| Library / Tipiṭaka / တိပိဋက • Tipiṭaka / စရိယာပိဋက-အဋ္ဌကထာ • Cariyāpiṭaka-aṭṭhakathā |
၁၅. မဟာလောမဟံသစရိယာဝဏ္ဏနာ
15. Mahālomahaṃsacariyāvaṇṇanā
၁၁၉. ပန္နရသမေ ‘‘သုသာနေ သေယ္ယံ ကပ္ပေမီ’’တိ ဧတ္ထာယံ အနုပုဗ္ဗိကထာ –
119. Pannarasame ‘‘susāne seyyaṃ kappemī’’ti etthāyaṃ anupubbikathā –
မဟာသတ္တော ဟိ တဒာ မဟတိ ဥဠာရဘောဂေ ကုလေ နိဗ္ဗတ္တိတ္ဝာ ဝုဒ္ဓိမန္ဝာယ ဒိသာပာမောက္ခသ္သ အာစရိယသ္သ သန္တိကေ ဂရုဝာသံ ဝသန္တော သဗ္ဗသိပ္ပာနံ နိပ္ဖတ္တိံ ပတ္ဝာ ကုလဃရံ အာဂန္တ္ဝာ မာတာပိတူနံ အစ္စယေန ဉာတကေဟိ ‘‘ကုဋုမ္ဗံ သဏ္ဌပေဟီ’’တိ ယာစိယမာနောပိ အနိစ္စတာမနသိကာရမုခေန သဗ္ဗဘဝေသု အဘိဝဍ္ဎမာနသံဝေဂော ကာယေ စ အသုဘသညံ ပဋိလဘိတ္ဝာ ဃရာဝာသပလိဗောဓာဓိဘူတံ ကိလေသဂဟနံ အနောဂာဟေတ္ဝာဝ စိရကာလသမ္ပရိစိတံ နေက္ခမ္မဇ္ဈာသယံ ဥပဗ္ရူဟယမာနော မဟန္တံ ဘောဂက္ခန္ဓံ ပဟာယ ပဗ္ဗဇိတုကာမော ဟုတ္ဝာ ပုန စိန္တေသိ – ‘‘သစာဟံ ပဗ္ဗဇိသ္သာမိ, ဂုဏသမ္ဘာဝနာပာကဋော ဘဝိသ္သာမီ’’တိ။
Mahāsatto hi tadā mahati uḷārabhoge kule nibbattitvā vuddhimanvāya disāpāmokkhassa ācariyassa santike garuvāsaṃ vasanto sabbasippānaṃ nipphattiṃ patvā kulagharaṃ āgantvā mātāpitūnaṃ accayena ñātakehi ‘‘kuṭumbaṃ saṇṭhapehī’’ti yāciyamānopi aniccatāmanasikāramukhena sabbabhavesu abhivaḍḍhamānasaṃvego kāye ca asubhasaññaṃ paṭilabhitvā gharāvāsapalibodhādhibhūtaṃ kilesagahanaṃ anogāhetvāva cirakālasamparicitaṃ nekkhammajjhāsayaṃ upabrūhayamāno mahantaṃ bhogakkhandhaṃ pahāya pabbajitukāmo hutvā puna cintesi – ‘‘sacāhaṃ pabbajissāmi, guṇasambhāvanāpākaṭo bhavissāmī’’ti.
သော လာဘသက္ကာရံ ဇိဂုစ္ဆန္တော ပဗ္ဗဇ္ဇံ အနုပဂန္တ္ဝာ ‘‘ပဟောမိ စာဟံ လာဘာလာဘာဒီသု နိဗ္ဗိကာရော ဟောတု’’န္တိ အတ္တာနံ တက္ကေန္တော ‘‘ဝိသေသတော ပရပရိဘဝသဟနာဒိပဋိပဒံ ပူရေန္တော ဥပေက္ခာပာရမိံ မတ္ထကံ ပာပေသ္သာမီ’’တိ နိဝတ္ထဝတ္ထေနေဝ ဂေဟတော နိက္ခမိတ္ဝာ ပရမသလ္လေခဝုတ္တိကောပိ အဗလဗလော အမန္ဒမန္ဒော ဝိယ ပရေသံ အစိတ္တကရူပေန ဟီဠိတပရိဘူတော ဟုတ္ဝာ ဂာမနိဂမရာဇဓာနီသု ဧကရတ္တိဝာသေနေဝ ဝိစရတိ။ ယတ္ထ ပန မဟန္တံ ပရိဘဝံ ပဋိလဘတိ, တတ္ထ စိရမ္ပိ ဝသတိ။ သော နိဝတ္ထဝတ္ထေ ဇိဏ္ဏေ ပိလောတိကခဏ္ဍေန တသ္မိမ္ပိ ဇိဏ္ဏေ ကေနစိ ဒိန္နံ အဂ္ဂဏ္ဟန္တော ဟိရိကောပီနပဋိစ္ဆာဒနမတ္တေနေဝ စရတိ။ ဧဝံ ဂစ္ဆန္တေ ကာလေ ဧကံ နိဂမဂာမံ အဂမာသိ။
So lābhasakkāraṃ jigucchanto pabbajjaṃ anupagantvā ‘‘pahomi cāhaṃ lābhālābhādīsu nibbikāro hotu’’nti attānaṃ takkento ‘‘visesato paraparibhavasahanādipaṭipadaṃ pūrento upekkhāpāramiṃ matthakaṃ pāpessāmī’’ti nivatthavattheneva gehato nikkhamitvā paramasallekhavuttikopi abalabalo amandamando viya paresaṃ acittakarūpena hīḷitaparibhūto hutvā gāmanigamarājadhānīsu ekarattivāseneva vicarati. Yattha pana mahantaṃ paribhavaṃ paṭilabhati, tattha cirampi vasati. So nivatthavatthe jiṇṇe pilotikakhaṇḍena tasmimpi jiṇṇe kenaci dinnaṃ aggaṇhanto hirikopīnapaṭicchādanamatteneva carati. Evaṃ gacchante kāle ekaṃ nigamagāmaṃ agamāsi.
တတ္ထ ဂာမဒာရကာ ဓုတ္တဇာတိကာ ဝေဓဝေရာ ကေစိ ရာဇဝလ္လဘာနံ ပုတ္တနတ္တုဒာသာဒယော စ ဥဒ္ဓတာ ဥန္နဠာ စပလာ မုခရာ ဝိကိဏ္ဏဝာစာ ကာလေန ကာလံ ကီဠာဗဟုလာ ဝိစရန္တိ။ ဒုဂ္ဂတေ မဟလ္လကေ ပုရိသေ စ ဣတ္ထိယော စ ဂစ္ဆန္တေ ဒိသ္ဝာ ဘသ္မပုဋေန ပိဋ္ဌိယံ အာကိရန္တိ, ကေတကီပဏ္ဏံ ကစ္ဆန္တရေ ဩလမ္ဗေန္တိ, တေန ဝိပ္ပကာရေန ပရိဝတ္တေတ္ဝာ ဩလောကေန္တေ ယထာဝဇ္ဇကီဠိတံ ဒသ္သေတ္ဝာ ဥပဟသန္တိ။ မဟာပုရိသော တသ္မိံ နိဂမေ တေ ဧဝံ ဝိစရန္တေ ဓုတ္တဒာရကေ ဒိသ္ဝာ ‘‘လဒ္ဓော ဝတ ဒာနိ မေ ဥပေက္ခာပာရမိယာ ပရိပူရဏူပာယော’’တိ စိန္တေတ္ဝာ တတ္ထ ဝိဟာသိ။ တံ တေ ဓုတ္တဒာရကာ ပသ္သိတ္ဝာ ဝိပ္ပကာရံ ကာတုံ အာရဘန္တိ။
Tattha gāmadārakā dhuttajātikā vedhaverā keci rājavallabhānaṃ puttanattudāsādayo ca uddhatā unnaḷā capalā mukharā vikiṇṇavācā kālena kālaṃ kīḷābahulā vicaranti. Duggate mahallake purise ca itthiyo ca gacchante disvā bhasmapuṭena piṭṭhiyaṃ ākiranti, ketakīpaṇṇaṃ kacchantare olambenti, tena vippakārena parivattetvā olokente yathāvajjakīḷitaṃ dassetvā upahasanti. Mahāpuriso tasmiṃ nigame te evaṃ vicarante dhuttadārake disvā ‘‘laddho vata dāni me upekkhāpāramiyā paripūraṇūpāyo’’ti cintetvā tattha vihāsi. Taṃ te dhuttadārakā passitvā vippakāraṃ kātuṃ ārabhanti.
မဟာသတ္တော တံ အသဟန္တော ဝိယ စ တေဟိ ဘာယန္တော ဝိယ စ ဥဋ္ဌဟိတ္ဝာ ဂစ္ဆတိ။ တေ တံ အနုဗန္ဓန္တိ။ သော တေဟိ အနုဗန္ဓိယမာနော ‘‘ဧတ္ထ နတ္ထိ ကောစိ ပဋိဝတ္တာ’’တိ သုသာနံ ဂန္တ္ဝာ အဋ္ဌိကံ သီသူပဓာနံ ကတ္ဝာ သယတိ။ ဓုတ္တဒာရကာပိ တတ္ထ ဂန္တ္ဝာ ဩဋ္ဌုဘနာဒိကံ နာနပ္ပကာရံ ဝိပ္ပကာရံ ကတ္ဝာ ပက္ကမန္တိ။ ဧဝံ တေ ဒိဝသေ ဒိဝသေ ကရောန္တိ ဧဝ။ ယေ ပန ဝိညူ ပုရိသာ, တေ ဧဝံ ကရောန္တေ ပသ္သန္တိ။ တေ တေ ပဋိဗာဟိတ္ဝာ ‘‘အယံ မဟာနုဘာဝော တပသ္သီ မဟာယောဂီ’’တိ စ ဉတ္ဝာ ဥဠာရံ သက္ကာရသမ္မာနံ ကရောန္တိ။ မဟာသတ္တော ပန သဗ္ဗတ္ထ ဧကသဒိသောဝ ဟောတိ မဇ္ဈတ္တဘူတော။ တေန ဝုတ္တံ ‘‘သုသာနေ သေယ္ယံ ကပ္ပေမီ’’တိအာဒိ။
Mahāsatto taṃ asahanto viya ca tehi bhāyanto viya ca uṭṭhahitvā gacchati. Te taṃ anubandhanti. So tehi anubandhiyamāno ‘‘ettha natthi koci paṭivattā’’ti susānaṃ gantvā aṭṭhikaṃ sīsūpadhānaṃ katvā sayati. Dhuttadārakāpi tattha gantvā oṭṭhubhanādikaṃ nānappakāraṃ vippakāraṃ katvā pakkamanti. Evaṃ te divase divase karonti eva. Ye pana viññū purisā, te evaṃ karonte passanti. Te te paṭibāhitvā ‘‘ayaṃ mahānubhāvo tapassī mahāyogī’’ti ca ñatvā uḷāraṃ sakkārasammānaṃ karonti. Mahāsatto pana sabbattha ekasadisova hoti majjhattabhūto. Tena vuttaṃ ‘‘susāne seyyaṃ kappemī’’tiādi.
တတ္ထ သုသာနေ သေယ္ယံ ကပ္ပေမိ, ဆဝဋ္ဌိကံ ဥပနိဓာယာတိ အာမကသုသာနေ ဆဍ္ဍိတကဠေဝရတော သောဏသိင္ဂာလာဒီဟိ တဟိံ တဟိံ ဝိက္ခိတ္တေသု အဋ္ဌိကေသု ဧကံ အဋ္ဌိကံ သီသူပဓာနံ ကတ္ဝာ သုစိမ္ဟိ စ အသုစိမ္ဟိ စ သမာနစိတ္တတာယ တသ္မိံ သုသာနေ သေယ္ယံ ကပ္ပေမိ, သယာမီတိ အတ္ထော။ ဂာမဏ္ဍလာတိ ဂာမဒာရကာ။ ရူပံ ဒသ္သေန္တိနပ္ပကန္တိ ယထာဝဇ္ဇကီဠိတာယ ဩဋ္ဌုဘနဥပဟသနဥမ္မိဟနာဒီဟိ ကဏ္ဏသောတေ သလာကပ္ပဝေသနာဒီဟိ စ အတိကက္ခဠံ အနပ္ပကံ နာနပ္ပကာရံ ရူပံ ဝိကာရံ ကရောန္တိ။
Tattha susāne seyyaṃ kappemi, chavaṭṭhikaṃ upanidhāyāti āmakasusāne chaḍḍitakaḷevarato soṇasiṅgālādīhi tahiṃ tahiṃ vikkhittesu aṭṭhikesu ekaṃ aṭṭhikaṃ sīsūpadhānaṃ katvā sucimhi ca asucimhi ca samānacittatāya tasmiṃ susāne seyyaṃ kappemi, sayāmīti attho. Gāmaṇḍalāti gāmadārakā. Rūpaṃ dassentinappakanti yathāvajjakīḷitāya oṭṭhubhanaupahasanaummihanādīhi kaṇṇasote salākappavesanādīhi ca atikakkhaḷaṃ anappakaṃ nānappakāraṃ rūpaṃ vikāraṃ karonti.
၁၂၀. အပရေတိ တေသု ဧဝ ဂာမဒာရကေသု ဧကစ္စေ။ ဥပာယနာနူပနေန္တီတိ ‘‘အယံ ဣမေသု ပရိဘဝဝသေန ဧဝရူပံ ဝိပ္ပကာရံ ကရောန္တေသု န ကိဉ္စိ ဝိကာရံ ဒသ္သေတိ, သမ္မာနနေ နု ခော ကီဒိသော’’တိ ပရိဂ္ဂဏ္ဟန္တာ ဝိဝိဓံ ဗဟုံ ဂန္ဓမာလံ ဘောဇနံ အညာနိ စ ဥပာယနာနိ ပဏ္ဏာကာရာနိ ဥပနေန္တိ ဥပဟရန္တိ။ အပရေဟိ ဝာ တေဟိ အနာစာရဂာမဒာရကေဟိ အညေ ဝိညူ မနုသ္သာ ‘‘အယံ ဣမေသံ ဧဝံ ဝိဝိဓမ္ပိ ဝိပ္ပကာရံ ကရောန္တာနံ န ကုပ္ပတိ, အညဒတ္ထု ခန္တိမေတ္တာနုဒ္ဒယံယေဝ တေသု ဥပဋ္ဌပေတိ, အဟော အစ္ဆရိယပုရိသော’’တိ ဟဋ္ဌာ ‘‘ဗဟု ဝတိမေဟိ ဧတသ္မိံ ဝိပ္ပဋိပဇ္ဇန္တေဟိ အပုညံ ပသုတ’’န္တိ သံဝိဂ္ဂမာနသာဝ ဟုတ္ဝာ ဗဟုံ ဂန္ဓမာလံ ဝိဝိဓံ ဘောဇနံ အညာနိ စ ဥပာယနာနိ ဥပနေန္တိ ဥပဟရန္တိ။
120.Apareti tesu eva gāmadārakesu ekacce. Upāyanānūpanentīti ‘‘ayaṃ imesu paribhavavasena evarūpaṃ vippakāraṃ karontesu na kiñci vikāraṃ dasseti, sammānane nu kho kīdiso’’ti pariggaṇhantā vividhaṃ bahuṃ gandhamālaṃ bhojanaṃ aññāni ca upāyanāni paṇṇākārāni upanenti upaharanti. Aparehi vā tehi anācāragāmadārakehi aññe viññū manussā ‘‘ayaṃ imesaṃ evaṃ vividhampi vippakāraṃ karontānaṃ na kuppati, aññadatthu khantimettānuddayaṃyeva tesu upaṭṭhapeti, aho acchariyapuriso’’ti haṭṭhā ‘‘bahu vatimehi etasmiṃ vippaṭipajjantehi apuññaṃ pasuta’’nti saṃviggamānasāva hutvā bahuṃ gandhamālaṃ vividhaṃ bhojanaṃ aññāni ca upāyanāni upanenti upaharanti.
၁၂၁. ယေ မေ ဒုက္ခံ ဥပဟရန္တီတိ ယေ ဂာမဒာရကာ မယ္ဟံ သရီရဒုက္ခံ ဥပဟရန္တိ ဥပနေန္တိ။ ‘‘ဥပဒဟန္တီ’’တိပိ ပာဌော, ဥပ္ပာဒေန္တီတိ အတ္ထော။ ယေ စ ဒေန္တိ သုခံ မမာတိ ယေ စ ဝိညူ မနုသ္သာ မမ မယ္ဟံ သုခံ ဒေန္တိ, မာလာဂန္ဓဘောဇနာဒိသုခူပကရဏေဟိ မမ သုခံ ဥပဟရန္တိ။ သဗ္ဗေသံ သမကော ဟောမီတိ ကတ္ထစိပိ ဝိကာရာနုပ္ပတ္တိယာ သမာနစိတ္တတာယ ဝိဝိဓာနမ္ပိ တေသံ ဇနာနံ သမကော ဧကသဒိသော ဟောမိ ဘဝာမိ။ ဒယာ ကောပော န ဝိဇ္ဇတီတိ ယသ္မာ မယ္ဟံ ဥပကာရကေ မေတ္တစိတ္တတာသင္ခာတာ ဒယာ, အပကာရကေ မနောပဒောသသင္ခာတော ကောပောပိ န ဝိဇ္ဇတိ, တသ္မာ သဗ္ဗေသံ သမကော ဟောမီတိ ဒသ္သေတိ။
121.Yeme dukkhaṃ upaharantīti ye gāmadārakā mayhaṃ sarīradukkhaṃ upaharanti upanenti. ‘‘Upadahantī’’tipi pāṭho, uppādentīti attho. Ye ca denti sukhaṃ mamāti ye ca viññū manussā mama mayhaṃ sukhaṃ denti, mālāgandhabhojanādisukhūpakaraṇehi mama sukhaṃ upaharanti. Sabbesaṃ samako homīti katthacipi vikārānuppattiyā samānacittatāya vividhānampi tesaṃ janānaṃ samako ekasadiso homi bhavāmi. Dayā kopo na vijjatīti yasmā mayhaṃ upakārake mettacittatāsaṅkhātā dayā, apakārake manopadosasaṅkhāto kopopi na vijjati, tasmā sabbesaṃ samako homīti dasseti.
၁၂၂. ဣဒာနိ ဘဂဝာ တဒာ ဥပကာရီသု အပကာရီသု စ သတ္တေသု သမုပစိတဉာဏသမ္ဘာရသ္သ အတ္တနော သမာနစိတ္တတာ ဝိကာရာဘာဝော ယာ စ လောကဓမ္မေသု အနုပလိတ္တတာ အဟောသိ, တံ ဒသ္သေတုံ ‘‘သုခဒုက္ခေ တုလာဘူတော’’တိ ဩသာနဂာထမာဟ။
122. Idāni bhagavā tadā upakārīsu apakārīsu ca sattesu samupacitañāṇasambhārassa attano samānacittatā vikārābhāvo yā ca lokadhammesu anupalittatā ahosi, taṃ dassetuṃ ‘‘sukhadukkhe tulābhūto’’ti osānagāthamāha.
တတ္ထ သုခဒုက္ခေတိ သုခေ စ ဒုက္ခေ စ။ တုလာဘူတောတိ သမကံ ဂဟိတတုလာ ဝိယ ဩနတိဥန္နတိအပနတိံ ဝဇ္ဇေတ္ဝာ မဇ္ဈတ္တဘူတော, သုခဒုက္ခဂ္ဂဟဏေနေဝ စေတ္ထ တံနိမိတ္တဘာဝတော လာဘာလာဘာပိ ဂဟိတာတိ ဝေဒိတဗ္ဗံ။ ယသေသူတိ ကိတ္တီသု။ အယသေသူတိ နိန္ဒာသု။ သဗ္ဗတ္ထာတိ သဗ္ဗေသု သုခာဒီသု လောကဓမ္မေသု။ ဣတိ ဘဂဝာ တဒာ သဗ္ဗသတ္တေသု သဗ္ဗလောကဓမ္မေသု စ အနညသာဓာရဏံ အတ္တနော မဇ္ဈတ္တဘာဝံ ကိတ္တေတ္ဝာ တေန တသ္မိံ အတ္တဘာဝေ အတ္တနော ဥပေက္ခာပာရမိယာ သိခာပ္ပတ္တဘာဝံ ဝိဘာဝေန္တော ‘‘ဧသာ မေ ဥပေက္ခာပာရမီ’’တိ ဒေသနံ နိဋ္ဌာပေသိ။
Tattha sukhadukkheti sukhe ca dukkhe ca. Tulābhūtoti samakaṃ gahitatulā viya onatiunnatiapanatiṃ vajjetvā majjhattabhūto, sukhadukkhaggahaṇeneva cettha taṃnimittabhāvato lābhālābhāpi gahitāti veditabbaṃ. Yasesūti kittīsu. Ayasesūti nindāsu. Sabbatthāti sabbesu sukhādīsu lokadhammesu. Iti bhagavā tadā sabbasattesu sabbalokadhammesu ca anaññasādhāraṇaṃ attano majjhattabhāvaṃ kittetvā tena tasmiṃ attabhāve attano upekkhāpāramiyā sikhāppattabhāvaṃ vibhāvento ‘‘esā me upekkhāpāramī’’ti desanaṃ niṭṭhāpesi.
ဣဓာပိ မဟာသတ္တသ္သ ပဌမံ ဒာနပာရမီ နာမ ဝိသေသတော သဗ္ဗဝိဘဝပရိစ္စာဂော ‘‘ယေ ကေစိ ဣမံ သရီရံ ဂဟေတ္ဝာ ယံကိဉ္စိ အတ္တနော ဣစ္ဆိတံ ကရောန္တူ’’တိ အနပေက္ခဘာဝေန အတ္တနော အတ္တဘာဝပရိစ္စာဂော စ ဒာနပာရမီ, ဟီနာဒိကသ္သ သဗ္ဗသ္သ အကတ္တဗ္ဗသ္သ အကရဏံ သီလပာရမီ, ကာမသ္သာဒဝိမုခသ္သ ဂေဟတော နိက္ခန္တသ္သ သတော ကာယေ အသုဘသညာနုဗ္ရူဟနာ နေက္ခမ္မပာရမီ, သမ္ဗောဓိသမ္ဘာရာနံ ဥပကာရဓမ္မပရိဂ္ဂဟဏေ တပ္ပဋိပက္ခပ္ပဟာနေ စ ကောသလ္လံ အဝိပရီတတော ဓမ္မသဘာဝစိန္တနာ စ ပညာပာရမီ , ကာမဝိတက္ကာဒိဝိနောဒနံ ဒုက္ခာဓိဝာသနဝီရိယဉ္စ ဝီရိယပာရမီ, သဗ္ဗာပိ အဓိဝာသနခန္တိ ခန္တိပာရမီ, ဝစီသစ္စံ သမာဒာနာဝိသံဝာဒနေန ဝိရတိသစ္စဉ္စ သစ္စပာရမီ , အနဝဇ္ဇဓမ္မေ အစလသမာဒာနာဓိဋ္ဌာနံ အဓိဋ္ဌာနပာရမီ, အနောဓိသော သဗ္ဗသတ္တေသု မေတ္တာနုဒ္ဒယဘာဝော မေတ္တာပာရမီ, ဥပေက္ခာပာရမီ ပနသ္သ ယထာဝုတ္တဝသေနေဝ ဝေဒိတဗ္ဗာတိ ဒသ ပာရမိယော လဗ္ဘန္တိ။ ဥပေက္ခာပာရမီ စေတ္ထ အတိသယဝတီတိ ကတ္ဝာ သာယေဝ ဒေသနံ အာရုဠ္ဟာ။ တထာ ဣဓ မဟာသတ္တသ္သ မဟန္တံ ဘောဂက္ခန္ဓံ မဟန္တဉ္စ ဉာတိပရိဝဋ္ဋံ ပဟာယ မဟာဘိနိက္ခမနသဒိသံ ဂေဟတော နိက္ခမနံ, တထာ နိက္ခမိတ္ဝာ လာဘသက္ကာရံ ဇိဂုစ္ဆတော ပရေသံ သမ္ဘာဝနံ ပရိဟရိတုကာမသ္သ ပဗ္ဗဇ္ဇာလိင္ဂံ အဂ္ဂဟေတ္ဝာ စိတ္တေနေဝ အနဝသေသံ ပဗ္ဗဇ္ဇာဂုဏေ အဓိဋ္ဌဟိတ္ဝာ ပရမသုခဝိဟာရော, ပရမပ္ပိစ္ဆတာ, ပဝိဝေကာဘိရတိ, ဥပေက္ခဏာဓိပ္ပာယေန အတ္တနော ကာယဇီဝိတနိရပေက္ခာ, ပရေဟိ အတ္တနော ဥပရိ ကတဝိပ္ပကာရာဓိဝာသနံ, ဥက္ကံသဂတသလ္လေခဝုတ္တိ, ဗောဓိသမ္ဘာရပဋိပက္ခာနံ ကိလေသာနံ တနုဘာဝေန ခီဏာသဝာနံ ဝိယ ပရေသံ ဥပကာရာပကာရေသု နိဗ္ဗိကာရဘာဝဟေတုဘူတေန သဗ္ဗတ္ထ မဇ္ဈတ္တဘာဝေန သမုဋ္ဌာပိတော လောကဓမ္မေဟိ အနုပလေပော, သဗ္ဗပာရမီနံ မုဒ္ဓဘူတာယ ဥပေက္ခာပာရမိယာ သိခာပ္ပတ္တီတိ ဧဝမာဒယော ဂုဏာနုဘာဝာ ဝိဘာဝေတဗ္ဗာတိ။
Idhāpi mahāsattassa paṭhamaṃ dānapāramī nāma visesato sabbavibhavapariccāgo ‘‘ye keci imaṃ sarīraṃ gahetvā yaṃkiñci attano icchitaṃ karontū’’ti anapekkhabhāvena attano attabhāvapariccāgo ca dānapāramī, hīnādikassa sabbassa akattabbassa akaraṇaṃ sīlapāramī, kāmassādavimukhassa gehato nikkhantassa sato kāye asubhasaññānubrūhanā nekkhammapāramī, sambodhisambhārānaṃ upakāradhammapariggahaṇe tappaṭipakkhappahāne ca kosallaṃ aviparītato dhammasabhāvacintanā ca paññāpāramī , kāmavitakkādivinodanaṃ dukkhādhivāsanavīriyañca vīriyapāramī, sabbāpi adhivāsanakhanti khantipāramī, vacīsaccaṃ samādānāvisaṃvādanena viratisaccañca saccapāramī , anavajjadhamme acalasamādānādhiṭṭhānaṃ adhiṭṭhānapāramī, anodhiso sabbasattesu mettānuddayabhāvo mettāpāramī, upekkhāpāramī panassa yathāvuttavaseneva veditabbāti dasa pāramiyo labbhanti. Upekkhāpāramī cettha atisayavatīti katvā sāyeva desanaṃ āruḷhā. Tathā idha mahāsattassa mahantaṃ bhogakkhandhaṃ mahantañca ñātiparivaṭṭaṃ pahāya mahābhinikkhamanasadisaṃ gehato nikkhamanaṃ, tathā nikkhamitvā lābhasakkāraṃ jigucchato paresaṃ sambhāvanaṃ pariharitukāmassa pabbajjāliṅgaṃ aggahetvā citteneva anavasesaṃ pabbajjāguṇe adhiṭṭhahitvā paramasukhavihāro, paramappicchatā, pavivekābhirati, upekkhaṇādhippāyena attano kāyajīvitanirapekkhā, parehi attano upari katavippakārādhivāsanaṃ, ukkaṃsagatasallekhavutti, bodhisambhārapaṭipakkhānaṃ kilesānaṃ tanubhāvena khīṇāsavānaṃ viya paresaṃ upakārāpakāresu nibbikārabhāvahetubhūtena sabbattha majjhattabhāvena samuṭṭhāpito lokadhammehi anupalepo, sabbapāramīnaṃ muddhabhūtāya upekkhāpāramiyā sikhāppattīti evamādayo guṇānubhāvā vibhāvetabbāti.
မဟာလောမဟံသစရိယာဝဏ္ဏနာ နိဋ္ဌိတာ။
Mahālomahaṃsacariyāvaṇṇanā niṭṭhitā.
ဥပေက္ခာပာရမီ နိဋ္ဌိတာ။
Upekkhāpāramī niṭṭhitā.
တတိယဝဂ္ဂသ္သ အတ္ထဝဏ္ဏနာ နိဋ္ဌိတာ။
Tatiyavaggassa atthavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / စရိယာပိဋကပာဠိ • Cariyāpiṭakapāḷi / ၁၅. မဟာလောမဟံသစရိယာ • 15. Mahālomahaṃsacariyā
