| Library / Tipiṭaka / ติปิฎก • Tipiṭaka / สารตฺถทีปนี-ฎีกา • Sāratthadīpanī-ṭīkā |
๗. มหานามสิกฺขาปทวณฺณนา
7. Mahānāmasikkhāpadavaṇṇanā
๓๐๓. สตฺตเม มหานาโม นามาติ อนุรุทฺธเตฺถรสฺส ภาตา ภควโต จูฬปิตุ ปุโตฺตฯ สุโทฺธทโน สโกฺกทโน สุโกฺกทโน โธโตทโน อมิโตทโนติ อิเม หิ ปญฺจ ชนา ภาตโรฯ อมิตา นาม เทวี เตสํ ภคินี, ติสฺสเตฺถโร ตสฺสา ปุโตฺตฯ ตถาคโต จ นนฺทเตฺถโร จ สุโทฺธทนสฺส ปุตฺตา, มหานาโม จ อนุรุทฺธเตฺถโร จ สุโกฺกทนสฺส, อานนฺทเตฺถโร อมิโตทนสฺสฯ โส ภควโต กนิโฎฺฐ, มหานาโม มหลฺลกตโร สกทาคามี อริยสาวโกฯ เตน วุตฺตํ ‘‘มหานาโม นาม…เป.… อริยสาวโก’’ติฯ
303. Sattame mahānāmo nāmāti anuruddhattherassa bhātā bhagavato cūḷapitu putto. Suddhodano sakkodano sukkodano dhotodano amitodanoti ime hi pañca janā bhātaro. Amitā nāma devī tesaṃ bhaginī, tissatthero tassā putto. Tathāgato ca nandatthero ca suddhodanassa puttā, mahānāmo ca anuruddhatthero ca sukkodanassa, ānandatthero amitodanassa. So bhagavato kaniṭṭho, mahānāmo mahallakataro sakadāgāmī ariyasāvako. Tena vuttaṃ ‘‘mahānāmo nāma…pe… ariyasāvako’’ti.
๓๐๕-๓๐๖. ปาฬิยํ อชฺชโณฺหติ อชฺช เอกทิวสนฺติ อโตฺถ, ‘‘อชฺชโน’’ติ วา อโตฺถ คเหตโพฺพ, โน อมฺหากํฯ กาลํ อาหริสฺสถาติ เสฺว หริสฺสถฯ ตโต เจ อุตฺตริ สาทิเยยฺยาติ สเจ ตตฺถ รตฺตีหิ วา เภสเชฺชหิ วา ปริเจฺฉโท กโต โหติ ‘‘เอตฺตกาเยว วา รตฺติโย เอตฺตกานิ วา เภสชฺชานิ วิญฺญาเปตพฺพานี’’ติ, ตโต รตฺติปริยนฺตโต วา เภสชฺชปริยนฺตโต วา อุตฺตริ วิญฺญาเปโนฺต สาทิเยยฺยฯ ‘‘อิเมหิ ตยา เภสเชฺชหิ ปวาริตมฺห, อมฺหากญฺจ อิมินาว เภสเชฺชน อโตฺถ’’ติ อาจิกฺขิตฺวา วิญฺญาเปตุมฺปิ คิลาโนว ลภติฯ
305-306. Pāḷiyaṃ ajjaṇhoti ajja ekadivasanti attho, ‘‘ajjano’’ti vā attho gahetabbo, no amhākaṃ. Kālaṃ āharissathāti sve harissatha. Tato ce uttari sādiyeyyāti sace tattha rattīhi vā bhesajjehi vā paricchedo kato hoti ‘‘ettakāyeva vā rattiyo ettakāni vā bhesajjāni viññāpetabbānī’’ti, tato rattipariyantato vā bhesajjapariyantato vā uttari viññāpento sādiyeyya. ‘‘Imehi tayā bhesajjehi pavāritamha, amhākañca imināva bhesajjena attho’’ti ācikkhitvā viññāpetumpi gilānova labhati.
๓๑๐. ยสฺมา สงฺฆปวารณายเมวายํ วิธิ, ตสฺมา ‘‘เย อตฺตโน ปุคฺคลิกาย ปวารณาย ปวาริตา’’ติ วุตฺตํฯ เสสํ อุตฺตานเมวฯ สงฺฆปวารณตา , เภสชฺชวิญฺญตฺติ, อคิลานตา, ปริยนฺตาติกฺกโมติ อิมานิ ปเนตฺถ จตฺตาริ องฺคานิฯ
310. Yasmā saṅghapavāraṇāyamevāyaṃ vidhi, tasmā ‘‘ye attano puggalikāya pavāraṇāya pavāritā’’ti vuttaṃ. Sesaṃ uttānameva. Saṅghapavāraṇatā , bhesajjaviññatti, agilānatā, pariyantātikkamoti imāni panettha cattāri aṅgāni.
มหานามสิกฺขาปทวณฺณนา นิฎฺฐิตาฯ
Mahānāmasikkhāpadavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวิภงฺค • Mahāvibhaṅga / ๕. อเจลกวโคฺค • 5. Acelakavaggo
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวิภงฺค-อฎฺฐกถา • Mahāvibhaṅga-aṭṭhakathā / ๗. มหานามสิกฺขาปทวณฺณนา • 7. Mahānāmasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ๗. มหานามสิกฺขาปทวณฺณนา • 7. Mahānāmasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ๗. มหานามสิกฺขาปทวณฺณนา • 7. Mahānāmasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ๗. มหานามสิกฺขาปทํ • 7. Mahānāmasikkhāpadaṃ
