| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. මහානාමසක්‌කසුත්‌තං
3. Mahānāmasakkasuttaṃ
74. එවං මෙ සුතං – එකං සමයං භගවා සක්‌කෙසු විහරති කපිලවත්‌ථුස්‌මිං නිග්‍රොධාරාමෙ. තෙන ඛො පන සමයෙන භගවා ගිලානාවුට්‌ඨිතො 1 හොති අචිරවුට්‌ඨිතො ගෙලඤ්‌ඤා. අථ ඛො මහානාමො සක්‌කො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො මහානාමො සක්‌කො භගවන්‌තං එතදවොච – ‘‘දීඝරත්‌තාහං, භන්‌තෙ, භගවතා එවං ධම්‌මං දෙසිතං ආජානාමි – ‘සමාහිතස්‌ස ඤාණං, නො අසමාහිතස්‌සා’ති. සමාධි නු ඛො, භන්‌තෙ, පුබ්‌බෙ, පච්‌ඡා ඤාණං; උදාහු ඤාණං පුබ්‌බෙ, පච්‌ඡා සමාධී’’ති? අථ ඛො ආයස්‌මතො ආනන්‌දස්‌ස එතදහොසි – ‘‘භගවා ඛො ගිලානවුට්‌ඨිතො අචිරවුට්‌ඨිතො ගෙලඤ්‌ඤා . අයඤ්‌ච මහානාමො සක්‌කො භගවන්‌තං අතිගම්‌භීරං පඤ්‌හං පුච්‌ඡති. යංනූනාහං මහානාමං සක්‌කං එකමන්‌තං අපනෙත්‌වා ධම්‌මං දෙසෙය්‍ය’’න්‌ති.
74. Evaṃ me sutaṃ – ekaṃ samayaṃ bhagavā sakkesu viharati kapilavatthusmiṃ nigrodhārāme. Tena kho pana samayena bhagavā gilānāvuṭṭhito 2 hoti aciravuṭṭhito gelaññā. Atha kho mahānāmo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho mahānāmo sakko bhagavantaṃ etadavoca – ‘‘dīgharattāhaṃ, bhante, bhagavatā evaṃ dhammaṃ desitaṃ ājānāmi – ‘samāhitassa ñāṇaṃ, no asamāhitassā’ti. Samādhi nu kho, bhante, pubbe, pacchā ñāṇaṃ; udāhu ñāṇaṃ pubbe, pacchā samādhī’’ti? Atha kho āyasmato ānandassa etadahosi – ‘‘bhagavā kho gilānavuṭṭhito aciravuṭṭhito gelaññā . Ayañca mahānāmo sakko bhagavantaṃ atigambhīraṃ pañhaṃ pucchati. Yaṃnūnāhaṃ mahānāmaṃ sakkaṃ ekamantaṃ apanetvā dhammaṃ deseyya’’nti.
අථ ඛො ආයස්‌මා ආනන්‌දො මහානාමං සක්‌කං බාහායං ගහෙත්‌වා එකමන්‌තං අපනෙත්‌වා මහානාමං සක්‌කං එතදවොච – ‘‘සෙඛම්‌පි ඛො, මහානාම, සීලං වුත්‌තං භගවතා, අසෙඛම්‌පි සීලං වුත්‌තං භගවතා; සෙඛොපි සමාධි වුත්‌තො භගවතා , අසෙඛොපි සමාධි වුත්‌තො භගවතා; සෙඛාපි පඤ්‌ඤා වුත්‌තා භගවතා, අසෙඛාපි පඤ්‌ඤා වුත්‌තා භගවතා. කතමඤ්‌ච, මහානාම , සෙඛං සීලං? ඉධ, මහානාම, භික්‌ඛු සීලවා හොති පාතිමොක්‌ඛසංවරසංවුතො විහරති…පෙ.… සමාදාය සික්‌ඛති සික්‌ඛාපදෙසු. ඉදං වුච්‌චති, මහානාම, සෙඛං සීලං’’.
Atha kho āyasmā ānando mahānāmaṃ sakkaṃ bāhāyaṃ gahetvā ekamantaṃ apanetvā mahānāmaṃ sakkaṃ etadavoca – ‘‘sekhampi kho, mahānāma, sīlaṃ vuttaṃ bhagavatā, asekhampi sīlaṃ vuttaṃ bhagavatā; sekhopi samādhi vutto bhagavatā , asekhopi samādhi vutto bhagavatā; sekhāpi paññā vuttā bhagavatā, asekhāpi paññā vuttā bhagavatā. Katamañca, mahānāma , sekhaṃ sīlaṃ? Idha, mahānāma, bhikkhu sīlavā hoti pātimokkhasaṃvarasaṃvuto viharati…pe… samādāya sikkhati sikkhāpadesu. Idaṃ vuccati, mahānāma, sekhaṃ sīlaṃ’’.
‘‘කතමො ච, මහානාම, සෙඛො සමාධි? ඉධ, මහානාම, භික්‌ඛු විවිච්‌චෙව කාමෙහි…පෙ.… චතුත්‌ථං ඣානං උපසම්‌පජ්‌ජ විහරති. අයං වුච්‌චති, මහානාම, සෙඛො සමාධි.
‘‘Katamo ca, mahānāma, sekho samādhi? Idha, mahānāma, bhikkhu vivicceva kāmehi…pe… catutthaṃ jhānaṃ upasampajja viharati. Ayaṃ vuccati, mahānāma, sekho samādhi.
‘‘කතමා ච, මහානාම, සෙඛා පඤ්‌ඤා? ඉධ, මහානාම, භික්‌ඛු ඉදං දුක්‌ඛන්‌ති යථාභූතං පජානාති…පෙ.… අයං දුක්‌ඛනිරොධගාමිනී පටිපදාති යථාභූතං පජානාති. අයං වුච්‌චති, මහානාම, සෙඛා පඤ්‌ඤා.
‘‘Katamā ca, mahānāma, sekhā paññā? Idha, mahānāma, bhikkhu idaṃ dukkhanti yathābhūtaṃ pajānāti…pe… ayaṃ dukkhanirodhagāminī paṭipadāti yathābhūtaṃ pajānāti. Ayaṃ vuccati, mahānāma, sekhā paññā.
‘‘ස ඛො සො, මහානාම, අරියසාවකො එවං සීලසම්‌පන්‌නො එවං සමාධිසම්‌පන්‌නො එවං පඤ්‌ඤාසම්‌පන්‌නො ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරති. එවං ඛො, මහානාම, සෙඛම්‌පි සීලං වුත්‌තං භගවතා, අසෙඛම්‌පි සීලං වුත්‌තං භගවතා; සෙඛොපි සමාධි වුත්‌තො භගවතා, අසෙඛොපි සමාධි වුත්‌තො භගවතා; සෙඛාපි පඤ්‌ඤා වුත්‌තා භගවතා, අසෙඛාපි පඤ්‌ඤා වුත්‌තා භගවතා’’ති. තතියං.
‘‘Sa kho so, mahānāma, ariyasāvako evaṃ sīlasampanno evaṃ samādhisampanno evaṃ paññāsampanno āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Evaṃ kho, mahānāma, sekhampi sīlaṃ vuttaṃ bhagavatā, asekhampi sīlaṃ vuttaṃ bhagavatā; sekhopi samādhi vutto bhagavatā, asekhopi samādhi vutto bhagavatā; sekhāpi paññā vuttā bhagavatā, asekhāpi paññā vuttā bhagavatā’’ti. Tatiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 3. මහානාමසක්‌කසුත්‌තවණ්‌ණනා • 3. Mahānāmasakkasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 3. මහානාමසක්‌කසුත්‌තවණ්‌ණනා • 3. Mahānāmasakkasuttavaṇṇanā
