| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
១០. មហានាមសុត្តវណ្ណនា
10. Mahānāmasuttavaṇṇanā
១០. ទសមេ មហានាមោតិ ទសពលស្ស ចូឡបិតុ បុត្តោ ឯកោ សក្យរាជា។ យេន ភគវា តេនុបសង្កមីតិ ភុត្តបាតរាសោ ហុត្វា ទាសបរិជនបរិវុតោ គន្ធមាលាទីនិ គាហាបេត្វា យត្ថ សត្ថា, តត្ថ អគមាសិ។ អរិយផលំ អស្ស អាគតន្តិ អាគតផលោ។ សិក្ខាត្តយសាសនំ ឯតេន វិញ្ញាតន្តិ វិញ្ញាតសាសនោ។ ឥតិ អយំ រាជា ‘‘សោតាបន្នស្ស និស្សយវិហារំ បុច្ឆាមី’’តិ បុច្ឆន្តោ ឯវមាហ។
10. Dasame mahānāmoti dasabalassa cūḷapitu putto eko sakyarājā. Yenabhagavā tenupasaṅkamīti bhuttapātarāso hutvā dāsaparijanaparivuto gandhamālādīni gāhāpetvā yattha satthā, tattha agamāsi. Ariyaphalaṃ assa āgatanti āgataphalo. Sikkhāttayasāsanaṃ etena viññātanti viññātasāsano. Iti ayaṃ rājā ‘‘sotāpannassa nissayavihāraṃ pucchāmī’’ti pucchanto evamāha.
នេវស្ស រាគបរិយុដ្ឋិតន្តិ ន ឧប្បជ្ជមានេន រាគេន ឧដ្ឋហិត្វា គហិតំ។ ឧជុគតន្តិ ពុទ្ធានុស្សតិកម្មដ្ឋានេ ឧជុកមេវ គតំ។ តថាគតំ អារព្ភាតិ តថាគតគុណេ អារព្ភ។ អត្ថវេទន្តិ អដ្ឋកថំ និស្សាយ ឧប្បន្នំ បីតិបាមោជ្ជំ។ ធម្មវេទន្តិ បាឡិំ និស្សាយ ឧប្បន្នំ បីតិបាមោជ្ជំ។ ធម្មូបសញ្ហិតន្តិ បាឡិញ្ច អដ្ឋកថញ្ច និស្សាយ ឧប្បន្នំ។ បមុទិតស្សាតិ ទុវិធេន បាមោជ្ជេន បមុទិតស្ស។ បីតិ ជាយតីតិ បញ្ចវិធា បីតិ និព្ពត្តតិ។ កាយោ បស្សម្ភតីតិ នាមកាយោ ច ករជកាយោ ច ទរថបដិប្បស្សទ្ធិយា បដិប្បស្សម្ភតិ។ សុខន្តិ កាយិកចេតសិកសុខំ។ សមាធិយតីតិ អារម្មណេ សម្មា ឋបិតំ ហោតិ។ វិសមគតាយ បជាយាតិ រាគទោសមោហវិសមគតេសុ សត្តេសុ។ សមប្បត្តោតិ សមំ ឧបសមំ បត្តោ ហុត្វា។ សព្យាបជ្ឈាយាតិ សទុក្ខាយ។ ធម្មសោតំ សមាបន្នោតិ វិបស្សនាសង្ខាតំ ធម្មសោតំ សមាបន្នោ។ ពុទ្ធានុស្សតិំ ភាវេតីតិ ពុទ្ធានុស្សតិកម្មដ្ឋានំ ព្រូហេតិ វឌ្ឍេតិ។ ឥមិនា នយេន សព្ពត្ថ អត្ថោ វេទិតព្ពោ។ ឥតិ មហានាមោ សោតាបន្នស្ស និស្សយវិហារំ បុច្ឆិ។ សត្ថាបិស្ស តមេវ កថេសិ។ ឯវំ ឥមស្មិំ សុត្តេ សោតាបន្នោវ កថិតោតិ។
Nevassa rāgapariyuṭṭhitanti na uppajjamānena rāgena uṭṭhahitvā gahitaṃ. Ujugatanti buddhānussatikammaṭṭhāne ujukameva gataṃ. Tathāgataṃ ārabbhāti tathāgataguṇe ārabbha. Atthavedanti aṭṭhakathaṃ nissāya uppannaṃ pītipāmojjaṃ. Dhammavedanti pāḷiṃ nissāya uppannaṃ pītipāmojjaṃ. Dhammūpasañhitanti pāḷiñca aṭṭhakathañca nissāya uppannaṃ. Pamuditassāti duvidhena pāmojjena pamuditassa. Pīti jāyatīti pañcavidhā pīti nibbattati. Kāyo passambhatīti nāmakāyo ca karajakāyo ca darathapaṭippassaddhiyā paṭippassambhati. Sukhanti kāyikacetasikasukhaṃ. Samādhiyatīti ārammaṇe sammā ṭhapitaṃ hoti. Visamagatāya pajāyāti rāgadosamohavisamagatesu sattesu. Samappattoti samaṃ upasamaṃ patto hutvā. Sabyāpajjhāyāti sadukkhāya. Dhammasotaṃsamāpannoti vipassanāsaṅkhātaṃ dhammasotaṃ samāpanno. Buddhānussatiṃ bhāvetīti buddhānussatikammaṭṭhānaṃ brūheti vaḍḍheti. Iminā nayena sabbattha attho veditabbo. Iti mahānāmo sotāpannassa nissayavihāraṃ pucchi. Satthāpissa tameva kathesi. Evaṃ imasmiṃ sutte sotāpannova kathitoti.
អាហុនេយ្យវគ្គោ បឋមោ។
Āhuneyyavaggo paṭhamo.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១០. មហានាមសុត្តំ • 10. Mahānāmasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១០. មហានាមសុត្តវណ្ណនា • 10. Mahānāmasuttavaṇṇanā
