| Library / Tipiṭaka / д̇ибидага • Tipiṭaka / уд̣̇аана-адтагат̇аа • Udāna-aṭṭhakathā |
5. махаамог̇г̇аллаанасуд̇д̇аван̣н̣анаа
5. Mahāmoggallānasuttavaṇṇanā
25. бан̃жамз гааяаг̇ад̇ааяа сад̇ияаад̇и гааяаанубассанаавасзна гааяз г̇ад̇ааяа гааяаарамман̣ааяа сад̇ияаа, ид̇т̇амбхууд̇алагкан̣з ид̣̇ам̣ гаран̣аважанам̣ . аж̇жхад̇д̇анд̇и ид̇ха аж̇жхад̇д̇ам̣ наама нияагаж̇жхад̇д̇ам̣, д̇асмаа ад̇д̇ани ад̇д̇асанд̇аанзд̇и ад̇т̇о. ат̇а ваа яасмаа гаммадтаанабхууд̇о гзсаад̣̇иго д̣̇вад̇д̇им̣сагодтаасасамуд̣̇ааяо ид̇ха гааяод̇и ад̇хиббзд̇о, д̇асмаа аж̇жхад̇д̇анд̇и бад̣̇асса г̇ожараж̇жхад̇д̇анд̇и ад̇т̇о взд̣̇ид̇аб̣б̣о. суубадтид̇ааяаад̇и нияагаж̇жхад̇д̇абхууд̇з г̇ожараж̇жхад̇д̇абхууд̇з ваа гааяз судту убадтид̇ааяа. гаа банааяам̣ сад̇и, яаа ‘‘аж̇жхад̇д̇ам̣ суубадтид̇аа’’д̇и вуд̇д̇аа? явааяам̣ бхаг̇авад̇аа ‘‘ад̇т̇и имасмим̣ гааяз гзсаа ломаа’’д̇иаад̣̇инаа (д̣̇ий. ни. 2.377; ма. ни. 1.110; ку. баа. 3.д̣̇вад̇д̇им̣саагаара) аж̇жхад̇д̇агзсаад̣̇иго д̣̇вад̇д̇им̣саагааро гааяо вуд̇д̇о, д̇ад̇т̇а яаа бадигууламанасигаарам̣ бавад̇д̇знд̇асса убажаараббанаавасзна гааяз убадтид̇аа сад̇и, саа ‘‘гааяаг̇ад̇аа сад̇ий’’д̇и вужжад̇и. яат̇аа жааяам̣, звам̣ аанаабаанажад̇уирияаабат̇асад̇исамбаж̇ан̃н̃аанам̣ васзна уд̣̇д̇хумаад̇агавинийлагаад̣̇ивасзна жа манасигаарам̣ бавад̇д̇знд̇асса яат̇аарахам̣ убажаараббанаавасзна гааяз убадтид̇аа сад̇и ‘‘гааяаг̇ад̇аа сад̇ий’’д̇и вужжад̇и. ид̇ха бана аж̇жхад̇д̇ам̣ гааяаг̇ад̇аа сад̇и бат̇авийаад̣̇игаа жад̇ассо д̇хаад̇уяо сасамбхаарасан̇кзбаад̣̇ийсу жад̇уусу язна гзнажи згзнаагаарзна вавад̇т̇абзд̇ваа д̇зсам̣ анижжаад̣̇илагкан̣асаллагкан̣авасзна убадтид̇аа вибассанаасамбаяуд̇д̇аа сад̇и ‘‘гааяаг̇ад̇аа сад̇ий’’д̇и ад̇хиббзд̇аа. т̇зро бана д̇ат̇аа вибассид̇ваа ад̇д̇ано паласамаабад̇д̇имзва самаабаж̇ж̇ид̇ваа нисийд̣̇и. ид̇хааби г̇аат̇ааяа звам̣ имасса ад̇т̇асса вин̃н̃аад̇аб̣б̣ад̇аа ‘‘на жааяам̣ нисаж̇ж̇аа’’д̇иаад̣̇инаа вуд̇д̇анаяаанусаарзна яож̇зд̇аб̣б̣аа.
25. Pañcame kāyagatāya satiyāti kāyānupassanāvasena kāye gatāya kāyārammaṇāya satiyā, itthambhūtalakkhaṇe idaṃ karaṇavacanaṃ . Ajjhattanti idha ajjhattaṃ nāma niyakajjhattaṃ, tasmā attani attasantāneti attho. Atha vā yasmā kammaṭṭhānabhūto kesādiko dvattiṃsakoṭṭhāsasamudāyo idha kāyoti adhippeto, tasmā ajjhattanti padassa gocarajjhattanti attho veditabbo. Sūpaṭṭhitāyāti niyakajjhattabhūte gocarajjhattabhūte vā kāye suṭṭhu upaṭṭhitāya. Kā panāyaṃ sati, yā ‘‘ajjhattaṃ sūpaṭṭhitā’’ti vuttā? Yvāyaṃ bhagavatā ‘‘atthi imasmiṃ kāye kesā lomā’’tiādinā (dī. ni. 2.377; ma. ni. 1.110; khu. pā. 3.dvattiṃsākāra) ajjhattakesādiko dvattiṃsākāro kāyo vutto, tattha yā paṭikūlamanasikāraṃ pavattentassa upacārappanāvasena kāye upaṭṭhitā sati, sā ‘‘kāyagatā satī’’ti vuccati. Yathā cāyaṃ, evaṃ ānāpānacatuiriyāpathasatisampajaññānaṃ vasena uddhumātakavinīlakādivasena ca manasikāraṃ pavattentassa yathārahaṃ upacārappanāvasena kāye upaṭṭhitā sati ‘‘kāyagatā satī’’ti vuccati. Idha pana ajjhattaṃ kāyagatā sati pathavīādikā catasso dhātuyo sasambhārasaṅkhepādīsu catūsu yena kenaci ekenākārena vavatthapetvā tesaṃ aniccādilakkhaṇasallakkhaṇavasena upaṭṭhitā vipassanāsampayuttā sati ‘‘kāyagatā satī’’ti adhippetā. Thero pana tathā vipassitvā attano phalasamāpattimeva samāpajjitvā nisīdi. Idhāpi gāthāya evaṃ imassa atthassa viññātabbatā ‘‘na cāyaṃ nisajjā’’tiādinā vuttanayānusārena yojetabbā.
зд̇амад̇т̇анд̇и зд̇ам̣ т̇зрасса жад̇уд̇хаад̇увавад̇т̇аанамукзна гааяаанубассанаасад̇ибадтаанзна вибассанам̣ ог̇аахзд̇ваа паласамаабад̇д̇исамаабаж̇ж̇анасан̇каад̇ам̣ ад̇т̇ам̣ вид̣̇ид̇ваа. имам̣ уд̣̇аананд̇и имам̣ сад̇ибадтаанабхааванааяа ниб̣б̣аанаад̇хиг̇амад̣̇ийбагам̣ уд̣̇аанам̣ уд̣̇аанзси.
Etamatthanti etaṃ therassa catudhātuvavatthānamukhena kāyānupassanāsatipaṭṭhānena vipassanaṃ ogāhetvā phalasamāpattisamāpajjanasaṅkhātaṃ atthaṃ viditvā. Imaṃ udānanti imaṃ satipaṭṭhānabhāvanāya nibbānādhigamadīpakaṃ udānaṃ udānesi.
д̇ад̇т̇а сад̇и гааяаг̇ад̇аа убадтид̇аад̇и буб̣б̣з вуд̇д̇алагкан̣аа сад̇и сад̣̇д̇хаабуб̣б̣ан̇г̇амаанам̣ самаад̇хивийрияабан̃н̃аанам̣ яат̇аасагам̣ гижжанибпаад̣̇анзна сахааяабхаавам̣ аабаннад̇д̇аа бахийнаббадибагкаа д̇ад̇о зва д̇игкависад̣̇абхууд̇аа жа яат̇аавуд̇д̇агааяасам̣варан̣авасзна згад̇т̇асамосаран̣авасзна жа авибарийд̇асабхаавам̣ саллагкзнд̇ий убаг̇анд̇ваа тид̇аа ход̇и, зд̇зна гааяасан̇каад̇аанам̣ жад̇уннам̣ д̇хаад̇уунам̣ д̇анниссид̇аанан̃жа убаад̣̇ааруубаанам̣ саллагкан̣авасзна, бажжаяз вавад̇т̇абзд̇ваа д̇ад̇о барам̣ д̇зсам̣ анижжаад̣̇илагкан̣асаллагкан̣авасзна жа бавад̇д̇ам̣ н̃аан̣абарамбарааг̇ад̇ам̣ сад̇им̣ д̣̇ассзд̇и, сад̇исийсзна ваа д̇ам̣самбаяуд̇д̇ам̣ барин̃н̃аад̇д̇аяабарияаабаннан̃аан̣абарамбарамзва д̣̇ассзд̇и. часу пассааяад̇анзсу сам̣вуд̇од̇и яат̇аавуд̇д̇ааяа гааяз убадтид̇ааяа сад̇ияаа саманнааг̇ад̇о жагкаад̣̇ийсу пассасса гааран̣абхууд̇зсу часу д̣̇ваарзсу гааяаанубассанааяа абхаавид̇ааяа уббаж̇ж̇анаарахаанам̣ абхиж̇жхаад̣̇ийнам̣ д̇ассаа бхаавид̇ад̇д̇аа н̃аан̣аббавад̇д̇им̣ бадивзд̇хзнд̇о д̇з бид̣̇аханд̇о ‘‘д̇ад̇т̇а сам̣вуд̇о’’д̇и вужжад̇и, зд̇зна н̃аан̣асам̣варам̣ д̣̇ассзд̇и.
Tattha sati kāyagatā upaṭṭhitāti pubbe vuttalakkhaṇā sati saddhāpubbaṅgamānaṃ samādhivīriyapaññānaṃ yathāsakaṃ kiccanipphādanena sahāyabhāvaṃ āpannattā pahīnappaṭipakkhā tato eva tikkhavisadabhūtā ca yathāvuttakāyasaṃvaraṇavasena ekatthasamosaraṇavasena ca aviparītasabhāvaṃ sallakkhentī upagantvā ṭhitā hoti, etena kāyasaṅkhātānaṃ catunnaṃ dhātūnaṃ tannissitānañca upādārūpānaṃ sallakkhaṇavasena, paccaye vavatthapetvā tato paraṃ tesaṃ aniccādilakkhaṇasallakkhaṇavasena ca pavattaṃ ñāṇaparamparāgataṃ satiṃ dasseti, satisīsena vā taṃsampayuttaṃ pariññāttayapariyāpannañāṇaparamparameva dasseti. Chasu phassāyatanesu saṃvutoti yathāvuttāya kāye upaṭṭhitāya satiyā samannāgato cakkhādīsu phassassa kāraṇabhūtesu chasu dvāresu kāyānupassanāya abhāvitāya uppajjanārahānaṃ abhijjhādīnaṃ tassā bhāvitattā ñāṇappavattiṃ paṭivedhento te pidahanto ‘‘tattha saṃvuto’’ti vuccati, etena ñāṇasaṃvaraṃ dasseti.
сад̇ад̇ам̣ бхигку самаахид̇од̇и со бхигку звам̣ убадтид̇ассад̇и саб̣б̣ад̇т̇а жа сам̣вуд̇о бут̇уд̇д̇аарамман̣з жид̇д̇ам̣ ависсаж̇ж̇зд̇ваа анижжаад̣̇ивасзна саммасанд̇о вибассанам̣ уссуггаабзд̇ваа н̃аан̣з д̇игкз суурз ваханд̇з вибассанаасамаад̇хинаа д̇аава сад̇ад̇ам̣ ниранд̇арам̣ самаахид̇о ануломан̃аан̣аананд̇арам̣ г̇од̇рабхун̃аан̣од̣̇аяад̇о бадтааяа. ж̇ан̃н̃аа ниб̣б̣аанамад̇д̇анод̇и ан̃н̃зсам̣ бут̇уж̇ж̇анаанам̣ субинанд̇зби аг̇ожарабхаавад̇о, арияаанам̣ бана д̇асса д̇ассзва аавзн̣игад̇д̇аа ад̇д̇асад̣̇исад̇д̇аа жа ‘‘ад̇д̇аа’’д̇и лад̣̇д̇хавохаарасса маг̇г̇апалан̃аан̣асса саад̇исаяависаяабхаавад̇о зганд̇асукаавахам̣ ниб̣б̣аанам̣ асан̇кад̇ад̇хаад̇у ‘‘ад̇д̇ано’’д̇и вуд̇д̇ам̣, д̇ам̣ ниб̣б̣аанам̣ ж̇ан̃н̃аа ж̇аанзяяа, маг̇г̇апалан̃аан̣зхи бадивиж̇жхзяяа, сажчигарзяяаад̇и ад̇т̇о. зд̇зна арияаанам̣ ниб̣б̣аанз ад̇химуд̇д̇ад̇ам̣ д̣̇ассзд̇и. арияаа хи ад̇хижид̇д̇аббавад̇д̇игаалзби зганд̇знзва ниб̣б̣аанз ниннабон̣абаб̣бхаарабхаавзна вихаранд̇и. зд̇т̇а жа яасса сад̇и гааяаг̇ад̇аа убадтид̇аа, со бхигку часу пассааяад̇анзсу сам̣вуд̇о, д̇ад̇о зва сад̇ад̇ам̣ самаахид̇о ад̇д̇абажжагкагаран̣зна ниб̣б̣аанам̣ ад̇д̇ано ж̇аанзяяаад̇и звам̣ г̇аат̇аабад̣̇аанам̣ самб̣анд̇хо взд̣̇ид̇аб̣б̣о. звам̣ гааяаанубассанаасад̇ибадтаанамукзна яаава арахад̇д̇аа згасса бхигкуно нияяаанамаг̇г̇ам̣ д̣̇ассзд̇и д̇хаммарааж̇аа.
Satataṃ bhikkhu samāhitoti so bhikkhu evaṃ upaṭṭhitassati sabbattha ca saṃvuto puthuttārammaṇe cittaṃ avissajjetvā aniccādivasena sammasanto vipassanaṃ ussukkāpetvā ñāṇe tikkhe sūre vahante vipassanāsamādhinā tāva satataṃ nirantaraṃ samāhito anulomañāṇānantaraṃ gotrabhuñāṇodayato paṭṭhāya. Jaññā nibbānamattanoti aññesaṃ puthujjanānaṃ supinantepi agocarabhāvato, ariyānaṃ pana tassa tasseva āveṇikattā attasadisattā ca ‘‘attā’’ti laddhavohārassa maggaphalañāṇassa sātisayavisayabhāvato ekantasukhāvahaṃ nibbānaṃ asaṅkhatadhātu ‘‘attano’’ti vuttaṃ, taṃ nibbānaṃ jaññā jāneyya, maggaphalañāṇehi paṭivijjheyya, sacchikareyyāti attho. Etena ariyānaṃ nibbāne adhimuttataṃ dasseti. Ariyā hi adhicittappavattikālepi ekanteneva nibbāne ninnapoṇapabbhārabhāvena viharanti. Ettha ca yassa sati kāyagatā upaṭṭhitā, so bhikkhu chasu phassāyatanesu saṃvuto, tato eva satataṃ samāhito attapaccakkhakaraṇena nibbānaṃ attano jāneyyāti evaṃ gāthāpadānaṃ sambandho veditabbo. Evaṃ kāyānupassanāsatipaṭṭhānamukhena yāva arahattā ekassa bhikkhuno niyyānamaggaṃ dasseti dhammarājā.
абаро наяо – сад̇и гааяаг̇ад̇аа убадтид̇аад̇и зд̇зна гааяаанубассанаасад̇ибадтаанам̣ д̣̇ассзд̇и. часу пассааяад̇анзсу сам̣вуд̇од̇и пассо ааяад̇анам̣ гааран̣ам̣ зд̇зсанд̇и пассааяад̇анаани, д̇зсу пассааяад̇анзсу. пассахзд̇угзсу пассабажжаяаа ниб̣б̣ад̇д̇зсу часу жагкусампассаж̇аад̣̇ивзд̣̇аяид̇зсу д̇ан̣хаад̣̇ийнам̣ аббавад̇д̇ияаа сам̣вуд̇о, зд̇зна взд̣̇анаанубассанаасад̇ибадтаанам̣ д̣̇ассзд̇и. сад̇ад̇ам̣ бхигку самаахид̇од̇и сад̇ад̇ам̣ нижжагаалам̣ ниранд̇арам̣ вигкзбаабхаавад̇о самаахид̇о бхигку. со жааяам̣ авигкзбо саб̣б̣асо сад̇ибадтаанабхааванааяа мад̇т̇агаббад̇д̇ааяа ход̇и. саммасанд̇о хи ад̇ийд̇аад̣̇ибхзд̣̇абхиннзсу бан̃жубаад̣̇аанагканд̇хзсу анавасзсад̇ова бариг̇г̇ахзд̇ваа саммасад̇ийд̇и. зд̇зна сзсасад̇ибадтаанз д̣̇ассзд̇и. ж̇ан̃н̃аа ниб̣б̣аанамад̇д̇анод̇и звам̣ жад̇усад̇ибадтаанабхааванам̣ мад̇т̇агам̣ баабзд̇ваа тид̇о бхиннагилзсо бхигку ад̇д̇ано гилзсаниб̣б̣аанам̣ бажжавзгкан̣ан̃аан̣зна саяамзва ж̇аанзяяаад̇и ад̇т̇о.
Aparo nayo – sati kāyagatā upaṭṭhitāti etena kāyānupassanāsatipaṭṭhānaṃ dasseti. Chasu phassāyatanesu saṃvutoti phasso āyatanaṃ kāraṇaṃ etesanti phassāyatanāni, tesu phassāyatanesu. Phassahetukesu phassapaccayā nibbattesu chasu cakkhusamphassajādivedayitesu taṇhādīnaṃ appavattiyā saṃvuto, etena vedanānupassanāsatipaṭṭhānaṃ dasseti. Satataṃ bhikkhu samāhitoti satataṃ niccakālaṃ nirantaraṃ vikkhepābhāvato samāhito bhikkhu. So cāyaṃ avikkhepo sabbaso satipaṭṭhānabhāvanāya matthakappattāya hoti. Sammasanto hi atītādibhedabhinnesu pañcupādānakkhandhesu anavasesatova pariggahetvā sammasatīti. Etena sesasatipaṭṭhāne dasseti. Jaññā nibbānamattanoti evaṃ catusatipaṭṭhānabhāvanaṃ matthakaṃ pāpetvā ṭhito bhinnakileso bhikkhu attano kilesanibbānaṃ paccavekkhaṇañāṇena sayameva jāneyyāti attho.
ат̇а ваа сад̇и гааяаг̇ад̇аа убадтид̇аад̇и ад̇д̇ано барзсан̃жа гааяасса яат̇аасабхаавабарин̃н̃аад̣̇ийбанзна т̇зрасса сад̇ивзбуллаббад̇д̇и д̣̇ийбид̇аа. часу пассааяад̇анзсу сам̣вуд̇од̇и жагкаад̣̇ийсу часу д̣̇ваарзсу ажжанд̇асам̣варад̣̇ийбанзна сад̇ад̇авихааривасзна т̇зрасса самбаж̇ан̃н̃аббагаасиний бан̃н̃аавзбуллаббад̇д̇и д̣̇ийбид̇аа. сад̇ад̇ам̣ бхигку самаахид̇од̇и самаабад̇д̇иб̣ахулад̇аад̣̇ассанзна наваанубуб̣б̣авихаарасамаабад̇д̇ияо д̣̇ассид̇аа. звам̣бхууд̇о бана бхигку ж̇ан̃н̃аа ниб̣б̣аанамад̇д̇анод̇и гад̇агижжад̇д̇аа уд̇д̇ари гаран̣ийяаабхаавад̇о гзвалам̣ ад̇д̇ано анубаад̣̇исзсаниб̣б̣аанамзва ж̇аанзяяа жинд̇зяяа, ан̃н̃амби д̇асса жинд̇зд̇аб̣б̣ам̣ над̇т̇ийд̇и ад̇хиббааяо.
Atha vā sati kāyagatā upaṭṭhitāti attano paresañca kāyassa yathāsabhāvapariññādīpanena therassa sativepullappatti dīpitā. Chasu phassāyatanesu saṃvutoti cakkhādīsu chasu dvāresu accantasaṃvaradīpanena satatavihārivasena therassa sampajaññappakāsinī paññāvepullappatti dīpitā. Satataṃ bhikkhu samāhitoti samāpattibahulatādassanena navānupubbavihārasamāpattiyo dassitā. Evaṃbhūto pana bhikkhu jaññā nibbānamattanoti katakiccattā uttari karaṇīyābhāvato kevalaṃ attano anupādisesanibbānameva jāneyya cinteyya, aññampi tassa cintetabbaṃ natthīti adhippāyo.
бан̃жамасуд̇д̇аван̣н̣анаа нидтид̇аа.
Pañcamasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / уд̣̇аанабаал̣и • Udānapāḷi / 5. махаамог̇г̇аллаанасуд̇д̇ам̣ • 5. Mahāmoggallānasuttaṃ
