| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. மஹானாமஸுத்தவண்ணனா
10. Mahānāmasuttavaṇṇanā
10. த³ஸமே மஹானாமோதி த³ஸப³லஸ்ஸ சூளபிது புத்தோ ஏகோ ஸக்யராஜா. யேன ப⁴க³வா தேனுபஸங்கமீதி பு⁴த்தபாதராஸோ ஹுத்வா தா³ஸபரிஜனபரிவுதோ க³ந்த⁴மாலாதீ³னி கா³ஹாபெத்வா யத்த² ஸத்தா², தத்த² அக³மாஸி. அரியப²லங் அஸ்ஸ ஆக³தந்தி ஆக³தப²லோ. ஸிக்கா²த்தயஸாஸனங் ஏதேன விஞ்ஞாதந்தி விஞ்ஞாதஸாஸனோ. இதி அயங் ராஜா ‘‘ஸோதாபன்னஸ்ஸ நிஸ்ஸயவிஹாரங் புச்சா²மீ’’தி புச்ச²ந்தோ ஏவமாஹ.
10. Dasame mahānāmoti dasabalassa cūḷapitu putto eko sakyarājā. Yenabhagavā tenupasaṅkamīti bhuttapātarāso hutvā dāsaparijanaparivuto gandhamālādīni gāhāpetvā yattha satthā, tattha agamāsi. Ariyaphalaṃ assa āgatanti āgataphalo. Sikkhāttayasāsanaṃ etena viññātanti viññātasāsano. Iti ayaṃ rājā ‘‘sotāpannassa nissayavihāraṃ pucchāmī’’ti pucchanto evamāha.
நேவஸ்ஸ ராக³பரியுட்டி²தந்தி ந உப்பஜ்ஜமானேன ராகே³ன உட்ட²ஹித்வா க³ஹிதங். உஜுக³தந்தி பு³த்³தா⁴னுஸ்ஸதிகம்மட்டா²னே உஜுகமேவ க³தங். ததா²க³தங் ஆரப்³பா⁴தி ததா²க³தகு³ணே ஆரப்³ப⁴. அத்த²வேத³ந்தி அட்ட²கத²ங் நிஸ்ஸாய உப்பன்னங் பீதிபாமோஜ்ஜங். த⁴ம்மவேத³ந்தி பாளிங் நிஸ்ஸாய உப்பன்னங் பீதிபாமோஜ்ஜங். த⁴ம்மூபஸஞ்ஹிதந்தி பாளிஞ்ச அட்ட²கத²ஞ்ச நிஸ்ஸாய உப்பன்னங். பமுதி³தஸ்ஸாதி து³விதே⁴ன பாமோஜ்ஜேன பமுதி³தஸ்ஸ. பீதி ஜாயதீதி பஞ்சவிதா⁴ பீதி நிப்³ப³த்ததி. காயோ பஸ்ஸம்ப⁴தீதி நாமகாயோ ச கரஜகாயோ ச த³ரத²படிப்பஸ்ஸத்³தி⁴யா படிப்பஸ்ஸம்ப⁴தி. ஸுக²ந்தி காயிகசேதஸிகஸுக²ங். ஸமாதி⁴யதீதி ஆரம்மணே ஸம்மா ட²பிதங் ஹோதி. விஸமக³தாய பஜாயாதி ராக³தோ³ஸமோஹவிஸமக³தேஸு ஸத்தேஸு. ஸமப்பத்தோதி ஸமங் உபஸமங் பத்தோ ஹுத்வா. ஸப்³யாபஜ்ஜா²யாதி ஸது³க்கா²ய. த⁴ம்மஸோதங் ஸமாபன்னோதி விபஸ்ஸனாஸங்கா²தங் த⁴ம்மஸோதங் ஸமாபன்னோ. பு³த்³தா⁴னுஸ்ஸதிங் பா⁴வேதீதி பு³த்³தா⁴னுஸ்ஸதிகம்மட்டா²னங் ப்³ரூஹேதி வட்³டே⁴தி. இமினா நயேன ஸப்³ப³த்த² அத்தோ² வேதி³தப்³போ³. இதி மஹானாமோ ஸோதாபன்னஸ்ஸ நிஸ்ஸயவிஹாரங் புச்சி². ஸத்தா²பிஸ்ஸ தமேவ கதே²ஸி. ஏவங் இமஸ்மிங் ஸுத்தே ஸோதாபன்னோவ கதி²தோதி.
Nevassa rāgapariyuṭṭhitanti na uppajjamānena rāgena uṭṭhahitvā gahitaṃ. Ujugatanti buddhānussatikammaṭṭhāne ujukameva gataṃ. Tathāgataṃ ārabbhāti tathāgataguṇe ārabbha. Atthavedanti aṭṭhakathaṃ nissāya uppannaṃ pītipāmojjaṃ. Dhammavedanti pāḷiṃ nissāya uppannaṃ pītipāmojjaṃ. Dhammūpasañhitanti pāḷiñca aṭṭhakathañca nissāya uppannaṃ. Pamuditassāti duvidhena pāmojjena pamuditassa. Pīti jāyatīti pañcavidhā pīti nibbattati. Kāyo passambhatīti nāmakāyo ca karajakāyo ca darathapaṭippassaddhiyā paṭippassambhati. Sukhanti kāyikacetasikasukhaṃ. Samādhiyatīti ārammaṇe sammā ṭhapitaṃ hoti. Visamagatāya pajāyāti rāgadosamohavisamagatesu sattesu. Samappattoti samaṃ upasamaṃ patto hutvā. Sabyāpajjhāyāti sadukkhāya. Dhammasotaṃsamāpannoti vipassanāsaṅkhātaṃ dhammasotaṃ samāpanno. Buddhānussatiṃ bhāvetīti buddhānussatikammaṭṭhānaṃ brūheti vaḍḍheti. Iminā nayena sabbattha attho veditabbo. Iti mahānāmo sotāpannassa nissayavihāraṃ pucchi. Satthāpissa tameva kathesi. Evaṃ imasmiṃ sutte sotāpannova kathitoti.
ஆஹுனெய்யவக்³கோ³ பட²மோ.
Āhuneyyavaggo paṭhamo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. மஹானாமஸுத்தங் • 10. Mahānāmasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. மஹானாமஸுத்தவண்ணனா • 10. Mahānāmasuttavaṇṇanā
