| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
၇. မဟာနာမသိက္ခာပဒဝဏ္ဏနာ
7. Mahānāmasikkhāpadavaṇṇanā
၃၀၃. သတ္တမေ မဟာနာမော နာမာတိ အနုရုဒ္ဓတ္ထေရသ္သ ဘာတာ ဘဂဝတော စူဠပိတု ပုတ္တော။ သုဒ္ဓောဒနော သက္ကောဒနော သုက္ကောဒနော ဓောတောဒနော အမိတောဒနောတိ ဣမေ ဟိ ပဉ္စ ဇနာ ဘာတရော။ အမိတာ နာမ ဒေဝီ တေသံ ဘဂိနီ, တိသ္သတ္ထေရော တသ္သာ ပုတ္တော။ တထာဂတော စ နန္ဒတ္ထေရော စ သုဒ္ဓောဒနသ္သ ပုတ္တာ, မဟာနာမော စ အနုရုဒ္ဓတ္ထေရော စ သုက္ကောဒနသ္သ, အာနန္ဒတ္ထေရော အမိတောဒနသ္သ။ သော ဘဂဝတော ကနိဋ္ဌော, မဟာနာမော မဟလ္လကတရော သကဒာဂာမီ အရိယသာဝကော။ တေန ဝုတ္တံ ‘‘မဟာနာမော နာမ။ပေ.။ အရိယသာဝကော’’တိ။
303. Sattame mahānāmo nāmāti anuruddhattherassa bhātā bhagavato cūḷapitu putto. Suddhodano sakkodano sukkodano dhotodano amitodanoti ime hi pañca janā bhātaro. Amitā nāma devī tesaṃ bhaginī, tissatthero tassā putto. Tathāgato ca nandatthero ca suddhodanassa puttā, mahānāmo ca anuruddhatthero ca sukkodanassa, ānandatthero amitodanassa. So bhagavato kaniṭṭho, mahānāmo mahallakataro sakadāgāmī ariyasāvako. Tena vuttaṃ ‘‘mahānāmo nāma…pe… ariyasāvako’’ti.
၃၀၅-၃၀၆. ပာဠိယံ အဇ္ဇဏ္ဟောတိ အဇ္ဇ ဧကဒိဝသန္တိ အတ္ထော, ‘‘အဇ္ဇနော’’တိ ဝာ အတ္ထော ဂဟေတဗ္ဗော, နော အမ္ဟာကံ။ ကာလံ အာဟရိသ္သထာတိ သ္ဝေ ဟရိသ္သထ။ တတော စေ ဥတ္တရိ သာဒိယေယ္ယာတိ သစေ တတ္ထ ရတ္တီဟိ ဝာ ဘေသဇ္ဇေဟိ ဝာ ပရိစ္ဆေဒော ကတော ဟောတိ ‘‘ဧတ္တကာယေဝ ဝာ ရတ္တိယော ဧတ္တကာနိ ဝာ ဘေသဇ္ဇာနိ ဝိညာပေတဗ္ဗာနီ’’တိ, တတော ရတ္တိပရိယန္တတော ဝာ ဘေသဇ္ဇပရိယန္တတော ဝာ ဥတ္တရိ ဝိညာပေန္တော သာဒိယေယ္ယ။ ‘‘ဣမေဟိ တယာ ဘေသဇ္ဇေဟိ ပဝာရိတမ္ဟ, အမ္ဟာကဉ္စ ဣမိနာဝ ဘေသဇ္ဇေန အတ္ထော’’တိ အာစိက္ခိတ္ဝာ ဝိညာပေတုမ္ပိ ဂိလာနောဝ လဘတိ။
305-306. Pāḷiyaṃ ajjaṇhoti ajja ekadivasanti attho, ‘‘ajjano’’ti vā attho gahetabbo, no amhākaṃ. Kālaṃ āharissathāti sve harissatha. Tato ce uttari sādiyeyyāti sace tattha rattīhi vā bhesajjehi vā paricchedo kato hoti ‘‘ettakāyeva vā rattiyo ettakāni vā bhesajjāni viññāpetabbānī’’ti, tato rattipariyantato vā bhesajjapariyantato vā uttari viññāpento sādiyeyya. ‘‘Imehi tayā bhesajjehi pavāritamha, amhākañca imināva bhesajjena attho’’ti ācikkhitvā viññāpetumpi gilānova labhati.
၃၁၀. ယသ္မာ သင္ဃပဝာရဏာယမေဝာယံ ဝိဓိ, တသ္မာ ‘‘ယေ အတ္တနော ပုဂ္ဂလိကာယ ပဝာရဏာယ ပဝာရိတာ’’တိ ဝုတ္တံ။ သေသံ ဥတ္တာနမေဝ။ သင္ဃပဝာရဏတာ , ဘေသဇ္ဇဝိညတ္တိ, အဂိလာနတာ, ပရိယန္တာတိက္ကမောတိ ဣမာနိ ပနေတ္ထ စတ္တာရိ အင္ဂာနိ။
310. Yasmā saṅghapavāraṇāyamevāyaṃ vidhi, tasmā ‘‘ye attano puggalikāya pavāraṇāya pavāritā’’ti vuttaṃ. Sesaṃ uttānameva. Saṅghapavāraṇatā , bhesajjaviññatti, agilānatā, pariyantātikkamoti imāni panettha cattāri aṅgāni.
မဟာနာမသိက္ခာပဒဝဏ္ဏနာ နိဋ္ဌိတာ။
Mahānāmasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၅. အစေလကဝဂ္ဂော • 5. Acelakavaggo
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၇. မဟာနာမသိက္ခာပဒဝဏ္ဏနာ • 7. Mahānāmasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၇. မဟာနာမသိက္ခာပဒဝဏ္ဏနာ • 7. Mahānāmasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၇. မဟာနာမသိက္ခာပဒဝဏ္ဏနာ • 7. Mahānāmasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၇. မဟာနာမသိက္ခာပဒံ • 7. Mahānāmasikkhāpadaṃ
