| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๑๐. มหานามสุตฺตวณฺณนา
10. Mahānāmasuttavaṇṇanā
๑๐. ทสเม มหานาโมติ ทสพลสฺส จูฬปิตุ ปุโตฺต เอโก สกฺยราชาฯ เยน ภควา เตนุปสงฺกมีติ ภุตฺตปาตราโส หุตฺวา ทาสปริชนปริวุโต คนฺธมาลาทีนิ คาหาเปตฺวา ยตฺถ สตฺถา, ตตฺถ อคมาสิฯ อริยผลํ อสฺส อาคตนฺติ อาคตผโลฯ สิกฺขาตฺตยสาสนํ เอเตน วิญฺญาตนฺติ วิญฺญาตสาสโนฯ อิติ อยํ ราชา ‘‘โสตาปนฺนสฺส นิสฺสยวิหารํ ปุจฺฉามี’’ติ ปุจฺฉโนฺต เอวมาหฯ
10. Dasame mahānāmoti dasabalassa cūḷapitu putto eko sakyarājā. Yenabhagavā tenupasaṅkamīti bhuttapātarāso hutvā dāsaparijanaparivuto gandhamālādīni gāhāpetvā yattha satthā, tattha agamāsi. Ariyaphalaṃ assa āgatanti āgataphalo. Sikkhāttayasāsanaṃ etena viññātanti viññātasāsano. Iti ayaṃ rājā ‘‘sotāpannassa nissayavihāraṃ pucchāmī’’ti pucchanto evamāha.
เนวสฺส ราคปริยุฎฺฐิตนฺติ น อุปฺปชฺชมาเนน ราเคน อุฎฺฐหิตฺวา คหิตํฯ อุชุคตนฺติ พุทฺธานุสฺสติกมฺมฎฺฐาเน อุชุกเมว คตํฯ ตถาคตํ อารพฺภาติ ตถาคตคุเณ อารพฺภฯ อตฺถเวทนฺติ อฎฺฐกถํ นิสฺสาย อุปฺปนฺนํ ปีติปาโมชฺชํฯ ธมฺมเวทนฺติ ปาฬิํ นิสฺสาย อุปฺปนฺนํ ปีติปาโมชฺชํฯ ธมฺมูปสญฺหิตนฺติ ปาฬิญฺจ อฎฺฐกถญฺจ นิสฺสาย อุปฺปนฺนํฯ ปมุทิตสฺสาติ ทุวิเธน ปาโมเชฺชน ปมุทิตสฺสฯ ปีติ ชายตีติ ปญฺจวิธา ปีติ นิพฺพตฺตติฯ กาโย ปสฺสมฺภตีติ นามกาโย จ กรชกาโย จ ทรถปฎิปฺปสฺสทฺธิยา ปฎิปฺปสฺสมฺภติฯ สุขนฺติ กายิกเจตสิกสุขํฯ สมาธิยตีติ อารมฺมเณ สมฺมา ฐปิตํ โหติฯ วิสมคตาย ปชายาติ ราคโทสโมหวิสมคเตสุ สเตฺตสุฯ สมปฺปโตฺตติ สมํ อุปสมํ ปโตฺต หุตฺวาฯ สพฺยาปชฺฌายาติ สทุกฺขายฯ ธมฺมโสตํ สมาปโนฺนติ วิปสฺสนาสงฺขาตํ ธมฺมโสตํ สมาปโนฺนฯ พุทฺธานุสฺสติํ ภาเวตีติ พุทฺธานุสฺสติกมฺมฎฺฐานํ พฺรูเหติ วเฑฺฒติฯ อิมินา นเยน สพฺพตฺถ อโตฺถ เวทิตโพฺพฯ อิติ มหานาโม โสตาปนฺนสฺส นิสฺสยวิหารํ ปุจฺฉิฯ สตฺถาปิสฺส ตเมว กเถสิฯ เอวํ อิมสฺมิํ สุเตฺต โสตาปโนฺนว กถิโตติฯ
Nevassa rāgapariyuṭṭhitanti na uppajjamānena rāgena uṭṭhahitvā gahitaṃ. Ujugatanti buddhānussatikammaṭṭhāne ujukameva gataṃ. Tathāgataṃ ārabbhāti tathāgataguṇe ārabbha. Atthavedanti aṭṭhakathaṃ nissāya uppannaṃ pītipāmojjaṃ. Dhammavedanti pāḷiṃ nissāya uppannaṃ pītipāmojjaṃ. Dhammūpasañhitanti pāḷiñca aṭṭhakathañca nissāya uppannaṃ. Pamuditassāti duvidhena pāmojjena pamuditassa. Pīti jāyatīti pañcavidhā pīti nibbattati. Kāyo passambhatīti nāmakāyo ca karajakāyo ca darathapaṭippassaddhiyā paṭippassambhati. Sukhanti kāyikacetasikasukhaṃ. Samādhiyatīti ārammaṇe sammā ṭhapitaṃ hoti. Visamagatāya pajāyāti rāgadosamohavisamagatesu sattesu. Samappattoti samaṃ upasamaṃ patto hutvā. Sabyāpajjhāyāti sadukkhāya. Dhammasotaṃsamāpannoti vipassanāsaṅkhātaṃ dhammasotaṃ samāpanno. Buddhānussatiṃ bhāvetīti buddhānussatikammaṭṭhānaṃ brūheti vaḍḍheti. Iminā nayena sabbattha attho veditabbo. Iti mahānāmo sotāpannassa nissayavihāraṃ pucchi. Satthāpissa tameva kathesi. Evaṃ imasmiṃ sutte sotāpannova kathitoti.
อาหุเนยฺยวโคฺค ปฐโมฯ
Āhuneyyavaggo paṭhamo.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๑๐. มหานามสุตฺตํ • 10. Mahānāmasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๑๐. มหานามสุตฺตวณฺณนา • 10. Mahānāmasuttavaṇṇanā
