| Library / Tipiṭaka / ติปิฎก • Tipiṭaka / ชาตกปาฬิ • Jātakapāḷi |
๔๕๓. มหามงฺคลชาตกํ (๑๕)
453. Mahāmaṅgalajātakaṃ (15)
๑๕๕.
155.
กิํสุ นโร ชปฺปมธิจฺจกาเล, กํ วา วิชฺชํ กตมํ วา สุตานํ;
Kiṃsu naro jappamadhiccakāle, kaṃ vā vijjaṃ katamaṃ vā sutānaṃ;
โส มโจฺจ อสฺมิญฺจ 1 ปรมฺหิ โลเก, กถํ กโร โสตฺถาเนน คุโตฺตฯ
So macco asmiñca 2 paramhi loke, kathaṃ karo sotthānena gutto.
๑๕๖.
156.
ยสฺส เทวา ปิตโร จ สเพฺพ, สรีสปา 3 สพฺพภูตานิ จาปิ;
Yassa devā pitaro ca sabbe, sarīsapā 4 sabbabhūtāni cāpi;
เมตฺตาย นิจฺจํ อปจิตานิ โหนฺติ, ภูเตสุ เว โสตฺถานํ ตทาหุฯ
Mettāya niccaṃ apacitāni honti, bhūtesu ve sotthānaṃ tadāhu.
๑๕๗.
157.
โย สพฺพโลกสฺส นิวาตวุตฺติ, อิตฺถีปุมานํ สหทารกานํ;
Yo sabbalokassa nivātavutti, itthīpumānaṃ sahadārakānaṃ;
ขนฺตา ทุรุตฺตานมปฺปฎิกูลวาที, อธิวาสนํ โสตฺถานํ ตทาหุฯ
Khantā duruttānamappaṭikūlavādī, adhivāsanaṃ sotthānaṃ tadāhu.
๑๕๘.
158.
โย นาวชานาติ สหายมิเตฺต 5, สิเปฺปน กุลฺยาหิ ธเนน ชจฺจา;
Yo nāvajānāti sahāyamitte 6, sippena kulyāhi dhanena jaccā;
รุจิปโญฺญ อตฺถกาเล มตีมา 7, สหาเยสุ เว โสตฺถานํ ตทาหุฯ
Rucipañño atthakāle matīmā 8, sahāyesu ve sotthānaṃ tadāhu.
๑๕๙.
159.
มิตฺตานิ เว ยสฺส ภวนฺติ สโนฺต, สํวิสฺสตฺถา อวิสํวาทกสฺส;
Mittāni ve yassa bhavanti santo, saṃvissatthā avisaṃvādakassa;
น มิตฺตทุพฺภี สํวิภาคี ธเนน, มิเตฺตสุ เว โสตฺถานํ ตทาหุฯ
Na mittadubbhī saṃvibhāgī dhanena, mittesu ve sotthānaṃ tadāhu.
๑๖๐.
160.
ยสฺส ภริยา ตุลฺยวยา สมคฺคา, อนุพฺพตา ธมฺมกามา ปชาตา 9;
Yassa bhariyā tulyavayā samaggā, anubbatā dhammakāmā pajātā 10;
โกลินิยา สีลวตี ปติพฺพตา, ทาเรสุ เว โสตฺถานํ ตทาหุฯ
Koliniyā sīlavatī patibbatā, dāresu ve sotthānaṃ tadāhu.
๑๖๑.
161.
ยสฺส ราชา ภูตปติ 11 ยสสฺสี, ชานาติ โสเจยฺยํ ปรกฺกมญฺจ;
Yassa rājā bhūtapati 12 yasassī, jānāti soceyyaṃ parakkamañca;
อเทฺวชฺฌตา สุหทยํ มมนฺติ, ราชูสุ เว โสตฺถานํ ตทาหุฯ
Advejjhatā suhadayaṃ mamanti, rājūsu ve sotthānaṃ tadāhu.
๑๖๒.
162.
อนฺนญฺจ ปานญฺจ ททาติ สโทฺธ, มาลญฺจ คนฺธญฺจ วิเลปนญฺจ;
Annañca pānañca dadāti saddho, mālañca gandhañca vilepanañca;
ปสนฺนจิโตฺต อนุโมทมาโน, สเคฺคสุ เว โสตฺถานํ ตทาหุฯ
Pasannacitto anumodamāno, saggesu ve sotthānaṃ tadāhu.
๑๖๓.
163.
ยมริยธเมฺมน ปุนนฺติ วุทฺธา, อาราธิตา สมจริยาย สโนฺต;
Yamariyadhammena punanti vuddhā, ārādhitā samacariyāya santo;
พหุสฺสุตา อิสโย สีลวโนฺต, อรหนฺตมเชฺฌ โสตฺถานํ ตทาหุฯ
Bahussutā isayo sīlavanto, arahantamajjhe sotthānaṃ tadāhu.
๑๖๔.
164.
เอตานิ โข โสตฺถานานิ โลเก, วิญฺญุปฺปสตฺถานิ สุขุทฺรยานิ 13;
Etāni kho sotthānāni loke, viññuppasatthāni sukhudrayāni 14;
ตานีธ เสเวถ นโร สปโญฺญ, น หิ มงฺคเล กิญฺจนมตฺถิ สจฺจนฺติฯ
Tānīdha sevetha naro sapañño, na hi maṅgale kiñcanamatthi saccanti.
มหามงฺคลชาตกํ ปนฺนรสมํฯ
Mahāmaṅgalajātakaṃ pannarasamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ชาตก-อฎฺฐกถา • Jātaka-aṭṭhakathā / [๔๕๓] ๑๕. มหามงฺคลชาตกวณฺณนา • [453] 15. Mahāmaṅgalajātakavaṇṇanā
