| Library / Tipiṭaka / ਤਿਪਿਟਕ • Tipiṭaka / ਮਹਾવਿਭਙ੍ਗ-ਅਟ੍ਠਕਥਾ • Mahāvibhaṅga-aṭṭhakathā |
ਮਹਾਮੋਗ੍ਗਲ੍ਲਾਨਸ੍ਸਸੀਹਨਾਦਕਥਾ
Mahāmoggallānassasīhanādakathā
੧੭. ਅਥ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋਤਿਆਦੀਸੁ ਆਯਸ੍ਮਾਤਿ ਪਿਯવਚਨਮੇਤਂ, ਗਰੁਗਾਰવਸਪ੍ਪਤਿਸ੍ਸਾਧਿવਚਨਮੇਤਂ। ਮਹਾਮੋਗ੍ਗਲ੍ਲਾਨੋਤਿ ਮਹਾ ਚ ਸੋ ਗੁਣਮਹਨ੍ਤਤਾਯ ਮੋਗ੍ਗਲ੍ਲਾਨੋ ਚ ਗੋਤ੍ਤੇਨਾਤਿ ਮਹਾਮੋਗ੍ਗਲ੍ਲਾਨੋ। ਏਤਦવੋਚਾਤਿ ਏਤਂ ਅવੋਚ। ਇਦਾਨਿ વਤ੍ਤਬ੍ਬਂ ‘‘ਏਤਰਹਿ ਭਨ੍ਤੇ’’ਤਿਆਦਿવਚਨਂ ਦਸ੍ਸੇਤਿ। ਕਸ੍ਮਾ ਅવੋਚ? ਥੇਰੋ ਕਿਰ ਪਬ੍ਬਜਿਤ੍વਾ ਸਤ੍ਤਮੇ ਦਿવਸੇ ਸਾવਕਪਾਰਮਿਞਾਣਸ੍ਸ ਮਤ੍ਥਕਂ ਪਤ੍ਤੋ, ਸਤ੍ਥਾਰਾਪਿ ਮਹਿਦ੍ਧਿਕਤਾਯ ਏਤਦਗ੍ਗੇ ਠਪਿਤੋ। ਸੋ ਤਂ ਅਤ੍ਤਨੋ ਮਹਿਦ੍ਧਿਕਤਂ ਨਿਸ੍ਸਾਯ ਚਿਨ੍ਤੇਸਿ – ‘‘ਅਯਂ વੇਰਞ੍ਜਾ ਦੁਬ੍ਭਿਕ੍ਖਾ, ਭਿਕ੍ਖੂ ਚ ਕਿਲਮਨ੍ਤਿ, ਯਂਨੂਨਾਹਂ ਪਥવਿਂ ਪਰਿવਤ੍ਤੇਤ੍વਾ ਭਿਕ੍ਖੂ ਪਪ੍ਪਟਕੋਜਂ ਭੋਜੇਯ੍ਯ’’ਨ੍ਤਿ। ਅਥਸ੍ਸ ਏਤਦਹੋਸਿ – ‘‘ਸਚੇ ਪਨਾਹਂ ਭਗવਤੋ ਸਨ੍ਤਿਕੇ વਿਹਰਨ੍ਤੋ ਭਗવਨ੍ਤਂ ਅਯਾਚਿਤ੍વਾ ਏવਂ ਕਰੇਯ੍ਯਂ, ਨ ਮੇਤਂ ਅਸ੍ਸ ਪਤਿਰੂਪਂ; ਯੁਗਗ੍ਗਾਹੋ વਿਯ ਭਗવਤਾ ਸਦ੍ਧਿਂ ਕਤੋ ਭવੇਯ੍ਯਾ’’ਤਿ। ਤਸ੍ਮਾ ਯਾਚਿਤੁਕਾਮੋ ਆਗਨ੍ਤ੍વਾ ਭਗવਨ੍ਤਂ ਏਤਦવੋਚ।
17.Atha kho āyasmā mahāmoggallānotiādīsu āyasmāti piyavacanametaṃ, garugāravasappatissādhivacanametaṃ. Mahāmoggallānoti mahā ca so guṇamahantatāya moggallāno ca gottenāti mahāmoggallāno. Etadavocāti etaṃ avoca. Idāni vattabbaṃ ‘‘etarahi bhante’’tiādivacanaṃ dasseti. Kasmā avoca? Thero kira pabbajitvā sattame divase sāvakapāramiñāṇassa matthakaṃ patto, satthārāpi mahiddhikatāya etadagge ṭhapito. So taṃ attano mahiddhikataṃ nissāya cintesi – ‘‘ayaṃ verañjā dubbhikkhā, bhikkhū ca kilamanti, yaṃnūnāhaṃ pathaviṃ parivattetvā bhikkhū pappaṭakojaṃ bhojeyya’’nti. Athassa etadahosi – ‘‘sace panāhaṃ bhagavato santike viharanto bhagavantaṃ ayācitvā evaṃ kareyyaṃ, na metaṃ assa patirūpaṃ; yugaggāho viya bhagavatā saddhiṃ kato bhaveyyā’’ti. Tasmā yācitukāmo āgantvā bhagavantaṃ etadavoca.
ਹੇਟ੍ਠਿਮਤਲਂ ਸਮ੍ਪਨ੍ਨਨ੍ਤਿ ਪਥવਿਯਾ ਕਿਰ ਹੇਟ੍ਠਿਮਤਲੇ ਪਥવਿਮਣ੍ਡੋ ਪਥવੋਜੋ ਪਥવਿ-ਪਪ੍ਪਟਕੋ ਅਤ੍ਥਿ, ਤਂ ਸਨ੍ਧਾਯ વਦਤਿ। ਤਤ੍ਥ ਸਮ੍ਪਨ੍ਨਨ੍ਤਿ ਮਧੁਰਂ, ਸਾਦੁਰਸਨ੍ਤਿ ਅਤ੍ਥੋ। ਯਥੇવ ਹਿ ‘‘ਤਤ੍ਰਸ੍ਸ ਰੁਕ੍ਖੋ ਸਮ੍ਪਨ੍ਨਫਲੋ ਚ ਉਪਪਨ੍ਨਫਲੋ ਚਾ’’ਤਿ (ਮ॰ ਨਿ॰ ੨.੪੮) ਏਤ੍ਥ ਮਧੁਰਫਲੋਤਿ ਅਤ੍ਥੋ; ਏવਮਿਧਾਪਿ ਸਮ੍ਪਨ੍ਨਨ੍ਤਿ ਮਧੁਰਂ ਸਾਦੁਰਸਨ੍ਤਿ વੇਦਿਤਬ੍ਬਂ। ਸੇਯ੍ਯਥਾਪਿ ਖੁਦ੍ਦਮਧੁਂ ਅਨੀਲ਼ਕਨ੍ਤਿ ਇਦਂ ਪਨਸ੍ਸ ਮਧੁਰਤਾਯ ਓਪਮ੍ਮਨਿਦਸ੍ਸਨਤ੍ਥਂ વੁਤ੍ਤਂ। ਖੁਦ੍ਦਮਧੁਨ੍ਤਿ ਖੁਦ੍ਦਕਮਕ੍ਖਿਕਾਹਿ ਕਤਮਧੁ। ਅਨੀਲ਼ਕਨ੍ਤਿ ਨਿਮ੍ਮਕ੍ਖਿਕਂ ਨਿਮ੍ਮਕ੍ਖਿਕਣ੍ਡਕਂ ਪਰਿਸੁਦ੍ਧਂ। ਏਤਂ ਕਿਰ ਮਧੁ ਸਬ੍ਬਮਧੂਹਿ ਅਗ੍ਗਞ੍ਚ ਸੇਟ੍ਠਞ੍ਚ ਸੁਰਸਞ੍ਚ ਓਜવਨ੍ਤਞ੍ਚ। ਤੇਨਾਹ – ‘‘ਸੇਯ੍ਯਥਾਪਿ ਖੁਦ੍ਦਮਧੁਂ ਅਨੀਲ਼ਕਂ ਏવਮਸ੍ਸਾਦ’’ਨ੍ਤਿ।
Heṭṭhimatalaṃ sampannanti pathaviyā kira heṭṭhimatale pathavimaṇḍo pathavojo pathavi-pappaṭako atthi, taṃ sandhāya vadati. Tattha sampannanti madhuraṃ, sādurasanti attho. Yatheva hi ‘‘tatrassa rukkho sampannaphalo ca upapannaphalo cā’’ti (ma. ni. 2.48) ettha madhuraphaloti attho; evamidhāpi sampannanti madhuraṃ sādurasanti veditabbaṃ. Seyyathāpi khuddamadhuṃ anīḷakanti idaṃ panassa madhuratāya opammanidassanatthaṃ vuttaṃ. Khuddamadhunti khuddakamakkhikāhi katamadhu. Anīḷakanti nimmakkhikaṃ nimmakkhikaṇḍakaṃ parisuddhaṃ. Etaṃ kira madhu sabbamadhūhi aggañca seṭṭhañca surasañca ojavantañca. Tenāha – ‘‘seyyathāpi khuddamadhuṃ anīḷakaṃ evamassāda’’nti.
ਸਾਧਾਹਂ , ਭਨ੍ਤੇਤਿ ਸਾਧੁ ਅਹਂ, ਭਨ੍ਤੇ। ਏਤ੍ਥ ਸਾਧੂਤਿ ਆਯਾਚਨવਚਨਮੇਤਂ। ਪਥવਿਪਰਿવਤ੍ਤਨਂ ਆਯਾਚਨ੍ਤੋ ਹਿ ਥੇਰੋ ਭਗવਨ੍ਤਂ ਏવਮਾਹ। ਪਰਿવਤ੍ਤੇਯ੍ਯਨ੍ਤਿ ਉਕ੍ਕੁਜ੍ਜੇਯ੍ਯਂ, ਹੇਟ੍ਠਿਮਤਲਂ ਉਪਰਿਮਂ ਕਰੇਯ੍ਯਂ। ਕਸ੍ਮਾ? ਏવਞ੍ਹਿ ਕਤੇ ਸੁਖੇਨ ਭਿਕ੍ਖੂ ਪਪ੍ਪਟਕੋਜਂ ਪਥવਿਮਣ੍ਡਂ ਪਰਿਭੁਞ੍ਜਿਸ੍ਸਨ੍ਤੀਤਿ। ਅਥ ਭਗવਾ ਅਨਨੁਞ੍ਞਾਤੁਕਾਮੋਪਿ ਥੇਰਂ ਸੀਹਨਾਦਂ ਨਦਾਪੇਤੁਂ ਪੁਚ੍ਛਿ – ‘‘ਯੇ ਪਨ ਤੇ, ਮੋਗ੍ਗਲ੍ਲਾਨ, ਪਥવਿਨਿਸ੍ਸਿਤਾ ਪਾਣਾ ਤੇ ਕਥਂ ਕਰਿਸ੍ਸਸੀ’’ਤਿ। ਯੇ ਪਥવਿਨਿਸ੍ਸਿਤਾ ਗਾਮਨਿਗਮਾਦੀਸੁ ਪਾਣਾ, ਤੇ ਪਥવਿਯਾ ਪਰਿવਤ੍ਤਿਯਮਾਨਾਯ ਆਕਾਸੇ ਸਣ੍ਠਾਤੁਂ ਅਸਕ੍ਕੋਨ੍ਤੇ ਕਥਂ ਕਰਿਸ੍ਸਸਿ, ਕਤ੍ਥ ਠਪੇਸ੍ਸਸੀਤਿ? ਅਥ ਥੇਰੋ ਭਗવਤਾ ਏਤਦਗ੍ਗੇ ਠਪਿਤਭਾવਾਨੁਰੂਪਂ ਅਤ੍ਤਨੋ ਇਦ੍ਧਾਨੁਭਾવਂ ਪਕਾਸੇਨ੍ਤੋ ‘‘ਏਕਾਹਂ, ਭਨ੍ਤੇ’’ਤਿਆਦਿਮਾਹ। ਤਸ੍ਸਤ੍ਥੋ – ਏਕਂ ਅਹਂ ਭਨ੍ਤੇ ਹਤ੍ਥਂ ਯਥਾ ਅਯਂ ਮਹਾਪਥવੀ ਏવਂ ਅਭਿਨਿਮ੍ਮਿਨਿਸ੍ਸਾਮਿ, ਪਥવਿਸਦਿਸਂ ਕਰਿਸ੍ਸਾਮਿ। ਏવਂ ਕਤ੍વਾ ਯੇ ਪਥવਿਨਿਸ੍ਸਿਤਾ ਪਾਣਾ ਤੇ ਏਕਸ੍ਮਿਂ ਹਤ੍ਥਤਲੇ ਠਿਤੇ ਪਾਣੇ ਤਤੋ ਦੁਤਿਯਹਤ੍ਥਤਲੇ ਸਙ੍ਕਾਮੇਨ੍ਤੋ વਿਯ ਤਤ੍ਥ ਸਙ੍ਕਾਮੇਸ੍ਸਾਮੀਤਿ।
Sādhāhaṃ, bhanteti sādhu ahaṃ, bhante. Ettha sādhūti āyācanavacanametaṃ. Pathaviparivattanaṃ āyācanto hi thero bhagavantaṃ evamāha. Parivatteyyanti ukkujjeyyaṃ, heṭṭhimatalaṃ uparimaṃ kareyyaṃ. Kasmā? Evañhi kate sukhena bhikkhū pappaṭakojaṃ pathavimaṇḍaṃ paribhuñjissantīti. Atha bhagavā ananuññātukāmopi theraṃ sīhanādaṃ nadāpetuṃ pucchi – ‘‘ye pana te, moggallāna, pathavinissitā pāṇā te kathaṃ karissasī’’ti. Ye pathavinissitā gāmanigamādīsu pāṇā, te pathaviyā parivattiyamānāya ākāse saṇṭhātuṃ asakkonte kathaṃ karissasi, kattha ṭhapessasīti? Atha thero bhagavatā etadagge ṭhapitabhāvānurūpaṃ attano iddhānubhāvaṃ pakāsento ‘‘ekāhaṃ, bhante’’tiādimāha. Tassattho – ekaṃ ahaṃ bhante hatthaṃ yathā ayaṃ mahāpathavī evaṃ abhinimminissāmi, pathavisadisaṃ karissāmi. Evaṃ katvā ye pathavinissitā pāṇā te ekasmiṃ hatthatale ṭhite pāṇe tato dutiyahatthatale saṅkāmento viya tattha saṅkāmessāmīti.
ਅਥਸ੍ਸ ਭਗવਾ ਆਯਾਚਨਂ ਪਟਿਕ੍ਖਿਪਨ੍ਤੋ ‘‘ਅਲਂ ਮੋਗ੍ਗਲ੍ਲਾਨਾ’’ਤਿਆਦਿਮਾਹ। ਤਤ੍ਥ ਅਲਨ੍ਤਿ ਪਟਿਕ੍ਖੇਪવਚਨਂ। વਿਪਲ੍ਲਾਸਮ੍ਪਿ ਸਤ੍ਤਾ ਪਟਿਲਭੇਯ੍ਯੁਨ੍ਤਿ વਿਪਰੀਤਗ੍ਗਾਹਮ੍ਪਿ ਸਤ੍ਤਾ ਸਮ੍ਪਾਪੁਣੇਯ੍ਯੁਂ। ਕਥਂ? ਅਯਂ ਨੁ ਖੋ ਪਥવੀ , ਉਦਾਹੁ ਨ ਅਯਨ੍ਤਿ। ਅਥ વਾ ਅਮ੍ਹਾਕਂ ਨੁ ਖੋ ਅਯਂ ਗਾਮੋ, ਉਦਾਹੁ ਅਞ੍ਞੇਸ’’ਨ੍ਤਿ। ਏવਂ ਨਿਗਮਜਨਪਦਖੇਤ੍ਤਾਰਾਮਾਦੀਸੁ। ਨ વਾ ਏਸ વਿਪਲ੍ਲਾਸੋ, ਅਚਿਨ੍ਤੇਯ੍ਯੋ ਹਿ ਇਦ੍ਧਿਮਤੋ ਇਦ੍ਧਿવਿਸਯੋ। ਏવਂ ਪਨ વਿਪਲ੍ਲਾਸਂ ਪਟਿਲਭੇਯ੍ਯੁਂ – ਇਦਂ ਦੁਬ੍ਭਿਕ੍ਖਂ ਨਾਮ ਨ ਇਦਾਨਿਯੇવ ਹੋਤਿ, ਅਨਾਗਤੇਪਿ ਭવਿਸ੍ਸਤਿ। ਤਦਾ ਭਿਕ੍ਖੂ ਤਾਦਿਸਂ ਇਦ੍ਧਿਮਨ੍ਤਂ ਸਬ੍ਰਹ੍ਮਚਾਰਿਂ ਕੁਤੋ ਲਭਿਸ੍ਸਨ੍ਤਿ? ਤੇ ਸੋਤਾਪਨ੍ਨ-ਸਕਦਾਗਾਮਿ-ਅਨਾਗਾਮਿ-ਸੁਕ੍ਖવਿਪਸ੍ਸਕ-ਝਾਨਲਾਭਿ-ਪਟਿਸਮ੍ਭਿਦਾਪ੍ਪਤ੍ਤਖੀਣਾਸવਾਪਿ ਸਮਾਨਾ ਇਦ੍ਧਿਬਲਾਭਾવਾ ਪਰਕੁਲਾਨਿ ਪਿਣ੍ਡਾਯ ਉਪਸਙ੍ਕਮਿਸ੍ਸਨ੍ਤਿ। ਤਤ੍ਰ ਮਨੁਸ੍ਸਾਨਂ ਏવਂ ਭવਿਸ੍ਸਤਿ – ‘‘ਬੁਦ੍ਧਕਾਲੇ ਭਿਕ੍ਖੂ ਸਿਕ੍ਖਾਸੁ ਪਰਿਪੂਰਕਾਰਿਨੋ ਅਹੇਸੁਂ। ਤੇ ਗੁਣੇ ਨਿਬ੍ਬਤ੍ਤੇਤ੍વਾ ਦੁਬ੍ਭਿਕ੍ਖਕਾਲੇ ਪਥવਿਂ ਪਰਿવਤ੍ਤੇਤ੍વਾ ਪਪ੍ਪਟਕੋਜਂ ਪਰਿਭੁਞ੍ਜਿਂਸੁ। ਇਦਾਨਿ ਪਨ ਸਿਕ੍ਖਾਯ ਪਰਿਪੂਰਕਾਰਿਨੋ ਨਤ੍ਥਿ। ਯਦਿ ਸਿਯੁਂ, ਤਥੇવ ਕਰੇਯ੍ਯੁਂ। ਨ ਅਮ੍ਹਾਕਂ ਯਂ ਕਿਞ੍ਚਿ ਪਕ੍ਕਂ વਾ ਆਮਂ વਾ ਖਾਦਿਤੁਂ ਦਦੇਯ੍ਯੁ’’ਨ੍ਤਿ। ਏવਂ ਤੇਸੁਯੇવ ਅਰਿਯਪੁਗ੍ਗਲੇਸੁ ‘‘ਨਤ੍ਥਿ ਅਰਿਯਪੁਗ੍ਗਲਾ’’ਤਿ ਇਮਂ વਿਪਲ੍ਲਾਸਂ ਪਟਿਲਭੇਯ੍ਯੁਂ। વਿਪਲ੍ਲਾਸવਸੇਨ ਚ ਅਰਿਯੇ ਗਰਹਨ੍ਤਾ ਉਪવਦਨ੍ਤਾ ਅਪਾਯੁਪਗਾ ਭવੇਯ੍ਯੁਂ। ਤਸ੍ਮਾ ਮਾ ਤੇ ਰੁਚ੍ਚਿ ਪਥવਿਂ ਪਰਿવਤ੍ਤੇਤੁਨ੍ਤਿ।
Athassa bhagavā āyācanaṃ paṭikkhipanto ‘‘alaṃ moggallānā’’tiādimāha. Tattha alanti paṭikkhepavacanaṃ. Vipallāsampi sattā paṭilabheyyunti viparītaggāhampi sattā sampāpuṇeyyuṃ. Kathaṃ? Ayaṃ nu kho pathavī , udāhu na ayanti. Atha vā amhākaṃ nu kho ayaṃ gāmo, udāhu aññesa’’nti. Evaṃ nigamajanapadakhettārāmādīsu. Na vā esa vipallāso, acinteyyo hi iddhimato iddhivisayo. Evaṃ pana vipallāsaṃ paṭilabheyyuṃ – idaṃ dubbhikkhaṃ nāma na idāniyeva hoti, anāgatepi bhavissati. Tadā bhikkhū tādisaṃ iddhimantaṃ sabrahmacāriṃ kuto labhissanti? Te sotāpanna-sakadāgāmi-anāgāmi-sukkhavipassaka-jhānalābhi-paṭisambhidāppattakhīṇāsavāpi samānā iddhibalābhāvā parakulāni piṇḍāya upasaṅkamissanti. Tatra manussānaṃ evaṃ bhavissati – ‘‘buddhakāle bhikkhū sikkhāsu paripūrakārino ahesuṃ. Te guṇe nibbattetvā dubbhikkhakāle pathaviṃ parivattetvā pappaṭakojaṃ paribhuñjiṃsu. Idāni pana sikkhāya paripūrakārino natthi. Yadi siyuṃ, tatheva kareyyuṃ. Na amhākaṃ yaṃ kiñci pakkaṃ vā āmaṃ vā khādituṃ dadeyyu’’nti. Evaṃ tesuyeva ariyapuggalesu ‘‘natthi ariyapuggalā’’ti imaṃ vipallāsaṃ paṭilabheyyuṃ. Vipallāsavasena ca ariye garahantā upavadantā apāyupagā bhaveyyuṃ. Tasmā mā te rucci pathaviṃ parivattetunti.
ਅਥ ਥੇਰੋ ਇਮਂ ਯਾਚਨਂ ਅਲਭਮਾਨੋ ਅਞ੍ਞਂ ਯਾਚਨ੍ਤੋ ‘‘ਸਾਧੁ, ਭਨ੍ਤੇ’’ਤਿਆਦਿਮਾਹ। ਤਮ੍ਪਿਸ੍ਸ ਭਗવਾ ਪਟਿਕ੍ਖਿਪਨ੍ਤੋ ‘‘ਅਲਂ ਮੋਗ੍ਗਲ੍ਲਾਨਾ’’ਤਿਆਦਿਮਾਹ। ਤਤ੍ਥ ਕਿਞ੍ਚਾਪਿ ਨ વੁਤ੍ਤਂ ‘‘વਿਪਲ੍ਲਾਸਮ੍ਪਿ ਸਤ੍ਤਾ ਪਟਿਲਭੇਯ੍ਯੁ’’ਨ੍ਤਿ, ਅਥ ਖੋ ਪੁਬ੍ਬੇ વੁਤ੍ਤਨਯੇਨੇવ ਗਹੇਤਬ੍ਬਂ; ਅਤ੍ਥੋਪਿ ਚਸ੍ਸ વੁਤ੍ਤਸਦਿਸਮੇવ વੇਦਿਤਬ੍ਬੋ। ਯਦਿ ਪਨ ਭਗવਾ ਅਨੁਜਾਨੇਯ੍ਯ, ਥੇਰੋ ਕਿਂ ਕਰੇਯ੍ਯਾਤਿ? ਮਹਾਸਮੁਦ੍ਦਂ ਏਕੇਨ ਪਦવੀਤਿਹਾਰੇਨ ਅਤਿਕ੍ਕਮਿਤਬ੍ਬਂ ਮਾਤਿਕਾਮਤ੍ਤਂ ਅਧਿਟ੍ਠਹਿਤ੍વਾ ਨਲ਼ੇਰੁਪੁਚਿਮਨ੍ਦਤੋ ਉਤ੍ਤਰਕੁਰੁਅਭਿਮੁਖਂ ਮਗ੍ਗਂ ਨੀਹਰਿਤ੍વਾ ਉਤ੍ਤਰਕੁਰੁਂ ਗਮਨਾਗਮਨਸਮ੍ਪਨ੍ਨੇ ਠਾਨੇ ਕਤ੍વਾ ਦਸ੍ਸੇਯ੍ਯ, ਯਥਾ ਭਿਕ੍ਖੂ ਗੋਚਰਗਾਮਂ વਿਯ ਯਥਾਸੁਖਂ ਪਿਣ੍ਡਾਯ ਪવਿਸਿਤ੍વਾ ਨਿਕ੍ਖਮੇਯ੍ਯੁਨ੍ਤਿ।
Atha thero imaṃ yācanaṃ alabhamāno aññaṃ yācanto ‘‘sādhu, bhante’’tiādimāha. Tampissa bhagavā paṭikkhipanto ‘‘alaṃmoggallānā’’tiādimāha. Tattha kiñcāpi na vuttaṃ ‘‘vipallāsampi sattā paṭilabheyyu’’nti, atha kho pubbe vuttanayeneva gahetabbaṃ; atthopi cassa vuttasadisameva veditabbo. Yadi pana bhagavā anujāneyya, thero kiṃ kareyyāti? Mahāsamuddaṃ ekena padavītihārena atikkamitabbaṃ mātikāmattaṃ adhiṭṭhahitvā naḷerupucimandato uttarakuruabhimukhaṃ maggaṃ nīharitvā uttarakuruṃ gamanāgamanasampanne ṭhāne katvā dasseyya, yathā bhikkhū gocaragāmaṃ viya yathāsukhaṃ piṇḍāya pavisitvā nikkhameyyunti.
ਨਿਟ੍ਠਿਤਾ ਮਹਾਮੋਗ੍ਗਲ੍ਲਾਨਸ੍ਸ ਸੀਹਨਾਦਕਥਾ।
Niṭṭhitā mahāmoggallānassa sīhanādakathā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਮਹਾવਿਭਙ੍ਗ • Mahāvibhaṅga / વੇਰਞ੍ਜਕਣ੍ਡਂ • Verañjakaṇḍaṃ
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਮਹਾਮੋਗ੍ਗਲ੍ਲਾਨਸ੍ਸ ਸੀਹਨਾਦਕਥਾ • Mahāmoggallānassa sīhanādakathā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਉਪਾਸਕਤ੍ਤਪਟਿવੇਦਨਾਕਥਾવਣ੍ਣਨਾ • Upāsakattapaṭivedanākathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਉਪਾਸਕਤ੍ਤਪਟਿવੇਦਨਾਕਥਾવਣ੍ਣਨਾ • Upāsakattapaṭivedanākathāvaṇṇanā
