| Library / Tipiṭaka / තිපිටක • Tipiṭaka / සාරත්‌ථදීපනී-ටීකා • Sāratthadīpanī-ṭīkā |
7. මහානාමසික්‌ඛාපදවණ්‌ණනා
7. Mahānāmasikkhāpadavaṇṇanā
303. සත්‌තමෙ මහානාමො නාමාති අනුරුද්‌ධත්‌ථෙරස්‌ස භාතා භගවතො චූළපිතු පුත්‌තො. සුද්‌ධොදනො සක්‌කොදනො සුක්‌කොදනො ධොතොදනො අමිතොදනොති ඉමෙ හි පඤ්‌ච ජනා භාතරො. අමිතා නාම දෙවී තෙසං භගිනී, තිස්‌සත්‌ථෙරො තස්‌සා පුත්‌තො. තථාගතො ච නන්‌දත්‌ථෙරො ච සුද්‌ධොදනස්‌ස පුත්‌තා, මහානාමො ච අනුරුද්‌ධත්‌ථෙරො ච සුක්‌කොදනස්‌ස, ආනන්‌දත්‌ථෙරො අමිතොදනස්‌ස. සො භගවතො කනිට්‌ඨො, මහානාමො මහල්‌ලකතරො සකදාගාමී අරියසාවකො. තෙන වුත්‌තං ‘‘මහානාමො නාම…පෙ.… අරියසාවකො’’ති.
303. Sattame mahānāmo nāmāti anuruddhattherassa bhātā bhagavato cūḷapitu putto. Suddhodano sakkodano sukkodano dhotodano amitodanoti ime hi pañca janā bhātaro. Amitā nāma devī tesaṃ bhaginī, tissatthero tassā putto. Tathāgato ca nandatthero ca suddhodanassa puttā, mahānāmo ca anuruddhatthero ca sukkodanassa, ānandatthero amitodanassa. So bhagavato kaniṭṭho, mahānāmo mahallakataro sakadāgāmī ariyasāvako. Tena vuttaṃ ‘‘mahānāmo nāma…pe… ariyasāvako’’ti.
305-306. පාළියං අජ්‌ජණ්‌හොති අජ්‌ජ එකදිවසන්‌ති අත්‌ථො, ‘‘අජ්‌ජනො’’ති වා අත්‌ථො ගහෙතබ්‌බො, නො අම්‌හාකං. කාලං ආහරිස්‌සථාති ස්‌වෙ හරිස්‌සථ. තතො චෙ උත්‌තරි සාදියෙය්‍යාති සචෙ තත්‌ථ රත්‌තීහි වා භෙසජ්‌ජෙහි වා පරිච්‌ඡෙදො කතො හොති ‘‘එත්‌තකායෙව වා රත්‌තියො එත්‌තකානි වා භෙසජ්‌ජානි විඤ්‌ඤාපෙතබ්‌බානී’’ති, තතො රත්‌තිපරියන්‌තතො වා භෙසජ්‌ජපරියන්‌තතො වා උත්‌තරි විඤ්‌ඤාපෙන්‌තො සාදියෙය්‍ය. ‘‘ඉමෙහි තයා භෙසජ්‌ජෙහි පවාරිතම්‌හ, අම්‌හාකඤ්‌ච ඉමිනාව භෙසජ්‌ජෙන අත්‌ථො’’ති ආචික්‌ඛිත්‌වා විඤ්‌ඤාපෙතුම්‌පි ගිලානොව ලභති.
305-306. Pāḷiyaṃ ajjaṇhoti ajja ekadivasanti attho, ‘‘ajjano’’ti vā attho gahetabbo, no amhākaṃ. Kālaṃ āharissathāti sve harissatha. Tato ce uttari sādiyeyyāti sace tattha rattīhi vā bhesajjehi vā paricchedo kato hoti ‘‘ettakāyeva vā rattiyo ettakāni vā bhesajjāni viññāpetabbānī’’ti, tato rattipariyantato vā bhesajjapariyantato vā uttari viññāpento sādiyeyya. ‘‘Imehi tayā bhesajjehi pavāritamha, amhākañca imināva bhesajjena attho’’ti ācikkhitvā viññāpetumpi gilānova labhati.
310. යස්‌මා සඞ්‌ඝපවාරණායමෙවායං විධි, තස්‌මා ‘‘යෙ අත්‌තනො පුග්‌ගලිකාය පවාරණාය පවාරිතා’’ති වුත්‌තං. සෙසං උත්‌තානමෙව. සඞ්‌ඝපවාරණතා , භෙසජ්‌ජවිඤ්‌ඤත්‌ති, අගිලානතා, පරියන්‌තාතික්‌කමොති ඉමානි පනෙත්‌ථ චත්‌තාරි අඞ්‌ගානි.
310. Yasmā saṅghapavāraṇāyamevāyaṃ vidhi, tasmā ‘‘ye attano puggalikāya pavāraṇāya pavāritā’’ti vuttaṃ. Sesaṃ uttānameva. Saṅghapavāraṇatā , bhesajjaviññatti, agilānatā, pariyantātikkamoti imāni panettha cattāri aṅgāni.
මහානාමසික්‌ඛාපදවණ්‌ණනා නිට්‌ඨිතා.
Mahānāmasikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 5. අචෙලකවග්‌ගො • 5. Acelakavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 7. මහානාමසික්‌ඛාපදවණ්‌ණනා • 7. Mahānāmasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 7. මහානාමසික්‌ඛාපදවණ්‌ණනා • 7. Mahānāmasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 7. මහානාමසික්‌ඛාපදවණ්‌ණනා • 7. Mahānāmasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 7. මහානාමසික්‌ඛාපදං • 7. Mahānāmasikkhāpadaṃ
