| Library / Tipiṭaka / តិបិដក • Tipiṭaka / ជាតកបាឡិ • Jātakapāḷi |
៤៥៣. មហាមង្គលជាតកំ (១៥)
453. Mahāmaṅgalajātakaṃ (15)
១៥៥.
155.
កិំសុ នរោ ជប្បមធិច្ចកាលេ, កំ វា វិជ្ជំ កតមំ វា សុតានំ;
Kiṃsu naro jappamadhiccakāle, kaṃ vā vijjaṃ katamaṃ vā sutānaṃ;
សោ មច្ចោ អស្មិញ្ច 1 បរម្ហិ លោកេ, កថំ ករោ សោត្ថានេន គុត្តោ។
So macco asmiñca 2 paramhi loke, kathaṃ karo sotthānena gutto.
១៥៦.
156.
យស្ស ទេវា បិតរោ ច សព្ពេ, សរីសបា 3 សព្ពភូតានិ ចាបិ;
Yassa devā pitaro ca sabbe, sarīsapā 4 sabbabhūtāni cāpi;
មេត្តាយ និច្ចំ អបចិតានិ ហោន្តិ, ភូតេសុ វេ សោត្ថានំ តទាហុ។
Mettāya niccaṃ apacitāni honti, bhūtesu ve sotthānaṃ tadāhu.
១៥៧.
157.
យោ សព្ពលោកស្ស និវាតវុត្តិ, ឥត្ថីបុមានំ សហទារកានំ;
Yo sabbalokassa nivātavutti, itthīpumānaṃ sahadārakānaṃ;
ខន្តា ទុរុត្តានមប្បដិកូលវាទី, អធិវាសនំ សោត្ថានំ តទាហុ។
Khantā duruttānamappaṭikūlavādī, adhivāsanaṃ sotthānaṃ tadāhu.
១៥៨.
158.
យោ នាវជានាតិ សហាយមិត្តេ 5, សិប្បេន កុល្យាហិ ធនេន ជច្ចា;
Yo nāvajānāti sahāyamitte 6, sippena kulyāhi dhanena jaccā;
រុចិបញ្ញោ អត្ថកាលេ មតីមា 7, សហាយេសុ វេ សោត្ថានំ តទាហុ។
Rucipañño atthakāle matīmā 8, sahāyesu ve sotthānaṃ tadāhu.
១៥៩.
159.
មិត្តានិ វេ យស្ស ភវន្តិ សន្តោ, សំវិស្សត្ថា អវិសំវាទកស្ស;
Mittāni ve yassa bhavanti santo, saṃvissatthā avisaṃvādakassa;
ន មិត្តទុព្ភី សំវិភាគី ធនេន, មិត្តេសុ វេ សោត្ថានំ តទាហុ។
Na mittadubbhī saṃvibhāgī dhanena, mittesu ve sotthānaṃ tadāhu.
១៦០.
160.
យស្ស ភរិយា តុល្យវយា សមគ្គា, អនុព្ពតា ធម្មកាមា បជាតា 9;
Yassa bhariyā tulyavayā samaggā, anubbatā dhammakāmā pajātā 10;
កោលិនិយា សីលវតី បតិព្ពតា, ទារេសុ វេ សោត្ថានំ តទាហុ។
Koliniyā sīlavatī patibbatā, dāresu ve sotthānaṃ tadāhu.
១៦១.
161.
យស្ស រាជា ភូតបតិ 11 យសស្សី, ជានាតិ សោចេយ្យំ បរក្កមញ្ច;
Yassa rājā bhūtapati 12 yasassī, jānāti soceyyaṃ parakkamañca;
អទ្វេជ្ឈតា សុហទយំ មមន្តិ, រាជូសុ វេ សោត្ថានំ តទាហុ។
Advejjhatā suhadayaṃ mamanti, rājūsu ve sotthānaṃ tadāhu.
១៦២.
162.
អន្នញ្ច បានញ្ច ទទាតិ សទ្ធោ, មាលញ្ច គន្ធញ្ច វិលេបនញ្ច;
Annañca pānañca dadāti saddho, mālañca gandhañca vilepanañca;
បសន្នចិត្តោ អនុមោទមានោ, សគ្គេសុ វេ សោត្ថានំ តទាហុ។
Pasannacitto anumodamāno, saggesu ve sotthānaṃ tadāhu.
១៦៣.
163.
យមរិយធម្មេន បុនន្តិ វុទ្ធា, អារាធិតា សមចរិយាយ សន្តោ;
Yamariyadhammena punanti vuddhā, ārādhitā samacariyāya santo;
ពហុស្សុតា ឥសយោ សីលវន្តោ, អរហន្តមជ្ឈេ សោត្ថានំ តទាហុ។
Bahussutā isayo sīlavanto, arahantamajjhe sotthānaṃ tadāhu.
១៦៤.
164.
ឯតានិ ខោ សោត្ថានានិ លោកេ, វិញ្ញុប្បសត្ថានិ សុខុទ្រយានិ 13;
Etāni kho sotthānāni loke, viññuppasatthāni sukhudrayāni 14;
តានីធ សេវេថ នរោ សបញ្ញោ, ន ហិ មង្គលេ កិញ្ចនមត្ថិ សច្ចន្តិ។
Tānīdha sevetha naro sapañño, na hi maṅgale kiñcanamatthi saccanti.
មហាមង្គលជាតកំ បន្នរសមំ។
Mahāmaṅgalajātakaṃ pannarasamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៤៥៣] ១៥. មហាមង្គលជាតកវណ្ណនា • [453] 15. Mahāmaṅgalajātakavaṇṇanā
