| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
7. மஹானாமஸிக்கா²பத³வண்ணனா
7. Mahānāmasikkhāpadavaṇṇanā
ஸப்³ப³ஞ்சேதங் வத்து²வஸேன வுத்தந்தி ‘‘அகி³லானேன பி⁴க்கு²னா சதுமாஸபச்சயபவாரணா ஸாதி³தப்³பா³ அஞ்ஞத்ர புனபவாரணாய அஞ்ஞத்ர நிச்சபவாரணாயா’’தி (பாசி॰ 306) ஏதங் ஸப்³ப³ங் ஸிக்கா²பத³னிதா³னஸங்கா²தஸ்ஸ வத்து²னோ வஸேன வுத்தங். தத்த² ஹி மஹானாமேன ஸக்கேன ‘‘இச்சா²மஹங், ப⁴ந்தே, ஸங்க⁴ங் சதுமாஸங் பே⁴ஸஜ்ஜேன பவாரேது’’ந்திஆதி³னா (பாசி॰ 303) உஸ்ஸன்னுஸ்ஸன்னேன ச பே⁴ஸஜ்ஜேன சதுமாஸங் புன நிச்சங் பவாரணா கதா, தஸ்மா ப⁴க³வதா தஸ்ஸ வஸேன ஏவங் வுத்தந்தி வுத்தங் ஹோதி. அஞ்ஞத்ர புனபவாரணாயாதி யதி³ புனபவாரணா அத்தி², தங் ட²பெத்வா. அஞ்ஞத்ர நிச்சபவாரணாயாதி எத்தா²பி ஏஸேவ நயோ. யதி³ பன தாபி அத்தி², ஸாதி³தப்³பா³வாதி அதி⁴ப்பாயோ. தேனாஹ ‘‘அயங் பனெத்த² அத்தோ²’’திஆதி³. தத்தா²தி திஸ்ஸங் பவாரணாயங். பே⁴ஸஜ்ஜேஹி வா பரிச்சே²தோ³ கதோ ஹோதீதி ‘‘ஸப்பி தேல’’ந்தி ஏவமாதி³னா நாமவஸேன வா ‘‘பத்தே²ன நாளியா ஆள்ஹகேனா’’திஆதி³னா பரிமாணவஸேன வா ‘‘எத்தகானி வா பே⁴ஸஜ்ஜானி விஞ்ஞாபேதப்³பா³னீ’’தி பே⁴ஸஜ்ஜேஹி பரிச்சே²தோ³ கதோ ஹோதி. நபே⁴ஸஜ்ஜகரணீயேதி மிஸ்ஸகப⁴த்தேனாபி சே யாபேதுங் ஸக்கோதி, நபே⁴ஸஜ்ஜகரணீயங் நாம ஹோதி. அஞ்ஞங் பே⁴ஸஜ்ஜந்தி ஸப்பினா பவாரிதோ தேலங், ஆள்ஹகேன பவாரிதோ தோ³ணங்.
Sabbañcetaṃvatthuvasena vuttanti ‘‘agilānena bhikkhunā catumāsapaccayapavāraṇā sāditabbā aññatra punapavāraṇāya aññatra niccapavāraṇāyā’’ti (pāci. 306) etaṃ sabbaṃ sikkhāpadanidānasaṅkhātassa vatthuno vasena vuttaṃ. Tattha hi mahānāmena sakkena ‘‘icchāmahaṃ, bhante, saṅghaṃ catumāsaṃ bhesajjena pavāretu’’ntiādinā (pāci. 303) ussannussannena ca bhesajjena catumāsaṃ puna niccaṃ pavāraṇā katā, tasmā bhagavatā tassa vasena evaṃ vuttanti vuttaṃ hoti. Aññatra punapavāraṇāyāti yadi punapavāraṇā atthi, taṃ ṭhapetvā. Aññatra niccapavāraṇāyāti etthāpi eseva nayo. Yadi pana tāpi atthi, sāditabbāvāti adhippāyo. Tenāha ‘‘ayaṃ panettha attho’’tiādi. Tatthāti tissaṃ pavāraṇāyaṃ. Bhesajjehi vā paricchedo kato hotīti ‘‘sappi tela’’nti evamādinā nāmavasena vā ‘‘patthena nāḷiyā āḷhakenā’’tiādinā parimāṇavasena vā ‘‘ettakāni vā bhesajjāni viññāpetabbānī’’ti bhesajjehi paricchedo kato hoti. Nabhesajjakaraṇīyeti missakabhattenāpi ce yāpetuṃ sakkoti, nabhesajjakaraṇīyaṃ nāma hoti. Aññaṃ bhesajjanti sappinā pavārito telaṃ, āḷhakena pavārito doṇaṃ.
யதா²பூ⁴தங் ஆசிக்கி²த்வாதி ‘‘இமேஹி தயா பே⁴ஸஜ்ஜேஹி பவாரிதம்ஹா, அம்ஹாகஞ்ச இமினா ச இமினா ச பே⁴ஸஜ்ஜேன அத்தோ², யாஸு தயா ரத்தீஸு பவாரிதம்ஹா, தா ரத்தியோ வீதிவத்தா, அம்ஹாகஞ்ச பே⁴ஸஜ்ஜேன அத்தோ²’’தி யதா²பூ⁴தங் ஆரோசெத்வா. ஏவஞ்ச விஞ்ஞாபேதுங் கி³லானோவ லப⁴தி, ந இதரோ.
Yathābhūtaṃ ācikkhitvāti ‘‘imehi tayā bhesajjehi pavāritamhā, amhākañca iminā ca iminā ca bhesajjena attho, yāsu tayā rattīsu pavāritamhā, tā rattiyo vītivattā, amhākañca bhesajjena attho’’ti yathābhūtaṃ ārocetvā. Evañca viññāpetuṃ gilānova labhati, na itaro.
மஹானாமஸிக்கா²பத³வண்ணனா நிட்டி²தா.
Mahānāmasikkhāpadavaṇṇanā niṭṭhitā.
