| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
9. மஹல்லகவிஹாரஸிக்கா²பத³வண்ணனா
9. Mahallakavihārasikkhāpadavaṇṇanā
135. நவமே ‘‘மஹல்லகோ நாம விஹாரோ ஸஸ்ஸாமிகோ’’தி வுத்தத்தா ஸஞ்ஞாசிகாய குடியா அனாபத்தீதி வத³ந்தி. யஸ்ஸாதி விஹாரஸ்ஸ. ஸா அபரிபூரூபசாராபி ஹோதீதி விவரியமானங் கவாடங் யங் பி⁴த்திங் ஆஹனதி, ஸா ஸாமந்தா கவாடவித்தா²ரப்பமாணா உபசாரரஹிதாபி ஹோதீதி அத்தோ². ஆலோகங் வாதபானங் ஸந்தே⁴தி க⁴டயதீதி ஆலோகஸந்தீ⁴தி கவாடங் வுச்சதி. த்³வாரவாதபானூபசாரதோ அஞ்ஞத்த² புனப்புனங் லிம்பனாதி³ங் கரொந்தஸ்ஸ பிண்ட³க³ணனாய பாசித்தியங்.
135. Navame ‘‘mahallako nāma vihāro sassāmiko’’ti vuttattā saññācikāya kuṭiyā anāpattīti vadanti. Yassāti vihārassa. Sā aparipūrūpacārāpi hotīti vivariyamānaṃ kavāṭaṃ yaṃ bhittiṃ āhanati, sā sāmantā kavāṭavitthārappamāṇā upacārarahitāpi hotīti attho. Ālokaṃ vātapānaṃ sandheti ghaṭayatīti ālokasandhīti kavāṭaṃ vuccati. Dvāravātapānūpacārato aññattha punappunaṃ limpanādiṃ karontassa piṇḍagaṇanāya pācittiyaṃ.
கேசி பன ‘‘பாளியங் பாசித்தியஸ்ஸ அவுத்தத்தா து³க்கட’’ந்தி வத³ந்தி. அதி⁴ட்டா²தப்³ப³ந்தி ஸங்விதா⁴தப்³ப³ங். ஹரிதே டி²தோ அதி⁴ட்டா²தி. ஆபத்தி து³க்கடஸ்ஸாதி ஹரிதயுத்தே கெ²த்தே ட²த்வா சா²தெ³ந்தஸ்ஸ து³க்கடந்தி அத்தோ². கேசி பன ‘‘தாதி³ஸே கெ²த்தே விஹாரங் கரொந்தஸ்ஸ து³க்கட’’ந்தி வத³ந்தி, தங் பாளியா ந ஸமேதி.
Keci pana ‘‘pāḷiyaṃ pācittiyassa avuttattā dukkaṭa’’nti vadanti. Adhiṭṭhātabbanti saṃvidhātabbaṃ. Harite ṭhito adhiṭṭhāti. Āpatti dukkaṭassāti haritayutte khette ṭhatvā chādentassa dukkaṭanti attho. Keci pana ‘‘tādise khette vihāraṃ karontassa dukkaṭa’’nti vadanti, taṃ pāḷiyā na sameti.
136. உஜுகமேவ சா²த³னந்தி சா²த³னமுக²வட்டிதோ பட்டா²ய யாவ பிட்டி²வங்ஸகூடாகா³ரகண்ணிகாதி³, தாவ இட்ட²காதீ³ஹி உஜுகங் சா²த³னங். இமினா பன யேன ஸப்³ப³ஸ்மிங் விஹாரே ஏகவாரங் சா²தி³தே தங் சா²த³னங் ஏகமக்³க³ந்தி க³ஹெத்வா பாளியங் ‘‘த்³வே மக்³கே³’’திஆதி³ வுத்தங். பரியாயேன சா²த³னம்பி இமினாவ நயேன யோஜேதப்³ப³ந்தி வத³ந்தி, தங் ‘‘புனப்புனங் சா²தா³பேஸீ’’தி இமாய பாளியா ச ‘‘ஸப்³ப³ம்பி சேதங் ச²த³னங் ச²த³னூபரி வேதி³தப்³ப³’’ந்தி இமினா அட்ட²கதா²வசனேன ச ஸமேதி.
136.Ujukameva chādananti chādanamukhavaṭṭito paṭṭhāya yāva piṭṭhivaṃsakūṭāgārakaṇṇikādi, tāva iṭṭhakādīhi ujukaṃ chādanaṃ. Iminā pana yena sabbasmiṃ vihāre ekavāraṃ chādite taṃ chādanaṃ ekamagganti gahetvā pāḷiyaṃ ‘‘dve magge’’tiādi vuttaṃ. Pariyāyena chādanampi imināva nayena yojetabbanti vadanti, taṃ ‘‘punappunaṃ chādāpesī’’ti imāya pāḷiyā ca ‘‘sabbampi cetaṃ chadanaṃ chadanūpari veditabba’’nti iminā aṭṭhakathāvacanena ca sameti.
பாளியங் ‘‘மக்³கே³ன சா²தெ³ந்தஸ்ஸ பரியாயேன சா²தெ³ந்தஸ்ஸா’’தி இத³ஞ்ச இட்ட²காதீ³ஹி, திணபண்ணேஹி ச சா²த³னப்பகாரபே⁴த³த³ஸ்ஸனத்த²ங் வுத்தங். கேசி பன ‘‘பந்தியா சா²தி³தஸ்ஸ ச²த³னஸ்ஸ உபரி ச²த³னமுக²வட்டிதோ பட்டா²ய உத்³த⁴ங் உஜுகமேவ ஏகவாரங் சா²த³னங் ஏகமக்³க³ந்தி க³ஹெத்வா ‘த்³வே மக்³கே³’திஆதி³ வுத்தங், ந பன ஸகலவிஹாரசா²த³னங். ஏஸ நயோ பரியாயேன சா²த³னேபீ’’தி வத³ந்தி, தங் பாளிஅட்ட²கதா²ஹி ந ஸமேதி.
Pāḷiyaṃ ‘‘maggena chādentassa pariyāyena chādentassā’’ti idañca iṭṭhakādīhi, tiṇapaṇṇehi ca chādanappakārabhedadassanatthaṃ vuttaṃ. Keci pana ‘‘pantiyā chāditassa chadanassa upari chadanamukhavaṭṭito paṭṭhāya uddhaṃ ujukameva ekavāraṃ chādanaṃ ekamagganti gahetvā ‘dve magge’tiādi vuttaṃ, na pana sakalavihārachādanaṃ. Esa nayo pariyāyena chādanepī’’ti vadanti, taṃ pāḷiaṭṭhakathāhi na sameti.
ததியாய மக்³க³ந்தி எத்த² ததியாயாதி உபயோக³த்தே² ஸம்பதா³னவசனங், ததியங் மக்³க³ந்தி அத்தோ². அயமேவ வா பாடோ². திணபண்ணேஹி லப்³ப⁴தீதி திணபண்ணேஹி சா²தெ³த்வா உபரி உல்லித்தாவலித்தகரணங் ஸந்தா⁴ய வுத்தங். கேவலங் திணகுடியா ஹி அனாபத்தி வுத்தா. திண்ணங் மக்³கா³னந்தி மக்³க³வஸேன சா²தி³தானங் திண்ணங் ச²த³னானங். திண்ணங் பரியாயானந்தி எத்தா²பி ஏஸேவ நயோ. மஹல்லகவிஹாரதா, அத்தனோ வாஸாகா³ரதா, உத்தரி அதி⁴ட்டா²னந்தி இமானெத்த² தீணி அங்கா³னி.
Tatiyāya magganti ettha tatiyāyāti upayogatthe sampadānavacanaṃ, tatiyaṃ magganti attho. Ayameva vā pāṭho. Tiṇapaṇṇehi labbhatīti tiṇapaṇṇehi chādetvā upari ullittāvalittakaraṇaṃ sandhāya vuttaṃ. Kevalaṃ tiṇakuṭiyā hi anāpatti vuttā. Tiṇṇaṃ maggānanti maggavasena chāditānaṃ tiṇṇaṃ chadanānaṃ. Tiṇṇaṃ pariyāyānanti etthāpi eseva nayo. Mahallakavihāratā, attano vāsāgāratā, uttari adhiṭṭhānanti imānettha tīṇi aṅgāni.
மஹல்லகவிஹாரஸிக்கா²பத³வண்ணனா நிட்டி²தா.
Mahallakavihārasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. பூ⁴தகா³மவக்³கோ³ • 2. Bhūtagāmavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 9. மஹல்லகவிஹாரஸிக்கா²பத³வண்ணனா • 9. Mahallakavihārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 9. மஹல்லகவிஹாரஸிக்கா²பத³வண்ணனா • 9. Mahallakavihārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 9. மஹல்லகவிஹாரஸிக்கா²பத³வண்ணனா • 9. Mahallakavihārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 9. மஹல்லகவிஹாரஸிக்கா²பத³ங் • 9. Mahallakavihārasikkhāpadaṃ
