| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
9. மஹல்லகவிஹாரஸிக்கா²பத³வண்ணனா
9. Mahallakavihārasikkhāpadavaṇṇanā
பிட்ட²ஸங்கா⁴டஸ்ஸாதி த்³வாரப³ந்த⁴ஸ்ஸ. ஸாமந்தா அட்³ட⁴தெய்யஹத்தோ² பதே³ஸோதி யஸ்ஸ (பாசி॰ அட்ட²॰ 135) வேமஜ்ஜே² த்³வாரங் ஹோதி, உபரிபா⁴கே³ ச உச்சா பி⁴த்தி, தஸ்ஸ தீஸு தி³ஸாஸு ஸாமந்தா அட்³ட⁴தெய்யஹத்தோ² பதே³ஸோ. கு²த்³த³கஸ்ஸ பன விஹாரஸ்ஸ த்³வீஸு தி³ஸாஸு. தத்ராபி யங் பி⁴த்திங் விவரியமானங் கவாடங் ஆஹனதி, ஸா அபரிபுண்ணூபசாராபி ஹோதி. ஸசே பன த்³வாரஸ்ஸ அதோ⁴பா⁴கே³பி லேபோகாஸோ அத்தி², தம்பி லிம்பிதுங் வட்டதி. அக்³க³ளட்ட²பனாயாதி எத்த² அக்³க³ளஸத்³தே³ன தங்ஸம்ப³ந்த⁴தோ த்³வாரப²லகஸஹிதங் த்³வாரப³ந்த⁴னங் அதி⁴ப்பேதங். தேனாஹ ‘‘ஸகவாடகஸ்ஸா’’திஆதி³. ‘‘நிச்சலபா⁴வத்தா²யா’’தி இமினா தஞ்ச கோ² ட²பனங் இத⁴ நிச்சலபா⁴வேனாதி த³ஸ்ஸேதி. கோ பனெத்த² அதி⁴ப்பாயோதி ஆஹ ‘‘கவாடஞ்ஹீ’’திஆதி³. கம்பதீதி சலதி. யாவ த்³வாரகோஸா அக்³க³ளட்ட²பனாய புனப்புனங் லிம்பிதப்³போ³ வா லேபாபேதப்³போ³ வாதி அக்³க³ளட்ட²பனத்தா²ய யாவ த்³வாரகோஸா புனப்புனங் அத்தனா லிம்பிதப்³போ³ வா, பரேஹி லேபாபேதப்³போ³ வாதி அத்தோ².
Piṭṭhasaṅghāṭassāti dvārabandhassa. Sāmantā aḍḍhateyyahattho padesoti yassa (pāci. aṭṭha. 135) vemajjhe dvāraṃ hoti, uparibhāge ca uccā bhitti, tassa tīsu disāsu sāmantā aḍḍhateyyahattho padeso. Khuddakassa pana vihārassa dvīsu disāsu. Tatrāpi yaṃ bhittiṃ vivariyamānaṃ kavāṭaṃ āhanati, sā aparipuṇṇūpacārāpi hoti. Sace pana dvārassa adhobhāgepi lepokāso atthi, tampi limpituṃ vaṭṭati. Aggaḷaṭṭhapanāyāti ettha aggaḷasaddena taṃsambandhato dvāraphalakasahitaṃ dvārabandhanaṃ adhippetaṃ. Tenāha ‘‘sakavāṭakassā’’tiādi. ‘‘Niccalabhāvatthāyā’’ti iminā tañca kho ṭhapanaṃ idha niccalabhāvenāti dasseti. Ko panettha adhippāyoti āha ‘‘kavāṭañhī’’tiādi. Kampatīti calati. Yāva dvārakosā aggaḷaṭṭhapanāya punappunaṃ limpitabbo vā lepāpetabbo vāti aggaḷaṭṭhapanatthāya yāva dvārakosā punappunaṃ attanā limpitabbo vā, parehi lepāpetabbo vāti attho.
நனு சாயமத்தோ² நேவ மாதிகாயங், ந பத³பா⁴ஜனே வுத்தோ, அத² குதோ த³ட்ட²ப்³போ³தி ஆஹ ‘‘தத்தா²’’திஆதி³. கிஞ்சாபீதி யதி³பி. அட்டு²ப்பத்தியந்தி ஸிக்கா²பத³ஸ்ஸ நிதா³னே. அதி⁴காரதோதி அனுவத்தனதோ. ஆலோகங் ஸந்தே⁴தி பிதே⁴தீதி ஆலோகஸந்தி⁴. தேனாஹ ‘‘ஆலோகஸந்தீ⁴தி வாதபானகவாடகா வுச்சந்தீ’’தி. தத்த² வாதபானகவாடகாதி வாதபானப²லகா. அனுஞ்ஞாதப்பதே³ஸதோ பன அஞ்ஞத்த² புனப்புனங் விலிம்பிதுங் வா விலிம்பாபேதுங் வா ந வட்டதி. ‘‘மத்திகாய கத்தப்³ப³கிச்சங் நிட்டா²பெத்வா புன சதுத்த²லேபே தி³ன்னே பாசித்திய’’ந்தி (ஸாரத்த²॰ டீ॰ பாசித்திய 3.135) கேசி. ‘‘புனப்புனங் லேபதா³னஸ்ஸ வுத்தப்பமாணதோ அஞ்ஞத்த² படிக்கி²த்தமத்தங் ட²பெத்வா பாசித்தியஸ்ஸ அவுத்தத்தா து³க்கட’’ந்தி அபரே.
Nanu cāyamattho neva mātikāyaṃ, na padabhājane vutto, atha kuto daṭṭhabboti āha ‘‘tatthā’’tiādi. Kiñcāpīti yadipi. Aṭṭhuppattiyanti sikkhāpadassa nidāne. Adhikāratoti anuvattanato. Ālokaṃ sandheti pidhetīti ālokasandhi. Tenāha ‘‘ālokasandhīti vātapānakavāṭakā vuccantī’’ti. Tattha vātapānakavāṭakāti vātapānaphalakā. Anuññātappadesato pana aññattha punappunaṃ vilimpituṃ vā vilimpāpetuṃ vā na vaṭṭati. ‘‘Mattikāya kattabbakiccaṃ niṭṭhāpetvā puna catutthalepe dinne pācittiya’’nti (sārattha. ṭī. pācittiya 3.135) keci. ‘‘Punappunaṃ lepadānassa vuttappamāṇato aññattha paṭikkhittamattaṃ ṭhapetvā pācittiyassa avuttattā dukkaṭa’’nti apare.
அதி⁴ட்டா²தப்³ப³ந்தி ஸங்விதா⁴தப்³ப³ங். அப்பஹரிதேதி எத்த² அப்பஸத்³தோ³ ‘‘அப்பிச்சோ²’’திஆதீ³ஸு (ம॰ நி॰ 1.252, 336; ஸங்॰ நி॰ 2.148) விய அபா⁴வத்தோ²தி ஆஹ ‘‘அஹரிதே’’தி. ஸாலிவீஹிஆதி³ (ஸாரத்த²॰ டீ॰ 2.30) புப்³ப³ண்ணங் ‘‘புரக்க²தங் ஸஸ்ஸப²ல’’ந்தி கத்வா, தப்³பி³பரியாயதோ முக்³க³மாஸாதி³ அபரண்ணங். வுத்தந்தி வபிதங். ‘‘தஸ்மிங் ட²த்வா அதி⁴ட்ட²ஹந்தோ து³க்கடங் ஆபஜ்ஜதீ’’தி இமினா யஸ்மிங் பதே³ஸே ஸமந்தா வுத்தப்பமாணே பரிச்சே²தே³ புப்³ப³ண்ணாதீ³னி ந ஸந்தி, தத்த² விஹாரோ காரேதப்³போ³. யத்த² பன ஸந்தி, தத்த² காராபேதுங் ந வட்டதீதி த³ஸ்ஸேதி. ததே²வாதி முக²வட்டிஅந்தேன. தஸ்மிங் டா²தப்³ப³ங் பதந்தஸ்ஸ விஹாரஸ்ஸ அபதனோகாஸத்தா, தஸ்ஸ பி⁴க்கு²னோ உபரி ந பதெய்யாதி அதி⁴ப்பாயோ. யதா²பரிச்சி²ன்னஸ்ஸ பன ஓகாஸஸ்ஸ அப்³ப⁴ந்தரங் விஹாரஸ்ஸ பதந்தஸ்ஸ ஓகாஸோ ஹோதீதி அப்பஹரிதேபி தஸ்மிங் ட²த்வா அதி⁴ட்டா²துங் ந லப⁴தி. தேனாஹ ‘‘தஸ்ஸ அந்தோ அஹரிதேபி டா²துங் ந லப⁴தீ’’தி.
Adhiṭṭhātabbanti saṃvidhātabbaṃ. Appahariteti ettha appasaddo ‘‘appiccho’’tiādīsu (ma. ni. 1.252, 336; saṃ. ni. 2.148) viya abhāvatthoti āha ‘‘aharite’’ti. Sālivīhiādi (sārattha. ṭī. 2.30) pubbaṇṇaṃ ‘‘purakkhataṃ sassaphala’’nti katvā, tabbipariyāyato muggamāsādi aparaṇṇaṃ. Vuttanti vapitaṃ. ‘‘Tasmiṃ ṭhatvā adhiṭṭhahanto dukkaṭaṃ āpajjatī’’ti iminā yasmiṃ padese samantā vuttappamāṇe paricchede pubbaṇṇādīni na santi, tattha vihāro kāretabbo. Yattha pana santi, tattha kārāpetuṃ na vaṭṭatīti dasseti. Tathevāti mukhavaṭṭiantena. Tasmiṃ ṭhātabbaṃ patantassa vihārassa apatanokāsattā, tassa bhikkhuno upari na pateyyāti adhippāyo. Yathāparicchinnassa pana okāsassa abbhantaraṃ vihārassa patantassa okāso hotīti appaharitepi tasmiṃ ṭhatvā adhiṭṭhātuṃ na labhati. Tenāha ‘‘tassa anto aharitepi ṭhātuṃ na labhatī’’ti.
ததோ சே உத்தரீதி திண்ணங் மக்³கா³னங் வா பரியாயானங் வா உபரி சதுத்தே² மக்³கே³ வா பரியாயே வாதி அத்தோ². தேனாஹ ‘‘மக்³கே³ன சா²தி³யமானே’’திஆதி³. தத்த² மக்³கே³ன சா²தி³யமானேதி அபரிக்கி²பித்வா உஜுகமேவ சா²தி³யமானே. பரியாயேனாதி பரிக்கே²பேன. தத்த² மக்³கே³ன சா²த³னங் இட்ட²கஸிலாஸுதா⁴ஹி லப்³ப⁴தி, பரியாயேன சா²த³னங் திணபண்ணேஹீதி ஆஹ ‘‘இட்ட²கஸிலாஸுதா⁴ஹீ’’திஆதி³. தஸ்மா யதா² இச்ச²தி, ததா² த்³வே மக்³கே³ வா த்³வே பரியாயே வா அதி⁴ட்ட²ஹித்வா ததியங் மக்³க³ங் வா பரியாயங் வா ‘‘ஏவங் சா²தே³ஹீ’’தி ஆணாபெத்வா பக்கமிதப்³ப³ங். ஸசே ந பக்கமதி, துண்ஹீபா⁴வேன டா²தப்³ப³ங். ஸப்³ப³ம்பி சேதங் ச²த³னங் ச²த³னூபரி வேதி³தப்³ப³ங். உபரூபரிச²ன்னோ ஹி விஹாரோ சிரங் அனோவஸ்ஸகோ ஹோதீதி மஞ்ஞமானா ஏவங் சா²தெ³ந்தி. திணமுட்டி²க³ணனாயாதி திணகரளக³ணனாய.
Tato ce uttarīti tiṇṇaṃ maggānaṃ vā pariyāyānaṃ vā upari catutthe magge vā pariyāye vāti attho. Tenāha ‘‘maggena chādiyamāne’’tiādi. Tattha maggena chādiyamāneti aparikkhipitvā ujukameva chādiyamāne. Pariyāyenāti parikkhepena. Tattha maggena chādanaṃ iṭṭhakasilāsudhāhi labbhati, pariyāyena chādanaṃ tiṇapaṇṇehīti āha ‘‘iṭṭhakasilāsudhāhī’’tiādi. Tasmā yathā icchati, tathā dve magge vā dve pariyāye vā adhiṭṭhahitvā tatiyaṃ maggaṃ vā pariyāyaṃ vā ‘‘evaṃ chādehī’’ti āṇāpetvā pakkamitabbaṃ. Sace na pakkamati, tuṇhībhāvena ṭhātabbaṃ. Sabbampi cetaṃ chadanaṃ chadanūpari veditabbaṃ. Uparūparichanno hi vihāro ciraṃ anovassako hotīti maññamānā evaṃ chādenti. Tiṇamuṭṭhigaṇanāyāti tiṇakaraḷagaṇanāya.
திகபாசித்தியந்தி அதிரேகத்³வத்திபரியாயே அதிரேகஸஞ்ஞிவேமதிகஊனகஸஞ்ஞீனங் வஸேன தீணி பாசித்தியானி. ஸேதவண்ணாதி³கரணேதி ஸேதவண்ணகாளவண்ணகே³ருகபரிகம்மமாலாகம்மலதாகம்மமகரத³ந்தகபஞ்சபடிகானங் கரணே. லேணகு³ஹாதிணகுடிகாதீ³ஸூதி எத்த² லேணந்தி த்³வாரப³த்³த⁴ங். கு³ஹாதி கேவலா பப்³ப³தகு³ஹா. திணகுடிகா பாகடா ஏவ.
Tikapācittiyanti atirekadvattipariyāye atirekasaññivematikaūnakasaññīnaṃ vasena tīṇi pācittiyāni. Setavaṇṇādikaraṇeti setavaṇṇakāḷavaṇṇagerukaparikammamālākammalatākammamakaradantakapañcapaṭikānaṃ karaṇe. Leṇaguhātiṇakuṭikādīsūti ettha leṇanti dvārabaddhaṃ. Guhāti kevalā pabbataguhā. Tiṇakuṭikā pākaṭā eva.
மஹல்லகவிஹாரஸிக்கா²பத³வண்ணனா நிட்டி²தா.
Mahallakavihārasikkhāpadavaṇṇanā niṭṭhitā.
