| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. மஹானாமஸுத்தங்
7. Mahānāmasuttaṃ
1033. ஏகங் ஸமயங் ப⁴க³வா ஸக்கேஸு விஹரதி கபிலவத்து²ஸ்மிங் நிக்³ரோதா⁴ராமே. அத² கோ² மஹானாமோ ஸக்கோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² மஹானாமோ ஸக்கோ ப⁴க³வந்தங் ஏதத³வோச –
1033. Ekaṃ samayaṃ bhagavā sakkesu viharati kapilavatthusmiṃ nigrodhārāme. Atha kho mahānāmo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho mahānāmo sakko bhagavantaṃ etadavoca –
‘‘கித்தாவதா நு கோ², ப⁴ந்தே, உபாஸகோ ஹோதீ’’தி? ‘‘யதோ கோ², மஹானாம, பு³த்³த⁴ங் ஸரணங் க³தோ ஹோதி, த⁴ம்மங் ஸரணங் க³தோ ஹோதி, ஸங்க⁴ங் ஸரணங் க³தோ ஹோதி – எத்தாவதா கோ², மஹானாம, உபாஸகோ ஹோதீ’’தி.
‘‘Kittāvatā nu kho, bhante, upāsako hotī’’ti? ‘‘Yato kho, mahānāma, buddhaṃ saraṇaṃ gato hoti, dhammaṃ saraṇaṃ gato hoti, saṅghaṃ saraṇaṃ gato hoti – ettāvatā kho, mahānāma, upāsako hotī’’ti.
‘‘கித்தாவதா பன, ப⁴ந்தே, உபாஸகோ ஸீலஸம்பன்னோ ஹோதீ’’தி? ‘‘யதோ கோ², மஹானாம, உபாஸகோ பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, ஸுராமேரயமஜ்ஜப்பமாத³ட்டா²னா படிவிரதோ ஹோதி, – எத்தாவதா கோ², மஹானாம, உபாஸகோ ஸீலஸம்பன்னோ ஹோதீ’’தி.
‘‘Kittāvatā pana, bhante, upāsako sīlasampanno hotī’’ti? ‘‘Yato kho, mahānāma, upāsako pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjappamādaṭṭhānā paṭivirato hoti, – ettāvatā kho, mahānāma, upāsako sīlasampanno hotī’’ti.
‘‘கித்தாவதா பன, ப⁴ந்தே, உபாஸகோ ஸத்³தா⁴ஸம்பன்னோ ஹோதீ’’தி? ‘‘இத⁴, மஹானாம, உபாஸகோ ஸத்³தோ⁴ ஹோதி, ஸத்³த³ஹதி ததா²க³தஸ்ஸ போ³தி⁴ங் – இதிபி ஸோ ப⁴க³வா…பே॰… ஸத்தா² தே³வமனுஸ்ஸானங் பு³த்³தோ⁴ ப⁴க³வாதி. எத்தாவதா கோ², மஹானாம, உபாஸகோ ஸத்³தா⁴ஸம்பன்னோ ஹோதீ’’தி.
‘‘Kittāvatā pana, bhante, upāsako saddhāsampanno hotī’’ti? ‘‘Idha, mahānāma, upāsako saddho hoti, saddahati tathāgatassa bodhiṃ – itipi so bhagavā…pe… satthā devamanussānaṃ buddho bhagavāti. Ettāvatā kho, mahānāma, upāsako saddhāsampanno hotī’’ti.
‘‘கித்தாவதா பன, ப⁴ந்தே, உபாஸகோ சாக³ஸம்பன்னோ ஹோதீ’’தி? ‘‘இத⁴, மஹானாம, உபாஸகோ விக³தமலமச்சே²ரேன சேதஸா அகா³ரங் அஜ்ஜா²வஸதி முத்தசாகோ³ பயதபாணி வொஸ்ஸக்³க³ரதோ யாசயோகோ³ தா³னஸங்விபா⁴க³ரதோ – எத்தாவதா கோ², மஹானாம, உபாஸகோ சாக³ஸம்பன்னோ ஹோதீ’’தி.
‘‘Kittāvatā pana, bhante, upāsako cāgasampanno hotī’’ti? ‘‘Idha, mahānāma, upāsako vigatamalamaccherena cetasā agāraṃ ajjhāvasati muttacāgo payatapāṇi vossaggarato yācayogo dānasaṃvibhāgarato – ettāvatā kho, mahānāma, upāsako cāgasampanno hotī’’ti.
‘‘கித்தாவதா பன, ப⁴ந்தே, உபாஸகோ பஞ்ஞாஸம்பன்னோ ஹோதீ’’தி? ‘‘இத⁴, மஹானாம, உபாஸகோ பஞ்ஞவா ஹோதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய ஸம்மா து³க்க²க்க²யகா³மினியா – எத்தாவதா கோ², மஹானாம, உபாஸகோ பஞ்ஞாஸம்பன்னோ ஹோதீ’’தி. ஸத்தமங்.
‘‘Kittāvatā pana, bhante, upāsako paññāsampanno hotī’’ti? ‘‘Idha, mahānāma, upāsako paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā – ettāvatā kho, mahānāma, upāsako paññāsampanno hotī’’ti. Sattamaṃ.
