| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. மஹானாமஸுத்தவண்ணனா
10. Mahānāmasuttavaṇṇanā
10. த³ஸமே தஸ்மிங் ஸமயேதி பு³த்³தா⁴கு³ணானுஸ்ஸரணஸமயே. ராக³பரியுட்டி²தந்தி ராகே³ன பரியுட்டி²தங். பரியுட்டா²னப்பத்திபி, ராகே³ன வா ஸங்ஹிதங் சித்தங் அரஞ்ஞமிவ சோரேஹி தேன பரியுட்டி²தந்தி வுத்தங், தஸ்ஸ பரியுட்டா²னட்டா²னபா⁴வதோபி பரியுட்டி²தராக³ந்தி அத்தோ². ப்³யஞ்ஜனங் பன அனாதி³யித்வா அத்த²மத்தங் த³ஸ்ஸெந்தோ ‘‘உப்பஜ்ஜமானேன ராகே³ன உட்ட²ஹித்வா க³ஹித’’ந்தி ஆஹ. உஜுகமேவாதி பகே³வ காயவங்காதீ³னங் அபனீதத்தா சித்தஸ்ஸ ச அனுஜுபா⁴வகரானங் மானாதீ³னங் அபா⁴வதோ, ராகா³தி³பரியுட்டா²னாபா⁴வேன வா ஓணதிஉண்ணதிவிரஹதோ உஜுபா⁴வமேவ க³தங். அத² வா உஜுகமேவாதி கம்மட்டா²னஸ்ஸ தி²னங் மித்³த⁴ங் ஓதிண்ணதாய லீனுத்³த⁴ச்சவிக³மதோ மஜ்ஜி²மஸமத²னிமித்தப்படிபத்தியா உஜுபா⁴வமேவ க³தங். அட்ட²கத²ங் நிஸ்ஸாயாதி ப⁴வஜாதிஆதீ³னங் பதா³னங் அத்த²ங் நிஸ்ஸாய. அத்த²வேத³ந்தி வா ஹேதுப²லங் படிச்ச உப்பன்னங் துட்டி²மாஹ. த⁴ம்மவேத³ந்தி ஹேதுங் படிச்ச உப்பன்னங் துட்டி²ங். ‘‘ஆரகத்தா அரஹ’’ந்தி அனுஸ்ஸரந்தஸ்ஸ ஹி யதி³த³ங் ப⁴க³வதோ கிலேஸேஹி ஆரகத்தங், ஸோ ஹேது. ஞாபகோ செத்த² ஹேது அதி⁴ப்பேதோ, ந காரகோ ஸம்பாபகோ. ததோனேன ஞாயமானோ அரஹத்தத்தோ² ப²லங். இமினா நயேன ஸேஸபதே³ஸுபி ஹேதுஸோ ப²லவிபாகோ வேதி³தப்³போ³. த⁴ம்மானுஸ்ஸதிஆதீ³ஸுபி ஹி ஆதி³மஜ்ஜ²பரியோஸானகல்யாணதாத³யோ ஸுப்படிபத்திஆத³யோ ச தத்த² தத்த² ஹேதுபா⁴வேன நித்³தி³ட்டா²யேவ. த⁴ம்மூபஸங்ஹிதந்தி யதா²வுத்தஹேதுப²லஸங்கா²தகு³ணூபஸங்ஹிதங்.
10. Dasame tasmiṃ samayeti buddhāguṇānussaraṇasamaye. Rāgapariyuṭṭhitanti rāgena pariyuṭṭhitaṃ. Pariyuṭṭhānappattipi, rāgena vā saṃhitaṃ cittaṃ araññamiva corehi tena pariyuṭṭhitanti vuttaṃ, tassa pariyuṭṭhānaṭṭhānabhāvatopi pariyuṭṭhitarāganti attho. Byañjanaṃ pana anādiyitvā atthamattaṃ dassento ‘‘uppajjamānena rāgena uṭṭhahitvā gahita’’nti āha. Ujukamevāti pageva kāyavaṅkādīnaṃ apanītattā cittassa ca anujubhāvakarānaṃ mānādīnaṃ abhāvato, rāgādipariyuṭṭhānābhāvena vā oṇatiuṇṇativirahato ujubhāvameva gataṃ. Atha vā ujukamevāti kammaṭṭhānassa thinaṃ middhaṃ otiṇṇatāya līnuddhaccavigamato majjhimasamathanimittappaṭipattiyā ujubhāvameva gataṃ. Aṭṭhakathaṃ nissāyāti bhavajātiādīnaṃ padānaṃ atthaṃ nissāya. Atthavedanti vā hetuphalaṃ paṭicca uppannaṃ tuṭṭhimāha. Dhammavedanti hetuṃ paṭicca uppannaṃ tuṭṭhiṃ. ‘‘Ārakattā araha’’nti anussarantassa hi yadidaṃ bhagavato kilesehi ārakattaṃ, so hetu. Ñāpako cettha hetu adhippeto, na kārako sampāpako. Tatonena ñāyamāno arahattattho phalaṃ. Iminā nayena sesapadesupi hetuso phalavipāko veditabbo. Dhammānussatiādīsupi hi ādimajjhapariyosānakalyāṇatādayo suppaṭipattiādayo ca tattha tattha hetubhāvena niddiṭṭhāyeva. Dhammūpasaṃhitanti yathāvuttahetuphalasaṅkhātaguṇūpasaṃhitaṃ.
மஹானாமஸுத்தவண்ணனா நிட்டி²தா.
Mahānāmasuttavaṇṇanā niṭṭhitā.
ஆஹுனெய்யவக்³க³வண்ணனா நிட்டி²தா.
Āhuneyyavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. மஹானாமஸுத்தங் • 10. Mahānāmasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. மஹானாமஸுத்தவண்ணனா • 10. Mahānāmasuttavaṇṇanā
