| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
১০. মহানামসুত্তৰণ্ণনা
10. Mahānāmasuttavaṇṇanā
১০. দসমে মহানামোতি দসবলস্স চূল়পিতু পুত্তো একো সক্যরাজা। যেন ভগৰা তেনুপসঙ্কমীতি ভুত্তপাতরাসো হুত্ৰা দাসপরিজনপরিৰুতো গন্ধমালাদীনি গাহাপেত্ৰা যত্থ সত্থা, তত্থ অগমাসি। অরিযফলং অস্স আগতন্তি আগতফলো। সিক্খাত্তযসাসনং এতেন ৰিঞ্ঞাতন্তি ৰিঞ্ঞাতসাসনো। ইতি অযং রাজা ‘‘সোতাপন্নস্স নিস্সযৰিহারং পুচ্ছামী’’তি পুচ্ছন্তো এৰমাহ।
10. Dasame mahānāmoti dasabalassa cūḷapitu putto eko sakyarājā. Yenabhagavā tenupasaṅkamīti bhuttapātarāso hutvā dāsaparijanaparivuto gandhamālādīni gāhāpetvā yattha satthā, tattha agamāsi. Ariyaphalaṃ assa āgatanti āgataphalo. Sikkhāttayasāsanaṃ etena viññātanti viññātasāsano. Iti ayaṃ rājā ‘‘sotāpannassa nissayavihāraṃ pucchāmī’’ti pucchanto evamāha.
নেৰস্স রাগপরিযুট্ঠিতন্তি ন উপ্পজ্জমানেন রাগেন উট্ঠহিত্ৰা গহিতং। উজুগতন্তি বুদ্ধানুস্সতিকম্মট্ঠানে উজুকমেৰ গতং। তথাগতং আরব্ভাতি তথাগতগুণে আরব্ভ। অত্থৰেদন্তি অট্ঠকথং নিস্সায উপ্পন্নং পীতিপামোজ্জং। ধম্মৰেদন্তি পাল়িং নিস্সায উপ্পন্নং পীতিপামোজ্জং। ধম্মূপসঞ্হিতন্তি পাল়িঞ্চ অট্ঠকথঞ্চ নিস্সায উপ্পন্নং। পমুদিতস্সাতি দুৰিধেন পামোজ্জেন পমুদিতস্স। পীতি জাযতীতি পঞ্চৰিধা পীতি নিব্বত্ততি। কাযো পস্সম্ভতীতি নামকাযো চ করজকাযো চ দরথপটিপ্পস্সদ্ধিযা পটিপ্পস্সম্ভতি। সুখন্তি কাযিকচেতসিকসুখং। সমাধিযতীতি আরম্মণে সম্মা ঠপিতং হোতি। ৰিসমগতায পজাযাতি রাগদোসমোহৰিসমগতেসু সত্তেসু। সমপ্পত্তোতি সমং উপসমং পত্তো হুত্ৰা। সব্যাপজ্ঝাযাতি সদুক্খায। ধম্মসোতং সমাপন্নোতি ৰিপস্সনাসঙ্খাতং ধম্মসোতং সমাপন্নো। বুদ্ধানুস্সতিং ভাৰেতীতি বুদ্ধানুস্সতিকম্মট্ঠানং ব্রূহেতি ৰড্ঢেতি। ইমিনা নযেন সব্বত্থ অত্থো ৰেদিতব্বো। ইতি মহানামো সোতাপন্নস্স নিস্সযৰিহারং পুচ্ছি। সত্থাপিস্স তমেৰ কথেসি। এৰং ইমস্মিং সুত্তে সোতাপন্নোৰ কথিতোতি।
Nevassa rāgapariyuṭṭhitanti na uppajjamānena rāgena uṭṭhahitvā gahitaṃ. Ujugatanti buddhānussatikammaṭṭhāne ujukameva gataṃ. Tathāgataṃ ārabbhāti tathāgataguṇe ārabbha. Atthavedanti aṭṭhakathaṃ nissāya uppannaṃ pītipāmojjaṃ. Dhammavedanti pāḷiṃ nissāya uppannaṃ pītipāmojjaṃ. Dhammūpasañhitanti pāḷiñca aṭṭhakathañca nissāya uppannaṃ. Pamuditassāti duvidhena pāmojjena pamuditassa. Pīti jāyatīti pañcavidhā pīti nibbattati. Kāyo passambhatīti nāmakāyo ca karajakāyo ca darathapaṭippassaddhiyā paṭippassambhati. Sukhanti kāyikacetasikasukhaṃ. Samādhiyatīti ārammaṇe sammā ṭhapitaṃ hoti. Visamagatāya pajāyāti rāgadosamohavisamagatesu sattesu. Samappattoti samaṃ upasamaṃ patto hutvā. Sabyāpajjhāyāti sadukkhāya. Dhammasotaṃsamāpannoti vipassanāsaṅkhātaṃ dhammasotaṃ samāpanno. Buddhānussatiṃ bhāvetīti buddhānussatikammaṭṭhānaṃ brūheti vaḍḍheti. Iminā nayena sabbattha attho veditabbo. Iti mahānāmo sotāpannassa nissayavihāraṃ pucchi. Satthāpissa tameva kathesi. Evaṃ imasmiṃ sutte sotāpannova kathitoti.
আহুনেয্যৰগ্গো পঠমো।
Āhuneyyavaggo paṭhamo.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. মহানামসুত্তং • 10. Mahānāmasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১০. মহানামসুত্তৰণ্ণনা • 10. Mahānāmasuttavaṇṇanā
