| Library / Tipiṭaka / д̇ибидага • Tipiṭaka / ган̇каавид̇аран̣ий-абхинава-дийгаа • Kaṅkhāvitaraṇī-abhinava-ṭīkā |
9. махаллагавихаарасигкаабад̣̇аван̣н̣анаа
9. Mahallakavihārasikkhāpadavaṇṇanā
бидтасан̇гхаадассаад̇и д̣̇ваараб̣анд̇хасса. сааманд̇аа ад̣дхад̇зяяахад̇т̇о бад̣̇зсод̇и яасса (баажи. адта. 135) взмаж̇жхз д̣̇ваарам̣ ход̇и, убарибхааг̇з жа ужжаа бхид̇д̇и, д̇асса д̇ийсу д̣̇исаасу сааманд̇аа ад̣дхад̇зяяахад̇т̇о бад̣̇зсо. куд̣̇д̣̇агасса бана вихаарасса д̣̇вийсу д̣̇исаасу. д̇ад̇рааби яам̣ бхид̇д̇им̣ виварияамаанам̣ гаваадам̣ ааханад̇и, саа абарибун̣н̣уубажаарааби ход̇и. сажз бана д̣̇ваарасса ад̇хобхааг̇зби лзбогаасо ад̇т̇и, д̇амби лимбид̇ум̣ ваддад̇и. аг̇г̇ал̣адтабанааяаад̇и зд̇т̇а аг̇г̇ал̣асад̣̇д̣̇зна д̇ам̣самб̣анд̇хад̇о д̣̇ваарапалагасахид̇ам̣ д̣̇ваараб̣анд̇ханам̣ ад̇хиббзд̇ам̣. д̇знааха ‘‘сагаваадагассаа’’д̇иаад̣̇и. ‘‘нижжалабхаавад̇т̇ааяаа’’д̇и иминаа д̇ан̃жа ко табанам̣ ид̇ха нижжалабхаавзнаад̇и д̣̇ассзд̇и. го банзд̇т̇а ад̇хиббааяод̇и ааха ‘‘гаваадан̃хий’’д̇иаад̣̇и. гамбад̇ийд̇и жалад̇и. яаава д̣̇ваарагосаа аг̇г̇ал̣адтабанааяа бунаббунам̣ лимбид̇аб̣б̣о ваа лзбаабзд̇аб̣б̣о ваад̇и аг̇г̇ал̣адтабанад̇т̇ааяа яаава д̣̇ваарагосаа бунаббунам̣ ад̇д̇анаа лимбид̇аб̣б̣о ваа, барзхи лзбаабзд̇аб̣б̣о ваад̇и ад̇т̇о.
Piṭṭhasaṅghāṭassāti dvārabandhassa. Sāmantā aḍḍhateyyahattho padesoti yassa (pāci. aṭṭha. 135) vemajjhe dvāraṃ hoti, uparibhāge ca uccā bhitti, tassa tīsu disāsu sāmantā aḍḍhateyyahattho padeso. Khuddakassa pana vihārassa dvīsu disāsu. Tatrāpi yaṃ bhittiṃ vivariyamānaṃ kavāṭaṃ āhanati, sā aparipuṇṇūpacārāpi hoti. Sace pana dvārassa adhobhāgepi lepokāso atthi, tampi limpituṃ vaṭṭati. Aggaḷaṭṭhapanāyāti ettha aggaḷasaddena taṃsambandhato dvāraphalakasahitaṃ dvārabandhanaṃ adhippetaṃ. Tenāha ‘‘sakavāṭakassā’’tiādi. ‘‘Niccalabhāvatthāyā’’ti iminā tañca kho ṭhapanaṃ idha niccalabhāvenāti dasseti. Ko panettha adhippāyoti āha ‘‘kavāṭañhī’’tiādi. Kampatīti calati. Yāva dvārakosā aggaḷaṭṭhapanāya punappunaṃ limpitabbo vā lepāpetabbo vāti aggaḷaṭṭhapanatthāya yāva dvārakosā punappunaṃ attanā limpitabbo vā, parehi lepāpetabbo vāti attho.
нану жааяамад̇т̇о нзва маад̇игааяам̣, на бад̣̇абхааж̇анз вуд̇д̇о, ат̇а гуд̇о д̣̇адтаб̣б̣од̇и ааха ‘‘д̇ад̇т̇аа’’д̇иаад̣̇и. гин̃жаабийд̇и яад̣̇иби. адтуббад̇д̇ияанд̇и сигкаабад̣̇асса нид̣̇аанз. ад̇хигаарад̇од̇и анувад̇д̇анад̇о. аалогам̣ санд̇хзд̇и бид̇хзд̇ийд̇и аалогасанд̇хи. д̇знааха ‘‘аалогасанд̇хийд̇и ваад̇абаанагаваадагаа вужжанд̇ий’’д̇и. д̇ад̇т̇а ваад̇абаанагаваадагаад̇и ваад̇абаанапалагаа. анун̃н̃аад̇аббад̣̇зсад̇о бана ан̃н̃ад̇т̇а бунаббунам̣ вилимбид̇ум̣ ваа вилимбаабзд̇ум̣ ваа на ваддад̇и. ‘‘мад̇д̇игааяа гад̇д̇аб̣б̣агижжам̣ нидтаабзд̇ваа буна жад̇уд̇т̇алзбз д̣̇иннз баажид̇д̇ияа’’нд̇и (саарад̇т̇а. дий. баажид̇д̇ияа 3.135) гзжи. ‘‘бунаббунам̣ лзбад̣̇аанасса вуд̇д̇аббамаан̣ад̇о ан̃н̃ад̇т̇а бадигкид̇д̇амад̇д̇ам̣ табзд̇ваа баажид̇д̇ияасса авуд̇д̇ад̇д̇аа д̣̇уггада’’нд̇и абарз.
Nanu cāyamattho neva mātikāyaṃ, na padabhājane vutto, atha kuto daṭṭhabboti āha ‘‘tatthā’’tiādi. Kiñcāpīti yadipi. Aṭṭhuppattiyanti sikkhāpadassa nidāne. Adhikāratoti anuvattanato. Ālokaṃ sandheti pidhetīti ālokasandhi. Tenāha ‘‘ālokasandhīti vātapānakavāṭakā vuccantī’’ti. Tattha vātapānakavāṭakāti vātapānaphalakā. Anuññātappadesato pana aññattha punappunaṃ vilimpituṃ vā vilimpāpetuṃ vā na vaṭṭati. ‘‘Mattikāya kattabbakiccaṃ niṭṭhāpetvā puna catutthalepe dinne pācittiya’’nti (sārattha. ṭī. pācittiya 3.135) keci. ‘‘Punappunaṃ lepadānassa vuttappamāṇato aññattha paṭikkhittamattaṃ ṭhapetvā pācittiyassa avuttattā dukkaṭa’’nti apare.
ад̇хидтаад̇аб̣б̣анд̇и сам̣вид̇хаад̇аб̣б̣ам̣. аббахарид̇зд̇и зд̇т̇а аббасад̣̇д̣̇о ‘‘аббижчо’’д̇иаад̣̇ийсу (ма. ни. 1.252, 336; сам̣. ни. 2.148) вияа абхаавад̇т̇од̇и ааха ‘‘ахарид̇з’’д̇и. сааливийхиаад̣̇и (саарад̇т̇а. дий. 2.30) буб̣б̣ан̣н̣ам̣ ‘‘бурагкад̇ам̣ сассапала’’нд̇и гад̇ваа, д̇аб̣б̣ибарияааяад̇о муг̇г̇амаасаад̣̇и абаран̣н̣ам̣. вуд̇д̇анд̇и вабид̇ам̣. ‘‘д̇асмим̣ тад̇ваа ад̇хидтаханд̇о д̣̇уггадам̣ аабаж̇ж̇ад̇ий’’д̇и иминаа яасмим̣ бад̣̇зсз саманд̇аа вуд̇д̇аббамаан̣з барижчзд̣̇з буб̣б̣ан̣н̣аад̣̇ийни на санд̇и, д̇ад̇т̇а вихааро гаарзд̇аб̣б̣о. яад̇т̇а бана санд̇и, д̇ад̇т̇а гаараабзд̇ум̣ на ваддад̇ийд̇и д̣̇ассзд̇и. д̇ат̇зваад̇и мукаваддианд̇зна. д̇асмим̣ таад̇аб̣б̣ам̣ бад̇анд̇асса вихаарасса абад̇аногаасад̇д̇аа, д̇асса бхигкуно убари на бад̇зяяаад̇и ад̇хиббааяо. яат̇аабарижчиннасса бана огаасасса аб̣бханд̇арам̣ вихаарасса бад̇анд̇асса огаасо ход̇ийд̇и аббахарид̇зби д̇асмим̣ тад̇ваа ад̇хидтаад̇ум̣ на лабхад̇и. д̇знааха ‘‘д̇асса анд̇о ахарид̇зби таад̇ум̣ на лабхад̇ий’’д̇и.
Adhiṭṭhātabbanti saṃvidhātabbaṃ. Appahariteti ettha appasaddo ‘‘appiccho’’tiādīsu (ma. ni. 1.252, 336; saṃ. ni. 2.148) viya abhāvatthoti āha ‘‘aharite’’ti. Sālivīhiādi (sārattha. ṭī. 2.30) pubbaṇṇaṃ ‘‘purakkhataṃ sassaphala’’nti katvā, tabbipariyāyato muggamāsādi aparaṇṇaṃ. Vuttanti vapitaṃ. ‘‘Tasmiṃ ṭhatvā adhiṭṭhahanto dukkaṭaṃ āpajjatī’’ti iminā yasmiṃ padese samantā vuttappamāṇe paricchede pubbaṇṇādīni na santi, tattha vihāro kāretabbo. Yattha pana santi, tattha kārāpetuṃ na vaṭṭatīti dasseti. Tathevāti mukhavaṭṭiantena. Tasmiṃ ṭhātabbaṃ patantassa vihārassa apatanokāsattā, tassa bhikkhuno upari na pateyyāti adhippāyo. Yathāparicchinnassa pana okāsassa abbhantaraṃ vihārassa patantassa okāso hotīti appaharitepi tasmiṃ ṭhatvā adhiṭṭhātuṃ na labhati. Tenāha ‘‘tassa anto aharitepi ṭhātuṃ na labhatī’’ti.
д̇ад̇о жз уд̇д̇арийд̇и д̇ин̣н̣ам̣ маг̇г̇аанам̣ ваа барияааяаанам̣ ваа убари жад̇уд̇т̇з маг̇г̇з ваа барияааяз ваад̇и ад̇т̇о. д̇знааха ‘‘маг̇г̇зна чаад̣̇ияамаанз’’д̇иаад̣̇и. д̇ад̇т̇а маг̇г̇зна чаад̣̇ияамаанзд̇и абаригкибид̇ваа уж̇угамзва чаад̣̇ияамаанз. барияааязнаад̇и баригкзбзна. д̇ад̇т̇а маг̇г̇зна чаад̣̇анам̣ идтагасилаасуд̇хаахи лаб̣бхад̇и, барияааязна чаад̣̇анам̣ д̇ин̣абан̣н̣зхийд̇и ааха ‘‘идтагасилаасуд̇хаахий’’д̇иаад̣̇и. д̇асмаа яат̇аа ижчад̇и, д̇ат̇аа д̣̇вз маг̇г̇з ваа д̣̇вз барияааяз ваа ад̇хидтахид̇ваа д̇ад̇ияам̣ маг̇г̇ам̣ ваа барияааяам̣ ваа ‘‘звам̣ чаад̣̇зхий’’д̇и аан̣аабзд̇ваа баггамид̇аб̣б̣ам̣. сажз на баггамад̇и, д̇ун̣хийбхаавзна таад̇аб̣б̣ам̣. саб̣б̣амби жзд̇ам̣ чад̣̇анам̣ чад̣̇ануубари взд̣̇ид̇аб̣б̣ам̣. убаруубаричанно хи вихааро жирам̣ ановассаго ход̇ийд̇и ман̃н̃амаанаа звам̣ чаад̣̇знд̇и. д̇ин̣амудтиг̇ан̣анааяаад̇и д̇ин̣агарал̣аг̇ан̣анааяа.
Tato ce uttarīti tiṇṇaṃ maggānaṃ vā pariyāyānaṃ vā upari catutthe magge vā pariyāye vāti attho. Tenāha ‘‘maggena chādiyamāne’’tiādi. Tattha maggena chādiyamāneti aparikkhipitvā ujukameva chādiyamāne. Pariyāyenāti parikkhepena. Tattha maggena chādanaṃ iṭṭhakasilāsudhāhi labbhati, pariyāyena chādanaṃ tiṇapaṇṇehīti āha ‘‘iṭṭhakasilāsudhāhī’’tiādi. Tasmā yathā icchati, tathā dve magge vā dve pariyāye vā adhiṭṭhahitvā tatiyaṃ maggaṃ vā pariyāyaṃ vā ‘‘evaṃ chādehī’’ti āṇāpetvā pakkamitabbaṃ. Sace na pakkamati, tuṇhībhāvena ṭhātabbaṃ. Sabbampi cetaṃ chadanaṃ chadanūpari veditabbaṃ. Uparūparichanno hi vihāro ciraṃ anovassako hotīti maññamānā evaṃ chādenti. Tiṇamuṭṭhigaṇanāyāti tiṇakaraḷagaṇanāya.
д̇игабаажид̇д̇ияанд̇и ад̇ирзгад̣̇вад̇д̇ибарияааяз ад̇ирзгасан̃н̃ивзмад̇игауунагасан̃н̃ийнам̣ васзна д̇ийн̣и баажид̇д̇ияаани. сзд̇аван̣н̣аад̣̇игаран̣зд̇и сзд̇аван̣н̣агаал̣аван̣н̣аг̇зругабаригаммамаалаагаммалад̇аагаммамагарад̣̇анд̇агабан̃жабадигаанам̣ гаран̣з. лзн̣аг̇ухаад̇ин̣агудигаад̣̇ийсууд̇и зд̇т̇а лзн̣анд̇и д̣̇ваараб̣ад̣̇д̇хам̣. г̇ухаад̇и гзвалаа баб̣б̣ад̇аг̇ухаа. д̇ин̣агудигаа баагадаа зва.
Tikapācittiyanti atirekadvattipariyāye atirekasaññivematikaūnakasaññīnaṃ vasena tīṇi pācittiyāni. Setavaṇṇādikaraṇeti setavaṇṇakāḷavaṇṇagerukaparikammamālākammalatākammamakaradantakapañcapaṭikānaṃ karaṇe. Leṇaguhātiṇakuṭikādīsūti ettha leṇanti dvārabaddhaṃ. Guhāti kevalā pabbataguhā. Tiṇakuṭikā pākaṭā eva.
махаллагавихаарасигкаабад̣̇аван̣н̣анаа нидтид̇аа.
Mahallakavihārasikkhāpadavaṇṇanā niṭṭhitā.
