏཾ ཨཡུཏྟམེཝ ཙིནྟེནྟོ, བྷཱསནྟོ, ཀརོནྟོ ཙ ཨནུཀྐམེན། བྷགཝཏི བདྡྷཱགྷཱཏཏཱཡ སཱསནེ པཏིཊྛཾ ཨལབྷནྟོ གིཧིབྷཱཝཾ པཏྭཱ།
Piyajātikānīti iṭṭhasabhāvāni. Sātajātikānīti madhurasabhāvāni. Madhuraṃ viyāti hi ‘‘madhura’’nti vuccati manoramaṃ yaṃ kiñci. Kāmūpasañhitānīti ārammaṇaṃ karontena kāmena upasaṃhitāni, kāmanīyānīti attho, tenāha ‘‘kāmassādayuttānī’’ti, kāmassādassa yuttāni yogyānīti attho. Sarīrasaṇṭhāneti sarīrabimbe, ādhāre cetaṃ bhummaṃ. Tasmā saddenāti taṃ nissāya tato uppannena saddenāti attho. Madhurenāti iṭṭhena. Ettāvatāti dibbasotañāṇassa parikammākathanamattena. ‘‘Attanā ñātampi na katheti, kimassa sāsane adhiṭṭhānenā’’ti kujjhanto āghātaṃ bandhitvā saha kujjhaneneva jhānābhiññāhi parihāyi. Cintesīti ‘‘kasmā nu kho mayhaṃ taṃ parikammaṃ na kathesī’’ti parivitakkento ayoniso ummujjanavasena cintesi. Anukkamenāti pāthikasutte āgatanayena taṃ taṃ ayuttameva cintento, bhāsanto, karonto ca anukkamena. Bhagavati baddhāghātatāya sāsane patiṭṭhaṃ alabhanto gihibhāvaṃ patvā.
ཨེཀཾསབྷཱཝིཏསམཱདྷིཝཎྞནཱ
Ekaṃsabhāvitasamādhivaṇṇanā
༣༦༦-༣༧༡. ཨེཀཾསཱཡཱཏི ཏདཏྠེཡེཝ ཙཏུཏྠཱི, ཏསྨཱ ཨེཀཾསཏྠནྟི ཨཏྠོ། ཨཾས-སདྡོ ཙེཏྠ ཀོཊྛཱསཔརིཡཱཡོ, སོ ཙ ཨདྷིཀཱརཏོ དིབྦརཱུཔདསྶནདིབྦསདྡསྶཝནཝསེན ཝེདིཏབྦོཏི ཨཱཧ ‘‘ཨེཀཀོཊྛཱསཱཡཱ’’ཏིཨཱདི། ཨནུདིསཱཡཱཏི པུརཏྠིམདཀྑིཎཱདིབྷེདཱཡ ཙཏུབྦིདྷཱཡ ཨནུདིསཱཡ། ཨུབྷཡཀོཊྛཱསཱཡཱཏི དིབྦརཱུཔདསྶནཏྠཱཡ, དིབྦསདྡསྶཝནཏྠཱཡ ཙ། བྷཱཝིཏོཏི ཡཐཱ དིབྦཙཀྑུཉཱཎཾ, དིབྦསོཏཉཱཎཉྩ སམདྷིགཏཾ ཧོཏི, ཨེཝཾ བྷཱཝིཏོ། ཏཡིདཾ ཝིསུཾ ཝིསུཾ པརིཀམྨཀརཎེན ཨིཛ྄ཛྷནྟཱིསུ ཝཏྟབྦཾ ནཏྠི, ཨེཀཛ྄ཛྷཾ ཨིཛ྄ཛྷནྟཱིསུཔི ཀམེནེཝ ཀིཙྩསིདྡྷི ཨེཀཛ྄ཛྷཾ ཀིཙྩསིདྡྷིཡཱ ཨསམྦྷཝཏོ། པཱལི༹ཡམྤི ཨེཀསྶ ཨུབྷཡསམཏྠཏཱསནྡསྶནཏྠམེཝ ‘‘དིབྦཱནཉྩ རཱུཔཱནཾ དསྶནཱཡ, དིབྦཱནཉྩ སདྡཱནཾ སཝནཱཡཱ’’ཏི ཝུཏྟཾ, ན ཨེཀཛ྄ཛྷཾ ཀིཙྩསིདྡྷིསམྦྷཝཏོ། ‘‘ཨེཀཾསབྷཱཝིཏོ སམཱདྷིཧེཏཱུ’’ཏི ཨིམིནཱ སུནཀྑཏྟོ དིབྦཙཀྑུཉཱཎཱཡ ཨེཝ པརིཀམྨསྶ ཀཏཏྟཱ ཝིཛྫམཱནམྤི དིབྦསདྡཾ ནཱསྶོསྶཱིཏི དསྶེཏི། ཨཔཎྞཀནྟི ཨཝིརཛ྄ཛྷནཀཾ, ཨནཝཛྫནྟི ཝཱ ཨཏྠོ།
366-371.Ekaṃsāyāti tadattheyeva catutthī, tasmā ekaṃsatthanti attho. Aṃsa-saddo cettha koṭṭhāsapariyāyo, so ca adhikārato dibbarūpadassanadibbasaddassavanavasena veditabboti āha ‘‘ekakoṭṭhāsāyā’’tiādi. Anudisāyāti puratthimadakkhiṇādibhedāya catubbidhāya anudisāya. Ubhayakoṭṭhāsāyāti dibbarūpadassanatthāya, dibbasaddassavanatthāya ca. Bhāvitoti yathā dibbacakkhuñāṇaṃ, dibbasotañāṇañca samadhigataṃ hoti, evaṃ bhāvito. Tayidaṃ visuṃ visuṃ parikammakaraṇena ijjhantīsu vattabbaṃ natthi, ekajjhaṃ ijjhantīsupi kameneva kiccasiddhi ekajjhaṃ kiccasiddhiyā asambhavato. Pāḷiyampi ekassa ubhayasamatthatāsandassanatthameva ‘‘dibbānañca rūpānaṃ dassanāya, dibbānañca saddānaṃ savanāyā’’ti vuttaṃ, na ekajjhaṃ kiccasiddhisambhavato. ‘‘Ekaṃsabhāvito samādhihetū’’ti iminā sunakkhatto dibbacakkhuñāṇāya eva parikammassa katattā vijjamānampi dibbasaddaṃ nāssossīti dasseti. Apaṇṇakanti avirajjhanakaṃ, anavajjanti vā attho.
༣༧༢. ‘‘སམཱདྷི ཨེཝ’’ བྷཱཝེཏབྦཊྛེན སམཱདྷིབྷཱཝནཱ། ‘‘དིབྦསོཏཉཱཎཾ སེཊྛ’’ནྟི མཉྙམཱནེནཱཔི མཧཱལིནཱ དིབྦཙཀྑུཉཱཎམྤི ཏེན སཧ གཧེཏྭཱ ‘‘ཨེཏཱསཾ ནཱུན བྷནྟེ’’ཏིཨཱདིནཱ པུཙྪིཏནྟི ‘‘ཨུབྷཡཾསབྷཱཝིཏཱནཾ སམཱདྷཱིནནྟི ཨཏྠོ’’ཏི ཝུཏྟཾ། བཱཧིརཱ ཨེཏཱ སམཱདྷིབྷཱཝནཱ ཨནིཡྻཱནིཀཏྟཱ། ཏཱ ཧི ཨིཏོ བཱཧིརཀཱནམྤི ཨིཛ྄ཛྷནྟི། ན ཨཛ྄ཛྷཏྟིཀཱ བྷགཝཏོ སཱམུཀྐཾསིཀབྷཱཝེན ཨཔྤཝེདིཏཏྟཱ། ཡདཏྠནྟི ཡེསཾ ཨཏྠཱཡ། ཏེཏི ཏེ ཨརིཡཕལདྷམྨེ། ཏེ ཧི སཙྪིཀཱཏབྦཱཏི།
372. ‘‘Samādhi eva’’ bhāvetabbaṭṭhena samādhibhāvanā. ‘‘Dibbasotañāṇaṃ seṭṭha’’nti maññamānenāpi mahālinā dibbacakkhuñāṇampi tena saha gahetvā ‘‘etāsaṃ nūna bhante’’tiādinā pucchitanti ‘‘ubhayaṃsabhāvitānaṃ samādhīnanti attho’’ti vuttaṃ. Bāhirāetā samādhibhāvanā aniyyānikattā. Tā hi ito bāhirakānampi ijjhanti. Na ajjhattikā bhagavato sāmukkaṃsikabhāvena appaveditattā. Yadatthanti yesaṃ atthāya. Teti te ariyaphaladhamme. Te hi sacchikātabbāti.
ཙཏུཨརིཡཕལཝཎྞནཱ
Catuariyaphalavaṇṇanā
༣༧༣. ཏསྨཱཏི ཝཊྚདུཀྑེ སཾཡོཛནཏོ། ‘‘མགྒསོཏཾ ཨཱཔནྣོ’’ཏི ཕལཊྛསྶ ཝསེན ཝུཏྟཾ། མགྒཊྛོ ཧི མགྒསོཏཾ ཨཱཔཛྫཏི། ཏེནེཝཱཧ ‘‘སོཏཱཔནྣེ’’ཏི, ‘‘སོཏཱཔཏྟིཕལསཙྪིཀིརིཡཱཡ པཊིཔནྣེ’’ཏི (མ॰ ནི॰ ༣.༣༧༩) ཙ། ཨཔཏནདྷམྨོཏི ཨནུཔྤཛྫན- (མ॰ ནི॰ ༣.༣༧༩) སབྷཱཝོ། དྷམྨནིཡཱམེནཱཏི མགྒདྷམྨནིཡཱམེན། ཧེཊྛིམནྟཏོ སཏྟམབྷཝཏོ ཨུཔརི ཨནུཔྤཛྫནདྷམྨཏཱཡ ཝཱ ནིཡཏོ། པརཾ ཨཡནཾ པརཱགཏི།
373.Tasmāti vaṭṭadukkhe saṃyojanato. ‘‘Maggasotaṃ āpanno’’ti phalaṭṭhassa vasena vuttaṃ. Maggaṭṭho hi maggasotaṃ āpajjati. Tenevāha ‘‘sotāpanne’’ti, ‘‘sotāpattiphalasacchikiriyāya paṭipanne’’ti (ma. ni. 3.379) ca. Apatanadhammoti anuppajjana- (ma. ni. 3.379) sabhāvo. Dhammaniyāmenāti maggadhammaniyāmena. Heṭṭhimantato sattamabhavato upari anuppajjanadhammatāya vā niyato. Paraṃ ayanaṃ parāgati.
ཏནུཏྟཾ ནཱམ པཝཏྟིཡཱ མནྡཏཱ, ཝིརལ༹ཏཱ ཙཱཏི ཨཱཧ ‘‘ཏནུཏྟཱ’’ཏིཨཱདི། ཧེཊྛཱབྷཱགིཡཱནནྟི ཧེཊྛཱབྷཱགསྶ ཀཱམབྷཝསྶཔཙྩཡབྷཱཝེན ཧིཏཱནཾ། ཨོཔཔཱཏིཀོཏི ཨུཔཔཱཏིཀོ ཨུཔཔཏནེ སཱདྷུཀཱརཱིཏི ཀཏྭཱ། ཝིམུཙྩཏཱིཏི ཝིམུཏྟི, ཙིཏྟམེཝ ཝིམུཏྟི ཙེཏོཝིམུཏྟཱིཏི ཨཱཧ ‘‘སབྦཀིལེས…པེ॰… ཨདྷིཝཙན’’ནྟི། ཙིཏྟསཱིསེན ཙེཏྠ སམཱདྷི གཧིཏོ ‘‘ཙིཏྟཾ པཉྙཉྩ བྷཱཝཡ’’ནྟི། ཨཱདཱིསུ (སཾ॰ ནི॰ ༡.༢༣; པེཊཀོ॰ ༢༢; མི॰ པ॰ ༢.༩) ཝིཡ། པཉྙཱཝིམུཏྟཱིཏི ཨེཏྠཱཔི ཨེསེཝ ནཡོ, ཏེནཱཧ ‘‘པཉྙཱཝ པཉྙཱཝིམུཏྟཱི’’ཏི། སཱམནྟི ཨཏྟནཱཝ, ཨཔརཔྤཙྩཡེནཱཏི ཨཏྠོ། ཨབྷིཉྙཱཏི ཡ-ཀཱརལོཔེན ནིདྡེསོཏི ཨཱཧ ‘‘ཨབྷིཛཱནིཏྭཱ’’ཏི།
Tanuttaṃ nāma pavattiyā mandatā, viraḷatā cāti āha ‘‘tanuttā’’tiādi. Heṭṭhābhāgiyānanti heṭṭhābhāgassa kāmabhavassapaccayabhāvena hitānaṃ. Opapātikoti upapātiko upapatane sādhukārīti katvā. Vimuccatīti vimutti, cittameva vimutti cetovimuttīti āha ‘‘sabbakilesa…pe… adhivacana’’nti. Cittasīsena cettha samādhi gahito ‘‘cittaṃ paññañca bhāvaya’’nti. Ādīsu (saṃ. ni. 1.23; peṭako. 22; mi. pa. 2.9) viya. Paññāvimuttīti etthāpi eseva nayo, tenāha ‘‘paññāva paññāvimuttī’’ti. Sāmanti attanāva, aparappaccayenāti attho. Abhiññāti ya-kāralopena niddesoti āha ‘‘abhijānitvā’’ti.
ཨརིཡཨཊྛངྒིཀམགྒཝཎྞནཱ
Ariyaaṭṭhaṅgikamaggavaṇṇanā
༣༧༤-༥. ཨརིཡསཱཝཀོ ནིབྦཱནཾ, ཨརིཡཕལཉྩ པཊིཔཛྫཏི ཨེཏཱཡཱཏི པཊིཔདཱ, སཱ ཙ ཏསྶ པུབྦབྷཱགོ ཨེཝཱཏི ཨིདྷ ‘‘པུབྦབྷཱགཔཊིཔདཱཡཱ’’ཏི ཨརིཡམགྒམཱཧ། ‘‘ཨཊྛ ཨངྒཱནི ཨསྶཱ’’ཏི ཨཉྙཔདཏྠསམཱསཾ ཨཀཏྭཱ ཨཊྛངྒཱནི ཨསྶ སནྟཱིཏི ཨཊྛངྒིཀོཏི པདསིདྡྷི དཊྛབྦཱ།
374-5. Ariyasāvako nibbānaṃ, ariyaphalañca paṭipajjati etāyāti paṭipadā, sā ca tassa pubbabhāgo evāti idha ‘‘pubbabhāgapaṭipadāyā’’ti ariyamaggamāha. ‘‘Aṭṭha aṅgāni assā’’ti aññapadatthasamāsaṃ akatvā aṭṭhaṅgāni assa santīti aṭṭhaṅgikoti padasiddhi daṭṭhabbā.
སམྨཱ ཨཝིཔརཱིཏཾ ཡཱཐཱཝཏོ ཙཏུནྣཾ ཨརིཡསཙྩཱནཾ པཙྩཀྑཏོ དསྶནསབྷཱཝཱ སམྨཱ དསྶནལཀྑཎཱ། སམྨདེཝ ནིབྦཱནཱརམྨཎེ ཙིཏྟསྶ ཨབྷིནིརོཔནསབྷཱཝོ སམྨཱ ཨབྷིནིརོཔནལཀྑཎོ། ཙཏུརངྒསམནྣཱགཏཱ ཝཱཙཱ ཛནཾ སངྒཎྷཱཏཱིཏི ཏབྦིཔཀྑཝིརཏིསབྷཱཝཱ སམྨཱཝཱཙཱ བྷེདཀརམིཙྪཱཝཱཙཱཔཧཱནེན ཛནེ སམྤཡུཏྟེ ཙ པརིགྒཎྷནཀིཙྩཝཏཱི ཧོཏཱིཏི སམྨཱ པརིགྒཧཎལཀྑཎཱ། ཡཐཱ ཙཱིཝརཀམྨཱདིཀོ ཀམྨནྟོ ཨེཀཾ ཀཱཏབྦཾ སམུཊྛཱཔེཏི, ཏཾ ཏཾ ཀིརིཡཱནིཔྥཱདཀོ ཝཱ ཙེཏནཱསངྑཱཏོ ཀམྨནྟོ ཧཏྠཔཱདཙལནཱདིཀཾ ཀིརིཡཾ སམུཊྛཱཔེཏི, ཨེཝཾ སཱཝཛྫཀཏྟབྦཀིརིཡཱསམུཊྛཱཔཀམིཙྪཱཀམྨནྟཔྤཧཱནེན སམྨཱཀམྨནྟོ ནིརཝཛྫསམུཊྛཱཔནཀིཙྩཝཱ ཧོཏི, སམྤཡུཏྟེ ཙ སམུཊྛཱཔེནྟོ ཨེཝ པཝཏྟཏཱིཏི སམྨཱ སམུཊྛཱཔནལཀྑཎོ སམྨཱཀམྨནྟོ། ཀཱཡཝཱཙཱནཾ, ཁནྡྷསནྟཱནསྶ ཙ སཾཀིལེསབྷཱུཏམིཙྪཱཛཱིཝཔྤཧཱནེན སམྨཱ ཝོདཱཔནལཀྑཎོ སམྨཱཨཱཛཱིཝོ། ཀོསཛྫཔཀྑཏོ པཏིཏུཾ ཨདཏྭཱ སམྤཡུཏྟདྷམྨཱནཾ པགྒཎྷནསབྷཱཝོཏི སམྨཱ པགྒཱཧལཀྑཎོ སམྨཱཝཱཡཱམོ། སམྨདེཝ ཨུཔཊྛཱནསབྷཱཝཱཏི སམྨཱ ཨུཔཊྛཱནལཀྑཎཱ སམྨཱསཏི། ཝིཀྑེཔཝིདྡྷཾསནེན སམྨདེཝ ཙིཏྟསྶ སམཱདཧནསབྷཱཝོཏི སམྨཱ སམཱདྷཱནལཀྑཎོ སམྨཱསམཱདྷི།
Sammā aviparītaṃ yāthāvato catunnaṃ ariyasaccānaṃ paccakkhato dassanasabhāvā sammā dassanalakkhaṇā. Sammadeva nibbānārammaṇe cittassa abhiniropanasabhāvo sammā abhiniropanalakkhaṇo. Caturaṅgasamannāgatā vācā janaṃ saṅgaṇhātīti tabbipakkhaviratisabhāvā sammāvācā bhedakaramicchāvācāpahānena jane sampayutte ca pariggaṇhanakiccavatī hotīti sammā pariggahaṇalakkhaṇā. Yathā cīvarakammādiko kammanto ekaṃ kātabbaṃ samuṭṭhāpeti, taṃ taṃ kiriyānipphādako vā cetanāsaṅkhāto kammanto hatthapādacalanādikaṃ kiriyaṃ samuṭṭhāpeti, evaṃ sāvajjakattabbakiriyāsamuṭṭhāpakamicchākammantappahānena sammākammanto niravajjasamuṭṭhāpanakiccavā hoti, sampayutte ca samuṭṭhāpento eva pavattatīti sammā samuṭṭhāpanalakkhaṇo sammākammanto. Kāyavācānaṃ, khandhasantānassa ca saṃkilesabhūtamicchājīvappahānena sammā vodāpanalakkhaṇo sammāājīvo. Kosajjapakkhato patituṃ adatvā sampayuttadhammānaṃ paggaṇhanasabhāvoti sammā paggāhalakkhaṇo sammāvāyāmo. Sammadeva upaṭṭhānasabhāvāti sammā upaṭṭhānalakkhaṇā sammāsati. Vikkhepaviddhaṃsanena sammadeva cittassa samādahanasabhāvoti sammā samādhānalakkhaṇo sammāsamādhi.
ཨཏྟནོ པཙྩནཱིཀཀིལེསཱ དིཊྛེཀཊྛཱ ཨཝིཛྫཱདཡོ། པསྶཏཱིཏི པཀཱསེཏི ཀིཙྩཔཊིཝེདྷེན པཊིཝིཛ྄ཛྷཏི, ཏེནཱཧ ‘‘ཏཔྤཊིཙྪཱདཀ…པེ॰… ཨསམྨོཧཏོ’’ཏི། ཏེནེཝ ཧི སམྨཱདིཊྛིསངྑཱཏེན ཨངྒེན ཏཏྠ པཙྩཝེཀྑཎཱ པཝཏྟཏཱིཏི ཏཐེཝཱཏི ཨཏྟནོ པཙྩནཱིཀཀིལེསེཧི སདྡྷིནྟི ཨཏྠོ།
Attano paccanīkakilesā diṭṭhekaṭṭhā avijjādayo. Passatīti pakāseti kiccapaṭivedhena paṭivijjhati, tenāha ‘‘tappaṭicchādaka…pe… asammohato’’ti. Teneva hi sammādiṭṭhisaṅkhātena aṅgena tattha paccavekkhaṇā pavattatīti tathevāti attano paccanīkakilesehi saddhinti attho.
ཀིཙྩཏོཏི པུབྦབྷཱགེཧི དུཀྑཱདིཉཱཎེཧི ཀཱཏབྦསྶ ཀིཙྩསྶ ཨིདྷ སཱཏིསཡཾ ནིཔྥཏྟིཏོ ཨིམསྶེཝ ཝཱ ཉཱཎསྶ དུཀྑཱདིཔྤཀཱསནཀིཙྩཏོ། ཙཏྟཱརི ནཱམཱནི ལབྷཏི ཙཏཱུསུ སཙྩེསུ ཀཱཏབྦཀིཙྩནིཔྥཏྟིཏོ། ཏཱིཎི ནཱམཱནི ལབྷཏི ཀཱམསངྐཔྤཱདིཔྤཧཱནཀིཙྩནིཔྥཏྟིཏོ། སིཀྑཱཔདཝིབྷངྒེ (ཝིབྷ॰ ༧༠༣) ‘‘ཝིརཏིཙེཏནཱ, སབྦེ སམྤཡུཏྟདྷམྨཱ ཙ སིཀྑཱཔདཱནཱི’’ཏི ཝུཙྩནྟཱིཏི ཏཏྠ པདྷཱནཱནཾ ཝིརཏིཙེཏནཱནཾ ཝསེན ‘‘ཝིརཏིཡོཔི ཧོནྟི ཙེཏནཱཡོཔཱི’’ཏི ཨཱཧ། མུསཱཝཱདཱདཱིཧི ཝིརམཎཀཱལེ ཝཱ ཝིརཏིཡོ, སུབྷཱསིཏཱདིཝཱཙཱབྷཱསནཱདིཀཱལེ ཙ ཙེཏནཱཡོ ཡོཛེཏབྦཱ། མགྒཀྑཎེ ཝིརཏིཡོཝ ཙེཏནཱནཾ ཨམགྒངྒཏྟཱ ཨེཀསྶ ཉཱཎསྶ དུཀྑཱདིཉཱཎཏཱ ཝིཡ, ཨེཀཱཡ ཝིརཏིཡཱ མུསཱཝཱདཱདིཝིརཏིབྷཱཝོ ཝིཡ ཙ ཨེཀཱཡ ཙེཏནཱཡ སམྨཱཝཱཙཱདིཀིཙྩཏྟཡསཱདྷནསབྷཱཝཱབྷཱཝཱ སམྨཱཝཱཙཱདིབྷཱཝཱསིདྡྷིཏོ, ཏཾསིདྡྷིཡཉྩ ཨངྒཏྟཡཏྟཱསིདྡྷིཏོ ཙ། སམྨཔྤདྷཱནསཏིཔཊྛཱནཝསེནཱཏི ཙཏུསམྨཔྤདྷཱནཙཏུསཏིཔཊྛཱནབྷཱཝཝསེན།
Kiccatoti pubbabhāgehi dukkhādiñāṇehi kātabbassa kiccassa idha sātisayaṃ nipphattito imasseva vā ñāṇassa dukkhādippakāsanakiccato. Cattāri nāmāni labhati catūsu saccesu kātabbakiccanipphattito. Tīṇi nāmāni labhati kāmasaṅkappādippahānakiccanipphattito. Sikkhāpadavibhaṅge (vibha. 703) ‘‘viraticetanā, sabbe sampayuttadhammā ca sikkhāpadānī’’ti vuccantīti tattha padhānānaṃ viraticetanānaṃ vasena ‘‘viratiyopihonti cetanāyopī’’ti āha. Musāvādādīhi viramaṇakāle vā viratiyo, subhāsitādivācābhāsanādikāle ca cetanāyo yojetabbā. Maggakkhaṇe viratiyova cetanānaṃ amaggaṅgattā ekassa ñāṇassa dukkhādiñāṇatā viya, ekāya viratiyā musāvādādiviratibhāvo viya ca ekāya cetanāya sammāvācādikiccattayasādhanasabhāvābhāvā sammāvācādibhāvāsiddhito, taṃsiddhiyañca aṅgattayattāsiddhito ca. Sammappadhānasatipaṭṭhānavasenāti catusammappadhānacatusatipaṭṭhānabhāvavasena.
པུབྦབྷཱགེཔི མགྒཀྑཎེཔི སམྨཱསམཱདྷིཡེཝཱཏི། ཡདིཔི སམཱདྷིཨུཔཀཱརཀཱནཾ ཨབྷིནིརོཔནཱནུམཛྫནསམྤིཡཱཡནབྲཱུཧནསནྟསུཁཱནཾ ཝིཏཀྐཱདཱིནཾ ཝསེན ཙཏཱུཧི ཛྷཱནེཧི སམྨཱསམཱདྷི ཝིབྷཏྟོ, ཏཐཱཔི ཝཱཡཱམོ ཝིཡ ཨནུཔྤནྣཱཀུསལཱནུཔྤཱདནཱདིཙཏུཝཱཡཱམཀིཙྩཾ, སཏི ཝིཡ ཙ ཨསུབྷཱསུཁཱནིཙྩཱནཏྟེསུ ཀཱཡཱདཱིསུ སུབྷཱདིསཉྙཱཔཧཱནཙཏུསཏིཀིཙྩཾ ཨེཀོ སམཱདྷི ཙཏུཀྐཛ྄ཛྷཱནསམཱདྷིཀིཙྩཾ ན སཱདྷེཏཱིཏི པུབྦབྷཱགེཔི པཋམཛ྄ཛྷཱནསམཱདྷི པཋམཛ྄ཛྷཱནསམཱདྷི ཨེཝ མགྒཀྑཎེཔི, ཏཐཱ པུབྦབྷཱགེཔི ཙཏུཏྠཛ྄ཛྷཱནསམཱདྷི ཙཏུཏྠཛ྄ཛྷཱནསམཱདྷི ཨེཝ མགྒཀྑཎེཔཱིཏི ཨཏྠོ།
Pubbabhāgepi maggakkhaṇepi sammāsamādhiyevāti. Yadipi samādhiupakārakānaṃ abhiniropanānumajjanasampiyāyanabrūhanasantasukhānaṃ vitakkādīnaṃ vasena catūhi jhānehi sammāsamādhi vibhatto, tathāpi vāyāmo viya anuppannākusalānuppādanādicatuvāyāmakiccaṃ, sati viya ca asubhāsukhāniccānattesu kāyādīsu subhādisaññāpahānacatusatikiccaṃ eko samādhi catukkajjhānasamādhikiccaṃ na sādhetīti pubbabhāgepi paṭhamajjhānasamādhi paṭhamajjhānasamādhi eva maggakkhaṇepi, tathā pubbabhāgepi catutthajjhānasamādhi catutthajjhānasamādhi eva maggakkhaṇepīti attho.
ཏསྨཱཏི པཉྙཱཔཛྫོཏཏྟཱ ཨཝིཛྫནྡྷཀཱརཾ ཝིདྷམིཏྭཱ པཉྙཱསཏྠཏྟཱ ཀིལེསཙོརེ གྷཱཏེནྟོ། བཧུཀཱརཏྟཱཏི ཡྭཱཡཾ ཨནཱདིམཏི སཾསཱརེ ཨིམིནཱ ཀདཱཙིཔི ཨསམུགྒྷཱཊིཏཔུབྦོ ཀིལེསགཎོ ཏསྶ སམུགྒྷཱཊཀོ ཨརིཡམགྒོ ། ཏཏྠ ཙཱཡཾ སམྨཱདིཊྛི པརིཉྙཱབྷིསམཡཱདིཝསེན པཝཏྟིཡཱ པུབྦངྒམཱ ཧོཏཱིཏི བཧུཀཱརཱ, ཏསྨཱ བཧུཀཱརཏྟཱ།
Tasmāti paññāpajjotattā avijjandhakāraṃ vidhamitvā paññāsatthattā kilesacore ghātento. Bahukārattāti yvāyaṃ anādimati saṃsāre iminā kadācipi asamugghāṭitapubbo kilesagaṇo tassa samugghāṭako ariyamaggo . Tattha cāyaṃ sammādiṭṭhi pariññābhisamayādivasena pavattiyā pubbaṅgamā hotīti bahukārā, tasmā bahukārattā.
ཏསྶཱཏི སམྨཱདིཊྛིཡཱ། ‘‘བཧུཀཱརོ’’ཏི ཝཏྭཱ ཏཾ བཧུཀཱརཏཾ ཨུཔམཱཡ ཝིབྷཱཝེཏུཾ ‘‘ཡཐཱ ཧཱི’’ཏིཨཱདི ཝུཏྟཾ། ‘‘ཨཡཾ’’ ཏམྦཀཾསཱདིམཡཏྟཱ ཀཱུཊོ། ཨཡཾ སམསཱརཏཱཡ མཧཱསཱརཏཱཡ ཚེཀོ། ཨེཝནྟི ཡཐཱ ཧེརཉྙིཀསྶ ཙཀྑུནཱ དིསྭཱ ཀཧཱཔཎཝིབྷཱགཛཱནནེ ཀརཎནྟརཾ བཧུཀཱརཾ ཡདིདཾ ཧཏྠོ, ཨེཝཾ ཡོགཱཝཙརསྶ པཉྙཱཡ ཨོལོཀེཏྭཱ དྷམྨཝིབྷཱགཛཱནནེ དྷམྨནྟརཾ བཧུཀཱརཾ ཡདིདཾ ཝིཏཀྐོ ཝིཏཀྐེཏྭཱ ཏདཝབོདྷཏོ, ཏསྨཱ སམྨཱསངྐཔྤོ སམྨཱདིཊྛིཡཱ བཧུཀཱརོཏི ཨདྷིཔྤཱཡོ། དུཏིཡཨུཔམཱཡཾ ཨེཝནྟི ཡཐཱ ཏཙྪཀོ པརེན པརིཝཏྟེཏྭཱ པརིཝཏྟེཏྭཱ དིནྣཾ དབྦསམྦྷཱརཾ ཝཱསིཡཱ ཏཙྪེཏྭཱ གེཧཀརཎཀམྨེ ཨུཔནེཏི, ཨེཝཾ ཡོགཱཝཙརོ ཝིཏཀྐེན ལཀྑཎཱདིཏོ ཝིཏཀྐེཏྭཱ དིནྣདྷམྨེ ཡཱཐཱཝཏོ པརིཙྪིནྡིཏྭཱ པརིཉྙཱབྷིསམཡཱདིཀམྨེ ཨུཔནེཏཱིཏི ཡོཛནཱ། ཝཙཱིབྷེདསྶ ཨུཔཀཱརཀོ ཝིཏཀྐོ སཱཝཛྫཱནཝཛྫཝཙཱིབྷེདནིཝཏྟནཔཝཏྟནཀརཱཡ སམྨཱཝཱཙཱཡཔི ཨུཔཀཱརཀོ ཨེཝཱཏི ‘‘སྭཱཡ’’ནྟིཨཱདི ཝུཏྟཾ།
Tassāti sammādiṭṭhiyā. ‘‘Bahukāro’’ti vatvā taṃ bahukārataṃ upamāya vibhāvetuṃ ‘‘yathā hī’’tiādi vuttaṃ. ‘‘Ayaṃ’’ tambakaṃsādimayattā kūṭo. Ayaṃ samasāratāya mahāsāratāya cheko. Evanti yathā heraññikassa cakkhunā disvā kahāpaṇavibhāgajānane karaṇantaraṃ bahukāraṃ yadidaṃ hattho, evaṃ yogāvacarassa paññāya oloketvā dhammavibhāgajānane dhammantaraṃ bahukāraṃ yadidaṃ vitakko vitakketvā tadavabodhato, tasmā sammāsaṅkappo sammādiṭṭhiyā bahukāroti adhippāyo. Dutiyaupamāyaṃ evanti yathā tacchako parena parivattetvā parivattetvā dinnaṃ dabbasambhāraṃ vāsiyā tacchetvā gehakaraṇakamme upaneti, evaṃ yogāvacaro vitakkena lakkhaṇādito vitakketvā dinnadhamme yāthāvato paricchinditvā pariññābhisamayādikamme upanetīti yojanā. Vacībhedassa upakārako vitakko sāvajjānavajjavacībhedanivattanapavattanakarāya sammāvācāyapi upakārako evāti ‘‘svāya’’ntiādi vuttaṃ.
ཝཙཱིབྷེདསྶ ནིཡཱམིཀཱ ཝཱཙཱ ཀཱཡིཀཀིརིཡཱནིཡཱམཀསྶ ཀམྨནྟསྶ ཨུཔཀཱརིཀཱ། ཏདུབྷཡཱནནྟརནྟི དུཙྩརིཏདྭཡཔཧཱཡཀསྶ སུཙརིཏདྭཡཔཱརིཔཱུརིཧེཏུབྷཱུཏསྶ སམྨཱཝཱཙཱསམྨཱཀམྨནྟདྭཡསྶ ཨནནྟརཾ། ཨིདཾ ཝཱིརིཡནྟི ཙཏུབྦིདྷཾ སམྨཔྤདྷཱནཝཱིརིཡཾ། ཨིནྡྲིཡསམཏཱདཡོ སམཱདྷིསྶ ཨུཔཀཱརདྷམྨཱ། ཏབྦིཔརིཡཱཡཏོ ཨཔཀཱརདྷམྨཱ ཝེདིཏབྦཱ། གཏིཡོཏི ནིཔྥཏྟིཡོ, ཀིཙྩཱདིསབྷཱཝེ ཝཱ། སམནྣེསིཏྭཱཏི ཨུཔདྷཱརེཏྭཱ།
Vacībhedassa niyāmikā vācā kāyikakiriyāniyāmakassa kammantassa upakārikā. Tadubhayānantaranti duccaritadvayapahāyakassa sucaritadvayapāripūrihetubhūtassa sammāvācāsammākammantadvayassa anantaraṃ. Idaṃ vīriyanti catubbidhaṃ sammappadhānavīriyaṃ. Indriyasamatādayo samādhissa upakāradhammā. Tabbipariyāyato apakāradhammā veditabbā. Gatiyoti nipphattiyo, kiccādisabhāve vā. Samannesitvāti upadhāretvā.
དྭེཔབྦཛིཏཝཏྠུཝཎྞནཱ
Dvepabbajitavatthuvaṇṇanā
༣༧༦-༧. ‘‘ཀསྨཱ ཨཱརདྡྷ’’ནྟི ཨནུསནྡྷིཀཱརཎཾ པུཙྪིཏྭཱ ཏཾ ཝིབྷཱཝེཏུཾ ‘‘ཨཡཾ ཀིརཱ’’ཏིཨཱདི ཝུཏྟཾ, ཏེན ཨཛ྄ཛྷཱསཡཱནུསནྡྷིཝསེན ཨུཔརི དེསནཱ པཝཏྟཱཏི དསྶེཏི། ཏེནཱཏི ཏཐཱལདྡྷིཀཏྟཱ། ཨསྶཱཏི ལིཙྪཝཱིརཉྙོ། དེསནཱཡཱཏི སཎྷསུཁུམཱཡཾ སུཉྙཏཔཊིསཾཡུཏྟཱཡཾ ཡཐཱདེསིཏདེསནཱཡཾ། ནཱདྷིམུཙྩཏཱིཏི ན སདྡཧཏི ན པསཱིདཏི། ཏནྟིདྷམྨཾ ནཱམ ཀཐེནྟོཏི ཡེསཾ ཨཏྠཱཡ དྷམྨོ ཀཐཱིཡཏི, ཏསྨིཾ ཏེསཾ ཨསཏིཔི མགྒཔཊིཝེདྷེ ཀེཝལཾ སཱསནེ ཏནྟིདྷམྨཾ ཀཏྭཱ ཀཐེནྟོ། ཨེཝརཱུཔསྶཱཏི སམྨཱསམྦུདྡྷཏྟཱ ཨཝིཔརཱིཏདྷམྨདེསནཏཱཡ ཨེཝཾཔཱཀཊདྷམྨཀཱཡསྶ སཏྠུ། ཡུཏྟཾ ནུ ཁོ ཨེཏཾ ཨསྶཱཏི ཨསྶ པཋམཛ྄ཛྷཱནཱདིསམདྷིགམེན སམཱཧིཏཙིཏྟསྶ ཀུལཔུཏྟསྶ ཨེཏཾ ‘‘ཏཾ ཛཱིཝ’’ནྟིཨཱདིནཱ ཨུཙྪེདཱདིགཱཧགཧཎཾ ཨཔི ནུ ཡུཏྟནྟི པུཙྪཏི། ལདྡྷིཡཱ པན ཛྷཱནཱདྷིགམམཏྟེན ན ཏཱཝ ཝིཝེཙིཏཏྟཱ ‘‘ཏེཧི ཡུཏྟ’’ནྟི ཝུཏྟཾ ཏཾ ཝཱདཾ པཊིཀྑིཔིཏྭཱཏི ཛྷཱནལཱབྷིནོཔི ཏཾ གཧཎཾ ‘‘ཨཡུཏྟམེཝཱ’’ཏི ཏཾ ཨུཙྪེདཝཱདཾ སསྶཏཝཱདཾ ཝཱ པཊིཀྑིཔིཏྭཱ། ཨཏྟམནཱ ཨཧེསུནྟི ཡསྨཱ ཁཱིཎཱསཝོ ཝིགཏསམྨོཧོ ཏིཎྞཝིཙིཀིཙྪོ, ‘‘ཏསྨཱ ཏསྶ ཏཐཱ ཝཏྟུཾ ན ཡུཏྟ’’ནྟི ཨུཔྤནྣནིཙྪཡཏཱཡ ཏཾ མམ ཝཙནཾ སུཏྭཱ ཨཏྟམནཱ ཨཧེསུནྟི ཨཏྠོ། སོཔི ལིཙྪཝཱི རཱཛཱ ཏེ ཝིཡ སཉྫཱཏནིཙྪཡཏྟཱ ཨཏྟམནོ ཨཧོསི། ཡཾ པནེཏྠ ཨཏྠཏོ ཨཝིབྷཏྟཾ, ཏཾ སུཝིཉྙེཡྻམེཝ།
376-7.‘‘Kasmā āraddha’’nti anusandhikāraṇaṃ pucchitvā taṃ vibhāvetuṃ ‘‘ayaṃ kirā’’tiādi vuttaṃ, tena ajjhāsayānusandhivasena upari desanā pavattāti dasseti. Tenāti tathāladdhikattā. Assāti licchavīrañño. Desanāyāti saṇhasukhumāyaṃ suññatapaṭisaṃyuttāyaṃ yathādesitadesanāyaṃ. Nādhimuccatīti na saddahati na pasīdati. Tantidhammaṃ nāma kathentoti yesaṃ atthāya dhammo kathīyati, tasmiṃ tesaṃ asatipi maggapaṭivedhe kevalaṃ sāsane tantidhammaṃ katvā kathento. Evarūpassāti sammāsambuddhattā aviparītadhammadesanatāya evaṃpākaṭadhammakāyassa satthu. Yuttaṃnu kho etaṃ assāti assa paṭhamajjhānādisamadhigamena samāhitacittassa kulaputtassa etaṃ ‘‘taṃ jīva’’ntiādinā ucchedādigāhagahaṇaṃ api nu yuttanti pucchati. Laddhiyā pana jhānādhigamamattena na tāva vivecitattā ‘‘tehi yutta’’nti vuttaṃ taṃ vādaṃ paṭikkhipitvāti jhānalābhinopi taṃ gahaṇaṃ ‘‘ayuttamevā’’ti taṃ ucchedavādaṃ sassatavādaṃ vā paṭikkhipitvā. Attamanā ahesunti yasmā khīṇāsavo vigatasammoho tiṇṇavicikiccho, ‘‘tasmā tassa tathā vattuṃ na yutta’’nti uppannanicchayatāya taṃ mama vacanaṃ sutvā attamanā ahesunti attho. Sopi licchavī rājā te viya sañjātanicchayattā attamano ahosi. Yaṃ panettha atthato avibhattaṃ, taṃ suviññeyyameva.
མཧཱལིསུཏྟཝཎྞནཱཡ ལཱིནཏྠཔྤཀཱསནཱ།
Mahālisuttavaṇṇanāya līnatthappakāsanā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / དཱིགྷནིཀཱཡ • Dīghanikāya / ༦. མཧཱལིསུཏྟཾ • 6. Mahālisuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā) / ༦. མཧཱལིསུཏྟཝཎྞནཱ • 6. Mahālisuttavaṇṇanā
