| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༣. མཧཱནཱམསཀྐསུཏྟཾ
3. Mahānāmasakkasuttaṃ
༧༤. ཨེཝཾ མེ སུཏཾ – ཨེཀཾ སམཡཾ བྷགཝཱ སཀྐེསུ ཝིཧརཏི ཀཔིལཝཏྠུསྨིཾ ནིགྲོདྷཱརཱམེ། ཏེན ཁོ པན སམཡེན བྷགཝཱ གིལཱནཱཝུཊྛིཏོ 1 ཧོཏི ཨཙིརཝུཊྛིཏོ གེལཉྙཱ། ཨཐ ཁོ མཧཱནཱམོ སཀྐོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ མཧཱནཱམོ སཀྐོ བྷགཝནྟཾ ཨེཏདཝོཙ – ‘‘དཱིགྷརཏྟཱཧཾ, བྷནྟེ, བྷགཝཏཱ ཨེཝཾ དྷམྨཾ དེསིཏཾ ཨཱཛཱནཱམི – ‘སམཱཧིཏསྶ ཉཱཎཾ, ནོ ཨསམཱཧིཏསྶཱ’ཏི། སམཱདྷི ནུ ཁོ, བྷནྟེ, པུབྦེ, པཙྪཱ ཉཱཎཾ; ཨུདཱཧུ ཉཱཎཾ པུབྦེ, པཙྪཱ སམཱདྷཱི’’ཏི? ཨཐ ཁོ ཨཱཡསྨཏོ ཨཱནནྡསྶ ཨེཏདཧོསི – ‘‘བྷགཝཱ ཁོ གིལཱནཝུཊྛིཏོ ཨཙིརཝུཊྛིཏོ གེལཉྙཱ ། ཨཡཉྩ མཧཱནཱམོ སཀྐོ བྷགཝནྟཾ ཨཏིགམྦྷཱིརཾ པཉྷཾ པུཙྪཏི། ཡཾནཱུནཱཧཾ མཧཱནཱམཾ སཀྐཾ ཨེཀམནྟཾ ཨཔནེཏྭཱ དྷམྨཾ དེསེཡྻ’’ནྟི།
74. Evaṃ me sutaṃ – ekaṃ samayaṃ bhagavā sakkesu viharati kapilavatthusmiṃ nigrodhārāme. Tena kho pana samayena bhagavā gilānāvuṭṭhito 2 hoti aciravuṭṭhito gelaññā. Atha kho mahānāmo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho mahānāmo sakko bhagavantaṃ etadavoca – ‘‘dīgharattāhaṃ, bhante, bhagavatā evaṃ dhammaṃ desitaṃ ājānāmi – ‘samāhitassa ñāṇaṃ, no asamāhitassā’ti. Samādhi nu kho, bhante, pubbe, pacchā ñāṇaṃ; udāhu ñāṇaṃ pubbe, pacchā samādhī’’ti? Atha kho āyasmato ānandassa etadahosi – ‘‘bhagavā kho gilānavuṭṭhito aciravuṭṭhito gelaññā . Ayañca mahānāmo sakko bhagavantaṃ atigambhīraṃ pañhaṃ pucchati. Yaṃnūnāhaṃ mahānāmaṃ sakkaṃ ekamantaṃ apanetvā dhammaṃ deseyya’’nti.
ཨཐ ཁོ ཨཱཡསྨཱ ཨཱནནྡོ མཧཱནཱམཾ སཀྐཾ བཱཧཱཡཾ གཧེཏྭཱ ཨེཀམནྟཾ ཨཔནེཏྭཱ མཧཱནཱམཾ སཀྐཾ ཨེཏདཝོཙ – ‘‘སེཁམྤི ཁོ, མཧཱནཱམ, སཱིལཾ ཝུཏྟཾ བྷགཝཏཱ, ཨསེཁམྤི སཱིལཾ ཝུཏྟཾ བྷགཝཏཱ; སེཁོཔི སམཱདྷི ཝུཏྟོ བྷགཝཏཱ , ཨསེཁོཔི སམཱདྷི ཝུཏྟོ བྷགཝཏཱ; སེཁཱཔི པཉྙཱ ཝུཏྟཱ བྷགཝཏཱ, ཨསེཁཱཔི པཉྙཱ ཝུཏྟཱ བྷགཝཏཱ། ཀཏམཉྩ, མཧཱནཱམ , སེཁཾ སཱིལཾ? ཨིདྷ, མཧཱནཱམ, བྷིཀྑུ སཱིལཝཱ ཧོཏི པཱཏིམོཀྑསཾཝརསཾཝུཏོ ཝིཧརཏི…པེ॰… སམཱདཱཡ སིཀྑཏི སིཀྑཱཔདེསུ། ཨིདཾ ཝུཙྩཏི, མཧཱནཱམ, སེཁཾ སཱིལཾ’’།
Atha kho āyasmā ānando mahānāmaṃ sakkaṃ bāhāyaṃ gahetvā ekamantaṃ apanetvā mahānāmaṃ sakkaṃ etadavoca – ‘‘sekhampi kho, mahānāma, sīlaṃ vuttaṃ bhagavatā, asekhampi sīlaṃ vuttaṃ bhagavatā; sekhopi samādhi vutto bhagavatā , asekhopi samādhi vutto bhagavatā; sekhāpi paññā vuttā bhagavatā, asekhāpi paññā vuttā bhagavatā. Katamañca, mahānāma , sekhaṃ sīlaṃ? Idha, mahānāma, bhikkhu sīlavā hoti pātimokkhasaṃvarasaṃvuto viharati…pe… samādāya sikkhati sikkhāpadesu. Idaṃ vuccati, mahānāma, sekhaṃ sīlaṃ’’.
‘‘ཀཏམོ ཙ, མཧཱནཱམ, སེཁོ སམཱདྷི? ཨིདྷ, མཧཱནཱམ, བྷིཀྑུ ཝིཝིཙྩེཝ ཀཱམེཧི…པེ॰… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི། ཨཡཾ ཝུཙྩཏི, མཧཱནཱམ, སེཁོ སམཱདྷི།
‘‘Katamo ca, mahānāma, sekho samādhi? Idha, mahānāma, bhikkhu vivicceva kāmehi…pe… catutthaṃ jhānaṃ upasampajja viharati. Ayaṃ vuccati, mahānāma, sekho samādhi.
‘‘ཀཏམཱ ཙ, མཧཱནཱམ, སེཁཱ པཉྙཱ? ཨིདྷ, མཧཱནཱམ, བྷིཀྑུ ཨིདཾ དུཀྑནྟི ཡཐཱབྷཱུཏཾ པཛཱནཱཏི…པེ॰… ཨཡཾ དུཀྑནིརོདྷགཱམིནཱི པཊིཔདཱཏི ཡཐཱབྷཱུཏཾ པཛཱནཱཏི། ཨཡཾ ཝུཙྩཏི, མཧཱནཱམ, སེཁཱ པཉྙཱ།
‘‘Katamā ca, mahānāma, sekhā paññā? Idha, mahānāma, bhikkhu idaṃ dukkhanti yathābhūtaṃ pajānāti…pe… ayaṃ dukkhanirodhagāminī paṭipadāti yathābhūtaṃ pajānāti. Ayaṃ vuccati, mahānāma, sekhā paññā.
‘‘ས ཁོ སོ, མཧཱནཱམ, ཨརིཡསཱཝཀོ ཨེཝཾ སཱིལསམྤནྣོ ཨེཝཾ སམཱདྷིསམྤནྣོ ཨེཝཾ པཉྙཱསམྤནྣོ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཏི། ཨེཝཾ ཁོ, མཧཱནཱམ, སེཁམྤི སཱིལཾ ཝུཏྟཾ བྷགཝཏཱ, ཨསེཁམྤི སཱིལཾ ཝུཏྟཾ བྷགཝཏཱ; སེཁོཔི སམཱདྷི ཝུཏྟོ བྷགཝཏཱ, ཨསེཁོཔི སམཱདྷི ཝུཏྟོ བྷགཝཏཱ; སེཁཱཔི པཉྙཱ ཝུཏྟཱ བྷགཝཏཱ, ཨསེཁཱཔི པཉྙཱ ཝུཏྟཱ བྷགཝཏཱ’’ཏི། ཏཏིཡཾ།
‘‘Sa kho so, mahānāma, ariyasāvako evaṃ sīlasampanno evaṃ samādhisampanno evaṃ paññāsampanno āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Evaṃ kho, mahānāma, sekhampi sīlaṃ vuttaṃ bhagavatā, asekhampi sīlaṃ vuttaṃ bhagavatā; sekhopi samādhi vutto bhagavatā, asekhopi samādhi vutto bhagavatā; sekhāpi paññā vuttā bhagavatā, asekhāpi paññā vuttā bhagavatā’’ti. Tatiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༣. མཧཱནཱམསཀྐསུཏྟཝཎྞནཱ • 3. Mahānāmasakkasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༣. མཧཱནཱམསཀྐསུཏྟཝཎྞནཱ • 3. Mahānāmasakkasuttavaṇṇanā
