| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
4. மஹாமாலுக்யஸுத்தவண்ணனா
4. Mahāmālukyasuttavaṇṇanā
129. ஓரங் வுச்சதி காமதா⁴து, தத்த² பவத்தியா ஸங்வத்தனதோ ஓரங் ப⁴ஜந்தீதி ஓரம்பா⁴கி³யானி, ஹெட்டி²மமக்³க³வஜ்ஜ²தாய ஓரம்பா⁴கே³ ஹெட்டா²கொட்டா²ஸே ப⁴ஜந்தீதி ஓரம்பா⁴கி³யானி க-காரஸ்ஸ ய-காரங் கத்வா. தேனாஹ ‘‘ஹெட்டா²கொட்டா²ஸிகானீ’’திஆதி³. கம்முனா ஹி வட்டேன ச து³க்க²ங் ஸங்யோஜெந்தீதி ஸங்யோஜனானி, ஓரம்பா⁴கி³யஸஞ்ஞிதானி ஸங்யோஜனானி யஸ்ஸ அப்பஹீனானி, தஸ்ஸேவ வட்டது³க்க²ங். யஸ்ஸ பன தானி பஹீனானி, தஸ்ஸ தங் நத்தீ²தி. அப்பஹீனதாய அனுஸேதீதி அரியமக்³கே³ன அஸமுச்சி²ன்னதாய காரணலாபே⁴ ஸதி உப்பஜ்ஜதி, அப்பஹீனபா⁴வேன அனுஸேதி. அனுஸயமானோ ஸங்யோஜனங் நாம ஹோதீதி அனுஸயத்தங் ப²ரித்வா பவத்தமானோ பாபத⁴ம்மோ யதா²வுத்தேனத்தே²ன ஸங்யோஜனங் நாம ஹோதி. ஏதேன யதி³ பன அனுஸயதோ ஸங்யோஜனங் பவத்தங், ததா²பி யே தே காமராகா³த³யோ ‘‘அனுஸயா’’தி வுச்சந்தி, தேயேவ ப³ந்த⁴னட்டே²ன ஸங்யோஜனானீதி த³ஸ்ஸேதி.
129. Oraṃ vuccati kāmadhātu, tattha pavattiyā saṃvattanato oraṃ bhajantīti orambhāgiyāni, heṭṭhimamaggavajjhatāya orambhāge heṭṭhākoṭṭhāse bhajantīti orambhāgiyāni ka-kārassa ya-kāraṃ katvā. Tenāha ‘‘heṭṭhākoṭṭhāsikānī’’tiādi. Kammunā hi vaṭṭena ca dukkhaṃ saṃyojentīti saṃyojanāni, orambhāgiyasaññitāni saṃyojanāni yassa appahīnāni, tasseva vaṭṭadukkhaṃ. Yassa pana tāni pahīnāni, tassa taṃ natthīti. Appahīnatāya anusetīti ariyamaggena asamucchinnatāya kāraṇalābhe sati uppajjati, appahīnabhāvena anuseti. Anusayamāno saṃyojanaṃ nāma hotīti anusayattaṃ pharitvā pavattamāno pāpadhammo yathāvuttenatthena saṃyojanaṃ nāma hoti. Etena yadi pana anusayato saṃyojanaṃ pavattaṃ, tathāpi ye te kāmarāgādayo ‘‘anusayā’’ti vuccanti, teyeva bandhanaṭṭhena saṃyojanānīti dasseti.
ஏவங் ஸந்தேபீதி யதே³வ ஓரம்பா⁴கி³யஸங்யோஜனங் ப⁴க³வதா புச்சி²தங், ததே³வ தே²ரேனபி விஸ்ஸஜ்ஜிதங், ததா²பி அயங் லத்³தி⁴ ஸன்னிஸ்ஸயா. தத்த² தோ³ஸாரோபனாதி த³ஸ்ஸேதுங் ‘‘தஸ்ஸ வாதே³’’திஆதி³ வுத்தங். ஸமுதா³சாரக்க²ணேயேவாதி பவத்திக்க²ணே ஏவ. ந ஹி ஸப்³பே³ வத்தமானா கிலேஸா ஸங்யோஜனத்த²ங் ப²ரந்தீதி அதி⁴ப்பாயோ. தேனாதி தேன காரணேன, ததா²லத்³தி⁴கத்தாதி அத்தோ². சிந்தேஸி ‘‘த⁴ம்மங் தே³ஸெஸ்ஸாமீ’’தி யோஜனா. அத்தனோ த⁴ம்மதாயேவாதி அஜ்ஜ²த்தாஸயேனேவ. விஸங்வாதி³தாதி ஸத்து² சித்தஸ்ஸ அனாராத⁴னேன விவேசிதா. ஏவமகாஸி ஏவங் த⁴ம்மங் தே³ஸாபேஸி.
Evaṃ santepīti yadeva orambhāgiyasaṃyojanaṃ bhagavatā pucchitaṃ, tadeva therenapi vissajjitaṃ, tathāpi ayaṃ laddhi sannissayā. Tattha dosāropanāti dassetuṃ ‘‘tassa vāde’’tiādi vuttaṃ. Samudācārakkhaṇeyevāti pavattikkhaṇe eva. Na hi sabbe vattamānā kilesā saṃyojanatthaṃ pharantīti adhippāyo. Tenāti tena kāraṇena, tathāladdhikattāti attho. Cintesi ‘‘dhammaṃ desessāmī’’ti yojanā. Attano dhammatāyevāti ajjhattāsayeneva. Visaṃvāditāti satthu cittassa anārādhanena vivecitā. Evamakāsi evaṃ dhammaṃ desāpesi.
130. ஸக்காயதி³ட்டி²பரியுட்டி²தேனாதி பரியுட்டா²னஸமத்த²ஸக்காயதி³ட்டி²கேன. ததா²பூ⁴தஞ்ச சித்தங் தாய தி³ட்டி²யா விக³ய்ஹிதங் அஜ்ஜொ²த்த²டஞ்ச நாம ஹோதீதி ஆஹ ‘‘க³ஹிதேன அபி⁴பூ⁴தேனா’’தி. தி³ட்டி²னிஸ்ஸரணங் நாம த³ஸ்ஸனமக்³கோ³ தேன ஸமுச்சி²ந்தி³தப்³ப³தோ, ஸோ பன நிப்³பா³னங் ஆக³ம்ம தங் ஸமுச்சி²ந்த³தி, தஸ்மா வுத்தங் ‘‘தி³ட்டி²னிஸ்ஸரணங் நிப்³பா³ன’’ந்தி. அவினோதி³தா அனீஹடாதி பத³த்³வயேனபி ஸமுச்சே²த³வஸேன அப்பஹீனத்தங்யேவ வத³தி. அஞ்ஞங் ஸங்யோஜனங் அஞ்ஞோ அனுஸயோதி வத³ந்தி, ஸஹபா⁴வோ நாம அஞ்ஞேன ஹோதி. ந ஹி ததே³வ தேன ஸஹாதி வுச்சதீதி தேஸங் அதி⁴ப்பாயோ. அஞ்ஞேனாதி அத்த²தோ அஞ்ஞேன. அவத்தா²மத்ததோ யதி³பி அவயவவினிமுத்தோ ஸமுதா³யோ நத்தி², அவயவோ பன ஸமுதா³யோ ந ஹோதீதி ஸோ ஸமுதா³யதோ அஞ்ஞோ ஏவாதி ஸக்கா வத்துந்தி யதா²வுத்தஸ்ஸ பரிஹாரஸ்ஸ அப்பாடிஹீரகதங் ஆஸங்கித்வா பக்க²ந்தரங் ஆஸல்லிதங் ‘‘அதா²பி ஸியா’’திஆதி³னா. பக்க²ந்தரேஹி பரிஹாரா ஹொந்தீதி யதா²வுத்தஞாயேனபி அஞ்ஞோ புரிஸோ அதா²பி ஸியா, அயங் பனெத்த² அஞ்ஞோ தோ³ஸோதி ஆஹ ‘‘யதி³ ததே³வா’’திஆதி³. அதா²பி ஸியா துய்ஹங் யதி³ பரிவிதக்கோ ஈதி³ஸோ யதி³ ததே³வ ஸங்யோஜனந்திஆதி³. இமமத்த²ங் ஸந்தா⁴யாதி பரமத்த²தோ ஸோ ஏவ கிலேஸோ ஸங்யோஜனமனுஸயோ ச, ப³ந்த⁴னத்த²அப்பஹீனத்தா²னங் பன அத்தே²வ பே⁴தோ³தி இமமத்த²ங் ஸந்தா⁴ய.
130.Sakkāyadiṭṭhipariyuṭṭhitenāti pariyuṭṭhānasamatthasakkāyadiṭṭhikena. Tathābhūtañca cittaṃ tāya diṭṭhiyā vigayhitaṃ ajjhotthaṭañca nāma hotīti āha ‘‘gahitena abhibhūtenā’’ti. Diṭṭhinissaraṇaṃ nāma dassanamaggo tena samucchinditabbato, so pana nibbānaṃ āgamma taṃ samucchindati, tasmā vuttaṃ ‘‘diṭṭhinissaraṇaṃ nibbāna’’nti. Avinoditā anīhaṭāti padadvayenapi samucchedavasena appahīnattaṃyeva vadati. Aññaṃ saṃyojanaṃ añño anusayoti vadanti, sahabhāvo nāma aññena hoti. Na hi tadeva tena sahāti vuccatīti tesaṃ adhippāyo. Aññenāti atthato aññena. Avatthāmattato yadipi avayavavinimutto samudāyo natthi, avayavo pana samudāyo na hotīti so samudāyato añño evāti sakkā vattunti yathāvuttassa parihārassa appāṭihīrakataṃ āsaṅkitvā pakkhantaraṃ āsallitaṃ ‘‘athāpi siyā’’tiādinā. Pakkhantarehi parihārā hontīti yathāvuttañāyenapi añño puriso athāpi siyā, ayaṃ panettha añño dosoti āha ‘‘yadi tadevā’’tiādi. Athāpi siyā tuyhaṃ yadi parivitakko īdiso yadi tadeva saṃyojanantiādi. Imamatthaṃ sandhāyāti paramatthato so eva kileso saṃyojanamanusayo ca, bandhanatthaappahīnatthānaṃ pana attheva bhedoti imamatthaṃ sandhāya.
132. தசச்சே²தோ³ விய ஸமாபத்தி கிலேஸானங் ஸமாபத்திவிக்க²ம்ப⁴னஸ்ஸ ஸாரச்சே²த³ஸ்ஸ அனுஸயஸ்ஸ தூ³ரபா⁴வதோ. பெ²க்³கு³ச்சே²தோ³ விய விபஸ்ஸனா தஸ்ஸ ஆஸன்னபா⁴வதோ. ஏவரூபா புக்³க³லாதி அபா⁴விதஸத்³தா⁴தி³ப³லதாய து³ப்³ப³லனாமகாயா புக்³க³லா, யேஸங் ஸக்காயனிரோதா⁴ய…பே॰… நாதி⁴முச்சதி. ஏவங் த³ட்ட²ப்³பா³தி யதா² ஸோ து³ப்³ப³லகோ புரிஸோ, ஏவங் த³ட்ட²ப்³போ³ ஸோ புரிஸோ க³ங்கா³பாரங் விய ஸக்காயபாரங் க³ந்துங் அஸமத்த²த்தா. வுத்தவிபரியாயேன ஸுக்கபக்க²ஸ்ஸ அத்தோ² வேதி³தப்³போ³.
132.Tacacchedo viya samāpatti kilesānaṃ samāpattivikkhambhanassa sāracchedassa anusayassa dūrabhāvato. Pheggucchedo viya vipassanā tassa āsannabhāvato. Evarūpā puggalāti abhāvitasaddhādibalatāya dubbalanāmakāyā puggalā, yesaṃ sakkāyanirodhāya…pe… nādhimuccati. Evaṃ daṭṭhabbāti yathā so dubbalako puriso, evaṃ daṭṭhabbo so puriso gaṅgāpāraṃ viya sakkāyapāraṃ gantuṃ asamatthattā. Vuttavipariyāyena sukkapakkhassa attho veditabbo.
133. உபதி⁴விவேகேனாதி இமினா உபதி⁴விவேகாதி கரணே நிஸ்ஸக்கனந்தி த³ஸ்ஸேதி, உபதி⁴விவேகாதி வா ஹேதும்ஹி நிஸ்ஸக்கவசனஸ்ஸ உபதி⁴விவேகேனாதி ஹேதும்ஹி கரணவசனேன பஞ்சகாமகு³ணவிவேகோ கதி²தோ. காமகு³ணாபி ஹி உபதீ⁴யதி எத்த² து³க்க²ந்தி உபதீ⁴தி வுச்சந்தீதி. தி²னமித்³த⁴பச்சயா காயவிஜம்பி⁴தாதி³பே⁴த³ங் காயாலஸியங். தத்தா²தி அந்தோஸமாபத்தியங் ஸமாபத்திஅப்³ப⁴ந்தரே ஜாதங். தங் பன ஸமாபத்திபரியாபன்னம்பி அபரியாபன்னம்பீதி தது³ப⁴யங் த³ஸ்ஸேதுங் ‘‘அந்தோஸமாபத்திக்க²ணேயேவா’’திஆதி³ வுத்தங். ரூபாத³யோ த⁴ம்மேதி ரூபவேத³னாதி³கே பஞ்சக்க²ந்த⁴த⁴ம்மே. ந நிச்சதோதி இமினா நிச்சபடிக்கே²பதோ தேஸங் அனிச்சதமாஹ. ததோ ஏவ உத³யவயந்ததோ விபரிணாமதோ தாவகாலிகதோ ச தே அனிச்சாதி ஜோதிதங் ஹோதி. யஞ்ஹி நிச்சங் ந ஹோதி, தங் உத³யப்³ப³யபரிச்சி²ன்னங் ஜராய மரணேன சாதி த்³வேதா⁴ விபரிணதங் இத்தரக²ணமேவ ச ஹோதி. ந ஸுக²தோதி இமினா ஸுக²படிக்கே²பதோ தேஸங் து³க்க²தமாஹ, அதோ ஏவ அபி⁴ண்ஹங் படிபீளனதோ து³க்க²வத்து²தோ ச தே து³க்கா²தி ஜோதிதங் ஹோதி. உத³யப்³ப³யவந்ததாய ஹி தே அபி⁴ண்ஹங் படிபீளனதோ நிரந்தரது³க்க²தாய து³க்க²ஸ்ஸேவ ச அதி⁴ட்டா²னபூ⁴தாதி. பச்சயயாபனீயதாய ரோக³மூலதாய ச ரோக³தோ. து³க்க²தாஸூலயோகி³தாய கிலேஸாஸுசிபக்³க⁴ரணதோ உப்பாத³ஜராப⁴ங்கே³ஹி உத்³து⁴மாதபக்கபி⁴ஜ்ஜனதோ ச க³ண்ட³தோ. பீளாஜனநதோ அந்தோதுத³னதோ து³ன்னீஹரணதோ ச அவத்³தி⁴ஆவஹதோ அக⁴வத்து²தோ ச அஸேரீபா⁴வதோ ஆபா³த⁴பத³ட்டா²னதாய ச ஆபா³த⁴தோ. அவஸவத்தனதோ அவிதெ⁴ய்யதாய பரதோ . ப்³யாதி⁴ஜராமரணேஹி பலுஜ்ஜனீயதாய பலோகதோ. ஸாமீனிவாஸீகாரகவேத³கஅதி⁴ட்டா²யகவிரஹதோ ஸுஞ்ஞதோ. அத்தபடிக்கே²பட்டே²ன அனத்ததோ, ரூபாதி³த⁴ம்மாபி ந எத்த² அத்தா ஹொந்தீதி அனத்தா, ஏவங் அயம்பி ந அத்தா ஹோதீதி அனத்தா. தேன அப்³யாபாரதோ நிரீஹதோ துச்ச²தோ அனத்தாதி தீ³பிதங் ஹோதி. லக்க²ணத்தயமேவ அவபோ³த⁴த்த²ங் ஏகாத³ஸஹி பதே³ஹி விப⁴ஜித்வா க³ஹிதந்தி த³ஸ்ஸேதுங் ‘‘தத்தா²’’திஆதி³ வுத்தங்.
133.Upadhivivekenāti iminā upadhivivekāti karaṇe nissakkananti dasseti, upadhivivekāti vā hetumhi nissakkavacanassa upadhivivekenāti hetumhi karaṇavacanena pañcakāmaguṇaviveko kathito. Kāmaguṇāpi hi upadhīyati ettha dukkhanti upadhīti vuccantīti. Thinamiddhapaccayā kāyavijambhitādibhedaṃ kāyālasiyaṃ. Tatthāti antosamāpattiyaṃ samāpattiabbhantare jātaṃ. Taṃ pana samāpattipariyāpannampi apariyāpannampīti tadubhayaṃ dassetuṃ ‘‘antosamāpattikkhaṇeyevā’’tiādi vuttaṃ. Rūpādayo dhammeti rūpavedanādike pañcakkhandhadhamme. Na niccatoti iminā niccapaṭikkhepato tesaṃ aniccatamāha. Tato eva udayavayantato vipariṇāmato tāvakālikato ca te aniccāti jotitaṃ hoti. Yañhi niccaṃ na hoti, taṃ udayabbayaparicchinnaṃ jarāya maraṇena cāti dvedhā vipariṇataṃ ittarakhaṇameva ca hoti. Na sukhatoti iminā sukhapaṭikkhepato tesaṃ dukkhatamāha, ato eva abhiṇhaṃ paṭipīḷanato dukkhavatthuto ca te dukkhāti jotitaṃ hoti. Udayabbayavantatāya hi te abhiṇhaṃ paṭipīḷanato nirantaradukkhatāya dukkhasseva ca adhiṭṭhānabhūtāti. Paccayayāpanīyatāya rogamūlatāya ca rogato. Dukkhatāsūlayogitāya kilesāsucipaggharaṇato uppādajarābhaṅgehi uddhumātapakkabhijjanato ca gaṇḍato. Pīḷājananato antotudanato dunnīharaṇato ca avaddhiāvahato aghavatthuto ca aserībhāvato ābādhapadaṭṭhānatāya ca ābādhato. Avasavattanato avidheyyatāya parato. Byādhijarāmaraṇehi palujjanīyatāya palokato. Sāmīnivāsīkārakavedakaadhiṭṭhāyakavirahato suññato. Attapaṭikkhepaṭṭhena anattato, rūpādidhammāpi na ettha attā hontīti anattā, evaṃ ayampi na attā hotīti anattā. Tena abyāpārato nirīhato tucchato anattāti dīpitaṃ hoti. Lakkhaṇattayameva avabodhatthaṃ ekādasahi padehi vibhajitvā gahitanti dassetuṃ ‘‘tatthā’’tiādi vuttaṃ.
அந்தோஸமாபத்தியந்தி ஸமாபத்தீனங் ஸஹஜாததாய ஸமாபத்தீனங் அப்³ப⁴ந்தரே. சித்தங் படிஸங்ஹரதீதி தப்படிப³த்³த⁴ச²ந்த³ராகா³தி³உபக்கிலேஸவிக்க²ம்ப⁴னேன விபஸ்ஸனாசித்தங் படிஸங்ஹரதி. தேனாஹ ‘‘மோசேதீ’’தி. ஸவனவஸேனாதி ‘‘ஸப்³ப³ஸங்கா²ரஸமதோ²’’திஆதி³னா ஸவனவஸேன. து²திவஸேனாதி ததே²வ தோ²மனாவஸேன கு³ணதோ ஸங்கித்தனவஸேன. பரியத்திவஸேனாதி தஸ்ஸ த⁴ம்மஸ்ஸ பரியாபுணனவஸேன. பஞ்ஞத்திவஸேனாதி தத³த்த²ஸ்ஸ பஞ்ஞாபனவஸேன. ஆரம்மணகரணவஸேனேவ உபஸங்ஹரதி மக்³க³சித்தங். ஏதங் ஸந்தந்திஆதி³ பன அவதா⁴ரணனிவத்திதத்த²த³ஸ்ஸனங். யதா² விபஸ்ஸனா ‘‘ஏதங் ஸந்தங் ஏதங் பணீத’’ந்திஆதி³னா அஸங்க²தாய தா⁴துயா சித்தங் உபஸங்ஹரதி, ஏவங் மக்³கோ³ நிப்³பா³னங் ஸச்சி²கிரியாபி⁴ஸமயவஸேன அபி⁴ஸமெந்தோ தத்த² லப்³ப⁴மானே ஸப்³பே³ விஸேஸே அஸம்மோஹதோ படிவிஜானந்தோ தத்த² சித்தங் உபஸங்ஹரதி. தேனாஹ ‘‘இமினா பன ஆகாரேனா’’திஆதி³. ஸோ தத்த² டி²தோதி ஸோ அத³ந்த⁴விபஸ்ஸனோ யோகீ³ தத்த² தாய அனிச்சாதி³லக்க²ணத்தயாரம்மணாய விபஸ்ஸனாய டி²தோ. ஸப்³ப³ஸோதி தஸ்ஸ மக்³க³ஸ்ஸ அதி⁴க³மாய நிப்³ப³த்திதஸமத²விபஸ்ஸனாஸு. அஸக்கொந்தோ அனாகா³மீ ஹோதீதி ஹெட்டி²மமக்³க³வஹாஸு ஏவ ஸமத²விபஸ்ஸனாஸு ச²ந்த³ராக³ங் பஹாய அக்³க³மக்³க³வஹாஸு தாஸு நிகந்திங் பரியாதா³துங் அஸக்கொந்தோ அனாகா³மிதாயமேவ ஸண்டா²தி.
Antosamāpattiyanti samāpattīnaṃ sahajātatāya samāpattīnaṃ abbhantare. Cittaṃ paṭisaṃharatīti tappaṭibaddhachandarāgādiupakkilesavikkhambhanena vipassanācittaṃ paṭisaṃharati. Tenāha ‘‘mocetī’’ti. Savanavasenāti ‘‘sabbasaṅkhārasamatho’’tiādinā savanavasena. Thutivasenāti tatheva thomanāvasena guṇato saṃkittanavasena. Pariyattivasenāti tassa dhammassa pariyāpuṇanavasena. Paññattivasenāti tadatthassa paññāpanavasena. Ārammaṇakaraṇavaseneva upasaṃharati maggacittaṃ. Etaṃ santantiādi pana avadhāraṇanivattitatthadassanaṃ. Yathā vipassanā ‘‘etaṃ santaṃ etaṃ paṇīta’’ntiādinā asaṅkhatāya dhātuyā cittaṃ upasaṃharati, evaṃ maggo nibbānaṃ sacchikiriyābhisamayavasena abhisamento tattha labbhamāne sabbe visese asammohato paṭivijānanto tattha cittaṃ upasaṃharati. Tenāha ‘‘iminā pana ākārenā’’tiādi. So tattha ṭhitoti so adandhavipassano yogī tattha tāya aniccādilakkhaṇattayārammaṇāya vipassanāya ṭhito. Sabbasoti tassa maggassa adhigamāya nibbattitasamathavipassanāsu. Asakkonto anāgāmī hotīti heṭṭhimamaggavahāsu eva samathavipassanāsu chandarāgaṃ pahāya aggamaggavahāsu tāsu nikantiṃ pariyādātuṃ asakkonto anāgāmitāyameva saṇṭhāti.
ஸமதிக்கந்தத்தாதி ஸமத²வஸேன விபஸ்ஸனாவஸேன சாதி ஸப்³ப³தா²பி ரூபஸ்ஸ அதிக்கந்தத்தா. தேனாஹ ‘‘அயஞ்ஹீ’’திஆதி³. அனேனாதி யோகி³னா. தங் அதிக்கம்மாதி இத³ங் யோ வா பட²மங் பஞ்சவோகாரப⁴வபரியாபன்னே த⁴ம்மே ஸம்மதே³வ ஸம்மஸித்வா தே விவஜ்ஜெத்வா ததோ அரூபஸமாபத்திங் ஸமாபஜ்ஜித்வா அரூபத⁴ம்மே ஸம்மஸதி, தங் ஸந்தா⁴ய வுத்தங். தேனாஹ ‘‘இதா³னி அரூபங் ஸம்மஸதீ’’தி.
Samatikkantattāti samathavasena vipassanāvasena cāti sabbathāpi rūpassa atikkantattā. Tenāha ‘‘ayañhī’’tiādi. Anenāti yoginā. Taṃ atikkammāti idaṃ yo vā paṭhamaṃ pañcavokārabhavapariyāpanne dhamme sammadeva sammasitvā te vivajjetvā tato arūpasamāpattiṃ samāpajjitvā arūpadhamme sammasati, taṃ sandhāya vuttaṃ. Tenāha ‘‘idāni arūpaṃ sammasatī’’ti.
ஸமத²வஸேன க³ச்ச²தோதி ஸமத²ப்பதா⁴னங் புப்³ப³பா⁴க³படிபத³ங் அனுயுஞ்ஜந்தஸ்ஸ. சித்தேகக்³க³தா து⁴ரங் ஹோதீதி தஸ்ஸ விபஸ்ஸனாபா⁴வனாய ததா² புப்³பே³ பவத்தத்தா வுட்டா²னகா³மினிவிபஸ்ஸனா ஸமாதி⁴ப்பதா⁴னா ஹோதி, மக்³கே³பி சித்தேகக்³க³தா து⁴ரங் ஹோதி, ஸமாதி⁴ந்த்³ரியங் புப்³ப³ங்க³மங் ப³லவங் ஹோதி. ஸோ சேதோவிமுத்தோ நாமாதி ஸோ அரியோ சேதோவிமுத்தோ நாம ஹோதி. விபஸ்ஸனாவஸேன க³ச்ச²தோதி ‘‘ஸமத²வஸேன க³ச்ச²தோ’’தி எத்த² வுத்தனயானுஸாரேன அத்தோ² வேதி³தப்³போ³. அயஞ்ச புக்³க³லவிபா⁴கோ³ ஸுத்தந்தனயேன இதா⁴பி⁴ஹிதோ பரியாயோ நாம, அபி⁴த⁴ம்மனயேன பரதோ கீடாகி³ரிஸுத்தவண்ணனாயங் த³ஸ்ஸயிஸ்ஸாம. அயங் ஸபா⁴வத⁴ம்மோயேவாதி புப்³ப³பா⁴க³படிபதா³ ஸமத²ப்பதா⁴னா சே ஸமாதி⁴ து⁴ரங், விபஸ்ஸனாபதா⁴னா சே பஞ்ஞா து⁴ரந்தி அயங் த⁴ம்மஸபா⁴வோயேவ, எத்த² கிஞ்சி ந ஆஸங்கிதப்³ப³ங்.
Samathavasenagacchatoti samathappadhānaṃ pubbabhāgapaṭipadaṃ anuyuñjantassa. Cittekaggatā dhuraṃ hotīti tassa vipassanābhāvanāya tathā pubbe pavattattā vuṭṭhānagāminivipassanā samādhippadhānā hoti, maggepi cittekaggatā dhuraṃ hoti, samādhindriyaṃ pubbaṅgamaṃ balavaṃ hoti. So cetovimutto nāmāti so ariyo cetovimutto nāma hoti. Vipassanāvasena gacchatoti ‘‘samathavasena gacchato’’ti ettha vuttanayānusārena attho veditabbo. Ayañca puggalavibhāgo suttantanayena idhābhihito pariyāyo nāma, abhidhammanayena parato kīṭāgirisuttavaṇṇanāyaṃ dassayissāma. Ayaṃ sabhāvadhammoyevāti pubbabhāgapaṭipadā samathappadhānā ce samādhi dhuraṃ, vipassanāpadhānā ce paññā dhuranti ayaṃ dhammasabhāvoyeva, ettha kiñci na āsaṅkitabbaṃ.
இந்த்³ரியபரோபரியத்தங் இந்த்³ரியவேமத்ததா. தேனாஹ ‘‘இந்த்³ரியனானத்தங் வதா³மீ’’தி. இந்த்³ரியனானத்ததா காரணந்தி இத³ங் த³ஸ்ஸேதி – அனிச்சாதி³வஸேன விபஸ்ஸனாபி⁴னிவேஸோ விய ஸமத²வஸேன விபஸ்ஸனாவஸேன ச யங் புப்³ப³பா⁴க³க³மனங், தங் அப்பமாணங் தங் வுட்டா²னகா³மினிவிபஸ்ஸனங், யஸ்ஸ ஸமாதி⁴ து⁴ரங் புப்³ப³ங்க³மங் ப³லவங் ஹோதி, ஸோ அரியோ சேதோவிமுத்தி நாம ஹோதி. யஸ்ஸ பஞ்ஞா து⁴ரங் புப்³ப³ங்க³மங் ப³லவங் ஹோதி ஸோ அரியோ பஞ்ஞாவிமுத்தோ நாம ஹோதி. இதா³னி தமத்த²ங் பு³த்³தி⁴விஸிட்டே²ன நித³ஸ்ஸனேன த³ஸ்ஸெந்தோ ‘‘த்³வே அக்³க³ஸாவகா’’திஆதி³மாஹ, தங் ஸுவிஞ்ஞெய்யமேவ.
Indriyaparopariyattaṃ indriyavemattatā. Tenāha ‘‘indriyanānattaṃ vadāmī’’ti. Indriyanānattatā kāraṇanti idaṃ dasseti – aniccādivasena vipassanābhiniveso viya samathavasena vipassanāvasena ca yaṃ pubbabhāgagamanaṃ, taṃ appamāṇaṃ taṃ vuṭṭhānagāminivipassanaṃ, yassa samādhi dhuraṃ pubbaṅgamaṃ balavaṃ hoti, so ariyo cetovimutti nāma hoti. Yassa paññā dhuraṃ pubbaṅgamaṃ balavaṃ hoti so ariyo paññāvimutto nāma hoti. Idāni tamatthaṃ buddhivisiṭṭhena nidassanena dassento ‘‘dve aggasāvakā’’tiādimāha, taṃ suviññeyyameva.
மஹாமாலுக்யஸுத்தவண்ணனாய லீனத்த²ப்பகாஸனா ஸமத்தா.
Mahāmālukyasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. மஹாமாலுக்யஸுத்தங் • 4. Mahāmālukyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 4. மஹாமாலுக்யஸுத்தவண்ணனா • 4. Mahāmālukyasuttavaṇṇanā
