| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
७-८. महामोग्गल्लानसुत्तादिवण्णना
7-8. Mahāmoggallānasuttādivaṇṇanā
१६७-१६८. सत्तमट्ठमेसु महामोग्गल्लानत्थेरस्सातिआदिना मोग्गल्लानत्थेरस्स हेट्ठा तिण्णं मग्गानं सुखपटिपददन्धाभिञ्ञभावो, अरहत्तमग्गस्स दुक्खपटिपदखिप्पाभिञ्ञभावो वुत्तो, सारिपुत्तत्थेरस्स पन हेट्ठिमानं तिण्णं मग्गानं सुखपटिपददन्धाभिञ्ञभावो, अरहत्तमग्गस्स च सुखपटिपदखिप्पाभिञ्ञभावो दस्सितो। यं पन वुत्तं विसुद्धिमग्गे (विसुद्धि॰ २.८०१) ‘‘बुद्धानं पन चत्तारोपि मग्गा सुखपटिपदखिप्पाभिञ्ञाव अहेसुं, तथा धम्मसेनापतिस्स। महामोग्गल्लानत्थेरस्स पन पठममग्गो सुखपटिपदखिप्पाभिञ्ञो अहोसि, उपरि तयो दुक्खपटिपददन्धाभिञ्ञा’’ति। यञ्च वुत्तं अट्ठसालिनियं (ध॰ स॰ अट्ठ॰ १४७६) ‘‘तथागतस्स हि सारिपुत्तत्थेरस्स च चत्तारोपि मग्गा सुखपटिपदखिप्पाभिञ्ञाव अहेसुं, महामोग्गल्लानत्थेरस्स पन पठममग्गो सुखपटिपदखिप्पाभिञ्ञो उपरि तयो दुक्खपटिपदखिप्पाभिञ्ञा’’ति, तं सब्बं अञ्ञमञ्ञं नानुलोमेति। इमाय पाळिया इमाय च अट्ठकथाय न समेति, तस्मा वीमंसितब्बमेतं। तंतंभाणकानं वा मतेन तत्थ तत्थ तथा तथा वुत्तन्ति गहेतब्बं।
167-168. Sattamaṭṭhamesu mahāmoggallānattherassātiādinā moggallānattherassa heṭṭhā tiṇṇaṃ maggānaṃ sukhapaṭipadadandhābhiññabhāvo, arahattamaggassa dukkhapaṭipadakhippābhiññabhāvo vutto, sāriputtattherassa pana heṭṭhimānaṃ tiṇṇaṃ maggānaṃ sukhapaṭipadadandhābhiññabhāvo, arahattamaggassa ca sukhapaṭipadakhippābhiññabhāvo dassito. Yaṃ pana vuttaṃ visuddhimagge (visuddhi. 2.801) ‘‘buddhānaṃ pana cattāropi maggā sukhapaṭipadakhippābhiññāva ahesuṃ, tathā dhammasenāpatissa. Mahāmoggallānattherassa pana paṭhamamaggo sukhapaṭipadakhippābhiñño ahosi, upari tayo dukkhapaṭipadadandhābhiññā’’ti. Yañca vuttaṃ aṭṭhasāliniyaṃ (dha. sa. aṭṭha. 1476) ‘‘tathāgatassa hi sāriputtattherassa ca cattāropi maggā sukhapaṭipadakhippābhiññāva ahesuṃ, mahāmoggallānattherassa pana paṭhamamaggo sukhapaṭipadakhippābhiñño upari tayo dukkhapaṭipadakhippābhiññā’’ti, taṃ sabbaṃ aññamaññaṃ nānulometi. Imāya pāḷiyā imāya ca aṭṭhakathāya na sameti, tasmā vīmaṃsitabbametaṃ. Taṃtaṃbhāṇakānaṃ vā matena tattha tattha tathā tathā vuttanti gahetabbaṃ.
महामोग्गल्लानसुत्तादिवण्णना निट्ठिता।
Mahāmoggallānasuttādivaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya
७. महामोग्गल्लानसुत्तं • 7. Mahāmoggallānasuttaṃ
८. सारिपुत्तसुत्तं • 8. Sāriputtasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā)
७. महामोग्गल्लानसुत्तवण्णना • 7. Mahāmoggallānasuttavaṇṇanā
८. सारिपुत्तसुत्तवण्णना • 8. Sāriputtasuttavaṇṇanā
