| Library / Tipiṭaka / තිපිටක • Tipiṭaka / උදානපාළි • Udānapāḷi |
5. මහාමොග්‌ගල්‌ලානසුත්‌තං
5. Mahāmoggallānasuttaṃ
25. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ආයස්‌මා මහාමොග්‌ගල්‌ලානො භගවතො අවිදූරෙ නිසින්‌නො හොති පල්‌ලඞ්‌කං ආභුජිත්‌වා උජුං කායං පණිධාය කායගතාය සතියා අජ්‌ඣත්‌තං සූපට්‌ඨිතාය. අද්‌දසා ඛො භගවා ආයස්‌මන්‌තං මහාමොග්‌ගල්‌ලානං අවිදූරෙ නිසින්‌නං පල්‌ලඞ්‌කං ආභුජිත්‌වා උජුං කායං පණිධාය කායගතාය සතියා අජ්‌ඣත්‌තං සූපට්‌ඨිතාය.
25. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā mahāmoggallāno bhagavato avidūre nisinno hoti pallaṅkaṃ ābhujitvā ujuṃ kāyaṃ paṇidhāya kāyagatāya satiyā ajjhattaṃ sūpaṭṭhitāya. Addasā kho bhagavā āyasmantaṃ mahāmoggallānaṃ avidūre nisinnaṃ pallaṅkaṃ ābhujitvā ujuṃ kāyaṃ paṇidhāya kāyagatāya satiyā ajjhattaṃ sūpaṭṭhitāya.
අථ ඛො භගවා එතමත්‌ථං විදිත්‌වා තායං වෙලායං ඉමං උදානං උදානෙසි –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘සති කායගතා උපට්‌ඨිතා,
‘‘Sati kāyagatā upaṭṭhitā,
ඡසු ඵස්‌සායතනෙසු සංවුතො;
Chasu phassāyatanesu saṃvuto;
සතතං භික්‌ඛු සමාහිතො,
Satataṃ bhikkhu samāhito,
ජඤ්‌ඤා නිබ්‌බානමත්‌තනො’’ති. පඤ්‌චමං;
Jaññā nibbānamattano’’ti. pañcamaṃ;
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / උදාන-අට්‌ඨකථා • Udāna-aṭṭhakathā / 5. මහාමොග්‌ගල්‌ලානසුත්‌තවණ්‌ණනා • 5. Mahāmoggallānasuttavaṇṇanā
