| Library / Tipiṭaka / තිපිටක • Tipiṭaka / ජාතකපාළි • Jātakapāḷi |
453. මහාමඞ්‌ගලජාතකං (15)
453. Mahāmaṅgalajātakaṃ (15)
155.
155.
කිංසු නරො ජප්‌පමධිච්‌චකාලෙ, කං වා විජ්‌ජං කතමං වා සුතානං;
Kiṃsu naro jappamadhiccakāle, kaṃ vā vijjaṃ katamaṃ vā sutānaṃ;
සො මච්‌චො අස්‌මිඤ්‌ච 1 පරම්‌හි ලොකෙ, කථං කරො සොත්‌ථානෙන ගුත්‌තො.
So macco asmiñca 2 paramhi loke, kathaṃ karo sotthānena gutto.
156.
156.
යස්‌ස දෙවා පිතරො ච සබ්‌බෙ, සරීසපා 3 සබ්‌බභූතානි චාපි;
Yassa devā pitaro ca sabbe, sarīsapā 4 sabbabhūtāni cāpi;
මෙත්‌තාය නිච්‌චං අපචිතානි හොන්‌ති, භූතෙසු වෙ සොත්‌ථානං තදාහු.
Mettāya niccaṃ apacitāni honti, bhūtesu ve sotthānaṃ tadāhu.
157.
157.
යො සබ්‌බලොකස්‌ස නිවාතවුත්‌ති, ඉත්‌ථීපුමානං සහදාරකානං;
Yo sabbalokassa nivātavutti, itthīpumānaṃ sahadārakānaṃ;
ඛන්‌තා දුරුත්‌තානමප්‌පටිකූලවාදී, අධිවාසනං සොත්‌ථානං තදාහු.
Khantā duruttānamappaṭikūlavādī, adhivāsanaṃ sotthānaṃ tadāhu.
158.
158.
යො නාවජානාති සහායමිත්‌තෙ 5, සිප්‌පෙන කුල්‍යාහි ධනෙන ජච්‌චා;
Yo nāvajānāti sahāyamitte 6, sippena kulyāhi dhanena jaccā;
රුචිපඤ්‌ඤො අත්‌ථකාලෙ මතීමා 7, සහායෙසු වෙ සොත්‌ථානං තදාහු.
Rucipañño atthakāle matīmā 8, sahāyesu ve sotthānaṃ tadāhu.
159.
159.
මිත්‌තානි වෙ යස්‌ස භවන්‌ති සන්‌තො, සංවිස්‌සත්‌ථා අවිසංවාදකස්‌ස;
Mittāni ve yassa bhavanti santo, saṃvissatthā avisaṃvādakassa;
න මිත්‌තදුබ්‌භී සංවිභාගී ධනෙන, මිත්‌තෙසු වෙ සොත්‌ථානං තදාහු.
Na mittadubbhī saṃvibhāgī dhanena, mittesu ve sotthānaṃ tadāhu.
160.
160.
යස්‌ස භරියා තුල්‍යවයා සමග්‌ගා, අනුබ්‌බතා ධම්‌මකාමා පජාතා 9;
Yassa bhariyā tulyavayā samaggā, anubbatā dhammakāmā pajātā 10;
කොලිනියා සීලවතී පතිබ්‌බතා, දාරෙසු වෙ සොත්‌ථානං තදාහු.
Koliniyā sīlavatī patibbatā, dāresu ve sotthānaṃ tadāhu.
161.
161.
යස්‌ස රාජා භූතපති 11 යසස්‌සී, ජානාති සොචෙය්‍යං පරක්‌කමඤ්‌ච;
Yassa rājā bhūtapati 12 yasassī, jānāti soceyyaṃ parakkamañca;
අද්‌වෙජ්‌ඣතා සුහදයං මමන්‌ති, රාජූසු වෙ සොත්‌ථානං තදාහු.
Advejjhatā suhadayaṃ mamanti, rājūsu ve sotthānaṃ tadāhu.
162.
162.
අන්‌නඤ්‌ච පානඤ්‌ච දදාති සද්‌ධො, මාලඤ්‌ච ගන්‌ධඤ්‌ච විලෙපනඤ්‌ච;
Annañca pānañca dadāti saddho, mālañca gandhañca vilepanañca;
පසන්‌නචිත්‌තො අනුමොදමානො, සග්‌ගෙසු වෙ සොත්‌ථානං තදාහු.
Pasannacitto anumodamāno, saggesu ve sotthānaṃ tadāhu.
163.
163.
යමරියධම්‌මෙන පුනන්‌ති වුද්‌ධා, ආරාධිතා සමචරියාය සන්‌තො;
Yamariyadhammena punanti vuddhā, ārādhitā samacariyāya santo;
බහුස්‌සුතා ඉසයො සීලවන්‌තො, අරහන්‌තමජ්‌ඣෙ සොත්‌ථානං තදාහු.
Bahussutā isayo sīlavanto, arahantamajjhe sotthānaṃ tadāhu.
164.
164.
එතානි ඛො සොත්‌ථානානි ලොකෙ, විඤ්‌ඤුප්‌පසත්‌ථානි සුඛුද්‍රයානි 13;
Etāni kho sotthānāni loke, viññuppasatthāni sukhudrayāni 14;
තානීධ සෙවෙථ නරො සපඤ්‌ඤො, න හි මඞ්‌ගලෙ කිඤ්‌චනමත්‌ථි සච්‌චන්‌ති.
Tānīdha sevetha naro sapañño, na hi maṅgale kiñcanamatthi saccanti.
මහාමඞ්‌ගලජාතකං පන්‌නරසමං.
Mahāmaṅgalajātakaṃ pannarasamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ජාතක-අට්‌ඨකථා • Jātaka-aṭṭhakathā / [453] 15. මහාමඞ්‌ගලජාතකවණ්‌ණනා • [453] 15. Mahāmaṅgalajātakavaṇṇanā
