| Library / Tipiṭaka / திபிடக • Tipiṭaka / சரியாபிடக-அட்ட²கதா² • Cariyāpiṭaka-aṭṭhakathā |
15. மஹாலோமஹங்ஸசரியாவண்ணனா
15. Mahālomahaṃsacariyāvaṇṇanā
119. பன்னரஸமே ‘‘ஸுஸானே ஸெய்யங் கப்பேமீ’’தி எத்தா²யங் அனுபுப்³பி³கதா² –
119. Pannarasame ‘‘susāne seyyaṃ kappemī’’ti etthāyaṃ anupubbikathā –
மஹாஸத்தோ ஹி ததா³ மஹதி உளாரபோ⁴கே³ குலே நிப்³ப³த்தித்வா வுத்³தி⁴மன்வாய தி³ஸாபாமொக்க²ஸ்ஸ ஆசரியஸ்ஸ ஸந்திகே க³ருவாஸங் வஸந்தோ ஸப்³ப³ஸிப்பானங் நிப்ப²த்திங் பத்வா குலக⁴ரங் ஆக³ந்த்வா மாதாபிதூனங் அச்சயேன ஞாதகேஹி ‘‘குடும்ப³ங் ஸண்ட²பேஹீ’’தி யாசியமானோபி அனிச்சதாமனஸிகாரமுகே²ன ஸப்³ப³ப⁴வேஸு அபி⁴வட்³ட⁴மானஸங்வேகோ³ காயே ச அஸுப⁴ஸஞ்ஞங் படிலபி⁴த்வா க⁴ராவாஸபலிபோ³தா⁴தி⁴பூ⁴தங் கிலேஸக³ஹனங் அனோகா³ஹெத்வாவ சிரகாலஸம்பரிசிதங் நெக்க²ம்மஜ்ஜா²ஸயங் உபப்³ரூஹயமானோ மஹந்தங் போ⁴க³க்க²ந்த⁴ங் பஹாய பப்³ப³ஜிதுகாமோ ஹுத்வா புன சிந்தேஸி – ‘‘ஸசாஹங் பப்³ப³ஜிஸ்ஸாமி, கு³ணஸம்பா⁴வனாபாகடோ ப⁴விஸ்ஸாமீ’’தி.
Mahāsatto hi tadā mahati uḷārabhoge kule nibbattitvā vuddhimanvāya disāpāmokkhassa ācariyassa santike garuvāsaṃ vasanto sabbasippānaṃ nipphattiṃ patvā kulagharaṃ āgantvā mātāpitūnaṃ accayena ñātakehi ‘‘kuṭumbaṃ saṇṭhapehī’’ti yāciyamānopi aniccatāmanasikāramukhena sabbabhavesu abhivaḍḍhamānasaṃvego kāye ca asubhasaññaṃ paṭilabhitvā gharāvāsapalibodhādhibhūtaṃ kilesagahanaṃ anogāhetvāva cirakālasamparicitaṃ nekkhammajjhāsayaṃ upabrūhayamāno mahantaṃ bhogakkhandhaṃ pahāya pabbajitukāmo hutvā puna cintesi – ‘‘sacāhaṃ pabbajissāmi, guṇasambhāvanāpākaṭo bhavissāmī’’ti.
ஸோ லாப⁴ஸக்காரங் ஜிகு³ச்ச²ந்தோ பப்³ப³ஜ்ஜங் அனுபக³ந்த்வா ‘‘பஹோமி சாஹங் லாபா⁴லாபா⁴தீ³ஸு நிப்³பி³காரோ ஹோது’’ந்தி அத்தானங் தக்கெந்தோ ‘‘விஸேஸதோ பரபரிப⁴வஸஹனாதி³படிபத³ங் பூரெந்தோ உபெக்கா²பாரமிங் மத்த²கங் பாபெஸ்ஸாமீ’’தி நிவத்த²வத்தே²னேவ கே³ஹதோ நிக்க²மித்வா பரமஸல்லேக²வுத்திகோபி அப³லப³லோ அமந்த³மந்தோ³ விய பரேஸங் அசித்தகரூபேன ஹீளிதபரிபூ⁴தோ ஹுத்வா கா³மனிக³மராஜதா⁴னீஸு ஏகரத்திவாஸேனேவ விசரதி. யத்த² பன மஹந்தங் பரிப⁴வங் படிலப⁴தி, தத்த² சிரம்பி வஸதி. ஸோ நிவத்த²வத்தே² ஜிண்ணே பிலோதிகக²ண்டே³ன தஸ்மிம்பி ஜிண்ணே கேனசி தி³ன்னங் அக்³க³ண்ஹந்தோ ஹிரிகோபீனபடிச்சா²த³னமத்தேனேவ சரதி. ஏவங் க³ச்ச²ந்தே காலே ஏகங் நிக³மகா³மங் அக³மாஸி.
So lābhasakkāraṃ jigucchanto pabbajjaṃ anupagantvā ‘‘pahomi cāhaṃ lābhālābhādīsu nibbikāro hotu’’nti attānaṃ takkento ‘‘visesato paraparibhavasahanādipaṭipadaṃ pūrento upekkhāpāramiṃ matthakaṃ pāpessāmī’’ti nivatthavattheneva gehato nikkhamitvā paramasallekhavuttikopi abalabalo amandamando viya paresaṃ acittakarūpena hīḷitaparibhūto hutvā gāmanigamarājadhānīsu ekarattivāseneva vicarati. Yattha pana mahantaṃ paribhavaṃ paṭilabhati, tattha cirampi vasati. So nivatthavatthe jiṇṇe pilotikakhaṇḍena tasmimpi jiṇṇe kenaci dinnaṃ aggaṇhanto hirikopīnapaṭicchādanamatteneva carati. Evaṃ gacchante kāle ekaṃ nigamagāmaṃ agamāsi.
தத்த² கா³மதா³ரகா து⁴த்தஜாதிகா வேத⁴வேரா கேசி ராஜவல்லபா⁴னங் புத்தனத்துதா³ஸாத³யோ ச உத்³த⁴தா உன்னளா சபலா முக²ரா விகிண்ணவாசா காலேன காலங் கீளாப³ஹுலா விசரந்தி. து³க்³க³தே மஹல்லகே புரிஸே ச இத்தி²யோ ச க³ச்ச²ந்தே தி³ஸ்வா ப⁴ஸ்மபுடேன பிட்டி²யங் ஆகிரந்தி, கேதகீபண்ணங் கச்ச²ந்தரே ஓலம்பெ³ந்தி, தேன விப்பகாரேன பரிவத்தெத்வா ஓலோகெந்தே யதா²வஜ்ஜகீளிதங் த³ஸ்ஸெத்வா உபஹஸந்தி. மஹாபுரிஸோ தஸ்மிங் நிக³மே தே ஏவங் விசரந்தே து⁴த்ததா³ரகே தி³ஸ்வா ‘‘லத்³தோ⁴ வத தா³னி மே உபெக்கா²பாரமியா பரிபூரணூபாயோ’’தி சிந்தெத்வா தத்த² விஹாஸி. தங் தே து⁴த்ததா³ரகா பஸ்ஸித்வா விப்பகாரங் காதுங் ஆரப⁴ந்தி.
Tattha gāmadārakā dhuttajātikā vedhaverā keci rājavallabhānaṃ puttanattudāsādayo ca uddhatā unnaḷā capalā mukharā vikiṇṇavācā kālena kālaṃ kīḷābahulā vicaranti. Duggate mahallake purise ca itthiyo ca gacchante disvā bhasmapuṭena piṭṭhiyaṃ ākiranti, ketakīpaṇṇaṃ kacchantare olambenti, tena vippakārena parivattetvā olokente yathāvajjakīḷitaṃ dassetvā upahasanti. Mahāpuriso tasmiṃ nigame te evaṃ vicarante dhuttadārake disvā ‘‘laddho vata dāni me upekkhāpāramiyā paripūraṇūpāyo’’ti cintetvā tattha vihāsi. Taṃ te dhuttadārakā passitvā vippakāraṃ kātuṃ ārabhanti.
மஹாஸத்தோ தங் அஸஹந்தோ விய ச தேஹி பா⁴யந்தோ விய ச உட்ட²ஹித்வா க³ச்ச²தி. தே தங் அனுப³ந்த⁴ந்தி. ஸோ தேஹி அனுப³ந்தி⁴யமானோ ‘‘எத்த² நத்தி² கோசி படிவத்தா’’தி ஸுஸானங் க³ந்த்வா அட்டி²கங் ஸீஸூபதா⁴னங் கத்வா ஸயதி. து⁴த்ததா³ரகாபி தத்த² க³ந்த்வா ஒட்டு²ப⁴னாதி³கங் நானப்பகாரங் விப்பகாரங் கத்வா பக்கமந்தி. ஏவங் தே தி³வஸே தி³வஸே கரொந்தி ஏவ. யே பன விஞ்ஞூ புரிஸா, தே ஏவங் கரொந்தே பஸ்ஸந்தி. தே தே படிபா³ஹித்வா ‘‘அயங் மஹானுபா⁴வோ தபஸ்ஸீ மஹாயோகீ³’’தி ச ஞத்வா உளாரங் ஸக்காரஸம்மானங் கரொந்தி. மஹாஸத்தோ பன ஸப்³ப³த்த² ஏகஸதி³ஸோவ ஹோதி மஜ்ஜ²த்தபூ⁴தோ. தேன வுத்தங் ‘‘ஸுஸானே ஸெய்யங் கப்பேமீ’’திஆதி³.
Mahāsatto taṃ asahanto viya ca tehi bhāyanto viya ca uṭṭhahitvā gacchati. Te taṃ anubandhanti. So tehi anubandhiyamāno ‘‘ettha natthi koci paṭivattā’’ti susānaṃ gantvā aṭṭhikaṃ sīsūpadhānaṃ katvā sayati. Dhuttadārakāpi tattha gantvā oṭṭhubhanādikaṃ nānappakāraṃ vippakāraṃ katvā pakkamanti. Evaṃ te divase divase karonti eva. Ye pana viññū purisā, te evaṃ karonte passanti. Te te paṭibāhitvā ‘‘ayaṃ mahānubhāvo tapassī mahāyogī’’ti ca ñatvā uḷāraṃ sakkārasammānaṃ karonti. Mahāsatto pana sabbattha ekasadisova hoti majjhattabhūto. Tena vuttaṃ ‘‘susāne seyyaṃ kappemī’’tiādi.
தத்த² ஸுஸானே ஸெய்யங் கப்பேமி, ச²வட்டி²கங் உபனிதா⁴யாதி ஆமகஸுஸானே ச²ட்³டி³தகளேவரதோ ஸோணஸிங்கா³லாதீ³ஹி தஹிங் தஹிங் விக்கி²த்தேஸு அட்டி²கேஸு ஏகங் அட்டி²கங் ஸீஸூபதா⁴னங் கத்வா ஸுசிம்ஹி ச அஸுசிம்ஹி ச ஸமானசித்ததாய தஸ்மிங் ஸுஸானே ஸெய்யங் கப்பேமி, ஸயாமீதி அத்தோ². கா³மண்ட³லாதி கா³மதா³ரகா. ரூபங் த³ஸ்ஸெந்தினப்பகந்தி யதா²வஜ்ஜகீளிதாய ஒட்டு²ப⁴னஉபஹஸனஉம்மிஹனாதீ³ஹி கண்ணஸோதே ஸலாகப்பவேஸனாதீ³ஹி ச அதிகக்க²ளங் அனப்பகங் நானப்பகாரங் ரூபங் விகாரங் கரொந்தி.
Tattha susāne seyyaṃ kappemi, chavaṭṭhikaṃ upanidhāyāti āmakasusāne chaḍḍitakaḷevarato soṇasiṅgālādīhi tahiṃ tahiṃ vikkhittesu aṭṭhikesu ekaṃ aṭṭhikaṃ sīsūpadhānaṃ katvā sucimhi ca asucimhi ca samānacittatāya tasmiṃ susāne seyyaṃ kappemi, sayāmīti attho. Gāmaṇḍalāti gāmadārakā. Rūpaṃ dassentinappakanti yathāvajjakīḷitāya oṭṭhubhanaupahasanaummihanādīhi kaṇṇasote salākappavesanādīhi ca atikakkhaḷaṃ anappakaṃ nānappakāraṃ rūpaṃ vikāraṃ karonti.
120. அபரேதி தேஸு ஏவ கா³மதா³ரகேஸு ஏகச்சே. உபாயனானூபனெந்தீதி ‘‘அயங் இமேஸு பரிப⁴வவஸேன ஏவரூபங் விப்பகாரங் கரொந்தேஸு ந கிஞ்சி விகாரங் த³ஸ்ஸேதி, ஸம்மானநே நு கோ² கீதி³ஸோ’’தி பரிக்³க³ண்ஹந்தா விவித⁴ங் ப³ஹுங் க³ந்த⁴மாலங் போ⁴ஜனங் அஞ்ஞானி ச உபாயனானி பண்ணாகாரானி உபனெந்தி உபஹரந்தி. அபரேஹி வா தேஹி அனாசாரகா³மதா³ரகேஹி அஞ்ஞே விஞ்ஞூ மனுஸ்ஸா ‘‘அயங் இமேஸங் ஏவங் விவித⁴ம்பி விப்பகாரங் கரொந்தானங் ந குப்பதி, அஞ்ஞத³த்து² க²ந்திமெத்தானுத்³த³யங்யேவ தேஸு உபட்ட²பேதி, அஹோ அச்ச²ரியபுரிஸோ’’தி ஹட்டா² ‘‘ப³ஹு வதிமேஹி ஏதஸ்மிங் விப்படிபஜ்ஜந்தேஹி அபுஞ்ஞங் பஸுத’’ந்தி ஸங்விக்³க³மானஸாவ ஹுத்வா ப³ஹுங் க³ந்த⁴மாலங் விவித⁴ங் போ⁴ஜனங் அஞ்ஞானி ச உபாயனானி உபனெந்தி உபஹரந்தி.
120.Apareti tesu eva gāmadārakesu ekacce. Upāyanānūpanentīti ‘‘ayaṃ imesu paribhavavasena evarūpaṃ vippakāraṃ karontesu na kiñci vikāraṃ dasseti, sammānane nu kho kīdiso’’ti pariggaṇhantā vividhaṃ bahuṃ gandhamālaṃ bhojanaṃ aññāni ca upāyanāni paṇṇākārāni upanenti upaharanti. Aparehi vā tehi anācāragāmadārakehi aññe viññū manussā ‘‘ayaṃ imesaṃ evaṃ vividhampi vippakāraṃ karontānaṃ na kuppati, aññadatthu khantimettānuddayaṃyeva tesu upaṭṭhapeti, aho acchariyapuriso’’ti haṭṭhā ‘‘bahu vatimehi etasmiṃ vippaṭipajjantehi apuññaṃ pasuta’’nti saṃviggamānasāva hutvā bahuṃ gandhamālaṃ vividhaṃ bhojanaṃ aññāni ca upāyanāni upanenti upaharanti.
121. யே மே து³க்க²ங் உபஹரந்தீதி யே கா³மதா³ரகா மய்ஹங் ஸரீரது³க்க²ங் உபஹரந்தி உபனெந்தி. ‘‘உபத³ஹந்தீ’’திபி பாடோ², உப்பாதெ³ந்தீதி அத்தோ². யே ச தெ³ந்தி ஸுக²ங் மமாதி யே ச விஞ்ஞூ மனுஸ்ஸா மம மய்ஹங் ஸுக²ங் தெ³ந்தி, மாலாக³ந்த⁴போ⁴ஜனாதி³ஸுகூ²பகரணேஹி மம ஸுக²ங் உபஹரந்தி. ஸப்³பே³ஸங் ஸமகோ ஹோமீதி கத்த²சிபி விகாரானுப்பத்தியா ஸமானசித்ததாய விவிதா⁴னம்பி தேஸங் ஜனானங் ஸமகோ ஏகஸதி³ஸோ ஹோமி ப⁴வாமி. த³யா கோபோ ந விஜ்ஜதீதி யஸ்மா மய்ஹங் உபகாரகே மெத்தசித்ததாஸங்கா²தா த³யா, அபகாரகே மனோபதோ³ஸஸங்கா²தோ கோபோபி ந விஜ்ஜதி, தஸ்மா ஸப்³பே³ஸங் ஸமகோ ஹோமீதி த³ஸ்ஸேதி.
121.Yeme dukkhaṃ upaharantīti ye gāmadārakā mayhaṃ sarīradukkhaṃ upaharanti upanenti. ‘‘Upadahantī’’tipi pāṭho, uppādentīti attho. Ye ca denti sukhaṃ mamāti ye ca viññū manussā mama mayhaṃ sukhaṃ denti, mālāgandhabhojanādisukhūpakaraṇehi mama sukhaṃ upaharanti. Sabbesaṃ samako homīti katthacipi vikārānuppattiyā samānacittatāya vividhānampi tesaṃ janānaṃ samako ekasadiso homi bhavāmi. Dayā kopo na vijjatīti yasmā mayhaṃ upakārake mettacittatāsaṅkhātā dayā, apakārake manopadosasaṅkhāto kopopi na vijjati, tasmā sabbesaṃ samako homīti dasseti.
122. இதா³னி ப⁴க³வா ததா³ உபகாரீஸு அபகாரீஸு ச ஸத்தேஸு ஸமுபசிதஞாணஸம்பா⁴ரஸ்ஸ அத்தனோ ஸமானசித்ததா விகாராபா⁴வோ யா ச லோகத⁴ம்மேஸு அனுபலித்ததா அஹோஸி, தங் த³ஸ்ஸேதுங் ‘‘ஸுக²து³க்கே² துலாபூ⁴தோ’’தி ஓஸானகா³த²மாஹ.
122. Idāni bhagavā tadā upakārīsu apakārīsu ca sattesu samupacitañāṇasambhārassa attano samānacittatā vikārābhāvo yā ca lokadhammesu anupalittatā ahosi, taṃ dassetuṃ ‘‘sukhadukkhe tulābhūto’’ti osānagāthamāha.
தத்த² ஸுக²து³க்கே²தி ஸுகே² ச து³க்கே² ச. துலாபூ⁴தோதி ஸமகங் க³ஹிததுலா விய ஓனதிஉன்னதிஅபனதிங் வஜ்ஜெத்வா மஜ்ஜ²த்தபூ⁴தோ, ஸுக²து³க்க²க்³க³ஹணேனேவ செத்த² தங்னிமித்தபா⁴வதோ லாபா⁴லாபா⁴பி க³ஹிதாதி வேதி³தப்³ப³ங். யஸேஸூதி கித்தீஸு. அயஸேஸூதி நிந்தா³ஸு. ஸப்³ப³த்தா²தி ஸப்³பே³ஸு ஸுகா²தீ³ஸு லோகத⁴ம்மேஸு. இதி ப⁴க³வா ததா³ ஸப்³ப³ஸத்தேஸு ஸப்³ப³லோகத⁴ம்மேஸு ச அனஞ்ஞஸாதா⁴ரணங் அத்தனோ மஜ்ஜ²த்தபா⁴வங் கித்தெத்வா தேன தஸ்மிங் அத்தபா⁴வே அத்தனோ உபெக்கா²பாரமியா ஸிகா²ப்பத்தபா⁴வங் விபா⁴வெந்தோ ‘‘ஏஸா மே உபெக்கா²பாரமீ’’தி தே³ஸனங் நிட்டா²பேஸி.
Tattha sukhadukkheti sukhe ca dukkhe ca. Tulābhūtoti samakaṃ gahitatulā viya onatiunnatiapanatiṃ vajjetvā majjhattabhūto, sukhadukkhaggahaṇeneva cettha taṃnimittabhāvato lābhālābhāpi gahitāti veditabbaṃ. Yasesūti kittīsu. Ayasesūti nindāsu. Sabbatthāti sabbesu sukhādīsu lokadhammesu. Iti bhagavā tadā sabbasattesu sabbalokadhammesu ca anaññasādhāraṇaṃ attano majjhattabhāvaṃ kittetvā tena tasmiṃ attabhāve attano upekkhāpāramiyā sikhāppattabhāvaṃ vibhāvento ‘‘esā me upekkhāpāramī’’ti desanaṃ niṭṭhāpesi.
இதா⁴பி மஹாஸத்தஸ்ஸ பட²மங் தா³னபாரமீ நாம விஸேஸதோ ஸப்³ப³விப⁴வபரிச்சாகோ³ ‘‘யே கேசி இமங் ஸரீரங் க³ஹெத்வா யங்கிஞ்சி அத்தனோ இச்சி²தங் கரொந்தூ’’தி அனபெக்க²பா⁴வேன அத்தனோ அத்தபா⁴வபரிச்சாகோ³ ச தா³னபாரமீ, ஹீனாதி³கஸ்ஸ ஸப்³ப³ஸ்ஸ அகத்தப்³ப³ஸ்ஸ அகரணங் ஸீலபாரமீ, காமஸ்ஸாத³விமுக²ஸ்ஸ கே³ஹதோ நிக்க²ந்தஸ்ஸ ஸதோ காயே அஸுப⁴ஸஞ்ஞானுப்³ரூஹனா நெக்க²ம்மபாரமீ, ஸம்போ³தி⁴ஸம்பா⁴ரானங் உபகாரத⁴ம்மபரிக்³க³ஹணே தப்படிபக்க²ப்பஹானே ச கோஸல்லங் அவிபரீததோ த⁴ம்மஸபா⁴வசிந்தனா ச பஞ்ஞாபாரமீ , காமவிதக்காதி³வினோத³னங் து³க்கா²தி⁴வாஸனவீரியஞ்ச வீரியபாரமீ, ஸப்³பா³பி அதி⁴வாஸனக²ந்தி க²ந்திபாரமீ, வசீஸச்சங் ஸமாதா³னாவிஸங்வாத³னேன விரதிஸச்சஞ்ச ஸச்சபாரமீ , அனவஜ்ஜத⁴ம்மே அசலஸமாதா³னாதி⁴ட்டா²னங் அதி⁴ட்டா²னபாரமீ, அனோதி⁴ஸோ ஸப்³ப³ஸத்தேஸு மெத்தானுத்³த³யபா⁴வோ மெத்தாபாரமீ, உபெக்கா²பாரமீ பனஸ்ஸ யதா²வுத்தவஸேனேவ வேதி³தப்³பா³தி த³ஸ பாரமியோ லப்³ப⁴ந்தி. உபெக்கா²பாரமீ செத்த² அதிஸயவதீதி கத்வா ஸாயேவ தே³ஸனங் ஆருள்ஹா. ததா² இத⁴ மஹாஸத்தஸ்ஸ மஹந்தங் போ⁴க³க்க²ந்த⁴ங் மஹந்தஞ்ச ஞாதிபரிவட்டங் பஹாய மஹாபி⁴னிக்க²மனஸதி³ஸங் கே³ஹதோ நிக்க²மனங், ததா² நிக்க²மித்வா லாப⁴ஸக்காரங் ஜிகு³ச்ச²தோ பரேஸங் ஸம்பா⁴வனங் பரிஹரிதுகாமஸ்ஸ பப்³ப³ஜ்ஜாலிங்க³ங் அக்³க³ஹெத்வா சித்தேனேவ அனவஸேஸங் பப்³ப³ஜ்ஜாகு³ணே அதி⁴ட்ட²ஹித்வா பரமஸுக²விஹாரோ, பரமப்பிச்ச²தா, பவிவேகாபி⁴ரதி, உபெக்க²ணாதி⁴ப்பாயேன அத்தனோ காயஜீவிதனிரபெக்கா², பரேஹி அத்தனோ உபரி கதவிப்பகாராதி⁴வாஸனங், உக்கங்ஸக³தஸல்லேக²வுத்தி, போ³தி⁴ஸம்பா⁴ரபடிபக்கா²னங் கிலேஸானங் தனுபா⁴வேன கீ²ணாஸவானங் விய பரேஸங் உபகாராபகாரேஸு நிப்³பி³காரபா⁴வஹேதுபூ⁴தேன ஸப்³ப³த்த² மஜ்ஜ²த்தபா⁴வேன ஸமுட்டா²பிதோ லோகத⁴ம்மேஹி அனுபலேபோ, ஸப்³ப³பாரமீனங் முத்³த⁴பூ⁴தாய உபெக்கா²பாரமியா ஸிகா²ப்பத்தீதி ஏவமாத³யோ கு³ணானுபா⁴வா விபா⁴வேதப்³பா³தி.
Idhāpi mahāsattassa paṭhamaṃ dānapāramī nāma visesato sabbavibhavapariccāgo ‘‘ye keci imaṃ sarīraṃ gahetvā yaṃkiñci attano icchitaṃ karontū’’ti anapekkhabhāvena attano attabhāvapariccāgo ca dānapāramī, hīnādikassa sabbassa akattabbassa akaraṇaṃ sīlapāramī, kāmassādavimukhassa gehato nikkhantassa sato kāye asubhasaññānubrūhanā nekkhammapāramī, sambodhisambhārānaṃ upakāradhammapariggahaṇe tappaṭipakkhappahāne ca kosallaṃ aviparītato dhammasabhāvacintanā ca paññāpāramī , kāmavitakkādivinodanaṃ dukkhādhivāsanavīriyañca vīriyapāramī, sabbāpi adhivāsanakhanti khantipāramī, vacīsaccaṃ samādānāvisaṃvādanena viratisaccañca saccapāramī , anavajjadhamme acalasamādānādhiṭṭhānaṃ adhiṭṭhānapāramī, anodhiso sabbasattesu mettānuddayabhāvo mettāpāramī, upekkhāpāramī panassa yathāvuttavaseneva veditabbāti dasa pāramiyo labbhanti. Upekkhāpāramī cettha atisayavatīti katvā sāyeva desanaṃ āruḷhā. Tathā idha mahāsattassa mahantaṃ bhogakkhandhaṃ mahantañca ñātiparivaṭṭaṃ pahāya mahābhinikkhamanasadisaṃ gehato nikkhamanaṃ, tathā nikkhamitvā lābhasakkāraṃ jigucchato paresaṃ sambhāvanaṃ pariharitukāmassa pabbajjāliṅgaṃ aggahetvā citteneva anavasesaṃ pabbajjāguṇe adhiṭṭhahitvā paramasukhavihāro, paramappicchatā, pavivekābhirati, upekkhaṇādhippāyena attano kāyajīvitanirapekkhā, parehi attano upari katavippakārādhivāsanaṃ, ukkaṃsagatasallekhavutti, bodhisambhārapaṭipakkhānaṃ kilesānaṃ tanubhāvena khīṇāsavānaṃ viya paresaṃ upakārāpakāresu nibbikārabhāvahetubhūtena sabbattha majjhattabhāvena samuṭṭhāpito lokadhammehi anupalepo, sabbapāramīnaṃ muddhabhūtāya upekkhāpāramiyā sikhāppattīti evamādayo guṇānubhāvā vibhāvetabbāti.
மஹாலோமஹங்ஸசரியாவண்ணனா நிட்டி²தா.
Mahālomahaṃsacariyāvaṇṇanā niṭṭhitā.
உபெக்கா²பாரமீ நிட்டி²தா.
Upekkhāpāramī niṭṭhitā.
ததியவக்³க³ஸ்ஸ அத்த²வண்ணனா நிட்டி²தா.
Tatiyavaggassa atthavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சரியாபிடகபாளி • Cariyāpiṭakapāḷi / 15. மஹாலோமஹங்ஸசரியா • 15. Mahālomahaṃsacariyā
