| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၃. မဟာနာမသက္ကသုတ္တဝဏ္ဏနာ
3. Mahānāmasakkasuttavaṇṇanā
၇၄. တတိယေ ဂိလာနာ ဝုဋ္ဌိတောတိ ဂိလာနော ဟုတ္ဝာ ဝုဋ္ဌိတော။ ဂေလညာတိ ဂိလာနဘာဝတော။ ဥပသင္ကမီတိ ဘုတ္တပာတရာသော မာလာဂန္ဓာဒီနိ အာဒာယ မဟာပရိဝာရပရိဝုတော ဥပသင္ကမိ။ ဗာဟာယံ ဂဟေတ္ဝာတိ န ဗာဟာယံ ဂဟေတ္ဝာ အာကဍ္ဎိ, နိသိန္နာသနတော ဝုဋ္ဌာယ တသ္သ သန္တိကံ ဂန္တ္ဝာ ဒက္ခိဏဗာဟာယံ အင္ဂုဋ္ဌကေန သညံ ဒတ္ဝာ ဧကမန္တံ အပနေသီတိ ဝေဒိတဗ္ဗော။ အထသ္သ ‘‘သေခမ္ပိ ခော, မဟာနာမ, သီလ’’န္တိအာဒိနာ နယေန သတ္တန္နံ သေခာနံ သီလဉ္စ သမာဓိဉ္စ ပညဉ္စ ကထေတ္ဝာ ဥပရိ အရဟတ္တဖလဝသေန အသေခာ သီလသမာဓိပညာယော ကထေန္တော – ‘‘သေခသမာဓိတော သေခံ ဝိပသ္သနာဉာဏံ အသေခဉ္စ ဖလဉာဏံ ပစ္ဆာ, သေခဝိပသ္သနာဉာဏတော စ အသေခဖလသမာဓိ ပစ္ဆာ ဥပ္ပဇ္ဇတီ’’တိ ဒီပေသိ။ ယာနိ ပန သမ္ပယုတ္တာနိ သမာဓိဉာဏာနိ, တေသံ အပစ္ဆာ အပုရေ ဥပ္ပတ္တိ ဝေဒိတဗ္ဗာတိ။
74. Tatiye gilānā vuṭṭhitoti gilāno hutvā vuṭṭhito. Gelaññāti gilānabhāvato. Upasaṅkamīti bhuttapātarāso mālāgandhādīni ādāya mahāparivāraparivuto upasaṅkami. Bāhāyaṃ gahetvāti na bāhāyaṃ gahetvā ākaḍḍhi, nisinnāsanato vuṭṭhāya tassa santikaṃ gantvā dakkhiṇabāhāyaṃ aṅguṭṭhakena saññaṃ datvā ekamantaṃ apanesīti veditabbo. Athassa ‘‘sekhampi kho, mahānāma, sīla’’ntiādinā nayena sattannaṃ sekhānaṃ sīlañca samādhiñca paññañca kathetvā upari arahattaphalavasena asekhā sīlasamādhipaññāyo kathento – ‘‘sekhasamādhito sekhaṃ vipassanāñāṇaṃ asekhañca phalañāṇaṃ pacchā, sekhavipassanāñāṇato ca asekhaphalasamādhi pacchā uppajjatī’’ti dīpesi. Yāni pana sampayuttāni samādhiñāṇāni, tesaṃ apacchā apure uppatti veditabbāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၃. မဟာနာမသက္ကသုတ္တံ • 3. Mahānāmasakkasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၃. မဟာနာမသက္ကသုတ္တဝဏ္ဏနာ • 3. Mahānāmasakkasuttavaṇṇanā
